شبكة همس الشوق - عرض مشاركة واحدة

24 - 3 - 2022, 12:37 AM

قصيدة يادهينه - مطلق النومسي

كل رجال يميز من قرينه
وكل علة يكشف الباري سببها

وكل ما هاد البحر ركبت سفينة
وكل ما هاج البحر .. ماج وركبها

والبحر يا ابو سعد محد يدينه
والسفينة وش تبقى من خشبها ؟

الشواطي لا سلام ولا سكينة
والبحر لا وصلت الشاطي قلبها

بس يا مشعل لي الله واستعينه
كيف أبا أرفض حاجة ربي كتبها ؟

لازم اصبر والصبر للرجل زينة
وش جنيت من الحياة إلا تعبها

كم سهرت ونامت بعيني مدينة
كم عطيت أرواح من روحي طلبها

كم تحاشيت النفوس المستهينة
وكم تناسيت الجروح ومن جلبها

وكم زرعت ب صدري ل غيري جنينة
ولا قدرت أذوق حبة من عنبها

يا ولد عمي ترى جروحي دفينة
لي ثمان أعوام وانا مجتنبها

شوفني وتشوف كم نفسي حزينة
شف عيوني .. وإلا تدري ؟ .. شف هدبها

كل رمش يغازل الدمعة ب عينه
كنه يكيف عليها لا سكبها

التسامح حطنا للناس طينة
أتشكل في يدين اللي قضبها

كيف نرضى بالخطا والعذر وينه
والمصيبة ما لحقنا إلا عتبها

نحسب إن الطيب ينفع بالعفينة
والعفينة طيبنا يملا .. ذربها

لا امتلا بطن العفين من الشنينة
قال راس المرجلة يشبه ذنبها

واحد ما تلحق الطولة يمينه
لو تجيه المرجلة تركض .. عقبها

قص عرق الدم من بيني وبينه
والعروق اللي تفوح ب طيب جبها

نخلة الوادي لها ظل ومتينة
بس قام الدود يمشي مع رطبها

فوق كفي .. يا دهينة .. يا دهينة
لا تكبون الدهينة من قربها

والله أن أكبر خطا .. وأكبر غبينة
والدهينة كل من جا .. يحتلبها

صح ... من قال القرايب غرغرينه
لا كلت كعب القدم تلحق ركبها

وانت يا مشعل يا أبو مدة سمينة
يا سليل اللي معربة نسبها

مصطفى الاغا .. قصدك .. ب كلمتينه
أنت الأجمل .. وأنت الأكمل .. وأنت الأبهى