شبكة همس الشوق - عرض مشاركة واحدة - ليه عمري مالقى لبرده دفى الا دفاكي للكاتبه ذكرى نجديه

30 - 12 - 2014, 02:59 PM

............................... موجوده في بيت نوال و كانت لطيفه موجوده
..المهم انك خلصتي من هالزواج
لطيفه ..لانه من بدايته غلط واكيد كان راح ينتهي
هدى ..لو مااقتنعوا اهلي انه مايصلح كنت للحين اتعذب معه
لطيفه ..وش الي خلاهم يغيرون رايهم فيه بعد ماجبروك عليه
هدى ..كنت حامل بشهرين ضربني لين نزل وصار معي نزيف لولا ستر الله كان رحت فيها
نوال ..الحمدلله انك ماانربطتي بطفل منه وصرتي طول عمرك تحت رحمته وما تقدرين تعيشين حياتك
لطيفه ..حياتك اللحين تبتدي
هدى..بس زوجته حلوه
نوال ..الجمال ماهو كل شي الحياه بدون حب صدقيني بلا معنى
هدى ..غريبه يالطيفه سمعت ان زوجة ناصر قريبك واختها خطيبة اخوك
لطيفه ..صح قريبتي بس انا مع الحق ويكون بعلمك انا منعت زواجها من نايف واستغفلني والعبت عل نواف وزوجته اختها لانه صغير وبسهوله ينلعب عليه
هدى..يعني كانت تحب نايف
لطيفه ..كانت تموت فيه
مؤامره تحاك للشر غيتها نوف ووسيلتها هدى ومبررها الشر

لبيه ثم لبيه لبيه واهلين
ياعز وجهين وثمرها سنيني
واعز واغلا ما تحلت به العين
واجل وابرك من اجيه ويجيني

اليوم الثاني
الساعه 12باليل ام ناصر بالمجلس تنتظر على احر من الجمر صار الوقت يمشي ببطئ تدور بالبيت الي افتقد الشمعه الي تضيه من اكثر اسبوع قامت من المجلس الصغير للصاله الكبيره الي تعتبر واجهة البيت دارت وجلست ورجعت وقامت كانت ناويه تقضي بعض الوقت في المجلس لكن هي دارت واسمعت على طول صوت الباب تسكر دخل عليها يحمل كل الشوق لها
ام ناصر ..هلا هلا بنور الرياض كلها
مشى لها بسرعه وحها ويدها ..هلابك يالغاليه
ام ناصر ..الحمدلله على سلامتك ياوليدي وابرقت عينها بدمعه دفعها الفرح
ناصر ..الله يسلمك يمه اشتقتلك يام ناصر
ام ناصر.. تشتاق لك العافيه يانظر عيني
في كل حركه تصدر من ام زوجها كانت تزيد شوقها لامها سبحان الله هذا الود الذي لايشوبه حقد هذا الحب العاري من المصالح هذه المشهد الخالي من التمثيل هذه المحبه التي لاتنتظر مقابل
وينك يمه تحسسيني هالاحساس تدفيني من برد الحرمان ومن جوع الحنان احسدك ياناصر على هاللحظه الي انحرمت منها وامي حيه امي الي كانت منبع للحنان الحين صار غيابي مثل حضوري حست بالدموع تتدافع على محجرها
ام ناصر ..حيالله راعية البيت
نوف بخجل ..الله يحييك ياخاله
ام ناصر ..نورتو بيتكم
نوف ..النور نوركم
ناصر بلهفه ..وين ابو ناصر؟؟
ام ناصر ..راح يريح بغرفته وقال قوميني اذا وصلوا
ناصر ..لايمه خليه يرتاح
..ومن قالك اني اقدر ارتاح وانا حاس انك قريب
ناصر ..حي هالصوت والله>>> وراح يسلم عليه
كان سلام حار يعبر عن مدى الشوق والمحبه
جلسوا يسولفون عن العرس وعن السفر وعن امور كثير حتى تعبوا وتفرقوا لغرفهم
.................................

في شقة نايف
..انت خلاص صرت رجل اعمال ولك شغلك والوظيفه ماعاد تهمك
..الحمدلله بس تو الوقت على ترك الوظيفه انا مانكر اني من خلال شغلي اكتسبت الخبره وحطيت رجلي على الطريق الصحيح
.. الله يوفقك
دخل عليهم نواف وبيده صينية الشاي
خالد ..ياويلك لو يطلع الشاي مافيه سكر او مزود السكر
نواف باستهزاء ..وش بتسوي يعني ؟؟
خالد ..بكبه فوق راسك واحرقك فيه
نايف ...هههههههههههه لاتكفى وراه عرس
نواف..ايه بعدين مايصير عرس بدون معرس
خالد بعد ماشرب من الشاي..احلى ابو الشباب صاير يظبط الشاي
نواف ..اعجبك لا وازيدك من الشعر بيت صرت اعرف اقلي بيض
خالد ..لللللاه عقبال الكبسه
نايف ..خلاص لازم يتعلم يطبخ
خالد وهويقوم..زين يالله تصبحون على خير
نايف ..وين تو الوقت بدري
خالد ..بدري من عمرك وراي بيت وعيله وبعدين ولدي ماشفته اليوم
نواف ..وينك عن ولدك يالهايت ؟؟
خالد ..اسمع من يتكلم صاير مصلح انا مااهمل ولدي طلعت وهو نايم ولاشفته
نواف ..انتبه لولدك الله يصلحك
نايف ..ياخي اترك الرجال بحاله
خالد ..بنشوف وش بتسوي اذا جاك ولد
نواف وهو يناظر لاخوه ..بخليه لعمه يربيه على طريقته
نايف ..ليه قايلين لك مربيه لولدك
خالد...خل يجي الولد اول بعدين تفاهاموا يالله تصبحون على خير
نايف ونواف ..وانت بخير

مهما غيابة يخنق الصوت فيني تبقى رياح الليل تخلق بي الصوت
دخلت الجناح الي يمتاز بالفخامه والذوق الرفيع بلونه الزيتي والذهبي والاثاث الرائع والستاير الفخمه المتدليه على الجدران المنقوشه باتقان والاكسورات المتفرقه بكل مكان مشت بالجناح بخطوات ثابته
هنا يانوف تبدين حياه جديده وتعيشين ايام مختلفه راح تنتسين الحياه البسيطه الي تعودتي عليها في بيت ابوسلمان العش الصغير الدافي نعم صغير لكن كنت احس بالحريه وانتقلتي لقفص ذهبي نعم ذهبي لكن له باب يتسكر علي
دخل وراها ..ادخلي بدلي وارتاحي
التفت له ..ان شالله
سوت مثل ماقال تسبحت ودخلت سريرها لعلها تنام

.................................................. .

امانتك../ لا جيــــــــــت صافح كفوفي ..!

...............امانتك ../ محـــــــــــــــتاج الامس كفوفك..!

ساره بغرفتها تحاول تكلم نوف لكن ماردت
حطت الجوال على التسريحه الصغيره
دق جوالها
ساره ..الو
نواف ..مسا الخير لاحلى سارونه
ساره ..مساء النور
نواف ..خفت تكونين نايمه
ساره ..لا كنت احاول اكلم العله نوف بس ماترد
نواف ..البنت جايه من سفر وتعبانه خليها ترتاح وبكره تجيكم
ساره ..بس ابي اسمع صوتها
نواف ..ماتلاحظين انها صارت تاخذ كثير من كلامنا
ساره ..آسفه ماكنت ابي اضايقك
نواف ..انا اتضايق منك بس لاتخليني اغار من نوف
ساره ..ههههههههه لاوش دعوه
نواف ..تسلملي الضحكه وراعيتها
ساره ..........
نواف ..ليش سكتي
ساره ..وش تبي اقول؟؟
نواف ..قولي أي شي
ساره ..ماعندي شي اقوله
نواف ..تدرين انا بنسكن ببيت نايف لين ابني الاراض
ساره هالاسم يوترها ويغيظها ..للللاه زين والله تنازل وسلفك بيته
نواف ..وش تقصدين ؟؟
ساره ..لا ماقصد شي بس انت ليه ماتستاجر وتخلي بيته
نواف ..هو اصر وانا ماحب اكسر كلمته
ظل فتره يكلمها عن البيت والاثاث والزواج حوالي ساعه
الى الان ماقدرت تحكم على مشاعرها تجاه نواف بس هوعارف ومتاكد انه يحبها

ليه خانتني ظروووفي يوم كااان الوقت صااافي ! ؟ ليه حطمني زماااني !؟ ليه ماللحظ ذمّه ! ؟

اليوم الثاني قبل المغرب
كان واقف على المرايه ويضبط شماغه سمع صوت جوال نوف الي على التسريحه
رفع الجوال>>> تؤام روحي يتصل بك
وقف عند باب غرفة الملابس ..جوالك يدق
طلعت واخذت الجوال من يده ورفضت المكالمه ونزلت الجوال على السرير
استغرب منها ولاعلق ياترى من هو تؤام روحك يانوف ورجعت تكمل لبسها سمع صوت الجوال مره ثانيه
كان ماسك علبة العطر ويتعطر نزل العطر واستدار له مره ثانيه
>>>غلاي يتصل بك شاف الاسم ونزله طلعت على الصوت حطته صامت صورتها بالمرايه وراه وش فيها ذي ماتبي تكلم احد يمكن لاني موجود
انتبه انها جهزت ..خلصتي
..خلصت
..يالله
اخذت جوالها ورمته بالشنطه بسرعه وقلبها يسبق خطوتها
نزل وهي تتبعه وامه وابوه جالسين بالصاله
..يالله تامرون على شي
..سلامتك يمه
..توصيني على شي ياخاله
..سلامتك بس لاتنسين تقولين لاهلك على العشا بكره
..ان شالله مع سلامه
..مع السلامه
...........................................
هدى ..دريتي نوف رجعت البارح
نوال ..متاكده
هدى ..ايه خالتي كلمت امي وقالت لها
نوال باستهزاء ..حياهم الله مابغو يشرفون
هدى..هههههههه بكره عندهم عزيمه راح ابدا شغلي معها
.................................................. ..

في بيت ابوسلمان حاقدين عليها لانها ماترد على اتصالاتهم
ساره ..هالخايسه نويفه ماترد علي وتعطيني بزي
ابو سلمان ..اهم شي تطمنا عليها انها وصلت بالسلامه
ساره ..الله لايسلمها اتصل من جوالي ومن جوال سلمان ولاترد واتصلت على تلفون البيت قلت لخالتها تقول لها ترد وهي حاقرتنا الشرهه علي انا الي معبرتها ومعطيتها وجه لكن ماهي كفو اوريها بس اشوفها هالحيوانه ولازالت تسب وتلعن ولابقى كلمه في قاموس الشتائم ماقالتها وابوها واخوها يتفرجون عليها سمعوا صوت الجرس
ساره ..سلمان قوم بسرعه افتح الباب يمكن الهبله اختك
قام متوجه للباب الداخل ..ههههههههههههه انتي وش فيك حاطه عليها
ساره ..اقول بس ورنا عرض مقفاك وروح افتح الباب
فتح الباب شافها وعرفها من ورى الغطا ..هلا والله
دخلت لبداية الحوش حظنت اخوها ..سلمان اشتقتلك
سلمان ..تشتاق لك العافيه
نوف ..وشلونكم وشلون امي وابوي ونوره وساره
سلمان ..كلهم بخير ادخلي شوفيهم وبعدي عن طريق الرجال خليه يدخل
التفت نوف وابعدت عنه كان مبتسم وينتظرها تعتق اخوها من ايديها واسئلتها
دخلت لداخل البيت وناصر طبعا دخل للمجلس مع سلمان
في الصاله دخلت نوف عليهم
بمجرد مادخلت طمرت ساره لها ماتدري كيف وصلت عندها واخذتها بالاحظان
ابو سلمان ...ههههههههههههههههه هذي الي تبي تذبح وتقطع وش غير كلامك
وجهت نظرها لابوها وقربت له وسلمت عليها
بعدها طلع ابوسلمان يسلم على ناصر الي طلع على انه يرجع بالليل ياخذ نوف
.................................................. ..........

نايف ..الاسبوع الجاي بسافر
نواف ..وين ؟؟
نايف ..لجده زياره وسياحه
نواف ..تدري يانايف ودي ابوي ينتقل للرياض
نايف ..ليش ؟؟
نواف ..صعبه نبقى بعيدين عنه وهو بعيد عنا
نايف ..هنا ابوي تربى بس شغله اجبره يبعد عنها بس صدقني رح يرجعه الحنين ويمكن العايله ترجع للرياض واحد واحد ويضطر ابوي يرجع
نواف ..وشلون
نايف ..اخوانك كلهم يتمنون يرجعون للرياض ويمكن بس يخلصون دراستهم يدورون وظايف بالرياض والبنات يتزوجن من الرياض وقتها ماراح يظل هناك
نواف ..ياليت نجتمع كلنا ويلتم شملنا مثل قبل لتوفى امي
نايف ..راح نظل نكلمه لين يقتنع يرجع
..................................................

عند نوف كانت في المجلس الصغير مع نوره وساره
ساره..نوره قومي صلحي لنا عصير
نوره ..اقول ضفي وجهك شغاله عندك قولي للشغاله
ساره..ماحب العصير الي تصلحه الشغاله
نوف ..هزي طولك انتي وصلحي الي تبين
قامت وهي واصله معها للاخر من نوره ..يعني كل شي لازام انا الي اسويه
نوره ..ساره حبيبتي لاتكثرين السكر ماحبه حلو مره
التفت لها شافتها تضحك هي ونوف.. تضحكون ياحيوانات
واخذت مخده من الكنب وركضت على نوره وهي ناويه على الشر نوره عرفت نيتها لمت نفسها على الكنب ورفعت رجولها عليه وحاولت تحمي نفسها من الضرب بيدها وصلتها وصارت تضربها ونوره تحاول تتحاشى الضرب وماهي قادره تمسك نفسها من الضحك ..انا تخدمين فيني ياحماره
ومازالت تضربها حتى حست بالي يسحبها من اذنها ..وش قاعده تسوين ؟؟ ابلعت ريقها عارفه انها ماراح تقدر عليه
..قاعده اربيها الي ماتربت
..ومن قالك ربيها عاجبتني كذا
رفعت يديها عن وجهها بعد ماحست ان الضرب وقف شافته ماسك اذن ساره ويتكلمون
ارتخت ملامحها ونزلت رجولها عن الكنب شعرها كان محيوس نتيجه المعركه
ساره ..اجل تقولي لاتكثرين السكر
سلمان ..خلاص سوي الي قالت لك
ساره ..من زينها ام كشه
انحرجت وانتبهت ان شعرها كان محيوس وصارت تحاول تزينه بيدها
نوف ..هههههههههه حسبي الله عليك احرجتيها
سلمان ..يالله اشوف سوي عصير وزينيه
مشت من عندهم وقبل تطلع من عند الباب ..مالت عليك انت وزوجتك
وقبل لاتطلع جتها شنطة نوف تدورطيرت شعرها
نوف ..سلوم كسرت اغراضي
سلمان ..آسف بس رفعت ضغطي هالدبه
نوف هاليوم الحلو عوضها عن الايام الكئيبه الي عاشتها بعيده عنهم ولكن انتهت سهرتها مع اهلها واتصل عليها ناصر تطلع
.................................................. ......................
ينتظرها بسيارته عند الباب اقبلت عليه وفتحت الباب وركبت جنبه
..السلام عليكم
..عليكم السلام>> وحرك سيارته بصمت
لاحظت انه وقف واضح انه كوفي شوب
..انزلي
نزلت معاه ودخلوا داخل كان المكان راقي واضائته خافته واجواه شاعريه جلسوا على وحده من الطاولات
..وش تحبين تشربين ؟؟
..اي شي
..يعني اطلب لك على ذوقي
هزت راسها
طلب لها وله كابتشينو وجلسوا ينتظرون الطلب
..حلو المكان
..يجنن >> حست برعشه من نظراته وطريقة كلامه
بدون مقدمات مد يده لها وحطها بين يديه كان يدها اصهرت من دفئ يده اول مره يعاملها كا شي له قيمه بحياته
لا هذا اليوم ماهو طبيعي
..نوف
رفعت عينها له ..نعم
تستناه يرد لكن سكت وهي تركته على راحته ترك يدها ورجع ركى ظهره على الكرسي كان فيه كلام كثير يحاول يقوله لها لكن خايف انه يتعلق فيها اوانه بالفعل بدت مشاعره تتحرك لها ويسمح لنفسه بالحب من جديد وهذا الي ماتوقع انه يصير تركها xxxxxه فيه وهو رحل مع افكاره
الله ياناصر كنت تدعي انك تقدر تحبها ويوم قلبك رف لها بتموته بتخنقه بحبل الماضي بتلفه على رقبتك ورقبتها لكن قطع عليهم صمتهم وصول طلبهم
جتها جراءه غريبه ..كنت تبي تسئل عن شي
انذهل من سؤالها يمكن طلعتى اشجع مني يانوف طلعت جبان خفت لاحبك ..كنت بسئلك عن الاتصالات الي جتك اليوم المغرب من من ؟؟
..اي اتصالات ؟؟
..غلاي وتؤام روحي
ابتسمت ابتسامه عذبه ..من تتوقع؟؟
هز كتفه ..مدري!!
..سلمان وساره!!
مافسرت سؤاله على انه شك فيها نوف ذكيه ومتاكده انه ماهو هذا سؤاله لكن مشتها له وماحبت تخرب هاللحظه
.................................................. ...
هدى تنتظر الشمس تطلع لعلها تشوف البنت الي اخذت مكانها وصارت تحت نظر ناصر وتتوعد بنفسها ماحد راح يحرمني منك مره ثانيه حتى نوف !!!!ولازام يرجع كل شي زي ماكان
ساره انهت يومها بمكالمه من نواف
نايف نام بعد سباحه طويله في بحر افكاره
نوره تعاني من تغيير سلمان
لطيفه مرض الحقد تمكن منها
..........................................

يوم عزيمة ابو ناصر
قبل المغرب ناصر بعد ماتغدى طلع لغرفته وجلس يقرا جريده ونوف كانت راح تبدا بالاستعداد
طرق على باب الغرفه
انتبه ناصر وسكر الجريده وقام
..هلا والله
..هلابك
..زارتنا البركه
..هههههه ساعتك ابرك
..تفضلي
دخلت ودخل وراها
..وين نوف
..نوف بالغرفه بغيتي شي يمه
..بغيت نوف
سمعت كلامهم ..سمي ياخاله
..سم الله عدوك بغيتك شوي
..آمري
..بغيتك بغرفتي شوي
.. حاضر
قامت ام ناصر ونوف تتبعها وناصر منذهل من امه
التفت امه ..وانت البس وانزل لابوك يمكن يحتاج شي
ناصر ..ان شالله يمه
في غرفة ام ناصر دخلت هي ونوف وراها لقت مره تتنتظرها
نوف ..من هذي ياخاله
ام ناصر ..هذي كوافيره
نوف ..كوافيره ليش جايبتها
ام ناصر ..حتى تزينك
نوف ..ماله داعي كنت انا ازين نفسي
ام ناصر ..لالا اليوم ابيك تكونين احلى وحده ابي الناس تقول ام ناصر عرفت تختار لولدها
نوف ..ههههههه يعني ماراح يقولون الااذا زينتني
ام ناصر ..انتي يابنيتي كامله والكمال لله بس انا ابيك تبهرينهم كلهم
طاعت نوف وسلمت نفسها للمره وبدت تزينها
.................................................. .....
..وش بتلبسين ؟؟
..لحد اللحين مدري
..قومي نختار لنا لبس ونزيين هالكشش لا نخرع الناس
..تكلمي عن نفسك انا اسم الله علي الزين كله
..اقول بس امشي انا مدري وشلون سلمان متحملك
..مثل ما نواف راح يتحمل
..نويره اقصري الشر
..انتي الي بديتي
..اقول بس يالله قدامي
...................................

كل شي جاهز بدايه من القهوه والحلويات والفطاير ونهايه بالعرسان ناصر قبل لاتخلص نوف لبس وطلع لابوه
نوف دخلت غرفتها تلبس جلابيتها الرائعه بالوانها الاروع كانت باللون الوردي والسماوي بطيقات فخمه ومكياج خيال شعرها بيرم كانت اكبر من الوصف
ام ناصر جاهزه وتستعد لاستقبال المعازيم
كان اول من وصل هدى وامها سلمت على خالتها
هدى ..انا بنزل عباتي واساعدك ياخاله
ام ناصر ماهي مرتاحه لوجود هدى ومع انها بنت اختها وتحبها بس ناصر اغلى عندها من أي احد ولاتحب احد ينكد عليه وعندها استعداد تخسر كل الناس علشان سعادة ناصر
ام ناصر ..تسلمين يابنيتي بس كل شي جاهز الشغالات خلصوا كل شي
هدى ..بروح اشوف وش سسووا
مصره انها تبرز نفسها اليوم

امتلى البيت بالمعازيم نوره وساره وصلوا وطلعوا لغرفة نوف

ساره ..الله غرفتك تجنن يانوف

نوره ..لااله الاالله ياختي انتي ماتعرفين تقولين ماشالله

ساره ..عيني بارده بعدين باحسد اختي

نوره ..مايحسد المال الا اصحابه

نوف ..اقول انتي وياها بلا كثر سوالف وش رايكم فيني

نوره ..قمر ماشالله

استغربت ساره من اسلوبها ..غريبه يانوف مااتوقع انك تهتمين لهالاشياء انتي دايما واثقه من نفسك واليوم بالذات لازام تكون ثقتك كبيره بنفسك
جلست على طرف السرير وابتسمت لكلامها ..انا نوف الي تعرفيني ولايمكن اتغير بس اليوم خالتي خلتني احس اني لازام اكون غير

جلست نوره جنبها ..وشلون يعني ؟؟

نوف ..مدري بس احسها تتحدى احد فيني وتبغى تكسب التحدي

ساره ..معقوله في احد من قرايبهم حاطه عينها على ناصر

نوف ..مدري بس انا اليوم ماراح افشلها وراح ارفع راسها

نوره ..وانتي قد التحدي

نوف ..مدري يانوره خايفه عالم جديد علي

ساره ..لاجديد ولا شي ليه وين كنتي عايشه بالباديه
يله بس انزلي خالتك تستناك تعرفك على اهل ناصر
نزلت نوف انشغالها بالمواجهه نساها ناصر وحياتها

تحت في الصاله
..وين نوف ياخاله؟؟

..الحين بتنزل وتشوفينها وتعرفين ان خالتك تعرف تختار

.. شفتها ياخاله شفتها البنت عاديه ولافيها شي يميزها

..فيها ياهدي فيها اخلاقها وتربيتها وادبها ماراح اقولك حلوه بس راح اقولك الجمال ماهو كل شي

..لاتستعجلين ياخاله وتحكمين عليها انتي ماعرفتيها الامن مده بسيطه
..وانتي بعد لاتحكمين عليها لانك ماتعرفينها خير شر

ومشت وخلتها ...

نزلت نوف للصاله وجلست وسط جموع النساء ابهرت الحاضرين بحسنها واعجب فيها كثير من الحاضرات
كانت زوجة عم ناصر تكلم ام ناصر

..ماشالله يام ناصر عروستكم تجنن

..وش رايك باختياري

..البنت ماشالله عليها حتى ان سئلت عن اختها وقالو انها مخطوبه كنت باخطبها لولدي بس ان شالله تقدر تنسيه
.............................................

كانت هدى تتحرك بالبيت باريحيه رايحه راجعه يمكن تحاول تبدد الحقد الي داخلها او تحاول تشوف ناصر او تضايق نوف بتصرفاتها لكن ماقدرت توصل واحد من اهدافها
ساره ..من هذي ماخذاه راحتها الي اعرفه ناصر ماله خوات
نوف ..عرفتني عليها خالتي تقول بنت اختها
ساره ..طيب ليش ماهي قادره تجلس
نوف ..ش عليك منها خليها بكيفها
ساره ..مادري ماخشت مزاجي ولا ارتحت لها
نوف ..لاحول ولاقوة الابالله وش فيك عليها
ساره ..البيت مليان بنات كلهم ادب ومحترمات بس هذي مدري ليش قلبي ماهو متطمن لها
.........
بعد العشا
نوف واقفه على المغسله تغسل
تبعتها هدى ليس صدفه ولكن متقصده تنفرد فيها
..مبروك يانوف
..الله يبارك بعمرك وعقبالك
..لا الحين خليني اخذ نفس بعد التجربه الفاشله الي طلعت منها
نوف بخجل من ردها ..آسفه ماكنت ادري الله يعوضك
..بيعوضني عن قريب ويلتم شملي مع الانسان الي حبيته
وراحت تمشي بغرور وصوت كعبها يرن على الرخام وكلماتها ترن بذهن نوف
غريب ردها كانت تقصد شي بالي قالته نظرتاها لي ماتطمن
كل يوم ساره تاكد لي انها تعرف تحكم على الناس من نظراتهم لكن وش وراى هالبنت ماطولت تفكر بكلامه
عدلت نفسها وراحت للصاله

ودعت ام ناصر المعازيم من ضمنهم اهل نوف
مابقى الاهدى وامها الي تعمدت تبقى لوقت متاخر
اتصل ناصر على امه اذا فيه احد موجود

ناصر ..يمه اذا مافيه احد انا بدخل ارتاح
ماحبت تقوله بس هدى موجوده وهي الي عارفه زين مخططاتها
بصوت واطي حتى ماينسمع ..اي يمه للحين في ناس بس زوجتك فوق اطلع من الباب الثاني
..خلاص انا طالع
كل الي قالت ام ناصر سمعته هدى وعرفت المقصد منه
لكن ماراح اتنازل عن الي في راسي
..انا بروح اشرب مويه وراجعه فيه احد ياخاله
..لاماقدامك احد خذي راحتك
ماخطر على ام ناصر انها انكشفت
راحت متوجه للمطبخ ومن غير ماتنتبه لها ام ناصر غير اتجاهها للباب الي راح يدخل منه ناصر هالبيت تعرفه شبر شبر حافظه كل ركن فيه اكثر من بيتها هذا البيت الي شهد على لقات الغرام بينها وبين ناصر انحرمت منه لاكثر من ثلاث سنين من انخطبت لولد عمها لكن مازالت تعرفه زين
عدلت نفسها ووقفت في الممر تستعد لتصنع صدفه تجمعها بناصر
نزلت نوف من الغرفه
ام ناصر ..وش منزلك
نوف ..اغراض بالغرفه باعطيها الشغالات يرمونها
ام ناصر ..كان ناديتيهم
نوف ..عادي ياخاله الشغالات مساكين لاهين بالتنظيف

دخل ناصر مايشوف الطريق من التعب شافها قدامه
معقوله نمت وانا امشي هذي هدى يالله وش كثر اشتقت لها من زمان عنها
بعد ماسمحت له يدقق بوجهها وحتى يعرفها اخذت طرف الشيله وغطت نص وجهها
كانت شوفته حلم تتمناه يتحقق مشتاقه غرقت عيونها بالدموع
واستدارت ناويه تترك له المكان
ناصر ..هدى
وقفت من غير ماتلتفت له
ناصر ..ناظري لي
التفت له وعيونها سارحه بملامحه الرجوليه وعيونه تتاملها بحزن
..شاخبارك ياهدى<<< تنهدت بالم
..اخباري ماتسر لاعدو ولاحبيب
..ليه هالحزن بعيونك ليش تعذبيني
..لاني اتعذب وحياتي صارت دمار بعدك
..بس انتي تزوجتي
..وانت ضعفت ماحاولت انا كنت اجاهد حتى انهي هالزواج وانت ماسويت غير انك انطويت على نفسك
..وش كنتي تبني اسوي اروح حبك من بيت زوجك واقول انااحبها
..انا البنت سويت وانت الرجال ماسويت شي يئست وتزوجت غيري
..انا تزوجت وانتي وش سويتي
بصوت باكي ..تطلقت
وقف ماهو مستوعب الي سمعه ..تطلقتي ؟؟
لكن كان يسئل طيفها تبخرت ومابقى الامكانها

في الصاله
دخلت نوف بسرعه تقصد الدرج
ام ناصر ..وش فيك يانوف ؟؟
نوف ..مافيني شي بس باطلع غرفتي <<وطلعت
ام ناصر..غريبه شكلها متضايقه
ام محمد ..يمكن تعبانه
دقايق معدوده ودخلت هدى وواضح انها كانت تبكي
ام ناصر قلبها نغزها وتوقعت ان بكى هدى له علاقه بضيق نوف والسالفه كلها مرتبطه بناصر وهذا الي تخاف منه

في بيت ابو سلمان

دخلت ساره ويتبعها سلمان ونوره
ساره وقبل تدخل غرفتها ..لاتقولين لي اسهري معاي تعبااااانه عندك هالمزيون اسهر معي للصبح وودخلت غرفتها وسكرت الباب
ضحكت نوره بنفسها على هبالها ودخلت ورى سلمان للغرفه
..بتنامين
..ايه تعبانه وفيني نوم ليش بغيت شي
..لا وش ابغي يعني نامي
يستفزها بطريقته ونظراته استدارت عنه وهي تحمل بقلبها الم ماتوقعته يتغير عليها فجئه التفت له ..انت ليش متغير على ؟؟
ماتخيل نوره تواجه ويئس انها تحس فيه لكن كالعاده مثل عدم المبالاه ..انا ماتغيرت هذا انا الي تعرفيني
..لا انت تغيرت على مانت سلمان الي عرفته وتزوجته
وقف وقرب لها ..لاتقولين عرفتيني لانك حطيتي جدار ثلج بيني وبينك ماحاولتي حتى تعرفيني <<<
نوت تطلع من المكان كله لكن استفزه برودها سحبها من يدها بعنف
..اذا كلمتك لاتمشين وتتركيني
..وش تبيني اقولك ؟؟؟
نفض يدها من يده ..تدرين انك بليده وعديمة احساس وتاكدي كنت كل يوم تخطر على بالي الف فكره تعز على نفسي ارتبط بوحده زيك وكل يوم افكر اريحك من هالزواج الي انجبرتي عليه بس ماهو حبكالسبب الوحيد الي خلاني اترجع فيه اسباب ثانيه غيره اولها فهد الي اعتبره اخوي ومابي اخسره ولانك بنت عمي ومارضى عليك الكلام واخرها واهمها ابوي الي وافقتي علي علشانه
بصوت مبحوح ومخنوق هزها الي سمعته كانت مثل الرصاص مهما تكون قسوتهماتوصل معه لهالدرجه ..انا ياسلمان انا بليده وعديمة احساس ..وبنظره غاضبه واثقه وصوت قوي ..انا بعد مارضى عليك تعيش مع وحده تشوفها ماتصلحلك لاتجبر نفسك ياولد عمي ولاتحملني عشان احد هذي حياتك وماحد بعيشها غيرك عيشها زي ماتبي انت سو الي تشوفه صح ووعد مني انا الي بشيل المسؤليه ..
ظل واقف ومازالت يده مقبوضه وبنفسه سكتي يانوره ويوم تكلمتي ما خليتي لي شي ارد به عليك بس انا لايمكن اعيش من غيرك دور كلمه يرد عليها لكن الحروف تبخرت ولسانه انشل عن الرد
................................................
طلعت لدرج تركض ماتدري كيف وصلت لغرفتها دخلت وسكرت الباب وراها تتنهد بصمت وتتالم بدون صوت وتصرخ بنبره خافته وتتاوه من الالم من الحظ اذا عاند الانسان في كل شي بدت تترخي على الباب البني الكبير
لكن وبدون مقدمات رفعت نفسها ,,انا نوف ماعاد اسمح لشي يكسرني انا ماحبيته عشان ازعل لانه يحب غيري ,,تنهدت ,,بس هذا صار زوجي انا حرمت على نفسي حتى افكر بغيره وهو معطي لنفسه الحق يحبها يعني هذا سبب الحزن الي اشوفه بعيونه هذا الي مخليه مايتقبلني يعني هدى هي الجدار الي بيني وبينه آآآآآآآآآآه وانا الي كنت اظنه نايف يعني تزوجني حتى ينساها طيب واذا مانساها انا وين مكاني ؟؟؟؟ سمعت صوت خطواته المتعبه قريب بسرعه دخلت لغرفة الملابس حتى تهدى شوي

دخل للغرفه لقاها فاضيه ماهتم ولاتسائل وينها
طلعت من الغرفه تحاول تصطنع البرود نظر لها نظره بارده
..مساء الخير>>> ورمى نفسه على الائريكه
..مساء النور<<قدر المستطاع تحاول تخفي الرجفه داخلها
وقفت عند راسه تعاند نفسها تحاول تثبت لنفسها انها قويه وانها قادره تتحداه وتتحدى حبه وتتحدى نفسها وتتحدى حبها تبي تهزم كل هذا وتتربع على عرش القوه
شكلك تعبان !!يهرب من نظراتها الجليديه
..ايه صاحي بدري
..طيب قوم نام >>قام بثقل من الهم الي في قلبه
عطاها ظهره هي واقفه بمكانها وقابضه يدها بدون ماتحس تحس شي داخلها يرجف وبنفسها وين انا بحياتك ياناصر
استدارت بثبات ماتدرى لوين لقت نفسها على كرسي التسريحه اخذت قلم الكحل وصارت تضرب بحافة التسريحه ضربات متباعده
طلع من الغرفه يقصد السرير يشوف وجهها بالمرايه
لولك حظ يانوف ماتزوجتيني ولو لي حظ ماتطلقت هدى بعد زواجي حط يديه على راسه كان مثل الي سمع خبر موت غالي ارخى جسمه على السرير مازال يفكر ومازالت تايهه بنفسها ما حست بالدموع الي غسلت وجهها
..........................
دخلت الغرفه لها اكثر من ساعتين وهو برى بالصاله يفكر بالي داربينهم متاكد انه جرحها قرب لباب الغرفه يسمع صوت لكن ماسمع خاف يكون صار لها شي رقيقه والكلام الي قاله قاسي لايمكن تتحمله <<انا ليش قلت لها هالاكلام
نوره حساسه يمكن صار لها شي
توكل على الله وفتح الباب بهدوء
منسدحه على السرير سمعت صوت الباب وغمضت عيونها الي جافاها النوم مشى شوي شوي حتى صار على بعد خطوات قليله منها بس ضوء الابجوره ينعكس على وجهها الغضبان حدق فيها باينه عاديه تطمن انفاسها منتظمه ابتسم بنفسه>>> تصبحين على خير>>> تركها ورجع ينام بالصاله

ودي أنام ,,
يمكن إذا منّي صحيت
ألقى " حزوني " طايرة فوق الغمام

نبهها صوت الاذان وهي كماهي ماسكه الكحل بيدها وضاغطه عليه بقوتها
ناصر يتقلب لكن عينه عافت النوم على صوت المؤذن قام لعل الصلاه تريحه
قام من السرير شافها بلبسها وعلى نفس وضعها ..ليش مانمتي
بدون لاترفع راسها..مافيني نوم
..وليش مابدلتي ؟؟ مخنوقه ومقهوره ومكسوره صارت مشاعرها حطام صعب لمه تضايقت من اسئلته
ارتبكت ماتدري بايش ترد ماكانت ناويه تبيه يعرف الي بداخلها او بالاحرى الموقف يتعدى حدود الجمل ..مدريــــ
قرب لها انتبه للنظره الي ارسلتها لها كانت تعبر عن شي ماوصله معها ..نوف وش فيك ؟؟؟
ماردت عليه بس نظرتها غريبه بارده حتى التجمد غاضبه حتى الاحتراق شعور اكبر من الوصف ..نوف نوف نــــــــــوفــــــ
ماكان نداء ه لها لانسان حي صار كأنه يوقض انسان يغرق في سبات عميق او انسان يحتضر رفعت عينها له وبكل هدوء... نعم
..وش فيك ؟؟
..مافيني شي بس تعبانه بروح اصلي يمكن اقدر انام
راحت من قدامه وهو مستغرب من حالها

..................................................
الصباح ماهو بس ناصر ونوف ونوره وسلمان الي ماناموا
هي بعد كانت سهرانه كانت تفكر بالي صار البارح خافت من رجعة هدى للبيت وانها تكون ناويه تفرض نفسها على حياة ناصر
جلست بالمجلس دخل زوجها ..صباح الخير
..صباح النور
..ماتوقعتك تقومين بدري بعد سهرة البارح
..والله ماقدرت انام يابو ناصر
..ليش عسى ماشر؟؟
..لا الحمدلله مافيني الاالعافيه بس خايفه على هالولد
..يام ناصر تراك اقلقتيني قولي وش صار
..البارح صار موقف وخايفه انه يخرب عليه حياته وانا ماصدقت على الله يتزوج ويستقر
..وش صار؟؟
..خلني اتاكد من الي انا شاكه فيه واشوف وش نسوي عشان نحمي حياته
..اجل انا باقوم للدوام الشغل متراكم من غياب ناصر
..مابقى الا ثلاث ايام ويرجع يساعدك
..ان شالله يلاه في امان الله
..في امان الكريم
..............................................
في المكتب يجهز اوراقه ويخلص بعض اشغاله لان وراه سفر وراح يغيب مده عن الشغل وخالد عنده
..ياخي تراك ازعجتني ماعندك شغل غيري
..احبك وماقدر استغني عنك ابي اشبع منك قبل تسافر
..لك ساعتين ماشبعت من مقابل وجهي
..لامايكفي بعدين انت بتغيب عشر ايام <<وهو يرفع يديه ..الله يصبرني بس
..روح عند نواف تسلى فيه لين ارجع تراه من ريحتي
..وععع من زينك ومن زين ريحتك
..هههههههههه انت الي تقول ماتستغني عني
..وانت ياحرم على طول صدقت مسكين رحمتك والله
..اقول خويلد وش رايك توريني عرض مقفاك وتتوكل على الله وتخليني اشوف شغلي
..ومن قالك اني ميت عليك
..خلاص بس هوني ترى خنقتني بثقل دمك
..زين يالله سلام ونشوفك على خير
ابتسم له ..مع السلامه
.............................
في بيت ام عبدالله لطيفه تزور بيت ام زوجها
ام عبدالله ..وين ريان ياعبدالله
عبدالله ..يلعب برى مع عيال عمه
ام عبدالله ..ياعمري مستانس على عيال عمه ماعنده احد بالبيت يلعب معه
ام عبدالله ماكانت تقصد الكلمه الي قالتها اما عبدالله كان وده يشوف ردة فعل لطيفه الي ولااول مرة تبلع كلمه او تسكت ماترد على كلام خالتها
قام عبدالله ..يالله انا طالع شوي وارجع للعشا
بعد ماطلع عبدالله حست ام عبدالله انها غلطت وضايقت ولدها وان لطيفه راح تتهاوش معه يعني تطلع حرتها بعبد الله
ام عبدالله..ماعليه يابنتي انا والله ماقصدت اضايقك بس مدري وشلون طلعت هالكلمه
بابتسامه مليانه شر ..قولي الي تبين تقولينه ماراح ارد عليك الحين بخلي الرد اذا حملت وقهرتك وخربت عليك تخطيطك
ام عبدالله بآسى ..لاتحسبين يالطيفه اني بزعل اذا حملتي انا اتمنى مو لاني احبك لا ني ام واهم شي عندي اشوف ولدي مستانس
لطيفه ..لا انتي تحبين عيالك كلهم الاعبدالله لانه ماهو راضي يتزوج على انا ماني غبيه تضحكين على زي ماضحكتي على عبدالله
ام عبدالله ..انتي مريضه ومرضك ماله علاج لكن ماقول الاحسبي الله ونعم الوكيل
لطيفه ..ماراح ارد عليك بخليك تموتين اروح اكلم صديقتي لين اروح لبيتي وارتاح من مقابل وجهك الي يجيب الهم
واخذت جوالها ناويه تكلم هدى
.................................................. ..........

ما أبكي الفرقا وطول المسافات ابكي القلوب الي تغير غلاها""

يلعب مع اخوانه على الشاطي والبنات جالسين يقهوون
مها من بعيد ..نــــــــــايف تكفى ابي العب معكم
نايف ..اقول ارتاحي ارتاحي يازين وجهك تلعبين بعباتك
مها بمزح ..عادي انزلها
مشى لها يصطنع العصبيه ..انتي والله تسوينها <<وهو يحرك يده جنب راسه ..مجنونه
وصل لهم وقف عندهم <<مها ..ماحد يعرف قيمتي غير نواف حبيبي مو مثل بعض الناس
جود تكلم نايف ..نايف ابي اطلب منك طلب
نزل نفسه لها وبحنان ..طلب واحد بس آمري بالي تبينه كم جود عندي <<<هالبنت لها مكانه خاصه عنده يعتبرها بنته
جود ببراه ..اي بس طلب واحد ابي اروح الملاهي
اشر على عيونه <<نايف ..ابشري من عيوني بكره ان شالله اوديك<< وراح وقف عند سيارته وسند جسمه عليها وصار يتفرج على الناس
شافته مها سارح عارفه وش الي مضايقه وحاسه فيه شافها طلعت على مقدمة السياره وتنظر للبعيد الى مكان مايناظر نايف
..تدري انا بجده والبحر بعد دقايق عنا ولنا زمان ماطلعنا هالطلعه الحلوه
التفت لها وابتسم ..ابوي وبدر دايما مشغولين ومشعل صغير اكيد ماحد راح يجيبكم << خلص جملته وسكت ورجع بنظره للبحر ومها تتمنى انه يتكلم او يعبر اوحتى يسب لطيفه يقول أي شي او يسوي أي شي الاانه يسكت لكن قررت تفتح معه الموضوع
..انت للحين مانسيتها .>>فتح عيونه على وسعها حتى يستوعب الي سمع<< كملت
.. لاتستغرب نواف من كثر ماكان متضايق قال لي على الي سوته لطيفه
..سكري الموضوع يامها ماحب اتكلم فيه
..سكوتك يعذبني يانايف
..والكلام ماينفع بالعكس يتعبنا زياده ويفتح الـــجـــــــــــروح <<من كلمته هذي حست بعمق الالم الي يعانيه<<< يعني انت مجروح يانايف
سكتت التفت لها ..شافها منزله راسها وباين انها تكفف الدموع الي غلبتها
واجهها بكل جسمه ومسك اكتافها وخلاها تقابله ..لاتبكين يامها اخوك قوي ولا يهزه أي شي صدقيني اكثر شي يضايقني ان اشوف دموع وحده منكم حتى لطيفه رغم الي سوته هي اختي وماحب اشوفها متضايقه
مسحت دموعها وناظرت له..آسفه يانايف غصبا عني <<عارفه نايف نقطة ضعفه يشوف دموع وحده من خواته
..بلا دلع امشي نجلس معهم ولا تبين تكسرين خاطري عشان اخليك تلعبين معنا لاتحاولين كلمتي وحده <<ومسك يدها حتى تمشي معه لكن رفعت يده وحبتها ابتسم رغم الالم كلامه مع مها خفف عنه واحساسها بمعانته بدد بعض الجروح مسكوا يدين بعض وتوجهوا لاخوانهم الي
مبسوطين بوجود نايف الي يحسسهم انه ابو لهم
.................................................. .................