سجه مع الهاجوس طبيعة لي طبيعة بموت ماجزت عنها
أشكي على الخلاق وارفع له إيدي لاكثرت الأفكار يفك منها
أما الكرم قد فاز به حاتم الطي حتى الفرس من شان ضيفه طعنها
خلوني أكرم في حياتي وأنا حي ولامت مدري جثتي من دفنها
خلقت في الدنيا وأنا ما معي شي وبروح منها مامعي شي منها
مسكين ياللي تحسب الواجد شوي والعافيه لو تنشري وش ثمنها
يا جاهل الدنيا تراها كما الفي يا مخبل اللي في حياته ومنها
إن ناحرت لك قامت تروح وتجي مثل الذلول اللي طويل رسنها
وإن أدبرت خلتك طايح ومرمي وكم واحد له حاجة ماضمنها
لابد ما نرحل عن المزح والغي ونسكن بيوت قبلنا من سكنها
النفس مثل الغصن عايش على الري ولولاه كل الناس عافت وطنها
يالله عسى الحسنات تقضي على السي لاقربوا للنفس ذرعة كفنها للشاعر / مبارك بن فايز البخيت ال محمد السبيعي