مسمـوح يـا زول مشيـت متـعـدي
حــط الــذرى بيـنـي وبيـنـه عبـاتـه
دوبـه بطـرف العـيـن يـمـي يـلـدي
يـبـي يسـمّـح خـاطــري بالتـفـاتـه
قلبـي يبـي شوفـه وعينـي تلـدي
أخـاف مـن هــرجٍ يطـولـه شمـاتـه
أخـاف مـن فطنـه خطـات متحـدي
اللـي علـى الغـرات هـذي سواتـه
ما ودّي إنه يكتشـف غيـب سـدّي
خـلّـه يــروح وعبـرتـه فــي لـهـاتـه
لابــد مـــن يـــومٍ رخـــاه مـتـمـدي
يلحـق بـه القلـب المـولـع شفـاتـه
يــومٍ بــه الحسـيـد عـنــا تـصــدي
راعـي الحـسـد عـنـا بعـيـدٍ مبـاتـه
جعـلـه بـدربـه ذالـــفٍ مـــا يـــردي
احذف وراء الشيطان سبع حصواته
يــا نــاس بالله لا تصـيـرون ضـــدي
من لا هرج بالعـدل يكفـي سكاتـه
يـا نـاس مجـروح الضميـر الـمـودي
خـلـوه يـدلـه سـاعـةٍ فــي حيـاتـه
يــا صـاحـبـي مـاهــوب ودك وودي
لــــو ودّنــــا كــــلٍ تـخـيّــر مـنـاتــه
مــن دون جمعـانـا سـلـومٍ تـلــدي
تمنع شفوق القلـب دون شهواتـه
دونــك عــدوٍ للحـسـد مسـتـعـدي
طـعـون قلـبـه بالحـشـا موجـعـاتـه
وإلا فــلا غـيـرك حـبـيـبٍ يـســدّي
تكفـيـك ضيـقـة خـاطـري وانهتـاتـه
حبـك مقيـم وحـب غيـرك يـشـدّي
هـذا الـكـلام الـلـي صحـيـحٍ ثبـاتـه
سلطـان حبـك لـو سيوفـه تـحـدّي
جيتـه مطـيـعٍ لسيـاتـه واحسنـاتـه