اشحني طفلك
- عارفة لما الموبيل يبقي قريب يفصل شحنه و تلاقيه بدأ نوره يخف و تظلم الشاشة وما يفتحش حاجات
و يبدا ينبهك و بعدين يضلم بس مايختفيش يعني إنت تلاقيه قدامك موجود بشاشته و بطاريته و كل أجزاء الملموسة بس مش مشحون و مهما حاولتي تجيبيله اشياء جديدة و تنظفيه مش حيرجع ينور غير بالشاحن الخاص بيه
,بالظبط زي الطفل عنده إحتياجات يومية هيا اللي بتشحنه و تخليه يستخدم مميزاته
ومهما عوضنا مايغنيش عن الشاحن ,طفلي مش بس محتاج ياكل و يشرب لا هذا شحن الجسد لكن ما هو شحن النفس ؟
*كل طفل أي كان نمطه و شخصيته و سنه بيحتاج حاجات يومية :
1-حضن
2-بوسة
3-وقت نافع ليكم لوحدكم(قصة - مناقشة -
لعبة ...)
4-تاخدي رأيه في حاجات كتير حتي لو بسيطة بس تكوني تقدري تنفذي رغباته وتاخذي برأيه
5-تطلبي منه مساعدة
و تبقي بصيغة :أنا محتاجة مساعدتك أو ممكن تساعدني و تجيبلي موبيلي ؟ و بعدها"شكرااا"
6-تشجعيه بجمل واضحة (برافو أنت تعرف ترتب معايا السفرة-أنت شاطر في الجري ..)
7-تعبريله عن مشاعرك بشكل واضح (أنا بحبك -أنا مبسوطة إنك إبني ..)
8-تكوني قدوة في أفعالك بجد .
-*خلي بالك :
-متستسلميش لجملة أنا معرفش احضنهم لأنك بتعمليلهم كم رهيب من الحاجات في اليوم
ممكن تكوني مش قادرة و بتقومي تعملي أصناف أكل ,تتابعي ملابسهم تحميهم و تلبسي لأنك بتحسي أن دى واجبات عليكي
ولكن إيه أهم للطفل اكل ولبس ولا ان نفسيته تكون سوية ويعرف يفكر كويس و مرتاح ؟
لو مش حاسه أعمليه كواجب لو ماتعرفيش تحضني إبتسمي و أحضني اولادك حتي لو مش حاسة الحضن .
-معظم اللي عنده المشكلة دى بتكون امه علي قد ما ضحت و عملت كتير علشان اولادها بس مكنتش بتحضنهم
فالبنت لما بقت أم أتكرر الوضع
ولكن هل إنت حابة تورثي المشكلة لحد إمتي ؟ و تفضل بنتك جواها بتتمني إنك تكوني عودتيها علي الحب والحنان.
-عدم الإشباع العاطفي بيخلي الطفل متعطش ياخده من أي مكان و هذا هنجني ثماره أكتر في المراهقة و تكون سيئة.
-ماينفعش نعوض الحب بالهدايا و الفسح و الحاجات الحلوة أبدا .
-خدعوك فقالوا
الطفل الحنين هو بس اللي محتاج عاطفة لكن برضو العنيد و الحركي و غيرهم في أمس الحاجة للإحتياجات هذه
-أنا مكنتش أعرف إن هذا مهم و لما عرفت جيت أحضن إبني حسيته بيبعد و مش راغب في حضني ماذا افعل؟
أطفال كتير جدا لما بتفتقد حاجة فترة طويلة أول ما بتتعرض للحاجة دى بتتوتر و يصعب عليها نفسها فمهم نمشي الموضوع واحدة واحدة
طول ما فيك روح أعطي اولادك إحتياجاتهم أي كان سنهم
ربي راجل يعرف يحس
ربي أم بتقدر تحتوي
شبعي أولادك حب وحنيه
|
|
|
|