مجموع الأوسمة: 17

جلسها على السرير وهي تنتفض بشكل مرعب...وشفايفها باللون الأزرق..
طلب من الاستقبال يتصلون بالطبيب...
فسخ جاكيته من عليها ونزل البالطو حقها...
سحب حجابها وقفاز يدها اليسار ولاحظ لون أظافرها بنفسجي قاني..
فسخ جزمتها وجواربها...
كان بيرفع كنزتها بس مارضت ترفع يدينها حاول فيها بس ماقدر..
مسك كنزتها من الرقبة وشقها بسرعة...
شهقت برعـــــــــــب ..
ورجعت لها الذكرى الأليمة...
لما قطع قميصها بهذاك اليوم...لما دمرها وضيعها...
صرخت بخوف ولمت بقايا كنزتها عليها وهي تبكي...
هديل\لااااااااااااااااااااااااااا ما ابييييييييييييك لا لا ..
انسدحت على جنبها اليمين وضمت نفسها بقوووة..
ماتبيه يلمسها الرعب شل عظامها وكأن الموقف ينعاد بكل قسوته..
كل مالمسها وحاول يقرب منها..تصرخ برعب..
ماعادت تحس بالبرد ولا إنها تتجمد..
رجع لها ألم هذيك اللحظات المخزية القاتلة..
كملت نحيب وهي تردد كلماتها المتوسلة له يتركها ويسامحها..
هديل بحسرة\سامحنييي خلاص سامحني تكفى لا لا..
جلس جنبها وسحبها له غصب عنها....
وهي تصرخ وتضربه وكأنها الى الآن ماضاعت..
غازي بتعب\أنتي اللي خلاص..عذبتيني إهدي اهدي..
هديل ترتجف\اتركنييييي ما ابييك..اكرهك اكرهك..
غازي\طيب باتركك بس أنتي لازم تبدلين ملابسك..
تركها فتح الكبت وطلع لها بجامة قرب منها وحطها بين يديها وهي لسى مسدوحة ع السرير..
غازي\يالله ياقلبي قومي بدلي..لازم تبدلين قبل تمرضين..
هديل صرخت\لا تلمسنـــــــــــــــــــــــــــــــي..
مرر يدينه على شعرهـ بضياع...
مستحيل تثق فيه ..هو أدرك وش اللي يدور في بالها من لما قطع كنزتها..
يدري انها تتوقع ينعاد الموقف الأليم اللي عرضها له...
غازي يهمس باذنها\الطبيب بيجي ويعطيك مهدىء...
بدلي بنفسك قبل تغفين...
تمر همساته بأذونها لكن ترجع لها كلماته القديمة..
كلمات التملك والحب الكاذب..
وكأنه يردد لها كلماته الكاذبة ...
لمت المفرش عليها رافضة تسمعه أو تسمح له يلمسها...
وتردد كلمة أكرهك بقلبها وروحها..

متاكد بانها ماراح تطيعه او تصدقه...
غطاها بالمفرش ودخل الطبيب عندها..
شرح له اللي صار معها بشكل سريع وطلب منه يعطيها حقنة ضد الحرارة..
لاحظ نظرات الطبيب له وكأنه يرفض أوامرهـ ..
غازي بحدة\إن لم تفعل ما أقول لن تجد لك عملاً بعد اليوم ولا بعد 20 عاماً..
رضخ الطبيب لأوامره لان هذا اللي كان راح يسويه لو ما أمرهـ غازي وتدخل بشغله..
ضربها بالحقنة وصرف لها أدوية ...
تكلم مع غازي عن الاعراض اللي راح تواجها بعد سقوطها في الماء الجليدي..
لكن غازي كان متجاهل وجودهـ كلياً..
لانه يعرف وش اللي راح يواجهه معها..
انصرف الطبيب ....
بعد المفرش عنها وقطع باقي كنزتها بدل ملابسها وهو يحس بغضب شديد..
ليس منها بل من نفسه...
ثاني مرة يغفل عنها..
المرة الأولى رمت نفسها تحت الحصان..
والمرة الثانية حاولت تغرق حالها ببحيرة جليد...
أنسدح جنبها وحضنها بقوة..
همس لها\إكـــرهيني بس لا تموتين...


؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛


بعد العشاء مجتمعين بالصالة...
عبدالله منسدح على الكنبة وراسه بحضن غادة ويلعب بجوالها..
علي بعصبية\ليه ماتقوم تنام ماتشوف الساعة كم..؟؟
عبدالله بتذمر\بزر أنا أنام الساعة 10 الله يصلحك يوبه..الشيبان اللي بعمرك المفروض نايمين من 7..
علي\عبيييد قم نام وراك مدرسة..
عبدالله بصوت هامس\وغدة قولي لأخوك يفكنا من حنته..
غادة\معليه علي الحين يقوم ينام خله شوي بعد..
علي\عشانك بس..
غادة تغمز لعبدالله\كيفني معك بيضت الوجه..؟؟
عبدالله\مالت ماسويتي خير..بعد شوي يشوتني..
غادة\هههههههههههههه والله مايبين في عينك يالنذل..
علي\يوبه ترى ضبطت أمور شغلي وودي أخاويك في سفرتك..
ابوعلي بحدة\وأنا قلت ماحدن برايح معي الا عمك..
علي بمجاراة\ الحين بدال ماتفرح اني باروح معكم ولاول مرة اطب اوروبا جالس تهاوشني..
ابوعلي\وش اللي بيوديك معي..؟؟ماني رايح أتمشى..
علي\ودي اخاويك مخاواتك تنشرى يا ابوعلي..
عبدالله\مايروح ابوي من غيري..
علي بعصبية\ان ماسكت طبيت في بطنك..
عبدالله\يرضيك يعني تروح مع أبوك وأنا ما أروح مع أبوي يرضيك؟؟
علي\ايوهـ يرضيني يرضييييييني..
عبدالله\وانا مايرضيني مايروح الاب الا وولده معه يساعده يدله على الصح..
ينصحه لا يماشي رفاق السؤ..
علي يناظر حنان\شلي المنحوس لا اقوم بالعقال...
غادة\هههههههههههه خلاص خله علي انا افهمه..
عبدالله باستخفاف\اقول وغدة ترى باخذ غرفتك..
غادة مبققة عيونها\عبيييد ان قربت من غرفتي ذبحتك..
عبدالله\اعووذ بالله وش ذا البخل مو عندك جناح وش كبره عند الوغد زوجك..
غادة\ما الوغد غيرك ياالضب..وغرفتي مالك دخل فيها..
عبدالله\عادي خليها لك بكرهـ ننتقل لبيتنا الجديد ولالك غرفة عندنا..
غادة\علي صدق مالي غرفة في البيت الجديد؟؟
علي باستغراب\من قالك هذا الكلام؟؟
غادة\ولدك..
علي\ياشين ماطريتي مالقيتي الا عبييد تصدقينه..تطمني غرفتك موجودة..
وبعض الناس بنيت لهم غرفة ورى الملحق يفكوني من غثاهم..
عبدالله\المهم أمي معي..
علي يضحك\هههههههههههه تعقب ماهي بمعك..
عبدالله يناظر أمه\بتعيشين معي ولا معه؟؟
حنان\لامعك ولا معه وفكونا من الهواش..
عبدالله يرفع حواجبه\أتحداك تخليها تقولك غير كلامها لي..
علي\لا تتحداني..
عبدالله\أتحداك..
علي\أنتي يامـــرهـ لمي قشك وتعالي في بيتنا الجديد..
حنان ضحكت عليهم وخرجت من الصالة من دون ماترد عليهم..
عبدالله\ههههههههههههههه ماعطتك وجه لبى أمي..
علي بخبث\هههههههههههههه الا راحت تلم قشها يالورع..
عبدالله\تصبحون على خير..
رمى جوال غادة عليها وطلع يركض ورى أمه..
وعلي يضحك عليه مع غادة...
غادة\الله يعينك تراه يموت في أمه..
علي\بس اسكتي لو تسمعينه وهو يقول لها..يومه بس اطول شبرين واطلع رخصة القيادة..
ما اخلي بعض الناس ياخذونك مشاوير..مايوديك ويجيبك غيري..
غادة\ههههههههههههههه يافديت قلبه..
الجدة\بتروح مع أبوك ياعلي؟؟
علي\هذا هو قدامك مارضى اروح معه..
الجدة\وش الطاري على سفرتك ياحسين؟؟
ابوعلي\كل خير يومه..لازم أسافر..
الجدة\ولازم يروح معك اخوك؟؟
ابوعلي\ماهو بلازم بس ودي به يجي معي..
الجدة بنبرة غريبة\ماخلصت أسرارك أنت وأخوك؟؟
ابوعلي\الله يسعدك يومه مابه أسرار ولاشيء..
غادة توقف\باروح اشوف امي قبل يجي راكان..
علي\تبين تنامين هنا الليلة؟؟
غادة\لا ما اقدر ماقلت لراكان والحين هو على وصول..
علي\ماعليك منه اذا تبين تنامين هنا قلت له يروح وماانتي رايحة معه..
الجدة\خل البنت على راحتها ومتفاهمة مع زوجها..لاتدخل بينهم..
علي\ماتدخلت بس تهمني راحتها..
غادة تبوسه على راسه\لاتخاف علي مرتاحة..
طلعت لغرفة أمها ولقتها جالسة وماسكة جوالها بيدها..
غادة\يومه من كنتي تكلمين؟؟
أم علي تمسح دموعها\هادي..
غادة بخوف\طيب ليه تبكين ياروحي..هادي فيه شيء؟؟
أم علي\لا يومه مافيه الا كل خير..
غادة تبوس يد امها\طيب ليه زعلانة؟؟
ام علي\كنا نسولف عن هديل..
غادة بزعل\الله يرحمها...طيب وانتوا كل ماتكلمتوا عن هديل بتبكون؟؟
ام علي تبكي بحسرة\ليه قلبي يوجعني عليها..ليه أحس انها ماهي بخير؟؟
غادة برعب\يومه اذكري الله وش هالكلام اللي تقولينه..
صلي على النبي وادعي لها..هي ان شاء الله بجنات النعيم..
هديل كانت طيبة ومصليه وتخاف الله..لاتقولين كذا يومه تكفين..
ام علي\ماهو بانا اللي اقول..قلبي اللي ناغزني ومعذبني عليها..
اصحى من النوم وانا اسمعها تناديني..ادورها بغرفتها بين هدومها بس ما القاها..
احكم عقلي واقول يمكن يكون هادي..ويطلع حال هادي اردى من حالي..
غادة تبكي\حرام عليكم لاتعذبونها باللي تسوونه..يومه مايجوز والله مايجوز..
الله مايرضى بحالكم وهديل بتزعل عليكم..انتوا ادعوا لها واذكروها بالخير..
وهي بعون الله تنتظرنا في الجنة..هذا حال الدنيا يومه كل من عليها فان..
ام علي\لا اله الا الله محمد رسول الله...يارب صبر قلبي على فراقها..
غادة تقبل راس امها\اللهم آآآآمين..
ردت على جوالها وكان راكان..
غادة\هلا..
راكان\هلا فيك أنتظرك برا لا تتأخري..
غادة تتنهد\طيب..
راكان\غادة وش في صوتك؟؟فيكم شيء..؟؟
غادة\.......لا مابتاخر..
راكان\اوكى انتظرك..
قفلت الخط وهي تكتم العبرة بصدرها..
مانسيناها يومه وحتى هو مانساها...
فديت قلبك ياهديل حتى قلبه يحبك..

ودعت أهلها وخرجت مع علي اللي وصلها السيارة..
رفع يده كرد لسلام راكان الواقف امام سيارته..
جلست وهي ضامة شنطتها وبالها عند أمها..
ماحست فيه وهو يكلمها ولا وهو يناديها..
حط يده على كتفها وهي فزت بخوف وهي تشهق..
راكان\بسم الله عليك..غادة وش فيك؟؟
بعدت عنه وهي تأشر بيدها عشان يتركها بحالها..
أحترم رغبتها وركز عينه ع الطريق مع انه مو مطمن لحالها..
يمكن متهاوشة مع أحد من أخوانها...أو أحد زعلها..
تضايق وعصب باي حق يزعلونها...لما وصلها العصر كانت مرتاحة ومبسوطة..
وصلوا البيت كانت سارة جالسة مع سلمان في الصالة..
سلم راكان وغادة عليهم وجلسوا معهم..
حست انها راح تبكي حاولت تشجع نفسها بس ماقدرت..عضت شفايفها تمنع العبرة..
استئذنت منهم وطلعت لجناحها..
دخلت غرفتها وهي تشهق محتاجة الهواء رمت عبايتها وطرحتها على الأرض..
فكت أزارير بلوزتها وهي ترتجف وتبكي...
حضنها بقووة وهو يقراء عليها..
راكان\غادة ياقلبي وش فيك؟؟
تعلقت بجيب ثوبه وهي تنتحب..أشتقت لها..مشتاقة لحبيبت قلبك..مشتاقة لاختي..
راكان\من اللي زعلك؟؟قولي لي وانا اوريك فيهم؟؟من اللي زعلك من؟؟
غادة بصوت مبحوح\أنــــــــــــــــــت..أنت أنت أنت..
راكان\هشششش اهدي اهدي وفهميني وش فيك ياروحي..
غادة بحسرة\لاتقووول روحي انا مو روحك لاتقول قلبي وانت كذاب كذاب..
راكان جلسها ع السرير وشربها ماء يبيها تهداء..
قالت هو اللي زعلها...لا فيه شيء ثاني مافهمه من كلامها..
راكان\والحين فهميني بايش زعلتك انا اليوم..؟؟
غادة بتعب\ما ابي اتكلم معك الله يخليك راكان خلني لحالي..
راكان يلم يده على كتوفها\لا ماباخليك لحالك ما اقوى..
وش اللي مزعلك ياقلب راكان قولي..
غادة\لا تقوول قلبـــ...............
حط اصبعه على فمها\الا قلبي وروحي عشقي وحبي من طفولتي..
بعدت اصبعه بقهر\لاتكذب علي..انا مو حبك..
راكان\مو مصدقتني يحق لك ماتصدقين...
وش اللي أنا سويته غير جرحك وتكسيرك..
جرحتك جرح مايبراء والى اليوم ماصارحتك بشيء...
غادة\الكلام في الفايت نقصان عقل...
راكان\بالعكس لازم نتكلم عشان توضح الصورة ونكون مرتاحين...
غادة وقفت\الكلام مستحيل يريحني مستحيييييييييييييييييل..
راكان\وش راح تخسرين اذا سمعتيني...؟؟
غادة تضحك بسخرية من حالها\هههههههههههه ماراح اخسر شيء...ولا شيء..
راكان سحبها ووثقها تجلس جنبه\لازم تسمعيني الحين..رضيتي او لا..
المفروض تكلمنا من قبل هالوقت..
والحين مستحيل اتاخر عن الموضوع وما افهمك وش صار..

ظلت جالسة جنبه ويده حوالين كتوفها تسمعه وماتحركت فيها شعره..
ماتأثرت معه ولا اهتزت بمشاعر غضبه..
ولما خلص كلامه رفع كفها وحطه على خدهـ..
راكان\تذكرين كفك لما صفعني...
صحاني من شكي وغضبي..خلاني ادرك أنا وش سويت وكيف ضيعتك من يدي..
غادة ببرود\ماتغير شيء..عرفت وش صار معك..ومع ذلك نفس الاحساس..
ماتصلح الماضي ولا انجبر اللي انكسر..
قبلها على جبينها\وش اللي يرضيك ياغادة وانا اسويه...
غادة\صارحني بالحقيقة...
راكان باستغراب\أي حقيقة..أنا قلتلك كل شيء صار..
غادة حطت يدها على قلبه\حقيقة هذا..
راكان حط يده على يدها وضغط عليها\هذا هو يجاوبك..
غادة حاولت تسحب يدها منه بس ماتركها..
\اتركني ياراكان اتركني ولاتكذب علي...انت اعترفت من زمان اعترفت..
سحبت يدها منه وخرجت من جناحهم بملابسها ومن دون حجابها..
دخلت بغرفة سارة وقفلت الباب..
لمت سارة بقوووة وهي تبكي..
غادة بزعل\ما ابي اشوفه ياسارة تكفين ما ابي..
سارة تحضنها\خليه يولي ماعليك منه ياروحي..
وش سوا قليل السنع وش زعلك فيه..
والله من شفت وجهك لما دخلتي وانا حاسة ان فيك شيء..
غادة\مازعلني بس متضايقة شوي..
سارة تجلسها على السرير وتجلس قبالها\الى متى ياغادة بتقضين حياتك بضيق وزعل..
ماهو كفاية اللي مريتي فيه من بعد موت هديل وخطبة راكان لك..وبعدها كنسلتوا الخطبة والزواج..
دراستك وخطبة جديدة ورجال جديد..وينتكس الحال بسرعة وترجعين لراكان مجبورة ولا راضية..
ماصار الوقت انك انتي تسيطرين على الوضع وماتسمحين ل الظروف تلعب فيك..
غادة\أنتي مو فاهمة ؟؟
سارة\لا ياغادة فاهمة..أنا صح أخت راكان وامووت فيه واعزهـ..
بس نهايتي اكون أنثى..والانثى لما تنطعن يكون صعب مداواتها..
راكان ماقصر فيك جرحك وبهذلك..
ماراح اتكلم عن آخر شيء سواه واللي خلى عمي وجدتي يحلفون ماياخذك..
هذا شيء تقدرون تحلونه بينكم..ومهما كان قرارك بهالموضوع ماتنلامين..
في خاطري كلام وابيك تعرفينه..
غادة\ما ابي اسمعه...ادري بيكون اعذار لراكان..
سارة\لا ماهو عذر لراكان...غادة أنا غلطت غلطة كبيرة لما كنت ارسم راكان العاشق الولهان بعيون هديل..
ويمكن علقتها فيه وهي كانت صغيرة ومراهقة ..
وبالتاكيد بتصدق كلامي لاني اخته..
راكان كان صدق عاشق وولهان وغرقان بعد..
بس مو في هديل لانها بنظرة طفلة ويمكن ماكان يشوفها..
غادة بغضب\الله يرحمها لاتتكلمي عنها كذا..
سارة\راكان ماكان يحب هديل كان يحبك أنتي..
بس انا كنت فاهمة غلط ورسمت الامور بكيفي..
غلطت وغلطتي كبيييرة يمكن لو هديا عايشة الحين نكون جرحناها بقووة..
غادة\ماكنت راح اجرح اختي على حساب احد..
لانها اهم لي من كل الخلق..
سارة\ماتنلامين وكلامك صح..
غادة\راكان بلسانه اعترف انه اخذني بس عشان هديل..
فلا تحاولين تغير الحقيقة عشان ترضيني..
سارة بغضب\كذاب يكذب عليك..والله العظيم هو يحبك أنتي..
غادة\لا تحلفين..وبعدين ماعاد يهم حبه وكرهه عندي واحد..
قلبي ماهو متقبله روحي تبي فراقه..
سارة\لا انتي مو صاحية ومو واعية للي تقولينه..
غادة اسمعي مني..الدنيا بتمشي وانتي ماتعاندي الا قدرك ونصيبك..
اكسبي الاوضاع بصفك ياروحي..لاتخلي الوهم والخيال يقضي عليك وعلى راكان..

انسدحت غادة على سرير سارة وغمضت عيونها..
سمعت سارة وهي تكلم راكان وتقوله ان غادة بتنام عندها..
قدرت عصبيته وانهم مو عايشين لحالهم ولازم ماتخرج مشاكلهم من جناحهم..
وقفت بتعب اخذت طرحت سارة ولفتها على راسها..
دخلت جناحهم وراكان ماكان موجود..
تحممت وبدلت ملابسها ونامت قبل يرجع...


؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛