ديوان و نبدة عن الشاعر متعب التركي

23 - 1 - 2022, 03:05 AM

ترجل الفارس

هذا الخبر صدمه وحزن وعلامه

على محبّة كل الامه لخطاب

هذا الخبر والهم هذى خيامه

شرّع للأحزان النوافذ والابواب

ألحقت من جاب الخبر لى ملامه

صعبه على الانسان توديع الاحباب

البارحه غابت عن العين قامه

قامة رجل زلزل قناعات واحزاب

ترجّل الفارس وذب العمامه

واستقبل الموت بحفاوه وترحاب

ترجّل بصمت ووقار وصرامه

حتى وفاته شى يدعو للأعجاب

من يعتبر فقدان كفه وسامه

أكيد ماهو لحظة الموت مرتاب

وجه واهو مسجى بدر فى تمامه

ميت ولكنه واهو ميّت مهاب

أومت له كفوفٍ تمنّت سلامه

بكته الامه قبل تبكيه الاقراب

خطاب ماهو بس رمز الشهامه

خطاب نجمٍ فى سما الامه وغاب

حر شهر والطلع دار الكرامه

والحر مايعنيه تحليق الاسراب

فعله فرض على الجميع إحترامه

واسمه ملا الدنيا بطوله واهو شاب

ماكانت الدنيا مثار اهتمامه

بالعكس كان لنصرة الدين وثاب

لو كان يبحث عن نفوذ وزعامه

كان امتلا صدره نياشين والقاب

الاخره كانت على طول امامه

فى هالزمن خطاب واشباهه اغراب

اختار بديار الجهاد الاقامه

ومن كان هذى رغبته لازم يثاب

واختار بالاسلام ذروة سنامه

الصبح ساحة حرب والليل محراب

يكفيه فخر ان الشهاده ختامه

ماحسّب لدنياه ولعمره احساب

يارب تغفر له وترفع مقامه

وتعظّم أجر إمة محمد بخطاب

23 - 1 - 2022, 03:06 AM

النصايب

يانفس هيدي لاتزيدين الاوجاع

كافي من الدنيا نشوف العجايب

ماني على من صد ضايق ومرتاع

لاهو من الغالين والا القرايب

لاصارمابيني ولابينه نزاع

ولاجيته بزله ولا علم خايب

حق الرفيق اني نهيته ولا طاع

والراي مابه فرض والا غصايب

يومه غدى بينت له كل الاوضاع

ماقلت اخلي سايب الوضع سايب

ناديت له لكن تجاهلني وضاع

صد وعلى عمياه ساق الركايب

اقفاعلى رايه ولافيه مرجاع

مثل السحاب اللي قفته الهبايب

للعلم بين الناس مدخل ومطلاع

واللي يجّود حامض العلم صايب

من ينطح المويه ولاعنده شراع

ان عاش يرجع من هك الموج هايب

والعاقل اللي لاخطا يرجع بساع

يسترجع ولاياخذ الراي عايب

واللي يصير لرغبة النفس مطواع

لابد مايلقا العنا والمصايب

والناس مختلفه لها اشكال واطباع

بعض المعارف عرفهم لك نشايب

بالناس من يلبس على وجهه قناع

حسود لكن في ثياب الحبايب

هذاك ماني في مخاواه طماع

من قبل اجيه وخاطري منه طايب

والا الرجال اللي لهم بالوفا باع

وقفاتهم تبري الجروح العطايب

واللي لفاك بحزة الضيق فزاع

مادار وجهه عن سموم ولهايب

ماصد يوم انك من الوقت ملتاع

ماغاب يوم ان اكثرالناس غايب

هذاك تشرى خوته كيف تنباع

هذاك من شانه تهون الصعايب

قلته وانا مالي ورى هرجي اطماع

على افراقه لاتصير السبايب

اسمع مادام الصوت ياصل للاسماع

ان تبت ولا ياعسى منت تايب

مادامها صارت حزازات واتباع

مالي ومال مدورين الطلايب

واعرف تراها لو شكت ثقلك القاع

مصيرها تركز عليك النصايب

23 - 1 - 2022, 03:07 AM

لمثلها والا بلاش

زى لون الطيف وألوان الفراش

الهنوف اللى شغلنى صدّها

إن بكت جا دمعها مثل الرشاش

وإن تبسّم ثغرها من قدّها

وإن حكت كن بشفايفها رعاش

الخجل عن سالفتها لدّها

والطيور اللى جفت حضن العشاش

ليتها خلّت بقايا ودّها

عقبها كل الغصون أمست نشاش

خاليه عقب الوناسه خدّها

كل قلبٍ فى ذراه الحب عاش

فيه طيبه زايده عن حدّها

والقلوب إن فارقت صارت هشاش

موحشه والذكريات تشدّها

رفرف البرق وزِمَت بيض الدشاش

وامتلا من صافى الما عِدّها

مابنيت بيوت شعرى من قشاش

ليه أخاف إن الرياح تهدّها

والهجوس اللى من الفرقا عطاش

ترقب نجوم السما وتعدّها

يوم شق النور من ليل القماش

شفت حبّة خالها فى خدّها

القصيد لمثلها ولأّ بلاش

لو تبى عمرى حشى ماردّها

23 - 1 - 2022, 03:08 AM

مرفوض

مرفوض ياللى بعت غيره عشانه

أزريت عن رد الجزا أو تهاونت

مابي لك أكثر سد باب الميانه

بانت مع الوقت الخفايا وبينت

مادام مالى وسط قلبك مكانه

أنا بعد مثلك عن الحب هونت

أنا مثل خيال خانه حصانه

عذره يقول من الرسن ماتمكنت

غرّه مع المركاض وارخى عنانه

مخطى وانا غلطان يوم انى امنت

لو كنت وافى ماتخون الامانه

ياللى تقول تشيب روحك ولا خنت

ذاك الهوى لو ماشعرت بحنانه

ماكنت فى حلو القصايد تفنّنت

شاعر تزلزل من فراقك كيانه

لك يعترف مايسكن القلب غير انت

اليوم كلن يحتفظ في مكانه

لا كان يوم به عرفتك ولا كنت

لو كان قلبك صافى الود خانه

فى ذمّتى ماهان حبّك ولا هنت

أحدٍ يخون وواحد الوقت خانه

أنا ترى الثانى وألاوّل تراه أنت

23 - 1 - 2022, 03:08 AM

يقصر الشعر

قلت القصيد وقال لبيك لبيك

على مثل عبدالله اتعب اخيولك

من قبل لا اشوفك واعرفك واحاكيك

اسمع من افواه النشاما فعولك

كلن مدح فعلك عسى الله يعافيك

والناس لولا فزعتك ما عنولك

مافيه مجلس ينذكر فيه طاريك

ألا ورواده بطيب اشهدولك

جيتك وانا اسمع فيك من قبل ماجيك

ودخلت قلبي بس من شفت زولك

جيت ولقيت ان التواضع سمه فيك

عرفت منها وش سبايب قبولك

واحترت مدري ويش اقول بمعاليك

الشعر يقصر طايله ما يطولك

المجد يتبع يابو راشد خطاويك

كنه لكل الناس يعلن وصولك

الطيب مثل ظلال زولك يباريك

وافق ميوله يابو راشد ميولك

لله در الشايب اللي مربيك

ولله در اللي بعد صوتو لك

مافيه طيب ماتمنا يخاويك

لوشفت في قلبه مكانك يهولك

اسمك جمع ناس وقبايل حواليك

ومدوا يديهم لكريم ودعولك

والطيب يلقى عندك وفي حراويك

والا وش اللي يجمع الناس حولك

كم واحدن وده بطيبه يجاريك

حاول ولكنه تثاقل حمولك

ان كان بك عذروب عيبك تماديك

بالطيب وافعلك تجي ضعف قولك

هذا بعض شعري وصف بعض مافيك

الشعر شعري والفعايل فعولك

23 - 1 - 2022, 03:09 AM

طاب السهر

يوم طاب السهر عيت تطيب النفوس

جت من الله وانا كم كنت محتاجها

كنها من حلاها كل ليله عروس

خايفه من عيون الناس واحراجها

حي هالطول يا زولٍ عساه محروس

من عبث لوعة الايام وازعاجها

تزعل نفوس ولا تمتلي غيض روس

من يقرب لها وضلوعي سياجها

لي متى وانت يا شوق القلوب محبوس

طالت السالفه وابطيت بعلاجها

جعل قلبن على نار الغياب محموس

يحترق بين صاليها ووهاجها

من خبر له غلا بين الضلوع مغروس

غرسةٍ كل ابو شعري من انتاجها

لا تقرب لك الفرقا هذيك الهجوس

من متى والبحور تفارق امواجها

لازم اصبر على وجه الزمان العبوس ..

لين سود الليالي يضحك احجاجها

من بغى يقطع الفرجه يعاف الجلوس

لين ياصل نهايتها ومخراجها

كان شعري قصر ما طال شمس الشموس

تستريح القصايد داخل ادراجها

23 - 1 - 2022, 03:10 AM

خيل السروج

ليه وطيت عن خيل السروج

ليه مديت عقب القراح الهماج

لا تجمل لي الغلطات والعوج عوج

يضحك احجاج او ينعقد لي حجاج

اصبر اشوي وش علمك تهوج وتموج

ميت القلب مثلك مايعرف الهياج

ماتعودت اجامل معتلين البروج

الزم العلم قبل يصير هرجك سماج

المشاعر تحي مثل المعاصير هوج

ونت مالك على هوج الرياح احتجاج

جيت وقلوب حسادي تميل وتروج

لا صفى جوهم ساعه قفاه العجاح

ابتسم لك وهمي فوج يقفاه فوج

من يحبك لزوم ايصر مثلك هجاج

بس قلي ونا غلطان لك ومحجوج

وين يلقون لجروح النواعس علاج

القمر غاب وانت اطفيت نور السروج

قلت يكفيك نور الوجه الاصبح سراج

كن بين الضلوع العوج صفقات موج

يوم فاض الغلا والشوق والقلب هاج

ضيقة الصدر لو بين المحاني تلوج

كل ضيقة لها عند الكريم انفراج

ماهو الغيض سبت كل ابو هالهروج

بس مالي على بعض السوالف مزاج

23 - 1 - 2022, 03:11 AM

وسيع البال

ياوسيع البال ضيّقت الصدور

رحت ماعلّمتنى وين أنت ساري

فى غيابك مال خلق الله حضور

وفى حضورك مالهم بالبال طاري

ليه ماتختال يابدر البدور

والقصايد لك وصيفات وجواري

لك بنات الفكر ربات الخدور

يكشفن لثامهن والجرح عاري

جعل قلبٍ ماملاه الصدق نور

عند وجه الريح مايلقى مزاري

التغاضى عجز لاطال القصور

ليه أدارى وأنت عني منت داري

الزمااااان قصير والدنيا تدور

كل يوم يضيق فى عينى مداري

صاحبى محتاج لك شعر وشعور

وإحتياجى شى ماكان إختياري

من متى والغصن يختار الطيور

من متى والبال يختار الطواري

لاتسمى صمتى البارح غرور

انكسارى خلف هالصّمت متواري

فى غياب الشمس وش ذنب الزهور

والمطر لاشح وش ذنب الصحاري

اللقا لحظات والغيبه شهور

تقصر الخطوات ويطول إنتظاري

لو قريت المنكتب وسط السطور

ماكتبت لغلطة العمر إعتذاري

صمت هالمينا مثل صمت القبور

مارسى مركب ولا لاحت صواري

23 - 1 - 2022, 03:11 AM

ماهو خطآ

ماهو خطاعشان ادور معاذير

ولاهوغلط عشان ادور صوابه

اليوم توه عود لوكره الطير

واصبح يشوف العالم اكثر رحابه

مستغربين انه ملى قلبي الخير

ليه الغرابة! وين وجه الغرابة؟

تعبت ادور للخطاوي مشاوير

لين التعب زاد الليالي رتابة

يبكي فرح من شاف بعض التباشير

معذور لو دمعه يبلل ثيابة

من كنت بأول خامسة طفل صغير

كنت امتلي حزن وغموض وكأبه

كنت أشعر اني غير والمدرسه غير

هيمان في جو النبي والصحابة

كنت المح بوجه الليالي تعابير

وأقراء همومي قبل أعرف الكتابة

والشعر غاااب وله محبة وتقدير

اول غيابه شلت هم لغيابه

بالنفس كان لبعض هالأمر تأثير

والليلة اهون من جناح الذبابه

23 - 1 - 2022, 03:12 AM

سر الإبتعاد

الموت هين والبلا وش ورا الموت

عند الحساب .. يهون سهم المنايا

باكر نموت وتصبح قبورنا بيوت

وعقب القصور بضيقات الزوايا

في جوف الارض وكل من حولك سكوت

وتعاقبن بالقبر عوج الحنايا

يارب يا منجي نبيك من الحوت

سترك وعفوك يوم كشف الخفايا

باكر ليا جينا على داعي الصوت

شيبان واطفال وشباب وصبايا

ندعي وحنا بين باكي ومبهوت

ورحنا لها ننقاد مثل السبايا

يا رب تهديني قبل لحظة الفوت

وتغفر ذنوبي يا كريم العطايا

اشكيك هم ٍ داخل الصدر مكبوت

وايامي اللي بالخطايا ملايا

ان لاذ بك من كان طايع ومبخوت

في من يلوذ المرتكب للخطايا؟

يا رب يا قادر على كل طاغوت

لا ياقف اللي وحدوا بك خزايا

رحماك لا منا صحينا من الموت

واليا وقفنا عند بابك عرايا

المواضيع المتشابهه لموضوع: ديوان و نبدة عن الشاعر متعب التركي لموضوع: ديوان و نبدة عن الشاعر متعب التركي
الموضوع	كاتب الموضوع	المنتدى	مشاركات	آخر مشاركة
ديوان الشاعر حمد البريدي	نجمة الليل	همس دواوين الشعراء	14	11 - 7 - 2023 01:05 AM
ديوان ويمنعنبذه عن الشاعر مطلق النومسي	حنين الأشواق	همس دواوين الشعراء	89	8 - 5 - 2022 10:32 PM
ديوان ونبذه عن الشاعر فهد المساعد	حنين الأشواق	همس دواوين الشعراء	65	7 - 5 - 2022 08:09 PM
ديوان الشاعر ضيدان بن قضعان	دلع الشوق	همس دواوين الشعراء	12	27 - 9 - 2021 01:33 AM
ديوان و نبذه عن الشاعر سعد علوش	همس الشوق	همس دواوين الشعراء	16	27 - 9 - 2021 01:31 AM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع

ديوان و نبدة عن الشاعر متعب التركي

همس دواوين الشعراء