مجموع الأوسمة: 17

قفل جواله وهو يغلي من الغضب..
وش تبي فيه تطلب حضووورهـ ..
معقولة يكون غالي عندها وتبيه يطلع من السجن..
يعني تبي تتصافى معه وتقاطعني..؟؟
دخل المركز وهو يتوعد في غازي مايطلع من السجن..

دخل المركز وطلب يشوف غازي..
ما انصدم لما شافه في مكتب العقيد..
سلم وجلس معهم..
وعرفه العقيد لانهم يتقابلون كثير..
هادي بسخرية\يا عقيد انا أشتكي على نسيبي..
ضربني قدام الناس..
العقيد\ههههههههه الأخ غازي قال عن مقلبك فيه..
بصراحة انصدمت إنك تشتكي على نسيبك..
هادي بإبتسامة\متسلف مني من خمس سنين ..ولا رد الدين..
غازي بسخرية\الليلة ارد الدين يا ابو نسب..
العقيد\الحمدلله اللي كسبنا شوفتك اليوم يا ابو ذياب..
وانت يا أخوي هادي..مقالبك خلها بعيدة عن السجن..
هادي\ماحلت الا في السجن..بس ماعرفت إن بينكم معرفة..
لا يكون خريج سجون يا ابوذياب..؟؟
العقيد بإحراج\حشاهـ ما انسجن الا في خير..

أستئذن منهم العقيد وخرج من المكتب..
لأنه لاحظ عصبية غازي..
وكلامه ما أثار آي فضول عند هادي..
هادي\تبي تعرف وينها فيه..؟؟بشرط..
غازي\وينها..؟؟
هادي\بأقولك لأنها طلبتني اقولك..
بس انا عندي شرط..تقضي الليلة في السجن..
بأي تهمة تعجبك..إختطاف..تزوير..قتل..اللي تبي..
وبكرهـ إطلع من السجن والعنوان معك..
غازي بتحدي\دامها طلبت إني أعرف وين مكانها..
فانا باعرفه من دون مساعدتك..
ألبي لها وين ما تكون..

طلع من المكتب وهادي مبسوط لانه ما قاله وينها فيه..
مثل ما درت في إيطاليا أدورها..
دوور على المملكة ودور عليها..
أدري ما بتلقى ربع ما لقيناهـ ..

وباقي حساب النذل سلمان..
خله يرجع من دبي ولكل حادث حديث..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛


خرجت من البيت ومشت في الحديقة..
صار لها اكثر من شهر وهي في بيت اهلها..
لما يتصل عليها تقفل جوالها..
ولما يرسل رسالة تحذفها قبل تقرأها..
تحس بنفوور كبير منه..وبنفس الوقت تتمنى تشوفه..
جلست على مقاعد الحديقة ..
وكان جوالها في يدها وتقرأ رسالة من راكان..

شفت الليالي وش تسوي و الايام
شفت الخوي وشلون ينسى خويه..؟

غادة بتعب\أوف حتى رسالتك معطرها بريحتك..
قفلت الجوال بعد ماحذفت الرسالة..
راكان يبتسم\يالكذوووب الرسالة بعد فيها ريحتي..؟
وقفت بسرعة وبعدت عنه..
غادة\وع وش جابك..رووح لبيتكم..
راكان بضحكة\المفروض أعطيك بوكس على اسنانك..
يعلمك كيف تقولين وع..بس عاذرك..
غادة بقهر\ياربي راكان روووح تنظف..وعععع..
راكان بمرح\والله انتي جنيتي على نفسك..

لم يدينه حواليها وضمها له وقبلها بقوووة..
أنبسط على محاولتها تبتعد عنه وهي تضربه وتصرخ..
راكان بحب\أبى اعرف مالقيتي غيري تنفرين منه..
عنبوا ابليسك نسيتي أيامنا الحلوة والرومنسية..؟؟
غادة تبكي\وخررر عني..طلقني ما ابيييك طلقني..
راكان\أوف بس أنتي عدي الشهرين الجاية وحسابك عندي..

بعد عنها لما زادت في البكاء..
غادة\والله اعلم ابوي إنك تتحرش فيني..
راكان\هههههههه اتحرش مرة وحدة..
غادة وبدت تحس انها بتزوع\طلقني..

دخلت البيت تركض هاربة منه وهو يضحك عليها..
تهرب منه حتى في الإتصالات..
من لما عرف إنها حامل وهو مشتاق لها ..
كان يتمنى لو يشوفها ولو بالصدفة بس هي ما تسمح له..
ولما ينذكر اسمه تبكي وتطلب الطلاق..
كان يتوعد فيها بس تهدأ نفسها وترتاح يطلع كل فعايلها من عيونها..
وكل ما تذمر يقول مالقت غيري تتوحم عليه..

ألتفت على صوت محمد الغاضب بتمثيل..
محمد\خيييير جالس تتحرش في أختي..؟؟
راكان\ههههههههههه سمعتها المهبولة..
محمد\هههههههههه قليل أدب طلقني..
راكان\هههههههه تبطين عظم..
محمد\ترى بتروح معنا بكرة..
راكان\وين رايحين..؟؟
محمد\الشرقية..يومين وراجعين..
راكان\أفا ولا تعزمون ولا شيء..؟؟
محمد\هذي سفرة عائلية..يعني بس الـ حسين بن جاسم يروحون..
راكان\ولدي ماهو منكم..لذلك مايروح..
محمد\نذل..
راكان\ههههههههههه الله معكم ترجعون بالسلامة..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛

توني حسبت حساب بعدك وفرقاك
توني دريت اني بدونك ولاشي
خليتني مابين طيفك وذكراك
عذبت حالي ليش ماترفق شوي
ارجع ولو تامر على الروح تفداك
ارجع ترني شفت موتي وانا حــــي ...

ركب سيارته متوجه لـ الشرقية ...
قدر يعرف مكان علي عن طريق أصحابه في البنك..
اتصل عليهم يسأل عن علي وإنه ضروري يلقاهـ قبل يسافر..
بس تعذروا منه وقالوا إنه مسافر ماهو في الرياض..
وسأل عن المدينة اللي هو فيها..
وعرف إنهم في الشرقية..

وصل الشرقية وأتصل على جوال علي..
وكان متأكد إنه راح يرد عليه ولا بيطنشه مثل قبل..
لانهم وأخيراً رضوا يدلونه على مكانها..
غازي\وينها..؟؟
علي ببرود\معي..
غازي\ويـــن..؟؟
علي بهدوء\هي طلبتك عشان تتفاهمون على كل شيء..
أتمنى تحترم رغبتها وتريحها..
ما ابي اتمشكل معك بوجودها..
غازي بسخرية\خايف..؟؟
علي يبتسم\إلا متمني اغرقك في البحر..
غازي\حلووو في أي شاليهات أنتو..؟؟
علي\تدري خسارة الذكاء اللي فيك عليك..
غازي\قل اعوذ برب الفلق..
علي\هههههههههه حن في شاليهات..........رقم......

قفل الجوال وهو يتوعد فيهم وفيها..
مثل ما تركت الرياض من غير علمه..
أجل تبين نتفاهم يا دلووعة هادي..؟؟
تستقوين فيه ومبسوطة بلمتهم حوالينك..
كابري ومثلي بقد ماتقدرين..
راجعة لي بعون الله راجعة..

إسبوع وزيادة مرت عليه..
لما كان ناوي يحدد اليوم اللي يروح فيه مع جاهة كبيرة جامعها من قبايل كثير ومشايخ..
حتى الأمراء دخلهم في جاهته ولبوا طلبه..
بس اجل زيارته لما اعترف ابوها وحلف غنها ماهي موجودة في البيت..
وإذا جاب جاهته معه ما بياخذها لانها مسافرة..

قلب الدنيا عليها..
سأل عنها في المطار في الرحلات الداخلية والخارجية..
بس ماأنذكر لا اسمها ولا اسم علي..
واليوم عرف مكانها وحالف ما يرجع الا بها أو بوعد منها ترجع له..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛

دخلت الغرفة بعد ما نيمت غازي بغرفته..
كانت ناوية تترك الغرفة له وتطلع منها..
بس هذا الشيء راح ينحسب عليها..
فقررت تظل في الغرفة وإن كان يبي يترك الغرفة ويهجرها بكيفه..

شافته واقف ويناظرها بنظرات غريبة..
ماقدرت تفهم شيء من نظراته..
بس الرجفة اللي حست فيها نبهتها إنه شيء مو لصالحها..
توجهت لدورة المياهـ..
اخذت علاجها من الصيدلية الصغيرة..
وهي ملاحظة إنه يراقبها..

قررت تطلع من الغرفة بسرعة..
لأنها حست بشيء غير طبيعي صاير في راجح..
رفعت عيونها والتقت بعيونه..
مرت دقيقة ولا واحد منهم تكلم أو شال عيونه عن الثاني..

فقدت كل ثقتها بنفسها..
كانت بتصرخ فيه وش فيك..؟؟
ليش تناظرني بهذا الشكل..؟؟

الخوف من شيء مجهول سيطر عليها..
فلما قرب منها صدت عنه بسرعة وخرجت من الغرفة..
دخلت غرفة غازي وقفلت الباب عليها..

جلست على الكنبة وهي مغمضة عيونها..
لا فيه شيء..والله فيه شيء..
أول مرة اشوف راجح كذا..
هو يحبني..أدري يحبني..
بس اليوم هو غير..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛