على الله يا زمن بشكي جروحي والليالي طوال
عسى راعي العنا ينسى عناه وينشرح صدره
على الله يا زمن بشكي همومي والهموم جبال
تعدّت عاصمة حزني حدود العالم بأســره
خسارة يالسنين اللي كتبتي سيرة الرحال
فرحت امس وحزنت اليوم بس الخوف من بكره
لساني كم شكى صمته والى منه حكى ما قال
طغى طبع السكوت بسيرة المحروم من صغره
كبرت وكبرت أحلامي وصارت قصة الترحال
اماني في مهب الريح وحلمٍ ما أكتمل بـدره
بعين اللي مع ايامه جلس يبكي على الاطلال
تذكّر ماضي ايامه الين خنقته العبره
انا منهو حمل همّه على راسه تقول عقال
مجاديف الزمن دارت عليه ونسّف الغتره
وانا منهو فقد صوته وبعض الصوت به مازال
دعيت الله يفرّجها عليّ وبحّت النبره
أشيل الحمل عن غيري وحملي صار ماينشال
كما الشيخ الهزيل اللي مشيبه منقضٍ ظهره
عزيزه يالعيون اللي حضنتي دمعة الرجال
حبستي دمعته بين المحاجر يوم ضاع امره
عزيزه يالحروف اللي سكتي والكلام يقال
حكيتي ما شكيتي الهم وهم القلب يا كبره
عزيزه ياليدين اللي ثنيتك بأصعب الأحوال
اكفك ساعة الحاجه وامدك ساعة القدره
وعزيز النفس لو يصبر على صبر الليالي نال
ابصبر والرجل يصبر ومقياس الرجل صبره
جروحي مزنةٍ منها هطل فيض الشعر همال
سقت جدب العروق اللي تبلل ريقها قطره
وعن حر الزمن صار حروفي للجروح ظلال
تذرّت عن هبوب الياس حلمٍ قد بنى قصره
عساها للمطر روحٍ بها وادي الظما ماسال
عروق سنينها جفت ووراها الزمن غدره
وعساها للمطر روحٍ خلص مرباعها ماطال
كساها ثوبها الاصفر وكانت تلبس الخضره
على الله ينجلي وقتٍ قضيته همٍ وغربال
ويشعّ النور في قلبٍ غشى ليل الظَلَم فجره
على الله والولي الله وبأمر الله يزين الحال
ويضحك للزمن قلبٍ مع همومه قضى عمره
عضويتي
على الله يا زمن بشكي جروحي والليالي طوال 
العرض العادي
