كيف اطفي الريح بثيابك وكيف اشعلك
كيف اتنثر على جمرك وكيف احتويك
نـقّـضت ليل الحرير وجيت منت لهلك
سميت باللي فتني بك وقلت ابتديك
هذا اول الدرب او هذا الطريق اولك
جيت اتوقى عذابات المدى واهتديك
شوقي مسافه وهمساتك مدار وفلك
ان ماضميتك غلى يا علّني ما ارتويك
ايه اعرفك واعرف اني من غلاك اجهلك
مرات اضمك واخاف اني مشبه عليك
مرات اشوفك بنفس الوقت واتخيلك
وانشد كفوفي عن آخر سالفه من يديك
آعن لك لو تصب الموت واتخيلك
واجوع لك واتمنى خنجرك واشتهيك
ما قلتلك عمر سيف العشق مايقتلك
ماتشوفني حي قدامك وانا اموت فيك
اشتقتلك قبل اجيك وجيت واشتقتلك
البارحه طول ليلي بين هذي وذيك
ملّيت جمر انتظارك واستحيت اسألك
واحسبتني مابعد جيتك وفكرت اجيك
اثرك بقلبي من البارح وانا استعجلك
واثري نسيتك من الفرحه وقمت احتريك
|
|
|
|