مجموع الأوسمة: 17

البارت الثامن والستــــــــون ..


أتريدين أن نتقاسم الأخطاء؟
أتريدين أن نقيم محاكمة مصغرة يمثل أمامها مندوب الادعاء والمتهم..
ويثور جدال عنيف صاخب قبل أن يصدر القاضي حكمه النهائي؟
أتريدين أن نستعرض الماضي ، ثانية ثانية ،
واقعة واقعة ، وكلمة كلمة ،
لكي نقرر من أصاب ومن أخطأ؟

دعيني أختصر المشوار فأقول أننا مذنبان وبنفس الدرجة..
لقد أذنبنا حين اعتقدنا أننا نستطيع أن ننصب بمفردنا
خيمة من الشعر وسط عالم من الحرائق..
حين ظننا أن بإمكاننا
أن نفرّ من دنيا الحقد والكراهية إلى قوقعة الحنين..
حين تصورنا أننا نستطيع أن نتجاهل ضجيج الكون
ونفتح قلوبنا للسمفونيات الزرقاء..
كان هذا ذنبنا الأعظم..
ثم اكتشفنا أن الحرائق تستطيع أن تلتهم الخيام ..
وأن قبضة الحقد تستطيع أن تهشم القواقع الصغيرة ..
وأن الضجيج يخمد كل السيمفونيات..

بدأنا نتحاور .. ونمت للحوار أظافر ومخالب..
قلت أنت ِ إنه كان بإمكاننا أن نعيش بمعزل عن العالم الخارجي المشوه .. لولاي..
وقلت أنا إنك فتحت الباب الذي دخلت منه الجراثيم المسمومة..
وقلنا ، وقلنا ..
تبقى ثمة حقيقة مفروشة في وجداني كما أعلم ،
وفي وجدانك ، كما أرجو..
لقد تمكنا من أن نحلم ، برهة ،
في خيمتنا الشعرية ، في قوقعة الحنين ، في السمفونية الزرقاء..
أنجزنا هذه الروعة معاً ..
هل يهم بعدها من الذي أخطأ؟


المرحوم بإذن الله تعالى..غازي القصيبي..


رفعت راسها من حضن أمها مجبورة..
يد أبوها اللي رفعتها غصب عنها..
شافت إبتسامت أمها المطمنة..
وشافت العكس بوجه ابوها..
سحبها له وهمس لها بصوت تعبان مهدوود..
أبو علي بحزن\إصدقيني القول يا بنت حسين..

من غير وعي منها غرزت اظافرها في صدر ابوها..
وبكت بحســرة ..
لاتصدقني ..انا كذاااابة..لا تصدقني..
كانت تصرخ بقلبها وهي تحترق بقهر..
كل اللي قلته لك كذب..الحقيقة عكس اللي قلته..
حتى كلمتي الأخيرة تراها معكوسة يوووبه..
لا تحرمني من الشكوى..لا تمنعني من الراحة..
خلني أقولك وش صار فيني..
أبي أشكي لك وأنوح على حالي..
ما ابى اكتم عبراتي وخوفي..
ذبح بنتك يا حسين..عذبني وضربني..
نسبني لغيرك..عاملني مثل الجواري..
جرحني وكسر في خاطري..
كرهت حالي معه يوبه..
خلني اشكي لك تـــكفى..
أبي أرتاااح يوبه ابي أرتاح..

وعكس كل اللي بخاطرها جاوبته بصوت مبحوح..
قبلت جبينه\صدقت في قولي يا ابو علي..
حط يده على راسها وشدهـ بقووة على صدرهـ..
وكأنه يبي يدخلها بضلوعه..
يحس فيها مجرووحة..
ولما يمر في باله صورة غازي ويتذكر قسوته..
يتحسر على بنته ويتخيل حياتها معه..

تأملها نايمة بتعب..وجها شاحب..
مرر اصابعه على عيونها وخدها..
هزمته الدمعة..
لاتعذبين ابوك ياالقلب..
إشكي لي..قولي لي الحقيقة..وش صار فيك بغيابك..
كم مرة طعنك..وبكاك..
كم مرة شهقتي باسمي مستوجعة..
يابعد أبوك ياهديل وش اللي سواهـ فيك..؟؟
سدحها جنب أمها اللي حضنتها بشوق وقرأ عليها الأذكار..

طلع من الغرفة وشاف عياله كلهم ينتظرونه في الصالة..
الأسئلة..العتب..الزعل مالي عيونهم..
خمس سنين وهو مخبي عليهم وخادعهم..
صار لازم يعرفون كل شيء..
ومادامت بنته عندهـ وتحت عينه..
فماعاد يهمه شيء..
أشر لهم بيده وخرجوا لــ مجلس الرجال الخارجي..
جلسوا بصمت..وهو اتصل على أخوهـ..
وطلب منه يجي ومعه عياله..

صحت من النوم بعد ثلاث ساعات..
جلست بسرعة وهي تشهق لأنها أدركت هي وين..
في السعودية..وفي بيت أهلها..وبغرفة أمها وأبوها..
كانت نايمة بحضن أمها...
تلفتت حواليها بعجز..
همست بألم\يوومه وينك..؟؟

بلحظات تملكها التفكير السوداوي الحزين..
هل ممكن افقدها بعد مالقيتها..
ولا أنا فعلاً مالقيتها..وكنت أتوهم..
هل هذا حلم مبتووور..
بس عمرها الأحلام مارحمتني ووصلتني لحضن أمي..
كانت تسمح لي أشوفها من بعيد واصرخ باسمها وتسمعني..
بس أني ألمسها..أحضنها..هذا ما سمحت لي فيه الأحلام..
أكثر كرمها كان معه هو..
بس هو ماكان من طرف الاحلام..
كان من الكوابيس..

وقفت بسرعة طلعت من الغرفة ونزلت الدرج تركض..
شافت جدتها جالسة في الصالة وسبحتها بيدها..
جلست عندها وضمتها بقووووة مانعة دموعها وشهقاتها..
همست بحنين\أنا رجعت..
الجدة قبلتها على كتفها\هلا بك يا بعدي..

بعدت عن جدتها وصارت تتلفت بإستفهام..
والجدة مستغربة منها..
هديل\أمي وين..؟؟
الجدة تبتسم\في المطبخ..

أتجهت لــ المطبخ بشكل سريع..
شافتها واقفة عند الغاز وتخلص القهوة والفطور..
حست قلبها يطير من فرحتها بشوفها..
حبيبت قلبي يا امي..
قربت منها وضمتها من ورى وقبلتها على ظهرها وكتوفها..
حست بامها تتصلب بوقفتها لانها أنصدمت من ضمتها لها..
بس عرفت من تكون اللي تقبلها بشووق..
هديل بغصة فرح\يووومه رجعت..
ألتفتت لها وضمتها لها بقوووة..
أم علي\ياروح أمي وعيونها..
عسى ربي يبارك ذا الصباح يوم حضنتك..
والله وراحت الضيقة يا هديل وإحساسي بالنقيصة..

رفعت راسها لامها تغالب دموعها..
قبلت كفوفها وهي تتنهد براحة..
هديل بإبتسامة\ماطلبت من الدنيا إلا حضنك وقربك..
مابقى شيء يستاهل الضيقة دامني معكم..
أم علي تبتسم\فرحتي ما أعطيها أحد بهـ اليوم..
هديل تضحك\ولا أنا..مبسووطة يومه..
أم علي\دوووم إن شاء الله يا روحي..
هديل\وين أبوي..؟؟
ام علي\في الضيافة الخارجية مع عمامك والعيال لا تطلعين..
هديل بإرتباك\عمامي كلهم..؟؟
أم علي\عمك علي..وعيال عم أبوك..
هديل تخفي خوفها\امممم آاآ ليش مجتمعين من بدري..؟؟
توها الساعة 7 عسى ماشر..
ام علي بحنية\مابه شر إن شاء الله..
خذي كوب حليب جونا بارد..
هديل بإبتسامة\فديت جونا وحشني..
أم علي\ههههههههههه كل شيء وحشك..؟؟
هديل بغصة\كل شيء يومه..كل شيء..
أم علي\طيب ليه مانمتي وأرتحتي..؟؟
هديل\ما ابى..أحس بنشاط ما اقدر أنام..
بأروح أشوف غادة واصحيها..
أم علي\لا بدري خليها تنام..
هديل بعناد\امممم بأصحيها مشتاقة لها..

خرجت من المطبخ وطلعت لغرفة غادة..
دخلت بهدوء وشافتها نايمة على ظهرها..
جلست على السرير بخفة..
مسكت كتوف غادة وصارت تهزها بقوووة..
هديل بصراخ\غااااااااادة..غدووووو قوووومي..
قومممي قلبوو أنا جيييييييييت..وغدة قووومي..

ضحكت بصوت عالي لما سمعت صراخ غادة..
فزت من نومها بخوف وركزت عيونها على هديل..
غادة بصدمة\هو صدق أنتي رجعتي..؟؟
هديل بابتسامة\يب رجعت..قووومي مشتاقة لك..
بلا نووم بلا بطيخ..أبي اعوض كل لحظاتي من دونكم..
يالله قوومي..
غادة تضمها\دام في السالفة تعويض..أبشري.
هديل بخجل\اممم غدوو..ابي اتحمم وأبدل ملابسي..
عطيني من ملابسك..
غادة بابتسامة\لا ماراح أعطيك من ملابسي..
خذي من شنطتك..
هديل\ما اخذت معي شيء من هناك..
غادة\تعالي انتي مافهمتي قصدي..

خذتها لخزانة الملابس..وطلعت شنطة صغيرة..
فتحتها وعرضتها لهديل..
غادة بغصة\هذي بعض ملابسك..
اخذتها من غرفتك قبل ننتقل هنا..
كنت أحب احتفظ فيها..لانها تخصك..
صح ماكانت بترجعك لي..بس ...... أنا...
جربت فقدان غالي وموته فيك..
كل شيء يخصك كنت اضمه وأبكي عليه..
أتذكر مواقف بينا كنت أزعلك فيها وأستفزك...
وكنت أمووت من الندم لأني بيوم ضايقتك..

كتمت هديل عبرتها وضمت غادة بحنية..
ماتبي تسمع الباقي..يكفيها الوجع الباين بعيونهم..
يكفيها إنهم عاشوا بحسرة موتها سنين وهي حية..
آآآهـ يا رفيقة دربي..
لو تدرين كيف حرمني من بقاياكم..
ومن أغراضكم اللي أخذتها معي..
عاقبني كثييير..تجبر وألمني..
حرمني منكم وقهرنــــي..

بعدت عنها وهي تبتسم..
هديل ترفع حواجبها\أنا بادخل أتحم وألبس من ملابسي وحشوووني..
وأنتي دبري عمرك لأني لما طلعت باسحبك معي تحت غصب عنك..
غادة بضحكة\بأروح لغرفة أمي أتحمم هناك ونجهز مع بعض..
هديل\اوكى..بس ابي اشوف ذياب أول..
غادة\يمكن نايم الحين..
هديل عقدت حواجبها\إيه هو دوووب نوم فديته..
غادة\هههههههههههه لايكون طالع لأبووهـ ..
هديل بصد\يقطع الطاري وصاحبه..

دخلت دورة المياهـ وغادة ظلت واقفة تفكر في كلام هديل..
هزت راسها بآسى على أختها وراحت تخلص نفسها..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

حست بصوت يناديها..حاولت ترد بس مالها حيل..
يدين ناعمة هزتها بخفة وهي تنادي أسمها..
فتحت عيونها بتعب وهي تسمع سارة تتذمر..
سارة بزعل\ياسمين وش فيك كل هذا نوم..أووولي على ئااامتك..
ثلاث ايام زايرة عندكم ما أشوفك..؟؟يالله قومي قبل يجي بعلي..
واحشتني يا مرت أخوي..قومي بلا كسل..

أبتسمت ياسمين بتعب على كلام سارة..
جلست بالقوة وسارة توقفها وتسحبها لدورة المياه..
سارة\أدخلي غسلي وتعالي..
كنت احسبك ذربة وراعية واجب طلعتي خرطي..
شكلي بأشتغلك شغل الحماوات وأطلع عيونك..
جلست ياسمين على الكرسي بتعب...
سارة بغيض\خييير من جدك نعسانة مع عيونك..؟؟
ياسمين\تعبانة مو قادرة اوقف..
سارة بإهتمام\سلامات وش تحسين فيه..؟؟
ياسمين\خموول وألم في بطني وظهري..
سارة بحنية\الله يعينك شكلك تعانين منها كثير..
قومي معي انا اساعدك..

ماسمحت لها تعترض..
ساعدتها تتغسل وتبدل ملابسها..
شهقت بصدمة لما شافت أثر على ذراع ياسمين..
سارة بشك\ياسمين..وش هذا اللي بذراعك..؟؟
ياسمين بهدوء\ضربت في الكبت..
سارة بقهر\كذابة..سلمان يضربك..؟؟
ياسمين\اول مرة يسويها..
سارة بغيض\وناوية تخلينه يسويها مرة ثانية..؟؟
ياسمين ببرود\لا..
سارة\يعني هذا اللي كان مانعك ما تنزلي تحت..؟؟
طيب يا سلمان انا أعلمك كيف تضربها..
ياسمين بهدوء\سارة ضربته المتني بوقتها..
اللي منعني ما أتحرك المي اللي قلت لك..
سارة بنبرة غاضبة\قومي معي تحت..وجهك اصفر من قل الأكل والتعب..
ياسمين\ليش زعلانة أنتي..؟؟
سارة بقهر\لانه ما يحق له يضربك مهما كان السبب..
وحتى لو كان أخوي مايحق له يضربك..
لا تتستري عليه..
ياسمين بصوت تعبان\سارة مافي نيتي أتستر على أخوك..
موضوع ابيه يظل بيني وبين زوجي وبنتفاهم عليه..
سارة بمحبة\ياسمين أنا اعتبرك مثل سهى ونورة أخواتي..
ومثل نفسي..ما ارضى عليك..
ياسمين\والله بأعرف بقدر حبك إلي..
بس صدقيني إذا عرفتي السبب ممكن تضربيني أنتي كمان..
سارة بصدمة\.................مافهمت..
ياسمين\سلمان أكيد بيقول لكم..
سارة بجدية\مايحتاج يقول..أكيد موضوع خاص فيكم..
وأنتي مستحيل تسوين شيء..تستاهلين منه الضرب..
وحتى لو صار وكنتي تستحقين العقاب..
لاتسمحي لاحد يعاقبك قبل نفسك..زوجك وله كلمة وحق عليك..
هذا أمر مفروغ منه..بس غيره مثلاً أنا أو أحد ثاني غير مسموح..
ياسمين بغصة\كنت مجبوورة..
سارة بحنية\قومي معي ألحين..
وبعدين نتكلم في الموضوع..حالك ماهو عاجبني..

نزلت معها وكانت سارة ساندتها وتسولف معها..
بعدت عنها عشان ماتنتبه امها وتحرج ياسمين..
كل خواتها كانوا موجودين بعد ما أتصلت عليهم سارة وخبرتهم برجوع هديل..
كانت سرحانة عنهم وأجبرها ذكر اسم هديل تركز معهم..
ياسمين\هديل..؟؟
سارة تبتسم\إيه هديل تكون بنت عمي حسين..أصغر من غادة..
هي توئم هادي..تزوجت من خمس سنين وتوها ترجع السعودية..
كنا نعتقد إنها ميتة بس الحمدلله طلعت حية..
ياسمين بشهقة\وينها..؟؟
سارة\جات من إيطاليا مع أخوها وولدها..
بنروح لها في الليل لازم تروحين معنا وتتعرفين عليها..
ياسمين بإرتباك\اممم ماراح أقدر أروح معكم..تعبانة..إن شاء الله مرة ثانية..
أم راكان\يابنتي مايصير لازم تروحين معنا..
أنتي صرتي منا وفينا ولزوم تسلمين عليها..
ياسمين بخوف\ما اقدر..تعبانة...ممــ....مو.....
سارة بهدوء\يومه شوفي شكلها غصب قدرت توقف..
إن شاء الله بكرهـ تكون أحسن واخذها تشوف هديل..

رضت أم راكان لان وجه ياسمين وحالها يثبت تبعها وعدم قدرتها..
بس ياسمين كانت مرعوووبة وتفكر بيأس..
كيف تقابل أهل هديل..امها الطيبة..وجدتها..وحتى غادة..
علاقتهم مثل الأخوات وماتبي تخسرهم..
الكل بيدرون إنها خبت عليهم سر هديل..
الضرب كان من نصيب زوجها..بس الباقين كيف راح يتعاملون معها..
ماتبي تخسر محبتهم وثقتهم..وما احد راح يتفهم إن هذي كانت رغبت هديل..
بهذي اللحظة أدركت مدى غلطها..
كان المفروض تتكلم من زمان..وتدلهم على مكان هديل..

حاولت توقف بس الألم زاد في بطنها..
حست بيد سارة توقفها وتسندها..
سارة\والله شكلك ماهو عاجبني..
خليني أخذك لـ الدكتورة..نتطمن عليك..
ياسمين بتعب\لا..بانام وإن شاء الله بأصير بخير..
بس ساعديني أروح لغرفتي..

طلعتها سارة وسدحتها على فراشها..
وقبل لا تقفل باب الغرفة سمعت صوت ياسمين تبكي..
توعدت في سلمان وتركتها لحالها..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛