مجموع الأوسمة: 18

البارت 10

لف لفارس وهو يشوفه ماسك علبة مويه بيده وماسك ضحكته غصب وانت الثاني لاعاد اسمع لك صوت .
رجع وهو يجلس على الكرسي.
سكت الكل وكل واحد مشغول بجواله ومحمد ماغير يهوجس في اللي صار رجع ناظر في احمد اللي جالس وقريب منه قال احمد لما جيت من غرفة العمليات كيف كان وضعي .
احمد يناظر اخوه : عادي ليش تسأل.
سكت وهو يتنهد ويحس بنار في صدره كيف الكلبة ذي جتها ‏الجرأة تسوي عملية مثل كذا لرجل وين الخجل مايستغرب عليها وهي بين الرجال.
كل خوفه لا تكون متدربه من طلاب الأمتياز وعادي عندها تصوره سناب مايستبعد شي البنات يموتون بالتصوير.
باقي دمه يفور وهو يتذكر لما بدء يفوق من البنج بشكل تدريجي جته الممرضه بأكل وعلاج رفضه وقال انا ابغى اخرج علشان ابوه مايشك في الوضع لانهم قالوا له عملية بسيطه وبدون جراحه تقدر تطلع بنفس اليوم وهو قال لأبوه ان له موعد وبيخلصه وبيروح يسلم على أمه ومعزوم هو واخوانه عند اصحابهم رحلتهم من الرياض كانت الساعه ثلاث الفجر..
الممرضه قالت له ماتقدر تخرج لين تشوفك الدكتورة وبعدها تقدر تطلع انصعق لما سمع كلامها معقوله دكتورة اللي مسويه له العملية مستحيل الدكتور مهند هو كشف عليه من اسبوع تقريبآ وحدد له موعد العملية رجع سأل
الممرضه دكتور اللي مسوي له عمليه وإلا دكتورة
قالت له لا دكتورة لما سمع كلامها عصب ونسى عمليته قام واقف وسلك المغذي بيده ويصارخ الممرضه لما شافته انفجعت وخرجت بسرعه رجع يستغفر لو انه تحمل الألم احسن من المهزله والفشيلة ذي
سمع صوت جواله يدق رفعه وهو يشوف ابوه المتصل نزله بدون مايرد ..سمع احمد يقوله رد ترى حتى انا اتصل اكثر من مره هو وجدي ولارديت علشان ترد انت ويطمن اكثر اذا سمع صوتك انك بخير لان فارس قال لهم انك سويت العملية رفع عيونه لفارس اللي من سمع كلام احمد فتح الباب وهو يخرج .

محمد بعصبيه ايش اسوي في فارس الخبل اللي مستحيل انه يمسك كلام رجع جواله يدق قرر انه يرد فتح الخط حاول يخرج صوته عادي هلا والله
علي بحنان غمر عياله فيه اخذ على نفسه عهد مايضيق صدر عياله يعاملهم بكل حب واحترام خاصه محمد ولده البكر اللي كان ضحية زواج فاشل نهايته طلاق وحرمان طفل من أمه كان لولده الأم والأب : الف سلامه عليك ياروح ابوك ما تشوف شر ماعندي علم بك إلا مع فارس اتصلت اطمن عليكم قال انك سويت العملية الظهر .
محمد /جعلك تسلم تدوم ياتاج راسي ابشرك انها عملية بسيطه مجرد تنظيف للأذن مثل ماقلت لك وبعد شوي بطلع وامر امي اسلم عليها وبعدها معزوم انا والعيال وإن شاء الله نرجع بكره او بعده.
علي/استودعت الله فيك خذ جدتك قلبها معك .!
محمد بحب لجدته وأمه الثانية وهو يسمع صوتها ولهفتها عليه ارحبي ارحبي .!
هيله/مجار والف سلامه ماتشوف شر ليته بروح جدك كيفك اربك بخير بشرني عنك..
محمد بمجرد ماسمع صوت جدته تعدل مزاجه حطه على السماعه وهو يضحك لازم تجيب سيرة جده وتدعي عليه : الله يجيرش وابشرش اني بخير.
هيلة/الله يصلحك قد قلت لك لا عاد تثور اذنك بالمفتاح والعيدان لو انك حطيت زيت زيتون كان سلمت من العملية .!
محمد انفجع من كلام جدته ولاعاد عرف ايش يقول لها اخر شي قفل الجوال وهو يرفع عيونه لأخوه احمد اللي ميت ضحك على شكل اخوه وكلام جدته .!
عصب وقال : احمد لو سمحت اخرج خلاص مااحتاج مرافق روح ارتاح في الشقه وانا اذا خلصت بجيكم.
احمد اللي حس انه غلط لما ضحك ومحمد زعل بس غصب عنه ضحك على كلام جدته قام وهو يدنق على راس اخوه ويسلم عليه : المعذره والسموحه .
محمد بعصبية : خلاص اطلع وقفل الباب معك .
شافه وهو يخرج ويقفل الباب حس بقهر ايش اليوم ذا اللي ماله نيه يخلص على خير تذكر كلام جدته وزاد قهره وحمد الله ان فارس ماهو موجود ماكان راح يسكت .
غمض عيونه وهو يحس بصداع فضيع كان متردد من العملية وراح اكثر من مستشفى علشان يحصل جراح ممتاز يسوي له العملية ويقدر يخرج بسرعه من المستشفى مايبغى احد يعرف انه مسوي عملية الكل مدح الجراح مهند يشتغل في مستشفى خاص في أبها وياليته ماجاء ولا تنوم عندهم فتح عيونه على صوت الباب اللي اندق ثلاث مرات وبعدين انفتح
شاف نفس الممرضه تدخل وبعدها دخلت وحده ثانيه اكيد انها الدكتورة قربت منه وبيدها اوراق
اعطاها نظره شامله طولها المميز وسع عيونها رموشها الكثيفه الواضحه من النقاب الواسع بياض يديها ساعتها الماركه بالطوا ابيض وتحت لبس العمليات الأخضر
لفت نظره بطاقتها الطبية المعلقة اسمها والصورة
(استشارية جراحة وجراحة المناظير والقولون والمستقيم وامراض الشرج والسمنه)