البارت 98


عند خالد .
بمجرد ماقفل الباب رفع سبابته وضغط على يسار صدره فوق قلبه بالضبط وهو منقهر من نفسه
يحس انه مو قادر يضبط تصرفاته ولا مشاعره
لو جلست بالفندق وما طلعت معها
لو تركتها تروح لحالها
مو احسن من النار اللي تشب بصدري مو احسن من القهر اللي يحرق فيني
تنهد واتجه للسرير ورمى نفسه عليه وهو يتنفس بقوه : يارب
غمض عيونه لثواني ومازالت حركاتها وتصرفاتها معه تدور في باله مافارقته ولو لثواني
نظراتها ! عيونها !
اتوقع انها ماتركت للخلق بعدها مجال
ماتركت للبنات فرصة يثبتون زينهم فيها
عيونها لله دُرها مخلوقه من نور من لون الشجر من لون الحياه والتفاؤل
بلمعة براءه ! برسمه خليجيه
خدودها شاميه وضحكتها مصريه
ابتسم وسحب الوساده تحت راسه وهو يحاول يتجاهلها ويرميها من خياله لكن اللي متأكد منه بهاللحظه انها استوطنت مكان بقلبه مكان كان طافي ومانوره غيرها كان ميت وقربها احياه .


في امستردام ..

ريتان تبكي بصوت عالي بقلة حيله وضعف وتضم راسها بكفوفها تغلق اذنيها لا تُريد ان تسمع
المزيد .
رائد بهدوء تكلم مع واحد منهم واخرج بطاقه حمراء مربعه تحتوي ختم اخذها وقراها الشرطي ورجعها له واشر للباقين يسمحون له يمر
تجاوزهم بهدوء وقرب لريتان وشدها
من كتفها بصمت
رفعت راسها له وعيونها بعيونه
عضت طرف شفتها وهزت راسها بلا وهي تشهق وتضمه بقوه ونحيبها يرتفع
رائد بهمس : يا جبانه ، ماتوقعتك كذا
سكنت انفاسها وهي تهمس : مو خوافـ..ـه
ضحك وهو يمرر كفه الايمن على خدها ويبتعد عنها ويضم راسها بين كفوفه : اشششش خلاص
ريتان هزت راسها بالايجاب وبعدت عنه تمشي قدامه لخارج المطار
وهو وراها بخطوات متوافقه متقاربه خرجوا من المطار للفندق ..

مر ربع ساعه على وصولهم
مابينهم لا كلام ولا شيء كل واحد شبك جواله وضبط رقمه وانشغل عليه
ريتان تراسل رتيل وتقولها اللي صار مع رامز ومع رائد وعن سفرتهم
ورائد للمره المليون يرسل لرامز ومايرد
يقراها ويتجاهلها انقهر ورمى جواله وناظرها : هيه
ماردت عليه وهي متعمده تطنشه تبي ترد على رتيل
رائد بنبره مرتفعه : قومي طلعي بجامه
لي وشغلي المكيف بسرعه
ريتان تذكرت خطتها ووقفت : من عيوني
صدت بسرعه قبل تضحك ودخلت للغرفه
طلعت له بجامه ورتبتها ع السرير
وشغلت المكيف واخذت اغراض رائد ورتبتها
دخل رائد وانتبه لها جالسه عند الدرج وترتب ملابسه
رفع حاجب وهو مستغرب : وش هالهدوء والخضوع ترتبين لي ! لااااا كذا اوفر اكيد وراك مصيبه
ريتان مسكت ضحكتها : افا ! هذا وانا ازين لك اغراضك طيب طيب
وقفت وتركت باقي اغراضه في الشنطه
وطلعت : رتبها بنفسك
ابتسم رائد بتعجب ودخل ياخذ شور ويبدل
وريتان جلست فالصاله وهي تاخذ نفس سمعت صوت باب دوره المياه " اكرم القارئ " يتقفل
وقفت بسرعه ودخلت للغرفه وهي تدور جوال رائد فتحته ودخلت للاسماء وسجلت رقم رامز بجوالها وقفلت الجوال
ورجعته مكانه بسرعه وطلعت
وكفوفها ترجف صح انها تجازف بروحها وبشيء مهم اللي هو حياتها
لكن مستحيل تسمح لهم يكملون لعب عليها
ارسلت لرامز ان هذا رقمها وانها في امستردام وتبي تشوفه
مسحت المحادثه خوف ان رائد يفتش جوالها وقفلته نزلته على الطاوله وعدلت الخداديه
ع الكنب واستلقت عليه بأريحيه وهي تحاول تنام .