ديوان ويمنعنبذه عن الشاعر مطلق النومسي

23 - 3 - 2022, 08:45 PM

قصيدة جابر مات - مطلق النومسي

يا عين حزنك حي وأفراحك جماد
إبني على خدي دموعك بيت بيت

أبا أبكي أبا أبكي أبا أبكي باجتهاد
وأبا أبكي أبا أبكي بحرقه ما حييت

لو البكا ماهو مبلغني مراد
بس إن صدري يتسع لامن بكيت

وأنا على صدري يمين الجرح جاد
جودة غصب رضيت وإلا مارضيت

أحيان أبشر جرح قلبي بالضماد
وأحيان أزيده جرح لامني صحيت

صحيت في يوم الأحد تال العياد
وليا النحيب وهاه حي لا لا ميت

منهو وكيف وليه مدري والوكاد
إني بغيت أقوم لكن ماقويت

تثنت عظامي وانا عظامي شداد
ولحقن على جسمي معاهن وإنثنيت

أفتح عيوني ما شوف إلا السواد
أغمض ألقى في عيوني دانميت

وشلون جابر مات يارب العباد
أستغفرك أغواني الحزن وغويت

الشيخ جابر مات موتي يا بلاد
الشيخ جابر مات من يقوى المبيت

كل شي تغير بعد موته يا ركاد
حتى الكويت اليوم ماهيب الكويت

أشوفها بمنظور دولة قوم عاد
ماباقي منها سوى ذكرى وصيت

يا سيدي مولاي يا شيخ الفؤاد
ياخذني الله كان عن حزنك سليت

أبا أجرح عيوني بسكين السهاد
والجرح يصحيني ليامني غفيت

يا شيخ عقبك كيف يهنا لي رقاد
وأنا بموتك ذاب قلبي وانتهيت

يا اعدل ولاة الأمر وأصفاهم وداد
يا من تحت ظل الكرم عشت وربيت

عطاك واضح بالقراب وبالبعاد
وأخلاصك مبين ليامنك عطيت

والناس تعطي بس تاخذ بازدياد
إلا أنت تعطي ثم تعطي وإن خذيت

تاخذ عروق قلوبنا على انفراد
تتشربك حب وغلا لين إرتويت

مافيه أحد من فضل خير ما استفاد
مثلك يا سيدي لا سمعت ولا رأيت

ورغم إنك اللي فوق عرش الطيب ساد
من زهدك إن طروك بالمدح استحيت

اواه من فرقاك واه من البعاد
والذبح من طيفك لا جا يمي وجيت

يا ليت موتك رجل وأعلنها جهاد
وأدافع إمن أجلك دفاع المستميت

لكن هي الأقدار ما عنها حياد
وإلا ترانا نقول يا عل ويا ليت

يا مجري الأقدار ذو الفضل الجواد
يا واسع الرحمة يا محيي يا مميت

يا من عليك المتكل والإعتماد
يا سامع دعواي لامني دعيت

أرسل من جنانك نسانيس البراد
على قبر مولاي إلهي بك لجيت

تعبان وأتعبني شعور الإضطهاد
وأبا أتحرر وأكتب أصدق مانشيت

إن موت جابر يعلن لكل العباد
إن الكويت اليوم ماهيب الكويت

23 - 3 - 2022, 08:46 PM

قصيدة الغياب - مطلق النومسي

طول غيابه علي .. وضاقت الدنيا .. بي
والبلا إني ما حسبت حساب طول غيابه

لنه أكبر مستحيل .. ولا حسبت حسابي
إني أسهر مثل هالليله .. وأحسب حسابه

قلت يوم وينتهي؟؟ .. يعني شبيه غيابي
وأثر ماهو مع غيابي .. للأسف متشابه

يالله تخفف على الهم .. وأنت أدرابي
إني إفراز الهموم الرمس النصابه

يالهي شوفني للصبر فاتح بابي
بس ليه الصبر في وجهي يسد ابوابه

والله إن الصبر .. يعذر لو يشق ثيابي
لأني أول من كشف ستره وشق ثيابه

وين غاب ؟؟ اللى حوى معنى وسر إعجابي
وليه غاب الله يرجعه لعيون أحبابه

غيبته .. يعنى غياب أهلي .. وأعز أصحابي
عزتي للي .. فقد أهله .. واعز أصحابه

وين أرضه ؟؟ من سماه ؟؟ المجرم الإرهابي؟؟
علني فدوة وعد جريمته .. وإرهابه

اه من ثقل الدموع اللى تشيل اهدابي
كيف أبا أسلم من عذاب الدمعة السكابه؟؟

مابقى لي غير أجدد .. دعوة الوهابي
واتحدى الوقت .. لو كشر علي أنيابه

لين أحقق في وصاله .. رد فعل إيجابي
أكتفي به .. عن تفاصيل الهجر .. وأسبابه

مانى مكسر شغف نفسي .. بكثر عتابي
العتب ممنوع ... والممنوع ويش أبغى به؟

ماهي إلا ليلة اللقيا .. بروح أحبابي
لازم أحيا به .. عشان اموت به .. وأحيابه

وألبس القيفان .. روح الشاعر الإعرابي
وأترك الشعر يتمايل .. كل ما غنابه

كل ما عرض علي .. بثوبه العنابي
أجمع أطراف الأصابع .. وأرفع السبابه

حق والله حق وأسلم يالخفوق الصابي
بين رعشة وجنتيه .. وذبذبة عنابه

لين أحس الدم .. يتجدد .. وأشوف اعصابي
ترتخي بشويش ... وتعانق برود اعصابه

23 - 3 - 2022, 08:47 PM

قصيدة البستان - مطلق النومسي

طاحت من الضيق حبه فوق بستاني
وأخذت أمسح جوانبها وألمعها.

وأسقيتها دمي اللي وسط شرياني
القلب يحرث لها والروح تزرعها.

ياصعبها لاغديت المجني الجاني
وياسهلها لابحثنا عن دوافعها.

وياشين صورة مطيحي عند عدواني
عدواني اللي تدور بي مطامعها.

يامشعل الحزن صبح بي ومساني
وعليك نفسي تدافعني وأدافعها.

مشعل يامشعل ياجل وياأقرب أخواني
لك فزعتا ماتخيب من يفزعها.

تراك ملحي وبارودي ودخاني
لاشفت ناسا توجه لي مدافعها.

جيتك وانا أبكي قهر من فقد خلاني
حتى دموعي تعوذ من مدامعها.

أسبوع كامل وحزني رابط لساني
باء باء داء دائيه ولا أدري كيف أجمعها.

بس أنت تقدر تجمعها على شاني
شف ضيقتي صدق شفني ماأتصنعها.

ليلة مساء السبت ماكانت بحسباني
لليوم هذا وانا أشرب من مواجعها.

فارقتها وأبتدت دوامة أحزاني
كذا بلمحة بصر قدام أوادعها.

راحت وخلت لي أوجاعي وحرماني
وشوي من عطرها بأطراف ملفعها.

مشعل ماهو ضلم منها يوم تجفاني
وانا اللذي فوق كل الناس رافعها.

قربتها دوون كل أهلي وحياني
وأبعدت عنها القلوب اللي تنازعها.

وملكتها بحر لولوي ومرجاني
ودلعتها فوق ماأبوها مدلعها.

وأذا قرت شي من شعري وقيفاني
أطرقت سمعي لها من دون أقاطعها.

وتدري وش أسوي لامن صرت وحداني
ماغير أقلب رسايلها وأراجعها.

واليوم يابو سعد ياذخر جداني
راحت وخلت ورا صدري مواجعها.

رح قلها صاحبك لو يبدل بثاني
تحرم حياته وتقطع من منافعها.

ورح قلها كانها للحين تبغاني
تسرع ودقات ساعتها تسرعها.

أما أجتمعنا وحلت ربطت لساني
ولا تراني بوادعك وبوادعها

23 - 3 - 2022, 08:47 PM

قصيدة سطوة ملل - مطلق النومسي

خطاى أسمى ما حصل من بيننا .. سطوة ملل
وخطاى أصدق كذبتى !!وأقول من هي كذبته

وخطاي نسياني لجهلك .. وقعة الأمر الجلل
وجهلك يزيد .. وكنك تحاول بعيني تثبته

وجهلك تسبب فى إصابة حبنا .. بداء الشلل
والله يساعد حبنا .. لين يتجاوز . نكبته

وإلا أنت ما قصرت !! دليته على دروب الزلل
وعرضته النشبة .. وإذا قاوم .. تزود نشبته

وليا عطاك ريال .. جيدك !! تصرف رياله هلل
وضحكت فى ثورة جنونك من بقايا مصيبته

ويوم أن بشته .. لفها بيديه .. من خوف البلل
هليت مزنك .. لين بشته .. نو مزنك شربته

مع أنه .. اللي شيد لقدرك .. زخاريف الفلل
وأعطاك قيمة .. وأصبحت فيك الحقايق مثبته

وتوصفه بالخلخله ؟؟!! وأنت أول أسباب الخلل
وليا سكت ما أنته بسالم من .. معاصي غيبته

لأن أنت عله ... بس طبعا غير عن كل العلل
وعلتك عشقك للطعن ... والإنصياع لرغبته

ومدام أنت .. المشتري . وتقول أبا أدور حلل؟؟ !!
لا تزدري .. باللى على راسه يكسر لعبته

24 - 3 - 2022, 12:34 AM

قصيدة معذور تضحك يا القهر - مطلق النومسي

معذور تضحك يا القهر باخر تفاهات الزمن
معذور تضحك بأمنيات أهل العروش الخاويه

مدام أمانتهم خيانه .. فى يدين المأتمن
بين الهوايه .. والهوادة ..والهوا .. والهاويه
تجدد الخوف القديم .. وزعزع أركان الأمن
.. . وصارت مسافات النظر بأنظارهم متساويه

وصار اليقين .. بحالة الإثبات .. عرضة للخمن
. . ورسم الدواير ( للغبى ).. فن .. إنعدام الزاويه

وإستقبل العالم .. خلاصة مؤتمر وفد اليمن
. . بأن الزباله !! ظلم !! نرميها بوسط الحاويه !!!!!

وأن المخالف للنتيجة المعلنه .. يصبح .. كمن
. ... كفر ولد عم الرسول .. وسب روح معاويه !!!!!

وإستهلكت كل القوى .. والمشكلة ( أيش) الثمن.؟؟
خمسين غاوى .. لعبة الزهرة بكف الغاويه

وأنا تمثنيت المعالى .. وأزدري باللى طمن
وأشوف ناس للمهانة والردا .. متخاويه

وأقرا .. محاذير النبي .. عن قرب خضراء الدمن
وأقول ( صلى الله ) على أسمى .. وأصدق .. راويه

وأضحك .. وأردد .. فى لسانى .. إيه يا اخر زمن
حتى السلق تضبح .. وتخشاها الذياب العاويه !!!!!

24 - 3 - 2022, 12:35 AM

قصيدة الخطر العبس - مطلق النومسي

يامسند ابعدني عن الخطر العبس
وأسمع كلامي... يابعيد الهقاوي

كلام مايصلح له. المذهب الضبس
يصلح .. لمذهب طيبين العزاوي

كلام لان ويبس واستلين ويبس
على شرايين .. الضميرالحياوي

وأسمع يامسند واكبس السالفه كبس
وخذ النقيض ولانت بالاصل غاوي

لوح الخشب جبار والجبر للجبس
والجبر واحد بس مابه تساوي

طيرالغلس يقرب على ضوحة الكبس
. .ويقرب على ضوح النجوم النداوي

والنمل الاسود تجذبه ريحة الدبس
وريح الغنم تجذب خشوم الشواوي

وعنترعرفنا به قبيلة بني عبس
لكن عتيبه عرفتنا العطاوي

برق وشوف الفرق واحذر من البس
وخذ الدلايل من كتاب الخلاوي

وإن كان الحضاره عندهم علبة اللببس
وجلسه على الشاطي وكيلو مشاوي

وإلا مسابقهم على موظة اللبس
وهز القوايم واستماع الغناوي

حنا حضارتنا لها بالسما قبس
فنجال هيل وريح شقرالقهاوي

واكرام ضيف وجاه لمظلم الحبس
وعون الرفيق ليا بلته البلاوي

هذي الحضاره صح ماهي حكي طبس
وإلاحضارتهم مجرد حكاوي

24 - 3 - 2022, 12:35 AM

قصيدة تصبيحة سهر -مطلق النومسي

يسعد مساء ( صبحك) عسى ممساك ( تصبيحه ) سهر
ليل .. مصابيحه على الواقع معك متلاشيه

ليل .. يراشيه الصباح .. ويرفض الرشوه جهر
حتى تتوب نجومه اللى من قبل متراشيه

ابيك ليل .. ( ماتصبح به ) صواديف الدهر
وأبيك سر ما تمثناه الصدور الفاشيه

مادام جيتك عشق في صافي نواياه إشتهر
لو كنت متحاشيه .. وأنتي ( يالغلا ) متحاشيه

أبطنت عشقك .. لين ضاقت به حناياي .. وظهر
ولا تخافي .. حافظه عن القلوب الواشيه

أزيد ضحكي مع وشايتهم .. ويزدادوا قهر
وأبشرك نفسي من الواشين ماهي خاشيه

مدام (لحظة من غيابك ) تنحسب عندي شهر
وزلتك تمشي .. لو ماهي ( يا غناتي) ماشيه

وميامنك ضفة نهر .. ومياسرك ضفة نهر
ومظلل ..راسك تحت غر المزون الناشيه

ومعطيك .. راسي نوع جاهية .. ودمي لك مهر
وقلبي معبد لك .. وشرياني رئيس الحاشيه

تطمني يالمزهرية ... كلهم لعبة زهر
والنار ما تحرق سوى رووس اليدين الراشيه

وأنتي وأنا .. عسى هوانا في سمانا يزدهر
وبحق من نزل تبارك .. والحشر .. والغاشيه

وإنسيهم .. وخلي مساك يعلم الصبح .. السهر
ومخاوفك مع الزمن .. متلاشيه .. متلاشيه

24 - 3 - 2022, 12:36 AM

قصيدة عنود الغيد - مطلق النومسي

هذي عنود الغيد من قد العنود
ياسعدعيني يوم أجي وألمها

وأحبها من فوق وجنتها وأزود
حبة جبيهتها وحبة فمها

وردة ولاتنبت على مي الورود
تنبت على الكافور لين يزمها

أشم فيها الياسمين من الخدود
والياسمينه تحتفل وتشمها

أجرم غلاها داخلي بلا حدود
وهي ليلة الستين تو تتمها

لاشفتها والله ماغبط ابن سعود
هي مملكة عمري وانا مهتمها

سمية أمي والغلا بسم العنود
وأنا غلاي يخصها ويعمها

يالله تحفظها من عيون الحسود
يالله تقفل كل باب يهمها

ويالله عساها قدام عيني بالوجود
وتكبر وتعجبها قصيدة عمها

وردة وعجزت لاتشابها الورود
الله يخليها لأبوها وأمها

24 - 3 - 2022, 12:37 AM

قصيدة يادهينه - مطلق النومسي

كل رجال يميز من قرينه
وكل علة يكشف الباري سببها

وكل ما هاد البحر ركبت سفينة
وكل ما هاج البحر .. ماج وركبها

والبحر يا ابو سعد محد يدينه
والسفينة وش تبقى من خشبها ؟

الشواطي لا سلام ولا سكينة
والبحر لا وصلت الشاطي قلبها

بس يا مشعل لي الله واستعينه
كيف أبا أرفض حاجة ربي كتبها ؟

لازم اصبر والصبر للرجل زينة
وش جنيت من الحياة إلا تعبها

كم سهرت ونامت بعيني مدينة
كم عطيت أرواح من روحي طلبها

كم تحاشيت النفوس المستهينة
وكم تناسيت الجروح ومن جلبها

وكم زرعت ب صدري ل غيري جنينة
ولا قدرت أذوق حبة من عنبها

يا ولد عمي ترى جروحي دفينة
لي ثمان أعوام وانا مجتنبها

شوفني وتشوف كم نفسي حزينة
شف عيوني .. وإلا تدري ؟ .. شف هدبها

كل رمش يغازل الدمعة ب عينه
كنه يكيف عليها لا سكبها

التسامح حطنا للناس طينة
أتشكل في يدين اللي قضبها

كيف نرضى بالخطا والعذر وينه
والمصيبة ما لحقنا إلا عتبها

نحسب إن الطيب ينفع بالعفينة
والعفينة طيبنا يملا .. ذربها

لا امتلا بطن العفين من الشنينة
قال راس المرجلة يشبه ذنبها

واحد ما تلحق الطولة يمينه
لو تجيه المرجلة تركض .. عقبها

قص عرق الدم من بيني وبينه
والعروق اللي تفوح ب طيب جبها

نخلة الوادي لها ظل ومتينة
بس قام الدود يمشي مع رطبها

فوق كفي .. يا دهينة .. يا دهينة
لا تكبون الدهينة من قربها

والله أن أكبر خطا .. وأكبر غبينة
والدهينة كل من جا .. يحتلبها

صح ... من قال القرايب غرغرينه
لا كلت كعب القدم تلحق ركبها

وانت يا مشعل يا أبو مدة سمينة
يا سليل اللي معربة نسبها

مصطفى الاغا .. قصدك .. ب كلمتينه
أنت الأجمل .. وأنت الأكمل .. وأنت الأبهى

24 - 3 - 2022, 12:38 AM

قصيدة نوت - مطلق النومسي

يامويس سلم لي على المترفه نوت
سلم عليها علني من فداها

نوت الغلا نوت الحلا شجرة التوت
اللي عيون المسك تسقي ثراها

لايابعد من تلبس الجنز والكوت
اللي تبين في كعبها خطاها

بنت الرجال اللي لهم فعل مثبوت
أهل البيوت اللي يذري ذراها

سمية اللي دونها السيف والموت
ورجال يرفع صيتها مستواها

يمويس والله بالغلا منت مبخوت
راحت به اللي مايليق لسواها

الله عطاها والغلا بي منحوت
لا تلومني مادام ربي عطاها

حورية العينين مبحوحة الصوت
وتزعل الرمان حمرة شفاها

لاجت جينا كلنا شعب وبشوت
وإن روحت رحنا ندوهج وراها

ياناس والله لو تقرب لكم نوت
تدرون وش يعني غلاي وغلاها

المواضيع المتشابهه لموضوع: ديوان ويمنعنبذه عن الشاعر مطلق النومسي لموضوع: ديوان ويمنعنبذه عن الشاعر مطلق النومسي
الموضوع	كاتب الموضوع	المنتدى	مشاركات	آخر مشاركة
نبذه عن الشاعر الكبير ناصر القحطاني	نجمة الليل	همس دواوين الشعراء	4	24 - 8 - 2023 07:17 AM
ديوان الشاعر حمد البريدي	نجمة الليل	همس دواوين الشعراء	14	11 - 7 - 2023 01:05 AM
ديوان و نبذه عن عبدالرحمن العشماوي	حنين الأشواق	همس دواوين الشعراء	136	2 - 6 - 2022 01:09 AM
ديوان و نبذه عن الشاعر سعد علوش	همس الشوق	همس دواوين الشعراء	16	27 - 9 - 2021 01:31 AM
ديوان و نبذه عن حياة الشاعر على محمد القحطاني	همس الشوق	همس دواوين الشعراء	33	27 - 9 - 2021 01:31 AM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع

ديوان ويمنعنبذه عن الشاعر مطلق النومسي

همس دواوين الشعراء