مجموع الأوسمة: 17

..... 91 .....






في هاللحظه كل الانظار توجهت لمنى عادل ونواف
عادل وقف وهو زعلان هالمره من جد : البيت بيت امي حتى لو ماتت ي عمه ومحد يقول غير هالكلام واذا امي ماتت بنظرك وبقلبك ما ماتت عندنا وخالتي ما تنطرد من بيتنا
منى هنا فهمت انها غلطت غلط كبير لما حست بعيونهم تغيرت :انا ماقصدت كذا بس
عادل : ما تحتاج تفسير كلنا فاهمين وش قصدتي
ام رامي : انا رايحه لبيتي
عادل : لا ي خاله لا انتي اذا ما شالك بيتنا تشيلك عيونا تعالي اجلسي
ام رامي : انا كنت بتطمن على فيصل واذا تطمنت خلاص بروح اصلا وسن لحالها بالبيت
عادل : اجلسي ي خاله انا اروح اجيب وسن انتي ارتاحي
ام رامي راحت لعادل وهي تضمه : ي حبيبي ي عادل الله يخليكم لي ذخر
عادل باس راسها وهو يقول :انا رايح ارتاحي
جلست ام رامي وهي تبي تضحك تبي تقهر منى اللي وقفت وطلعت بضيق اما ابو عادل اللي اعجبه تصرف عياله بس ماعجبه جلست ام رامي وعدم احترامها له فقرر يقوم ويتركهم
عادل طلع يجيب وسن ونواف جلس مع خالته اللي ابتدت تحقق معهم بحياتهم مع سهام نواف مستسلم ويتكلم
ظ ظ 
ظ 
عند سهام اللي كانت هالمره مو اي مره وتبكي بحرقه وهي ناويه ماتجلس هنا لو تموت دخل ابو عادل وهو يشوفها تجهز الشنطه
ابو عادل : سهام وين رايحه
سهام: اسمعني زين ي طلال انا ما ضريت فيصل ولا ادري من سوا كذا اقسم بالله اني ماسويتها والله ولو الموضوع وقف كذا كان بلعتها اما تجي هالمتخلفه وتتهجم علي وانت ساكت مستحيل مستحيل
ابو عادل تنهد واتجه لها وهو يجلسها: سهام انا شرحت لك كل هذا من اول ليله وقلت لك عن اللي بيواجهك ام رامي هاذي مريضه وانا مقدر اواجهها ولا اقدر اسوي شي لاني مستحيل اسوي شي لحرمه وبعدين اللي مقويها انها غاليه على العيال كلهم ولا اقدر اسوي شي واخسرهم انا اقول تجنبيها مريضه
سهام : وش ذنبي انا وش ذنبي شوف لي حل مستحيل اتحملها
ابو عادل: تجنبيها اتركيها تسوي اللي تبي واخسريها اصلا هي ماتجي كثير ما تستاهل انك تزعلين عشانها
سهام وهي تبكي : طلال افهم والله ما زودت الملح لفيصل والله
ابو عادل : اجل مين اذا مافيه احد غيركم انتي وفيصل
سهام: اكيد فيصل اكيد
ابو عادل: لا لا لا ي سهام انتي شفتي فيصل كيف تعبان وغير كذا نزل مع نواف وعادل والاقوى انه عباله منى اللي سوتها يعني ماايدري عن كل هذا وطول الوقت كان نايم
سهام صدت وهي تبكي ومتاكده ان فيصل هو اللي سواها بس كيف بتفهم طلال
ابو عادل : عدي الموضوع المشاكل لابد منها مو في يدينا
سهام : ودني بيت اهلي بجلس عندهم كم يوم ارتاح ويرتاح البيت شوي
ابو عادل : سهام وش ذا الكلام لا مستحيل اوديك وش بيقولون عليك
سهام :مابيقولون شي ابي ارتاح
ابو عادل :صعبه ي سهام مقدر اسمعيني ارتاحي هنا ولا تطلعين ولا احد يجي لك احسن
سهام بترجي :تكفى طلال بس يوم انا بدور عذر تكفى
ابو عادل تنهد بضيق : زين زين اللي تبينه
قامت سهام وهي تغسل وجهها وتبكي ندمت حيل وتمنت ما تزوجته وهذا اللي يسمونه اول الغيث قطره
لبست بعد ما ترتبت وشالت اثار البكى من وجهها ورجعت لابوعادل وهي لابسه عبايتها ابو عادل كان يدري انها ماتسويها بس بعد متاكد انه مو فيصل : سهام انا مدري وش اقول لكن انا متاكد مو فيصل ولا انتي
سهام: خلاص الله يخليك من اليوم ورايح مالي شغل في فيصل
ابو عادل تنهد :زين يلا
طلعوا وشافوا ام رامي جالسه مع نواف ومقضيتها سوالف وضحك واول ماشافتهم زادت تضحك وسهام هنا ولعت ولفت وهي تمسك في ابو عادل اللي هز راسه بأسى
ام رامي : روحه بلا رده
طنشوها وطلعوا قامت ام رامي :تعال تعاال نروح نفرح فيصل بطستها
نواف :يلا
طلعت ام رامي وهي مبسوطه دقوا باب غرفة فيصل اللي باقي يضحك وفز وهو يحاول يوقف ضحك وسوا نفسه ضايق :مين
ام رامي :فيصل حبيبي افتح ابشرك هالحيه راحت بيت اهلها
فيصل نط من فوق السرير بفرحه وطاح وكان لاخر لحظه بينسى التمثيل ويفتح الباب بس تذكر ووقف وهو ينط ويضحك ويحضن اي شي يقابله وبعدها وقف بجمود وفتح الباب : شسوي يعني
ام رامي حضنته: ماعليه ي حبيبي ادري ضايق بس هذا حنا ذلفناها من البيت
نواف : فيصل الله يخليك خلاص
فيصل راح وجلس :خلوني لحالي
ام رامي : لا لا مافيه خلوني لحالي قوم معي بننزل تحت واسوي لكم غدا تاكلون اصابيعكم وراه بلا اكلها المتسمم ونضحك ونسولف وننبسط وهذا هو عادل راح يجيب وسن وبنستانس اليوم
فيصل اول ماسمع طاري وسن ضاااق بس عداها عشان سهام طست :خاله مالي نفس
ام رامي سحبته وهي تقومه: يلا بس تردني
فيصل ابتسم بهدوء الحيله :زين انا اصلا مقدر اردك
ضحكت ام رامي ونزلوا كلهم تحت وابتدت ام رامي تصلح لهم غدا وهي تغني وفيصل اللي دخل بالجو يطبل بالقدر ونواف يصفق والجو رهيب ..






..... 92 ......






بعد تقريبا نص ساعه دخل عادل ومعاه وسن اللي كانت طايره من الفرح سمعوا الاصوات في المطبخ وراحوا
عادل باستغراب :فيصل نزلت
فيصل ابتسم بهدوء يمثل فيه المرض :احد يقدر لأم رامي
عادل قرب وهو يحضنه: زين تسوي فيك وانت بعد مالك شغل باحد اهم شي صحتك فيصل انتبه لنفسك
اشر فيصل براسه وصد لما شاف وسن اللي تسلم على نواف : فيصل كيفك الحمدلله على سلامتك
فيصل زفر بهدوء : يسلمك ربي كيفك انتي
وسن : الحمدلله
ام رامي : يلا يلا تعالوا ساعدوني خلاص شوية ويجهز الغداء
الكل قربوا يساعدونها وكان وضعهم مع وسن كانها اختهم لكن وسن مركزه على فيصل وبس تحارشه نزلوا الغداء وكان فيصل بالقوه ماسك نفسه لاا يسولف والكل كانوا مبسوطين وقالبين الدنيا
ظ ظ 
ظ 
عند منى اللي دخلت البيت وهي معصبه رمت عبايتها وهي تدعي : حسبي الله عليك ي العقرب ي اللي مالك خاتمه
الجد فز بفجعه: وش فيك وش اللي صار
منى سحبت طرحتها وهي تربطها على راسها اللي صدع : ومن غيرها مقباس الشر اللي جات وحاست الدنيا من غيرها اللي ماتستحي
الجد : منى قولي فجعتيني
منى: خالة العيال حسبي الله عليها
الجد حط يده على راسه :وش سوت بعد هالمجنونه
منى: وش اللي ماسوته
ابتدت منى تحكي وهي تولول من قوة القهر الجد كان فعلا مصدوم من اللي صار كله: الظاهر ان الزواج ذا ماهو الا مصيبه على طلال
منى: لا والله قول متسلطين عليه مصايب
الجد : حسبي الله وسهام وش صار عليها
منى: ما ادري جيت وهي بغرفتها
الجد : لا حول ولا قوة الا بالله انا مدري وش باقي بيصير
منى: والله مدري مدري
الجد :الله يجيرنا من اللي جاي
سعيد من عند الباب :انتي اللي دخلتي هالنار بينهم يوم زوجتي طلال
منى: الله يرحم والدينك ي سعيد ماني ناقصتك انت الثاني
سعيد :هذا الحق وباقي بتشوف عينك كثير ي منى الحين شوفي وش سويتي
الجد :الله يهدي الجميع
قامت منى وتركتهم وهي فيها صداع الدنيا كلها
ظ ظ 
ظ 
اما ابو عادل اللي ترك سهام عند اهلها وغير طريقه وهو متجه لدكان ابو عبد المجيد وقف ونزل وهو الضيق باين على وجهه ولا يبي يرجع البيت وهو يدري ان ام رامي هناك
ابو عبد المجيد وقف وهو يرحب : ي هلا ي مرحبا عاش من شافك
ابو عادل : تعيش ايامك ي ابو عبدالمجيد كيفك وش علومك؟
ابو عبد المجيد : الحمدلله انت كيفك كيف العيال وكيف اموركم من الناس الجدد
ابو عادل جلس وهو يتنهد : والله مدري وش اقول انا من سيء لاسواء
ابو عبد المجيد وهو يصب القهوه :افا وش السالفه وش صار
ابو عادل : قول وش ماصار الظاهر ان زواجي اكبر غلط سويته ومدري كيف اتصرف اول مره احتار كذا
ابو عبد المجيد :خير اللهم اجلعه خير وش السالفه
ابو عادل جلس يحكي لابو مجيد كل اللي صار معه من بداية زواجه
ابو عبد المجيد : والله ي اخوك وضعك متأزم
ابو عادل : انا هنا مدري وش اسوي اذا نصرت سهام زعلوا العيال واذا نصرت العيال ظلمت سهام وانا فعلا بين نارين قول العيال مقدور عليهم ويمكن هاضمين سهام المشكله فيصل وسهام
ابو عبد المجيد : والله ي طلال من النهايه اقولك فيصل وسهام مستحيل يتصافون او حتى يتغاضون عن بعض كل واحد منهم يكره الثاني وكيده لثاني اقوى ولا تقدر تحدد من فيهم سوا مشكله وبما انك مافي يدك حيله عشان تنصف بينهم الحل الوحيد انك تفرق البيوت عشان ترتاح وخصوصا ان خالة العيال تجي عندهم وتسبب مشاكل
ابو عادل : وش تقول انت الله يهديك تبيني اطلع من البيت عشان تقوم القيامه من جد هم كل بلاهم انهم خايفين اني اتركهم وانشغل عنهم
ابو عبد المجيد: قولي وش بتسوي هاه طالما ان فيصل وسهام بنفس البيت مشاكلك ما بتوقف وانسى انها توقف
ابو عادل : اي انا ادري بس وش السوات
ابو عبد المجيد : ما عندك الا هالحل والا انك تشغل فيصل عن سهام
ابو عادل : وشلون يعني
ابو عبد المجيد : مدري فكر بشي يشغل فيصل
ابو عادل : انا متاكد ان فيصل لو رضى على سهام الكل بيرضى
ابو عبد المجيد : هذا شي مفروغ منه
كملوا سوالف وهم مركز سوالفهم فيصل اللي مايعرفون كيف يتصرفون معاه
ظ ظ 
ظ 
اما عند سهام اللي دخلت بيت ابو مشاري وهي قادره تتحكم بدمعتها وانفعالاتها شافتهم متجمعين على الغدا :سلااام
فزت اديم وصرخت بحماس : سهااااام
الكل ضحك وهم يرحبون بسهام اللي نشبت بحضن اديم اللي تصارخ
سهام: ههههههه اديم اوجعتيني
اديم :مشتاقه لك ي خبله وينك طولتي علينا.






..... 93 ......






سهام: شسوي مشغوله شوي لكن ابشرك جيت وببات الليله هنا
اديم رجعت تصارخ وهي تحضنها مره ثانيه : اييييه زيييييين
ابو مشاري:ههههه تعالي تعالي ي سهام اشهد بالله انك لك فقده عظيمه
سهام ضحكت وهي تتجه وسلمت عليه :وانتم والله
مروى: هههههه انا اكثر وحده فقدتك ترا
اديم:نصابه كعادتك
ام مشاري: لاو الله انا اللي فقدتك
سهام راحت وهي تسلم عليها: عاد انتي صدقتي والله كلكم وحشتوني
ابو مشاري: اجلسي اجلسي تغدي جيتي بوقتك
سهام :لا الحمدلله سبقتكم وتغديت مع طلال
اديم:شعليك تغديت مع طلال ي شينها رومانسية الشياب ههههههه
الكل ضحك لما انقلب وجه سهام وهي تضربها بالشنطه:نشوف وش بيصير فيك وبعدين انا بعدي شابه شزيني
اديم: ههههههههه الله يخلف بس
ام مشاري : والله لو قايله بتجين لحضر لك كل اللي تحبينه
مروى:من جد والله وش هالزياره المفاجأه
ابو مشاري : البيت بيتها تجي وتروح بالوقت اللي يناسبها
سهام: الله يعزك ي اخوي ماتقصر
ابو مشاري : كيفك وكيف طلال وعياله كيف فيصل سمعت انه تعبان
من اللي على الطاوله طلعت تنهيدتين اديم وسهام اديم تنهدت بحب لفيصل اللي كل يوم عن يوم يمتلكها اكثر من اللي قبله ويطغى عليها بأسلوبه الجذاب اما سهام تنهدت بقهر من سوايا فيصل وقالت : ايه فيصل قبل امس طاح علينا واخذوه للمستشفى لكن الحين الحمدلله بخير والعيال بخير
ابو مشاري: والله مايشوف شر نفسي ازوره بس مامعي وقت
سهام بغل في قلبها: لا تتعب نفسك هو مايجلس بالبيت عشان تزوره
مروى: هو وش فيه اصلا عشان طاح
سهام كانت كارهه الكلام عنه وقالت لهم انه هبوط بالضغط ولا حبت تفصل بالموضوع كثير
ظ ظ 
ظ 
ع المغرب وصل عساف ورائد لبيت ابو عادل وهم ناوين يزورون فيصل
عساف : تتوقع عندهم احد
رائد: واذا عندهم احنا بناخذ فيصل ونطلع مالنا شغل بأحد
عساف : صادق
فتح الباب نواف وسلم عليهم وراح ينادي لفيصل بعد ما دخلهم المجلس
فيصل اللي كان يمشي بهدوء وهو مو مصدق متى يوصل المجلس وعادل معاه
عادل : ي هلا ي هلا
عساف ورائد وقفوا يسلمون عليه وبعدها اتجهوا لفيصل اللي كان يمثل التعب بإتقان
عادل : انا بروح اجيب القهوه
عساف :لا والله ارتاح متقهوين عادل : اقول ارتاح بس
راح عادل واول ما طلع نط فيصل وهو يضم عساف ورائد اللي انفجعوا وشهقوا مع بعض بصدمه فيصل ضحك: بسم لله عليكم وش فيكم
عساف بصدمه : فيصلوه لا تقول كل هذا تمثييل
فيصل: هههههه اليوم بس تمثيل
رائد طارت عيونه: فيصل اقسم بالله او تقول ان اللي صار معنا امس وقبله تمثيل لزعل من جد
فيصل : انثبر انت وياه ماكان تمثيل اليوم بس تمثيل او مثل ماتسمونه وقفت الحظ
عساف : قول وش مسوي اقسم بالله قلبي قايلي فيك إن بالموضوع
فيصل : انتظروا بس لا تفضحونا ترا محد يدري الا انتم
رائد: انطق نشف قلبي انطق
عساف : فيصل اقسم بالله صرت اخاف منك ي رجل
فيصل ضحك وهو يقولهم عن اللي صار اليوم وفيه ضحك كل هذا قاله تحت سمع عادل اللي انصدم هو بعد من فيصل فتح الباب بقوه ونزل القهوه بالارض : فيصل
فيصل لف بقوه وهو يناظر عادل عساف ورائد بعد كانوا نفس صدمه عادل وطاحت قلوبهم من شكل عادل
عادل اتجه لفيصل وهو يسحبه وقفه وهو يهزه : كل شي ممكن اسكت عنه الا انك تظلم ما تخاف ربك انت ما تخاف ربك واحنا اللي عبالنا تعبان ومسكين واثاريك تحفر فيصل انت وش صاير لك ليش كل هذا خلاص صارت القصه مرض كل شي كنت تسويه تقبلته وقلت مافيه ضرر لكن تظلم سهام وهي اللي ما نوت لك شر صغرتها قدامنا كلنا ولا فكرت وفوق ذا كملت عليها خالتي الادميه متعبه عمرها ومصلحه لك غدا وشايله همك وانت تسوي اللي تسويه وفوق ذا تمثل المرض علينا ابوي تعبت قلبه من كثر ماهو شايل همك انت خلاص صرت اناني ما تفكر هاه قول تكلم وش عذرك من اللي تسويه هذا كله كل يوم مشكله شكل على شي فاضي رضيت بسهام والا ما رضيت محد جابرك ياخي لا تحبها محد حالف انك تحبها بس لا تظلم ناظرني زين من اليوم ورايح تترك لعب الاطفال حقكك وتصير رجال والا والله اقول لابوي عن اللي تسويه وهو يتصرف
عساف : عادل الله يهديك انت فهمت خطا الموضوع مو كذا
عادل : عساف اسكت لا تجلس تعزز له على خطا
فيصل : هذا فوق اني جالس احميكم منها تقول عنها ظلم وانانيه
عادل : من قالك نبيك تحمينا ولا تاخذ دور المضحي المسكين احنا ما شفنا منها اذى عشان تحمينا واترك عنك هالحركات احسن لك ..






.....94 .......







فيصل : ما راح اتركها ونشوف وش بتسوي
عادل بصرامه : نهايه الموضوع اقسم لك بالله طول ما انت تسوي هالحركات لساني ما يطب لسانك
فيصل انصدم : حلو انت بعد رحت بصفها
عادل : طالما انك تظلمها لا تتخيلني بصفك
طلع عادل وتركهم
رائد : شفت وش سويت بنفسك اعجبك
فيصل : ريحنا انت الثاني وش مسوي انا خرجت عن المله
عساف : وش بكم قمتوا عليه هاااه هي تستاهل اللي يصير وانتهى محد قالها ترضا فيه
رائد: عساف انت تدري انه غلط لا تجلس ترقع
عساف : وخر بس فيصل لا تشيل هم وماعليك
فيصل زفر بضيق وجلس وهو يحط يده على راسه
رائد : وش بتسوي الحين
فيصل : وش بسوي يعني بروح اكلم هالحمار لا يفضحني
رائد : عادل صادق
عساف : يرحم امك عاد الانسانيه هاذي مره موب وقتها
رائد : انا اتكلم من جد حرام اللي تسويه
فيصل : رائد يرحم امك مالي خلق نصايح طافح طافح نصايح
عساف :اسمعني روح كلمه وعقله وان استدعى التمثيل مثل
رائد : شتقولون ي مجانين
فيصل غمز لعساف بدون ما يحس رائد: لا ما بمثل كفايه اللي صار بروح اكلمه وامري لله
عساف :زين براحتك حنا ماشيين
فيصل :الله معاكم
طلعوا عساف ورائد وهم فيهم اللي راضي وفيهم المعصب
اما فيصل اللي دخل وشاف خالته ووسن راحوا انبسط انهم مو فيه وطلع لعادل وصل غرفة عادل وهو يستعد لبداية تمثيل قويه دق الباب ودخل :عادل
عادل طبعا اللي كان في قمة غضبه وهو جالس ويهز رجله مارد على فيصل اللي دخل وجلس قباله: عادل بلا هبل انا اكلمك
عادل : قلت لك وش تسوي عشان اكلمك
فيصل : عادل انت تدري اني مستحيل أأذي احد وتدري بعد اني مابي وجود سهام في البيت ومحد راضي يفهمني
عادل : ما احد طلب رضاك ي فيصل محد طلب رضاك سهام بغرفتها تحت لا تتعرض لك ولا تتعرض لها وانت انثبر هنا وسهام هنا تخدم ابوي سامعني
فيصل تنهد : بس هي جالسه تأثر على ابوي وبكره بتخليه يرمينا ولا يلتفت لنا
عادل: فيصل انت مو بزر وفاهم وتدري ان كل هالكلام من راسك وابوي مستحيل يرضى يصير هالشي طيب
فيصل : اذا تعلق فيها بيرضى
عادل : الله يخليك شيل هالافكار من بالك ولا تتعبني وتعب نفسك
فيصل : عااااادل لا تستهين في الموضوع ي عادل
عادل ؛ فيصل انا مقدر خوفك علينا ومن فقد ابوي وحياتنا بس هذا مايعطيك الحق انك تظلمها انا ادري انك شايف الموضوع بسيط وانك ماسويت شي كبير لكن انت اذا استهنت بهالسالفه بتسهل عليك بكره الظلايم وتوصل معاك الاشياء كبيره محد فينا بينجى منها فيصل ركز معي جرب تطنشها وينتهي الموضوع اذا انت مو قادر تتعايش معها لا تحتك فيها واتركها بحالها واذا فعلا جاء يوم واذتك سهام صدقني مو بس انا بوقف بوجهها انا وابوي وكلنا محد بيتركها تلعب على الحبلين الله يخليك ي فيصل خوفك هذا لا يفرقنا خلنا نعطي الناس فرص وبنشوف
فيصل طبعا ما اقتنع ومستحيل يقتنع بس مضطر يجاري عادل شوي : واحنا بنستناها لين تضرنا
عادل ابتداء يتكلم بنقاط ضعف فيصل عشان يفهمه : فيصل انا ما همني اللي بتسويه سوي اللي تبي بس انتبه والظلم انتبه اول شي مايرضي الله وحوبته كبيره وثاني شي امي بعد وما ترضى وانت جالس تظلم تذكر تذكر لما كنا نكسر شي بالبيت وكل واحد منا يرمي الشغله على الثاني كانت تضربنا كلنا وتعاقبنا كلنا وماتكلمنا مو عشان هي زعلانه إنا كسرنا وخربنا لا عشان كل واحد فينا عشان ينقذ نفسه يظلم الثاني وش موقفك لما تظلمها عشان تنقذنا وش موقفك لما تروح تحكي لامي عن اللي سويته غلطان صح
فيصل فهم حركة عادل صح اثر فيه بس صعب انه يقتنع وعنده قناعه في باله انه بيطلع سهام لو انه يقتل مو مهم واخذ دور انه تأثر : زين ادري اني غلطان وادري انه شي بشع بس عشانك وعشان امي مابي اسوي لها شي وابيك تشوف بعينك وشلون هي تضرنا بوقف كل شي وانت راقب انا مابي اخسرك ي عادل ومستعد اسوي اللي تبي بس لا تزعل وبعطيهم فرصه ونشوف
عادل ابتسم بفرح ان فيصل طاعه وقرب وهو يخبط على كتفه : ايوه كذا لا تنسى نفسك وتربيتك وانا متاكد انك بترضى بالنتيجه
ابتسم فيصل : هاه خلاص استبينا صافي ي لبن
ضحك عادل وهو يضربه بخفه: حليب ي قشطه
نواف دخل : خير جالسين لحالكم وتاركيني
عادل :ههههه تعال تعال
نواف : خلونا نطلع نتعشى برا والله من زمان ما طلعت
فيصل : من جد حتى انا ضقت
عادل : يلا قوموا خلونا ندق على ابوي بعد
فيصل : يلا احنا بنجهز وانت اتصل على ابوي
عادل : يلا ظ ظ 






..... 95 .....






عند سهام اللي ماصدقت تتفرد بأديم كانت جالسه على سرير اديم اللي تسولف وتضحك وهي جالسه بالكرسي المقابل لكنها انصدمت اول ماشافت سهام اللي نزلت راسها وهي تبكي فزت واسرعت لها : سهااام بسم الله عليك وش فيك
سهام رفعت راسها وهي تمسح دموعها بضيق : اووف ي اديم ي ليتني سمعت كلامك مدري وش لي بهالعايله
اديم طاح قلبها: وش فيك وش مسوين لك قولي لي
سهام هدت شوي وابتدت تشرح لها اللي صار لها من اول يوم إلين اليوم وكله بسبب فيصل وهي متاكده من ذا الشي
اديم هنا ما عرفت وش احتارت وش تعبر ماتدري تدافع عن مين بالضبط ماعرفت الا انها تضمها وهي تقول :نصحتك ماسمعتيني وش في يدي الحين وش في يدك مالك الا الصبر يمكن يتعدل
سهام : مقهوره منه ي اديم مقهوره
اديم : الله يلعن ابليس انتي وش سويتي له عشان يسوي كذا وش مصلحته
سهام: يبيني اتطلق واطلع من البييت
اديم : حسبي الله على العدو حسبي الله
سهام: قولي لي وش اسوي الكل كويس ما عدا هو والزفت خالته
اديم :مالك حل الا تطنشينه وتبعدين عن المكان اللي هو فيه الين يحصل ابوه له حل وتفتكين
سهام: عمري عمري ما انهنت كل ما اهانتني خالته
اديم: طيب طلال يقول انها مريضه خلاص اتركيها على ربك
سهام : الله يعين والله انهد حيلي وانا توي من اسبوع
اديم : انا اقول اتركيه وهو بنفسه بيعرف غلطه ويجي يعتذر منك
سهام: تهقين
اديم :اهقى ونص تراه واضح انه ضعيف ومتردد
سهام : ليت كلامك جد مابيه يعتذر ابيه يتركني من شره
اديم :وكليه ربك وهو كفيل بكل شي
سهام تنهدت وقامت وهي تقول : انا بروح ارتاح احس تعبت اليوم حيل
اديم: وسعي صدرك بالرحمن ان شاء الله بتنحل
سهام: الله كبير
نزلت سهام وعلى طول اتجهت لغرفتها وهي تبي ترتاح قفلت جوالها وهي على امل ان بكره اجمل
ظ ظ 
ظ 
في بيت ابو محمد اللي كان اشبه بالكهوف والحياه فيه مستحيله بسبب ظلم ابو محمد اللي كان فاهم الخوف على عياله وحياتهم غلط وبحرصه الزايد يكرههم فيه كان البيت ساكن وهادي نسرين اللي مكسور خاطرها من بعد ملكة عادل وبعد هالمجهول اللي هددها بذاك اليوم ولا تدري وش تسوي
اما ريمان اللي كانت ما تتهنى بنومها وهي خايفه من كلمة عادل اللي كل يوم تخوفها بسبب ان عادل يكون عارف عنها شي واصراره الغريب في الزواج منها ومتخوفه من سكوته الين الحين
اما ام محمد اللي قلبها متعب من حال بيتها اللي من يوم عرفت ابو محمد وهي حاله مع عياله ومحمد اللي اخذ نهج ابوه في حياته مع الكل اما رائد اللي استقر برا البيت لانه مستحيل يتحمل الوضع
ظ ظ 
ظ 
في المطعم كانوا ابو عادل وعياله مبسوطين ويسولفون ويضحكون قطع عليهم ابو عادل اللي كان كلامه جدي : فيصل ي ابوي
فيصل :سم يبه
ابو عادل : اسمعني ي حبيبي زين انا ادري انك ما تبي سهام بينا وادري كارهها ولا تحبها ولا اطلب منك تحبها ابي منك تتجاهلها انسى وجودها كأنك ما تشوفها ي ابوي انا تعب قلبي من المشاكل كل يوم وانا اوعدك مالها شغل فيك ولا تكلمك ولا لها اي علاقه فيك واذا في بالك انها بتاخذني او تأثر فيني ضدكم شيله من بالك قلتها مره وارجع اقول مليون مره انا ما اطلب منك تحبها لكن ابيك تتجاهلها تماما عيش بالبيت زي ما انت تحب اطلع وادخل زي قبل سولف لو تبي مع الجدران هذا بيتك واللي يعجبك سوه لا سهام ولا عشرين حرمه تغير هالشي مكان امك محفوظ عندنا كلنا محد له اي قدره يغيره وهذا الكلام كلنا متفقين عليه انا حرصت اليوم عليها مالها شغل ابدا في اي شي يخصك نهائيا ومنى بتهتم فيك وتسوي اللي انت تبي المهم تكون مرتاح
فيصل حزن على ابوه بس برضوا هالكلام ما غير قناعته في الانتقام من سهام قرب يبوس راس ابوه: ابشر يبه من اليوم مالي شغل فيها نهائيا ولا بعدها موجوده ابشر باللي تبي
ابو عادل : ايه الله يرضى عليك وابي منك بعد تهتم بجامعتك وتركز فيها وتتخرج وتتوظف
فيصل :من عيوني يبه
عادل : انا اضمن لك هالشي يبه
ابو عادل :الله يخليكم لي ويفرحني فيكم
الكل :وياك يبه
طبعا كملوا الاكل وهم متاكدين ان فيصل خلاص اقتنع وترك سهام بحالها لكن في الحقيقه فيصل مسوي هدنه بسيطه وبيرجع قريب ظ ظ