ديوان ويمنعنبذه عن الشاعر مطلق النومسي

8 - 4 - 2022, 07:27 AM

قصيدة رشيق الحرف - مطلق النومسي

(رشيق الحرف والمعنى العميق وروعة التصوير
ربيع الشعر وشهور الربيع وريحة ازهاره)

ونفحات الهوى البارد .. ليا مال الظلال .. عصير
وبشّة وجه سطح الأرض ..بالبراق وأمطاره

ورقّة جدول الما .. والغصون المورقة .. والطير
ودمع العود .. من ضحك الأصابع داخل أوتاره

وستر الليل.. وأنفاس الصباح .. وصفوة التفكير
وصدق الماضي بعين الزمان .. وكذب تذكاره

ومطلق .. والشمال .. ونجد .. وطويق .. وإجا .. والنير
وبحر الشرق .. وبلاد الحجاز وهيبة دياره

جميع اللى ذكرته .. فيك شفته .. والهوى بكيّر
يادوب إنا قرينا الفاتحه .. مع بدء مشواره

تقول شلون صار ؟ أو مايصير ؟ .. أرجع وأقول يصير
لأنك غير يا نفع الخفوق .. ودفعة أضراره

تقول شلون غير؟ أقول مدري ؟؟ بس والله غير
عموما .. أنت فوق الشعر .. والشاعر .. وأشعاره

يجوز .. تقول تو الناس .. والتعجيل ما به خير
أقول إخترت .. والمختار يكفل حال .. ما أختاره

غلط ؟؟ لو قلت فسّر .. والزمن كله يبي تفسير
بعد ما حرّم الجيرة.. وصدّ الجار عن جاره

وأنا ماني بزير .. ولو ساسي .. ينتسب للزير
تمّر أفواج .. تمسي بي .. غلا .. وأصبح لها .. كاره

مضحّي .. للخيال اللى وجوده .. ماله أي تبرير
ولكن كان موجود .. ووجوده يصعب إنكاره

ما غير الياس .. يتسلى بصوت الناي.. والتزمير
يغنّي لي جفا ساره .. وأغني له وصل ساره

على هالحال .. بين أرض الثبات .. وكوكب التغيير
تشع الأرض نور .. ويدمع الكوكب من غباره

غريب أمري ؟؟ أنا وياك .. كنّه طيش عقل صغير
ولكن لو تميّز ما حدث .. ميّزت مقداره

أحبك .. إيه ..أحبك .. قبل لا أحمل زلّة التاخيير
وتجمعني مخاليب الندم .. صيده لمنقاره

فديت .. الهمسة اللى خدّرت .. ليل الغلا .. تخدير
وفديت .. الليل .. لاوصّلت لي .. يمناه بيساره

وفديتك .. كل ما مارس دلعك ..بقلبي التعزير
وفديت الضحك .. لاعانق شفاك .. وزوّد عياره

ترى ماني .. بمستعجل .. ولكن خانك التعبير
وعذرك معك .. مرهبك الزمان .. وسرع تيّاره

ولا تستكثر اللى قلت .. لو كان الهوى بكّير
لأنك غير .. يا نفع الخفوق .. ودفعة أضراره

8 - 4 - 2022, 07:28 AM

قصيدة طيش الحليم - مطلق النومسي

شكرا جزيلا من جديد ... ويتبع الشكرر القديم
شكر سخيف .. ومن سخافتك برزت سخافته

شكرا على الصدمة .. ونكرانك لمدات الكريم
اللي فرش قلبه .. يبرهن لك كرم ضيافته

والمشكلة إني إعتبرتك .. بلسم الجرح الاليم
وإنك بقايا من زمن جدي .. ومن نظافته

ولقيتها حسبة غلط ... وإثباتها أصبح عقيم
وحاولت اكذّب .. بس عيني شافت اللي عافته

عاد انت ؟ والله كنت عندي مثل دمعات اليتيم
اللى على محور برائتها .. الصحيح اضافته

عن جد ماني قادر أستوعب .. وتفكيري سليم
لكن تفكيري من الصدمة .. فقد شفافته

وابشرك بشرى ..؟ تراها حوّلت بي بالصميم
وقلبي تكسّر وكسرت كسره .. كثر حسافته

ياللي تلاعب بالمشاعر .. فالك الذنب الأثيم
بكرة .. يجيك اللي حوت كذب الغلا .. ثقافته

وأنا أشهد إنك محترف ممتاز .. وأعتبرك عديم
والمحترف في أي حاجة ... أحترم حرافته

وأنا اعترف لك .. بس حاول تتقي طيش الحليم
وارجوك لا تنسى تعلّق للحليم اللافته

وأكتب عليها .. إذكر إنك .. إكتشفت إنك غشيم
في خط واضح .. ينقرا على الإنارة الخافته

وارقد على فراش الذهب ... والماس .. والمجد العظيم
وأنا بدوي .. عن عز نفسه ما قصر مسافته

وأبغاك تفهم ..شي واحد قبل لا أمشي يا فهيم
عمرك .. سمعت إن السخف .. يشكر على سخافته ؟

8 - 4 - 2022, 07:28 AM

قصيدة متوجهه للقاهرة - مطلق النومسي

الشعر وهبة وزعت بين الخلايق والبشر
مقسمه بين القلوب المذنبة والطاهرة

الشعر منهج فلسفه بين المحانى والفكر
ضرب إتفاق ويبتدى سرى وعقب مجاهره

الشعر مزج من الثقافه والفراسة والعبر
فيه النوايا تختلف الباطنة والظاهرة

الشعر خبث الثعلب اللى جده من أمه نمر
خبث ودهاء ويعشق السيف ويقدس شاهره

الشعر أبرد من بلاد الروس فى وقت الفجر
وأحر من صحرا النفود أم الشموس الصاهره

الشعر أثقل لا وزنته من جلاميد الحجر
وأخف من كلمة شرف مرت لسان العاهره

الشعر ماهو صبغة الدفتر من إنزاف الحبر
الشعر متعة للعقول المبدعة والباهره

واللى ماهو شاعر ماهو لازم يطول بالسهر
ويترك حديث الدمع لأهداب العيون الساهره

لاصار بيته لا بغى يبنيه ياخذ له شهر
يحجز على أول طايرة متوجهة للقاهرة

8 - 4 - 2022, 07:29 AM

قصيدة خذني غلا - مطلق النومسي

خذني غلا يا أصدق غلا بالوقت الأول والأخير

أبغاك تدرس حالتي أول وأنا أدرس حالتك

حنا نفس واحد وروح وقلب وعيون وضمير

عدالتي ظلمك وظلمي منتهى عدالتك

يا بدري الطلّة ويا طلّتك يا البدر المنير

ترى خسوف القمر بشارة وصول إطلالتك

وإطلالتك عندي أنا تعني لي الشي الكثير

لا صارت عيوني على خدك سحاب وسالتك

أوقف وأسميك الملك وشوي أسميك الأمير

أخاف من سطوة سموّك وأحترم جلالتك

حبك كبير وبالمقابل قدرك بقلبي كبير

إحساسي بمحبتك وإحساسي ب زمالتك

لا يضيق لك خاطر فديتك لو يصير اللي يصير

إن كان ما شالتك الأرض رموش عيني شالتك

يا أترف مشاعر بالبشر يا أرق من لمس الحرير

ساعة زمن ممشاك من غرفتك حتي صالتك

دلعك يثقل خطوتك وأحيان يمنعك المسير

وأحيان أشك إن الدلع سلالته سلالتك

يومك تعض شفيفتك وإصبعك ل عيوني يشير

وتقول هذي مالتي وأقول طبعا مالتك

تقولها وأعيش نشوتها وأحس الموت أخير

لا شفت موتي بين عقرب صدرك وسلسالتك

تدري لا شفت بيالتك بأطراف ثغرك تستدير

أضرب على صدري وأقول الحظ حظ بيالتك

مدام أبوك الناي وأمك ضحكة الطفل الغرير

وتصير عمتك الشطانة والشقاوة خالتك

لازم عليك اغير من نفسك وحتي منك اغير

عشان لو تطاولك كل البشر ما طالتك

ما طالتك يالأسمر الجذاب يالملح المثير

ياللي سمارك جامعِِ سكر وملح أصالتك

فتنتني بعيونك الخدرات والزول القصير

وحببتني في طيشك وحببتني جهالتك

ماعاد لي سلطة على حالي وأنا بيديك أسير

ولا عاد لي حيلِِ يساعدني على حيالتك

يا علّني فدوتك من راسك إلى إصبعك الصغير

يا كبر بختي يوم ناولتك يدي ونالتك

يا أصدق غلالا وأعذب غلا بالوقت الأول والاخير

هذي خلاصة حالتي عطني خلاصة حالتك

8 - 4 - 2022, 07:30 AM

قصيدة ياخوي الي مانجبته امي - مطلق النومسي

يا أخوي يا اللي ما أنجبته أمي ولا جابه أبي
لكنه أقرب بالغلا من جملة إخوان الدما

لو إن بني عمي يحسبونك حساب الأجنبي
أنا أشهد إنك بين أبوي وبين جدي كلما

تبصرت نفسي بفعلك قلت يا دين النبي
أنا أشهد إن جدك زعيم ومن سلالات زعما

معرب ساسك وأنا يا الظفر دمي يعربي
لا حس في ضيقة خويه ضاق عرقه وإنتمى

من بيننا رفقة يتعرب طيبها مية صبي
أرداهم اللي طايل شبره وبأخلاقه سما

رفقة على وضح النقا ماهي مصالح ويهي
اللي على درب المصالح ساق دمه وإنتمى

تحشم لحانا وشنبك يكرم ومحشوم شنبي
عن رفقة القلب الدهيم اللي نواياه دهما

أفخر بطيبك مثل ما أفخر في عظامة منسبي
وإن حل طاريك طرى هداج قطاع الظما

والله ما أدري وش سبب هالحال لو كان سببي
يعني تقل جاهل حضر درس علماء عند علماء

تعبث الريح بسنى ناري بعد قل حطبي
وشح المزن بالماء وأنا ماني برجوى غير ماء

حتى صرخ عقلي على قلبي ونادى ياغبي
ما للسنون البيض هيبة غير بعروق الجما

لكن تشربت الضياع اللي سبى حالي سبي
ضياع والله يا ولد مشيت له مشية عما

أقرأ ضياعي وأكتبه من منكبي لمنكبي
وأرد وأمسح ماكتبته وأتجاهل طالما

تشبه نهاية ضيعتي نهاية الداء الوبي
أستوجب إستغلال فرصة حظ وقتي لو زما

وأرمي ظلال الظبي وأتعشى من جنوب الظبي
و مارميت إذا رميت ولكن المولى رما

تعبان والله يا ولد والموت لو طال تعبي
مالي ورى نار الحمى إلا جمر نار الحمى

هذي أحوالي وذا وضعي وجيتك يا صبي
أشكى وأسوق العذر وأقبل ما تقوله إنما

لايضيق بي مذهبك تكفى وإنت خابر مذهبي
ماضاق لو ضاقت علي الأرض وأبراج السما

ولازم تعرف إنك ولو ماجيت من أمي وأبي
محسوب أقرب بالغلا من جملة أخوان الدما

8 - 4 - 2022, 07:30 AM

قصيدة الشوق جاير وجور الشوق لعيونك - مطلق النومسي

الشوق جاير وجور الشوق لعيونك
والحب بين بعيني يوم حبيتك
يا مبعد عناد قلبي مايعرفونك
حتى لو إني عزفت إسمك وغنيتك
ساندت صبري وراك وطاح من دونك
وجيتك وأنا لا بغيت الصدق ما جيتك
أهلكني الوجد وأنت أهلكت مفتونك
وعلمتني كيف أونك لين ونيتك
ياليتك تشيل دمعي في حجر نونك
أو ليتك تردني عن قول يا ليتك
مابين سكر عنبك ولذع ليمونك
شربت مرك على شانك وحليتك
تكفا فديتك شوي شوي على هونك
تراك غالي وأنا زودت وأغليتك
وإن شفت أهل بيتك المعمور يغلونك
شف قلبي أصدق غلا من كل أهل بيتك
لاتسمع الناس لو كانوا ينادونك
إسمع صدى صوت قلبي يوم ناديتك
قل سم أو قل هلا أو قول يا عونك
ما تدري إنك ليا ناديت لبيتك
لبيه لامن ضحكت وبانت سنونك
وأخفيت مبسمك بين أطراف جاكيتك
حبيتك بعقل لين أصبحت مجنونك
وذبحت شعري لأمل لقياك وأحييتك
متى على الله تضم عيونى عيونك
وأنشدك بالله قلي ليش حبيتك

8 - 4 - 2022, 07:31 AM

قصيدة النجم - مطلق النومسي

مع سكون الليل وأصوات الرعود وسع بالي
جالس بالمجلس اللي عطرته الشاذلية

جالس والبال داله لا جنوب ولا شمالي
مختلي وأقرأ حكايات العصور الأولية

وأتكيف لا بغيت الكيف من صفر الدلالي
وأتخير ماعجبني من أعذوق السكرية

ليل غيث وليل خير وليل مركوز الخيالي
عقربيه تنتهي ولا أنتهت جت عقربية

وبعد ماكف المطر شاهدت لي نور يلالي
فرق اطراف المزون وطارت العين الشقية

وأقترب مني وأنا أراعيه وأجود عقالي
من أخبالي يوم قرب اعتزي بالوايلية

هي شجاعه هي رخامه ماقدرت أقرأ سؤالي
المهم أني أشوف الموت أقرب من أيدية

قال بسم الله عليك وهد روحك ياحلالي
ماقصدتك بالهلاك ولا نويتك بالأذية

حاول أنك تفتكرني واذكر العهد المثالي
حول ست سنين يمكن أو بعد أكثر شوية

يوم ترسلني لخلك يوم أنا أمرك لحالي
يوم أنا أطلبك وصفه وأنت زعلان علية

يمكن أن الوقت غير شي في شكلي وحالي
ذاك أنا النجم الذي وصيته بأغلى وصية

وقمت أحد الشوف فيه وطاب فكري وستوالي
وصحت بأعلى الصوت أرحب ياهلا يالله حية

كيف حالك ياعساك بخير يانجم الليالي
أقدع وخذلك من الفنجال مزات هنية

وعطني أعلومك عسى وصلت غالي عند غالي
طالبك يانجم قلي كيف حال الغشمرية

هي تبي قربي أو أن البعد فوق الأحتمالي
أو مثل ماهي على خبري لرفقتنا وفية

قال أبشرك بسلامه مابين عم وخالي
ولا تبي غير أنت من بد الصنوف الأدمية

وتنشد الأيام عنك ومخطر فيها الأهبالي
وصورتك معها وتبكي بالصباح والمسية

وتحلف أنك غير ترجع كل ماهل الهلالي
وأن حبك ممتلكها دامها بالأرض حية

وضحكها كان أضحكت مصدرها الأيام الخوالي
تضحك قدام وجهك ضحكت الطفل البرية

وأذكر أني قبل أجيك وقبل أشد الرحالي
أمسكتني وأشهقت شهقة من الداخل قوية

قالت أرفق في حبيبي جعل مال النجم والي
طالبك أكذب عليه ولا تحده للخطية

بس أنا بعلمك بالعلم وأبعد عن جدالي
زوجوها غصب وأغراء عمها زود العطية

بس تكفى لا تكمل وش بقالي وش بقالي
ليتني قبل لا سمع هالخبر ذقت المنية

8 - 4 - 2022, 07:31 AM

قصيدة عتاب الأنهزام - مطلق النومسي

ياحي هالصوت الذى أخلا الفؤاد المزدحم
باخر عتاب الأنهزام وفقد حلم السيطرة

ياحي صوتك لا تمادى بالتغنج واقتحم
خلوة فؤادى فى عتابه للجروح المخطرة

وياحي صوتك لا همس لاخر عروقي وألتحم
يجبر محيط الزاويه يرفض قياس المسطره

صوتك أشارات لضميري يدحم اللوعه دحم
وأعلان لأذني تحتفل باللي قدرها تنطره

صوتك يكون من حجر أنسان من دم ولحم
صوتك كتاب يعجز التاريخ يشرح أسطره

صوتك ليا انساب بهداوه روض قلوب السحم
رووس السباع اللي على رووس الاوادم مفطره

صوتك يبث العاطفة فى قلب طاغى ما رحم
فى ذبحة الطفل البري ياماأشطره ياما أشطره

صوتك على جال الدلع فكل ليله يستحم
صوتك أمان القلب فى وقت أمانه بخطره

صوتك بياله شاهى النعناع من جمر الفحم
صبوا له الما من شهاليل المزون الممطره

ويكفي ليا منى سهيت وقلت لى إحم إحم
نحن هنا نحن هنا أفقد وجود السيطره

8 - 4 - 2022, 07:32 AM

قصيدة اخر رصاصة - مطلق النومسي

اخر رصاصة كنت أهدد بها الغول
طاحت وأخذها الغول وأخرج لسانه

وأصبحت لا محزم ولا سلاح مصقول
ولا ظهر يستد ولامن حصانة

أجسم خسارة وأكسرتني على طول
كسرة قهر ماهيب كسرة جبانة

صدمة وهزتني ورددت مذهول
أثر النوايا البيض جرم وإدانة

من كانت الدنيا فتية وعطبول
وكل شي له أصول ومقام ومكانة

حتى الخطا لا أخطيت تخطي على أصول
وإلا إنوصفت بنقص عقل وديانة

يامن خطاك يطول شرحه ولا أطول
عذر يوقف مكرة الأسطوانة

معقول جتني منك منك أنت معقول
يا صبر الأرض وهالزمن يا هوانه

وأنا أعتبرك أكبر اخواني ومسؤول
عني وأقول إني من أصغر اخوانه

وأغض عن زلتك من حول لا حول
وأقول له عذر الغلا والميانة

وأسمح وأقول إن الخطا منك مقبول
إلا ليا وصلت حدود الإهانة

أنا خلاصة حرب وسيوف وخيول
وفعل البطل لا قال أنا أخو فلانة

ما أرضى ولو كان الثمن فقدي لذول
والعذر شان القبح والقبح شانه

اسمع وأنا بناخيك للهرج مدلول
العار عار الصيت والصدق أمانة

أنا جبل على الرفاعات مجبول
ماني بشقة جيب وإلا خيانة

أنا إبن عم السيف لا صار مسلول
مع صيحة الفارس وصهلة حصانه

وإن رحت للمجهول مانيب مجهول
وأعرف أساليب الدجل والكهانة

وأصير بهلولين لا شفت بهلول
وأخطر مفاهيم الذكاء اللعانة

القاع تتزلزل ولا طاح أبا الهول
تباشروا بالخير يا أهل الكنانة

لذا يا ابن عمي ترى الباب مقفول
والبيت ثابت ما تزعزع كيانه

ماهي كذا يا محزمي لكن أقول
أقبل شكر مطلق وكثر امتنانه

إعرف نتيجة قسمة الطول بالطول
وتكسب تجاريب الزمن وامتحانه

وأوصيك يا بن العم لا جاك مرسول
رحب تري الترحيب ما فات أوانه

والحين أبا وادعك والبال مشغول
قبل الوداع إخذ الشطر مع ضمانه

شطر لابن رشيد من بيت منقول
لو كان ماهذا الزمان بزمانه

قاله يوصي عبده حسين ويقول
ترى الخوي يا حسين مثل الأمانة

8 - 4 - 2022, 07:33 AM

قصيدة افة الذوبان - مطلق النومسي

يا زاكي العرقين يا أعز منسوب
يا مرجع أنساب الوفا والنظافة

أزعلت من شانك حكومات وشعوب
ولا لحقني من زعلهم حسافة

واللوم إبن عم الحسد والحسد ثوب
لا طالت كمومه تشقق كتافه

لوامتي بك صاروا قروب وقروب
وإن زادوا أزيد بهواك المسافة

يعني عشاني متعب قلوب وقلوب
علقي بك صار مثل الخرافة

بس أنت غير وكل مافيك مرغوب
والهرج عقبك بالصبايا سخافة

تحشم عن الرفلات والطفق والعوب
مخلوق كامل ما يبيلك إضافة

طيب وابن ناس ومسامح وحبوب
وافي طبيعي ماتحب الكلافة

أهيف حشا مغناج رقراق غرشوب
مزاح سمح قبال ما بك لقافة

مياس لين مورد خدود رعبوب
ثقل وعقل وأبعاد فكر وشفافة

هرجك مسافة جمرة اشفاتك دروب
خلطة عسل دوعن بسكركنافة

أما إنعطافة خصرك حكاية بصوب
يبغي لها شرح ودروس بكثافة

ما أكذب لا قلت إنك مربرب ودبدوب
وما أكذب لا قلت إنك زعيم النحافة

يا دوب أقاوم سحر عينيك يا دوب
ماني حمل خصرك لا زاد إنعطافه

اتركني أذنب في عيونك ولا أتوب
ذنب ولا أحلا منه كود أقترافه

ذيك العيون اللي بها بيت مصبوب
عين المها بين الجسر والرصافه

فيها اتذكر ما ورا معتق الطوب
وقلوبنا بين الأمن والمخافة

وصدري نزاعات وعداوات وحروب
وصدرك صراع الملك بعد الخلافة

والصمت سيد والحكي عبد مغصوب
والدم نازل بالعروق بكثافة

والشوق جسم وروح طالب ومطلوب
واللون باين بالوجيه إنخطافه

باللحظة هذي ينعدل كل مقلوب
وتقرب وأنا أقرب منحني بالتفافه

وأذوب وأنت تذوب وأذوب وتذوب
واذوب وتذوب وذوبانك افه

إي والله افه تثمل العقل بإسلوب
يعجز خيال أكبر رموز الثقافة

ثمالة بنشوة صحاوة بماجوب
بعلوم ظفرة بإنشراح بظرافة

يا كثر ما منك وما فيك والنوب
يبوني أستطول عليك المسافة

المواضيع المتشابهه لموضوع: ديوان ويمنعنبذه عن الشاعر مطلق النومسي لموضوع: ديوان ويمنعنبذه عن الشاعر مطلق النومسي
الموضوع	كاتب الموضوع	المنتدى	مشاركات	آخر مشاركة
نبذه عن الشاعر الكبير ناصر القحطاني	نجمة الليل	همس دواوين الشعراء	4	24 - 8 - 2023 07:17 AM
ديوان الشاعر حمد البريدي	نجمة الليل	همس دواوين الشعراء	14	11 - 7 - 2023 01:05 AM
ديوان و نبذه عن عبدالرحمن العشماوي	حنين الأشواق	همس دواوين الشعراء	136	2 - 6 - 2022 01:09 AM
ديوان و نبذه عن الشاعر سعد علوش	همس الشوق	همس دواوين الشعراء	16	27 - 9 - 2021 01:31 AM
ديوان و نبذه عن حياة الشاعر على محمد القحطاني	همس الشوق	همس دواوين الشعراء	33	27 - 9 - 2021 01:31 AM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع

ديوان ويمنعنبذه عن الشاعر مطلق النومسي

همس دواوين الشعراء