ديوان ويمنعنبذه عن الشاعر مطلق النومسي - الصفحة 7

8 - 4 - 2022, 07:20 AM

قصيدة ماهي نهايات إقتراب - مطلق النومسي

ماهي نهايات إقتراب ولا بدايات إبتعاد
ولاهي شفاحة نفس راعيها على اللذة يموت

ولا هيب نزوة تدفع الجاهل لتحقيق المراد
ولا هيب سكبة عاري المنسب ليا لبس البشوت

ولاهي قياسات المسافة من بلاد إلي بلاد
ولاهي ضحك صنعا على طيبة أهالى حضرموت

هي حالة من الشوق تدخل ضمن بند الإعتقاد
يعنى تعدت مرحلة حرب التمايل والثبوت

حالة توهّج للمشاعر فوق جمرات الفؤاد
ماهي سماع الصوت لالا المسئلة ماهيب صوت

المسئلة أكبر من التفكير فيها .... والوكاد؟؟
إن الغلا والشوق يبنولك على قلبي بيوت

ياللى خذيتي عن صبايا الكون وضع الإنفراد
جيت بظفر جدي عقاب وحقّقي لي شوق نوت

تكفي غرابيل الزمن والناس وأشباح البعاد
ماعاد لي قدره وأنا همي لبسني لبس كوت

ما أبي جماد يفوت.ويجيني على حوله جماد
وأنا ماغير أرقب جماد يفوت وإلا ما يفوت

أبي قبالك حي .... يا لذّة نسانيس البراد
لا يا بعد والله مقابل صاحب القلب الشموت

وأنا أدري إنك جامعه شمل المطاوع والعناد
وأنا أتجمّع لك زعل مثل زعل لعب البلوت

روفي بحالي وإرحميني يرحمك رب العباد
اللى رحم يونس بعد مامسى تحت فكين حوت

وتبصّري باخر ثلاث بيوت أبا أكتبهن جداد
تو إستثارن هاجسي .بس إفهمي معنى البيوت

الزير ما يعرف لو إنه طاع شور إبن عباد
والموج ماله ذنب لو يغرق شراع الجيلبوت

والأرض معذوره إذا تبكي من أفواج الجراد
بس الجبل مخطي ليا بكّاه سلك العنكبوت

والتوت الأحمر له معي كلمة ولا يمكن تعاد
يا توت تبقى لو جفتك الأرض عند الناس توت

استجمعي فكرك ترى التفكير نوع من الجهاد
واللى يجاهد حسبته يا ينتصر وإلا يموت

وانتي من اسيادالنصر .. والنصر سيّد لا يساد
لكن تسيّدتي عليه .بقوّة الفعل الصموت

هذي صفة فيك.وتحقّق لي كمال الإعتماد
وأرتاح من هم الحكي وأنام بأحضان السكوت

لأنك أكيد بتعرفي.ماهي بدايات إبتعاد
ولاهي سماع الصوت .لأن المسئلة ماهيب صوت

8 - 4 - 2022, 07:21 AM

قصيدة الفراق - مطلق النومسي

صحيح أنا تفارقنا وكل راح في حاله
ولكن كان للتقدير موقف ما تناسيته

أنا قدرت وضعه والفراق أشتد زلزاله
وصاني على الصمت وعلى التفكير وصيته

وسامحته على اللي قال واللي ما بعد قاله
وعلى راحت ضميره والقرار الصعب خليته

وبديت أرقب نتايج خلوته بدموع هماله
وتحريته على نار وياليتي ما تحريته

صدمني بالفراق وسرعته في ردت أفعاله
وثبت بي خيال ما سعى الواقع بتثبيته

بعد ما كان أقرب لي من الرجال لظلاله
بعد ما كان يضحك لو قسي قلبي وبكيته

بعد ما كان قاهر كل عذالي وعذاله
بعد ما كان يتفرش سحابي كل ما جيته

بعد ما كان يعشق من رجاحة عقلي هباله
بعد ما كان سيد قلعة الشعر وعفاريته

بعد ,, وش عاد باقي ؟ يا بعد يا كود مواله
ليا جره وأنا غافل وقرب لي وضميته

أنا وشلون أصدق بالفراق وبارق خياله
وأنا قبل أمس لا, لا , أمس لا, لا, اليوم في بيته؟

وش اللي صار يا ربي ؟؟ وش اللي غير أحواله ؟
وش اللي يجبره يصد صوتي يوم ناديته ؟

قسي ؟ وألا نسى ؟ وألا عسى؟ ما كان في باله ؟
فراقي ,, وأعتبر ما صار ممسك صعب تفويته

عجب يا قلب كيف حظوظنا بالوقت مياله
وأنا ما فيه شي ما يسوى , ألا وسويته !!؟

غدى راسي هدف نقص الزمان وخمة رجاله
وأنأ راسي عزيز وعن سقاط الحكي عزيته

وعزيت الحبيب اللي ضوى قلبي على جاله
وشلت القلب .. في كفين مرضاته وحطيته

وانا ماني .. ولد عمه .. ولا حتى ولد خاله
ولكن دون إبن عمى .. وإبن خالي تعزويته

ولكن راح .. وأبقاني على صدر الحزن عاله
ولزمنى خطاي .. اللى عليه نذر .. ما اخطيته

ف إذاهو شايف حبه إضافة ذنب لأعماله
أنا أطهر ما عملته في حياتي يوم حبيته

وعزاي إني على حق .. وعزاي أنه على فاله
وعزاي إني , على صدق الغلا والشوق خاويته

ولو حنا تفارقنا كل راح في حاله
أبستناه ,, لين الموت تاقف بي مواقيته

8 - 4 - 2022, 07:22 AM

قصيدة كل عام وأنت بخير - مطلق النومسي

يا طير ياللي تركب الريح يا طير
قل للحرار اللي تطير بسمانا

اليوم هذا غير وأفراحنا غير
وصدورنا يدفع زعلها رضانا

كل عام وأنت بخير .. وأحرارنا بخير
وكل عام والدنيا على مشتهانا

كل عام تجمعنا حسان المقادير
ويربط بعضنا في بعضنا غلانا

تمايلن يالفاتنات الغنادير
ولجّن زغاريد الفرح من ورانا

البارحة هبّت على خشمي عصير
وتمثنت بصدري نسايم هوانا

وأخذت لي مع جن شعري مشاوير
وليا توانا قلت وشبك توانا

يا جن أنا في مخ راسي سعاطير
وليا أتربت لحيتك .. تكرم لحانا

هنا .. هنا .. للشعر معنى وتقدير
وهنا .. هنا .. شعورنا يا شعرانا

جانا هلال العيد .. والعيد بكيّر
لا والله إلا العيد ... بكيّر جانا

مع جية علوم السعد والتباشير
حي البشير وحي علمِِ لفانا

بشارة تسوى الذهب والدنانير
عطا من الله جل رب عطانا

بشرى .. الشفا والعافية يالله الخير
يا أميرنا .. وأمير كل أمرانا

مرضك يمرضنا .. ولا فيه تفكير
إن الشفا .. لعروق جسمك .. شفانا

وطيحتك غزو أسود.. ووقفتك .. تحرير
والحمد لله .. مستصح .. ومعانا

يا شيخنا .. يا قمة طويق والنير
ياللي نشوفه .. وإن بغانا لقانا

يا أطهر سريرة .. سيرتك للعرب سير
يا وجهنا .. يا جاهنا .. يا ذرانا

يا مقدم زحول الرجال البواتير
حنّا ... وحنّا من يشرف نبانا

جعافرة .. يكتب لنا العز .. تقرير
يوم الفزع .. ما أحدن توطى حمانا

فراشنا شلف ... وغطانا شواطير
والله من عزِِ بلمعة غطانا

ما للمذلة عندنا أية معابير
الله خلقنا عزاز .. ما هو خطانا

في عصرنا الحالي والى ماورى الزير
وهو مستوانا ثابتاً مستوانا

اطفالنا ترعب قلوب المناعير
وحنا على كبود النشاما عشانا

نكسر عيون المجد بالزود تكسير
والماء ليامنا بغيناه مانا

ونكسب بأيادينا بهز الطابير
ماهو بورثة جد مات وكفانا

قد قالها سعدون شيخ المظاهير
كسبِِ بالأيدي من حلايب عدانا

جعافرة .. وإكتب يساوي .. مخاسير
للي قرده الله .. وقام وغزانا

بالحق ما نقبل كلام ومعاذير
وحقوقنا .. وحلوقهم .. ما تدانا

عشنا كذا .. ولعزّنا صار تأثير
ومن عزّنا عاشو بعز ..حلفانا

ذا .. بإختصار .. ودون شرحِِ وتفسير
طرّاه .. شوف الشيخ صالح معانا

سالم .. ومتعافي .. ومرتاح .. وبخير
والحزن ماله غيمة في سمانا

قلت أتمثّل بإبن الأمعط .. وأنا أشير
يا وجهنا ... يا جاهنا .. يا ذرانا

8 - 4 - 2022, 07:22 AM

قصيدة الهرج - مطلق النومسي

الشاعر مطلق النومسي يمدح قبيله عنزه

الهرج مابه خوض عرضه .. // .. وطوله

ابختصر كل السواليف // ..بشوي

بيوت بالمسك // العتيق // مغسوله

ونياتها // .. واهدفها.. اصفا // من المي

لها تحت صدري .. زمان // معقوله

ثارت // ولكن ثورتن..// .. وضعها سي

وعقلتها لين ..//.. اكمل القاف // حوله

واطلقتها ..//.. واليوم تمشي // مشي غي

يسوقها وبل // المزون وهطوله

ولحترت // الشرقا تمايل // لها الفي

مدلله ومن // الاوادم // جفوله

واليوم اسمعها النشاما كما // هي

من قلب جمعتكم // توافق // .. ميوله

واي // عنزي // لاطاب طيبه // رجع لي

فيكم افاخر كل قوم // وحموله

واقول ربعي مالهم // بالبشر زي

وارفع بكم راسي // ولحدن يطوله

واقول // دي لمن تعرضلكم // دي

من دونكم كل اليدين // مغلوله

وفيكم اهد // طويق وانسف // جبل طي

يعيال وايل يانتاج // الرجوله

يامن بفزعتكم مشى // الميت للحي

حنا هل // الطولات وأهل // البطوله

واللي للي راد في // نزلنا لي

زحول قوم // وكل اهلنا // زحوله

ولا ذكر بعيال وايل // ولد عي

النومسي غنى // ودرج ذلوله

مدو يديكم عل // تفداكم يدي

في خاطري كلمه // وكلمه عجوله

كلمه تغنيكم عن // الزاد والمي

اذا تجمعتو تصيرون // دوله

واذا تفرقتو تصيرون // لاشي

8 - 4 - 2022, 07:23 AM

قصيدة لشر تعطيني إشاره وتلميح - مطلق النومسي

حاولت أصدّقها دموع التماسيح
وأشرح لها معنى ضبيح الحناجر

وحاولت أشيلك عن عيون المشافيح
وأقول هاجر يا أطرق العود هاجر

وحاولت أقرّب لك خشوع التسابيح
والتوبه اللى عانقت قلب فاجر

وحاولت أجمّع لك شتات المسابيح
وطغى الفقير ليا تحوّل لتاجر

وحاولت أوصّف لك قلوب المجاريح
وعلاقه الدمعه بيأس المحاجر

وحاولت أحس أنى على منبع السيح
ولقيتك أول من يحب المشاجر

للشر .. تعطينى اشاره . وتلميح
وللخير .. تصبح يا هوى البال زاجر

وأنته بخيل وتدّعى هبّة الريح
وأن الكرم ورثك من الشيخ ساجر

وأنته بخيل أبخل من الشهد للشيح
ولا أنته كريم الا بطعن الخناجر

دوّر على غير الكرم لك مصابيح
والا الكرم عيّوا عليه الهواجر

8 - 4 - 2022, 07:24 AM

قصيدة يازمن.. يا ناس - مطلق النومسي

قصيده مدح بالدكتور سعد الركاد

يازمن.. يا ناس.. ياركاب... يارجليه
ياقصايد.. يابحر.. ياوزن.. يا قافيه

سجلوا عني قصيده واشرحو معناها
ماكذبت بحرف واحد منّها موليه

بحرها بحر الدويرج والصدر متحرك
وانتقيت لعجزها سهل القوافي ايه

لأجل يفهمها الصغير مثل فهم الشايب
ولأجل اعرّي كل صاحب نظرة فوقيه

واحد(ن)لامن سرى الطاروق داخل مخه
ينكشف فقر الشعر بالساحه الشعبيه

زم ياخشم القصيد وعلم القصّاده
بالشمال وبالجنوب ونجد والشرقيه

من يخاف الضلع يصلح له طريق الوادي
ومن يخاف البحر لايلعب على شاطيه

الشعر باب الادب ماهوب باب الشحذه
انظروله يا عياله نظره انسانيه

كل واحد يحترم نفسه ويلزم حده
والردى لايمدحه لو يدبل الخرجيه

لايمّدح كود رجال كفو للمدحه
حتى لو ما مدّ له من خزنته روبيه

الردى يعطيك بين الناس لجل يماري
لكن الطيب يمد الطيبه سريه

مثل ابن عمي سعد عضدي وعصبة راسي
يوم ساق الروح يمي سوقة المرعيه

مانصيته.. مار حس بضيقتي وانجدني
شوفوا فروق الرجال... وزودوه شويه

الشجاع بن الشجاع بن الشجاع الباتع
الكريم بن الكريم ملطّخ الشبريه

الشريف بن الشريف بن الشريف (الموقف)
ماعلى ساسه كلام... وعز طاريه

يجذبه جده دخيل الله وجده ثاري
كل عرق من عروقه نبتةِِ محميه

جده من امه يهوش ونومته بعيونه
وجده من ابوه راعي( بجره الحربيه)

حي والله هالجدود وحي من يخلفهم
ياسعد ياستر جيب الفارع النشميه

جيتني مثل المطر وانا الضمى ذابحني
وان بغيت اقوم طحت وطيحتي مثنيه

الله الى يعلم بحالي وسوء ظروفي
وكثرة التفكير تفرز مشكله نفسيه

يكفي ان النوم يبطي مايمر عيوني
كل مافكرت باحوالي وقصر يديه

مار ياذيبان صوتك يوم مر الهاتف
حول السودا.. بعيني لوحة ورديه

كان صدري قبل صوتك كبر خرم الابره
وصار صدري عقب صوتك وسع هالبريه

علني ماعدم وجودك ياكريم المبدأ
ياسخي الكف.. ياسمح النبا والنيه

ماعلى خلاف دامك بالحياه وطيب
محزمي يامحزمي.. بالفزعه الجديه

فزعتك هذي ماهي الاولى ولا الاخيره
انت عد يروى الظميان ياراعيه

وانت مثل العود الازرق ينتعش من يشمه
وان بغى يلمسك يلقى جمرتين(ن) حيه

ياسعد ياسعد من ضاقت علي الدنيا
ويش ابا اكتب فيك وبيوتي على معيْه

القصايد كلبوها فيك ماتكفيني
وقفتك ماهي شويه.. وانت ما أنت شويه

مار ابختمها ببيت نسجت حروفه
يشرح الي داخلي ويحلل الشخصيه

كان صدري قبل صوتك ضيق خرم الابره
وصار صدري عقب صوتك وسع هالبريه

8 - 4 - 2022, 07:24 AM

قصيدة ماني مسلم - مطلق النومسي

هذي القصيدة هي رد من الشاعر مطلق على خلف المشعان
يقول مطلق النومسي في خلف المشعان ...

ماني مسلّم جاي أرحّب وأهّلي
أنا المعزّب يا جناب المعازيب

يا مرحبا ترحيب بعضه بكّلي
وكلّه ببعضي يكتب أحلا التراحيب

ما غبت قصدي صد وإلا تغلّى
غيبة ظروف وكملتها المكاتيب

واليوم جيت ... ومرحبا في محلي
والله يلعن طاري الشك والريب

والله يا ابو خالد ليا قلت قلّي
لا أقول لك عذرِِ يطيّب ولا يطيب

أعرف خلف مشعان وأعرف مجلّي
عرف الهبايب .. للحمام الرعابيب

البارح خليفان عيّا يصلي
على النبي .. يوم أكثروا بالمناديب

ورحت .. ومراحي ... بالفعل جايز لّي
وأقول يا رحمتك يا عالم الغيب

ولقيت ذيبِِ لهن جديل مدلّي
وله مبسم خاثر ... ولا له مخاليب

وطرا على محسن .. وبيتِِ مولّي
الذيب ماله مفلجاتِِ معاذيب

الذيب ما يمشط شعره .. ويهّلي
لا واهني من مرقده في حشا ذيب

8 - 4 - 2022, 07:25 AM

قصيدة اشغلني الهاجس العاصي - مطلق النومسي

اشغلني " الهاجس العاصي " وأنا اشغلته
اعصاه ..! ليله وخمس ليال يعصاني

إن شان ../.. عرجت به وإن زان ../.. مولته
وإن جيت أبا أجوده يروح ممداني

على كذا لين "تعبني" و../.. هملته
ومن دون مايلتفت مر وتعداني

وجلست ادور // سبب واحد // لمشكلته
ولقيت ../..الأسباب .. تذكرني وتنساني

حتى امتزجبي غرام (التحفه الفلتة)
اللي له // لسان عيني // حرك لساني

هنا بدا هاجسي يشرح معدلته
واستنتج الحل شيخ شيوخ خلاني

جمع شتات الغلا واعاد هيكلته
كانسان يسكن بعالم غير انساني

واستوجب الشعر ينجح في محاولته
والفضل لله وبعد الله ..//.. لقيفاني

جاني يشيل ../.. العسل ويهز../.. منحلته
وإن قلت من شان مين يقول من شاني

لبيه ../.. لبيه .. ياوجهٍ تأملته
استغفر الله تقل "مخلوق روحاني"

اللي تجمل بخفاقي وجملته
بعيون عدوانه وبعيون عدواني

يستاهل القلب ../.. والكرسي وطاولته
وأستاهل أصير "الأول" ../.. ماني "الثاني"

مدام شيخة حروف اسمه // موكلته
على حروف اسمي../..ورسمي ../.. وعنواني

أسلمت لرضاه ../.. وأكفر في ../.. مزاعلته
يعليّ افداه واهل الأرض تفداني

هبيل / هبلبي / اهباله / وهبلته
اهبال ../.. مدري على أية وجه وداني

بس الوكاد أني بوجهه ولا طلته
يعني مثل "سلطت" الحكم البريطاني

هذاك لاسلهم بعينه تخيلته
يعمل كما يعمل ../.. السحر السليماني

وإذا مشى فيه ثقل ولا "تثاقلته"
وإذا وقف توقف النبظة بشرياني

وإذا جلس "مع ثقل زوله" ../.. تطاولته
لبيه ../ .. ياطول قصره بين ذرعاني

شربت توته وانا .. اكل من فراولته
وانا .. أتمناه قدام يتمناني

ذبحني بذوقه / ورقة معاملته
وخلاني أتنفس أنفاسه وخلاني

هذا ..اخر العهد / باخر يوم قابلته
وأقفى على سلم جدانه وجداني

8 - 4 - 2022, 07:26 AM

قصيدة الصبايا الاربع - مطلق النومسي

أغرقوكم بالمديح وكل واحد من لسانه
قام ينسج من بديع الوصف ثوب الجاذبيه

وكثر هرج الناس فيكم وأرتدى المدح البطانه
والبطانه ذكر ربى والتحيات لنبيّه

يالصبايا الأربع اللى كلّهن عقل وتكانه
فرشهن صدر العفاف ولحفهن روح الحميّه

ولا أذكر أنى شفت وحده منّهن شوفة بيانه
بس قلبى عند أصغرهن دعا الروح الشقيّه

يوم زاد الوصف فيك أنتى يا ريح القحويانه
هام قلبى فيك يا اخر مفرزات اليوسفيّه

وقمت أجيبك فى خيالى وأرسمك فى كل خانه
ومع حروف أسمك تجاهلت الحروف الابجديّه

وأحتري شوفك وأقول الله على شوف الميانه
وأدعي الله لأجل أشوفك يامجاميع الخليّه

وتمّت الصدفة بلطف الله وفضله وأمتنانه
وقمت أناظر لك وكذّبنى خيال المنطقيّه

أيه أشوفك !!صح أشوفك يا رضا القلب وأمانه
ويش أقول وويش أخلّى وويش لى وش عليّه؟

شعرك ؟! يفرّق من الجبهه ويستوعب مكانه
ولا مشيتى ,,عانك الله الرياح الموسميّه

والعيون أنفاس ساحر وسّعت ضيقة زمانه
عين ترمز للنظام وعين رمز الفوضويّه

والرموش اللى تشيل العطف بكفوف اللعانه
علّقت نور الشروق بعرض وجه المغربيه

وثغرك أهدى الجمر ثلج وعانق الثلج الحصانه
وخشمك أبطل سوق مكّه للسيوف الحضرميّه

وكفك يغار الرخام ليا بدت دمجة بنانه
يحتمى نور الصباح ويردع أطماع المسيّه

وصدرك أستدرك بقايا عهد أبو زيد وحصانه
فيه كبر وفيه مدخل لأكتساب العاطفيه

وخصرك يبرهن وجود العسر بأطراف الليانه
ولا تهزّعتى كسبتى فالبشر ذنب وخطيه

وأن حكيتى ذاب ريح الهيل وسط الزعفرانه
وأن سكتتى أعلن الشاهى جحود المرمريه

ويش أوصّف فيك؟ وأنت أصل القصيد وعنفوانه
ومحتوى روح التواضع يا زعيم العنجهيه

8 - 4 - 2022, 07:26 AM

قصيدة مدى تقديرك - مطلق النومسي

انت ياللى جيت تسال عن مدى تقديرك
والله إن قدرك على عيني وقمة راسي

والله إني ما عطيت القلب لأحدِِ غيرك
والله إني من عرفتك وأنت عطر انفاسي

ما انت ناسي .. لأجل احاول يالغلا تذكيرك
كيف تبغاني أذكّر .. وأنت ما انت بناسي

لا تروح بعيد .. وإلا يشغلك تفكيرك
أنت ناسي .. لو تكاثر في عيوووونك ناسي

مار عبّر لبّا والله يالغلا تعبيرك
لين تلغي سلطة الحرمان فوق إحساسي

جيت لك .. كتلة عطش .. تطمع بجمّة بيرك
ولا تسقيّني .. بكاسي .. والظما من كاسي

جيت احلم إنك اميري .. وإلا أنا أميرك
لو ما عندي سياسه .. والأمير سياسي

حلم .. وإتركني .. بحلمِِ ما يخالف سيرك
فوق صحوة .. ما يشابهها يا كود نعاسي

وإن نستني رحمتك .. لا يذكرن تعزيرك
ما ورا تعزيرك إلا ضيعتي وإفلالالاسي

وافتخر في جيرتي .. جعل الولي يجيرررك
من مسا الواشنطني .. واصبووحة التكساسي

أعطني نسمة هواك .. وهفهفة نوّيرك
وأخذ عزّة وقفتي .. وإنعم بقوّة باسي

وزدني بخيرك .. عسى ربّي يكثّر خيرررررك
وخل حبك .. فوق قلب اللى يحبك .. راسي

ولا تنشدني .. وتسأل عن مدى تقديرك
والله إن قدرك على عيني وقمة راسي

المواضيع المتشابهه لموضوع: ديوان ويمنعنبذه عن الشاعر مطلق النومسي لموضوع: ديوان ويمنعنبذه عن الشاعر مطلق النومسي
الموضوع	كاتب الموضوع	المنتدى	مشاركات	آخر مشاركة
ديوان و نبذه عن عبدالرحمن العشماوي	حنين الأشواق	همس دواوين الشعراء	137	15 - 1 - 2025 04:36 PM
نبذه عن الشاعر الكبير ناصر القحطاني	نجمة الليل	همس دواوين الشعراء	5	15 - 1 - 2025 04:27 PM
ديوان الشاعر حمد البريدي	نجمة الليل	همس دواوين الشعراء	15	15 - 1 - 2025 04:25 PM
ديوان و نبذه عن الشاعر سعد علوش	همس الشوق	همس دواوين الشعراء	16	27 - 9 - 2021 01:31 AM
ديوان و نبذه عن حياة الشاعر على محمد القحطاني	همس الشوق	همس دواوين الشعراء	33	27 - 9 - 2021 01:31 AM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع