روايه مالي وطن في نجد ألا وطنها، الكاتبه اديم الراشد مميزة مكتملة

5 - 11 - 2024, 09:29 PM

البـارت عشـريــن ..
.
.
.
في بيت ابو زيد
عند مطلق اللي اول ماصحى من بدري اعتدل وهو يتحسس اديم وشافها كويسه ماعندها حراره لكن انصدم اول ماشاف الساعه كانت قريب ال 11 الظهر
طلع مستغرب : يمه ليش ما صحيتوني من بدري
ام زيد : شفتك تعبان واديم تعبانه وخليتك تنام
مطلق : الله يهديتس اكيد ان ابوي معصب
سلمى: لا ابشرك ابوي يوم عرف ان اديم تعبانه قال خلوه ينام
مطلق : وينها شريفه
سلمى: كلهم راحوا وكلهم يسلمون عليك
مطلق : الله يسلمهم خساره ياهايف ليتني لحقته
ام زيد : الله يهدي قلب هايف بس
مطلق : امين
سلمى : مطلق خذ هذا فطورك وانا بروح لاديم
ام زيد : شلون اديم الحين
مطلق : لا بخير
مطلق اخذ الصينيه وجلس وجاء محسن : يممه
ام زيد: نعم يا محسن
محسن : يمه كلمي ابوي نرجع اصايل تعبانه
ضحك مطلق بإستهزاء: انت ما فيك طب ! ماعندك كرامه
محسن: انت مالك دخل
ام زيد : يا محسن ابوك حلف تبي تكلم كلمه هو ولا شف لك بيت اجلس انت واصايل فيه
محسن :ماعندي فلوس اشتري بيت
ام زيد : كلم ابوك ولا دبر نفسك
مطلق : عندك شي كلم ابوي امي لا تغثها بكثر الكلام
قام محسن بطرف عين وتركهم
................••............
في غرفة مطلق
عند اديم اللي صحت على صوت سلمى : يوووه ياسلمى يا حبتس للازعاج
سلمى: ادري بس خلاص انتي طيبه مطلق يقول بخير يلا قومي
اديم : اخوتس ذا لو اموت يقول بخير ماعليها
ضحكت سلمى: متعودين على مطلق كذا تعودي انتي وترا نظرته ثاقبه دامه قال بخير خلاص بخير
اديم وقفت وهي توخر شعرها : اي خلاص انتهى النقاش
غسلت اديم ورجعت جلست : راح هايف
سلمى: راح الله يكون بعونه
اديم : الله يسامح عمي يعني يدري انه يحبها ويبيها ليه يوقف بوجهه
سلمى: ابوي من طرف معه حق يعني انا لو مثلا اكرهه وحده مستحيل اسمع ولدي يتزوج بنتها بس اذا شفت هايف ينكسر قلبي
اديم جلست بتفكير : مهما كان ترا الحب يغيير الحياه يغيير مفاهيم الناس يحلي الحياه لازم عمي ينظر من ذا المنظور ، وبعدين شوفي كيف كان هايف ملييييان حياه ومجرد انه خاف من فقد نجدد انطفى نوره وصار ضايق ومكتئب وهذا ما ينفع
سلمى: والله انا ما ادري كيف صراحه انا محتاره في ذا الحب يعني اذا ناظرت زيد اقول يااازين الحب وسنينه وذا ناظرت في محسن اقول وووع واذا ناظرت في مطلق اكره ابو ابوه وشكل هايف بيكمل الموضوع
انتبهت سلمى لملامح اديم اللي انقلبت : اقصد ان شاء الله ان مطلق يحببني في ذا الحب معتس
اديم صدت وهي ترتب السرير ووقفت سلمى بهدوء اول ما دخل مطلق
مطلق كان جاي بيعطي اديم الفطور لانها ما افطرت لكن سمع كل شي ماكان يدري وش يعلق بالضبط كيف اديم تشوف الحب بنظره حلوه وورديه وكيف مطلق يدمر معالم الحب في عيون الناس
تجاهل كل شي ودخل : صحيتي ! يلا افطري لا ترجعين تمرضين
اديم سكتت وهي تناظر سلمى اللي تناظرها بهدوء
ضحكت سلمى برعب : الله الله مطلق جايب الفطور اصبر بشوف الشمس منين طلعت
مطلق سحبها تجلس : اجلسي بس
اديم اخذت الفطور وجلست : تعال افطر
مطلق : خلاص افطرت هناك افطري انتي
سلمى : اسمع طيب عندي فكره
مطلق : قولي
سلمى: ودنا نروح السوق العصر كلنا نغير جو
مطلق : بشوف على حسب شغلي
سلمى : اصبر اصبر بعلمك
مطلق : وشو بعد
سلمى: تخيل من رجع
مطلق : من ؟!
سلمى نطت وهي تجلس جنب مطلق وتربعت : اول شي رجع ابو راضي
مطلق : ماشاء الله هالمره ما ابطى
سلمى: ايه جاء ويقولون ما قعد فالديره ولا واحد ما عطاه فلوس هديه
اديم : ماشاء الله ماعاد يدري وين يودي فلوسه
مطلق : الله يعوضه ، ومن بعد جاء ؟!
سلمى: تعرف ولد ابو لافي اللي انجن وودوه للمدينه في المستشفى
مطلق :ايييهه
سلمى: يقول حسين رجع و المستشفى معاد يستقلبه وهذا هو يدور بالديره
اديم : المجنون اللي قد علمتيني عنه
سلمى : ايه
اديم : يوووه
مطلق : بس غريبه كيف المستشفى معاد يستقبل حالته
سلمى: مدري بس يقول هبل بالدكاتره اخر شي قالوا تعال خذ ولدك بس
مطلق : عجيب والله
اديم : هو خطير ولا
سلمى: اووه وش خطيره اقولتس لو يذبحتس محد فزع
مطلق عرف ان اديم بتخاف : اااااايييه سلمى هدي هدي فكينا من هالمواضيع هو ما يأذي الا اللي يأذيه
سلمى : ايه صح
اديم :لا تكفون اذا صدق خطير سكروا كل الابواب لا يطب مثل الحراميه
مطلق : لا لا ما يطب
سلمى: هاه بتطلعنا
مطلق : اصبري اصبري بنشوف
سلمى : انا بروح لامي
راحت سلمى ولف مطلق على اديم : انا بطلع اكتبي اللي تبينه
اديم : مابي شي
مطلق كان يرتب نفسه وهو ينعاد في باله كل اللي قالته اديم
طلع بهدوء وهو يمشي بالحاره وكان الكل فرحان بأبو راضي
................••............
في الرياض
عند وليد اللي كان يداري نفسه من نظرات العيال اللي قالهم ابو هيفاء انها مطلقه وهو كان يدري بس ما علمهم
ابو فرج لف يناظر بوليد بهدوء وشاف نظرات وليد تطلبه يتمم لابو هيفاء وتمم ابو فرج وطلعوا بعد ماحددو يوم الملكه اللي اصلا كان وليد محدده مع هيفاء وهو اللي مستسلم لها بكل حب
اما العيال محد كان راضي عن الزواج وهيفاء اللي مابلغت وليد بقصتها بس ألفت قصه تكسر الخاطر وصدقها وليد
ركبوا وهم ساكتين بقهر ولا واحد تكلم لما دخلوا الفندق وكان هايف منسدح يمثل التعب وهو فعلا تعبان نفسياً ومشاري جالس جنبه وهو في دوامة افكار
دخلوا ورمى متعب المفتاح بغضب : من البدايه علمتك يا اهبل وقلت لك تلعب عليك ما طعت
مشاري وهايف جمدوا خوف انهم دروا انها طليقة مطلق وهم يناظرون عصبيه متعب وغضب العيال
ابو فرج: يا وليد يا ولدي انت توك بأول عمرك ويحق لك تطلب اللي تبيها وتاخذها بس انا مانيب مرتاح للناس هذولا فكر واستوعب وبتلقى من بنات الحلال كثير
وليد: يا ناس وش فيكم وش يعني اذا مطلقه
مقبل اللي كان عارف كل شي وساكت وهو يدري ان وليد ما صدق لقى وحده يتعلق فيها ويعوض فقد اهله
سعود : يا حبيبي افهم اعتراضنا مب عشان مطلقه بس كل الموضوع احس فيه شي فيه تدبير
وليد: الله اكبر الحين يوم جت علي صار الموضوع تدبير
مشاري : لحظه ! وعلموني وش صاير
متعب : ابد طال عمرك الاستاذ بيتزوج وحده مطلقه ولا ندري وش علة طلاقها ولا ندري عنها شي الا بتووووصيه من صديق طار فيها وصار الا يبيها
ابو فرج اللي مصدق مسألة الصديق : طيب صديقك ما ذكر لك سبب طلاقهم
وليد : الا
متعب ضحك بإستهزاء وكان متعب شديد ولا يتقبل اي عذر ودقيق بشكل وما ينلعب عليه
سعود : طيب علمنا وانت تشوفنا نحوس من اليوم
وليد : هي كانت متزوجه واحد ما يخاف الله فيها
مشاري لف على هايف اللي اعتدل بذهول
ابو فرج: وشلون !
وليد : يعني مايخاف الله فيها بالمعنى اللي نعرفه
مقبل اللي مب مصدق كل القصه : وليد اشرح بالتفصيل هالعذر ما يمشي
وليد ناظره بعتب :يعني كانت متزوجه واحد اكبر منها بكثير ومعقد وحالته حاله وكان يضربها ولا يصرف عليها ومخليها خدامه عند اهله ولا تقدر تقوله شي يعني كان معنفها
هايف اتسعت عيونه بصدمه: منهو ذا !
وليد : طليقهاا
ابو فرج: ايه كمل !
وليد: ايه يعني كانوا يطلعونها من بيته بالاسعافات واهله ظلام اكثر منه تخيل ان اخوانه كانوا يتخدمون بها كل الحاره تشهد على ظلمهم لها وكان مريض نفسي وحالته حاله وتطلقت قبل فتره
هايف اللي نسى نفسه : على اي اساس صدقت ذا القصه
متعب وقف : على اساس الغباء ! يا رجل انت خبل لذا الدرجه واضحه القصه تلفيق
مشاري : اتوقع كذا
وليد : لا يا حبيبي مب تلفيق واذا انت مب صدقك هذا ما يعنيني انا اللي بتزوج وانا اللي بعيش ماعليكم انتم ارتاحوا
سعود : وليه ابوها ماجاب طاري
ابو فرج: يمكن ماحب يحرج نفسه وبنته
هايف لف على مشاري وهو يحس انه بينفجر دام من بدايتها كذب وبذا الطريقه بيكدون خيير وقف وهو بيشرح كل شي بس قاطعه وليد اللي جلس وهو يمسك ذراع ابو فرج بترجي : تكفى يا ابو فرج لا تتركوني بنص الطريق انا متاكد من قراري وانا ابي البنت من زمان وقلبي يبيها
ابو فرج: وش اقول دامك تبيها اجل براحتك
متعب : انا وشوله محرق دمي بكيفك سو اللي تسويه
سعود مقبل ومشاري وهايف كانوا يناظرونه بشفقه كسر خاطرهم وهم يشوفونه ضاق وهو يترجاهم يوقفون معه
سكت هايف وجلس وهو يناظر مشاري بضيق ومشاري يناظره بتردد محد منهم قدر يوقف ويكشف اوراق هيفاء
................••............
في الديره
عند مطلق اللي كان بطريقه راجع من المحل وهو يكلم زيد اللي انصدم من الاحداث
زيد: كل ذا ولا احد علمني
مطلق : وش نقول ياخي حنا من يومين محتاسين
زيد: الله يهديك يا مطلق وهايف وينه
مطلق: طلع الخبر
زيد : ليته ما تعلق فيها لذا الدرجه وليت ابوي ما درى
مطلق : اللي صار صار
زيد: وانت بعد الله يصلحك علمتك من البدايه يا مطلق لا تخلي هايف يعيش الحلم يا مطلق لا تخليه يتعلق بنجد ما تسمع
مطلق : يا زيد انت تستوعب ولا لا هذا شي لا بيدي ولا بيدك ولا بيد هايف
زيد: المفروض انك تنصحه وانت عايش وشايف ما ترضى عليه وجع القلب
مطلق اخذ نفس : انا عشت بس انا فشلت وهذا مب شرط يصير مع هايف
زيد: بس هايف واضحه قصته من البدايه
مطلق : ربي بيكتب كل خير لو له فيها نصيب بياخذها
زيد : المهم معاد نقدر نسوي شي بس حاول تسوي الامور مع ابوي لا تخليه يعصب زود واترك لي محسن بعدين لين نحل قضية هايف
مطلق : زين
زيد: يلا بروح اكلم هايف
سكر وكمل مطلق طريقه وهو ملاحظ ان اي قصة فاشله يعلقونها على طول في مطلق ويجزمون ان هايف بيطيح فيها مثله
................••............
في بيت ابو زيد
عند سلمى واديم اللي كانوا جالسين بزهق
سلمى وهي تحرك السكر وهي عافسه وجهها : ليتنا رحنا مع امي لام مشعان نغير جو ولا ننادي غزيل توسع صدورنا بأخبار الحاره
اديم : ما يحتاج توسع صدرتس كل الاخبار عندتس
سلمى: وش نسوي ماعندنا شي غيرها ، حتى مطلق حسبي لله على ابليسه سحب علينا
اديم : ما تعودت على بيتكم كذا هدوء احس يوحش
سلمى: اسكتي ما شفتي من الوحشه شي عشت اسبوع مرعب وانتم مسافرين تخيلي بس انا وام شحوم محسنوه حسبي للله عليهم الاثنين
اديم اخذت اراديو وهي تحوس فيه وتسمع سوالف سلمى عن معاناتها مع ام شحوم وش كثر الحين تحس بالراحه
لكن رمت الراديو وصرخت برعب اول ما حست احد كبير وراها وقطع عنها نسيم الهواء البارد وهي ماطرا لها الا المجنون
مطلق اللي كان جاي وهو دايم مطلق يدخل صامت واذا جلس رد السلام كان لابس فروته ولاف شماغه على وجهه واول ما قرب بيجلس صرخت اديم : يمممممه يمممه يممه
مطلق انفجع وهو يحاول يسكتها وهي تصارخ
سلمى صرخت : هذا مطلق ياخبله مطلق مطلق
مطلق سحب الشماغه عن وجهه : هذا انا وش بلاتس
اديم اللي كانت حاط ذراعها على عيونها بعدتها بخوف وهي قلبها يرقع اول ماشافته مطلق لا شعوورياً دفته بخوف وهي تبكي : ياللللله منك يالللله ياخي الانسان يتكلم يطلع صوت يعلم الناس انه جاي انت وش انت تموت على التروييع ؟!
مطلق رفع حواجبه بذهول ووقفت اديم اول ما حست انها جابت العيد وهي تشوف وجهه اللي مايدل على شي بحواجبه المرفوعه ما قدرت تفسرها غضب ولا ووشو راحت للغرفه وهي تبكي
سلمى كان ودها تضحك بس حست من سكوت مطلق انه عصب لكن ضحكت اول ما لف مطلق عليها بصدمه : وش بلاها ذا الخبله وش سوينا لها
سلمى:ههههههههههههههههههههï؟½ ï؟½هههههههههههههههههههههههه هههههههههه روعتها وش بتسوي يعني تصفق لك
مطلق : حسبي للله ربي قومي قومي اجهزي الشرهه على اللي بيطلعكم
سلمى نطت وهي تضحك: انا طالعه ماعليك بس ذا المروعه وش بيطلعها
مطلق : خليها خليها انا بروح لها
سلمى ركضت وهي تضحك ومطلق اللي نزل فروته وشماغه خوفا انه يفجعها بعد مره ثانيه ويبتلش بها
دخل وهو يسمعها تغسل طلعت اديم وهي متوقعه انها بتصفق منه بس انصدمت اول ما ابتسم وهو رافع يده: هه هه هذا انا مطلق لا تروعين بعد
اديم صدت وهي تمسح وجهها
مطلق : وش دراني انتس بتروعين وبعدين انا اول مره اشوف انسانه خوافه كثرتس حتى عبود مايخاف مثلتس
اديم : سبحان الله ، صرت انا خوافه والله لو ادخل عليك مثل ما دخلت لتنفجع وبعدين احسبك المجنون
مطلق : حسبي لله عليتس يا سلمى ، اول شي انا هاذي دخلتي من يوم ربي خلقني وثاني شي المجنون مايدخل البيوت وثالث شي انتي اللي غلطانه احد يجلس ويعطي الباب ظهره
وقرب وهو يضحك: ورابع شي انتي دموعتس ما تخلص
اديم بطرف عين : وانا وش عندي غير دموعي
مطلق رجع لورا بضيق من كلمتها:ما عليه بسيطه قومي اللسبي يلا بنطلع لسوق
اديم: ايه بعد الفجعه سوق
مطلق : كنت جاي اطلعكم وانتي انفجعتي وبعدين خلاص بعدين من يوم ادخل الحوش بنادي واصارخ
اديم : تسوي خير فالمسلمين ترا مروعين خلقه وانت بس تكلم مب تدخل كذا
مطلق : ماشاء الله وش ذا اللساان اللي طلع فجاءه
اديم هجدت : معليش بس فقدت اعصابي
مطلق: يلا انتظرتس بالحوش عجلي
طلع وهو يشوف سلمى اللي جاهزه و واقفه : عاد انتي ماتخلين شي يعتب عليتس
سلمى تكت عليه : ياخي ترا حامت كبدي ماعندي الا هالديره وبعد ما نطلع فيها ماشاء الله على غزيل ما تقعد بالبيت
مطلق دفها بطرف عين: ايييه ودتس انتس مثلها بس معصي
سلمى بقناعه تامه: ادري بتقطعون رجليني
ضحك مطلق : امي وين ؟
سلمى: ابد امي اليوم قهوتهم عند ام مشعان
توه مطلق بيعلق بس فزت سلمى وهي تصفق وتغني :هلا بالمروعه
اديم اللي كانت تسكر عبايتها: انتي اص ولا كلمه
سلمى ضحكت وهي تعدل عباية اديم:
(العبااة الرهيفه ع المتون الرهايف
خلت القلب يرجف غصب ماهو بكيفه )
اديم ضحكت وهي ما انتبهت وقصدها ان قلبها يرجف بسبة فجعه مطلق لها بس خانها التعبير وقالت: والله اخوتس اللي خلى القلب يرجف غصب ماهو بكيفه
لف مطلق يناظرها بذهول وهدوء
وضحكت سلمى وهو تصفق : احلللى يالغزل الصريح
مطلق ضربها على راسها بخفه : اقصري صوتتس
اديم تلخبطت وحسته فهمها غلط: اقصد من الفجعه
سلمى ضحكت : لحظه وش تكملتها تكفى يامطلق نسيتها
ابتسم مطلق وهو يسكر الباب وقال بصوت عادي
(من ردى الحظ قلبي طول الايام خايف
‏خايف والليالي ماتجيله بكيفه )
هذا البيت بالضبط كان حال مطلق اللي وده يصرخ به ويقولهم انه مهما كان مع اديم كويس ومهما تقبلها ومهما تعود يبقى قلبه خايف وصح خايف والليالي ماتجي على كيفه
اديم فهمت ذا البيت بس ماهي متاكده ان مطلق قلبه خايف
سلمى: صح تكملتها بس هايف دايم يغني منها بيت ناسيته
مطلق اللي مستحييل ينسى تفاصيل هايف وهو يلعب بمسبحته قال بنفس النبره والصوت :
القدر حط سيفه دون زين الوصايف
‏حال من دون شوفه ما بقى غير طيفه
‏ما بقى غير طيفه ساكنٍ قلب هايف
اديم: هو كذا فيها هايف
سلمى: لا هي الاغنيه تكون
ما بقى غير طيفه داخل القلب طايف
بس هايف يقلبها على اسمه
مطلق وهو يراقب خطواته: مادرى ان القدر صدق بيحط سيفه دونها
اديم وسلمى ماتعودوا ياخذون يعطون مع مطلق بذا المواضيع فا سكتوا وهم فاهمين وضع هايف اللي فعلا نجد ساكنه قلبه
............••............
في الرياض
عند وليد اللي مازال يقنعهم بقصة هيفاء اللي ما قدر هايف يتحملها زياده وانفجر : تراك ازعجتنا بهيفاء وقصة هيفاء دامك تبيها اذلف تزوجها لكن حط في راسك ان كل هالقصه كذب في كذب
مشاري حس ان هايف بيقول كل السالفه وقف : خلاص يا وليد خلاص هايف تعال تعال
سحب هايف وطلعوا برا الشقه
هايف: فكني يا مشاري هذا انغسل مخه خلني افجر القصه بوجهه وبكيفه
مشاري : يا هايف وش بتستفيد بتقول كذابه ولا بتقول مطلق كان معيشها اميره وهي اللي طغت فالنهايه وليد متعلق فيها ما بيصير شي الا انه بينكسر قلبه في ذا الحالتين يا انه بيتركها يا انه بيتهاوش معنا
هايف :ما يهمني اهم شي ما اخلي احد يتكلم على مطلق بذا الطريقه وانا بعيني كنت اشوف وشلون مطلق محترمها ومن كثر ما اغلاها للحين يعاني وهي ابد ولا فيه احترام للعشره ما قصرت طلعته اسواء منه مافيه
مشاري: لا تصير اناني يمكن قالت كذا تبي تكسب ود وليد وقدرت واللي راح راح
هايف: انت تحسب انها ذا شافتني ما بتسوي اللي تسويه عشان تبعدني لا اكشف اللعبه
مشاري : مدري بس انت تشوف وليد وشلون متعلق فيها
هايف : يااااه ياربي اخر عمري اخوي ينغلط عليه وينظلم وانا ساكت اتفرج
مشاري : تدري قله بس لا تقول انه مطلق قل واحد من الجماعه قول اللي تقوله بس لا تسبب بينه وبين مطلق حزازيه وهو حاب مطلق
هايف قبل يرد سمع صوت متعب اللي يقولهم يمشون
طلعوا وهايف يراقب وليد بغضب لكن اللي يشوفه ان وليد متعلق بهيفاء كثير طول وقته يكلمها وحالته حاله
افترقوا بسيارتين هايف ومشاري ومقبل بسيارة هايف والباقين مع متعب
مقبل : وش رايكم بموضوع وليد
مشاري: انت اقرب له انت قول وش رايك
مقبل : لو اقولك اني ضد ورافض كل ذا محد بيصدقني
هايف : وليه دعمته!
مقبل : لاني ادري ومتاكد ان وليد بعد يدري وعارف ان قصة هيفاء كذب ولعب ويدري انه لازم يسمع كلامنا ولكن مايبي يسمع لاحد غير قلبه انا اقدر اعارضه وازعل عليه وادري بيرجع لكن وليد قلبه متعلق فيها كثييير يشوف انها فرصه يبي يعيشها ومؤمن انه بيستقر معها وحاولت فيه بس مافيه طب الرجال انتهى امره معها عشان كذا انا ساكت
مشاري : ما توقعت انه متأزم وضعه لذا الدرجه
مقبل: هو مستسلم لكل شي تبي تزين بيعيشها واذا ما حصلت بتخرب
هايف بضيق : ليه نخليه يدخلها من البدايه
مقبل ابتسم:المفروض تكون انت اكثر واحد بينا يفهمه قراره بقلبه مب بيده
مشاري كان يأشر لهايف يسكت ويطوف الموضوع وفعلا سكت هايف وانشغل باتصال زيد اللي مهما نصح هايف ما يتنصح ولا فيه طب
وضحك مقبل : شفت كيف انت ما تبي تسمع اي شور حتى لو انك تدري انه صحيح ومنطقي ماتبي الا تسمع حل يجمعك بنجد او تسمع لقلبك واحلامك مع نجد هذا وضع وليد
هنا مقبل خلص على السالفه وقرر هايف يسكت ويتجاهل القصه ويركز على قضيته هو بس
................••............
في الديره
عند نجد وغزيل اللي كانو يتمشون بالسوق ونجد ضايقه ومهما سولفت غزيل ما تسليها
غزيل : شوفي شوفي هذا مطلق وزوجته وسلمى
لفت نجد بارتباك : غزيل تقدرين تسألين عن هايف
غزيل: اسأل وش اقول
نجد : تكفين يا غزيل على الاقل شوفي اذا صاير عندهم شي
غزيل: اروح واخليتس
نجد : روحي مسامحه روحي
راحت غزيل ووقفت نجد تراقبهم قريب محل ابوها
في الطرف المقابل
عند سلوى واديم اللي كانو يحشون اكثر من ما هم يناظرون الاغراض ومطلق سامع وساكت ولف يضحك لسلمى : جت قدوتس بالحياه
سلمى لفت وهي تشوف غزيل : سلام نور السوق
سلمى:الله يسلمتس ودي اقول النور نورتس بس دايم وانتي تدوجين بالسوق
غزيل: ماعليه تمونين اديم شلونتس
اديم : بخير انتي شلونس
غزيل : حمدلله
بدت غزيل تسأل عن الاخبار وبطريقتها وصلت لهايف وقالت: يا بنت اخوانتس مختفين معاد ينشافون
سلمى: ابد هايف بالخبر وزيد فالمدنيه والباقين فيه
غزيل: اييه صح نسيت ان هايف بالخبر وماجاء الاسبوع ذا صح ماشفته
سلمى: جاء بس مريض ماطلع كثير
غزيل: ماعلينا المهم خلوني بروح وانتم زورونا
سلمى: انتي خفيفه تعالي
غزيل : ان شاء الله
راحت ولف مطلق: وش عندها
سلمى: تسلم
مطلق : يلا خفوا قبل يشوفنا ابوي
عند نجد قالت لها غزيل ان هايف تعبان والحين شالت همه زود ما تدري وش تسوي الحين وكيف توصل رجعت لبيتهم وهي متضايقه من كل الاحتمالات اللي تضيق الصدر
................••............
الليل في الخبر
هايف اللي ماصدق ان وليد ينخمد ويفتك من دوامت هيفاء اللي سببت له صداع فوق اللي همه
راح لسعود اللي مشغول بعياله وهو ياخذ عنه عزيز بما انه سهران سهران
وهو منسدح بالصاله وعزيز على صدره فز على صوت جواله ورد : الو
نجد : هايف
تكهربت كل خليه بهايف وفز لكن ارتعب وهو يمسك عزيز اللي فلت منه وكان بيطيح مسكه وجلس بتوتر : نجد
نجد : سلامات يقولون مريض
هايف انشرح صدره بصوتها: من يقوله
نجد : رحت الخبر بدون ما تودعني وقلت اكيد فيه شي وسألنا وقالوا انك مريض
هايف ابتسم : ودتس ارد عليتس بالرد اللي تحبينه
نجد ابتسمت : يكفي انك ترد
هايف ضحك : انتي تحبين خالد فيصل وخالد فيصل يقول ( مريض المحبه داه ودواه بوصالك )
نجد بالحقيقه كانت ودها تطير ما ندمت ابد انها قررت تتصل فيه وتطمن عليه ايه هذا هايف اللي ما تعودت انه يكون بعيد
ابتسمت وهي تقول : دامني شفت انك بخير بقولك اسمع اخر بيت بالاغنيه وتعرف ردي
سكرت نجد اللي يكفيها هذا الرد من هايف اللي ما تدري نجد وش سوت فيه بصوتها بس حس ان الدنيا ضحكت له وطار ثلاث ارباع همه سحب الجوال وهو يفتح على الاغنيه ويسمعها لين وصلت به لشطر المقصود من نجد
(تفرغت لك يا ساكن القلب بلحالك ... تقل غيرك من الناس ما هم بحييني)
يووووه يافرحة قلب هايف يوووه يا سعة صدره بهاللحظه اللي جددت فيها نجد حياته وطلعته من الضيق كله ونسته كل مشكله وكل عائق وقف بطريقه
اعتدل وهو يحضن عزيز وهو خلاص يحس انه ارتاح باله الحين ويقدر انه يصبر ويفكر
................••............
في بيت ابو زيد
اعلن ابو زيد انتهى اليوم وهو يقفل الانوار ويسكر الابواب وجاء حسين بعد ما ودا نويصر المجنون لاهله
ابو زيد : وديت نويصر لاهله
حسين: ايه
ابو زيد: يلا يلا نم
حسين: ابشر
دخل ابو زيد وهو يشوف محسن اللي قال : يبه وش قلت في موضوعي
ابو زيد: بكره يحلها حلال
محسن :يعني الليله ما انت بقايل شي
ابو زيد: لا فكني منك لا ترفع ضغطي
وقف محسن وطلع لغرفته
وابو زيد راح ينام وفي المطبخ كانت سلمى تغسل المواعين واديم ترتب معها ومطلق يظبط سلك الثلاجه وشبكها وهو يبعد : سلمى خلاص ترا ضبطتها
سلمى: زين زين
ناظر ساعته مطلق وهو يشوف ابوه يسكر الانوار : يلا يلا نوم
سلمى وهي تمسح يدها: والله بدري ابوي الله يهديه
ام زيد طلت: سلمى يلا خلصي
اديم : سلمى تعالي معنا والله مافيني نوم
سلمى : حتى انا بس خليني اقول لامي
ركضت سلمى لامها قبل تدخل : يمه انا بروح عند اديم شوي بنسهر وارجع
ام زيد طارت عيونها : وشو انهبلتي انتي وش تبين عند الرجال وزوجته بذا الليل امشي امشي نومي بس
سلمى: يييمه تكفين بدري تونا
ام زيد : اصص وامشي
دخلت ام زيد وتركت سلمى اللي انقهرت ورجعت :روحي انا بنوم بدري ابوي بكره يبي له صحوه من بدري
اديم : امشي ما بنطول
سلمى: لا يا بنت انا اعرفني اذا مسكت خط سوالف ما بخلص الا الفجر بكره ان شاء الله
مطلق اللي كان برا بالحوش ويدق على هايف بس مغلق سكر اول ماشاف اديم جايه واتجهه للغرفه
وبعد ما انسدح مطلق واستعد انه ينام وجات اديم بعد على اساس تنام
تسكرت كل الانوار ولا فيه الا نور الشباك عليهم واديم ما كان فيها نوم ابد ولا مطلق وكلهم ساكتين
مطلق اللي كان من اول ما قرر ابوه يخطب له وهو يحاول يرتب نفسه ويتقبل ويستعد ويعيش ويحب
رتب نفسه وتقبل واستعد لكن وصل لمرحله انه يعيش حياته وللحين واقف على اول عتبات هالمرحله وقدر يتخطاها لكن محتار وشايل هم الخطوات الجايه
لف يناظر اديم الهاديه وقال بعد تردد كبيييير وهو للحين كلام اديم يتردد بباله : كيف تشوفين الحياه يا اديم
اديم احتارت ما عرفت كيف تجاوب او ما فهمت : شلون يعني
مطلق : حياتنا ذي كيف تشوفينا ادري انها مب اللي في بالتس بس جاوبيني
اديم احتارت وش تجاوبه بس قالت وهي تداري لا تجيب العيد : حياه عاديه ، حياه روتينيه ، يمكن فيها اختلافات وتمييز ، صح مب مثل اللي ببالي بس حياه حلوه يعني
مطلق : وش اللي في بالتس
اديم ( يالليل وش اقوله ذا ،اقول في بالي اني اعيش حياه حلوه مع انسان يحبني واحبه مب واحد يحب طليقته ) بس لفت وهي تحاول انها تخلي هالحياه مثل تفكيرها : يعني كنت افكر اني اعيش حياه احسها شوي غريبه عني يعني مابي اعيش شي اعرفه وشي روتيني ابي اشياء تتجدد بحياتي كل يوم اشوف شي وكل يوم اعرف شي
ابتسم مطلق وهو يعرف تفكير اديم : ايه تفكرين تعيشين كذا لكن مع انسان يحبتس وتحبينه
اديم لفت بصدمه تناظره بتوتر
مطلق : هذا تفكير اغلب الناس او اغلب البنات انا مقدر ازيف واكذب واخلق لي قصه وهميه اخليتس تعيشين عليها معي وادري تدرين بسالفة زواجي الاول وادري وش ممكن تفكرين عني وادري تضايقين من اشياء كثيره وادري انتس المفروض ماتعيشين اي شي من ذا .. لكن ابيتس تأكدين مستحيل اظلمتس بس ابي منتس وقت وفرصه
اديم بكل ما تعنيه كلمة انصدمت ايه انصدمت ماهي مستوعبه انها بيجي يوم تسمع هالكلام من احد وخصوصاً مطلق تجمدت تجمدت بجد وهي للحين تحاول تفهم انه يطلب منها وقت جمدت عيونها وهي تناظر كتفه بصدمه
مطلق اللي اخيراً قدر ينطق ذا الجُمل ويرتاح اخيرا يحس انه بيهدي تأنيب الضمير اللي يحسه اتجاه اديم
كان وده يعيش مع اديم ولا يظلمها بس يبي وقت واخيرا قدر يبرر بعد ما حس بضيقها بعد كلامه وتصرفاته : انتظر جوابتس
اديم غمضت بأرتباك وهي وماتدري كيف ترد وش تقول لكن قدرت تنطق اكثر جمله حستها منطقيه بذا الوضع : لو اني ماعطتيك فرصه ووقت ما تزوجتك وانا ادري بوضعك وقتك معك من زمان يا مطلق
اكتفى مطلق بهالرد اللي برد قلبه وابتسم : ان شاء الله ان هالوقت ينصفك وينصفني
اديم اللي ماكانت تحس بنوم بس بعد كلامه حست انها ودها تنام للأبد سكتت وسكت مطلق
واستمر السكوت ساعات قدر مطلق يغفى فيها براحة قلب بس صحى على صوت اديم اللي تناديه بهمس : مطلق مطلق تكفى اصحى
فز وهو فاتح عيونه بقوه ورعب: اديم وش فيتس
اديم بهمس خايف : تسمع الصوت اللي اسمعه
اعتدل مطلق وهو يسمع وكان فعلا صوت احد يتكلم بصوت مرعب : وش ذا ؟!
اديم اللي صحت على هالصوت وعلى طول صحت مطلق بخوف وهي تحس أنها تتوهم بس اول ما تاكدت ان مطلق سمعه مسكت كتف مطلق برعب : مطلق وش ذاا
مطلق اللي مفجوع اصلا من صحيته بس ماكان يسمع هالصوت واديم فيه صح انه متعوووود على هالشي بالديره بس همه الحين اديم : مافيه شي اصبري
تحرك بيقوم ومسكته اديم : وين بتروووح
مطلق :بشوف وش ذا
اديم : بتروح وتخليني
مطلق : اجلسي هنا ما بيجيتس شي
اديم : لا والله ما تروح وتخليني اروح معك
مطلق : وين بترو.. انقطع صوته اول ما ارتفع الصوت
اديم نطت وهي تقرب من مطلق بخوف : تكفى يا مطلق انا خايفه
مطلق اول ما سمع تكفى منها نسى كل شي : طيب قومي بشويش
وقفت اديم وهي من الخرعه متمسكه بذراع مطلق اللي رفع ذراعه وهو يحاوط كتف اديم بحذر
تحرك وهو متجهه لمصدر الصوت عند الشباك وهو يسمي واديم اللي ما تبي تشوف شي ومخبيه وجهها بكتف مطلق اللي فتح الشباك وهو يناظر بحذر وتوتر لكن زفر بضيق وهو يرجع يسكر الشباك
اديم : وشو؟!!
مطلق سكر الشباك بقوه والستاره وهو يمسك كتف اديم : مافيه شي تعالي
اديم: بس الصوت باقي
مطلق : هذا نويصر
اديم شهقت : المجنون
مطلق : ايه
اديم : يا ويلي وش جابه
مطلق اللي كان شايف نويصر جالس بزوايه قريب بيتههم وهو يتكلم مع الجدار وعنده اصوات غريبه : مجنون وش جابه يعني
اديم : هذا كله صوته
مطلق اللي صح خاف بس طنش وهو مايبي يعلم اديم تخاف : ايه
اديم : مستحيل يا مطلق تسمع ولا ما تسمع
مطلق : يا بنت الحلال انتي لا تسمعين شي وسمي بالله ونامي
اديم : نامي !! كذا ببساطه نامي انا مستحيل يمر النوم علي والصوت هذا فيه
مطلق دخلها باللحاف : ما بيجيتس يا بنت الحلال
اديم اللي كانت تتكلم برجفه وهي تسمع الصوت يزيد : يا ويلي تسمع انت ولا ما تسمع
مطلق : اول شي لا تبكين وخليتس قويه وثاني شي انا معتس وشوله خايفه
اديم : انت تنام وتخليني
مطلق ابتسم وهو يحاول يشتت الصوت : مانيب نايم بجلس معتس
انسدح مطلق بجنبها وهو يحس بخوفها ولكن فجاءه ماعاد قدر مطلق يسيطر على نومه عيونه تسكر غصب عليه
اديم : يا مطلق لا تنام
مطلق: ما نمت بس انتي نامي بتجلسين كذا بتخافين اكثر
اديم : وشلون انام وشلون
مطلق : اقري المعوذات وبتنامين
اديم اللي كانت لازقه بكتف مطلق وهي مب قادره تركز من الخوف وصارت تخبص بالايات
مطلق اللي اخر الحلول وهو ميت نوم رفع ذراعه بتردد : تعالي نامي قريبه مني
اديم اللي جمدت اكثر وهي ماتدري وش تسوي ما اصعب من المجنون الا نومتها على ذراع مطلق
مطلق : يلا
دخلت اديم معه وهي تنسدح على ذراعه وكان مطلق ارحم لها من الاصوات اللي تسمعها
حاوطها مطلق بذراعه الثاني وهي تحس انها انعزلت عن كل شي ومعاد تسمع الا صوت دقات قلبها اللي اختلطت بأنفاس مطلق االلي كانت هااااديه رغم ان مطلق ما كان هادي داخلياً كان في قمة توتره وكان متوقع انه بيرتاح وينام بس ويييين طار النوم عنه و اديم قريبه منه لذا الدرجه
اما اديم اللي حست انها دخلت غيبوبه رعب تحس انها متخدره بس صاحيه وكله من هول الموقف
رغم ان كل شوي يزيد الصوت الا انهم تقريبا ماعاد يسمعونه ما عاد يسمعون الا صوت قلبهم اللي يرجف بشكل مرعب وموجع
ماكان مطلق يحس بيده اللي كل مره يحس انه قلبه اوجعه كان يشد على اديم لين صارت شوي وتدخل بين ضلوعه
اديم كل ما حست انه شد عليها يزيد الرعب بقلبها لكن كثر هالرعب كان يزيد الامان وتنسى نويصر المجنون وتبلش بمطلق المجنون
كان مثل هالتقدم المرعب في زواجهم اللي كان على ورق طول هالفتره وطول هالفتره ما قدر مطلق يتجاوز وضعه ويصير متزوج رسمي
.................••............
اذن الفجر اخييراً
وبهالاذان ارتبطت كثيييير اشياء بدايتها وصول فايز وريوف لسعوديه ورغم انهم كانوا اسعد اثنين بزواجهم واكثر اثنين محللين كل معاني الزواج والسعاده ...
وهاالاذان صحى هايف اللي من يوم ماحط راسه على المخده ونام وهو سهران مع طيف نجد بأحلامه وكانت اسعد نومه لهايف بعد هالايام المتعبه فز هايف اول مافقد محل عزيز وانتبه لصوت متعب وراه وهو يمسح وجهه من الوضوء : لا تخاف شفتك نايم بتعب وخفت تنقلب عليه بالغلط فا اخذته لابوه يكمل نومه
هايف اللي كان يحس انه الابتسامه مرسومه غصب على وجهه : زين زين اجل خلني اتوضى واطلع للمسجد
وبعد ما توضى توجهه للمسجد وهو يستغفر في كل دقيقه وهو خايف ان نجد تدخل بصلاته بعد وتبطلها
...
وهالاذان حرر قلب مطلق اللي تعب من عصف المشاعر اللي يمر بها مطلق اللي ابتعد بالقوه وهو يحس انه صوته حتى اختفى : اديم
اديم اللي ماصدقت اذن الفجر وقالت بصوت تعبان من الخوف والتوتر ودقات القلب : همم
مطلق : قومي صلي وانا بروح اصلي
اديم توها تذكر ان المجنون فيه ولفت برعب لشباك : وين تروح ! كيف اجلس لحالي
مطلق : خلاص المجنون راح وانا بصلي
اديم : لا ولله ما اجلس لحالي
مطلق اللي اصلا مرتبك : اخلي صلاة الجماعه واجلس معتس يعني
اديم :والله خايفه
مطلق : اسمعي صلي وخليتس جالسه بصلي وبجي والله ما بيجيتس شي
اديم : لا تكفى والله مقدر
مطلق اللي يسمع ابوه ينادي : وش اسوي يعني
اديم :ودني عند سلمى
مطلق : يلا خليني اتوضى
فرت اديم وهو توقف عند باب الحمام برعب وتوتر وهي تنتظر مطلق يتوضى وطلع مطلق : يلا توضي وصلي عشان اوديتس وألحق
دخلت اديم وبسرعه توضت وطلعت ومطلق ماسك جلال الصلاة عطاها وهو ينتظرها تصلي وبعدها طلعوا متجهيين لسلمى
بس حصلوا ام زيد قدامهم : وش فيكم
مطلق وهو مستعجل بيلحق الصلاة : يمه خلي اديم عندتس لين اصلي واجي
بسرعه راح ولفت ام زيد : اديم وش فيتس تعبانه
اديم بتوتر : لا بس ياخالتي كان المجنون طول الوقت تحت الشباك وعنده اصوات تفجع عجزت اجلس لحالي
ام زيد : لا بسم لله عليتس مافي شي يخوف يا حبيبتي وهذا ابتلاء من ربي ولا تخافين
اخذتها ام زيد ودخلت واديم كانت ما تفكر بالمجنون قد ما تفكر بمطلق
.
.
.
انتهىâ™¥

5 - 11 - 2024, 09:30 PM

البـارت الواحـد والعشـرين...
.
.
.
في الخبر
عند هايف الللي من بعد ما سلم وهو يحاول قد مايقدر يتجاهل وليد بكل مافيه من طاقه
ولف على يمينه وابتسم لمشاري االلي قام من الصلاة وجاء له مبتسم : ياصباح الابتسامه اللي وحشتنا ، خير خير وش ذا الرضا مبتسم وحياتك حلوه اللي يشوفك الحين مايشوفك البارح
ضحك هايف : هداني الله
مشاري ضحك وهو يهمس : هداك الله ان شاء الله بس اكيد فيه سبب والظاهر حلم
هايف:هو ذا
مشاري : الله يكثر الاحلام اجل
هايف : امين
دخل هايف للغرفه وهو يشوف الشباب راجعين من المسجد وبيرجعون ينامون انسدح بينهم وهو ما زال مبتسم وكان من كثر ماهو يحس انت بخير وده يرجع يتصل بنجد بس مايقدر
................••............
في الديره
عند مطلق اللي سلم وحتى من قوة مب مستعجل كان يتعثر بالناس
ابو زيد اللي كان يمشي هو ومحسن وحسين ورا مطلق اللي يخف بمشيته بيلحق على اديم اكيد انها جننت امه
ابو زيد : مطلق وش بلاك بتطير
مطلق: هاه لا بس امشي
ابو زيد : اركد الدنيا مب طايره
مطلق:ابشر
ابو زيد:اديم تعبانه اليوم
مطلق : شوي
ابوزيد : اجل اليوم لا تروح لا لعزبه ولا لمحل اذا احتاجت مستشفى ودها
مطلق اللي يبيها من الله يبي ينام انهد حيله طول الليل : ابشر
راح مطلق يتاكد اذا نويصر باقي فيه او راح بس حصله راح ودخل يدور على اديم وشافها جالسه جنب امه الي تصلي وتسنن وسلمى اللي منسدحه بجلالها ماصدقت مطلق وصل وفزت: خذ مرتك ذا الخوافه بلحق أنوم قبل الساعه 7
مطلق ضحك : وش فايدتس انتي اصلا روحي روحي
سلمى: ماني فاضيه لك ، بس من الحين اعلمتس ترا باقي ما شفتي من اكشن الديره شي
سلمت ام زيد: ماعليك منها وانتي يا حبيبتي يا اديم لا تخافين اقري المعوذات ونامي
مطلق : هين يا سلمى اذلفي اذلفي
اديم : معليش ياخالتي اربكتس معي
ام زيد: لا يمه حبيبتي
دخل ابو زيد: اديم علامتس وانا عمتس تعبانه بالحيل
مطلق : ا لا لا امي تقول بخير ما عليها بس تنام وتصير احسن
ابو زيد : اجل روحي روحي
اديم طلعت مع مطلق اللي منهار تعب دخل وهو يتفقد الغرفه وانسدح بتعب
اديم: راح المجنون
مطلق لف ووده يقول راح بس مايدري ليه قال: صراحه ماراح مره قريب
اديم :يوووه تكفى يامطلق خله يروح
مطلق جاز له وابتسم بخفيه : حرام يا اديم مسكين خليه شوي وبيروح لاهله
اديم : بس انا مقدر انام كذا والله بتجنن
مطلق : والله انا ميت نوم معاد فيني صبر ابد تعالي تعوذي من ابليس ونامي
اديم جلست جنبه : ايييه انت ماعليك من شي لو بيديك من اليوم نايم
مطلق : والله انا لقيت لتس حل يريحني ويريحتس
اديم وهي تدعي ربها انه ما يقصد انها تنام على ذراعه او بالاصح بحضنه: وشو !!
مطلق مد ذراعه وهو متردد بس هذا انسب حل يخليه يتعود على ان يكون بجنبه انسانه لطيفه مثل اديم ويبدأ يتقبلها زوجه حقيقه
اديم ناظرته بهدوء وهو يبادلها نفس النظرات الهاديه صدت وهي مصدقه مسألة المجنون ورجعت تنسدح على ذراعه ورجع نفس الموقف بس مشاعر اهداء شوي لين ما كل واحد دخل بنومه
................••............
عند بيت ابو فايز
دخلوا فايز وريوف وهم يسلمون على الكل والكل استقبلهم بحب وعمها اللي استقبلها بحفاوه وكانت ريوف مذهوله ببيتهم اللي ما توقعته كذا
جاء فايز مع الشنط ونزلها بجناحهم وهو يبتسم : ودي اوريك كل البيت وتفاصيله بس خلاص انتهيت تعبان وبناام
ريوف ؛طيب انت نام وانا بكلم اهلي
فايز : زين بس لا تبطين علي اشتاق لك ترا
ريوف بخجل : ابشر
راح فايز ينام وسحبت ريوف جوالها وتتصل وترد عليها امها ومثل سوالف اي ام وبنتها وبعدها اخذت سلمى الجوال وهو تسوي فطور ابوها : ماشاءا الله ريوف اخيرا تذكرتي اهلتس يالخاينه
ريوف : والله ما نسيتكم لكن والله لو اعلمتس وش لقيت ما تلوميني
سلمى؛ بتعلميني ياقلبي وبتفصيل بعد
ريوف: اصبري بس لين اجيكم واعلمتس انتم كيفكم كلكم كيف مطلق واديم
سلمى : ابد بخير ومطلق ابشرتس ما تشوفينه الحين تعرفين وش معنى اشغله الله بأديم صدق اشغله الله بها صار رايح يا اديم وراجع يا اديم
ريوف : حمدلله اكثر اثنين شلت همهم
سلمى: ايه ايه الحمدلله
ريوف : اجل انا تعبانه بسكر وبعدين اكلمتس
سلمى: الله يالدنيا ناس تكرف وناس راجعه من سفر
وتنام
وسكرت ريوف وهي تضحك ورجعت سلمى لشغلها
................••............
في الخبر
عند هايف من الصبح صحى وهو يجهز لدوامه وطلع وهو بيده كوب الشاهي واكتشف هايف انه يضيق على نفسه بنفسه ما عليه بيدور حل بس بعد مايبي يفقد روحه اللي حس في ايام انه اظلم من الضيق
ابتسم وهو يشوف ابو فرج اللي بابه مفتوح وهو يسقي الزرع دق الباب ببتسامه : يا صباح الخير يا وجه الخير
ضحك ابو فرج وهو ينزل المويه من يده: يا صباح الخير والنوير من زمان عن هالصباح اللي يشرح الصدر بشوفة وجهك
هايف وهو يبوس راسه : الله يخليك لنا
ابو فرج : ادخل افطر
هايف : مستعجل والله
ابو فرج:اجل الله يستر عليك يا ولدي لكن تعالوا تغدوا عندنا شوي ولا بتزعل ام فرج
هايف: ابشر ابشر وسلم عليها
راح هايف وهو الأول مره يروح لدوام بدون مايشغل اي شي يسمعه كان مكتفي بصوت نجد اللي للان يفكر فيه ويتأمله ضحك اول ماشاف لوحه على مكتبه عليها مكتوب فرع الخُبر ابتسم وهو متعجب حتى لو نجد بالديره بس صوتها باقي بمسمع هايف وهو بالخبر
دخل متعب وهو معاه اوراق :هايف خذ هاذي عدلها وخذ هالقهوه روق عليها
هايف : مشكور يا باشا
متعب كان بيلف بس ضحك وهو يسحب ورقه من بين اوراق هايف اللي كان وهو يفكر بنجد لا شعورياً خطتها يده : واضح مروق ما تحتاج قهوتي
هايف ضحك : وش نسوي هاذي اهم محسنات المزاج
حط متعب الورقه قدام هايف وهو يضحك : اجل كمل شغلك يا شاعر نجد
طلع متعب واخذ هايف الورقه وهو يقراء السطور اللي رتبها قلبه ببتسامه رضا وحب (يامبسمك صيته وصل حد الخبر
كل الامكان تحتفل لا جيتها
حسنك كلامك و صوتك اللي يعتبر ‏
أجمل قصيده عشتها و أمسيتها)
نزل الورقه ببتسامه وهو يرجع لشغله
................••............
عند ابو زيد اللي كان بالمحل
ويقلب اوراق الحساب وحسين جالس جنبه وهو مرتبك ويكرهه فقرة اخر الشهر اللي ابوه يراجع فيها الحسابات
محسن: يبه اليوم حسابات لازم مطلق يكون فيه ليه ماداوم
ابو زيد: وش تبي بمطلق خله يرتاح وبعدين مرته تعبانه
محسن: الله اكبر واذا مرته تعبانه يجلس يرافقها ماربيتنا على كذا يا يبه ولا عشان بنت اخوك
ابو زيد: اعقب واخس ماعاد الا هي تحاسبني اص ولا كلمه
محسن: ايه بعقب لكن ترا ولدك ذا من تزوج وهو متعود على الرباده
حسين لا شعوريا: على الاقل رجال مب رجيجيل
محسن : من الرجيجيل يا حسيونه تسمع يا ابوي
ابو زيد اللي اول مره ما يهاوش حسين : وهو صادژ
محسن طلع بغضب وابتسم حسين بإنتصار وهو يرجع للحسابات لكن قلب عليه ابوه : ولا تحسبني سكت لك انت كم مره اقول تحترم اخوك لو يذبحك
حسين: نسيت نفسي يبه بس ابشر
ابو زيد صد وهو يقفل الدفتر : سكر الدفتر لين شوي ورح جب لي شاهي من عند حميد
حسين راح بسرعه
................••............
في بيت ابو زيد
عند مطلق اللي فعلا تعود على النوم صحى بإنزعاج من صوت سلمى اللي تدق الباب : يا ويلي علييييه اخوي اللي كان ذيييب ما يعرف النوم الحين صار الضحىى وهو ما صحى
مطلق تحرك وهو يدور اديم بس ما حصلها لكن انتبهه ليدها لللي ماسكه ذراعه رفع اللحاف وكانت متوزيه بالنص ولافه اغلب اللحاف عليها
وقف ببتسامه وهو يفتح الباب لسلمى: خير وش بلاتس من صبح الله تصارخين
سلمى: وش صبحه يا لبى عيونك وش صبحه الساعه 11 يا ابو قلب رهيف
مطلق : واذا يعني
سلمى مسكت راسها تمثل الصدمه : افااا مطلق اللي كان يهاوشني اذا جت الساعه 9:30 وانا نايمه ويقول ذبحتس الرباده وش صار فيه حسبي الله عليتس يا اديم
مطلق لف وهو يضحك : ما نمت كذا الا اني تعبان
سلمى : ماعليه ما عليه وين اديم
مطلق : نايمه ادخلي صحيها
سلمى من عند الباب تورطت وهي توها تستوعب انها قاطه على زوج وزوجته وهي ما تدري وش وضعهم :لاااا قومها انت بس اخلصوا وتعالو هناك ابوي وامي ينتظرون
اديم تحركت على صوت سلمى وفزت وهيي تناظر حولها ورجع مطلق بعد ما قفل الباب : يلا اصحي امي وابوي ينتظرون
اديم وهي باقي مغمضه عيونها : راح المجنون
مطلق : ايه راح
دخل مطلق وجهز وخلص ورجع ودخلت اديم تلبس ومطلق اللي طلع وهو يدق على هايف من امس ما كلمه
.................••............
في الخبر
عند هايف اللي لف على صوت جوواله اول ما شافه مطلق ضاق ما تعود يخفي عن مطلق شي والحين موضوع هيفاء ذا بيشغل هايف لكن تجاهله وقال : هلا هلا بأخوي اللي تزوج وقطعنا
مطلق ضحك: اوووه الخاطر زين والصوت مسفهل ايه هذا هايف اللي اخبره وبعدين والله ما قطعت بس لهييت الله اشغلني بذا الاديم
هايف : لاا فيه تطور
مطلق ابتسم: عطني اخبارك اخبرك كنت ضايق وش حصل لقيت حل
هايف تنهد : ما لقيت حل بس اللي لقيته يا مطلق اني فعلياً عايش على صوت نجد وطاريها
مطلق : من زمان عارفين ذا الشي بس وش حصل
هايف ماقال لمطلق عن اتصال نجد لانه يدري انه بيهاوش وياخذ موقف ضد نجد: ابد بعد ما وخرت عن الديره وبعد ما هديت شفت اني ضايق على الفاضي وبحاول اسوي الامور مع ابوي وادور حل وبعدين ابوي بنفسه بخطبها لي
مطلق : هذا اللي بفهمك اياه وعجزت ! طيب وش بتسوي وش الحل ! اول شي كلمك زيد
هايف : اووه يا زيد ما تركني ابد ما خلى نصيحه ما نصحها ولا هواش ما هاوشه !واذا على الحل انا احس ورا ابوي وابو نجد شي غير الارض واذا عرفته بحل باقي الموضوع ومالي الا ابو ثامر
مطلق : يا رجل وين تفكر ان ابوي لو درا انك تفتش وراه والله واللله تطير نجد من يديك ومب بس من يديك من احلامك بعد
هايف : ادري عشان كذا افكر ، المهم خلك مني انا مشكلتي واضح انت كيف اوضاعك اشوف حتى حسين يقول مدري عنه
مطلق : والله ياخي اني لاهي يا هايف ابتلشت ببنت عمك ذي حتى الطير اللي يطير تخاف منه وغير ذا من امس مريضه ويوم تشافت شرف نويصر المجنون على الديره ودرت به وتعال شوف اللي صار والألعن مسكت معه امس ما يكلم جنونه الا تحت شباك الغرفه وتخبر عاد الاصوات وراح فيها مطلق
هايف :ههههههههههههههههههههههههï؟½ ï؟½هههههههههههههههههههههههه ههههههه الله ينصرك يا نويصر اخيرا اخيرا لقيت واقع ملموس يخوف اديم
مطلق : يا رجال ما يحتاج تخاف من كل شي
هايف : المهم مستقرين
مطلق : ايه ايه الحمدلله
هايف اللي دخل له عميل : زين اكلمك بعدين عندي عميل
مطلق : زين
سكر مطلق ودخل الصاله بعد ما جت اديم وهم يسلمون على ابو زيد وام زيد
ابو زيد : سلامات يا اديم وانا عمتس اشوفتس ذا الفتره تعبانه بالحيل
اديم : الله يسلمك يا عمي مدري يمكن من البرد واني ادخل عند نار حاره واطلع برا للهواء ومرضت
ابو زيد ابتسم وهو جلطهم بكلامه : ولا ننتظر لنا حفيد
مطلق اللي كان بيده شاهي ورفع راسه قبل يشربه وهو يناظر ابوه بذهول واديم ارتبكت
وضحكت ام زيد: باقي بدري توهم معاريس
مطلق اللي ولا كأنه متعود على كلام ابوه وتلميحه ولا كأنه متزوج قبل تنحنح بإرتباك :زي ما قالت امي بدري
اديم احترت وهي تشوف نظرات سلمى اللي تضحك وتغمز
ولكن انقذها دخول حسين وهو ينزل الجح عند سلمى : يبه ابو راضي يعزمك للغداء
ابو زيد: وش عنده
حسين: مسوي غدا لاهل الديره ويعزم مطلق بعد
ابو زيد:زين زين انا مانيب موصيك بجحتين وين الثانيه
حسين جلس وهو منهلك واخذ من يد مطلق كوب الشاهي وهو يشربه : كنت جايب ثنتين بس الله لا يوريك وش سوا فيني نويصر
ام زيد : وش سوا فيك
مطلق ضحك وهو يشوف حسين مغبببر تراب : واضح ممردغك
حسين لف يوريهم ظهره بضحك : مردغني وبس الا رماني بالحجر لين قلت بس ودفني ويوم طحت اخذ الجحه الثانيه وفقشها بظهري
مطلق وسلمى :ههههههههههههههههههههههههï؟½ ï؟½هههههههههههههههههههههههه ههههههه
ام زيد : حرام عليكم مجنون ماينضحك عليه
اديم : يا ويلي يا حسين وش سويت
حسين : وش اسوي هجيت بالجحه ذي
اديم : لو اني منك اموت
مطلق بهمس لاديم : اكيد بتموتين اكييد ابصم بالعشره
اديم : الله فوق يا مطلق والله ينصرني عليك
ضحك مطلق : الله ينصرتس
ابو زيد: ماعليه مسكين الله يعين اهله
ام زيد: وينه محسن ماجاء
ابو زيد: وش عند محسن الا يلف ورا هاللي ما تسمى
ام زيد: الله يهديه بس
ابو زيد وهو يناظر ساعته : يلا يلا يا مطلق انت وحسين ابدوا تجهزوا ما بقى على الصلاة شي بنصلي ونروح لابو راضي من هناك
مطلق : ابشر
ابو زيد: سلمى يلا وين ملابسي
راحت سلمى تزهب ملابس ابوها ولف مطلق يناظر اديم اللي جالسه وابو زيد يناظرها بتمعن ( بمعنى وش فيها ماقامت تجهز اغراض زوجها)
مطلق اللي كان يأشر لها ومافيه فايده تنحنح وانتبهت اديم وهي تناظره ببلااهه
مطلق بهمس : تعالي
وقفت اديم وراحت : وش فيه
مطلق : تعالي تعالي
طلعوا متجهين لغرفتهم : ما تشوفين ابوي وشلون يناظرتس
اديم: ليه!؟
مطلق :المفروض دامتس تدرين اني معزوم تقومين تجهزين اغراضي وانتي ابد جالسه
اديم: طيب اغراضك جاهزه
مطلق : عند ابوي لازم تقومين ولا بيهاوشتس ترا
اديم : مادريت
مطلق : المفروض انه من غير مايقول ولا اقول انا لازم تجهزين اغراضي ما بجلس كل يوم ادور بلحالي او انادي
اديم حست ان مطلق صوته جدي وانه بهالامور مايمزح ؛طيب
مطلق : يلا يلا عطيني شماغي ملابسي نظيفه اصلا
اديم اللي نست انها مسؤوله من زوج ولازم تهتم بملابسه وتكوي وتغسل وترتب فتحت الدولاب والصدمه ان الشماغ ماهي مكويه
مطلق :ما كويتيها!
اديم تنحت: هاه ! ا اا نسيت يعني انت تدري اني مريضه قبل وتوني تشافيت
مطلق اللي من المفترض بأحواله الطبيعيه انه يعصب بس عشان قالت مريضه تعاطف شوي : طيب طيب اكويها بسرعه راح الوقت وابوي ينتظر
اديم تورطت اكثر وهي بالحقيقه ما تعرف تكوي الشماغ بالعاده يا أمها يا لطيفه او الخادمه : اا طيب بروح اجيب الكوايه من عند سلمى
مطلق : اجلسي انا اجيبها
اديم اللي كانت ودها تهج لسلمى تكوي لها الشماغ: لا حلفت انا اجيبها
مطلق : يا بنت الحلال انتظري
اديم بسرعه لبست وركضت ومطلق منهبل : والله ما اخبل منتس الا هي
راح وراها وسلمى اللي كانت تجهز لابوها العود دخلت اديم تركض: سلمى تكفين افزعي
سلمى: علامتس وش فيتس اذا مطلق طاقتس مانيب فازعه
اديم : هو ماطقني بس اذا مافزعتي 90ظھ يطقني
سلمى: وش افزع فيه !
اديم رفعت الشماغ:ما اعرف اكويه ومطلق يبيه ومدري وش اسوي
شهقت سلمى بصدمه: وشوووو ! ما تعرفين تكوينه اجل وشوله انتي بنت حسبي لله عليتس
اديم : وش دراني ما اكويه في بيتنا يا امي يا لطيفه او الخادمه ولا بعد يودونها الكواي
سلمى: حسبي للله وضاقت مالقيتي تزوجين الا مطلق اللي موته فالاشمغه
اديم : ما سألتس وش يموت فيه مطلق ! اقولتس افزعي
دخل مطلق : وين رحتي الوقت راح ! يلا
سلمى سحبت الشماغ بربكه: حلفت ما تكوينه توتس عروس
اديم جازت لها وهي تكمل: لا والله خليه
سلمى: لا والله عطيني
مطلق :وش تحلفين عليه انتي بعد ! عطيها الكوايه بسرعه وروحي خلصي امور ابوي
سحب الشماغ من سلمى وسحبتها سلمى منه: تكفى يا مطلق اشتقت اكوي شماغك
مطلق: حسبي لله ونعم الوكيل ! مب وقت شوقتس يا بنت الناس ابوي ينادي اخلصي روحي
اخذها وهو ياخذ الكوايه وهو بدا يعصب : يلا يا بنت الناس
اديم اللي كانت تناظر سلمى بإستنجاد وهي فعلا الحين خافت وقال مطلق بغضب : خلصيني
اديم اخذتها وراحت وهي خايفه نزلتها وهي تناظر الشماغ اللي ماكان فيه ملامح ومطلق فوق راسها متكتف
اديم : طيب وخر من فوق راسي
مطلق : يا صصصصبر ايوب
راح وجلس واديم تقلب الشماغ وتوتر مطلق وهى يسمع ابوه وحسين برا : وش بلاتس تناظرينها ترا ما تكوينها بعيونتس
اديم اول ما سمعت صوت عمها ارتبكت ورفعتها ووقفت واتجهت لمطلق وهي ماتدري كيف تجرأت ووقفت قدامه وضمت الشماغ وهي مغمضه عيونها :مطلق بقول شي بس لاتعصب
مطلق وهو متكي بيد على ركبته ويد على خصره : هو باقي تعصيب ! هاتي
اديم بسرعه: معرف اكوي الشماغ
حرفففيا انجلط مطلق ووقف : هاااه وشو ماتعرفين تكوينها
اديم كانت منتظره انه يكفخها ورغم ان مطلق انفجر عصبيه وسحب الشماغ وهو ساكت ويحاول مايهاوش
سحب القاعده وهو يفرش الشماغ عليها بغضب
واديم تناظره بخوف واخيرا قال: في بنت عمرها 24 ماتعرف تكوي شماغ وين عايشين هاه
اديم :وش اسوي معرف
حسين من برا: مطلق يلاا
مطلق : روحوا بلحقكم
لف على اديم بغضب مكتوم : تعالي
اديم جت بهدوء : وش تبي
مطلق وهو يأشر قدامه : تعالي هنا
اديم :ليه؟!
مطلق : لا تجننيني
اديم قربت بخوف وقرب مطلق وهو يياخذ الكوايه وبدا يشرح لهاا وشلون تكوي صح كان شرح غاضب بس غصب على اديم استوعبت وسحب مطلق الشماغ بعد ماكواها وهو يلبس :جيبي الشماغ الثاني
جابته اديم بخرشه وهي تعطيه :خذ
مطلق : تشوفين هالكوايه والشماغ
اديم: ايه
مطلق وهو حاط يده على رقبتها من خلف ويأشر على الكوايه : لا ارجع من الغدا الا هي منكويه وبكوي زي الناس وان دريت ولا سمعت ان سلموه ساعدتس ذبحتكم يااثنتين تسمعيين
اديم ارتجفت من يده : ايه
مطلق :ولا تحاولين تكذبين عشان بتكوينها قدامي اذا جيت
اديم : طيب
طلع مطلق مستعجل بيلحق ابوه واديم اللي تناظر الشماغ بقهر واخذته وهي تفرشه وتحاول تقلد مطلق اللي كان يعيد لها الشرح مرتين
فزت على دخلت سلمى اللي تركض وتضحك : هاااه حيه ياربي لك الحمد عسى ما اوجعتس بالطق
اديم دفتها: ماطقني حمدلله بس هددني
سلمى بفجعه: هاه
اديم شرحت لها كل السالفه وهم يضحكون
سلمى:اشوى والله توقعته يذبحتس بس هانت
اديم : ياخي وش اسوي انا ماعرف
سلمى: اقول تعلمي والله ترا ثاني مره بيخقنتس بالشماغ
اديم : هذا اللي بيصير ااااه يا ابوي وفايز
سلمى تكت وهي تضحك: عاد تدرين هو للي معلمني اكوي الشماغه بس بعد ما مصع اذني اول ماقلت ما اعرف بس شكله استحى منتس
اديم : هههههههههههههههههههه الله يديم الحياء يا شيخه
سلمى وقفت: اجل حاولي تكوين الشماغ بسرعه وتجين امي عازمه ام مشعان للغداء
ادييم : يا بنت الحلال شماغ مطلق ارحم لي روحي بس سوي قهوه وتعالي
سلمى :بخلص شغلهم واجي
اديم ما ردت وهي تحوس بالشماغ
................••............
في الخبر
هايف اللي انتهى دوامه وطلع واول ماوقف عند البيت لف وهو يشوف بيت ابو فرج كالعاده مفتوح والعيال متجمعين فيه ماعدا متعب اللي توه وصل معه
دخل هايف : سلام عليكم
الكل : وعليكم السلام
ركض دحوم اللي تعود على هايف وهو يحضنه رفعه هايف وجلس وهو يسلم عليه
سعود : هايف اليوم بخير
هايف ؛حمدلله
ابو فرج: جلعه دوم
هايف : تدوم ياعمي بس بغيتك بشغله
ابو فرج: سم
هايف : تعرف ابو ثامر رفيق لابوي من زمان تعرفه
ابو فرج: اي والله اعرفه
هايف : حق المعرفه ولا سطحيه
ابو فرج: لا اعرفه زين
هايف : اجل اسمعني
ابو فرج : وشو؟!
هايف : انا قلبي يقول المشكله ماهي ارض وبس ابوي واعرفه زين مايبيع احد عشان ارض فيه شي ثاني
ابو فرج:فيه ان ابو نجد ماحشم ابوك قدام الناس وابوك صاحب كرامه
مشاري: بس انا من وجهة نظري اشوف ان مابين الاصحاب كرامه
متعب : يعني يمكن ان غلط ابو نجد كبير
هايف : يمكن كرامه وهذا اللي اقتنعنا به سنين بس زعل ابوي كبيييير ولو هي كرامه كان ابوي ما تعنا كذا وخصوصا انه وده يرجع لابو نجد بس ان فيه شي كبير يردعه
سعود: وش خلاك تقول كذا؟!
هايف : فالديره الاسبوع اللي فات صارت حرب قصايد بينهم بس كلها مجوفه بعتاب واتوقع ان فيه سر
ابو فرج: معقوله؟
مقبل : والله يمكن
ابو فرج : وتهقى ابو ثامر يعرف
هايف : الا يعرف ونص لانه الوحيد اللي انحاااز لنا ولابوي ولا عاد يسلم على ابو نجد وزعل زعل كبير بعد
مشاري : بس اجل فيه إن
ابو فرج: اجل انا بحاول اسأله لكن كيف اجيه
هايف : ابد بجيب لك رقمه واذا قدرت تخليه يجي الخبر بعد يا زينها عشان مايقدر يقول لابوي شي
ابو فرج: عطني رقمه
هايف : بدق على مطلق يرسله
كان هايف وده يطير بالاحداث قدااام ويشوف وش بيصير ووش بيطلع مايدري ليه يحس ان الفرج قرب اتصل بمطلق اللي قال بيجيب الرقم ويرسله ................••............
في بيت ابو نجد
وعند نجد اللي هي بعد من بعد ضيقه اتسع خاطرها وصارت راضيه وهي لو ما تخاف كان كل شوي تتصل بهايف وتسمع صوته وسوالفه المختصره لكنها له معنا كبيييير نزلت من البيت متجهه للبقاله دخلت وهي مبتسمه وتدور هالبسكويت اللي يجيب لها هايف
ولفت نظرها
مطلق اللي بعد الغدا كان ياخذ اغراض ورغم انها ماتعرف مطلق ابد ولا تذكر منه الا جموده الا انها تعرف ومتاكده انه اقرب انسان لقلب هايف
مطلق اللي وهو يجمع اغراضه حس احد يناظره والتفت وشاف نجد صد ببتسامه ( ليت هايف هنا ويشوف )
اخذ اغراضه وهو كان وده ياخذ اخر كرتون البسكويت اللي دايم هايف ياخذه عشان نجد بس تركه لنجد ويدري انها تحبه رفع صوته وهو يقول : قادريين هالكرتون خله على حساب هايف وعطه اللي يبيه
قادرين ناظر مطلق باستغراب بس ما اعترض لانه يخاف مطلق
انصدمت اديم من حركته بس ضحكت وتأكدت ان مطلق رغم ان هايف بعيد ولا يقدر يهتم بنجد مطلق يعوض اللي ماقدر هايف يسويه
اخذت الكرتون على حساب هايف وطلعت ونست وش اللي تبيه من البقاله
دخلت البيت وهي مبتسمه ومتحضنه الكرتون
ام نجد :نجججد وين الاغراض اللي وصيتيس
نجد : هاه
ام نجد : ما تسمعين انصمختي
نجد :مالقيتها
ام نجد: بقاله وش كبرها ما لقيتي الا ذا
نجد : لقيت بس زحمه رجال اخذت البسكوت وطلعت
ام نجد : هذا انتي ما منتس فود روحي روحي عطيني عباتي
عطتها نجد عبايتها وهي مبتسمه وطلعت ام نجد ونجد اللي جلست بهيمان
................••............
في بيت ابو زيد
عند اديم اللي ما خلصت الشماغ الا وانهد حيلها وسلمى اللي منسدحه ووتقهوى بضحك: انا عيوني تشوف مستقبلتس الزاهر مع مطلق
اديم انسدحت بإنهلاك :واضح زاااهر ما جلس مصيبه ما صارت لي مع اخوتس
ضحكت سلمى: والله مطلق حليل
اديم : ندري انه حليل بس فكينا
دخل مطلق : ماشاء الله متجمعيين ان شاء الله انتس كويتي الشماغ وان شاء الله انتس فزعتي يا استاذه سلمى وساعدتيها
سلمى ضحكت : والله شوف بالقوه قدرت امسك نخوتي وشجاعتي وانا اشوفها تعاني بس ما عليه عشان تعلم
مطلق لف على اديم :اييه وش حصل بالمعاناه
اديم : سويت اللي علي والباقي على الله
مطلق : وريني اشوف
رفعت اديم الشماغ وقال مطلق: يبيلها يبيلها لكن مب الحين ، امي من عندها
سلمى: كانت عندها ام مشعان بس راحت وراحت امي تقيل ( تاخذ قيلوله)
مطلق وهو ينزل ثوبه : اجل قومي ضفي وجهتس بقيل انا بعد
سلمى: يووه والله تعبانه
مطلق وهو ينسدح : يا تقومين ولا تنكتمين نهائي مابي اسمع صوت وتنخمدين
سلمى وقفت : الله لا يحدني والله اطس ارحم لي من اني اجلس ساكته
مطلق ابتسم : يا كثثر ما تخثردژين
اديم وقفت وهي تعدل شعرها: انا اضف وجهي معها
مطلق ضحك: وش رايتس انتي
اديم : يعني مافيني نوم ولا اقدر اسكت
مطلق بضحك ومن باب المزح: اجل ضفي وجهتس
سلمى سحبتها وهي تضحك: خلي الخايس يجلس تعالي نطقطق على حسين
مطلق بحده : ادييييم جلالتس
اديم رجعت تاخذ غطاها وطلعت وهي تسكر الانوار على مطلق اللي كان مبتلش بسلمى وجت اديم معها
................••............
في بيت ابو فايز
ريوف اللي عجزت تناام ومن الصبحيه صاحيه وهي مثل ماتعودت في بيت اهلها ترتب وتزهب القهوه والغداء
لطيفه رجعت من دوامها وهي تناظر المطبخ بإستغراب :ريوف وش تسوين
ريوف : هلا لطيفه صحيت بدري وشفتس مداومه وخالتي بعد مداومه وعمي طالع قلت اجهز الغداء لين ترجعون
لطيفه ضحكت: يا بعد قلبي يا ريوف ليه تعبين نفستس الخادمه تسويه
ريوف اللي ما تثقق ابدا في اكل الخادمه : لا يا بنت الحلال ماتدرين عن اكلها وش فيه
لطيفه ضحكت : اجل خليني ابدل واجي اساعدتس
ريوف : زين
ريوف طلعت وهي تبدلل ملابسها عن ريحة الاكل وتترتب واتجهت لفايز وهي تصحيه بس رفض يصحى بما انه مواصل ونزلت وتركته
وهي تحضر لفت على صوت لطيفه اللي نزلت بس استغربت وهي تناظر لطيفه اللي كانت لابسه لبس عادي بنطلون وتيشيرت وقربت تساعدها
ريوف اللي قالت بعد تفكير وهي بطبيعة بيئتها بالديره ابد ما يلبسون هالنوع من اللبس وياويلهم اذا لبسوه : لطيفه الحين انتي بتجلسين كذا
لطيفه وهي مشغوله : ايه ليه !؟
ريوف :كذا قدام عمي وفايز
لطيفه : اييه وش فيها ! ااااه قصدك عن لبسي
ريوف : ايه وشلون تلبسين كذا قدامهم
لطيفه ضحكت : ماعليييه يا ريوف هنا مب مثل الديره تعودي كذا
مايمدي ريوف ترد الا وصلت ام فايز ابو فايز وهم يسلمون وطلعت تبدل ام فايز
ريوف تحس انها خجلانه من لبس لطيفه وهي ماتعودت ابد انها تحضر مثل كذا واللي جلطها ان عمها اقبل للطيفه اللي تبوس راسه وهي تضحك معه وواقفه معاه عادي ورغم انه لطيفه عاديه بس ريوف تشوفه شي عظيم
ابو فايز: ليتس يا ريوف ماتعبتي نفستس وانا عمتس وانا بجيب لتس غدا من المطعم ولا تتعبين
ريوف اللي باقي بهول الموقف الاول : لا معليه ياعمي
ابو فايز: تعالي ارتاحي تعالي
جلست ريوف بجنب عمها وهي تشوف الكل جالس والخادمه تشتغل وهذ عكس بيتهم
والصدمه الاكبر لها لما نزلت ام فايز وهي لابسه جلابيه قصيره ممكن تجي لحد الركبه ماقدرت ريوف تتدارك صدمتها وهي تناظر بصدمه وخجل في عمها اللي كان الامر عنده عادي
وجات الشغاله تقولهم الغداء جاهز وقاموا
ابو فايز : وفايز وينه !؟
ريوف ماردت وهي تحس انها مصدومه
لطيفه: ريوف ابوي يكلمك
ريوف : ا ا هاه ايه نايم
كانت ريوف تحسب انه عمها بيهاوش مثل ابوها اللي مستحيل يسمح ان احد من اخوانها يتاخر عن اي وجبه الا انه زعلان عليه لكن صدمها عمها بعد : ايه خليه ينام واذا صحى خير
ماقدرت ريوف تاكل وهي تشوف اشياء ضد عيشتها قبل وكانت تقلب الاكل بهدوء واستاذنت وطلعت وهي تعيش صدمه اختلاف البيئه
................••............
في الخبر
عند هايف الليل اخذ الرقم من مطلق وهو يعطيه ابو فرج وهم يتصلون بس مغلق
ابو فرج: ما توقع فيه شبكه
هايف: يمكن
مشاري: وش بتسوون طيب
هايف : ننتظر لبكره واذا مارد يروح له مطلق
متعب ضحك: يعني بتجيبونه غصب طيب بتجيبونه
ضحك هايف : ماعاد فيني صبببر طقت كبدي خلاص
وليد : متى ينتهي هالاسبوع وأملك انا والله اللي طقت كبدي
كلهم ناظروه بيأس ولفوا الا ابو فرج ضحك: يا زين حماس الحب
وليد وقف وهو يحضن ابو فرج: انت الوحيد اللي يفهم حبي
هايف صد يتجاهل اللي يسمعه وهو يلعب مع عزيز
ولف يناظر دحوم اللي على يتابع بالجوال: سعود مب زين يطول على هالجوال
سعود: وش اسوي
ضحك هايف : ليت يشوفك عمي ولا بنته( يقصد لطيفه) ويعطونك هاذيك المحاضره اللي عطوها زيد لين تتوب
سعود : والله ادري بس غصب علي
متعبب: ليه عمك وبنته وش فيهم
هايف من باب انه يسولف ويقطع سوالف وليد عن ملكته اللي تغثه : عمي مدمن ثقافه واستطلاع وتحذيرات واخبار وبنته مدرسه اطفال واشغلتنا مع عبود
مشاري ضحك: يعني يحق لها ماعندكم بزر تطبق عليه الا عبود
متعب بتدقيق : وش تخصصها بالاطفال بالضبط
ورد عليه هايف وقدر هايف انه يحرف موضوع وليد اللي بالنسبه لهايف ممل
................••............
في بيت ابو زيد
مطلق اللي صحى من النوم على ازعاااج واحد يناديه ويستنجد به فز وهو يرمي اللحاف لكن تعلق برجله ويدفه مطلق لكن كان متعلق بالقوه وخره مطلق بغضب وهو يفتح باب الغرفه وانذهل اول ماشاف اديم اللي تركض بالحوش بكل قوتها وهي تصارخ وسلمى اللي تركض وراها بضحكه شريره وبيدها قطو دايماً عندهم وماسكته بوقايه وتطردها فيه وام زيد اللي من مكانها ترمي سلمى بالنعال والفناجيل بس لا حياة لمن تنادي
ولا يمدي مطلق يستوعب الا اقبلت اديم تركض وهي تستنجد : مطلق انا في وجهك من اختك الجنيه
تخبت ورا ظهره وجات سلمى تركض وهي ترمي القطو عليهم ومسكه مطلق قبل يجي اديم اللي صرخت
والقطو المسكين يصارخ وانحاش ركض مطلق ورا سلمى وهو بالسروال والفنيله
وهي تضحك وتصارخ لين طاحت وجاء مطلق وهو يثبتها : ادديم جيبي طرحتس
اديم ركضت وتعطيه الطرحه ومطلق بركبته مثبت سلمى ويربط يدينها برجولها : حسبي الله عليتس ما خليتي براسي عقل انتي ما تعقلين انتي
اديم : ايييه كفو ربطها
سلمى : حسبيي الله يمه افزعي لبنتس وتشوفينهم متحدين علي
ام زيد : مانيب فازعه احسن احسن عليك بها
مطلق وهو يشد الرباط : ابشري ابشري
سلمى : افا يا اخوي كسرت ظهري يا مطلق غدرتني وبعت اختك عشان اديموووه
مطلق وقف وهو ينظف يدينه من التراب : والله لو تحاولين من هنا لبكره ما تركتس كسرتي ظهري انا حسبي عليتس
اديم : تستاهلين
حسين اللي دخل وهو يقول : يا ولد
مطلق لف وهو يغطي على اديم : دقيقه دقيقه
دخلت اديم غرفتها ودخل حسين واول من شاف سلمى انفجر ضحك
ركض لها حسين وهو يدحرجها بالحوش اللي تعبت تراب ويضحك ومطلق يضحك وسلمى تصارخ واديم اللي تصور من جوا
واخيرا فزعت لها امها وفكتها وهي تدعي عليهم
سلمى: ااااه خساره يا هايف! اصبروا لين يجي اخوي حبيبي ويفزع لي
حسين:ههههههههههههههههههههï؟½ ï؟½هههههههههههههههههههههههه ههههههههههه اخوتس الحين مب فاضي لتس مصعت قلبه نجد
ام زيد : اص اص لا يجي ابوك
رجع مطلق لاديم اللي قفلت التصوير وتكلم لطيفه واول ما شافت مطلق سكرت وهي تضحك: فكيتوها
مطلق : ايه فكيتها لكن لا ينعاد هالصراخ كل الحاره تسمعه
اديم :طيب
................••............
مرت الليله عاديه
ومر بكره مثلها ولا فيه جديد يذكر االا أن ابو فرج تواصل مع ابو ثامر وعزمه يجي له بالخبر فالويكند ووافق ابو ثامر اللي كان اصلا له ولد بالخبر ويروح ويجي له كل فتره
واخيرا الويكند اللي ينتظرونه الكل بالنسبه لهايف كان وده يجلس بالخبر يبي يعرف وش بيصير مع ابو فرج وابو ثامر بس قاله ابو فرج انه يروح احسن عشان لا يثير شك ابوه وابو ثامر
وعند هايف اللي كان يرتب شنطته ومشاري متكي على باب الدرج : وش توقع يطلع من ابو ثامر
هايف : مدري بس بيطلع شي اكيد لكن تكفى انتبه وخلك حريص اول ما يصير شي على طول اتصل بي واذا ما رديت دق على مطلق
مشاري: طيب طيب
هايف : يلا
طلع هايف بعد ما سلم عليهم كلهم متجهه للديره وهو متشفق على الديره وعلى نجد
.................••............
في بيت ابو زيد
كانوا يستعدون لجيت الكل بما انه ويكند
مطلق اللي كان واقف عند باب المطبخ : يمه علموني وش تحتاجون اجيبه
ام زيد: بس اللي علمتك من شوي
سلمى: واللي علمتك انا بعد
مطلق : ياكثر اللي علمتيني به يا ذا الملسونه
اديم اللي خلاص تعودت على مطلق صح تخاف منه للحين اذا عصب بس عاد الحين خلاص صار شوي عادي : انا ودي اروح معك بسوي حلا وابي اششوف الاغراض بنفسي
مطلق : وين تروحين الله يهديتس بقاله ورجال وين اجلسي انا اجيبها
اديم لا شعوريا مسكت ذراعه بترجي : تكفى يامطلق بروح والله اتغطى زين
مطلق صد بتوتر وقالت ام زيد: خذها يا مطلق
مطلق : يلا يلا اخلصي
ركضت اديم تلبس وهي متحمسه ومطلق ينتظر وهو يشوف محسن يحاول في ابوه يخلص امور البيت اللي اختاره وبيسكن فيه هو واصايل
طلعت اديم بعد ما لبست ومشى مطلق ولف عليها يناظرها : غطي عيونتس
اديم : طيب
مشى مطلق واديم جنبه واتجهوا للبقاله ودخلوا وقادرين يناظر اديم باستغراب وهو يعرف كل حريم الحاره ودق مطلق الطاوله بغضب : رز يا قادرين رز
انخرش قادرين وركض يجيب الرز ومطلق اللي متكتف : خذي اغراضتس بسرعه يلا
اديم انطلقت وهي تاخذ كل اللي تحتاجه بسرعه وهي ما معها لا كيس ولا سله وتورطت وهي تشوف الاغراض تكبكب منها
وجاء مطلق وهو يحط مسبحته بجيبه : هاتيها
اخذها وهو يشيلها : خلاص
اديم: ايه
مطلق : يلا
وحاسبوا ومطلق كل شوي يطل مايبي احد يجي البقاله واديم فيها وبعد ماطلعوا ووصلوا نص الطريق شهقت اديم: يوووه نسيت
مطلق : وشو
اديم : الله يخليك يامطلق خلنا نرجع احس نفسي ذاك العصير ونسيته
مطلق :ضروري
اديم : اذا ودك
رجع مطلق وهو يقول : بسرعه جيبيه وتعالي ركضت اديم تاخذه ورجعت لمطلق وهي مبتسمه: جبت 3 لي ولك ولسلمى عشان ما تذبحنا وتقول كسرتوا ظهري وغدرتوني
ضحك مطلق : زين زين
وهم يمشون عض مطلق شفته بضيق اول ماشاف نويصر المججنون وقال بحذر : اديم تعالي على يميني
اديم وهي مشغوله بالعصير :ليه
مطلق : بسرعه تعالي بس
اديم اول ما راحت عند يمينه شهقت اول ماشافت رجال شكله غريب ومبهذل وحالته حاله ويكلم نفسه ويطق اللي يحصله ومن سوء الحظ ما صفى بالسكه الا هم ونويصر
مطلق :لا تخافين لا تخافين انا معتس لا تلفتين انتباهه بخوفتس
اديم رمت العصير وهي تمسك ذراع مطلق بخوف : يمه يامطلق بيجينا بيجينا
مطلق : لا تناظرينه واسكتي واذا جا مابيسوي لتس شي انا معتس
اديم اللي تشوفه يناظر وهو معه عصا وحجر ويهاوش ويرمي الحجر وماتت اديم من الخرشه
مطلق يحاول يداري اديم اللي شوي وتموت ونويصر يحذفهم وفجاءه بدون سابق انذار ركض عليهم نويصر وهو يصيييح بصوت مرعععب ومعاه حديده
..................••............
.
.
انتهىâ™¥

5 - 11 - 2024, 09:31 PM

البــارت الثانـي والعشــرين ..
.
.
.
في بيت ابو زيد
وصل زيد وميثى وركض حسين يستقبلهم وهو يرحب بهم
وزيد اللي يسلم عليهم بحب وعبود والكل فرحانين فيهم
سلمى: لكم وحشه يالثلاثي والله
زيد : والله ان هالاسبوع عجز يمر علينا وحنا ماجينا
ابو زيد : المهم جيتوا وجبتوا عبود الذيب
عبود : جدي انا صار عندي شنب اكبر من شنب عمي هايف اذا جاء بوريه
ابو زيد:ههههههههههههههههه ايه ايه اذا جاء وره
زيد ضحك: غثه هايف بذا الشنب وسوس فيه ، الا مطلق وينه
ام زيد: بيجيب اغراض ويجي
................••............
في احد سكك الديره
عند مطلق اللي انصدم من ركض نويصر وصراخ اديم ويحمد ربه انه كان معه خيشة الرز بيده ورفعها وصكت الحديده فيها ومايدري كيف بيده الثانيه اللي كان فيها كيس البيض اللي تعلق بيد مطلق ولا طاح مع باقي الاكياس ضرب راس نويصر وانفجر البيض على راس نويصر وانقطع الكيس والبيض على راس نويصر اللي كان عباره عن قششششه كبيييره وبعد هالضربه عم هالهدوء ولا فيه الا بكى اديم ونويصر ساكت والبيض يسيل عليه ومطلق فغر اول مره يطق نويصر المجنون ولكن اخيس طق طقه مطلق احد يطق ببيض؟!
وفجاءه دف نويصر مطلق اللي رجع لوراء بصدمه وصقع بأديم اللي صقعت بالجدار ومطلق عفسها على الجدار زياده والعصير الثاني اللي بيدها ومفتوح انكب عليها وكان عصير فراوله ولا اكتفى ناصر بهاللي صار ابد اخذ كل البطاطس والخرابيط حقت سلمى ومن سوء الحظ انه مر فلاح ومعاه طبق بيض وانصدم ونزل البيض وهو يركض بيشوف وش صار لكن نويصر ركض لطبق وهو يرميه عليهم حتى فلاح ما سلم منه بالقوه ركض وراه فلاح وانحاش نويصر بس أي نحشه حاسهم حوسه مابعدها ولا قبلها حوسه
في ذا اللحظات وصل هايف وهو يشوف غبار عند بيتهم وقف قريب ونزل يركض لكن دخل في نوبه ضحك وهو يشوف الدعثه اللي صارت مطلق على فلاح على اديم كلهم حالتهم حاله
هايف :ههههههههههههههههههههههههï؟½ ï؟½هههههههههههههههههههههههه ههههههه ابك انتم علامكم
مطلق اللي مايدري يعصب ولا يضحك هو لو مامعه اديم كان عرف يتصرف بس اديم واغراض : تعال ساعدنا وانت تضحك
لف مطلق على اديم اللي تبكي :بنت انتي بخير
ماردت اديم اللي تبكي بإنهيار رفعها مطلق اللي خاف انها تضررت من ضربته فيها لانها كانت قويه : اديم ردي علي
اديم اللي صكتها بيضه بعد على العصير وصار شكلها يا سلااااام
فلاح اللي سلم على هايف وهو راح يدور نويصر بيكفخه
وهايف اللي عجز يرفع شي وهو ميت ضحك وهو يشوف حالتهم :ههههههههههههههههههههههههï؟½ ï؟½هههههههههههههههههههههههه ههههههه يا ويلي ويلااه
مطلق اللي عصب : هايف اص ولا كلمه قش الاغراض ذي بالسياره وخلنا نروح البيت
هايف : ههههههههههههههههههههههههه ههههههههههههههههههههههههه هههههه لا تقولي نويصر اللي ادعث بكم
اديم وهي مستنده على يد مطلق : ايه نوصير الله ياخذ نويصر
هايف :ههههههههههههههههههههههههï؟½ ï؟½هههههههههههههههههههههههه ههههههه ياااا نصر الله
مطلق: بتجلس تضحك بفقع اللي بقى في راسك
هايف جمع الااغراض وهو يضححك : والله ياهو استقبال فااااخر
ركب مطلق اديم السياره وجاء بيركب وقال هايف بمزح: لا لا البيض بيخرب سيارت لو سمحت يعني
مطلق من الغضب ركب بعد مارفع ثوبه وسحب على هايف وراح وصح ماكان البيت بعيد بس حالتهم مزريه
اما هايف اللي مابقى معاه الا كيس الرز وضحك وهو يشيله وهو من قوة الضحك بالقوه يمشي
................••............
في بيت ابو نجد
عند نجد اللي وضعها معروف اول ماسمعت الازعاج طلت وهي شايفه الموقف من البدايه وكانت في حاله هستيريه من الضحك لكن اختفت وهي تشوف هايف اللي بنظر نجد نورت الديره بجيته وزاد ضحكها من صوت ضحك هايف بالسكه ................••............ في المجلس لف زيد : هذا صوت ضحك هايف
حسين فز وفزت سلمى بحماس وطلعوا لكن ألجمهم منظر مطلق اللي وقف بالسياره ونزل وهو رافع ثوبه ورابطه على خصره وشماغه على كتفه وثوبه مبقع واديم اللي نزلت وهي بعد في حاله يرثى لها
واخيرا دخل هايف اللي معاه الرز ويضحك
حسين: مطلق علامكم
الكل طلعوا على صوت ضحك هايف وهم مستغربين منظر مطلق اللي رمى الاغراض بغضب : جب لي رشاش بثور في نويصر
هو بس قال نويصر والكل يناظر انفجرت سلمى وهي تضحك على اديم وشوي دخل حسين بالضحك وبعدها الكل يضحك وركضت اديم لغرفتها وهي تحس بأحراج
حتى ابو زيد ضحك: وش بلاه عليكم ذا الخبل
مطلق بغضب : ابتلاء من ربي ابتلاء
بالقوه سكت هايف وهو يسلم عليهم ومطلق راح يبدل وهايف اللي يشرح لهم الموضووع اللي حضره وتقطع سالفته بضحكه وقطع عليهم وصول ابو فايز واهله وفايز وريوف والعمه حصه ومؤيد ( حبيبنا اللزم ��) وهم يسلمون عليهم مستغربين نوبات الضحك
................••............
في غرفة مطلق
اديم بعد ما نزلت عبايتها ولفت وشافت شكل مطلق اللي واقف يقول : عطيني ملابس
اديم حاولت تسكت ماتضحك بس انفجرت من بين دموعها وهي ترجف من هول الموقف ضحك وخوف
كان مطلق معصب ليييين شافها تضحك وشافها بخير ولا قدر يجمد قدام ضحكتها
ونزل ثوبه وجلس وهو يضحك بقهقه وهاذي المره الاولى اللي تسمع فيها اديم صوت ضحكة مطلق اللي كانت تشبه ضحكة هايف كثييير
ما قدرت اديم توقف وهي تذكر الموقف اللي من قمة الرعب انقلب لقمة المصخره
ضحك مطلق : من غير ماتقولين ماعاد تطبين البقاله
دخل مطلق الحمام وهو للحين يضحك كل ماتذكر الموقف وهو يتروش وطلع يلبس وشاف اديم للحين تضحك دخلت اديم تتروش بعد ومطلق يرتب نفسه وااخذ ثوبه وهو يطلع اغراضه القديمه وهو يحس بفشله من فلاح واهله على هالمنظر بس ماعلى المجنون حرج
اديم توقعت مطلق طلع لانها معاد سمعت صوت ضحكه وطلعت وهي تنفض شعرها في الهواء عشان يجف وهي لابسه روب الحمام ورفع راسه مطلق وجمدت نظرته على اديم وهو يناظرها من اسفل رجولها المكشوفه لين جمدت عيونه بعيونها وشهقت اديم وارتبكت ودخلت الحمام وهي تحس ان كل انتعاشها تبخربتوتر من الفشله ونظرته وقالت بارتباك: مادريت انك هنا
مطلق توتر ورمى الثوب : بطلع الحين خذي راحتس
وطلع وهو عيونه للحين تصور له شكل اديم واذا على الريحه حفظ مطلق ريحة عطرها اللي من ايام وهي تحتبس بصدره
................••............
وفي المجلس
كان هايف يعيد ويشرح باللي شافه والكل يضحك ودخل مطلق : سلام عليكم
وقفوا يسلمون عليه لكن مؤيد حضنه وهو يضحك: لاااا قالوا لنا هالمجنون فكك جوكم
مطلق غمض بقهر: حسبي لله عليك يا هايف
هايف ركض وهو يضحك وحضن مطلق من كتفه: انا اسف بس وربي ما قدرت امسك نفسي
فايز بضحك : افا هقينا إنا مزوجين اختنا ذيب فالاخير كفخكم المجنون كلكم
الكل :ههههههههههههههههههههههههï؟½ ï؟½هههههههههههههههههههههههه ههههههه
العمه حصه: والله مطلق ذيب بس مدري وش جاه الزواج يخرب
مطلق وهو مبتسم ابتسامه خفيفه : البلا ان اختك معي لو ماهي معي عرفت اتصرف
ابو فايز : علمنا وش صار
ابو زيد: من الغلط انك اخذت حرمه معك
مطلق اللي عرف ان ابوه بيهاوش وسكر الموضوع بسرعه وهو يشرح لهم هجوم نويصر عليهم والكل يضحك
اديم اللي جات وهي تسلم على ابوها اللي حضنها وهو يضحك: افا يا بنيتي بغيتي تروحين ضحية المجنون
هايف وهو يمسح على قلبه: الحيييين شفى قلبي بروح اعطي نويصر هديه
اديم وخرت بإحراج عن ابوها : لاتقصر انت اضحك بس اضحك
مؤيد: غرييبه فين لسانك يا اديم بالعاده تقرمشين الناس بلسانك
حسين ضحك : هذاااك اوووووووول
اديم اللي كانت تسلم على فايز وامها ولطيفه وجلست وهي تشوف مطلق اللي يهاوش حسين ومؤيد اللي يطقطقون عليها
لطيفه بهمس وهي تضحك : وش الاكشن
اديم : اصلا اسبوعين عشت فيها شي ماعشته ب 24 سنه
لطيفه ضحكت :واضح من البدايه حالتكم حاله
فجاءه فز مطلق اللي نسى ريوف من الزحمه اسرع لها وهو يحتضنها بحب : ما شفتس انتي وينتس
ريوف : اشوفك مزحوم
هايف بضحك : كان سلمتي عليه تعرفين البيض يأثر على المخ والذاكره
عبود اللي كان بحضن هايف: انا اكلت بيض وصرت كبير وطلع لي شنب
هايف باسه وهو يضحك : جرب افجر وحده على راس ابوك ويطلع لك لحيه بعد
حسين :هههههههههههههههههههه اذا بيطلع له بتطلع حمرا من التصفيق
زيد: هااايف لا توسوس بالولد
ابو فايز: لا تسمع كلامه يا عبود
مطلق اللي طول وقته يتحاشى انه يناظر اديم اللي ماعاد يشوفها الا بهذاك المنظر
مؤيد : اقول يا مطلق كيف شكله هالمجنون
مطلق : ما تعرف نويصر
مؤيد : لا
مطلق : اجل ابشر بتعريف يليق بحضرتك
حصه : يا مطلق انا في وجهه الله ماتودي مؤيد له
زيد : مطلق الحين ماعاد فيه فزعه
ابو فايز : محسن وش فيك اليوم ساكت
محسن : ولا شي يا عمي وش اقول اسكت ازين لي
حسين همس لهايف : احسن شي قاله
هايف ببتسامه : الظاهر انه عقل
مطلق دق هايف بهمس : اسكت اسكت ترا اوضاعك مب احسن منه هو كذا عشان اصايل
هايف : يا ويلي اذا انا بهالمنظر
حسين: مدري والله اذا نجد ذي على سنع ولا لا
مؤيد اللي كان جنبهم ويسمعهم وقال بصوت عالي : مين نجد
مطلق وحسين وهايف جمدوا وهم يناظرون ابوهم وبسرعة البرق تكهرب المجلس والكل يناظرهم
هايف بغى ينجلط ومطلق اللي ضرب مؤيد بخفه على كتفه : نجد العذيه يقول هايف انه انتعش اول ماجاء الديره
فايز اللي حس بأرتباكهم وقرر انه يجاري مطلق : اييه عاد هايف مايعيش الا بالبر ومدن البحر والرطوبه تكتمه
هايف اللي للحظه حس انقطع نفسه من نظرات ابوه له : اييييه يا شين الرطوبه
ابو فايز : عاد والله يا حر نجد نفس حرالخبر
هايف : يا زينها ويازين حرها
زيد ضحك : يا عمي لا تحاول كلن يطفش من نجد ويملها الا هايف
وقف حسين يناظر وقال: يبه جاء تركي
وقففوا كلهم ودخلوا الحريم ودخل تركي اللي ماكان كثير اختلاط فيهم ولا له ابد وجود معاهم وكان جدي وعملي اقبل يسلم عليهم بحراره واتجهه لابو زيد يبوس راسه ومازال واقف
هايف : استريح ياتركي
تركي : والله ودي بس وراي شغل بلحق اسلم على ابوي واطلع
ابو زيد : فنجال قهوه
تركي :والله ما مايمدي بالعافيه
طلع تركي مثل ما دخل وودخلوا العيال يسلمون على شريفه ورجعوا للمجلس
مؤيد اللي جالس بالنص ويتكلم عن دوامه وصعوبة دوامه
وطلع حسين اللي كان بيسكر باب الحوش بس شاف نويصر يمشي وابتسم بخبث : نويصر تعال تعال تبي عصير
نويصر : ايه ايه عندكم عصير عندكم عصير
حسين مسكه بيده عشان مايغير مساره وراح وهو يأشر على مؤيد من الشباك : هذا الرجال معه عصير وحلاو واللي تبي
ضحك نويصر ودخل عليهم وهو يضحك وفزوا الكل اللي خايف واللي مصدوم واللي يضحك
مؤيد اللي لا شعوريا صرخ ولكن مايمديه ينحاش الا مسكه نويصر وهو يضحك: ابي حلاو ابي عصيير
مؤيد اللي يتفلت وهو حرفياً منرعب : سيبني مامعايا حاجه يا خالي ياهايف تكفى مطلق
مطلق اللي خلقه مقهور من نويصر سحبه عن مؤيد اللي انحاش ورا ابو زيد
نويصر : عطني العصير
مطلق : مافيه عصير رح لاهلك يلا
هايف اللي كان ميت ضحك وهو حاضن عبود اللي كان خايف ورمى كل الحلاوه والعصير اللي معه لنويصر اللي اخذها وراح
حسين اللي كان في حاله ضحك هستيريه وفايز وزيد وحتى محسن وابو فايز يضحكون على مؤيد اللي كان وجهه اسووود من الرعب
ابو زيد ببتسامه: حسين هذا وش جابه
حسين: مدري دخل كذا
مطلق : قفل الباب زين ترا كفايه مصخره
زيد ركض وهو ياخذ عبود من هايف اللي كان يضحك وطلع برا يحاول يوقف ضحك
ورفع راسه وهو يكتم نفسه بشماغه لكن هنا اختفى الضحك الهستيري وتحول لبتسامه عذذذبه وسعت خاطر هايف اول ماشاف شباك نجد اللي انفتح وطار الهوى بالشال الستاره ويد نجد اللي تعدله تمنى لو ينكشف الستار اكثر ويبان له وجهه نجد
لكن ما طولت امنيته وتسكر الشباك رجع للمجلس وهو ما يدري وش هالسحر بذا الشباك
................••............
عند البنات
كانوا يطقطقون على اديم اللي اول ماعرفت ان نويصر دخل على الرجال مره ثانيه انهارت وام فايز حاضنتها
ام فايز : وهذا المجنون ليه مب فالمستشفى
سلمى وهي تصب القهوه : كان بس عجزوا يتحملونه وطلعوا من اسبوع ومن حظ اديم مصخرها لين قال بس
ريوف : اخبره يخاف من مطلق
سلمى : اييه يخاف بس عشانه يخاف ضرب مطلق يخاف يهاوشه
حصه : زين ان مطلق ماصار له شي
اديم : حرمت اروح البقاله مره ثانيه خلاص
سلمى : علمتس مطلق بس ما تفهمين
ام زيد : يلا يلا حضروا الغداء يا بنات
اديم قربت بتوقف وقفتها شريفه: اجلسي انتي خلقه مفجوعه
اديم: بساعدكم
شريفه: خليها ماعليتس
اتجهوا بنات ابو زيد للمطبخ وهو يحضرون
شريفه : ريوف هاه كيف امورتس ان شاء الله مستقره
ريوف : حمدلله كل شي تمام بس كل شي يا ناس لو تشوفون عمي وعياله ما تصدقون
سلمى : لييه!
ريوف :انا بقول وانتم قولوا لو هو ابوي وش يسوي
شريفه : قولي
ريوف : ببدا بالهين
سلمى: اخلصي
ريوف : لو ينامون اخواني الفجر والصلاة يصلونها بالبيت وش بيسوي ابوي
شريفه : والله ليحرقهم
ريوف : طيب لو نحط الغداء الساعه 3 العصر وش بيسوي
سلمى بضحك: بيطبخنا بداله
ريوف ضحكت: لو امي تلبس قصير وتلبس بنطلون وش بيصير
شهقوا سلمى ولطيفه : لا تقولين ام فايز
ريوف : انا اول مره اشوف حرمه كبيره بهالمنظر ولطيفه بعد
شريفه : خلي ام فايز عمي زوجها وبكيفها بس احس صعبه قدام ابوهم واخوانهم
ريوف : يا بنت الحلال هناك شي غريب فطورهم الساعه 12 وغداهم الساعه 3 والعشاء يجي 12
سلمى : اوووه لو يدري ابوي بيموت حنا صلاة العشاء قد خلصنا عشا وبننام
ريوف : انا للحين اعيش صدمه غير كذا ما يشتغلون شي الخدامه تسوي كل شي
سلمى: والله اجل ما الوم اديم تكتئب هنا لو تدرون وش صار فيها مع مطلق قبل ايام تموتون ضحك
ام زيد : وين الغداء يا بنات
سلمى: خلصنا يمه خلاص
انقطعت السوالف ونزل الغداء اللي كان الساعه 1:30 بالضبط وبعد يشوفه ابو زيد متأخر
اجتمعوا عليه وهم مبسوطييين ومستانسين وجوهم علييل .................••............
في الخبر
عند ابو فرج اللي كان مشاري مسنتر عنده من الصبح وهو يساعده
ام فرج: مشاري اليوم غريبه عندنا
مشاري: افااااا تطرديني
ام فرج: لا بس مستغربه ولا البيت بيتك
مشاري: ماعندي دوام اليوم والعيال نايمين وهايف مب فيه فقلت اجي عندكم
ابو فرج: مسوي خير تساعدني
مشاري : متى بيجي ابو ثامر
ابو فرج: بيجي بعد العصر ان شاء الله
مشاري: زين الله يجيبه على خير
مشاري كان مستعد انه يجلس طول الوقت مع انه ميت نوم بس لعيون هااايف ................••............
وبعد العصر في بيت ابو زيد
وقف ابو زيد وهو ينادي : مطلق مطلق وينك يا ابوك يلا ابطينا على الحلال زيد : خلني بوديك انا اليوم
ابو فايز : مطلق الظاهر للحين ماجهز
مؤيد: الله عليه مطلق الحين عندو زوجه مو فاضي لكم
ابو زيد بحده :مب وقت زوجات الحين
زيد: خلونا نروح والعيال يلحقونا
ابو زيد : وش رايكم نكشت يم العزبه ونتعشى اليوم هناك
الكل قاموا يناظرون بعض وقال مؤيد: ايوه بالله عليك يا خالي ونشوي ونسوي حركات
ابو زيد ضحك: يا نعنبا المياعه يناه
ابو فايز:هههههههههههههه تم تم ومنه نفتك من نويصر
محسن: ايه مبطين ما كشتنا
هايف: اجل اسبقونا وحنا نلحقكم مع الحريم
ابو زيد : يلا ولا تبطي تجلس تهذر انت ومطلق وتنسى حسين اجلس معهم
حسين : طيب
مؤيد ركض يمسك يد ابو زيد: انا بروح معك ياخالي مابجلس عند المجانين
حسين : هييين والله لجيبه
الكل: ههههههههههههههههههههههههه ههههههههههههههههههههههههه هههههه
ابو زيد: امش يلا امش
اما هايف اللي ينتظر مطلق يجي اللي راح يبدل ولا عاد جاء
..................••............
في غرفة مطلق
مطلق اللي يفتش يدور على ملابسه ولا حصل طلع ينادي اديم اتجهه وهو يوقف على باب المطبخ الخارجي : اديييم ادييم
اديم اللي كانت تسولف مع لطيفه عن الحياه هنا وماكانت اديم مستاءه من الحياه ابد بس تشرح لها اللي صار طول هالفتره
فزت اول ماسمعت صوت مطلق : عطيني طرحتيي بروح اشوفه
لطيفه: اركضي لا يعصب
اديم ركضت وطلعت : هلا
مطلق : وينتس من ساعه اناديتس
اديم : ماسمعت وش بغيت
مطلق: تعالي شوفي لي ملابسي مدري وينها
اديم لا شعورياً: يمه يا عيارتك يا مطلق ما تعرف دولابك
مطلق ناظرها : الا اعرف بس ماحصلت شماغي وثوبي
اديم طلعت قدامه وهي تدور عليها واعطته ومطلق اللي يناظر الشماغ بدقه: لا اشوى عرفتي تكوينها
اديم : وش اسوي لازم اعرف
اخذ الثوب الابيض بس اخذته اديم منه وناظرها بإستغراب : وش فيتس
اديم طلعت الثوب الشتوي المعلق : خذ هذا جالس كذا من دون فايده ألبسه
مطلق اللي ماكان يميل لثياب الملونه : اوووه هذا ناسيه والله
اديم : ماعمري شفتك بذا اللون دايم ابيض غير ياخي
مطلق اللي ماكان يبي يلبسه بس مايدري ليه خضع اول ما قالت ماعمري شفتك كذا وكأنه ملزوم يحقق كل شي ما شافته او ماعرفته
مطلق اللي نزل ثوبه الابيض وهو يلبس ثوب كان شتوي اسود واديم اللي ما تتذكر متى اخر مره شافت مطلق بالثوب الشتوي دايم ابيض وقبل ماكانت تهتم لمطلق وتدقق وش يلبس لكن هالمره جاء على بالها تشوفه بذا الثوب انرسم قدامها شكل مطلق عن قرب سواد ثوبه كان تماماً مثل سواد شعره ودقنه ورغم سماره اللي له جاذبيه كان ملفت بشكل عجزت اديم تشيل عينها من عليه
وابتسمت وهي ماسكه الشماغ وبعد ماسكر مطلق ازاريره لف وهو يناظر الثوب اللي فصله هايف له بداية البرد ولا عاد لبسه مطلق لكن اليوم قرر يلبسه
لف وهو محتار فيه وقال : ووالله اني ما قست هالثوب من يوم ما جاء ولا ادري كيف
اديم اللي عجزت تتمالك ابتسامتها : شفت انك ظالم نفسك بالابيض
مطلق : بالله ! يعني مضبوط
اديم نست نفسها وهو تسكر له الكبك : اووه وش مضبوط الا فنااااان خلك كذا شفت طلعت مزيون
رفع مطلق حواجبه بتتسامه جانبيه من هالاطراء ولا رد وفجاءه انتبهت اديم ونزلت يدها بارتباك بعد ماسكرت واحد من الكبكات ورجعت وراء وهي تبعد شعرها عن وجهها (حسبي لله على ابليس وش بيقول الحين يقول ذي ماتستحي تغزل عيني عينك فيني )
مطلق مد يده اليسار : وهاذي بتخلينها
اديم تورطت وهي تسكره واخذ مطلق الشماغ وهو يلفه على راسه
وقفه صوت هايف اللي يدق الباب : يا مطلق ماصار ثوب يا مطلق
ضحك مطلق وطلع: يا ذا العزابيه اللي اقلقونا
هايف كان بيمدح الثوب بس لف على مطلق : عزابيه هاه خير ان شاء الله يا المستقر
مطلق رفع يدينه وهو يوريه الثوب وصفق هايف : اخييييرا اقتنعت ولبسته هاذي فايدة الزواج
ضحك مطلق : كيف بس
هايف : مسسسسكت فخم خلك كذا بس
ضحك مطلق :عاد انت محد يفوز عليك بالثياب الشتويه
هايف اللي كان مايصدق البرد يجي عشان يبدع فالثياب ضحك وهو يلف : اييه خلني انا يا ملحي
مطلق : يلا يلا تاخرنا على ابوي
هايف: ابوي راح من مبطي ويقول الحقونا بالحريم بنكشت فالعزبه ونتعشا
مطلق : الله وش طرا
هايف: نويصر مروع ابوي الظاهر هههههههههههههه
مطلق : اجل زين على زين يلا يلا خذ الزل معك وانا بجمع باقي الاغراض
هايف: يلا اصلا حسين بعد معنا راح يعلم الحريم
راح هايف يجمع باقي الاغراض وينتظرهم ولكن زهق وهو ينتظر ولف وهو يشوف الجدار اللي دايم يكتب عليه ممسوح الكلام منه وباقي فراغ كبير ابتسم وراح وهو يطلع البخاخ وهو عشقه انه يكتب على الجدران
وكتب «كيف نخفي حبنا ! والشوق فاضح ؟! »
نزل البخاخ وطلع وهو مبتسم وينادي بصوت عالي : مطلللق ابطينا على نجد يا مطلق
واللي يسمعه يحسب انه يقصد عزبتهم اللي كانت في ارض من اراضي نجد " لكن هايف كان وده ينبه نجد انه يدري انه متاخر عليها بس بيجي ومعه الفرج
طلع مطلق وهو يضحك وفاهم :ياهايف الصبر تاليه الفرج يا هايف ................••............
في بيت ابو نجد
نجد اللي كانت تكنس الحوش وفزت اول ماسمعت هايف وصوت هايف ركضت وهي قلبها يركض قبلها
فتحت الشباك وهي تطل من بعيد بحيث مايشوفونها وضحكت بحب وهي تشوف الكلام وتسمع الصوت اللي يوسع صدرها ويثلجه
ماقدرت تحرك من عند الشباك وهي تأمل الجدار وهايف اللي يسولف مع مطلق ويضحك وكان لضحكه رنه في كل مكان وفي كل زمان
ولا عاد عندها قدرة حتى ترد عليه ولا تقول له اي شي حب هايف لها كبييير وصعب احد يقدر يرد عليه
................••............
واخيرا طلعوا
الحريم مستانسين انهم بيكشتون وكان فيه سيارة هايف وسيارة مطلق اللي كانت جمس بمرتبه وحده ( اتمنى فهمتوا ��) هايف : مطلق الاغراض كلها بحوض سيارتك
مطلق: زين
حسين : كيف نسوي بالزحمه
مطلق : عمتي وخالتي وامي وشريفه ولطيفه وام عبود معك ياهايف
واديم وسلمى وريوف معي وحسين وعبود فالحوض
حسين : لاا مابي الحوض
ام زيد: ياحسين الاغراض بتطير
مطلق : حسين اخلص علي بس وامسك عبود زين
هايف : يلا يلا
بدت مرحلة الزحمه والضغط لكن الكل يضحك
تحرك هايف وهو يرتبهم مع ذا الزحمه
ومطلق اللي ثبت عبود وحسين وهو يوصي حسين على عبود
ولف وهو يشوف البنات يتهاوشون من يركب على الشباك
مطلق : اخلصوا
اديم : يوه يا سلموه ابي الشباك
مطلق اللي ركب : اديم ترا ماني مسؤول اذا نط عليتس نويصر من الشباك فا احسن لتس تعالي
اديم لفت بخوف وهي تضرب سلمى : جعله يسحبتس يالقرده
ركبت اديم وهي تبعد لين عند مطلق وركبت ريوف جنبها وبعدها سلمى اللي فرحانه بالشباك وصح كانوا مضغوطين شوي بس امورهم ماشيه واديم متكتفه بغضب
مطلق : هاذ شباكي ناظري معه
اديم : مابي
سلمى: الله يالهبوب البارده مب الضغط والزحمه
ريوف : انا عجزت اتنفس
مطلق شوي وخر ادديم عشان يوسسعون لريوف واديم اللي كانت يدها على ظهر مطلق عشان تجلس زين ورجولها جهة مطلق بعد ومضطره تكون لازقه فيه ( مدري اذا قد جربتوا الزحمه اللي تخليكم تنحشرون مع السواق��)
سلمى : مطلق شغل لنا شي
مطلق : شغلي انتي فاضي لتس انا
شغلت سلمى المسجل وهي منطربه هي وريوف
اما مطلق اللي ساكت وهو وده يقول لسلمى تسكر الشباك اللي هواه ينشر عطر اديم
واديم ماكانت مرتاحه وكل شوي تتحرك ودها توخر بس مع الاسف كل مارفعت رجلها لامست رجل مطلق وكل ما قررت تطلع يدها من ورا ظهره لامست ظهر مطلق ورقبته وارتبكت
ولف مطلق عليها بهمس : ماودتس ترتاحين وتريحيني
اديم جمدت ولا عاد تحركت اما مطلق اللي يحس انه يتعذب مع كل حكه مب كفايه عليه العطر ومب كفايه عليه شكلها اللي مب راضي يروح من عيونه عشان تطلع هالحركات الاجباريه
................••............
اما هايف
اللي هبل باذا العجايز وهو يفحطبهم واللي تطقه واللي تصيح واللي تدعي
شريفه: ياهايف طيحت ولدي يا هايف
هايف اللي نسى: يووووه صح خلاص خلاص
حصصه: انت فسقان لو تقلبنا ونموت الحين وش بتسوي
هايف: بسم لله عليتس يا قلبي ماعليتس شر ان شاء الله بسيطه الحياه
ام فايز: الله يصلحك السياره ماينلعب فيها
ميثى: ليت يدري عنك زيد وعمي
هايف ضحك: ماتسويها ام عبود وتعلم علي
ميثى بضحك: ايه ما اسويها بس لا تعيدها
ام زيد كانت مبسوطه ان هايف رجعت له ضحكته وردت روحه وروحهم معه وحتى لو هي مب راضيه عن حركاته بس كان ودها يسوي اي شي يسلي خاطره
.................••............
في العزبه
عند زيد ومحسن وفايز اللي يعانون من مؤيد اللي اصر انه الا يمسك الذبيحه ولا بقى ولا عنز ولا غنم الا هجت من الشبك ولا مسك ولا وحده فيهم
ابو زيد: يا زيييد الحلال تروع طلع ذا الخبل واخلصوا علي
زيد: يا يبه وش اسوي به
ابوفايز: مؤيد خلاص تعال تعال
ابو زيد: يا ويل تسبدي من زيد ومحسن ، ما ينفعون الا ان الصخره تنفع ابك شوفوا لي هايف ولا مطلق
زيد : هذا هم جو
ابو زيد ماكان يقتنع الا بشغل عياله ( هايف ومطلق وحسين )اما محسن وزيد مايعرفون كثير لهالامور
نزل هايف وابو زيد يصيح له: ألحق يا هايف رد الغنم ألحق
رفع هايف ثوبه وركض وحسين معه ومطلق اللي ماصدق يتحرر من معاناه السياره وقبل يتحرك مؤيد مسكه مطلق بحده: اقعد وينك رايح لا اشوفك جاي هناك
وفي ثواني بردت قلب ابو زيد جمعوا العيال الحلال ومسك هايف الذبيحه وذبحها ومطلق اللي يجهز النار ويرتب الامور عشان يشوون وحسين مسك الزل يفرشه
ابوزيد لمحسن وزيد: شف الشغل انت وياه شف
زيد : ابشر يا يبه ابشر
فايز اللي كان يراقب ريوف اللي تساعد حسين ويشتغلون مع باقي البنات راح وهو ياخذ الزل من يدها وبهمس :روحي ارتاحي لا تتعبين عمرتس وانا ما ارضى عليتسس التعب
ريوف ابتسمت: انا مشتاقه لهالتعب
فايز: وانا مشتاق لتس
ابتسمت ريوف بخجل وهي تبعد
................••............
في مطبخ العزبه
مطلق اللي طلع امه وعمته حصه من الخيمه اللي مصلحينه على شكل مطبخ :روحوا ارتاحوا اليوم راحتكم
ام زيد:من بيساعدك
مطلق اللي كان يحد السكين عشان يقطع اللحم: اليوم انا بضبط العشاء ويساعدوني البنات
سلمى جت وهي معها القدر ونزلته : المفروض الراحه لي
مطلق ضحك: انتي بذات مافيه راحهه ، روحي نادي اديم وتعالوا ساعدوني
جت اديم وهي تناظر اللحم بهدوء وهي ما تحب تقطعه ولا تمسكه مطلق اللي اشر لها تجلس : تعالي امسكي لي ذا اللحمه
اديم : انا
مطلق ناظرها :من غيرتس
اديم : تكفى سلمى
مطلق : سلمى بتغسل الكرشه ولا انتي غسليها
اديم بضيق: لااا خلاص امسك لك اللحمه
سلمى : الله يجازيني الجنه بس
شريفه : هاتيها اغسلها وانتي سوي الاغراض الثانيه
مطلق : شريفه حطيها واطلعي انتي يالله في عمرتس حامل وتعبانه اطلعي
شريفه: والله ما تتعبني
مطلق : وش اقول
نزلتها شريفه تضحك وناظرت سلمى في مطلق بيأس: ماتخاف الله انت ولا تبي تغثني وش فيها اذا غسلتها هي
مطلق : اقولتس اخلصي لا اجيب ألعن يلا
ام زيد اللي جت وهي ما ترتاح لين تساعدهم: خلوني اساعدكم
مطلق : يمه اخذي شريفه يا حبيبتي وروحي ماعليتس انا اخلص لتس
راحت ام زيد وشريفه ولطيفه اللي مستحيل تجي عند مطلق تحسه يربكها كانت تصب القهوه للحريم هناك اما سلمى واديم طاحوا بيدين مطلق اللي ما رحمهم
هايف اللي جاء وهو منزل ثوبه عشان الدم مايجي له : يا ولد فيه احد
مطلق ناظر اديم اللي كانت منزله النقاب عن وجهها وناظرته : مقدر ارفعه في يدي دم ارفعه انت
مطلق نزل السكين من يده النظيفه وهو يرفعه لها ويعدله ويده الللي بالنسبه لوجهه اديم كبيره تمر على خد اديم الناعم بسرعه رفعه وهو يقول : ادخل
قبل تلحق اديم ترتبك فزت اول مادخل هايف ومعاه الراس وهو يضحك : اوووه ادييم هنا يا هلا ومرحبا
اديم : هايف فكني شرك
سلمى ضحكت : الا تكفى يا هايف يا اخوي ماقصروا فيني طول مانك بالخبر
هايف : افا ابشري بعزتس وانا اخوتس يا سلمى
مطلق : يا هايف فكنا شرك وانتي اجلسي ترا راس مايسوي شي
اديم اللي كانت ورا ظهر مطلق : لا ما احبه تكفى مطلق فكني منه
مطلق وقف : هاااااايف وخر لا تحوسنا
هايف وسلمى كانوا يضحكون بشر ومطلق يهدد واديم وراه وبسرعه ركض هايف وركضت اديم وانقلبت الخيمه ركض وضحك واخيرا مطلق مسك هايف وهو ياخذ الراس ودفه: يا الله عليك العوض ومنك العوض يا ربي انت صاحي
هايف كان بيرد بس قطع عليه ابوه اللي يناديه وراح ركض وسلمى رجعت تغسل ولف مطلق على اديم
مطلق : انتي وش بلاتس اذا بتجلسين تخافين كذا كل الناس بطقطق عليتس
اديم : اخاف غصب علي وش بنسوي يعني
مطلق : الله يعيني اداريتس اجل
اديم : دامك بداريني ليش معصب
مطلق : ماني معصب بس مابي احد يمصخرتس
اديم بأسترسال مع الكلام : اذا انت فيه محد يمصخرني
مطلق تلاشت عصبيته وابتسم : البلا اني فيه
سلمى اللي طارت عيونها وتمنت انها ماهي معهم كانت من الاحراج تمنت تدخل راسها بالكرش
اما اديم ومطلق اللي رجعوا اللحم بهدوء ماكانه قبل شوي عاصفه ................••............
.
.
.
انتهىâ™¥

5 - 11 - 2024, 09:33 PM

البــارت الثالـــث والعشـريــن...
.
.
.
في بيت ابو فرج
مشاري اللي ما انثنت رجله وهو يصب القهوه لابو ثامر اللي عرفه وطول وقته مفتح اذانه مزبوط ولا فوت ولا حرف وينتظر بس ابو فرج يسأل ابو ثامر اللي كان يسولف ويسولف
ابو فرج : مشاري يا ولدي حط القهوه ورح لام فرج بتوصيك بأغراض
مشاري انصدم وانتبه ان ابو فرج يغمز له يبيه يروح
وطلع وهو مقهور وده يسمع بس فكر ان ابو ثامر ما بيتكلم ابد عند مشاري
ابو فرج : يا ابو ثامر يا اخوك انت تدري ان قلبي يحترق على ابو زيد وابو نجد كلهم اخوياي وكلهم احبهم ولايرضيني خلافهم وحرام صداقة مثل صداقتهم تضيعها ارض وودي لو نصالحهم
ابو ثامر : بس ابو زيد ما يسامح لو مدري وش يصير الموضوع ماهو هين
................••............
في عزبة ابو زيد بعد ماخلصوا كرف
ابو زيد : اذن يااا هااايف دخلت الصلاة
ركض هايف للمسجد اللي مسوينه بالحجر بس حدود وهو يعتدل وبعدها رفع صوته يأذن وبعدها اقام وهم يصطفون جاء مؤيد : بصلي بكم انا
مطلق سحبه جنبه: لا الله يعافيك ماعاد باقي الا صلاتنا بنحافظ عليها صف وكبر بس
زيد ضحك وهو يدري محد يحط حد لمؤيد وشطحاته الا مطلق
وبعدها كبروا يصلون
................••............
وجهة الحريم
بعد كانوا يصلون وبعد الصلاة في فرشوا في خيمه كبيره وقدامها النار يديرها هايف
ومطلق يروح ويجي يشرف على اللحم اللي يجهزونه لشوي
وحسين اللي يصب القهوه بطرف الرجال وريوف بطرف الحريم
ابو زيد : محسسن قم قم جب لنا التمر من السياره
محسن : يا حسيين
ابوزيد : انا اقول انت
فايز: خلك انا اقوم
اشر ابو زيد لفايز يجلس وقام محسن بغضب وهو يجيب التمر
ابو فايز: يا رجال العيال اللي اصغر منه واجد
ابو زيد: خله يقوم يشتت افكاره ويرجع
حصه: هو علامه
ابو زيد: علامه القشر والله
سكتوا وهم يشوفون محسن اللي جلس بهدوء وهو عيونه على جواله يراسل اصايل اللي تقنعه ياخذ لهم بيت بلحالهم
..................••............
في اطراف العزبه
عند هايف ومطلق اللي شابين نار بعيده عشان يشوون عليها
مطلق : وش صار مع ابو ثامر
هايف :مدري للحين مدري عنه
مطلق : اخاف يشك عاد هو فطين
هايف : ولو هو فطين وش بيدريه اني ورا السالفه
مطلق : هو مب داري بس ابوي بيدري
هايف : لا انا وصيت ابو فرج ومشاري يضبطون الامور
مطلق : ياخي الله الله يوسع صدره مشاري رجال والله وكلهم رجال
هايف تذكر وليد وسكت
مطلق : علامك سكت
هايف : ولا شي
مطلق : احد مضايقك منهم
هايف : لا وين يضايقوني ياحليلهم
مطلق : والله مدري لكن فيه واحد ماش مانيب مرتاح له كثير ابو جوال ذاك
هايف غمض ببتسامه ورطه: وليد
مطلق : ايه
هايف( بلاك ماتدري ولا ما ترتاح مره ): لا يا حليله حبيب بس مشكلته ادمان الجوال
مطلق : والله بكيفه المهم لا يضايقك
هايف اللي وده يعلم مطلق ووده ينبهه وليد بس حيل الله اقوى زي ما يقول
.................••............
واخيرا استوى هالعشاء
واجتمعوا عليه والرضا يعم قلوب الكل وبعد ما تعشوا وخلصوا
ابو فايز اللي كان متكي : والله يا هوى هالعزبه انه عليل ماعاد ودي ارجع للبيوت ابد
ابو زيد: عز الله اني يتوسع صدري بذا الخيام
مطلق :ولا تقعد بخواطركم نبات هنا الليله
ابو زيد : اي والله انك جبتها
مؤيد:لا والله بعدين يطلعلنا حنشان وافاعي خلونا نروح بيتنا احسن
هايف ضحك وهو يحضن مؤيد ومن باب المزح :لا تخاف انومك بحضني مايجيك شي
مؤيد : والله انت تنام وتنسى الدنيا
حسين ضحك: ماعليك بنخلي مطلق جنبك وش تبي بعد
زيد بضحك: اووه مطلق الحين مايبي العزابيه رجعته لهم بتصير من سوء المنقلب
مطلق اللي كان ساكت بنفس هدوءه وهو يثبت الشاهي على النار : خل عنك هالحكي وقرروا عشان من بدري نعرف اوضاعنا
فايز : وانا من اليوم مستغرب الخاطر المسفهل حمدلله على السلامه وصل جمودك الحين
مطلق صد ببتسامه خفيفه : مب لازم اتشقق من الضحك عشان يصير خاطري مسفهل
ابو زيد: خلاص اجل بنبات هنا
مطلق : اجل خلني افتح الخيمه الثانيه
ابو زيد: هايف خذ معك سلمى وروحوا جيبوا اللي تحتاجونه من البيت وحسين وزيد قوموا مع مطلق يلا
هايف وقف وهو يشغل سيارة مطلق وراح ينادي سلمى : سلمى تعالي
سلمى: هاه
هايف : اسمعي نبي ننام هنا وبنروح نجيب اغراض من البيت ونجي يلا
سلمى: الله اخيييرا بنفتك من البيت
هايف : يلا يلا لا يمردغنا ابوي
ركضت سلمى ورجعت بس ما رجعت لحالها رجعت مع ريوف واديم ولطيفه
هايف : الله وين اوديكم انتم كلكم
سلمى: تكفى هايف بناخذ لفه نوسع خواطرنا قبل ابوي ومطلق يشوفنا
هايف ضحك: اديموه معنا اخذتي اذن مطلق
اديم : هايف تراك محرق دمي من غير شي وسع صدرونا لا تنكد
هايف : ههههههههههههههههههه يلا انتي في وجههي اركبوا يلا
لطيفه: بس كيف تشيلنا
هايف : اسمعوا انحشروا كلكم شوي لين نبعد
وصرخت سلمى بحماس : وبعدها نركب الحوض
هايف : اييه
نطت اديم بحماس :ااااه ياربي اخيرا
هايف : اص لا احد يصارخ يلا يلا ترا ان دروا الشياب والعجايز بيكفخوني
ركبوا كلهم واول ما بعدوا وقف هايف ونزلوا كلهم للحوض وضربت سلمى التنده ( سقف السياره ) : هايييف اطربنا
ضحك هايف وهو يرفع الصوت والبنات اللي فكوا الطرح والشعور ولطيفه واديم اللي استحوا من هايف بس قال :وهو يرجع المرايات عليه : خذوا راحتكم مانيب شايف احد
وطبعا كانت من امتع مشاهد الرحله الهواء البارد اللي يطير بشعورهم مع صوت المسجل العالي والضحك والسرعه ومن بين ذا تفحيطات
هايف فيهم اللي كان حريص ان اديم ولطيفه ياخذون راحتهم وهو محافظ على امانه انه مايشوفهم ابد اول ما قربوا الديره وقف هايف وهو يقصرر الصوت ولبسوا البنات ورجعوا ينحشرون معه وخواته بجهه واديم ولطيفه على جنب ولا صدقوا البنات دخلوا الديره الا صابهم حالة ضحك فضيعه واضطر هايف يقفل الشبابيك
ودخلوا البيت هايف : طيروا جمعوا كل شي وجيبوه يلا
سلمى بغمز :وين بتروح انت
هايف : بطير وش تبين ، روحي خلصي والا والله امشي واخليتس
تفرقوا البنات ياخذون اغراضهم وهايف اللي طلع متشفق لنجد ................••............
في بيت ابو نجد
نجد اللي بعد ما قفلت كل الانوار وابوها وامها ناموا طلعت وهي مستغربه هدوء بيت ابو زيد وينهم جلست وهي تراقب الجو
والسيء في حياة نجد انها وحيده جداً ولا في حياتها شي ينذكر الا مواقفها مع هايف
وفزت اول ماشافت السياره وضحك وهي تشوف كمية البنات اللي نزلوا من السياره ونزل هايف وهو يضحك وبعدها طلع برا يناظر بيتهم
نجد اللي كانت مشتاقه انها تراقب تحركات هايف طول اليوم واخيرا جاء
خذت ورقه وهي تكتب « ما نصدق تجي من هالخبر وتختفي بالديره ، ترا لاحبابك عليك حق يا لليل »
ضحكت وهي تسويها على شكل طياره وبعدت الشباك بحذر وهي ترميها على هايف اللي يراقب الورقه اللي نزلت من الشباك لين طاحت قدامه ضحك على طريقه ارسال الورقه اللطيفه واتسعت ابتسامته وهو يحطها بجيبه
دخل يتفش وطلع دفتر وهو يكتب «والله اني جيت من الخبر وقلبي على يدي وقلبي ذبحه الحنين للاحباب والقمرا ، لكن لابوي علي حق .. وادري اني ابطيت عليتس بس وش اسوي لازم اسايرهم .. وبرجع لتس ومابقى شي ان شاء الله »
طلع النبيله وهو يحذف الورقه على نجد اللي قرتها ببتسامه حتى اعتذاره لطيف وحنين
طولت نجد تدور رد له ولكن خير الكلام ما قل ودل وكتبت وهي ترسلها
«خذ راحتك بس انتبه!! نجد العذيه وقمراك يحترونك »
اعظم سطر مواساة صبر قلب هايف اللي احتضن الورقه وهو يدخلها في بوكه
واخر ردوده كتبها من فيض الحب اللي يحسه
«مالك على نجد العذيه مضاهي ‏
ايه انتي اجمل من وطى في ثرى نجد »
وهو فعلا وكل حرف يعنيه ويقصده لولا نجد ما حب هايف نجد العذيه هالكثر
وصلت ل نجد رسالة هايف اللي خلاص طمنت قلب نجد من اي خوف وايقنت مهما حبوها محد يحبها كثر هايف
لكن هايف عجز يكتفي بهالبيتين وهالمره ما اهتم اذا احد يشوفه يكتب على الجدار ولا ما يشوفه
وهو اصلا ماجاء من العزبه الا عشان نجد كان قادر يرسل اي احد لكن جاء عشانها
وهالمره ما كتب على الجدار المعتاد هالمره كتب على جدار بيتهم وبالخط العررييض
( عنيت لك رجلي وسخرت جاهي ‏وحنا لنا فعلٍ يطمن اهل نجد )
وهو يعني بالشطر الثاني انه مستعد يحمي كل نجد واهل نجد لعيون نجد
ولف على جيت سلمى بالاغراض لكن وقفت وهي تناظر الجدار بهدوء وناظرت هايف اللي بيده البخاج :انهبلت
هايف : من قالتس اني عاقل
سلمى : هايف ابوي بيذبحك
هايف اللي قلبه مرتاح من هالحديث القصير بس انه له قدره عجيبه يريح بها قلب هايف : سلمى
سلمى: هاه
هايف : اركبي اذا خلصتي
ركبت سلمى وهي ودها تهاشوه بس قالت بنفسها ( دامها خاربه خاربه خله يستانس )
شوي وجو البنات وانحشروا من جديد وهم يضحكون
وهايف اللي رفع يده يلوح لنجد
اللي اكبر وعد لها هالبيت اللي كتبه هايف على الجدار
قربت الجوال وهي ترفع صوت ابو نايف اللي اعتلى صوته مع نسيم بارد والديره هاديه وظلام يخترقه نور القمر الهادي في بدايات الشهر وبعض اضاءات البيت استندت نجد على الشباك وهي تردد معه
(نحيا على مـر الزمـن ربـع وأحبـاب
والله لا يـحـرم زمـانـك زمـانـي
من كثر ما تهوى وأنا أهواك الاعجـاب
احتار فيـك وصـار شوقـي أغانـي)
.................••............
عند البنات
وقفوا هايف بنص الطريق وكان كله ( نفود ، طعوس)
سلمى: تكفى يا هايف اسمع بنربط هاللحاف بالسياره من وراه واسحبنا
هايف : قولي والله اسحبكم بذا لليل ما كفاتس الحوض
اديم : ما بيصير شي تكفى نبي نفلها
هايف: والله خطر
لطيفه: انا احس انه خطر
سلمى: وخري انتي خوافه
ريوف : وانا بعد
اديم : يا شيييينكم يا بنات المدينه
الكل :اخخخخس
ضحكت اديم بمزح: تقمصت ادور صح
سلمى: صح عليييتس
هايف : اقول مابقى الا انتم يالمجانين لا لا اركبوا بالحوض يلا
سلمى: طلبتك يا هايف افا تمن علينا الفرحه
هايف : لو هو صبح ايه بس ليل
اديم: ماعليك
هايف بعد تردد : زين بس ما بنطول
سلمى : ماعندك مشكله
ربط هايف الفرشه الخفيفه بحبل بالسياره ولطيفه وريوف ركبوا بالحوض واديم وسلمى على الفرشه
وطار بهم هايف وهو يضحكون وماسكين بقوه وبعد جولة مليانه ضحك وتطعيس وتقلبات قربوا ورجعوا كلهم يدخلون السياره وبعد ماوصلوا نزلوا البنات وهم الكل يحب هايف عشان مايرد لهم طلب ومعهم معهم وعليهم عليهم
رجعوا ولا كأنهم الا راحوا يجيبون الاغراض بس
شريفه: اديم وينتس مطلق ينادي من اليوم
اديم : وش يبي
العمه حصه : مدري بس ترا كنه عصب
طلعت اديم وهي منخرشه وتدور مطلق وراحت : ميثى وين عبود ابيه ينادي مطلق
ميثى: شوفي يلعب هنا مع حسين
راحت اديم لعبود بس شافت مطلق اللي معاه
الكشاف ويحوس بالمطبخ
اما مطلق اللي كان يدور اديم لانه من اليوم معطيها ادوية ابوه وكل اغراضه يوم كان يطبخ عشان ما تطيح منه وجاء بياخذها بس ما حصل اديم وهو ضايق عشان دواء ابوه تأخر وابوه بدا يعصب وعصب مطلق من تعصيبه وجلس يحوس بالمطبخ يدور يمكن حطته هنا
اديم دخلت : مطلق
مطلق لف : ماشاء الله شرفتي
اديم : كنت بجيب اغراضنا
مطلق تكتف : وانا وين وشوله ما قلتي له بتروحين وبعدين وشلون رحتوا كلكم مع هايف بالجمس هاه
اديم حست انه بيغسل شراعها : بس انا وسلمى رحنا وما توقعت انك بتهاوش اني رحت ماقلت
مطلق : لا توقعين شي انتي بس روحي وتعالي على راحتس وانا اخر من يعلم ! وين دواء ابوي والاغراض اللي عطيتس
اديم : في شنطتي بيجيبها
ركضت تجيبها وهي تعطيه اخذ مطلق المويه وقبل يتحرك قالت اديم وهي توقفه : ترا ما رحت الا كلهم يدرون اني رحت وشفتك مشغول وبعدين انا ماتعودت اقول اني بروح لغير امي ونسيت اقولك
مطلق : خير لا عاد تنسين ،لاني ما احب ذا الحركه بذات ! واذا بتروحين من دون تقولين وش دراني وين رحتي ! انتي في سماء ولا في ارض !
اديم : خلاص ابشر
حسين جاء: مطلق ابوي يقول لقيت الدواء
مطلق عطاه : خذه
اديم : ترا جبت لحافك
مطلق : جبتي لتس انتي شي
اديم بعفويه : ما احتاجه اصلا بنام اليوم في اعظم حضن
مطلق ناظرها وكان فيه نور خفيف من الخيمه الكبيره عليها وتنح وهو مستغرب كلمتها: هاه
اديم انتبهت لنبرته وارتبكت : اقصد اني بنام في حضن امي اليوم اشتقت لها كثير
بهدوء الدنيا اللي عم بينهم قال مطلق بهدوء : الله يخليها لتس
وانسحب بدون اي كلمه زياده وهو بينه وبين نفسه منذهل من وين جاب فكرة ان اديم تقصد حضنه وعلى اي اساس اصلا فكر كذا
................••............
عند هايف ومؤيد
اللي كانوا يفرشون اللحف بالخيمه لابو فايز وابو زيد وباقي العيال
اخذ هايف لحاف مؤيد وهو يحط بجنب لحافه: وانت عاد جنبي
مؤيد ابتسم وهو يناظر هايف : انت فيك حاجه
هايف لف وهو مبتسم : ليه وش فيني
مؤيد : مدري حاس انك تحاول تشغل نفسك فيك شي ما تبغى تفكر
هايف مد يده يرتب شنبه وهو مبتسم : مافيني شي دامكم بخير انا بخير
مؤيد: تعرف اني احبكم مره انتم وخالي ومابي اشوف احد منكم متضايق
هايف وقف وهو يحضن مؤيد : يا بعد قلبي والله يا مؤيد والله وحنا نحبك حيل بعد الاسبوع اللي ماتجي فيه لك فقده ويمكن إننا احيان نمزح مزح شوي ثقيل بس نحبك وخصوصا مطلق هاللي دايم يهاوش تراه يغليك بالحيل
وضحك: لكنك تصدع به شوي
مؤيد ابتسم بحب صادق لهم : عارف والله
مطلق جاء وهو ينزل اللحاف ولكن تفاجئ بمؤيد اللي اقبل عليه وهو يحضنه اشر مطلق بمعنى ( وش فيه!) لهايف اللي اشر بمعنى ( مدري )
مطلق :مؤيد وش فيك
مؤيد : كذا اعبر عن حبي
ضحك مطلق يسحب مؤيد له وهو يخبط على كتفه : اجل لو نعبر عن حبنا لك ماقضينا
حسين اللي جاء : اشكر حبكم اللي ماطلع الا الحين
هايف ضحك: ليييل ونسيم ومشاعر
ابو زيد وابو فايز جوا وهم يسكرون الانوار
ابو زيد: ارقدوا يا عيال ترا بكره من الصبح بتصحون
العيال :ابشر
لفوا هايف ومطلق وهم يناظرون محسن اللي جالس عند النار بلحاله
هايف : وش بلاه من اليوم ساكت
مطلق : وش بلاه غير قلبه متعني عشان ذا الاصايل ابوي رفض انه ياخذ له البيت ورافض اصلا انه يرجع اصايل
هايف : والله اني اعطي ابوي واعطي محسن حق ابوي قاسي والعوبا اقسى منه ومحسن ضاع فالطوشه
مطلق : وش نسوي لو فيه حل خلصناك انت بعد
هايف : نروح له
مطلق : لا يا رجال ان رحنا بيجلس يتكلم ويتلفظ وانا مالي خلقه
هايف: بس يكسر الخاطر
مطلق : ادري يكسر الخاطر وعيني عليه من اليوم ومهما كان اخوي بس ماودي اضيق منه ولا اضيق عليه
هايف شاف زيد اللي متجهه لمخيم الحريم وركض : زيد زيد تعال تعال
زيد اللي كان معه دواء ميثى اللي من ايام وهي مريضه من اجواء البرد : هاه وش فيه
هايف : ابيك بشغله وبعدين وش ذا الدوا
زيد: حق ميثى تعبانه بوديه لها
مطلق ضحك : ايييه قطعت عليه الموعد الغرامي المرضي
زيد ضحك: ياخي مريضه اخليها
هايف : الخيمه عندها مليانه حريم بس قلبك ما يخليها
زيد : هذا هو ، وش تبي طيب
هايف : ياخي رح لمحسن شف وش فيه جالس بلحاله
زيد: ورا ما تروح انت
هايف: يا زيد تعرف محسن ما يسمع الا منك واذا رحنا بيجلس يتكلم لين يحوس الشغله
زيد لف على مطلق : عاد انت يا مطلق مافيك رجا ما بتروح له
مطلق وهو متكتف : ان كنت ماني رايح له عشانه مب عشاني حاقد عليه
زيد هز راسه بأسى : طيب طيب اودي الدواء واجي
.................••............
قبل ساعات وتحديداً العصر في بيت ابو فرج
اللي كان جاهز يسمع كلام ابو ثامر اما مشاري للي صح طلع لكن باقي عند الباب وهو يحاول يسمع لكن اصوات السيارات تزعجه ويحاول يكون طبيعي ولا احد من الحاره يشك فيه
ابو ثامر : احساسك يا ابو فرج في محله المشكله ماهي ارض المشكله اكبببر من انها قطعة تراب
ابو فرج : قول يا ابو ثامر لا تحيرني
ابو ثامر : كل الديره محد يدري من وين ابو نجد طلع بتجارة الذهب
محد يدري الا ابو زيد اللي حفظ السر وهو قلبه جمره لكن ابو نجد ما حفظ العشره وباعها في لحظة طمع
تعجب ابو فرج ومشاري اللي مسك في الباب بصدمه ولكن جاه متعب : مشاري وش تسوي
مشاري : هاه ولا شي اشوف الباب
متعب : مسكت على الباب الحين
مشاري : يعني
متعب : من عند ابو فرج
مشاري : ابو ثامر
متعب ناظره بشك : وانت تسمعهم
مشاري : لاا
متعب : اجل امش امش عندي اغراض بطلعها لعمال طلعها معي
مشاري : بعدين اجيك
متعب بحده: مشاااري ادري وش تبي امش
مشاري : يا متعب رح مانيب رايح
متعب : انت ما تستحي تسمع عليهم
مشاري : عشان هايف
متعب :ابو فرج ترا ماهو مخبي عن هايف واحرص منك يلا امش بس
مشاري اول مره ينغث من متعب : طيييب رح وانا اجي
راح متعب ولف مشاري بس ما سمع اي شي لانهم سكتوا من الصدمه .................••............
عند ابو ثامر
اللي كان يحكي عن قبل سنييييييين بعيده من اول ماكانوا ابو زيد وابو نجد في عز شبابهم اول ماكانوا يدورون الوظايف وكان ابو زيد ما عنده الا زيد وابو نجد ماتزوج وهم راجعين لرياض بيأس من حالات الفقر واول ماطلعت السيارات وهم راجعين فز ابو نجد : عبدلله تشوف اللي اشوفه يا عبدلله
ابو زيد : كنه حادث
ابو نجد : امش امش نساعده
ركضوا وهو يشوفون رجال واضح من شكله انه اجنبي مصتدم بناقه وهو فيه شوي حياه والناقه ميته
ابو زيد: حي يا مشعل حي
ابو نجد اللي كان يدور حوالين السياره : خلنا نشوف هويه ولا شي ندل به اهله
ابو زيد : كنه من الخواجات ماشوف زين
واتسعت عيون ابو نجد بصدمه اول مافتح الشنطه : عبدلله اركض يا عبدلله
ابو زيد سحب الششنطه وانصدم : ذهب
سحب مشعل سبايك الذهب اللي كانت مليااانه : اييه اييه هذا ذهب هذا حظنا وقدرنا اللي بيتغيير يا عبدلله هذا اللي بيدفن فقرنا ويطلعنا للحياه كل احلامنا بتصير حقيقه
ابو زيد : مشعل هاذي مب لنا حرام يا مشعل وبعدين دور لنا ورقه نوصل فيها لاهله ونبلغ عنه وهذا حقهم
ابو نجد وقف وهو يمسك ذراع ابو زيد بحذر : لا يا عبدلله هذا لنا حنا حنا اللي لقيناه وحنا اولى به
ابوزيد سحب يده وركض وهو يشوف الرجال بدا يتعب : مب وقت الذهب يا مشعل الرجال بيموت
ابو نجد : الرجال ميت ميت مافي يدينا حل كل شي واضح ولا حولنا احد يسعفه اتركه وامش خلنا ناخذ هالذهب ونروح قبل احد يجي
ابو زيد: مانيب رايح ومخلي الرجال يموت والذهب هذا علينا حرام
سكر ابو نجد الشنطه وهو يسحب ابو زيد: عبدلله حنا ورانا اشياء اهم يا عبدلله
وانت تدري لو نسوي اللي نسويه ما قدرنا ننقذ الرجال وربي حطه في طريقنا عشان يبين لنا هالرزق ويطلعنا من رداة الحظ والفقر امش يا عبدلله امش وتذكر وراك زوجه وولد ذبحهم الفقر واعياهم ولدك ما تقدر تطلع له عشاء ليله ربي كاتب رزقنا يا عبدلله
ابو زيد اللي اضعفه طاري زيد وابتعد مع ابو نجد لكن ماقدر وترك ابو نجد ورجع يركض بس وقفه ابو نجد اول ماسحبه وهو يشوف سياره وقفت عند الحادث وقال واحد منهم:ميت الله يرحمه
ابو نجد : شفت مات مات وفاضت روحه يلا خلنا نروح قبل احد ينتبه
رجع ابو زيد وهو كل شوي يلتفت لرجال والسياره وهو يحس بذنب عظيم وصل بيته وهو حزين انه ترك هالرجال وطاع مشعل ولكن مشعل ماهمه ابد وكان فرحان ان فقره بيندفن وينتهي وحاول يقنع ابو زيد يتقاسمون الذهب بس رفض ابو زيد وحاول انه يرجع ابو نجد عن هالذهب ويروحون يسلمونه للجهات الامنيه ورفض وقال انه رزقه ولا بيرجعه وعاش ابو نجد مع هالذهب اللي نقله من ذل الفقر لاغنا الاغنياء
اما ابو زيد ما اخذ ولا شي وراح يتعلم خياطة البشوت والمشالح وصناعه السيوف لين كون كاره ولكن االسر ماهو هنا
السر اكبر من كذا ورغم ان ابو زيد ماكان راضي بس عشان صديق عمره قرر انه يسكت هو سوا اللي عليه ونصحه بس ابو نجد ما اكتفى ابد
وبعد سنيين من كتمان السر وفي ثاني ليالي العيد في بيت ابو ثامر كان ابو نجد موجود ومعاه شنطه
ابو نجد : انا يا ابو ثامر جيتك وانا ادري انك تحفظ الامانه ودامك رايح للخبر بعطيك هالشنطه وابيك تعطيها رجال بيقابلك هناك لكن اول شي توعدني لا تفتح الشنطه ولا تفرط فيها
ابو ثامر : ابشر بس انت ليه حزين ومتضايق
ابو نجد بحزن : لاني ادفع ثمن بأغلى ما املك غصب علي
ابو ثامر: افا يا ابو نجد وش اللي تقوله فيه احد مضايقك اذا تحتاج عون انا عوينك
ابو نجد وقف وهو قلبه مب مرتاح : لا تسلم بس سلم هالشنطه لرجال اللي اسمه بالورقه وحافظ على الامانه
ابو ثامر: طيب ابشر والامانه بالحفظ والصون
طلع ابو نجد وهو يصارع القهر والضيق والحزن والعجز والاجبار واتجهه لابو حميد وهو مقرر ياخذ الارض لمقصد كان في نفسه
وبعد ما صار اللي صار وزعل الارض كان ابو زيد يبي يزعل ايام من ابو نجد وهو يدري انه بيجي يراضيه ولكن الصدمه جاته اكبر لما دق باب ابو زيد ودخل ابو ثامر ووجهه منقلب
ابو زيد: علامك يا ابو ثامر
ابو ثامر: بقولك بس قلي وين ابو نجد ما جاك ولا رجع الارض
ابو زيد : مدري يا بو ثامر مدري ماخبرته يرضى زعلي ابد واحتريته يجي ولا جاء
ابو ثامر اللي كان ضايق : ولا هو بجايك ولا هو يهمه زعلك
ابو زيد: وش تقول انت في لسانك كلامك قله ترا اعصابي تعبانه من غير
ابو ثامر طلع الاوراق اللي في جيب سديريته : جاني ابو نجد قبل فتره عطاني شنطه يقول هاذي امانه وصلها وكنت بروح لكن مدري ليه قلبي نغزني مدري ليه اصر قلبي اني اغدر الامانه وافتح الشنطه ولكن شفت شي ضيق صدري وكسره
ابو زيد سحب الاوراق وهو يعتدل والصدمه كانت المكتوب تذكر ان ابو نجد كان يطلبه بصمته دايم على اساس الاوراق اللي بينهم والشراكه في بعض الاملاك لكن عمره ماتوقع يغدر ابه ابو نجد ابد
كل الاوراق كانت اعتراف واقرار عن سرقة الذهب وكانت تكلف مبلغ كبييير من المال والمنجم اللي كان يشتغل فيه الرجال اللي كان يدورون على هالذهب وكلها بهالاوراق تصير في ظهر ابو زيد
ابو زيد رمى الاوراق بغضب: وش ذا يا ابو ثامر
ابو ثامر : مدري وش بس لو ما شفت ذا الاوراق وسلمتها هالرجال بتروح انت في ذنب انت مالك فيه لا يد ولا رجل
ابو زيد اخذ الاوراق بغضب وهو يشققها بقهر هو اللي ستر عليييه و سكت عن ذنبه اخو شي يورطه فيها : انا اللي سترت علييه وهو اللي غدر فيني
ابو ثامر: وش بتسوي يا ابو زيد
ابو زيد بغضب : خل الموضوع سر بينا لين اشوف اللي بيصير
ابو ثامر : ابشر يا ابو زيد ابشر
طلع ابو ثامر وترك ابو زيد وراه جريييييح ومصدوم ومقهور كل شي الا غدر الاصحاب
بعد ما استجمع قوته طلع متجهه لابو نجد اللي كان جالس ببييته وهو يحتري الخبر اللي بيقضي عليه ماكان ابد وده يغدر صاحبه ماكان ابد وده يبيع ابو زيد وخوته ولكن كان مجبووور ومهدد يا انه يخون ابو زيد ويتهمه بهالذهب يا انه ينكشف امره ووينسجن او ينقتل ويقتلون بنته وزوجتهه وفي كلا الحالتين كارثه وخصوصا ان ابو نجد ماله احد
غمض بقهر وتمنى انه ما دخل شريك مع رجل كان يتوقع انه رجل خير لكن الحقيقه اللي اكتشفها كانت مره كان خطير اكثر من اي شي واهم شي عليه ينفي وجود ابو زيد عن طريق ابو نجد والا يودع بنته وزوجته للابد وهو يجهل مصيرهم واللي بيصير فيهم
اختار بعد ضغط ولكن ماكان راضي ابد ماكان راضي واشترى الارض بقصد انه بعد ما ينسجن ابو زيد يبيعها وويدفع جزء من اللي بيجي على ابو زيد ويطلعه وبعدين يشرح له الموضوع ولكن انتهى كل شي اول ما دق ابو زيد الباب بغضب وفز ابو نجد يعرف دقته
فتح الباب :عبدلله
دفه ابو زيد بعصاته بغضب : بعت ذمتي وضميري وبعت كل شي لخاطرك سكت عن الحق عشان تشبع وتعيش ضحيت بكل شي كل شي عشانك
ضحيت بكل شي كل شي عشانك ولكن مايفيد فيك كان المفروض اني افهم انك غدار من الساعه اللي تركت الرجال فيها وراك ورحت لكن مع الاسف توني فهمت انك جببببان وغدار وكل شي عطيتك اياه حرام امنتك فيك وتممت لك كل شي واخر شي بتورطني بمصايبك !!! مانيب قايل ليه ؟ لان ادري ماقادك لها الافعال الا اطماعك
ابو نجد انصدم : عبدلله الامور ماهي مثل ما انت فاهم
ابو زيد : خلني يكفيني اللي فهمته لكن تدري وش بسوي ! ابطلع من هنا لكن بدفن لي خوي كان خوي وبسكت ولاني مسوي لك شي ولا ببلغ عنك وابعدك عن عيالك واهلك بسكت عشان شي واحد ايام كنت اعدك ليها اخو بسكت عشان في حضنك بنت مالها ذنب في فعايل ابوها وبسكت لاني عاهدت اني ما اخون ولكن اعرف انك انتهيت بالنسبه لي ولا ابي شي من الاملاك اللي بينا ولا ابي اي شي يجمعني فيك واذا هالمال بيغينك خذه وابعد عن حياتي وخلني اعيش العزا في مشعل اللي مات
ابو زيد ما قدر ابد ابد انه حتى يضرب ابو نجد كان يعز عليه كثير ومكسور منه كثير طلع وهو يمشي على نار من قهره
««والجزء اللي مايعرفه ابو زيد ولا ابو ثامر ولا احد »» ان ابو نجد اللي تمنى لو ابو زيد ذبحه ولا قال اللي قاله تمنى لو انه كان يقدر يختار ابو زيد ويبيع الدنيا بس اذا فات الفوت ماينفع الصوت طلع وهو يبكي بحرقه ليته خسر كل شي ولا خسر ابو زيد من قهره ماكان يدري وش يسوي غير انه ينتقم للسنين اللي خسرها بحادث مدبر تخلص من هالشخص الكارهه ولكن ماتخلص من تأنيب الضمير ابد وحاول طول هالفتره يشرح لابو زيد الاسباب اللي خلته يسوي كذا ولكن ماعطاه اي مجال واي فرصه وياما ندم وتعذب وطلع قيمة الذهب اللي اخذه ورجعه لشركه بدون محد يحس وصار طول هالسنين يحاول يغفر هالذنب بالصدقات عنه وعن ابو زيد ورجع لصفر ورجع يكسب كسب الحلال وتمنى لو طاع ابو زيد ولا باع ذمته وضميره ولكن ما قدر يكسب صديقه من جديد
( ابو زيد للحين مايدري ليش ابو نجد سوا كذا)
وبعد ما انتهى كل شي بينهم قرر ابو نجد يبني الارض ويسكنها دامه ماقدر يرجع لصاحبه على الاقل ينعم بقربه وامان جيرته وهو يوميا يتعذب
.................••............
عند ابو فرج
اللي كانت صدمته اكبر ولا توقع ابد ان هذا السبب انكسر داخله وضاق خاطره وزعل من ابو نجد وفي نفس الوقت ضاق عليه هالمووضوع اكبر من انه يحله ابو فرج تمنى انه ما اعرف ولا يدري كيف يعلم هايف
ابو ثامر: قلت لك ما تقدر تحله
ابو فرج: هذا والله اللي ما حسبنا حسابه
ابو ثامر : كل شي الا الغدر وصار
ابو فرج: ماعاد بيدي حيله
ابو ثامر : انا عاد بستاذن واقولك لا تبحث الجروح
ابو فرج: الله يعين الله يعين
طلع ابو ثامر لكن حمل ابو فرج امانه كبيره وحتى ماقدر انه يفكر فيها مع نفسه وكيف بيقول لهايف ذا الموضوع وكيف بيشرحه
مشاري اللي اول ماطلع ابو ثامر ركض وهو ماسمع الا البدايه : عمي وش صار
ابو فرج اللي شاف انه ماعنده الا حل واحد يسكت مثل ماسكت ابو ثامر ولا يقتل كل شي بقلب هايف بهالسبب :ماقال شي خلاص على املاك وتجاره
مشاري : وش السبب
ابو فرج: السبب اراضي معروفه
مشاري : بس انا سمعت ان السالفه فيها ذهب
لف ابو فرج بغضب : مشاري وش االي سمعته
مشاري قاله اللي سمعه ابو فرج: اسمعني يا مشاري السبب اللي علمتك فيه هو اللي بتقوله لهايف ولا تجيب طاري ذهب ولا هم يحزنون
مشاري: ليييه ! وش يخليني اسكت عن هايف
ابو فررج: لان الذهب سالفه ثانيه مالها دخل
مشاري بشك: كيف يعني
ابو فرج: الذهب يخصني انا وابو زيد ماله دخل
مشاري : زين ما طلعت بشي
ابو فرج: لا هو هو بس ان فيه خلافات على املاك كثيره مب بس ارض
مشاري : اجل بعلم هايف
ابو فرج: لا لا خله انا اعلمه
مشاري شك بارتباك ابو فرج لكن طلع وهو مصر يدق على هايف ومطلق بس محد يرد عليه
.
.
.
انتهى â™¥

5 - 11 - 2024, 09:34 PM

البـارت الرابــع والعشــريــن ...
.
.
.
في العزبه
وعند زيد اللي رجع لمحسن اللي كان صامت : محسن وراك هنا
محسن : وين اروح
زيد: مب لازم تكون مع الناس المتجمعه
محسن: هذا اذا صار احد يبيني
زيد: وراك تقول كذا ،تدري انهم يحبوك ويبونك
محسن ضحك: اييه ايه
زيد: محسن اذا انت تشوف ان محد يبيك هذا بسببك انت ، كم مره يا محسن شرحت لك كم مره قلت ارجع محسن الاول وقلت لك لا تسمع اصايل اللي تبي تخرب بينك وبين اهلك وماطعت تبي تصير هيبه تقدر تصير من دون طق وصراخ وهواش هذا مطلق كلٍ يهابه ويخاف منه بس بإحترام بدون لا يطق ولا يخرب علاقته بأخوانه اللي يبيه يسونه له بكل حب تدري ليش لانه يحبهم ومهما سوو يكون صارم بس بحق وانت تحسب انك بتخليهم يسمعون كلامك اذا طقيتهم واذا هاوشتهم واذا صرت لهم عقبه بينهم وبين ابوي هذا مايزيدهم الا كره لك يا محسن انت حتى ما خليت لهم مجال يقولون يا محسن وش فيك وليش ضايق تقول مايحبوني وانت مأذيهم هايف وسلمى وحسين كلهم مأذيهم وبدون حق عشان خاطر من عشان اصايل عشان ترضى لكن عمرها ما بترضى طالما انت تطيعها حتى بأذية اخوانك انا ادري تحبها وتحبها حيل بس مايعطيها الحق انها تخلي بينك وبين اخوانك عداوه اتركها فتره تربى وتعرف انك ماتبديها على اهلك وارجع لعقلك ولاخوانك اجلس معهم وشاركهم في كل وتشوف وشلون يحبونك وهم اللي قالوا لي يازيد شوف محسن متضايق كلمه ووسع خاطره هو مايسمع منا ، محسن لا تخسر اخوانك ابد مهما كان السبب واصايل اذا مارضت بتحصل غيرها كثير وتعوضها بس اهلك مايينتعوضون
محسن اللي كان يحس بكلام زيد بس يحس انه بعيد عنهم وقف زيد وهو يوقفه : امش وخلك معنا واصايل بترجع بس اتركها فتره وحسن علاقتك باهلك وبعدين فكر فيها وابوي اذا شافك تغيرت صدقني بيعطيك حتى عيونه
محسن اللي من ضعف شخصيته كان يحتاج ان احد يدله كل شوي عشان يكمل راح وشاف حسين اللي مرتب له فراش ووقف : محسن هذا فراشك حطيتك بالنص ادري بك ما تحب الزاويه
محسن ابتسم وهو يخبط على كتف حسين: يعطيك العافيه
ناظروه بصدمه وابتسم زيد اللي اشر لهم يسايرونه
وكل واحد راح لفراشه وانطفت الانوار ولا بقى الا اصوات السوالف والحكاوي بين العيال
وهاذي اول مره محسن يشاركهم لانه دايم مع اصايل ولا يدري بهم شي وكان مستمتع جدا
................••............
في الخبر
وعند مشاري اللي كان يتقلب بفراشه ماهو مقتنع بعذر ابو فرج وطلع وشاف سعود جالس بلحاله مع دحوم اللي مايبي ينام يلعب
مشاري: سعود صاحي
سعود : ايه كلهم ناموا وجلست مع ذا الشقي
مشاري جلس بعد ماحاس شعر دحوم ببتسامه وهو يبوسه
سعود : وش فيك مانمت !
مشاري اللي قتلته الحيره:سعود فيه شي بعلمك فيه بس خله بينا لانها بذبحتني الحيره
سعود : وش فيك!؟
مشاري قاله اللي صار اليوم : وانا ماني مرتاح لارتباك ابو فرج
سعود : يا مشاري لا توسوس اول شي تعرف ابو فرج مستحيل يخبي شي وعنا بذات وبعدين هو يعز هايف كثير ولا فيه اي سبب في الدنيا يخليه يخبي عن هايف شي وخصوصاً في ذا الموضوع واذا سالفة الذهب هو قالك تخصه والرجال ربي معطيه يمكن عنده تجاره بالذهب ولا يبي يقول لا تحرجه انت واذا لابو زيد شغل بالذهب كان هايف عرف لكن السبب معروف اراضي واملاك والطمع
مشاري : مدري ماني واثق كثير
سعود : يا مشاري والله انك شايل هم على الفاضي تعوذ من ابليس ولا توسوس بهايف ترا مب ناقصه وخل االموضوع اراضي واملاك يقدرون يحصلون له حل
مشاري :اجل شورك وهداية الله
سعود اخذ دحوم اللي بدا ينعس: يلا قم نام ولا تفكر
مشاري:يلا
................••............
ومن بكره الصبح في العزبه
صحى مطلق وحسين وهايف على صوت ابوهم اللي يصحيهم
ابو زيد : يلا قوموا شوفوا شغلكم وانتم ذبحكم النوم
هايف بهمس لمطلق : ذبحنا النوم والساعه 6
مطلق : قم قم لا يلسبك بالعقال
ابو زيد : هايف شب النار وانت يامطلق جهز عمرك تسوي الفطور وحسين قم شف الحلال وقوم محسن وزيد معك
حسين : طيب
طبعا عيال ابو زيد هم اللي المفروض يصحون قبل الكل وكل واحد راح لشغله
اما مطلق اللي راح المطبخ وهو يدور الكبده لف على صوت امه : مطلق وش دور
مطلق : بسوي الكبده والمقلقل يمه
ام زيد: هاته انا اسويه
مطلق : لا ياحبيبتي ارتاحي انتي ابوي قال لي اصلحه انا
ام زيد: اذا انت لحالك ما بتقضي
مطلق : ابشري اجل صحي لي اديم تجي هي وسلمى
ام زيد :خل اديم ما تعرف وخلها عند امها بنادي لك سلمى
مطلق بحده : لا يمه والله ما تكرف سلمى وزوجتي نايمه ما تزوجت عشان سلمى تكرف لي
ام زيد اللي تدري ان مطلق ما يرضى ان اخته تشتغل وزوجته جالسه وخصوصا اذا الشغل له : طيب طيب
راحت ورجع مطلق يجهز وشوي جت سلمى وهي تمشي على جنب من النوم ودخلت وهي تجلس: يالله صباح خير ها مانك تقول اجازه للحريم وانا وش انا بقره يوم ماتعطوني اجازه
مطلق ضحك: الاعتراف بالحق فضيله اجل قومي يا بقره وقطعي البصل على ما اجيب المويه واجي
سلمى: الله ينصرني عليكم بس
طلع مطلق يضحك على سلمى وقرب عند خزان المويه وقبل يلف طلعت اديم اللي كانت تغسل وشهقت برعب : يممه
مطلق : لا اله الا الله يالله صباح خير يا ادميه يوم واحد صبحي بدون ماترتاعين
اديم : انت اللي يوم واحد بس لا تروعني
مطلق ضحك : بسم لله عليتس اذا انا مروعتس
اتجهه مطلق يعبي المويه وقالت اديم: ناديتني وش تبي
مطلق بطقطقه وهو مروق من الصباح وهو متعود اذا سلمى قالت ليه تناديني يرد عليها بذا الرد لكن ما انتبهه لحساسية الموقف بينهم: اشتقت لتس
اديم طارت عيونها وطار النوم اما مطلق اللي ارتبك : وش ابي يعني من صبح الله بنجهز الفطور
اديم : ليه حنا ما تشملنا الاجازه
مطلق مشى وهو يشيل المويه حط يده على كتفها من باب انه يمشيها : لا ما تشمل يلا يلا ورانا شغل
اديم سهت وهي تناظر يده لكن فجاءه سحبها مطلق له بقوه وانصدمت
مطلق :وش بلاتس ما تشوفين الشجره
اديم وخرت عنه بتوتر : هاه ماشفتها
دخلو الخيمه وهم يشوفون سلمى اللي ماكأنها كانت معصبه وهي تغني موال يوصف حالتها :
لاقعدن على الطريييق واشتكي
واقول مظلوم ومطلق ظلمنيي
مطلق ضربها بسبحته وهو يضحك:اشتغلي قبل يجي ابوي يقلقلنا بدال الكبده
اديم قربت وهي تحضن سلمى: ماعليه يا حبيبتي تصبري كلنا تحت نفس الظلم
سلمى: اااه ضاع شبابنا يا بنت عمي
مطلق عطى اديم الطماطم تقطعه ووقفت جنب سلمى : وش نسوي نعتبر شهداء في سبيل الله وثم طاعة ولي الامر لنا الله يا اديم
وفجاءه فصلوا يغنون : لنا الله خالي مِن الشَّوق
وأنا مُولَّع .. على نارين .. كيييييييييف
بعدَ المُودَّه والَمحبَّه صِرتوا تِنسوني
ومطلق يضحك عليهم ومنذهل بهالمجانين
ووقفت اديم تناظر مطلق اللي يقلب الكبده وسلمى جنبها وفجاءه قالت سلمى وهو تدق بالصحن : واتقلللبب على جمره الغضااااااا
وكملت اديم وهي تضحك وتطق اصبع : واتقلب
مطلق مسح وجهه : يلاااااا جهزوا الصحون وانتم ترقصون
سلمى اخذت السفر وركضت: انا مالي دخل الا بالسفره والباقي عليتس يا اديموه
اديم: لا يالغداره
سلمى ضحكت: فطور رجلتس وبكيفتس
راحت سلمى واديم اللي ماسكه الصحون لمطلق اللي يغرف الكبده وعلى اخر صحن وكان صغير وقزاز احتر على يد اديم وهي تحاول تمسكه: يييوه لحظه مطلق حار حار
مطلق قرب بيمسكه وفي نفس الوقت نزلت اديم يدها بسرعه بتنزله وانقلب عليها وصرخت رمى مطلق المغرفه من يده وراح لها ومن حسن الحظ ماكان المرق كثيره وسحبت اديم بلوزتها تبعدها عن بطنها بألم
مطلق : احترقتي صار لتس شي!؟
اديم اللي على طول تجمعت دموعها : لا ماصار لي شي
مطلق اللي كاان مقطب حواجبه بخوف : اكيد
اديم صدت وهي تناظر بطنها كان فيه احمرار مب كبير شوي يعني ومسحت دموعها ولفت بعد مانزلت البلوزه:لا ما صار شي حمرت شوي بس
مطلق راح وهو يجيب ثلج من الترمس : خذي خذي حطيه عليها عشان ماتوجعتس
اديم اخذتها وهي تحس بألم وعيونها عجزت تحكم في دموعها لفها مطلق بكتفها: الا والله يوجعتس دامتس تبكين
اديم مسحت دموعها : لاوجع خفيف بس ماتعرفني ابكي على كل شي
جت شريفه وريوف : يعطيكم العافيه
مطلق رد بهدوء واديم صاده واخذوا البنات فطور الحريم وطلعوا وهم مستغربين الهدوء من اديم و الا مطلق متعودين عليه
مطلق اعطى حسين مؤيد فطور الرجال ورجع وهو ماهو مرتاح دخل وشاف اديم جالسه للحين حط يده على كتفها عشان ماتنفجع : اديم وراتس جالسه للحين
اديم نزلت بلوزتها بسرعه: ولا شي بروح الحين
مطلق جلسها بهدوء : اشوف الحرق
اديم اتسعت عيونها اللي مليانه دموع:هاه
مطلق : ادري انه اوجعتس عشان كذا جالسه وريني اذا يحتاج مستشفى بنروح ! بشوف بس الحرق
اديم اللي توترت وخافت ماقدرت توريه ابد ولا قدر مطلق انه هو يشوفه منحرج مره ولاحتى قدر يصر ولكن بعد معاناة قال: اديم ماله داعي التوتر بشوف الجرح بس وريني
اديم تعرفه اذا يبي شي مايروح ابد لين يشوفه غمضت بارتباك وهي ترفع بس على حد الجرح ناظره مطلق بحدود ومد يده يلمسه وصرخت اديم : لا تلمسه توجعني زياده
مطلق اخذ المرهم اللي جابه : ابعدي يدتس
اديم : انا احطه
رفع عينه مطلق لعينها اللي قريبه منه وهو منحني بجسمه : واذا قلت انا بحطه
اديم وخرت عينها ضيق وارتباك وبخفة وحنية الدنيا حط مطلق المرهم وارتفع وهو يقول :ان شاء الله مايوجعتس اكثر وهو بسيط شوي ماعليه
اديم وقفت وهو مرتبكه: زين
مطلق وقف وهو يمسك ذراعها وهو يحس بالذنب : اذا طول يوجعتس ناديني
اديم : وش بتسوي فيه ؟!
مطلق : ناديني وبس ،الحين روحي افطري
طلعت اديم وهي رغم وجع الحرق الا تحس انها من ارتباكها ما تحس فيه
مطلق وقف وهو يغسل يده لف على صوت هايف اللي جاي يركض: مطلق تعال يلا نحتريك
مطلق : افطروا بالعافيه مابيه
هايف قرب يناظر وجهه :وش بلاك وش فيك
مطلق يحس انها انسدت نفسه وتنكد : مافيني شي بس اكلت شوي هنا واحس لو بكثر بيصكني غثيان
هايف: خل عنك الخرابيط صاير شي
مطلق : ما صاير شي والله روح كمل فطورك يلا
هايف ناظره بهدوء وتوقع ان لاديم دخل ولا حب يضايقه: طيب
رجع ومطلق اللي جلس بعد ما اخذ فنجال شاهي وطلع متجهه لاخر العزبه ................••............
في طرف الحريم
عند اديم اللي بالقوه هي افطرت بعد ورجعت تجلس بطرف وقربت سلمى: علامتس لايكون تهاوشتوا
اديم : لا
سلمى: وش فيتس اجل
اديم : احترقت شوي
سلمى: في ذمتس وين!؟
اديم : انقلب الصحن علي بس بسيطه
سلمى: ماش ماينشد فيكم الظهر يالاثنين ليتني ماخليتكم
ضحكت اديم : روحي بس خليني انام
سلمى: لا والله ما تنامين قومي عندي شي فلله قبل تقوى الشمس
اديم: وشو
سلمى: بنات خلصتوا تعالوا
طلعوا كل البنات يمشون ورا سلمى اللي راحت لاخر العزبه لكن تفاجأت بمطلق اللي جالس
مطلق : سلمى وش عندتس هنا
سلمى: حمدلله كنت افكر وش بسوي بس جيت وجابك الله
شريفه: وش بتسوين ياخبله
سلمى اللي كانت معها حبل ومخده صغيره اشرت لمطلق اللي يناظر اديم: بتسوي لنا في ذا الشجره الطويله مرجيحه
مطلق : قولي والله
سلمى:تكفى من زمان عنها
البنات اصروا على مطلق يطلبونها وطلع مطلق وسوا لهم المرجيحه ونطت سلمى فيها وهي تضحك والبنات يحجزون بالدور
وتقدم مطلق لاديم : يوجعتس للحين
اديم : لا
مطلق ابتسم : اشوى اجل خلتس مع سلمى وانتبهي وانتي تلعبين
ضحكت اديم : ايه تقول سلمى ماينشد فينا الظهر
مطلق ضحك:وهي صادقه
اديم تخصرت: لا والله هذا وانا مساعدتك
مطلق : ماينفع نشتغل مع بعض نجيب العيد دايم
اديم : انا ماجبت شي انت مدري عنك
مطلق ابتسم: انتي المصيبه كلها
مطلق كان قصده انه مايقدر يركز معها واديم اللي لفت بضيق : ماعليش ازعجتك كثير بس ترا انت اللي ناديتني اساعدك
راحت وتركت مطلق اللي انصدم من زعلها
لف مطلق وهو ماهو مستوعب اذا قال شي صح او غلط هي فالنهايه ما فهمت قصده وكلامه مبهم ووضعه حساس نزل الكوب وراح وهو مايقدر يرجع بحكم ان ميثى ولطيفه فيه
اما اديم اللي فعلا ماعاد تدري وش يقصد مطلق بكلامه تصرفاته غير وكلامه غييير
................••............
بعيد شوي عن العزبه
هايف اللي كان طالع بعيد وهو يدق على مشاري اللي رد وهو بعز نومه هايف : مشاري صحصح الله يرحم اهلك
مشاري: مصحصح ماعليك
هايف: وش صار مع ابو ثامر
مشاري : ابد كنك يا ابو زيد ما غزيت هي هي نفس السالفه اللهم ان فيه املاك ثانيه متهاوشين عليها ومدري عاد من اكل الاملاك على من
هايف : ما اخبر املاك لابوي عند ابو نجد ودامه املاك على قولك وش دخل ابو ثامر
مشاري : الظاهر ابو ثامر كان شريك معهم وسحب ابو نجد على شراكته وزعل عاد انت فتش املاك ابوك وشف عاد وش يطلع معك
هايف اللي يفهم كلمه وعشره لا من صوت مشاري النايم : :ياخي اكرهه احاكيك وانت نايم خلني اسال ابو فرج
مشاري اللي من كثر ما اتعب عقله بالتفكير يحس خلاص وده ينام:طيب
سكر هايف وراح يدق على ابو فرج اللي قاله نفس السالفه واستغرب هايف ماخبر ابوه يزعل عشان املاك بس نزل وهو يقول : الطمع ماينفع
مطلق اللي جاي من بعيد: هاه وش صار!؟
هايف: ابد هو هو السبب
مطلق : يعني ! وش بتسوي
هايف : الحسنه الوحيده في الموضوع ان المشكله كلها املاك واراضي يعني يمديهم يتراضون والله كنت خايف ان فيه شي اكبر
مطلق : الشيطان اذا دخل عقل الانسان امره انتهى
هايف : تزين ان شاء الله
طلعوا متجهين لخيمة الرجال
................••............
انتهى هاليوم
اللي من اسعد الايام ورجعوا كلهم للبيت ومطلق للحين ما قابل اديم بعد اللي صار ولاهو مستوعب الزعل
اما هايف اللي ما صدق رجعوا عشان ترجع لروحه واول ماقفوا ناظر ابو زيد الجدار بشك : من كاتب ذا !؟
مطلق اللي على طول عرف : مدري من عيال الديره اكيد
ابو زيد وهو يناظر هايف اللي ما اهتم ابد وهو ينزل الاغراض :ان شاء الله انه من عيال الديره
دخلوا كلهم الا هايف اللي يتعمد يبطئ نفسه سكر باب البيت وجلس وهو يتربع فالحوض طلع الدفتر وقلم الرصاص وقد مايقدر حاول يرسم الليل والقمرا و شباك نجد وقدر انه يخلص بوقت قصير رماها على شباك نجد ودخلت وابتسم برضا وهاذي رساله انه وصل وانها معه في كل مكان
................••............
في بيت ابو نجد
نجد لللي اول ما وصلتها الرساله اخذتها وهي مبتسمه على ان هايف اكثر انسان يضحكها الا انها ما تبكي الا من رسايل هايف اللي تخاف انها في يوم من الايام تفقدها وتعيش بدونها راححت لدرج وهي تطلع منه نفس الرسمه اللي رسمتها هي وهايف قبل سنين هي هي نفسها نفسها للحين الرسمه نفس الرسمه وللحين خط هايف بنفس الابداع وللحين رسمته للقمر وحده اللي اختلف الشباك اللي توه يصير وسيله بينهم لكن قبل مايحتاجون اي وسيله
................••............
وفي بيت ابو زيد بعد ما استقروا
عند البنات اللي بعد ما تروشوا وفرشوا ألحفتهم وجلسوا جت اديم وجلست
لطيفه:اديم بتنامين هنا
اديم : لا بس اسولف معكم وارجع
سلمى اللي كانت منتهيه من التعب : انا ضروري جداً اجيب شغاله بس تهمزني
ميثى اللي نفس الوضع : انا انتهيت من هالانفلونزا حسبي لله ياربي
لطيفه: وين عبود
ميثى: مع ابوه
سلمى اللي كانت تناظر شريفه وريوف اللي يراسلون : ترا غثيتونا اللي يشوفكم يقول محد تزوج الا انتم
شريفه: وش فيتس روعتيني بتطمن على تركي
سلمى: انتي يمكن معتس عذر لكن هالشينه اللي جنبتس وش وضعها ريوفوه ترا هذا هو بالمجلس جنبتس
ريوف : وش عليتس انتي اراسل على حسابتس
لطيفه ضحكت:خليهم ريوف وفايز انا غسلت يديني منهم ذبحتهم الخقه على بعض
سلمى ضحكت: يا زين اخوي ومرته العاقلين
اديم ضحكت بخفه : اووه على طاري العقل خليني اروح اخمد قبل يطير عقلي من النوم
سلمى: كلنا بنخمد متنا تعب
طلعت اديم بعد ما سكرت كل الانوار عليهم دخلت غرفتها بس ماحصلت مطلق وهي مقهوره انه طول اليوم ولا فكر حتى يراضيها على كلامه انسدحت بتعب وتلحفت
................••............
في الحوش
عند هايف اللي كان ملاحظ ان ابوه طول الوقت يدقه بالكلام وشاك انه كاتب الكلام لكن مطنش كان منسدح وهو يسولف مع مؤيد وفايز ومحسن وحسين وزيد ولكن مطلق كعادته ساكت ووقف وهو ياخذ اغراضه وهو يشوف المكان زحمه مع العيال
هايف: للله مطلق ودع نومتنا
فايز: والله ما الومه فيكم
مؤيد: والله يامطلق انت صح سيب هالمجانين وروح مع زوجتك احسن لك
مطلق ابتسم وهو بس يبي يقهرهم : اول مره تقول شي صح يا مؤيد
مؤيد:عشان تعرف اني كويس
هايف: رووح روح كلنا معطينك الحق لو اني متزوج والله ما اقعد معهم والله
ضحك مطلق : يلا يلا
راح مطلق متجهه لغرفته دخل وهو مستغرب ان اديم نايمه بلحالها ولا بعد نايمه فالظلام حس ان زعلتها قويه قرب وهو وده يصحيها بس تراجع وهو يبدل وانسدح بهدوء وهو معطيها ظهره بعد ماشغل اضاءه خفيفه وهو اللي يكرهه ينام وفيه نور بس تعود من اديم
اديم اللي كانت بين النومه والصحوه وهي ماصدقت انه يجي جلست وهي ماتشوف الا ملامح ظهر مطلق
قالت بهمس نعسان : مطلق
فز مطلق ولف عليها : انتي صاحيه احسبتس نايمه ، يوجعتس شي ، كيف الحرق ؟!
اديم :لا مايوجعني شي وحطيت المرهم وخف مره
مطلق : طيب وش فيتس صحيتي ! اكيد انتس خفتي والله اني مستغرب من الظلام
اديم : لا ماني خايفه بس بقولك شي
مطلق اللي كان متكي على يده : وشو ؟!
اديم وهي خايفه انه يرفض : بكره بروح مع اهلي
ثقل جسم مطلق على يده وزلقت رجع يستند عليها من جديد واختبص ما توقع ان زعلها لذا الدرجه ما توقعها ابد بترجع وتزعل من كلمه ما كان قاصدها
اديم كانت تناظره وهي منرعبه من نظرته اللي تبدلت ولا فهمتها
مطلق : شلون بتروحين مع اهلتس !؟
اديم : بروح معهم يعني بروح معهم لبيتهم
مطلق اعتدل بتوتر :انتي صاحيه! بتزعلين وبتروحين عشان كلمه فهمتيها غلط وبدون قصد
اديم جت بتتكلم ورفع مطلق يده بإعتراض : لا تقولين لي شي عن زعل تافهه انا قلت كلامي وانا اقصد إن انتي المصيبه اللي مااعرف كيف اتعامل معها مب عن انها سيئه لا عن اني ماني متعود عليها و لا قصدت ازعلتس ولا اغلط عليتس وافهمي هذا الموضوع كذا وانسي مسألة انتس بتروحين مع اهلتس
اديم اللي ما عرفت كيف ترد وهي كل ما تحاول تتكلم يسكتها مطلق بغضب وزعل
................••............
اما في مطبخ ابو زيد
كان زيد جالس مقابل ميثى اللي تعبانه وام زيد عندها وتصلح لها مسكن وجات : خذي يا بنتي اشربيه وان شاء للله تخف عليتس السخونه
ميثىى بتعب : مابي يا خالتي احس اني برجع اي شي اكله الله يسعدك لا تعطيني شي
زيد اخذ الكوب من يد امه : يا ميثى يا حبيبتي ما بترجعين شي بس انتي لا تخافين اشربي شوي بس لين تخف حرارتس وبعدين اذا ما خفت نروح المستشفى
ميثى:مابي يا زيد
زيد: عشاني يا بنت الحلال
اخذته ميثى اللي هالمره كانت تعبانه مره وزيد يداريها وام زيد تتأملهم بحب وهي اللي تحمد ربها ان ربي عطا عيالها هالحنيه وابعدهم عن قسوة ابوهم ................••............
في الطرف الثاني من الحوش
كان فايز وريوف جالسين وهم عايشين ليل العشاق بتفاصيله ويعتبرون هم الاثنين افضل قصة حب نجحت من بعد زيد وميثى وفايز اللي كان يشرح لريوف امور الحفله اللي بيسوونها لهم ويعزمون اصحابهم ................••............
بالمجلس
كان هايف اللي يسمع من سوالف مؤيد الربع والباقي يفكر كيف يصلح بين ابوه وابو نجد ولكن صحى هايف من تفكيره على صوت ابوه الغاضب : انت وياه وراح ماتمرحون تخلون الناس يمرحون
مؤيد اللي انخرش ودخل فراشه وتغطى ونام وهايف بعد نفس الوضع بس من اللحظه اللي حط راسه فيها راسه نام ولكن ماكانت نومة التعب خاليه من احلام هايف الورديه
................••............
في غرفة مطلق
مطلق اللي رجع ينسدح وهو مايبي يسمع موال ان اديم بتروح مع اهلها لكن لف بصدمه على صوت بكى اديم اللي قالت بقهر فيها من زمان : ياخي انت ليش كذا !من قالك بروح مع اهلي لاني زعلانه ومن قالك اصلا اني زعلت ! اييه يمكن فهمتك غلط لكن انا بروح عشان امي مسويه حفله لي لكن ماعاد ابي اروح لاي شي ولا ابي مكان ولا انضرب على قلبي خلاص ارتحت الحين
رجعت تغطت وهي ودها تلف وتضربه كف
اما مطلق اللي انصعق غمض وهو يشد ذراعه بغضب ( اااه منك يا ذا المطلق ما تتوب لين تحوس كل شي اااه )
اعتدل وغمض جلس فتره يرتب كلامه ومد يده يسحب اللحاف : اديم قومي وكلميني
اديم ماردت عليه سحبها مطلق بخفه: يا بنت الناس ترا اعصابي مب ناقصه وش دراني انا إن امتس مسويه حفله انتي ماقلتي الا بروح مع اهلي وتوقعت انتس زعلتي
ماردت اديم مطلق :يا شيخه حقتس علي خلصنا عاد
اديم نفس الموقف
مطلق : ادييييم انا اكلمتس
اديم لفت : وش اقول اخاف اقول شي وبعد تاكلني
مطلق ابتسم : ماني باكلتس قولي اللي تقولين بسكت
اديم : خلاص ماعندي شي
مطلق تربع وهو يقابلها : امسحي دموعتس اول شي وبعدين علميني السالفه كلها
اديم مسحت وجهها : مافيه سالفه الا ان امي عشان الزواج كان بالديره قررت امي تسوي حفله تعزم فيها صاحباتنا وصاحباتها وجيرانا معارفنا عامه وانا ما ابيك تطق مشوار على الفاضي قلت اروح مع اهلي واريحك بس انت الله يهديك
مطلق اللي ابتسم ابتسامه عريضه :والله اني مدري وش اقول ادري اني خبصت لكن عاد العذر والسموحه وليتس شرحتي من البدايه زين عشان افهم وبعدين ما دامني زوجتس ما تقولين بروح مع اهلي تقولين يا مطلق انت ودني وتبشرين وعلى خشمي ولا اربكتيني واربكتي نفستس
اديم كان ودها تهاوش بس ماقدرت وهي تشوف مطلق يعتذر منها : ما انتبهت
مطلق :متى الحفل
اديم : بعد يومين
مطلق :معناته ننتظر ليوم الحفل وانا اوديتس للحفل بنفسي
اديم : بس
مطلق : وشو ؟!
اديم : يعني في اشياء تحتاجني امي اسويها معها وتبيني اروح معها من بدري يعني اذا رضيت انت
مطلق ابتسم :يعني تقولين امري منتهي
اديم : لاا بس اعلمك عشان ماتقول ماعلمتيني
مطلق : زين زين اجل تم بس انا اللي اوديتس
اديم ابتسمت : تم
مطلق : ايييه كذا خليتس تضحكين ولا تقعدين تبكين
اديم : بحاول اخذ هالوصيه بجد
مطلق اللي رجع لمكانه وهو يتلحف : ابد لا تفكرين حتى فيها نفذيها فوراً
اديم : ابشر
كل واحد رجع لمكانه وكل واحد مبتسم عكس بداية اليوم
اديم كانت ماهي مستوعبه كيف توصل لقمة ازعل من مطلق وفي ثواني بس يراضيها واغلب الرضا هواش بس ترضى
اما مطلق اللي ما طرى له بهالحاله الا بيت واحد بس
‏إليا ضحكت ، تضحك معها النسايم
‏وتعمّ على الدنيا هبوب المسرات.
مايدري له تذكر هالبيت بس هذا اللي يحسه كل ما التفت وشافها مبتسمه ................••............
من بكره الصباح في السوق
هايف اللي من الصبح وهو مع فلاح ويتمشون بالسوق
هايف : فلاح الحين وش املاك ابو نجد اللي هنا فالديره
فلاح: محل الذهب وبيته اللي ساكن فيه وبيته القديم ! ليه تسأل
هايف: مدري مستغرب تاجر ذهب ما عنده املاك
فلاح ضحك : اوووه اوه وش يبي تاجر الذهب بهالديره الفانيه
هايف: لو عندي فلووس والله املك نجد كلها
فلاح: هههههههههههههههههههه اجل حمدلله انك مطفر
هايف لف على نويصر اللي جاء يركض ووقف عنده كان متوقع هايف هجوم بس انصدم بنويصر اللي تحضن ذراعه : معك حلاو
هايف ضحك : معي كل شي تبيه
نويصر : عطني
هايف: تعال بنروح البقاله
راح هايف ونويصر اللي فرحان وهايف مبتسم
.................••............
في بيت ابو زيد
كان زيد يتجهز انه يروح لبيته
ام زيد : طمني اذا وصلتوا وعلى طول روحوا المستشفى
زيد اللي كان شايل عبود : ابشري ابشري
سلمى: تكفى اترك عبود عندي
زيد: وين يا سلمى عبود ما يعرف ينام الا مع امه
سلمى: تكفى تكفى
ابو زيد:خله عندها وانت يادوب في امه مريضه وتعبانه
ميثى: خلاص اتركه عندها
نزل عبود من حضن ابوه يركض لسلمى بفرح: ايه تكفى بجلس
زيد: اييه عشان يزين له الدلع
ابو زيد: خله خله وش عليك انت
ابو فايز : حنا بعد بنمشي معك يا زيد
ابو زيد: ما كنه بدري
ابو فايز: ورانا مشاغل
مؤيد: ونحنا بعد ابويا عنده ضيوف بنروح له
طلعوا كلهم يجهزون ومن بعدها راحو كلهم ومطلق اللي توه يرجع من العزبه شاف عبود : وين الناس
سلمى كلهم راحوا
مطلق : وزيد !
سلمى: ايه زيد ميثى تعبانه وطلبته يخلي عندي عبود
مطلق: وهايف
سلمى: مدري راح مع فلاح
مطلق : ايييه اجل عبود عندنا
سلمى: اييه بيسليني دام اديموه بتروح بعد
اديم طلعت من المطبخ وهي معها فنجال قهوه بضحك: ابرك يوم افتك فيه من وجهتس
سلمى بمزح: فكه يا ربيييي نبي نعيش براحه
مطلق : عطيني قهوه يا اديم
بحركه عفويه اعطته اديم فنجالها : خذ هذا لين اسوي جديده
مطلق اخذ الفنجال وجلس وهو يسمع سوالف امه وسلمى واديم اللي تشاركهم ببعض المواقف
................••............
في السوق
عند هايف اللي بعد ما اشترى لنويصر طلع يتمشى وهو يدور اي شي يوصله لاملاك ابو نجد لكن صدفته اعظم املاك ابو نجد ( نجد )وامها اللي كانوا بالسوق
اخذ وقت هايف وهو يمر من قدامهم كذا مره عشان تنتبه له نجد واخيرا انتبهت وابتسمت وهي تترك الي بيدها وتقدم هايف مبتسم وهو يأشر لها بيده (��) يعني اذا هي بخير ورجعت له اديم الاشاره ببتسامه وهم حريصين مايلفتون انتباه احد
لفت ام نجد: نجد روحي للكهربائي جيبي منه الفرامه بسرعه
نجد : طيب
هايف عرف وجهتها وسبقها لكهربائي وهو يقول لسوداني: عثمان وين مكنسه جابتها امي لك قبل فتره
عثمان: اخذتها االوالده
هايف: لا ما اخذتها دورها
نجد جات وهي توقف بعيد شوي: لو سمححت في فرامه بأسم ام نجد خلصت
عثمان: شوي وتخلص
وقفت نجد يسار المحل تنتظر وهايف بالنص وكان يشغل عثمان عنه لين قدر يقول :امس ما كنت عند الشباك انتظرتس تطلين ماطليتي
نجد وهي تحس بحرج : نمت بدري
هايف : نوم العوافي
نجد: للله يعافيك
هايف بعد صمت وبعد تردد قال : عندي احساس ايام وينتهي هالبعد ايام ان شاء لله ونجتمع ولازم احصل حل لابوي وابوك
نجد: وشلون بتحصل حل
هايف : لا تتعبين عقلتس بهالتفكير انتي بس حبيني وخليتس على وعدنا واتركي الباقي علي
نجد تجمد قلبها وحست بإرتباك بخوف وحب وكل المشاعر مرت بها
لكن قطع هالموقف اللي افعم قلوبهم بالحب عثمان اللي قال وهو يضرب الفاتوره قدام هايف : يااربي يا هايف انت ما داير تفهم هاذي فاتوره الوالده شالت المكنسه وراحت ماهي عندي
هايف اللي ارتعب من خبطته ورجع براسه ورا: خييير يا زول خلاص صدقناك وش بلاك قلبت علي
عثمان: ازعجتني
هايف ماعطاه اهميه ولف ببتسامهه لنجد اللي اخذت الفرامه وطلعت
وافترقت طرقهم واتجهه هايف لبيتهم يتسعد انه يرجع للخبر ................••............
في بيت ابو زيد
كانت سلمى لاهيه مع عبود وام زيد اللي تقرا قرآن اما اديم للي كانت ترتب شنطتها ومطلق للي كان جالس مع ابوه اللي اخيرا رضا على محسن وقاله يجيب اوراق البيت اللي يبيه وطلع محسن فرحان
ودخل هايف بداله: اووه وين الناس
مطلق : الناس راحوا وانت مختفي وينك؟
هايف: كنت مع فلاح
ابو زيد بطرف عين:اللي يشوفك يقول ما وراك طريق تسعسع مع فلاح
هايف: معي وقت يا يبه
ابو زيد: اييه ودك انك تمشي مع الليل بس معصي قم جهز اغراضك وامش قبل يمسي الليل
هايف: ابشر بس اتقهوى
انسدح ابو زيد وهو يتلثم بشماغه وعصاه قدامه يبي يريح شوي اما مطلق اللي دق هايف برجله يأشر له يقوم
اخذ هايف الدله وفناجيل وطلع قدام الباب : هاه وش فيك
مطلق : العصر بطلع للمدينه وقلت أسال اذا لابو نجد املاك مشتركه بينه وبين ابوي
هايف: تسأل من!
مطلق : عمي
هايف: اخاف عمي يعلم ابوي
مطلق : لا ما عليك ما بيعلم خصوصا انا لانه يدري اني ما اسوي شي الا وابوي يدري
هايف : اجل شد حيلك بس وش عندك بتروح لعمي وهو توه راح
مطلق : اديم امها مسويه لهم حفله وبتروح هناك
هايف: ياحبك للمشاوير كان خليتها تروح معهم
مطلق: هي محسوبه علي مستحيل اخليها تروح مع احد غيري
هايف : براحتك
................••............
بعد الغداء مشى هايف كالعاده للخبر
لكن في راسه الحل اللي بيتوقع انه يجمع ابوه وابو نجد
ومطلق اللي طلع راح للغرفه وهو يشوف اديم تجهز اغراضها جلس
اديم: بعد العصر بنمشي صح
مطلق: ايه
ناظر مطلق الشنط ولف : هاذي كلها ييومين
اديم : ايه يعني فستان الحفله والمكياج والخرابيط
مطلق ماعطى تعليق وهو ماتهمه هاذي كلها لكن سند راسه وغمض ولا يدري كيف اختطلت كل الطيوف بعقله ولا يدري كيف دخلت هيفاء لحلمه السرييييع وهو من زمان ماعاد يحلم بها
فتح عيونه بقوه وفز بغضب وهو يناظر حوله
اديم: بسم لله عليك وش فيك
مطلق وقف وهو مقطب حواجبه ويناظر اديم بإستغراب لكن مد يده يدلك جبينه : مافيني شي
طلع وقف عند الباب وهو يلتفت يناظر اديم ويناظر زوايا هالغرفه اللي مايدري كيف صار يشوفها بأشياء قديمه وحياه قديمه
لف على صوت سلمى : مطلق علامك واقف بالشمس ناوي تنتحر
مارد مطلق اللي راح وتركها واقفه تناظره دخلت سلمى: اديموه علامه !
اديم:مدري جلس عشر دقايق وهو مغمض وشكله غفى وحلم وفز وهو كذا
اما مطلق اللي كان غضبان انه كيف ترجع له ذكريات هيفاء وهو اللي قدر يرميها بعيييد من فتره من قبل حتى يتزوج ويرتبط كيف وهو حتى صار مايفكر بها مثل قبل اجتاح قلبه رعب غريب مايدري وش مصدره
................••............
في الطريق
عند هايف اللي بعد ما دخل المدينه وقبل يطلع للخبر اجتاحه شعور قوي حاول هايف يطنش ولا يطيع قلبه بس عجز ولا قدر يتجاهله رجع بطريقه وهو يحس مع كل كيلو قلبه يدق على المغرب وصل لخط اللي يوديه ديرتهم وقف بعيد شوي وتلثم ودخل وهو ووجهته واضحه اتجهه للجهه الخلفيه من بيت ابو نجد وبسرعه ومهاره متعود عليها هايف نط لحوش ابو نجد ماكان ابد راضي على اللي يسويه بس قلبه يحترق قلبه مصر يرجعه مايدري ليه هالمره وده يودع نجد وداع كبيير “ او يمكن وداع لعذاب الحب من بعيد ، وهو في نفسه متاكد انها اخر ايام العذاب وبداية لحب حلال يجمعهم “
صد وهو يمسع ام نجد اللي تلبس عبايتها : اسمعي يا نجد سكري الباب زين وانتبهي حنا بنتعشى ونجي
ابو نجد اللي طلع يضبط شماغه : ورا ما تروحين مع امتس انتي
نجد :وين اروح يبه كلهم عجايز
ابو نجد : المهم اذا صار شي ترانا في بيت ابو راضي
طلعوا وهم معزومين في بيت ابو راضي ونجد اللي رجعت وهي تدق اصابعها بملل : يا شين الملل يا ليت هايف ما رجع للخبر كان مونسني
هايف اللي ورا الجدار ابتسم بحب : يا جعل هايف فدوتن لتس
نجد لفت بصدمه ورعب : من ذا
هايف ابتسم: هايف
ركضت نجد وهي تاخذ طرحتها واقرب شي عندها بشت ابوها الثقيل وتغطت وهي للحين مصدومه: هايف وش جابك وش فيك؟!
هايف طلع وهو للحين يتقطع كلامه من دق قلبه : عجزت اروح عجزت اطلع من الرياض قلبي ما طاوعني ابد وانا ما ودعتس
نجد ابتسمت : بس تلاقينا بالسوق
هايف : وهذاا يعتبر وداع
نجد ضحكت : وش فيك مصر على الوداع لا تخوفني
هايف ابتسم وهو وواقف بعيد عنها ومتكتف ومعطيها ظهره : لانه بيكون وداع لايام الشقا والحب من خلف الشبابيك ان قاله الله ايام بسيطه بس وما يحتاج اودعتس بالعكس بحط يدي بيدتس واخذتس زوجه لي
نجد اللي طار قلبها من الفرح وعجزت ترد كان ود هايف يحتضنها بكل قوته الا وده يدخلها بين ضلووعه وكان يقاوم هالرغبه كثير لكن ما قدر يمنع يده اللي امتدت تشد بكل قوه على يد نجد من ورا بشت ابوها : يا كثر ما ودي اخطفتس وادخلتس بين ضلوعي وتعيشين في صدري بعيد عن هالدنيا الدنيه ولكن ما بيدي الا اني يدي تشد على يدتس ولكن ترا قلبي عندتس وبين ضلوعتس واودعتس الله يانجد انتبهي لنفستس وانتبهي لي معتس
ماقدرت نجد ما تحط يدها اليسار على يده لكن بين يدينهم فاصل وهو البشت اللي يمثل ابو زيد وملكية البشت لابو نجد
حس هايف ان قلبه شوي ارتاح وكأن يد نجد تشد على قلبه ابتسم : طيب خليني اروح احسن لان يدي نشبن عجزت اشيلها واتركتس
نجد سحبت يدها بإحراج وهي تحمد ربها انه مايشوف وجهها والا ضحك من ملامحها الخاقه
طلع هايف وهو يلتفت لها لما طلع من الديره ركب سيارته وهو شعوره يمشيه لين وصل الخبر بدون ما يحس وهو كل خليه بجسمه تنبض والللله تنبض
................••............
عند مطلق
اللي من بعد هاللي صار وهو مختبص وساكت وجامد ركبوا السياره وهو ساكت وصوت الاغاني خفيف لكن الصمت اعلى
اديم كانت مستغبره سكوته وهدوءه مدت يده تهز كتفه بهدوء: مطلق فيك شي ! يوجعك شي
مطلق ناظر يدها بهدوء : مافيني شي ليه وش فيني
اديم :مدري ساكت من اليوم مدري وش فيك
مطلق : لا لا بخير مافيني شي
رجعت اديم تسكت وهي تخاف تقول اي كلمه وهو معصب ويرجع الديره
وصلو بيت ابو فايز نزل مطلق اغراض اديم ودخل مع ابو فايز للقهوه وهو يحاول يسأله عن املاك ابو نجد ورد ابو فايز الوحيد هو :كانت لهم املاك مشتركه بس الظاهر باعوها كلها اول ماصارت المشكله ! وليه تسأل
مطلق : اسمعهم يتكلمون بالديره عن محل ابو نجد وتذكرت الاملاك ، المهم انا بتيسر
فايز: تعشى عندنا
مطلق : بالعافيه بس ناد لي اديم قبل اطلع
راح فايز ينادي اديم اللي رجعت بسرعه : هلا
ماكان بالمجلس الا مطلق اللي يفتش في بوكه: تعالي
قربت اديم ومد مطلق يده ليدها وهو يحط فيها فلوس : خذي هذا مصروفتس هاليومين واذا احتجتي زود علميني
اديم : لا لا ماتقصر تكفيني
مطلق : يلا اجل
لف بيطلع بس ركضت اديم وهي تمسك كتفه : اسمع
مطلق : سمي
اديم ابتسمت : اذا كنت تعبان ولا فيك شي روح المستشفى لا تمسك طريق وانت تعبان
مطلق : ابشري
طلع مطلق وركب سيارته ولف واديم على الباب تنتظره يروح : هاه جايزه لتس وقفت الباب
اديم : هاه
مطلق بحده : ادخلي قبل يجي احد يشوفتس
اديم ضحكت : طيب
تكتف مطلق ينتظرها لين تدخل وبعدها راح
.
.
.
انتهىâ™¥

5 - 11 - 2024, 09:35 PM

مساء الخير..
البــارت الخــامـس والعشــرين..
.
.
.
في بيت ابو فرج
ابو فرج اللي كان للحين بتأثير الصدمه من خلاف ابو زيد وابو نجد جالس مع العيال بس تفكيره بعيد
مشاري بهمس لسعود: لا تقولي وسوسه ما وسوسه ما جلس يفكر الا فيه شي
سعود اللي محتضن عزيز : والله مدري وش اقولك
مشاري : الله يجيبك ياهايف
في ذا اللحظه دخل هايف : مساء الخييييير يا وجيه الخير
الكل وقف يرحبون فيه وهو يسلم عليهم بحراره واتجه لابو فرج وهو يبوس راسه: كيف شايبنا
ابو فرج اللي كان يناظر هايف وابتسامته بضيق : هلا يا حبيبي هلا
استغرب هايف حضن ابو فرج له لكن شد عليه وهو يجلس :وش اخبارهم
متعب : بخيير انت كيف وضعك
هايف اللي يحس انه فوق الغمام : في احسن احوالي
مشاري ضحك: اول مره تجي من الديره مسفهل
هايف ضحك: ما كسبت من الضيقه خير
ابو فرج: كيف ابوك والدديره وعمك
هايف: حمدلله من احسن ما يكون
وليد: اجل تجهز لملكتي الاسبوع الجاي ولا تروح لديره
هايف ناظره بهدوء : خير ان شاء للله
ام فرج : هايف حمدلله على السلامه
هايف: الله يسلمتس ياخاله وشلونتس انتي طيبه
ام فرج: حمدلله ، يلا تعالوا للعشاء
طلعوا للعشاء وبعد العشاء طلع هايف ومشاري برا
مشاري: هاه وش قالك ابو فرج
هايف: نفس اللي انت قلته
مشاري: وانت مقتنع
هايف: مافيه الا هذا وبيني وبينك ماعاد ابي انبش والسالفه والواضحه والحل لقيته
مشاري: وش حلك؟!
هايف : من بكره بقدم في قرض من البنك وغير القرض بطلبهم يشترون لي ارض يعني بشتري ارضين بجنب بعض واعطي وحده لابوي وحده لابو نجد
مشاري: توقع هذا حل
هايف : بيتراضون طيب ولا غصب وتراهم تعبوا من القطاعه والهجر واذا ما تراضوا رحت جمعت كل شيوخ القبايل ورحت خطبت نجد واخذتها ورحت
مشاري:خلك على حلك الاول يمكن ينفع
................••............
من بكره
في الخبر
هايف قدم طلبه وينتظر الموافقه الاسبوع الجاي ومطلق حالته واضحه وومختبص من بعدطاري هيفاء وهو بس مشغل نفسه او ساكت
وسلمى اللي انشغلت عنه بعبود ولا هي فاضيه ابد
اما محسن اللي اخذ ابوه واشتروا البيت وبدا يأثث عشان يرجع اصايل
اديم كانت مشغوله مع اهلها بس مستغربه حالة مطلق الاخيره .................••............
اما في بيت ابو نجد
اللي كان عنده ابو راضي وولده راضي
ابو راضي : والله يا ابو نجد حنا جيناك عانين وراجين إنك ماترد طلبنا
ابو نجد : افا ابشروا وامروا
ابو راضي : انت تعرف راضي ولدي ركضت به السنين وكبر ويبي يعرس ودورت بالديره احس من بنتك نسب وجاه ما لقيت وجيت بخطب من عندك وطامعين بعطاك
انصدم ابو نجد واعتدل وهو يناظر راضي اللي فعلا كبر وصار تاجر كبير ويشرف اي احد يتزوج من عنده: والله راضي مثل ولدي ويشرفني انه يتزوج بنتي ورجال ونعم وسبعة انعام لكن الحقيقه اني تفاجأت
ابو راضي : ابد لا تفاجئ وتعرف ان بنتك مثل بنتي وتبشر بالبيت اللي تبيه وتطلبه وبالمهر اللي تبيه وكل شي تطلبونه تم وابشر ولا عندنا مشكله في اي شي
ابو نجد :والله ما تقصرون ونعرف معدنكم والطيب وحنا نشتري الرجال بأفعاله ماهي بفلوسه
ابو راضي: ان شاء لله خير ونبي عاد نشوف وش قلت
ابو نجد اللي فكر ان نجد مع راضي بتكون عايشه بعز وبيحطها في امان وخصوصا ان مالها احد و خايف يموت يتركها وحيده وراه وراضي فيه مواصفات اي رجل تمناه البنت لكن
قال بدون تردد : تم وعطيتكم يوم الله عطاكم
ابتسم راضي وضحك ابو واضي بفرح : هاذي والله الساعه المباركه والف مبروك
ابو نجد ببتسامه: لله يبارك فيك
راضي : تاكد انك حطيت بنتك في ايدي امينه
ابو نجد : لا شك لا شك
ابو راضي : عاد يا ابو نجد تدري بوضع راضي والايام الجايه عندنا شغل كثير في جده وودي ابكر العرس والعرس يكون هنا بالديره وش قلت
ابو نجد: ابد ماعندي اعتراض وفي ديرتنا بين اهلنا ويحضرون معنا ويفرحون معنا
ابو راضي: هذا اللي انا اقوله بس انت قلي قبل متى تحب يكون العرس
ابو نجد :والله اللي يناسبكم
ابو راضي : والله حنا بيت راضي جاهز وكل شي من اكلمه وواذا ما عندك مانع نخليه يوم الجمعه
ابو نجد اللي حس انه قريب بس من احكام العادات والتقاليد ان بعد الخطبه مايطول الزواج وغير هذا والاهم ان البنت ما ينأخذ شورها دام ابوها ادرا بمصلحتها وزواجات اهل الديره بسيطه فوق ذا ابو نجد ما عليه الا يجهز بنته عروس وهو يدري انهم يقدرون يخلصون كل شي في اسبوع: على خير
طلع راضي دفتر الشيكات وهو يكتب مهر نجد لابو نجد مية الف ريال
وبعد اتفاقات معتاد عليها طلعوا راضي وابوه ودخل ابو نجد ينادي نجد وامها
ام نجد : وش يبي ابو راضي
مد ابو نجد لنجد الشيك: خذي
نجد اخذته وهي تناظره ووقفت
ابو نجد: وين بتروحين
نجد اللي متوقعه انه من شغل ابوها: بحطه بخزنتك مب ذا شيك شغل
ابو نجد ببتسامه:لا هذا مهرتس
ام نجد فزت : هاه وش مهره وش السالفه
تركت نجد الشيك وطاح : وشو !!!
ابو نجد وهو مبتسم: اليوم ابو راضي خطب نجد لولده راضي وانا شفت انه رجال كفو والنعم ومقتدر وعطيته نجد يوم الله عطاه والعرس الجمعه
ام نجد اللي وقفت بفرح: عشان كذا تسأل ام راضي عن نجد ، بس ما كن الجمعه قريب والعرس مستعجل
ابو نجد: لا لا فيها بركه والحين نجهز ونروح المدينه وتاخذين بنتس وتجهزينها بأحسن مايكون وبعدين الرجال شاريها ومستعجل لانه ماعاد يقدر يجلس هنا اكثر من اسبوع والخيره في ما يختاره الله
نجد كانت مصدومه تناظر ابوها وامها وهم يتكلمون وكإنها وافقت وانتهى الامر قالت ببكي: من قالكم اني ابي اتزوج راضي اصلا انا مابي اتزوج مابي
ابو نجد رفع راسه بغضب: وقص يقص لسانتس ياللي ما تستحين من اخذ رايتس اصلا العرس تحدد وانتهى وبعدين احمدي ربتس إن راضي خطبتس البنات كلهم يتمنونه
نجد : بس انا مابيه ولا اتمناه
ابو نجد : اها بس عقلي بنتس يا مره وفهميها زين وهي ماهيب بزر نغصبها على شي
وقف ابو نجد وطلع ونجد تناظر امها ببكى : والله مااتزوجه والله لو اذبح نفسي سمعتوني
ام نجد : اقول اسمعيني زين يا خبله وش اللي تذبحين نفستس اللي مثلس يفرح ويرقص ويغني ادري انتس خفتي عشان العرس بدري بس معليه يمه كلنا تزوجنا بسرعه لكن ربي بارك لنا اهدي ولا تسرعين
نجد سكرت اذانها بقهر وهي تصرخ: ماااابي شي مابي اتزوج تكفون مابي ماااابي
ام نجد : اقول اسمعيني بس اعقلي وخلي ابوتس راضي عليتس ترا ان عصب بيذبحتس وتزوجي برضاتس لا يزوجتس ابوتس غصب عليتس فهمتي
طلعت ام نجد وتركت نجد اللي تبكي بحرقه توها للحين ما نست موقف هايف توها الحين تنتبه ان هايف كان معه حق يوم رجع عشان يودعها كان عنده امل انها بتكون زوجته كيف بتكون زوجة غيره كيف؟؟؟!
بكت بكى عمرها ما بكته وهي ماهي متخيله ابد ابد ابد انها تنحط بهالموقف
كان عندها امل ان ابوها اللي يحبها مستحيل يسوي بها كذا طلعت للحوش وهي تنتظر ابوها ببكى
................••............
في بيت ابو زيد
عند مطلق اللي كان منسدح بغرفته
وتفكيره يروح ويجي وقف بغضب وهو ياخذ نفس يشتت كل افكاره مد يده يحوس شعره ووقف فتح الشباك وهو يشوف نويصر بنفس المكان لا شعورياً ضحك وهو يفكر لو اديم فيه كان في ذا اللحظه بتكون متعلقه بكتفه سكر الشباك ورجع يمشي بالغرفه وهو في كل زاويه يحصل لاديم شي ناظر جواله وهو متكتف وهو يفكر "يدق ولا مايدق "
ناظر ساعته يشوف الوقت : اكيد نايمه
من يوم راحت مادق مطلق وهو مايدري لو دق وش بيقول لها حاول انه ينام بس مافيه فايده واخذ لحافه وطلع للمقلط وانسدح بجنب حسين اللي ما درا به ضحك وهو يناظر حسين : اللهم يتمم راحت البال عليك يا حسين ................••............
من بكره يوم الحفله في بيت ابو فايز
اللي كانوا مشغولين مره عشان الحفل
كانت ريوف تنتظر امها وسلمى وشريفه يجون عشان يجهزون معها
واديم اللي كانت مشغوله وتكشخ ماكانت مستغربه عدم اتصال مطلق اصلا لو دق بتفاجئ ولطيفه مثل حالها
اما فايز وابو فايز اللي كل واحد جواله بيده وكل واحد يرتب شغله اللي عليه ................••............
اما في الديره
في عند ابو زيد اللي بعد ما قفل المحل وكان بلحاله ورجع لكن وهو راجع يسمع طراطيش كلام وقف وهو يقول : حميد تعال تعال
حميد : سم
ابو زيد :وش ذا اللي يتكلمون به الناس عرس من اللي الجمعه
حميد ضحك وهو بيده صينية الشاهي : عرس راضي ولد ابوي راضي
ابو زيد: ماشاء للله بيعرس وبذا للسرعه على بنت من !؟
حميد: بيعرس بسرعه عشانه بيروح جده يقولون الميناء عندهم مليان بضايع مشرف عليها راضي وصفقة بينهم وبين الدوله مافيها لعب وتعرف الله معطيهم ومعرس على نجد بنت ابو نجد
ابو زيد انصدم: هاه نجد ما غيرها !؟
حميد: ايه نجد ماغيرها
ابو زيد: وعطوه !؟
حميد: ايه ايه عطوه وهذا هم يزهبون للعرس
ابو زيد راح وترك حميد وراه وهو منصدم ان نجد هالصغيره بتعرس والبلا لو درا هايف اتجهه للبيت وهو يفكر بذهول راضي رجال كويس وينفع بس هايف لو عرف ما بتمشي الامور بخير احتار وش يسوي ولكن سرعان ما تبدل ذهوله بتفكير عميق ( هذا افضل شي وهذا حل من ربي يريحني ويفكني من المشاكل والنشايب خلها تزوج والله يستر عليها)
دخل البيت وهو يسكر الباب وحريص ان محد من اهل البيت يسمع
وشاف حسين ومطلق اللي ما بعد طلعوا ولا يدرون وش صاير برا وام زيد وسلوى وعبود يجهزون
ابو زيد: يلا يلا خلصوا خلصوا بنمشي
مطلق ناظر ساعته : بدري يا يبه
ابو زيد: ماعاد بدري يلا خلصوا
سلمى ركضت وهي تعطي مطلق عبود: تكفى خذ لبسه عشان اجهز
مطلق : وش اللبسه معرف
سلمى: تكفى يا مطلق
رمت على مطلق الملابس وراحت وعبود يناظر مطلق : يلا يا عمو برد
قرب مطلق يلبسه وهو انشغل بعبود وابو زيد يراقبه بهدوء ( اييه هايف لازم ما يدري واهم شي مطلق مايدري لانه ما بيسكت ولا بيخلي هايف يسكت وين اوديك يا مطلق )
وقف ابو زيد: مطلق خلص وتعال بسرعه
مطلق اللي مايدري كيف لبس عبود بس لبسه تركه ووقف متجهه لابوه : سم
ابوزيد : اسمع زهب لك اغراض معك وتراك بتطلع للاحساء بعد الحفل
مطلق : الاحساء لييه !؟
ابو زيد : تبي تروح لابو هيثم وتستلم منه البشوت والمشالح الجديده ولا ناسي ان ذا وقتها
مطلق : والله اني ناسي
ابو زيد: المهم خذ اغراضك وان كان بتاخذ معك اديم بعد زين على زين تمشون وتخلصون على ما تشيك على البضاعه وتشوفها
مطلق ناظر ابوه با ستغراب ولا قدر يتعرض اول ماقال ابوه : يلا يلا وانا ابوك اعجل علينا
راح مطلق لغرفته وهو مستغرب يدور اغراضه ويحوس وبالقوه جهزها بعد مساعدة سلمى وبعد نص ساعه كلهم ركبوا وكلهم اتجهوا للمدينه
حسين: مدري الديره اليوم فيها حركه غريبه
مطلق : مدري ما طلعت من الصبح الا للعزبه
ابو زيد: وش فيها يعني ديرتنا هي هي ناظر طريقك وسبح ربك
سكتوا الكل وعلى صوت سلمى وعبود اللي يلعبون ويغنون كملوا طريقهم
.................••............
في الخبر
وعند هايف اللي كان يمشي مع مشاري وهم يلعبون دحوم وجلسوا بعد تعب قريب البحر
مشاري : هاه وش صار في اوراقك
ابتسم هايف : خلاص ان شاء الله الاسبوع الجاي كل شي بيدي
مشاري ابتسم وهو يخبط كتف هايف بحب : الله يتمم لك يا هايف
هايف : امين
قبل يتلفت هايف فز وهو يصرخ: لاااا لاا لا
لكن ما لحق دحوم اللي رمى جواله بالبحر وهو ييضحك وركض يحتضن مشاري
هايف اللي وقف يطل بالبحر وهو رافع ثوبه : حسبي الله على ابلييييسك يا دحوم
مشاري اللي كان يضحك وهو يطل معه : نسفه نسف
لف هايف على دحوم وهو يمسكه بخفه ورفعه فوق يهزه بضحك ومزح: لييييه يا دحوووم ليه ما لقيت الا جوالي
دحوم اللي كان يضحك ضحكات طفوليه وهو يمد يدينه لهايف ينزله نزله هايف
مشاري:راح الجوال راااح
هايف: يوووه والله مالي خلق ابد
مشاري: امسك سعود بأذنه يجيب جوال وشريحه
ضحك هايف ورجعوا متجهيين للبيت
................••............
في بيت ابو نجد
عند نجد اللي كانت جالسه بالحوش وهي تبكي وفزت اول ما دخل ابوها : يبه يبه تكفى يبه انا بنتك انا وحيدتك نجد ما ترضى تخليني اطلع من بيتك وكأني طالعه لقبري لا تطلعني ذليله وغصب علي ربيتني في عز ربيتني بنيتك المدلّلله ربيتني اكون بقوة نجد كلها لا تضيق نجد علي ولا تكسرني
ابو نجد اللي كان واقف بذهول وصدمه مايدري وش يقول وجلس على ركبته وهو يشد على كتفها : لا يا نجد لا وانا ابوتس انا ما اكسرتس ابد بالعكس انا اعزتس يا نجد يا بنيتي انا مانيب دايم حي لتس وانا ما وراي الا انتي وامتس ولو ربي اخذ مني امانته في يوم من الايام مدري وش بيصير فيكم واذا تزوجتي بيكون معتس رجلتس يوقف معتس ومع امتس ويعزتس عن الناس
نجد وهي من كثر ما بكت ترجف : بس انا توني صغيره يا يبه توني صغيره تكفى لا تزوجني
ابو نجد حضنها وهو يمسح عليها : الصغير تكبره الدنيا وودي يكبرتس الزواج ولا يكبرتس جور الايام قومي وانا ابوتس لا توجعين قلبي قومي تعوذي من ابليس وتاكدي اني ما وافقت الا ادري بمصلحتس ولو ادري انه بيذلتس مقدار شعره والله انه يخسي ماياخذتس بس بكره بتجين وتشكريني يا نجد قومي
نجد وقفت مع ابوها وهي للحين ترجاه لكن سحبتها امها وهي تمشيها بهدوء وجلستها بغرفتها وهي تقول : نجد ابوتس من غير شي همومه فوق راسه لا تصيرين انتي والدنيا عليه
نجد :وانا لا تصيرون مع الدنيا علي
ام نجد : ابوتس كل شي يسويه يسويه عشانتس لا تعصينه ويغربلتس ربي اعقلي واستخيري واتركي دلع البنات
راحت وتركتها ونجد اللي اخر حلولها بعد موجة بكى كسرت ضلوعها تتصل بهايف وتقوله ولكن سمعت ابوها يقول انهم بيطلعون للمدينه ركبت وهي تبكي وابوها اللي ضاق من صوت بكاها ولا في يده حل الا انه يهاوشها وتسكت
وصلت البيت واول شي سوته تدور رقم هايف برجفه
طلعته وهي تركض للجوال سحبته وهي تدق الرقم وكانت ترتجف تنتظر رده
لكن كان مغلق ودقت لين اندق قلبها بس كان مغلق
................••............
وفي الحفل
طبعاً وصلوا اهل ابو زيد ولكن الرجال طلعوا سيده للقاعه وبعد ما جهزوا الحريم طلعوا مع فايز وطبعا كانت حفله مرتبه من جميع الجهات وكانت سلمى وشريفه تايهين في ذا القاعه
سلمى ركضت وهي تمسك يدها: يمه اجلسي وين بتروحين
ام زيد:مدري ضعت ولا فيه احد اعرفه غير ام فايز وام فايز مشغوله
شريفه: لا ابشرتس جت عمتي حصه
التقوا على الطاوله وهم جالسين بذهول
اما ام فايز ولطيفه كانوا اكثر اختلاف عن الديره وكانوا يتصرفون بطبيعه حضاريه وقمة الرقي
اما ريوف واديم كانوا ينتظرون عشان يطلون وكان من المفترض يطلون هالعرسان معهم ولكن قالت ريوف ان مطلق بيرفض ورفض قطعي ومستحيل يدخل وقرروا يكنسلون وفايز اللي منقهرر وهو وده يمر وهو يده بيد ريوف قدام كل الناس
وبعد مراسم معروفه في الحفلات الحضاريه اللي مب كثير اعجبت ام زيد
وهذا الحال مع ابو زيد وعياله اللي كانوا صح بكامل اناقتهم ولكن ما ارتاحوا ابد ابد لاجواء المدينه المكتضه والناس الرسميه اللي كلها على نفس النمط ولا هم مرتاحين وهم جالسين كذا بدون لا شغل ولا مشغله وهالقهوجين يلفون بطريقه مستفزه وابو فايز لاهي وفايز بعد وناسين الناس وكانوا ودهم يفزون ويصبون القهوه ويعدلون هالجو اللي جالطهم
حسين بهمس لمطلق: ليت هايف جاي نتونس معه
مطلق : والله لا هايف ولاا زيد فاضين وارحم لهم من هالجوء اللي يجيب الغلقه
حسين : مستعد احلف ان ابوي ضغطه سبعه مليون من اخويا فايز
مطلق ابتسم : واضح واضح انتظر هجومه بس
حسين :وانت بتروح للاحساء
مطلق : ايه
سكت حسين اما مطلق اللي من صبح الله يتصل بأديم يا مغلق يا ماترد وبدا الموضوع يستفزه بس يحط عذر انه انشغالها
لف ببتسامه يشوف ابوه اللي متكي على عصاته ويناظر القهوجين بطرف عين وهم واحد يصب بيساره واحد يمرر العود وهو يسعى وغير الشاهي اللي يكرهه ابو زيد يكون خفيف دخل الجوال بجيبه ووقف وهو يقول : حسين انقز دور لابوي شاهي زي الناس
حسين : ايه توني بقوم اسوي له
راح حسين للمطبخ الصغير وهو يسوي لابوه الشاهي اللي يحبه
اما مطلق اتجهه للقهوجي وهو ياخذ من يده الدله والفناجيل وبعد ما غسلها اتجهه لابوه وهو يصب له القهوه بالطريقه اللي تبرد قلب ابوه اللي رفع نفسه وكإنه مفتخر بمطلق اللي واقف على راسه ويقهويه وكل المجلس يناظرونه .
فايز راح لمطلق :وش تسوي يا مطلق القهوجي فيه وانت ضيف وش تصب له القهوه
ناظره مطلق بنظره حاره : لا تحتريني اجلس واحط يدي على خدي وانا اشوف الحال المايل ابوي ما يحب ذا الاطباع وانا تهمني راحة ابوي
فايز رجع لوراء وهو يبتسم لضيوف وبعد شوي جاء حسين وهو بعد يصب لابوه والشياب اللي حوله شاهي وابو فايز واقف اخر القاعه مبتسم ( صح ان ابو زيد تربيته لعياله صعبه بس طلعت رجال ، وهذا شتان بينهم وبين فايز اللي صح كان هه شوي ينتعش معهم بس يحب الخدمه
ومن كآبة الحفل ان مؤيد ما حضر هو بعد وطبعا اخيييرا وصل عشاء الرجال ................••............
وفي قاعة الحريم
بعد انتظار انزلوا اديم وريوف وبعد ما سلموا عليهم وكانت اديم تناظر جوالها ومطلق يدق لكن طنشته بزعل وشلون يمر يومين ولا فكر يتصل يقول ( وش اخبارك ، وش مسويه ، وش محتاجه ) رجعت للمة صاحباتها وهي تستمع بكل لحظه لكن ما طولت كثير وناستها لما جات سلمى وهي تسحبها بهدوء : ماودي اخرب عليتس بس مطلق احرق الجوال يقول قولي لاديم تجي في ذا هالصاله اللي بالطرف
اديم ميلت فمها : طيب
راحت اديم وهي تدخل وكانت تدور مطلق : هلا
مطلق اللي جاي من بعيد ومايشوفها زين : ما شاء الله اديم ، دليتي طريقنا حمدلله على السلامه
اديم بعتب: وعليكم السلام يا مطلق انا بخير انت وشلونك
مطلق اللي ما اشد على قلبه من العتاب الا شكل اديم الفاتن تنحنح : سلام
اديم : وعليكم السلام
مطلق حس انه انحرج وهو داخل بشره : ا وشلونس!
اديم بعتب : يهمك تسأل
مطلق اللي مد يده لكتفها وهو يقربها بهدوء بحيث انه يسلم عليها وهاذي من طرق الارضاء الغير مباشر من مطلق اللي ما تعود يسلم عليها بس من باب انه يلين موقفه سلم عليها وابعد
اديم اللي كانت متكتفه نزلت يدها بصدمه لما اصتدم خدها بلحية مطلق اللي كان يسلم بشويش وكأنه خايف يجرح خدها شدت يدينها ببعض بأحراج اعتلى وجهها وابتعد مطلق : يهمني اكيد ولكن اتصل بتس من اليوم يا مغلق يا مشغول
اديم اللي كان ودها تزعل انه ليش ما اتصل بس ابد ما حولها زعل بعد الموقف : ا كنت مشغوله
مطلق : ادري اني المفروض اتصل باليومين اللي طافت بس قلت اكيد بترتاحين مابي ازعجتس
اديم بحرج : لا وش ازعاجه
مطلق اللي كل ما حاول يرفع عيونه عنها عجز قال بتوتر وهو يلعب بمسبحته: طيب يلا
اديم بفهاوه : هاه !!! وين !
مطلق اللي مايعرف ابد للمفاجأت قال: بنروح للاحساء
اديم :وشو !؟ وش تقول
مطلق : اللبسي وتعالي واعلمتس
اديم : وش اللبسي وين بتوديني
مطلق بارتباك : خلصتي حفلتس
اديم : لا
مطلق : ليه الساعه 1
اديم : توها تبداء
مطلق : طيب اسمعيني اتركيهم يبدون ويلا معي
اديم كانت منصدمه من اسلوب مطلق : مطلق اقولك حفلتي توها تبدا
مطلق : الحين ليش هالحفله؟!
اديم : عشان تزوجت
مطلق : هذا انتي قلتيها تزوجتي وزوجتس يقول يلا ، يعني يلا الله يرضى لي عليتس
اديم اللي ناظرته بطوله الفارع بشخصية شماغه الفريده لحيته السوداء عيونه الحاده وطباعه اللي يلغب عليها طابع البداوه يده اللي متدته لها وبين اصابعه مسبحته المعهوده
في لحظات نظرات اديم له كانت تبادلها نظرات مطلق اللي بنظراته يشوف اديم جدا ملفته بشعرها البني الريفي المرفوع بطريقة بسيطه وعيونها العسليه الواسعه وابتسامه متعجبه ! وفستان اوف وايت ماسك وموديل مبرز تفاصيل جسمها
تحركت اديم بتوتر ولف وهي تقول : طيب
وهي تمشي في نفسها ( خير يا اديم انهبلتي الناس يحتفلون فيتس وانت بتروحين ارجعي بس خلي الخفه وقولي بجلس معهم شوي)
رجعت وهو تناظر مطلق اللي كان حاط يده بجيبه ويمشي بخطوات متباعده ينتظرها : يا مطلق
لف مطلق وهو يتكتف : سمي يا اديم
اديم عجزت بعد هالكلمه تكلم بس قالت : بجلس شوي صاحباتي ما شفتهم زين
سكت مطلق يناظرها بهدوء كان بيوافق بس صدمته اديم اللي قالت: خلاص بجي لا تعصب
راحت وهي نوعا ما معصبه لكن طرف منها راضخ مب لان مطلق يمكن يعصب لا لا لانها ما تقدر بعد كل اللي قاله تقوله لا
ضحك مطلق وهو يرجع شماغه ورا : هالبنت بتجنني على كيفها تكلم وعلى كيفها ترد وعلى كيفها تزعل ومن كيفها ترضى
................••............
في بيت ابو نجد
نجد اللي انهارت وهي كل ساعه تتصل وتنتظر هايف يرد وكل شوي تحط له عذر وانقضى الليل وهي تدق وهايف مغلق نزلت الجوال وهي تبكي بحسره : تكفى يا هايف رد تكفى ساعدني مب وقته تسكر جوالك تكفى رد يارب ساعدني يارب
في الغرفه اللي بجنبها كان ابو نجد جالس بضيق وهو متكتف
ام نجد : وش فيك يا ابو نجد
ابو نجد بتردد : والله مدري انا ابو لنجد ولا ظالمها خايف من غصيبة هالبنت
ام نجد : لا يا مشعل ما ظلمتها ولا شي وابد تاكد انك ما انت لاقي لها احسن من راضي علم وعقل وجاه وعز وبيصونها ويحفظها واذا قصدك على بكاها ما عليه انت ادرى ببنتك مدلَعه وبكره تعقل وتعررف انك ما ظلمتها وانك تبي مصلحتها وتبي تزعل اسبوع وبكره اذذا اعرست بتطخ وتشوفها مستانسه ولا تفكر هذا دلع البنات شوي ويروح
ابو نجد سكت بحيره من كلامها وهو فيه تردد كبير بس دمحته ام نجد اللي اقنعته انه مجرد دلع وبينتهي
................••............
في الخبر
في شقة العيال اللي رجعوا هايف ومشاري وبلغوا سعود وهم يضحكون وجلسوا ولكن تفاجئ هايف بسعود اللي رجع ومعه جوال جديد ورقم جديد
هايف وقف بصدمه وهو بيحلف بس مسكه سعود وهو يسكته : والله لتاخذه دحوم اللي رمى جوالك خذ بس
هايف: يا سعود ليه تكلف على نفسك
مشاري: خذه يا رجال بالعافيه عليك
اخذه هايف وهو منحرج وضحك متعب : يا زينك يا هايف ترا ما كلفت عليه ولا شي هذا حقك
وليد: يلا سعود جب لي جوال هديه
ضحك سعود : اقلب وجهك
جاء ابو فرج ويمشي بهدوء وقد مايقدر يتجنب هايف : وليد من بكره انزل مع ام فرج عشان تشوفون وش تحتاجون للملكه
وليد وقف وهو يبوس راسه : الله يخليك لنا يا سيد الكل
ابو فرج: الله يسلمك
متعب :اجلس يا عمي
ابو فرج: لا راسي يوجعني بروح انام بدري
هايف : بسم الله عليك وسلامتك
ابو فرج: الله يسلمك
راح وتركهم ومشاري اللي وقف وهو يسحب هايف : تعال تعال بسوي جوالك
اخذه ودخلوا الغرفه وسكر مشاري الباب : تشوف في حال ابو فرج شي
هايف: لا بس كنه من امس مش ولا بد
مشاري : اجل اسمع اللي انا شاك فيه
هايف: وش
مشاري قاله اللي سمعه كله وقاله كلام سعود
هايف وقف وهو يناظر بشك : يعني ابو فرج يكذب علي
................••............
في الرياض
وعند مطلق واديم اللي وقفوا عند بيت ابو فايز عشان اديم تاخذ اغراضها
مطلق : بسرعه هاه لا تاخرين
اديم : بجمع اغراضي وابدل وغسل هالحوسه اللي بشعري ووجهي وبعدين اجي
مطلق : لا لا بس خذي اغراضتس وتعالي
اديم : وش رايك يعني نروح لاحساء بحوستي
مطلق: اسمعي الكلام وبعلمتس اذا رجعتي بس خذي اغراضتس وتعالي
اديم نزلت وهي تجمع اغراضها ورجعت ونزل مطلق يدخل الشنطه بالسياره ورجع يركب وهو يطقطق بجواله
اديم : مطلق انتبه للخط وش فيك
مطلق : طيب
اديم : اترك الجوال
مطلق رد على اتصال وماكان معلوم وسكر وهو يوقف عند فندق : يلا
اديم ناظرت في الفندق : وين
مطلق قرب يناظر الفندق مع القزازه الاماميه يأشر لها :وش ذا
اديم قربت وهي تناظر : فندق
مطلق : وش يعني ؟!
اديم: وش يعني
مطلق : يعني بنبات هنا الليله وبكره بنمشي
اديم: ودامنا بنبات ليه ما خليتني مع البنات
مطلق نزل وهو يقول : انسي لي ذا البنات يا بنت الحلال وانزلي
نزلت اديم بحمق : ايييه انت بس خلك انزلي امشي واطلعي واسكتي
مارد مطلق اللي كان على وجهه طيف ابتسامه وهو ينزل الشنط وتحرك وهو يأشر لها : نسيتي تقولين غطي عيونتس
اديم غطت وهي عجزانه تمشي من الكعب مد مطلق ذراعه : امسكيني لا تطيحين انتي وذا الغبر
اديم مسكت ذراعه وبعد ماعدوا الدرج تركها مطلق اللي راح يستلم مفتاح الغرفه ورجع وطلعوا دخلت اديم وهو ترمي الكعب : ااه رجلي راحت فيها
مطلق : وش الله حادكم عليه
اديم : نكشخ
مطلق نزل شماغه وهو يطلب العشاء ووقفت اديم :ببدل لين يوصل العشاء
مطلق لللي يحس انه ماشبع من شكلها الفاتن : اجلسي لين تعشين
اديم جلست وهي ساكته، مطلق : ايه كيف حفلكم !؟
اديم : حلو مره انبسطنا
مطلق : وامي وخواتي
اديم ضحكت : البنات انبسطو بس خالتي ما اظن جاز لها حفلات الحضر على قول سلمى
مطلق : يا بعد عيني يمه حتى ابوي ضايق مره اتوقع انه قد قشهم ورجعوا للبيت من الطفش
اديم ضحكت :اووه عمي عاد وضعه اصعب بكثيير
وصل العشاء ودخله مطلق وجلسوا يتعشون ومطلق اللي من قوة ماهو سرحان بأديم وملفته شكلها مب قادر يتعشى زين
وهو كان تفكيره بينه وبين نفسه (وش تنتظر يا مطلق قلت تنتظر الفرصه والادميه عطتك فرصه وصبرت عليك وجلست لين رجعت هيفاء تعشعش بمخك تعوذ من ابليس وتوكل على الله وابداء حياتك مالك مفر )
وقف وهو يغسل ورجع يجلس وهو مايدري متى يجمع شجاعته ويخطي هالخطوه غسلت اديم وبعدت العشاء وراحت تبدل ورجعت وهي تخفض الاضاءه شوي : خلاص مت من التعب فيني نوم لو نويصر بكبره يطب علي ماصحيت
مطلق اللي كان منسدح هو بعد وجات اديم وانسدحت بعيد عنه وزي ما تعودت
مطلق ببتسامه : على طاري نويصر له يومين ما بعد ابد من الشباك
اديم ضحكت: اييه قول لي انك مرتاح يومين يجي نويصر ولا مايجي مايفرق معك ماعندك احد يخاف ويقروشك
لف مطلق يناظرها وهو يضحك : صح المفروض اكون مرتاح بس مدري ليش كنت متضايق
اديم اللي كانت لافه عليه : اصلا كنت متضايق من قبل
مطلق اللي اخيراً بعد صراع قدر انه يمد يده اليمين ليد اديم وهو يشبك اصابعه بأصابعها البارده : يمكن ضايق من روحتس
اديم ارتجفت اديم وهي مصدومه
اما مطلق اللي اخذ نفس وهو يشد بيده اليسار على يده ويدها : دامتس اليوم احتفلتي بزواجتس واليوم بالنسبه لي انتهت الفرصه وصار لازم اني اترك كل شي وانتبه لزواجي وزوجتي وخلينا نعتبر ان اليوم هو يوم عرسنا وان اليوم بدايتنا ودي اقولتس انسي قبل بس فيه بعض المواقف الحلوه مابيتس تنسينها
اديم اللي من قوة الاحراج ورجفة يدها بيد مطلق ترتجف اعتدل مطلق وهو يقول : انا مابي اجبرتس على شي ما تبينه ولا ابيتس تخافين ابد كل اللي تبينه هو اللي يصير
اديم ارتجفت وهي ماتدري وش تقوله وش اللي اصلا بترده على هالطلب والموقف
اديم ارتجفت وهي ماتدري وش تقوله وش اللي اصلا بترد على هالطلب والموقف
مطلق اللي قلبه يرتجف وهو يحاول يأيد قراره: صح انا طلبتس من عمي زوجة وتزوجتس بس انا الحين اطلب اديم منتس زوجة لي بكل ما تعنيه الكلمه
اديم اتسعت عيونها بصدمه ولكن صدمها مطلق للمره الرابعه وقال : موافقه يا اديم
اديم اللي عجزت ترد عليه ما تنكر انها فرحت بأن قرار مطلق ذا يأكد ان هيفاء ماتعنيه ولا تهمه ونساها من زمان وصارت اديم بدالها بس كيف ترد عليه
مطلق اللي للحين يده بيدها وفاهم صدمتها وأحراجها وقال تفادي للاحراج :اذا انتي موافقه خلي يدتس بيدي واذا للحين متردده اسحبيها من يدي
اديم جمدت ما عرفت حتى يدها تحركها او بالاصح ماتبي تحركها طولت وهي ماقدرت تعطي اي ردة فعل لكن مطلق اللي كان متوقع انها تسحب يدها بس ابتسم وهو يناظر يدها بيده ما تركها ابد لكنه امتد بجسمه كله يحتضن اديم لصدره وانحبست كل الانفاس واجتمعت حياتهم مع بعض رغم شعور البعد الا انه تبدل بشعور غريب بس حلو واخيرا قدر مطلق يكسر الحاجز ويعدي
................••............
في الخبر
هايف ومشاري اللي لفوا وداروا يحاولون يحصلون سبب لابو فرج بس ما حصلوا
هايف : يمكن صدق له شراكه مع ابو نجد انت تعرف انهم بعد اصحاب
مشاري : انا فكرت لين تعطل مخي ما لقيت الا هالحل
هايف : حل منطقي لانه مستحيل ابو فرج يخبي علي سبب مهما كان مافيه شي اسواء من اني ما اجتمع ب نجد وابو فرج مقدر هالشي وفاهمه
مشاري : هذا اللي مجنني
هايف توتر ووقف وهو يدق اصابعه: تكفى لا تخوفني يا مشاري
مشاري :انت لا تخاف كمل حلك وان شاء لله بتنحل
هايف اخذ جواله : اصبر ادق على مطلق بعلمه بشوف وش يقول
مشاري : اي احسن مطلق اللي بيقطع الشك باليقين
اتصل هايف بمطلق وينتظره يرد ولا رد سكر وهو مستغرب : شكله نايم ولا بالحفل للحين
مشاري : غريبه انت مارحت الحفل
هايف :كان ودي والله بس راح الوقت علي وانشغلت
ضحك وهو يجلس : بس كأني اشوف ابوي و اوضاعه
مشاري : ايييه عاد ابوك ما يحب حفلات المدينه ابد
ضحك هايف وهو يحكي لمشاري بعض المواقف
.
.
.
انتهىâ™¥

5 - 11 - 2024, 09:35 PM

البــارت السادس والعشـريـن ..
.
.
.
ومن بكره في بيت ابو نجد
عند نجد اللي ما باتت الليل ابد كانت تحوم وهي كل ساعه تدق بهايف وهي تدعي انه يرد بس ما عندها اي حل
جلست وهي ما صدقت يطلع الصبح ويجي موعد دوامه اكيد اذا نايم بيصحى دقت ونفس الموال
مدت يدها لقلبها الللي اوجعها من التفكير والخوف غمضت تفكر وش تسوي وش تسوي على مين تتصل من بيوصل لهايف
حولت الاتصال على غزيل مالها الا غزيل لكن الصدمه ان غزيل مقطوع الخط
نزلت الجوال اول ما سمعت صوت امها اللي دخلت : انتي للحين تبكين يانجد اتركي هالدموع وهالدراما ترا مانتس بمحصله احسن من راضي واعقلي وبعدين وش ذا الخوف كلله هاااه وشهو اسمعيني عااد سكت بالحيل لتس ولكن ترا ان زادت هالتصرفات عن حدها بعلم ابوتس وخليه هو يطلع سبب هالبكاء اللي الله يستر منه
راحت ونجد اللي من خوف ان امها تفكر تفكير غلط قررت تسكت بس تدور حل بسرعه وتعصر مخها وتذكر كل ارقام الديره اللي تعرفهم ................••............
في الخبر
هايف اللي بالقوه نام من التفكير وما صدق هالصبح يطلع واتجهه للمطبخ يحوس يبي يسوي له قهوه تفتح عقله شوي ولكن اشغله صوت وليد اللي كان جالس في البلكونه يكلم هيفاء
شد يده وهو يحاول يطنش بس ما قدر وطلع وترك القهوه اخذ شماغه وطلع بدون حتى لا يسلم
وليد لف يناظره : وش بلاه ذا ياالله صباح خير
هيفاء : مين وش فيك !؟
وليد ببتسامه : هذا هايف
هيفاء اللي من فتره كانت تسمع اسم هايف بس ما توقعت انه هايف ما غيره اخو مطلق قالت بشك: ماا تتكلم كثير عنه
وليد:هو توه من شهور سكن معنا ولا يجلس الا 5 ايام وبعدها يطلع لديرتهم وهو مب مرهه اسولف معه طبعه بدوي بحت وينقد كثير فا مابي احتك
هيفاء دق قلبها بخوف : غريبه من الديره للخبر
وليد : هو والله كويس بس ما تقبل الخبر وكثير احيان يقرر ينسحب بس وراه اخو يقاله مطلق هو اللي رادهه
انصدمت هيفاء مب معقول الصدف لذا الدرجه: غريبه من اي ديره هم عشان يحبها كذا
وليد من باب السوالف : نجد ويحبها حب جما لو ما يروح لها بالويكند يموت
مسكت هيفاء راسها بصدمه ( اكيد هايف اذا عرفني بيقول لوليد وش اسوي )
لكن صدمها وليد اول ما قال : صراحه ديرتهم تنحب حضرنا زواج مطلق هناك لكن فعلا استمتعنا
هيفاء: مطلق تزوج شلون !؟
وليد: هاه !؟
هيفاء : ا ا اقصد انه كيف يقدرون يسوون زواج بالديره
وليد ما انتبه لارتباكها وكمل يسولف عن تفاصيل العرس وهيفاء في ذهول اللي تعرفه ان مطلق يحبها وحيل ومستحيل يتزوج حتى لو طلقها وكانت صدمتها الاكبر انه تزوج وحده من بنات عمه وتوقعت انها اديم لان لطيفه معلمه ومستحيل تترك وظيفتها عشان تعيش بالديره وطبعا هيفاء كانت تكرهه اديم واديم بعد وهاذي النقطه هزت غيرة هيفاء اللي فقدت حب مطلق العظيم وحاولت ترجع له بس رفض مطلق سكرت من وليد ومن الغيره يدها اتجهت لرقم مطلق اللي مستحيل تنساه
دخلت وهي تكتب بمقصد تهز مطلق وحبه ( صباح الخير .. ادري انك الحين بتصحى بنفس الحواجب المقعوده اللي حافظتها ،بتصحى تدور على امك وتصبح على ابوك وبتطلع للعزبه ويدك على كتف حسين وبترجع للمحل وتصتدم مع محسن وبتضيق وبتقول لهايف وبتضحك اذا سلمى ضحكتك وتمل من ريوف اذا مافهمت عليك وتساعد شريفه اذا احتاجتك وبتتصل في زيد تطمن عليه ..... كل هذا بتسويه بقلبك الابيض الطيب الحنون.. هونفس القلب اللي حبته هيفاء وهو حب هيفاء كثير
بعلمك انك وحشتني حيل حيل يا مطلق واني ما نسيت اي من تفاصيلك وكل يوم اصبح وكأني اصبح بوجهك .. ادري انك بتقرا هالرساله وانت ساكت ولا بتعطي ردة فعل لكن ردك فعلي اني عجزت اتحمل ما اكتب لك هالكلام اللي هز قلبي من شوقه ..هيفاء)
ارسلتها وهي نصفها شوق حقيقي لمطلق ونصفها غيره تتبي تدمر فيها استقرار مطلق اللي تدريبه اذا ارتبك وضاق وتوتر يحوس الدنيا ويخرب كل شي سواه
.................••............
اما هايف في الخبر
اتجهه للبنك دخل وهو متجهه للي مسؤول عن اوراقه وابتسم وقف وهو يشوف هايف : جيت وجابك الله
عبد المجيد : ابشرك اوراقك صارت جاهزه الخميس يا طويل العمر تطلع مع اللجنه وبعدها توقعون الصكوك والله يهنيك
هايف ابتسم وهو يسلم على عبد المجيد : الله يعطيك العافيه ويرزقك
عبد المجيد : امين وياك
راح هايف لمكتبه وهو متحمس طلع الجوال يراقبه وهو مافيه الا رقم مطلق غمض بقهر وهو مايدري وين اختفى رقم بيت ابو نجد وهو مب حافظه ................••............
في الفندق
عند مطلق اللي صحى وهو اول ما فتح عينه فتحها على الشباك لف بسرعه وهو يبي يتاكد هو اللي صار حلم ولا حقيقه واعتدل براحه اول ما جت عينه على اديم اللي كعادتها بنص السرير متغطيه بكامل اللحاف ولا باين منها شي وقف مطلق وطلع وهو يشوف الوقت بدري مسك راسه وهو يستغفر وشلون من النوم ما صلى الفجر مايدري كيف صلى وحتى قبلته مايدري صحيحه او لا اخذ جواله وطلع يبي يتنشط شوي نزل من الفندق لشارع وهو توه يفتح جواله وشاف اتصالات من رقم غريب وابوه وامه ومن بعدهم رسايل واول شي سواه اتصل بابوه وامه اللي باقي بالرياض وطمنهم عنه وبعد امه نشب بحسين وسلمى وريوف وسكر منهم يضحك على تعليقاتهم ودق على هايف بس مغلق استغرب بس طلع للرسايل ومن بين هالرسايل رسالة هيفاء اللي صدقت بكل حرف وصفته رساله هيفاء اللي ضربت قلب مطلق بالصميم وعرفت كيف تدخل لمطلق من باب انها تذكره باحواله مع اهله وبعدها لحبه لها
ارتجف قلب مطلق لكن ماهي الرجفه المعهوده ابد رجفة بسيطه بس لان اسم هيفاء كااان يعني له كثيير بس هالايام ماصار مهم وبالاخص اليوم بعد ما فتح صفحته مع اديم مستحيل يخونها حتى بالتفكير ب هيفاء سكر الجوال ولكن توه يفهم هايف اللي اذا حصل موقف يهيض قلبه فوراً تنكتب معه ابيات شعر وهذا اللي حصل مع مطلق اللي مهما فكر يوقف حب هيفاء مالها الا انه يرد عليها بصرامه تقنع قلبه قبلها
جلس بهدوء وهو صريح بكل كلمه يقولها ويكتبها
(‏ ‏يا مقصر العمر لا ترجع علئ شاني ،
‏طاريك روح وضيع بالهواء صيته ،
‏ابشرك بادي اتعلق باحد ثاني ،
‏بادي احبه واشيد بالصدر بيته ،
‏بادي اعيشه غلا من كل وجداني ،
‏بادي اسميه كل اللي تسميته ،
‏بادي اخليه الاول ماهو الثاني ،
بادي اشوف بقصيدي يبتدي بيته
‏بادي اخليه يعشقني ويهواني
‏بادي كثير وكثير اللي تهقويته
هذاك لو بس يضحك تضحك احزاني
‏هذاك هو الحبيب اللي تمنيته
‏هذاك وافي وعوض كل خلاني
‏هذاك لوين مايصعد تعليته
‏هذاك لو ضعت بالدنيا بيلقاني
‏هذاك مااعرف احزاني لياجيته
‏‏عساي اموت به غلا والقاه يحياني
‏وعساه يبقى بقلبي مشيد بيته))
ارسل مطلق الرساله وهو راضي رضا تام عن كل سطر حظر رقمها وطلع بعد ما اخذ الفطور وهو ناوي يتمم خامس بيت ويبدا به دخل ببتسامه اول ما قابلته ريحة العود وعطرها اللي متعود عليها بس اليوم ما اوجعت قلبه ابد بالعكس دخلت قلبه اليوم مثل النسمه دخل طاولة الفطور وتقدم بخطواته الثقيله وهو يشوف اديم اللي طلعت وهي وتبعد شعرها واول ما شافت مطلق نزلت راسها بحرج وهي تاخذ من جنبه الطاوله
لكن وقفها مطلق اللي همس بأذنها ببتسامه : صبحي على الدنيا بخير
اديم رغم ارتباكها ما تركت العباطه : ليه الدنيا تنتظرني
مطلق ابتسم وهو يحاوط كتفها بذراعه : مدري عن دنيا الناس بس اللي اعرفه دنيا مطلق تحتريتس
اديم اللي جتها دوخه ( حسبي لله عليه وهو ساكت يحوسني وهو يتكلم يحوسني وش اسوي به ذا الادمي ليته جلس معصب كان اهون )
مطلق جلس وجلسست اديم وهم يفطرون بهدوء وقال مطلق : اذا خلصتي جمعي الاغراض ماودي اتاخر والرجال يحتروني
اديم : طيب
................••............
في الخبر
هايف اللي في قلبه شي مايدري وشهو في زي الحجر ثقييييل عجز يبعده ناظر التقويم وهو يقلبه : هانت باقي يومين وتروح الديره اركد يا هايف
متعب اللي جاء وهو يضحك : اركد يا هايف اركد وراه ملكة وليد وعاد لو ما تحضر الملكه بيزعل
هايف: لا معليك بحضر بحضر
متعب : الله يعافيك يا هايف خذ لي هالملف وخلصه كامل بيجيك الرجال بعد شوي
هايف : طيب
راح متعب وانشغل هايف بالملف
................••............
في بيت ابو نجد
نجد اللي ماصدقت امها راحت لسوق ونزلت تحوس بارقام ابوها واخيرا حصلت رقم فلاح مافيه الا هو
اتصلت وجاها صوت فلاح المتقطع : الووووو
نجد: سلام عليكم فلاح
فلاح: وعليكم السلام من معي
نجد : معك وحده داخله على الله وعليك
ارتبك فلاح ووقف : من انتي
نجد:مقدر اقولك اسمي بس تكفى ابي رقم مطلق وهايف عيال ابو زيد
فلاح : ليه ! صاير شي
نجد : تكفى يا ابن الحلال افزع
فلاح اللي تردد بس قال( وش يعني بتسوي لهم) عطاها الرقم وقفلت نجد وهي تحس من الفرحه بتطير رقم هايف هو هو رقمه اللي مايرد عليه
ودقت على مطلق
................••............
في الطريق
مطلق اللي كان بالسياره رايحين للاحساء
دق الجوال ورد بهدوءه المعتاد : الو
نجد : سلام عليكم ، هذا رقم مطلق صح
مطلق اللي من ارتباك الرساله الصباح توقعها هيفاء :غلطانه يا اختي
نجد اللي خافت انها غلطانه بس هذا صوت مطلق رجعت تدق ومطلق يشغلها
اديم لفت عليه : من ذي عطني ارد عليها
مطلق : وش تبين فيها غلطانه
اديم : غلطانه ما تفهم انا افهمها
مطلق :خلصنا عاد
دقت ونطت اديم : عطني عطني
مطلق : اديم اجلسي وخليها بنحضرها وينتهي الموضوع
اديم : احضرها يلا
مطلق بحده : وش رايتس تكفخيني
اديم هجدت : لابس ازعجتني
مطلق اللي حظر الرقم ونزل الجوال واديم اللي صح استفزتها البنت وتمنت سلمى معها تفزع بس ارتاحت اول ما حظرها
اما نجد انجلطت وشلون بتوصل لهايف الحين وشلوون .................••............
هذا حال نجد في هالايام ما خلت ولا حل ما دورت فيه على طريقة توصل فيها لهايف بس كلها تقفلت بوجهها وهايف اللي كان يكلم مطلق وعادي مافيه شي ويكللم اهله واهله عند زيد واستغرب كيف ابوه جلس وترك اشغاله وطلع موصي فلاح على العزبه ولكن هايف ماكان عنده وقت يفكر بعد ما استلم الصكوك بيدينه ووببتسامه وطلعوا يجهزون لملكة وليد اللي كانت الخميس
اما مطلق واديم اللي هاليومين مرت خجوله لكن من بين فتره وفتره ينعشها مطلق بهمساته الغزليه اللي توجع القلب وطبعا اديم لها بصمه في تجنين مطلق
اما عند بيت ابو فايز صح ابو زيد وعياله استانسوا بس مهما حاولوا ابو فايز واهله ويوصلون لنفس همة الشغل والكرم في عيال ابو زيد وابو زيد ماقدروا وماصدق ابو زيد انه يجي الخميس ويرجعون الديره ومع زيد اللي هالايام محد بفرحته ينتظر مولوده الثاني
................••............
في الديره وطبعاً كانت قايمه الافراح عندهم ومن يومين والمخيم مبني والاحتفالات عامره دخلوا ابوزيد وعياله وهم مستغربين واول مادخلوا البيت نزل زيد : محسن عرس من ذا
محسن اللي اول ماعرف انصدم بس سكت وقال وهو يناظر ردة فعل الكل : عرس راضي
ام زيد وهو تنزل الاغراض : ماشاء الله متى عرسه ما درينا به
سلمى : اول مره يفوتني خبر
ابو زيد اللي كان سااكت وهو ينتظر بس وش يسوون
زيد: وبيعرس على بنت من
محسن بتردد: على نجد بنت ابو نجد
سلمى طاحت منها الشنطه ولفت وهي تشهق ووقفت ام زيد بصدمه وحسين اللي جمدت يده على باب السياره اما ميثى وزيد كانوا ساكتين بصدمه
ام زيد قربت لمحسن وهي تمسك ذراعه: نجد ما غيرها نجد اللي سماها هايف
محسن : من غيرها فالديره يمه
سلمى بصدمه : وهايف
اختلطت الاصوات والاسم الواضح اللي يتردد كان هايف و انهى النقاش ابو زيد بغضب : اقططع الصوت
الكل سكت يناظرون ابو زيد اللي قال وهو يدق بعصاته الارض : بنت الناس تزوجت والله يستر عليها وهايف يدري وكلكم تدرون لو يموت مب اخذها ولكن حطوا في بالكم امر لين يتم هالزواج لو يدري هايف او يعلمه احد منكم والله اني لابراء منه ومن هايف معه واللي يعصيني والله لاهو ولدي ولااني ابوه واللي يعلم مطلق بعد والله اني لسوي فيه شي ماعمره تخيله سامعين
ام زيد وهي تبكي: يا ابو زيد تكفى لا تذبح هايف انت تعرف وش كثر يحبها عشان هايف سو شي افزع معه
ابو زيد بحده: انا فازع له الحين وانا حانه من اللي بيصير فيه حتى لو اني رضخت وخطبت ما مشعل بمزوجه لو يموت ولا راضي بيرضى يخلي مرته لهايف الموضوع طلع من يدينا والعلم واضح وكلكم تسمعونه وتدرون ان هايف لو درا بيذبح راضي ولابيجيب له فضيحه اتركوه ولا احد يعلمه وبيزعل ايام ويرضى ويتزوج مثل مطلق ويعيش ولكن اعيد واكرر والله لو يدرون ليصير شي ما حسبتوا حسابه
راح ودخلهم وبكت سلمى هي بعد بحرقه: والله انه حرام وولله هايف بيموت تكفى يازيد تكفى سو شي يا زيد
زيد اللي اوجعه الموضوع بقلبه بس هو من البدايه شرح لهايف وعلمه بس ماطاع هايف لف بضيق: وش اسوي هذا امر مافيه حلول
محسن : اسكتوا وخلوه لايدري وهايف زعله مايطول بيضيق اليوم وبكره يرجع يضحك
حسين اللي الاول مره يعصب : وش تخربطون انتم يوم كان الحب حبكم كلكم نصرتوه وجبتوه ويوم صار لهايف كلكم وقفتوا في طريقه
زيد بغضب:اعقل انت وسمعت كلام ابوي وش قال وحنا وضعنا ماهو مثل وضع هايف وانسب حل تعرس البنت وتروح وهايف مرده بيرضى وهو يدري من البدايه طريقه مسدود
ام زيد اللي من الحين جلست وبكت وهي حزينه على حال هايف وتبكي
................••............
في الخبر
في شقة الشباب كل واحد يجهز ومستعدين ووليد عند ام فرج يشيكون على الاغراض
مشاري اتجهه لهايف : تتوقع يعرفونك اهل هيفاء
هايف : اكيد بيعرفوني
مشاري : وش بتسوي
هايف : بسكت وش اسوي بسوي نفسي ما اعرفهم وهم اكيد بيسكتون لان مب من صالحهم يعرفوني علن
مشاري : والله مدري يا شيخ الله يهني سعيد بسعيده
متعب : يلا يا عيال يلا
طلعوا وسعود اللي اخذ دحوم وهايف معه عزيز وركبوا يراقبون فرحه وليد وطلعوا كلهم متجهين لرياض
رغم ان هايف مب مرتاح ابد لا لروحة الملكه ولا مرتاح بشكل كامل
مشاري بهمس :وش فيك ضايق
هايف : مدري احس فيه شي على قلبي ثقيل
مشاري : معليك هذا خوفك من ان حلك ما ينفع لكن ان شاء الله بينفع
هايف : يارب
................••............
في الاحساء
عند مطلق اللي كان جالس بصالة الشقه وهو يقلب اوراق البضاعه بيده وهو منشد لشغله
جات اديم وجلست وهي تعطيه كوب شاهي وسحبت الاوراق منه بشويش : ممكن تخلي هالاوراق من الصبح تناظرها عيونك تعبت
مطلق اخذ الكوب وهو مبتسم : عيوني تعبت ولا عيونتس طفشت من هالغرفه اللي تناظريها
اديم ضحكت: لا والله يعني صح انا طفشانه بس حتى انت تعبت لا تنكر
مطلق رجع لورا وهو يمسح عيونه : من ناحية تعبت تعبت بس خلصت بكره استلم الطلب
اديم :طيب دامك خلصت خلنا نطلع
مطلق : يلا يلا اجهزي
قام مطلق يشوف في يده الساعه وكانت 6 المغرب دق على رقم هايف الجديد ورد هايف بسرعه
هايف: هلا مطلق
مطلق : هلا بك وينك اليوم مختفي
هايف : تعرف ملكة وليد وحايسين معه
مطلق : بتطلع الديره
هايف : ايه ان شاء الله وبعطي ابوي وابو نجد الاوراق قول ان شاء الله انها تنحل
مطلق: ان شاء للله وانا اخوك ان شاء الله
هايف : انت وينك ؟
مطلق : فالاحساء للحين بكره برجع
هايف : زين اجل تجي وتعاوني ، شعلومك واضح مبسوط الله يديمها
مطلق : حمدلله اخيرا شفت الدنيا زين
هايف: الله يديمها يا مطلق
مطلق : شخبار نجد ولا ما تدري عنها
هايف: والله مدري بس اتوقع انهم بالديره وتلفون بيتهم بالديره ما اعرفه بس هانت بكره اذا جيت اعرف اخبارها
مطلق لف يشوف اديم جايه :الله يكون معك يلا تبي شي
هايف كان بيقول لمطلق بس اول ماشافه مبسوط كنسل الفكره
اديم وقفت وهي تضحك : لبست بسرعه وجهزت بسرعه وغطيت عيوني
مطلق ضحك وهو يدري ان هاذي الكلمات دايم يقولها قبل يطلع : اجل يلا
طلعوا وهم يتمشون ببعض اماكن الاحساء
................••............
في بيت ابو نجد
عند نجد اللي كانت تشوف امها اللي استجارت خادمه وترتب معها الاغراض ونجد اللي ما جفت دموعها وهي ما شافت ولا قطعه من دبشها ولا تدري كيف شكله ولا كيف كان وكيف بيكون
ركبت السياره وهي تسمع امها تتحلطم ليش نجد ما حنت يديها كونها عروس بس ابوها قال وكأنه يناصرها : اللي تبيه تسويه ماتبي تحني لا تحني
بكت نجد بقهر : يعني ماعرفت تنصري يبه الا بموضوع الحناء
ام نجد : نجد اص ولا كلمه تراني صبرت عليتس وش رايتس نروح لناس ونقول خلاص بنتنا ماتبيكم وش تبين الناس يقولون اعقلي واسمعي الكلاام زين والدلع هذا فكيني منه
ابو نجد : خلاص يا بنتي خلاص اتعبتي نفستس واتعبتينا معتس لا تعصين والديتس لا يعذبتس ربي
سكتت نجد على دخولهم للديره ولفت وهي تدور هايف بعيونها وهي مستعده اذا شافته تطنش كل شي وتركض وتقوله وصلو بيتهم وهايف للحين مابان دخلت البيت تركتهم وراها وركضت لغرفتها فتحت الشباك وهي عيونها مب قادره تشوف من الدموع مسحت عيونها وهي تناظر بيت ابو زيد لكن كان مسكر وكل شي مسكر ابوابه اليوم مسكره وهاذي اول مره يتسكر ولا حتى فيه احد بالحوش مسكت راسها ببكى : وين رحتوا وين هايف تكفون اطلعوا مطلق تكفى اطلع يا مطلق
رجعت وهي تجلس ودخلت امها تنزل بعض الاغراض
ورفعت راسها نجد : اقل شي نادو لي غزيل
ام نجد: انهبلتي مانيب مناديتها عشان تعلمينها بسواد وجهتس وهي مب مقصره بتنشرها اقولتس اقعدي بغرفتس بس
طلعت ام نجد وهي تقفل الباب وقفت نجد تنتظر ابوها يروح وهي لاول مره تكرهه انها تشوف تحضيرات عرس وهي تشوف عرسها يتحضر والناس كلها تركض وتساعد والدنيا فرحانه لكن نجد جدا حزينه جلست قريب الشباك وهي تبكي كانت تنتظر اي بزر يمر وفزت وهي تنادي بزر ناظرها باستغراب وهي تبكي : اسمع تعرف غزيل غزيل اخت فلاح
البزر : ايه وش تبين بها
نجد وهي تمسح دموعها : اركض لها قلها نجد تبيتس ضروري وقلها تجي عند شباك الغرفه لا تجي من الباب
البزر كان يناظرها بخوف وركضت نجد وهي تاخذ الفلوس اللي بشنطتها رمت عليها 50 : خذ هاذي لك واركض
اخذها البزر وركض ورجعت نجد وهي تدعي : يارب فرج همي يا رب ................••............!
في اطراف الديره
وعند غزيل للي كانت شايله هم نجد اللي ما لحقت تسألها وش صار فيها وفي هايف كانت تشتغل مع امها في بيت ابو راضي ويساعدون وهي ضايقه مررره
جات امها : غزيل اسمعي روحي بيتنا وجيبي منه ملابسي بجهز هنا
غزيل : طيب
طلعت وهي متجهه لبيتهم وهي بعد ودها تشوف هايف غريبه ما جاء ووينه اصلا وين عيال ابو زيد وابو زيد ما لهم شوفه
دخلت بيتهم وبعد ما اخذت ملابس امها طلعت ولكن وقفها البزر اللي وقف بتعب : غزيل في وحده اسمها نجد تقولتس ألحقيها بسرعه وتعالي من عند الشباك
غزيل اتسعت عيونها بارتباك اخيرا عرفت شي عن نجد عطت الولد الملابس وقالت: ودها لبيت ابو راضي عطاها ام غزيل واذا قالت وينها قل عند نجد
الولد: طيب
ركضت نجد لبيت ابو نجد ووراحت لشباك وهي تناظره وقالت بصوت مرتفع شوي : نجد نجد
طلعت نجد وهي تبكي : غزيل جيتي
غزيل : اصبري لا تبكين بجيتس
نجد : لالا امي ماهي مدخلتس بس اسمعيني تكفين بسرعه قبل يجي احد
غزيل : اسمعتس قولي
نجد وهي تبكي : تكفين يا غزيل اركضي ودوري هايف في كل مكان واذا لقيتيه قولي له يلحقني قولي له قمراك يالليل بتنطفي
غزيل : ابشري بس انا ماشفته اليوم اصلا ماشفت اهله هم لهم يومين بالرياض
نجد بكت بيأس: تكفين ياغزيل دوري بعد يمكن جو اذا ما لقيتي هايف روحي لمطلق وانتبهي لا تقولين لاحد غير مطلق
غزيل :بس وش اقول لمطلق
نجد: قولي له يعلم هايف باللي قلت لتس
غزيل : طيب طيب انتي لا تبكين
ركضت غزيل ونجد جلست تحت الشباك ببكي وهي تدعي وبنفس الوقت خايفه من اختفاء هايف ولا تدري وينه حتى اهله اللي مستحيل يفارقون الديره هالاسبوع بالرياض شدت شعرها بقهر على حظها
................••............
اما غزيل
اللي انطلقت فالديره كلها تدور هايف او مطلق كل مكان دورتهم فيه القهوه ومخيم العرس البقاله حتى نويصر سألته عنهم بس ما حصلت شي وقفت بتعب وهي تناظر السوق : مافيه الا محل ابوهم
ركضت للمحل وارتاحت اول ما شافته مفتوح راحت بسرعه وهي تتنفس بتعب بس ماشافت الا محسن وحسين : سلام عليكم
حسين اللي كان معصب ويده على خده وحاس بقهر الدنيا وهو مكتف مب قادر يسوي شي لهايف : وعليكم السلام
غزيل : حسين وين هايف اخوك !
حسين : هايف بالخبر!!
غزيل بتعب : طيب ومطلق
حسين :مطلق بالاحساء وش تبين بهم
غزيل بتصريف : ا ا تلفون بيتنا خربان وقلت يمكن يعرفون له
حسين بضيق: انتي فاضيه يا غزيل حنا نشتغل في بشوت والا تلفونات
غزيل : طييب
راحت غزيل بيأس الدنيا وهي ماتدري وش بتقول لنجد وش بترد عليها وكانت تلفت يمكن تحصل حل يمكن يصير معجزه
................••............
في بيت ابو زيد
عند سلمى اللي من يوم دخلوا ما وقفت بكى ابد وهي مقهوره وكأنها تشوف حال هايف بعيونها كانت امها في غرفتها وهي رابطه راسها بحزن وتدعي ان الله يعدي الامر على خير وان ربي يجبر قلب هايف
اما ميثى اللي من صدمتها كانت جالسه جنب زيد اللي فالمقلط جالس بصمت وهي مايدري كيف يتصرف وكيف بيسحب هايف من هالصدمه
و ابو زيد اللي سكر كل الابواب في بيته مثل ما سكرها في وجهه هايف كان جالس بالصاله وهو مستند على عصاته وهو مايدري هو ينقذ هايف من هلاك هالحب المستحيل ولا يدفنه حي
................••............
في بيت ابو نجد
عند نجد اللي كانت تنتظر الامل وهي تشوف الليل بدا ينتشر والظلام بدا بالسماء رفعت راسها وهي تقول : تكفى يا هايف الليل جاء وانت ما جيت تكفى لا تخليني يا هايف
فزت على صوت غزيل اللي تنادي بحزن : نجد
نجد طلت :بشريني يا غزيل
غزيل : ما لقيت احد يا نجد هايف بالخبر ما جاء ومطلق بالاحساء له ايام
نجد انهد حيلها وجلست : الله يهده هالخبر
غزيل : نجد وش بتسوين يا نجد
نجد:روحي يا غزيل وش بيدي اسويه من اسبوع قمت وطحت مليون مره ولا قدرت اوصل لهايف جواله من اسبوع مغلق ومطلق حظرني
غزيل بصدمه : نجد متاكده ان هايف يبيتس
نجد ناظرتها بحزن:متاكده
غزيل : وش تفسرين غيابه وهو عمره ما غاب عن الديره مب المفروض اليوم جاي من بدري مب لازم يكون جواله مفتوح خلي هايف حتى مطلق حظرتس بدون سبب وش توقعين السبب
صدت نجد متجاهله غزيل وهي تقول : غزيل ما تبين تساعديني لا تزيدين الطين بله وروحي وادفني هالسر ولا تطلعينه لاحد
سكرت نجد شباكها وجلست وهي تبكي وهي متاكده هايف يبيها ويحبها بس ماهي فاهمه ليه هالتصرفات وليه مطلق حظرها بدون مايعرف من هي وهي ماتثق الا بمطلق وباقي عيال ابو زيد يمكن يكرهون ابوها
اتسعت عيونها بخوف من فكره " ان هايف يلعب بها هو ومطلق واول ما جاء الصدق اختفو"
هزت راسها تطير هالوسواس ما تبي تصدقه مستحيل يكون صدق
................••............
في الرياض
عند هايف اللي كان جالس على جمر وده تنتهي هالملكه ويطلع تحركوا للقاعه وانصدموا اهل هيفاء بوجود هايف بس قال وليد وقطع الصمت : عمي هذا هايف صاحبي ما قدر يجي معي بالخطبه
ابو هيفاء : حياك الله يا هايف
هايف وهو يبادله النظرات : تشرفت بمعرفتك يا ابو هيفاء
مشاري شاف النظرات طالت وقال وهو يسلم: كيفك يا ابو هيفاء
لف ابو هيفاء اللي سواء نفسه ما يعرف هايف : بخير اقلطىوا
دخلوا وهم جالسين بصمت وهايف مب بالع كل اللي يصير
وما صدق هالليل يمشي ويطلعون بعد ما وليد دخل عند هيفاء ورجع وهو في قمة فرحته ووناسته
وكان يوصف للعيال شعوره بالفندق لكن هايف تحرك بضيق : يلا انا بروح
متعب: بتمشي بذا الليل
مقبل : ولا وانت نعسان اقول اجلس الديره ماهيب طايره
ابو فرج: اقعد يا هايف نم وعين من الله خير وبكره الصباح روح الحين بتمسك خط الديره وعيونك من قوة النومه حمرا
هايف: والله مانيب مرتاح هنا خلوني بروح بس وان شاء الله اني بوداعة الله
سعود: يا هايف وش تبي بالطريق الوعر بذا للليل والوقت متاخر اصبر لين بكره
هايف : الخط ذا متعود عليه ما عليكم
ابو فرج:اقول اجلس بس والله ما تطلع الليله من هنا اذا بايع عمرك ما حنا بايعينه اجلس وبكره اذا صحيت شبعان نوم روح وابوك فيه وابو نجد فيه والديره فيه اجلس بس
هايف ضاق : ياعمي الله يهديك وشوله تحلف
ابو فرج: لانك طايش ولا تعرف مصلحتك اجلس بس
هايف هنا انفجر بغضب مكتوم : للله يا مصلحة هايف اللي ما يعرفها الا انتم وانا بزر اراقب اللي بيصير بس واللي بتفرضونه علي
مشاري وقف : هايف تعوذ من ابليس عمي خايف عليك ما يفرض عليك شي
ابو فرج بزعل : ان كنت بفرض شي عليك بفرضه لاني اخاف عليك مثل ولدي ولا ابي يصيبك مكروه لكن بكيفك ياولدي
راح ابو فرج ولف وليد على هايف بغضب: ياخي وش فيك انت تحب النكد هذا جزاته عاد نفسه ابوك تصيح فيه كذا
هايف : اقول لك انت بذات اص
متعب : هايف وش فيك تعوذ من ابليس
فك هايف ازارير ثوبه بضيق : لا حول ولا قوة الا بالله
مشاري بهدوء: هايف لا تخلي ابو فرج يضيق منك
هايف رمى جواله وراح ورا ابو فرج تقدم وهو يبوس راسه : انا اسف ياعمي والله يقطع لساني اللي طولته علييك ولكن فقدت نفسي في لحظات وانت تدري بالضغط اللي فيني وتعرف زين شعوري فيه جبل على صدري عجزت اشيله ماني مرتاح لين اروح وانت ابوي وتاج على راسي واللي تبيه تم
ابو فرج ابتسم: ادري ادري ياهايف عشان كذا رح بس انتبه والوقت متاخر يمكن ما توصل الا الفجر بس دق علي
هايف وقف يبوس يده وراسه وكتفه؛ الله يخليك لي ابشر بتصل في مشاري وهو يعلمك وانت نم لا تطول
ابو فرج : زين زين
طلع هايف وهو ياخذ اغراضه ويسلم على العيال
مشاري: انتبه لنفسك وعلمنا اول ما توصل
هايف: من عيوني انتم ناموا لا تفكرون
اتجهه لوليد وهو يخبط كتفه: لا تزعل وليدو تعرف وضعي هالايام
وليد: ماعليك
هايف: يلا فمان الله
طلع هايف بسرعه وهو متجهه لديره رغم انه ميت نوم
.................••............
في بيت ابو نجد
عند نجد اللي انتظرت وانتظرت وعدت الساعات وهي رافضه تاكل اي شي او تفتح الباب لاحد انهد حيلها وصارت الساعه 2 وهايف ما فكر يجي وبدت نجد تخاف من كل الاحتمالات انسدحت بتعب اول ما ذبلت عيونها اللي تعبت من البكى ومراقبة طريق هايف والسهر
غفت بتعب بدون ما تحس وهي تاركه شباكها مفتوح ومتأمله ان هايف بيجي
ولكن دخل ابو نجد اللي شافها نايمه بتعب مد يده يغطيها وراح وهو يسكر الشباك ويقفل كل الستاير
وطلع وهو يدعي انه مايكون ظالم نجد ابد
................••............
في الاحساء
عند مطلق واديم اللي كانوا جالسين وهم جالسين وفاتحين باب البلكونه
لف مطلق على اديم : طفي النور بالله
اديم اللي كانت تاكل وشرقت اول ما طار تفكيرها بعيد بخجل
عطاها مطلق المويه:وش بلاتس يا بنت الحلال
اديم: ولاشي
مطلق وقف وهو يطفي النور ورجع جلس وهو يقول بهمس : طفيت النور ابي اشوف القمر اهدي ماعمري اكلتس ابد عشان كل مره تروعين كذا
اديم تفشلت من نفسها بس مهما مر من الوقت للحين تخجل وترتبك
ضحك مطلق وهو يهز راسه بأسى من خوفها
اما اديم انقطع صوتها نهائياً من الفشله
مر الوقت ومطلق يراقب القمر بهدوء وهو ساكت
لف على اديم ببتسامه: اجل عشان نخليتس تسكتين وتروقين نقول طفي النور ونروعتس
اديم لفت بفشله ودرعمه : خلاص ياخي وش دراني عنك انا
مطلق رفع حواجبه بضحك: صح وش دراتس عني المهم خاطري الليله انام وانا اشوف السماء وش رايتس نجيب الفراش هنا وننام هنا
اديم : مدري مابي اقول شي بعد وتطير عيونك
ضحك مطلق : اذا انتي مختس ينسم وش دخلني انا
اديم: انا مخي ينسم
لف مطلق ببتسامه خفيفه : ابد انا انا بس جيبي اللحاف
وقفت اديم وهي تبعد الاكل وهي للحين متفشله وجابت اللحاف وفرشته وعدلته وانسدح مطلق وهو يتوسطه
اديم: ماشاء الله عليك انا وين انا برا يعني وخر لي
ضحك مطلق ومد ذراعه : اذكر إنا اتفقنا على مكانتس
اديم ارتبكت وهي خايفه تجيب العيد بعد ويحسبها منحرفه : متى اتفقنا
مطلق سحبها بخفه لحضنه وهو يلحفها: انا وقلبي اتفقنا بس مدري عنتس انتي شكلتس كنتي تطفين النور
تمنت اديم تنشق الارض وتبلعها وجمدت بشكل نهائي وهي مابين فرح وخجل اما مطلق بدا يختار كل تصرف يقربه من اديم
.
.
.
انتهىâ™¥

5 - 11 - 2024, 09:36 PM

مساء الخير..
البــارت السـابـع والعشـريـن ..
.
.
.
في الديره
في بيت ابو زيد
هايف وصل الساعه 3 نزل بهدوء والدنيا ظلااااام رفع راسه يناظر الشباك بس كان مسكر ابتسم وهو يحس بضيق : هانت هانت يا نجد هايف
دخل بعد ما وقف سيارته بالطرف الثاني من البيت كان البيت ساكن وظلام وهدوء توقع يحصل امه وابوه يقومون الليل كعادتهم بس ما حصلهم لانه كان متأخر
دخل المقلط وهو ينزل اغراضه شاف حسين اللي نايم بلحاله تقدم ببتسامه وهو يدخل مع حسين بفراشه وحسين اللي ما حس فيه كانت عيون هايف غصب تتسكر ولو انه ما يبي ينام له اسبوع ما يناام الا ساعه ساعتين ومع ارهاق الدوام ومع السفر انتهى ودخل بنومه تعب
................••............
الفجر في بيت ابو زيد
ابو زيد اللي مثل عادته يلف بالبيت يصحيهم فتح المقلط وهو ينادي : حسسسسسيين حسيين
لكن قطب حواجبه : من اللي نايم معه
تقدم وهو يفتح النور وشاف هايف اللي حتى ما نزل ثوبه وقف وهو ياخذ نفس هادي ( وش السوات الحين )
لف يصحي حسين بشويش وطلعوا من المقلط واخذ زيد وراحوا يصلون مخلين هايف بالبيت
واول مارجعوا اتجهه ابو زيد للمقلط وهو يدري دايم هايف تعبان كل مستحيل يصحصح بشكل كامل
كل البيت توتروا اول ما عرفوا ان هايف جاء
ابو زيد اللي بالقوه سحب هايف يصلي ومثل ما توقع ان هايف ما صحصح ابد بالقوه صلى فرضه ونام في المكان اللي سلم فيه
دخلت ام زيد وهي حزينه اخذت اللحاف وهي تلحف هايف اللي كان منسدح بتعب ويده تحت راسه
مدت يدها تمسح وجهه هايف اللي للحين فيه بقايا من وضوءه : الله يصبر قلبك يا ولدي
زيد : يمه تعالي خليه ينام تعالي
وقفت ام زيد ولفت لابو زيد: خاف الله فيه يا عبدلله
سكر ابو زيد الباب بحده : اسمعيني زين يا مره تراه ولدي وخايف الله فيه وخايف عليه وش بيدي اسويه اروح اسحب االبنت من بيت اهلها واقول اخذها يا هايف
زيد: يمه الموضوع مب بيدينا
ام زيد لفت بحزن وهي تجلس وقال ابو زيد: اسمعوني زين اياني وياكم احد يصحيه خلوه ينام لين مايصحى من نفسه واذا صحى وانا مانيب فيه علموني ولا يطلع من البيت
الكل كان واقف بالصاله وبعد ما راح ابو زيد جلسوا كلهم بصمت وسلمى اللي كانت تسوي الفطور وهي جداً حزينه
والبقيه مجتمعين بالصاله وبهدوء
زيد اللي مب بس شايل هم هايف شايل هم مطلق بعد .................••............
في بيت ابو نجد الساعه 10
وعند نجد اللي صحت وفزت قبل اي شي تفتح الشباك شافت سيارة هايف مب فيه وبيت ابو زيد هادي هادي جدا ولا واحد بالحوش اللهم ان باب البيت الداخلي مفتوح وعبود يدخل ويطلع
جلست بيأس وهي تسمع امها اللي دخلت وهي تزغرط : يلا يلا امي قومي جهزي نفستس عشان تدخل الكوافيره يلا
نجد : يمه ارحميني تكفين
ام نجد بغضب : انتي اللي ارحميني قومي خلصي يا نجد لا والله لاذبحتس قومي
راحت ونجد اللي وقفت بيأس دخلت الحمام وهي تفتح المويه عليها يمكن حلم وتصحى يمكن كابوس
ما نفع ابد نفس الكابوس مستمر طلعت وهي تلبس اخف شي عندها يمكن يخفف ثقل الهم شوي طلعت وهي تسمع العمال بحوشهم يركبون العقود ويفرشون الزل رجعت لغرفتها وهي تشوف الكوافيره داخلها بمجموعتها جلست ببكى وهي كل شوي تطل من الشباك ولكن نفس الموقف من هايف واهله
.................••............
الديره كلها كانت مستنفره ومن العصر والافراح عاليه
والساعه 5 العصر في مقلط ابو زيد
تحرك هايف بألم في يده ورقبته تمدد وهو يدلك رقبته
مد يده لجيبه يدور جواله طلعه واول ماشاف السااعه فز واتسعت عيونه بصدمه: 4 العصر كل ذا نمته وش بلاك يا هايف هذا وقت نومك
فز يبعد اللحاف عنه وطلع من المقلط وهو مستغرب هدوء البيت شاف امه طالعه من غرفتها اتجهه لها مبتسم : ياحي هالزول والطله
ام زيد : هلا امي هلا يا ولدي
هايف حضنها وهو يبوس راسها : كيفتس يا قلب ولدتس
ام زيد: بخير ياحبيبي انت وشلونك
هايف : بخير بخير بس اني عتبان عليتس
ام زيد بخوف :خير يمه
هايف: ليه ما صحيتوني لصلوات اللي طافتني
ام زيد : صحيتك يمه ماصحيت كنت تعبان بالحيل
هايف : اجل خليني اروح اصلي
ام زيد :روح يا حبيبي لين ازهب لك شي تاكله
هايف راح يوضي ويصلي وهو ما طلع برا ابد ولا يدري وش صار برا واول ماسلم كان ابوه موجود
طلع وهو يبوس راسه
ابو زيد بضيق: توك تصلي صلاتك يا ولد وشلون تقدر ترتاح وانت ما صليت
هايف: الله يغفر لي يبه والله اني ماحسيت بنفسي
جات سلمى وهي تحط الاكل ووقف هايف يسلم عليها بحراره وبعدها جلس ياكل وهو بيخلص بسرعه ويفاتح ابوه بالموضوع ولكن قال ابوه :دامك خلصت اللبس بسرعه باخذك معي العزبه العيال مشغولين
هايف صح انصدم بس قال: ابشر
ابو زيد: تعال لي مع باب المطبخ الخلفي
هايف كان يحس الجو غريب بس كان مهتم انه يبلغ ابوه بحله اخذ اغراضه وطلع مع الجهه الخلفيه اللي ماكانت تطلع لديره كانت تطلع باتجاه العزبه وبكذا راح هايف ما درا بأي شي
سلمى بقهر: يمه وش بيصير بهايف لو درا إنا ندري ولا علمناه وسكتنا وخلينا نجد تطير من يده
ام زيد: وش في يدي يا سلمى ان علمته بيروح يحوس الدنيا ويذبح راضي وان سكت مالي حيله
................••............
في بيت ابو نجد
الوضع هو ان نجد ابتدت تنتهي من مكياجها اللي طلعت عيونهم فيه وهي تحاول تخربه قد مافيها وجلست وهي حزينه من غياب هايف لفت على دخول غزيل اللي قربت وحضنتها : نجد لا عاد تبكين يا نجد وجعتي قلبتس
نجد : انا بنتهي يا غزيل اذا تزوجت راضي بموت
غزيل :يا نجد لا تتعبين نفستس وانت تدرين ان المشاكل بين ابوتس وبين ابو زيد كبيره وانا اقول ان هايف مستحيل ما يكون عرف بزواجتس من اسبوع والديره يتناقلون الخبر وكلن عرف وفلاح بنفسه عطى ابو زيد الكروت وعيال ابو زيد كثار توقعين محد قاله محد زل عنده وعلمه توقعينه ما عرف !؟ يمكن عرف ولكن مايبي يسوي شي لان خاطر ابوه عنده اعز واغلى يمكن يحبتس ما اقول لا لكن مستحيل يعصى ابوه عشانتس
نجد وخرتها بضيق : بس هو وعدني هايف قالي بس اسبوع و يلقى حل وبيرجع وبيخطبني ونتزوج مستحيل يكون يكذب
غزيل : ما قلت لتس يكذب بس يمكن مافي يده شي
نجد مسكت راسها بضيق : يارب لا تخذلني بهايف يارب
سمعت اصوات الحريم اللي ابتدو يتجمعون ويساعدون وسكرت باب غرفتها بضيق وهي ودها تسكر الدنيا عليها ولا تشوف احد
................••............
المغرب عند هايف بالعزبه
اللي كل ماحصل فرصه يكلم ابوه اشغله ابوه وراح يخلص الشغله لين ما اذن وصلوا وبعد بربع ساعه مشوا لديره
هايف : يبه انا عندي موضوع بحاكيك فيه
ابو زيد : طيب طيب اذا وصلنا البيت خلني اسبح ربي الحين
سكت هايف وابوه يأشر له يروح من الجهه الخلفيه
وقال هايف:يبه وش بلاهم بالديره رايحين جاين فيه مناسبه
ابو زيد : ا اييه فيه عرس ولد ابو راضي راضي
هايف ابتسم: بالله ورا ما علمتوني
ابو زيد: خابرك بتجي قلت لا جيت نعلمك
هايف : حتى ما رحنا نعاونهم
ابو زيد: بتعاونهم بس اصبر
دخلوا البيت وللحينه هايف ماعرف شي واول ما اتجهوا للمقلط دخل ابو ثامر : ابو زيد ابو زيد وينك يا رجال ما جيت لا انت ولعيالك لغداء العرس والحين متاخرين فيكم شي
ابو زيد : هايف ادخل
ابو ثامر استعجل وهو لابس مشلحه: ولا عشان راضي معرس على بنت ابو نجد ما تبون تحضرون
ابو زيد بحده: زيييد اخذ اخوك
زيد ترك عبود واتجهه لهايف اللي كان عند باب المجلس وقف وهو يحس ما سمع اي شي من بعد كلمة ابو ثامر ولا حس الا بيدين زيد على صدره يدفه للمجلس
وابو زيد يعيد : اخلص يا زيد
ابو ثامر:علامكم وش فيكم وش بلاه هايف
هايف اللي اتسعت عيونه برعب وهو يبعد يدين زيد: زيييييد وش يقول ذا الشايب من اللي تزوج فكنيييي يا زيييد فكني
ابو زيد لف ابو ثامر : بجيك بجيك اسبقني بلحقك بس هايف مريض بشوفه واجيكم
راح ابو ثامر مستغرب اما هايف اللي بالقوه فلت من يد زيد وركض ورا ابو ثامر بس سحبه ابوه بياقته يثبته : وين رايح ويييين رايح
هايف اللي لف يناظر ابوه وهو مقطب حواجبه بصدمه وخوف : تكفى يبه وش يقول ابو ثامر تكفى لا تقول صدق يا يبه تكفى بروح اساله يمكن غلطان
ابو زيد ثبت هايف قدامه وهو يصيح : تروح له !!! انهبلت انت تبي تفضحني خلاص مافيك طب
هايف : وش فضيحته يبه ! يقولك نجد بتعرس يا يبه
ابو زيد هزه وهو ماسكه بيدينه الثنتين : اييييه بتعرس نجد والليله عرسها وراضي خذاها ! تاكدت الحييين طابت نفسك سمعت باذنك اللي انا عجزت افهمك اياه وعلمتك ملييييون مره ما تطيع قلت لو تموت لو تمووووت ما زوجتك نجد وزين جت منهم اعرست وريحتنا
هايف اللي كانت يده على يدين ابوه ارتخت بصدمه وهو يناظر عيون ابوه انقطع نفسه للحظات واحمر وجهه وارتفع صدره من هول الصدمه لكن في لحظه سمع فيها الزغاريط من بيت ابو نجد تكهربت كل خلايا جسمه انفلت من يدين ابوه وهو يصرخ : والله ما تروح نجد والله ما تروووح ويخسي راضي واللي جاب راضي
ركض وهو حتى ما عليه نعال لكن ركض زيد وابو زيد ومسكه اول ماحط رجله برا البيت وسحبوه وهم يدخلونه وطلعت ام زيد تركض ببكى: هاااايف يا امي بسم لله عليك
هايف اللي كان بين يدين زيد اللي مثبته وهو يدفه يدخله : ييممممممممممه تسمعيييين يمه نجد بتعرس يا يممممممه نجد بتروح مني يا ييييمه تكفين
ام زيد مسكت يدين هايف اللي صارت مثل الثلج: تعوذ من ابليس يمه تعوذ من ابليس
هايف اللي كان يتفلت من يدين زيد اللي من كثر ماهو مثبته وهايف يتهرب طلع لهم غبار
بس قطع صوت هايف الكف اللي اخذه من ابوه اللي قال بصراخ: اعقل يا ولد اعقل لا والله لذبحك
صرخ هايف : ماعاد فيها عقل طار عقلي وانا اقوم واطيح ادور حل يرضيك لكن وش استفدت نجد بتروح مني يا يبببببببه كله عشان خلاف جاهل كله عشان طمع دنييييييا
ابو زيد: زيييد اقلعه عن وجهي
كان ابو زيد من البدايه مفهم زيد وش بيسوي وزيد اللي ماكان عنده حل الا يطيع ابوه لان نجد صارت مستحييييييييله جدا .سحبه زيد اللي كان عريض جدا وثقيل على هايف اللي اخر الايام من كثر ماهو مهموم هزل جسمه وضعف قدر يقاوم زيد الللي كان قوي لكن كانت مقاومه هايف قويه من قهره ولو ما شتت انتباهه اصوات الزغاريط والموكب اللي جايبين فيه راضي كان ما قدر عليه زيد لكن بلحظه تحطمت فيها مقاومه هايف اللي دفه زيد للمجلس وهو يسحب الباب اللي كان حديد وقفله ووجهه محمر وحزين من وضع هايف
اللي اول ما تسكر الباب انهبل ركض للباب وهو يدقه بصرااااخ مكسوور وموجوع : ييبببببببببببه افتتتح الباب يببببببه تكفى يبببه تكفى لاتسوي فيني كذا تكفى لا تذبحني حي يببببببه لا تكسسسسر ظهري يبه الله يخليييييك يبه عطيييتك كل شي يا يبه واعطيييك رووووووحي يا يبه بسسسس لا تاخذ مني نجد يا يبببببه
رجع يدقه وهو ينادي : زيييييييييد انت تددددري يا زيد انت عاااارف كل شي يا زيييد تكفى يا زيد انت فاهمنيييي يا زيدد تكفى يا زيييد لا تعااااونهم زيييد انا فيييي وجهك يا زييييييييد يا زيد انا اخووووك يا زيد لا ترضى لي العذاب
ماكان احد يرد رغم ان الكل سامعه
زيد اللي جلس بهدت حييييل وثوبه اللي انشق من يدين هايف اللي يحاول ينفلت منه وهو يوجعه استنجااد هايف فيه وهو مايقدر يسوي شي
اما ابو زيد اللي جلس وهو يسند راسه على عكازه : يااااما نصحتكم ما تطيعوني اااااه منكم اااه
دخل حسين وانفجع من صوت الضرب وبعده محسن اللي دخل يسكر الباب : يبه وش صاير وش هالصراخ من فالمجلس
حسين رمى المشلح اللي بيده وركض بييفتح لهايف بس دفه زيد : ووخر عنه تبي تفكه لشر انت
حسين اللي كان قوي بس مايقدر يشوف هالانكسار بصوت هايف ويسكت صرخ : وخرررر انت ما تخاف الله يترجاك وتتركه انت اخو انت
ابو زيد:حسسسسسين انقلع لا والله لكسر يدك بهالعصا
محسن سحب حسين وهو منفجع من قوة الضرب والصراخ من هايف اللي كان يسمعهم وهو منهبل منهبلل حرفياً : حسسسسسيين حسييين افتح الباب يا حسييين
حسين اللي كانوا ماسكينه وهو اللي يحس خنقته العبره: يا ليتني يا اخوك اقدر
ضرب هايف الباب ضربه مرعبه مختلطه بصرخة قهههر ولفوا متوقعينه كسر الباب بس كان الباب حديد
هايف اللي لف يضرب الشبابيك يمكن تنكسر بس مافيه فايده رجع للباب وهو ينادي : يييييمه تكفين لا تخليني يممممه تكفيين لا تخلين نجد تروح انتي ادرى بقلبي يييييييمه انتي تحسسسسين فيني تكفين لا تخلينهم يشبون في صدري النار تكفين لا تخلينهم يكسرون ضلوعي لا تخلين ولدتس يمممه تكفين يا ييييمه
ام زيد اللي ماكان في يدها حيله الا تبكي بصوت مسموع لهايف اللي انهارت قوته وجلس وهو يختنق صدره وعيونه احتارت بالقهر والانكسار والدموع
.................••............
في بيت ابو نجد
من سوء حظ نجد اللي كانت على الشباك وشافت كل شي وهي تشوف كل المنظر اللي صار كل شي حتى صراخ هايف تحس انها سمعته كانت تشوف احوالهم وهي بفستانها ام زيد اللي تبكي وسلمى وميثى اللي محاوطينها وسلمى بعد تبكي
اما زيد اللي للحين جالس على باب المجلس وهو يدينه على راسه ابو زيد اللي جالس بنص الحوش بجنب مشلحه اللي طايح وهو ساند راسه على عصاته ومحسن اللي ماسك حسين اللي مابقى له على البكى شي
طاحت تحت شباكها بإنهيار وبكت وانحاس كل شي مكياجها شعرها فستانها من قهره سحبت الفستان وهي تقطعه بقهر
صرخت وهي تبكي وتردد اسم هايف بحسره
.................••............
في بيت ابو زيد
هايف اللي ما بقى مكان ما حاول يكسره ويطلع وهو للحين يستنجد وللحين مايبي دموعه تطيح للحين يحس نجد في عيونه مستحيل يطيحها بدموعه خيم ظلام الليل اللي اظلم الديره واظلم صدر هايف ولكن عقود العرس اللي اضاءة الديره احرقت صدر هايف اللي كان يحاول بس اول ما سمع صوت الطقاقات اللي مختلط بصوت العرضه وقف وهو يرجع للباب ويدق ويستنجد بقهره ولكن محط يرد عليه اول ماطرا بس ان نجد خلاص طارت من يده ضرب راسه بكل قوته بالجدار يبي يبعد هالفكره واحتر جسمه اول ما سال دمه من جبينه على وجهه
رجع هايف للباب : زييييد والله يا زيييد ما اسامحك والله ما اسسسسامحكم اذا راحت نجد من يديني واللله ما اسامحكم
تقطع صوت هايف اللي انهار من ألم صدره ااكثر من ألم راسه طاح على وجهه جنب الباب وهو يردد بصوت باكي حزين: وللله ماا اسامحكم والله
اختلطت دموعه مع دمه وهو للحين طايح بمكانه
................••............
برا بالحوش
ابو زيد اللي وقف بعد ما حس ان صدره تفجر من الضيق : محسن اللبس بتروح معي للعرس وانتي بعد
ام زيد: حشى والله ما روح والله ما اروح احضر حرقة جوف هايف
ابو زيد :محسسسن اخلص
محسن اللي كان لابس : خالص
ابو زيد لف لزيد بتحذير : اياني واياك تفتح له تسسسمع خله وانت يا حسينوه لو ادري انك فتحت الباب والله ل اذكيك ذكاة الشاه تسمعني وانتي بعد يا سلمى
سلمى وقف ببكى وهي تقول :وين بتروحون من ظليمته
دخلت البيت وحسين جلس وهو يحاول يمسك دموعه من صوت هايف اللي كان بكى مقهور معاه تنهيدات تكسر الضلوع .
كان هايف يدري ان محد منقذه من هالمكان ولا بينصره الا شخص واحد بس وقف وهو يستند على الباب ويدور جواله بس مع الاسف طاح منه شد بيده على قلبه وهو يقول برجى: ويييينك يا مطلق تكفى يا مطلق تعال ................••............
في الطريق
عند مطلق الوحيد اللي كان قلقان على هايف مايدري وش صار معاه وهو اللي كان راجع من الاحساء ويبي له ساعتين عشان يوصل الرياض
اديم : مطلق وش فيك قلقان صاير شي تتصل بمن
مطلق اللي كان شبه معصب : لا مافيه شي اتصل بهايف من امس مايرد مدري وش صار معه
اديم : يمكن نايم او مشغول
مطلق اللي كل ما يدق مغلق وكل ما قرب يحس بضيق سكت وهو مايبي يناقش شي خصوصاً انه متوتر
اديم اللي شافته ساكت وقررت تسكت هي بعد قبل يفصل عليها وهي ماتدري ليه خايف على هايف هالكثر
................••............
في بيت ابو نجد
عند نجد دخلت امها اللي شهقت من المنظر :نننجد
نجد غمضت وهي ما همها اللي يصير واللي بيصير
ام نجد ركضت : وش بلاتس يا بنت انهبلتي وش ذا اللي مسويته بنفستس مجنونه انتي تبين تفضحينا انتي
نجد : تخافين من الفضيحه ما تخافين على حياة بنتس
ام نجد مسكتها من كتفها وهي تهزها بغضب: اقولتس ولا كلمه وصبرت قلت بتطخ وتعقل لكن الظاهر اني ماربيتس زين اسمعيني زين علم يوصلتس ويتعداتس بتجي الحين الكوافيره تعدل مكياجتس ياويلتس تعيدين هاللي سويتيه سمعتي
بسرعه تداركت ام نجد الفستان اللي ما انعدم بشكل واضح وعدلت طلة اديم وهي تحذرها مليون مره من انها تعيد اللي صار بس نجد ابد ماكانت معها
قلبها متعلق بمنظر هايف اللي يهد الحيل وتاكدت انه ماكان يدري بس ماتدري كيف ما درا
................••............
مر الوقت على هايف اللي نزف جرحه لين خلاص بدا هايف يحس انه بيطيح سحب شماغه وهو يربطه على راسه يوقف النزيف لكن ماعرف وش يسوي عشان يطفي حريق قلبه وهو يسمع صوت الدق يضرب مسامعه يهد حيله وكل ما فكر في كون نجد عند احد غيره بيموت كان ماهو مستوعب وشلون ماعرف وشلون اسبوع وهو وينه كيف ما اتصلت به نجد كيف ما احد قال
لاول مره يحس بالغدر من اهله لاول مره يحس انه انخذل
جلس لما بدا يحس انه داخ وهو يحس ان داخله يحترق سحب كل ازارير ثوبه اللي تقطعت من حرة ما يحس فيه بس مافادت كل ماله يختنق مدت يده يشق فنيلته اللي يحس انه تخنقه
وهو يدق الباب للمره المليون ولا احد يرد
.................••............
الوقت كان يمر
بس يمر مثل السيف اللي ينزع روح هايف ونجد اللي الحين نجد العذيه بكبرها عجزت تشيل حزنهم
في هاذي اللحظه دخل راضي لنجد اللي كانت تبكي صح انه انصدم بس توقعه خوف
قرب ابو نجد يسلم على نجد اللي تناظره بحزن وانكسار مسكت فيه لكن ابتعد بحزن وهو يوصي راضي عليها وام نجد اللي بعد كانت عندهم وهي خايفه نجد تسوي شي ما صدقت قال راضي بنمشي اخذت العبايه تلبسها نجد وهي تهددها: اعقلي يابنت لا تخربين بيتس بيدتس لا تكسرين ظهر ابوتس وتفضحينه عند الناس وفكري زين لو سويتي شي اول ما بيروح فيها ابوتس
نجد اللي تعبت من كثر ما تحاول طلعت وهي تركب السياره وكانت امها ماسكتها لين ركبت وهي ودها تنفلت وتركض لهايف
كانت كارهه كل شي من راضي اللي كان يحاول يكلمها بس كانت تبكي بخوف بغربه بحزن
................••............
في مداخل الديره
عند مطلق اللي فهاللحظه دخل الديره واستغرب من الاحتفالات وفوق ذا سيارة راضي مرته وهي مزينه
اديم : فيه عرس؟!
مطلق اللي كان يناظر بسيارة راضي بشك : مدري
وصل مطلق اللي اول ما نزل طاحت عيونه على السيارات عند بيت ابو نجد وواضح انها موكب العريس والعقود والدق اللي جاي من بيت ابو نجد رمى مطلق كل شي بيده ونزل وهو يركض للبيت فتح الباب ويده ترتجف وشاف ابوه اللي جاء اول ما شاف موكب راضي طلع للبيت وخايف ان هايف يسوي شي ..................••............
في بيت ابو زيد
هايف اللي كان للحين في محله بس فز اول ماسمع صوت الموكب ركض وهو بكل قهر وهو يدق الباب : زييييييييييييد افتح يا زيد لا ياخذها يا زيييييد زييييييد حسسسسسين افتحوا الباب
في ذا اللحظات دخل مطلق وهو يشوفهم كلهم واقفين عند باب المجلس وابو زيد يده على راسه
ركض مطلق وهو يدف محسن عن الباب اول ماسمع صراخ هايف المحبوس : من قفل علييييه !؟؟ هااااايف هاااايف
هايف اللي من ورا الباب : مطططلق تكفى يا مطلق نجد لا تروح يا مطلق
ضرب مطلق الباب برجله وهو معصب : ويييييين المفتاح
ابو زيد : مطلق وخر عن الباب يا مطلق وش بتسوي
مطلق اللي كان يدور المفتاح لف بصراخ: مانييييب موخر
حسين : مطلق المفتاح مع زيد
سحب مطلق زيد بكل قوته وهو يسحب المفتاح منه سحب الباب اللي من كثر ما ضربه هايف عيا لا ينفتح
مطلق اللي كان يصارخ : ماتخافووون الله انتم
ابو زيد اللي كان يحاول يسحب مطلق اللي انجن ولا عاد يعرف من قدامه بعد يد ابوه عنه وهو يصرخ: هايف ابعد عن الباب
ابتعد هايف وضرب مطلق الباب برجله بعد ما فتح القفل وانفجر الباب لكن اول ما انفتح جمد مطلق للي انصدم من شكل هايف اللي كان حمار وجهه مختلط بين دم وقهر ودموع وثوبه اللي كله دم يدينه ترجف وصدره يطلع وينزل بشكل مرعب ولا كانت الصدمه لمطلق بس للكل
وصرخت ام زيد : يا وييييلي يا ولدي
هايف اللي اول ماشاف مطلق انهار زياده طلع من الباب وهو يركض ومطلق اللي ركض هو وحسين وراه لكن راح الموكب والناس بدت تطلع من العرس
هايف لمطلق : لا تقول راحوا يا مطلق
مطلق اللي قرب وهو يمسك هايف اللي كان يترنح : مادريت عن راضي يا هايف مرني رايح بس مادريت ان اللي معه نجد والله ما دريت يا اخوي
شهق هايف يسحب انفاسه المتقطعه ركض من الطريق اللي يطلع برا الديره بس مع الاسف مالهم اثر
مطلق اللي كان يشوف الناس يطلعون وخاف يشوفون هايف كذا حاوط كتف هايف بشماغه وهو محتضنه ورجعوا البيت وهو يسحب هايف سحب
دخلو البيت وهو مافيه شي مسموع الا تنهيدات هايف المقهوره ابتعد عن مطلق ودخل سحب الصكوك بقهر الدنيا طلع لابوه وهو يرمي الصكوك عند رجوله وهالمره ما استحى هايف ابد انه يبكي قال بصوت يرجف : خذ يبه خذ هاذي الارض اللي تركت صاحبك عشانها خذ واشبع فيها خذ قطعة هالتراب اللي بديتها على ولدك سنين يا يبه وانا مالي هم الا اصلحك انت وابو نجد لكن يا حسافه بعتوا كل شي وبعتني وبعت نجد عشان كبرياء وش اقولك يبه وش اقولك رضيت باللي سويته فيني رضيت يوم هزيتني 17 سنه قمت وطحت وانا ساكت عشانك يبه لكن انت ما ضيعت ولا سنه عشاني
مطلق اللي حس ان هايف بدا صوته يختفي وهو اللي جرحه رجع ينزف وكان عميق لف هايف على زيد ومحسن : رضيتوا انتم بعد هاذي خوتكم يا اخواني ياخساره لكن والله والله ما اسامحكم
قال هايف هالكلمات الاخيره ومطلق وراه لف هايف اللي تقدم للباب لين وقف يشوف شباك نجد اللي مسكر والقعود اللي بتدت تنطفي صرخ بكل صوته وده لو انه يموت بعد هالصرخه : سااااامحيني يا نجد سامحيني يا قمراي وللللللله ما دريت يا نننننننجددد
ام زيد اللي كانت وراه وهي تناديه لكن ما لحقت وصرخت اول ماطاح هايف على ركبه وهو يصيح بأسم نجد لين اغمى
عليه وركض له مطلق وهو يناديه بخوف وام زيد اللي صرخت وارتعب ابو زيد والكل اجتمع عليه ومطلق اللي رفعه يسعفه
وكان اوفى بيت يوصف حال شاعرنا الكسير هو
(يا وجد حالي وجد من نام ثم قام
‏على صياح أمه وهو دون رجلين
‏عويق وأمه تنعته والنعت سام
‏وهو خابرنه يقسم الصف صفين)
اما مطلق اللي رفع هايف ياخذه لسياره وركض معه زيد وابو زيد
مطلق بحده : انا اوديه
زيد : انا بروح معكم
مطلق اللي فقد اعصابه وسحب زيد وهو يبعده : لو فيك خييير ما تركته لين وصل هالمواصيل وخر يا زيد احسن لك وان كنت بتسوي شي خلك مع ابوي وامي ابرك لنا ولك
ركب مطلق وطار وترك الكل وراه وهو كل شوي ينادي هايف بس مافيه رد ابد .................••............
في الفندق
عند نجد اللي دخلوا الفندق وهي من الساعه اللي ركبت فيها وهي تبكي بحرقه جلست ولا انتظرته يقول لها اجلسي
قرب راضي بعد ما نزل بشته : لا تخافين يا نجد وماله داعي هالخوف والبكى
وخرت نجد عنه وهو ماهي خايفه منه قد ماهي كارهته
راضي : بطلب العشاء الحين تعشي واهدي وكل شي بيزين
نجد اللي حتى ماشافت وجهه ابد ابد وصل العشاء ونزله راضي اللي غلط لما مد يده لكتف نجد : يلا
لا شعوريا دفت نجد يده بكرهه: لا تلمسني
رفع حواجبه راضي بصدمه بس مشاها : زين قومي تعشي
نجد :مابي شي
راضي : بس ما ينفع كذا
نجد وقفت وهي تتجهه للحمام بعد ما اخذت شنطتها الصغيره وهي مخنوقه من هالفستان نزلت الفستان وهي صوت بكاها مسموع لبست بجامه واسعه ججدا وعاديه ما تدل ابد انها عروس اخذت لحافها الصغير
وراحت لابعد مكان عن راضي
اللي كان مصدوم من تصرفات هالبنت كان جالس وهو يده اليمين شاده على كف يده اليسار وقف وانسدت نفسه عن كل شي : لا تجلسن هناك برد ادخلي نامي بالسرير
ماردت نجد وهز راسه راضي بغضب وطلع وهو ياخذ لحافه : نامي هنا بنام بالصاله انا
طلع وسكر باب الغرفه وترك لها حتى العشاء
اما نجد وقفت متجهه لسرير جلست وهي تضم رجولها الضعيفه لصدرها وهي وجهها الصغير ماينشاف من الدموع وهي للحين قلقانه على هايف ماتدري وش صار له او وش سوو فيه
.................••............
في المستشفى
عند مطلق اللي كان واقف فوق راس هايف اللي خيط له الدكتور الجرح ولف عليه وبعد ما سوى له اشعه يتأكدون من سلامة راسه كان نايم وهو بيده المغذي لف مطلق وهو يسمح على وجهه بذهول من هاللي صار فيهم شاف الدكتور اللي جاء وقف مطلق
الدكتور : حمدلله الاشعه تقول ان راسه سليم ما تضرر كثير بس غير ان راسه مصاب واضح ان اخوك يعاني من انهيار عصبي ضغط الدم مرتفع مره وهذا شي مب كويس ولازم يرتاح ممكن لا سمح الله يتعرض لاي شي خطير
مطلق انقلبت ملامح وجهه لخوف: والحل يادكتور
الدكتور : اول شي لازم ينزل الضغط ولاااازم بعد تسيطر على المشكله اللي يعاني منها
مسح مطلق جبينه بتوتر : طيب هو متى بيصحى
الدكتور : المفروض انه يصحى الحين لان ماينفع ابداً نعطيه مهدئ بهذا الوضع
مطلق لف على صوت هايف اللي بدا يصحى وراح له هو والدكتور
هايف اللي كان يناظر بهدوء وكأنه ناسي لكن اول ماثبتت عينه في عين مطلق رجعت كل الاحداث تنرسم قدامه
مطلق اللي شد يد هايف اللي قال بيأس : ليه ما جيت بدري يا مطلق ليه تأخرت
مطلق : هايف يا اخوك تكفى يا حبيبي هد نفسك اهدا شوي ضريت نفسك اهدا وانا اوعدك ارجعها لك بس لا تسوي بنفسك كذا
شد هايف يد مطلق بيقوم بس رجعه الدكتور: هايف وين بتروح انت للحين تعبان ما ينفع ابد تطلع اقل شي اجلس لين يعتدل الضغط
هايف وخر يد الدكتور عنه : طلعني يا مطلق طلعني اختنقت
مطلق : ابشر بس اصبر لين ينزل ضغطك يا هايف
هايف اللي عيونه كانت حمرا لف بغضب وهو يشد ثوب مطلق بصراخ: طووول عمري صااااابر صبرت يامطلق كثير صبرت لين راحت نجد من يدي وانا صاااااابر هذا الصبر اللي صبرته
مطلق سكت وهو يسنده وراح الدكتور الي يكتب ادويه ويعطي مطلق بعض التوصيات
طلعوا من المستشفى وهايف اللي فاتح كل الشبابيك وهو يحاول ياخذ نفس
مطلق الي وقف في مكان خالي بالديره عند هضبه مرتفعه نزل يساعد هايف وهو ياخذ فروته جلس هايف على طرف الهضبه وهو مستنده بيدينه على رجوله وساكت حط مطلق الفروه على ظهره وابعدها هايف بخنقه
مطلق : هايف لا تبرد خلها عليك
هايف : روحي تحترق ماني ببردان
مطلق جلس وهو يحاول يعطيه الدوا ورفضه هايف مطلق : هايف ادري ان اللي صار مب هين بس اللي انت تسويه غلط
هايف مارد عليه
مطلق : والله والله وانا اخوك يا هايف ما ارتاح لين ارجع لك نجد لكن مابيك تعيقني بحالك
هايف : راحت نجد ماعاد هي راجعه
مطلق : والله لو دريت اني لقلب الديره كلها ولا تتزوج راضي لكن والله والله ما دريت حتى اني كل ما كلمتهم مايجيبون طاري محد علمني
هايف وهو صوته مختنق عبره : كلهم رضوا وسكتوا كلهم يعرفون لكن محد قال اقول لهايف كلهم غدروني ومنعوني
مطلق :صدقني لاخذ حقك منهم كلهم بس تكفى لا تنكسر يا هايف
هايف اللي كانت بأطرافه رجفه: انا ما انكسرت هم اللي كسروني يا مطلق
مطلق سكت على صوت الجوال قفله وهو مايبي يرد على احد
هايف اللي وقف وهو مب قادر يتحمل الحرقه اللي بصدره كل ما تخيل ان نجد الحين مع غيره في بيت رجال غيره رجال له حق في كل شي في نجد بيشوف عيونها وشعرها وابتسامتها حتى بيكون له نصيب في دلال نجد غمض عيونه بقهر وهو يقول بصوت جداً متذبذب وحزين
(‏كنت أعاند واقعي و أضحك لـ ضني
‏أحسّب ، أن السالفـه ارض ( وخلاها )
‏لين ..زفوها عروس و أيقنت .. أني
‏[ مآصحيت إلا وقد ، غيري خذاها ] !
وقف مطلق اللي قرب وهو يحتضن هايف اللي جلس بهدت حيييل وضعف جلس مطلق معه وهو سانده كان اعتماد جسم هايف على مطلق وكان مطلق حزين على وضع هايف اكثثثثر من اي شي ووده لو يرجع ويحرق الدنيا بالللي فيها وبيدينه يذبح راضي وياخذ نجد لهايف عروس كان الصمت بالليل جدا قاتل وعدا ليلهم وهايف مستند على كتف مطلق الين ما اذن الفجر ووقف مطلق يصلي وهايف بجنبه وبعدها تحركوا لدييره
.
.
.
انتهىâ™¥

5 - 11 - 2024, 09:37 PM

البـارت الثــامـن والعشــريـن ..
.
.
.
ليل نجد انقضى وهي تراقب الشباك وهي منسدحه بهدت حيييل بنص السرير اول ما اذن وقفت وهي توضي وتصلي ولكن كان بكاها في صلاتها اشد واقوى وهي تمتم بالدعاء
وهذا اللي اثار شك راضي اللي كان يراقبها مع الباب باستغراب من هالانهيار اللي مستحيل يكون خوف او فقد اهلها
استمرت نجد تدعي من كل قلبها ان ربي يفرج كربها ويقربها لهايف ويبعد راضي عنها حتى لو هو يموت ألين ما طلعت عليها الشمس ونامت على سجادتها
................••............
في الديره
عند ابو زيد اللي صلى فالمسجد هو وزيد وحسين ومحسن والكل يسأله وين عيالك الباقين!؟ ليه امس محد حضر العرس غيرك انت ومحسن ؟! وكان جوابه ان هايف مريض واعذار واعذار واعذار يسكت الناس فيها لكن ضميره وش يسكته رجع للبيت وجلس وهو ينتظر مطلق وهايف اللي محد يرد منهم واول ماطلعت الشمس دخل مطلق وهو يد ورا ظهر هايف ويد ماسكه يد هايف
فزوا كلهم وركضت ام زيد وهي تحتضن هايف : بسم لله عليك يا حبيبي بسم لله عليك يا قرة عيوني هايف يمه انتي بخير تكفى لا تخوفني عليك
ابو زيد : وش قالوا لكم
زييد قرب بياخذ هايف بس ابعده مطلق بحده
مارد هايف على احد ابد ودخل مع مطلق المجلس
وركضت سلمى اللي كانت حزينه وهي تحط له مخده ولحاف وانسدح قبال الباب هايف ووجهه على بيت ابو نجد
سلمى برجفه مسكت يد هايف وهو خانقتها عبرتها : والله والله ياهايف مادريت ولا عرفنا الا يوم الخميس العصر وابوي سحب كل الجوالات وتعرفه حلف يمين ودين اللي يجيب سيره بيذبحه حتى ما خلانا نقول لمطلق ابد وحتى جوال ميثى اخذه زيد والله كنت بعلمك حتى لو اذبحوني
هايف مارد على سلمى وسكتت سلمى اول مادخلوا ابوها واخوانها وهم مهما حاولوا يكلمون هايف ماكان يرد وهو يا مغمض يا عيونه الحمرا على بيت ابو نجد
ابو زيد اللي من القهر عصب : هااااايف والله لو ما تفز على حيلك مثل الرجال اني اعلم بالعصا ذي على جنوبك
مطلق وقف بغضب : يبببه ترا ما عاد الموضوع متحمل علوم ووسوم كفايه اللي سويتوه وكفايه اللي صار ارحموا من فالارض يا ناس .
زيد: حنا ما سوينا اللي سويناه الا عشانه
مطلق اشر على هايف : هذا اللي عشانه !
حسين وقف اول ماشاف ابو ثامر وابو صيته وبعض اهل الديره جايين يزورون هايف سكتوا وتفرقوا
ودخلوا الشياب وهو يسلمون والكل يسلم عليهم لكن هايف ما قام والكل يناظره صمته بإستغراب وصدمه
ابو ثامر: يا ابو زيد سلامات علامه هايف منقلب حاله كذا عسى ماهو شي كبير
ابو زيد اخذ نفس :والله ما ندري له ايام تعبان ويوم جاء امس وهو على هالحال وطاح علينا وضرب راسه وهذا هو حتى هرج ما يهرجنا
ابو صيته بطرف عين : يمكن انها ذنوب
مطلق اللي كان متكتف : ما ازكي هايف بس ما ظنتي ذنوبه كثر ذنوبك
لف ابو زيد لمطلق بحده : بس ياولد
ابو تركي : وده لشيخ يا ابو زيد ولدك ما اظنتي انه طيب
ابو ثامر : لا لا اقول جب الشيخ له هنا
ابو زيد: لا ما يحتاج ابد ايااام ويطيب
ابد ماكان هايف يسمعهم بالعكس كان عالم ثاني ما يجمع الا هو ونجد بس ................••............
العصر في الفندق
عند نجد اللي صحت وهي اللي ماقدرت تنام من خوفها وكوابيسها ورجفتها كانت للحين بمكانها وماهي مهتمه لراضي كان فيه او مب فيه
راضي اللي دخل وهو يناظر العشاء اللي للحين بمكانه :ليه ما تعشيتي
نجد ماردت
راضي : اللي تسوينه ما ينفعك لازم تاكلين او اقل شي توقفين بكى وتردين علي اذا كل بكاك خوفك مني تراي مانيب مسوي لك شي انا زوجك
رفعت نجد راسها بحقد : انا ماني زوجة احد
ناظرها راضي بهدوء وقال : يمكن بالمعنى الحقيقي ما صرتي زوجتي للحين لكن بنعدي هالقلق اللي انتي فيه وبعدين نتفاهم الحين قومي وافطري
نجد لللي صدت وهي ما ترد عليه وحاول راضي انه يكلمها بس ما ترد طلع وهو يصفق باب الغرفه بغضب وهو محتار في امرها وحس ان تصرفاتها تدل انها مغصوبه عليه ولكن ماكانت عنده مشكله وهو يقول ( مثل جمالها ما ينتعوض يا راضي خلها ايام وبتطخ وترضى يكفيها انك تسفرها وتعيشها عيشة ملوك)
وماكان راضي يدري انه لو يعيش نجد بييين رموشه
ما ملكها
................••............
في بيت ابو زيد
اما عند مطلق اللي ذبح نفسه يحاول بهايف ياخذ الادويه بس رافض طلع للمطبخ وضيق الدنيا يعتلي صدره
اديم لفت وهي تناظره بحزن : ما اخذه
مطلق : لا
اديم : مدري وش اواسيك فيه يا مطلق بس ذنبهم كبير
مطلق : والله ما اخليهم ينجون فيه والله
رجع للمجلس وهو يشوف هايف طالع للحوش وهو منسدح على رجول امه اللي تقرا عليه وتمسح على قلبه
زيد اللي قرب لمطلق : تعال بكلمك
طلعوا برا كلهم حسين ومحسن وزيد وهم واقفين قدام مطلق اللي متكتف
زيد: مطلق سكتنا وقلنا من حقك تطلع غضبك لكن لا تعاملنا وكأننا متعمدين نأذي هايف حنا بعد اخوانه ونحبه ونخاف عليه
حسين : مطلق انت تدري اني مستحيل أأذي هايف والله لو بيدي لعطيه عيوني
محسن: انا ماني راضي بحال هايف بس انا مستحيل ارضى بزواجه من نجد وانا مع اللي سواه ابوي
مطلق ناظر محسن باستحقار : انت قاضين منك ما تنفع ابد
ولف يناظر زيد : لكن انت وش نقول عنك قبل سنين ما تركت شي ما سويته عشان تقنع ابوي تزوج ميثى وكلنا وقفنا معك وهايف اكثر واحد ولا انت ناسي كلكم ما تستاهلون وقفة هايف معكم هاذي اخوتكم !!!
زيد بغضب: وش تبينا نسوي
مطلق بغضب وهو يدق صدر زيد : وش تسوووي مثلك المفروض يخلي المستحييييل يصير لعيون اخوه مثلك يكسر الدنيا ولا تكسسسر اخوه بس تدري هذا مب انتم هذا الاخو الحقيقي ما يهمني وش اللي سويتوه واللي ماقدرتوا تسوونه لكن اعرفوا اني مستحيل انسى لكم اللي سويتوه
لف لحسين : وانت يا حسين ماعليك الا العتب
راح وتركهم وهو يجلس بجنب هايف
................••............
هاليومين اللي راحت مرت وهي اخذه حقها واااافي ومككمل من صدر هايف اللي ابد كان هذا حاله من يومين ما نطق بحرف واحد ابد وهي بس وجبه وحده يجبره مطلق عليها وبعض الادويه والنهار نايم لكن عمرها ماكانت نومة راحه اقرب وصف لهالنومه غيبوبه مشاعر وتلف اعصاب اما الليل كان يقضيه هايف سهران بالحوش وهو يجدد اوجاعه بشوفة شباك نجد
................••............
اما نجد هاليومين كانت ثقيله عليها وهي من جهه تحارب دموعها وخوفها ومن جهه تحارب راضي اللي كان يحاول انه يفهم وش فيها بس ما عطته مجال
في الفندق كانت كعادتها جالسه بصمت تراقب الشارع لفت على صوت راضي: نجد قومي تغدي وبعدها بنروح لديره
نجد لفت عليه بحقد وهي مستحيل تقبل ان احد يناديها بنجد وهو ملك هايف : لا تقول نجد
راضي بحده : وش اقول ؟! يا زوجتي مثلاً
نجد وقفت بهدوء وراحت تلبس وهي ودها تروح الديره تسمع اخبار هايف وتشوفه
وبعد ما جهزت بسرعه طلعوا متجهين لديره
..................••............
في بيت ابو زيد
هايف اللي كان جالس بجنب مطلق والكل موجودين
دخل مؤيد اللي كان مصدوم من وضع هايف قرب يحتضن هايف بمزح وده يغير جوه : حبيبي ياهايف اشبك كذا اكيييد اشتقت لي مررره صح لكن ماعليك شوفني جيت لك
هايف اللي مد يده لظهر مؤيد يشد عليه وبصوت متحشرج : اي والله مشتاق يا مؤيد
ابو فايز اللي بلغه ابو زيد باللي صار وكان حرفيا ومصدوم ويناظر هايف بيأس وكل العايله تقريبا عرفوا بعلة هايف
والكلام كان يدور ويدور ومؤيد يحاول قد مايقدر يغير جو هايف بس ماقدر الا انه يطلع منه كلمة مشتاق بس
.................••............
عند البنات
كانت لطيفه جالسه بصدمه وهي تمسع سلمى تشرح لخواتها بحزن اللي صار
شريفه اللي كانت مره حزينه: يا ويل قلبي عليه هايف وش بيصير فيه الحين
اديم : ان شاء الله مابيصير له شي ومطلق حلف انه يرجع له نجد بس مدري كيف بيرجعها
ريوف : الله يستر لا ينجن مطلق بعد ويحوس الدنيا
لطيفه : خليه يا اختي يحوسها عمي غلطان مليون بالميه حرام اللي سواها وهو عارف
سلمى: اصلا بالحقيقه حتى لو عرف هايف وش بيسوي غير انه بيفضح نفسه ويفضحها معه
ميثى : صح انا ضد اللي سووه بس انا مع رأي سلمى
شريفه: انا بروح لامي مسكينه انفجر راسها من البكي
راحت شريفه ولفت سلمى: مع انه مب وقته بس الحسنه الوحيده في هالموضوع ان ام شحوم مب فيه ولا فضحتنا
لطيفه: تعالي هي وش صار عليها
سلمى: ابد اشترا لهم ابوي بيت في اخر الديره وخلاها تنثبر هي ومحيسن فيه
اديم: احسن شي صار
................••............
عند نجد اللي دخلوا الديره ولفت وهي عيونها تراقب بيت ابو زيد اللي كان بوابته مفتوحه والرجال يدخلون ويطلعون ارتعبت نجد بخوف ان هايف صار له شي وقفوا وهي للحين تناظر البيت وماكان بيت ابو راضي بعيد عن بيت ابو زيد دخلت اول ماسمعت صوت ابو راضي يرحب فيها وام راضي بعد وكانت نجد جداً كارهه راضي واهله وسلمت بدون نفس وجلست وهي حتى ما نزلت عبايتها
ام راضي : عطيني عبايتك يانجد
نجد: معليتس ياخاله كذا مرتاحه
راضي ناظرها بحده : عطيها امي يا نجد
وقفت نجد بضيق وعطتها وهي ماودها ان راضي يشوف شي من كشختها اللي ماتعتبر كشخه عروس بس ان نجد تشوف ان هاذي الكشخه العاديه كثيره على راضي واهله
وابو راضي اللي طاير في نجد جاء وهو بيده هديه كانت جدا جدا جميله بتعليقه ذهب ومجموعة عطور ومبلغ لكن كان جدا متكلف بها واي وحده مكان نجد بتطير من الفرحه
نجد باحراج: ماله داعي تكلف على نفسك
ابو راضي : ولا شي من حقتس انتي الغاليه مرت الغالي
صدت نجد بكرهه وهي تحطها على جنب وهي ودها تضرب بها راضي على راسه
وام راضي بعد جابت هديتها وكانت متكلفه بعد واخذتها نجد وهي مافكرت تشوفها وكانت ساكته رغم محاولاتهم في انهم يسولفون معها وهي تدري زينً
( ان امه وابوه مالهم شغل ومساكين فرحانين بولدهم وانها المفروض تعبترهم مثل اهلها بس مع الاسف كل ما تتذكر هايف كل ما بعيونها يمر طيفه تكرههم كلهم وتكره الديره بكبرها)
ابو راضي وقف وهو متوقع نجد مستحيه: اجل حنا بنروح ونخليكم حريم مع بعض
ام راضي : وين بتروحون
ابو راضي وهو يضبط شماغه : قم يا راضي بنروح لبيت ابو زيد
راضي نزل فنجاله : ليه!؟
نجد لفت وهي تناظر ابو راضي بخوف من اللي بيقوله
ابو راضي : بنروح نزور ولده هايف يقولون مريض له ايام
راضي اللي كانت علاقته بهايف سطحيه مثل اي علاقه بين عيال قبيله وحده مايتواجهون الا بالاعراس بس اللي كان يعرفه ويعرفه زييين بعد ان هايف له ثقله فالقبيله والكل يحبه ولا عمرهم تقابلوا الا هايف مبتسم ويضحك ويمازح الكل بالعربي كانت له شخصيه جدا محبوبه : افا لييه سلامته وش فيه ؟!
ابو راضي : ابد يوم العرس ماحضر وانا استغربت واسال ابوه ويقول مريض واخوانه عنده وهاليومين الديره مالهم سالفه الا هايف ولد ابو زيد يقولون من كثر التعب مساوي الارض وناس تقول عين وناس يقولون مسحور وناس يقولون مسكون وللحين محد يدري وش علته
ام راضي: الله انه يصبر قلب امه
نجد تجمعت الدموع بعينها وهي ودها تقول ( انتم مرضه ومرضي حسبي لله عليكم )
راضي : لا اله الا للله اجل يلا يلا
نجد اللي فزت وهي خايفه من روحة راضي لهايف : بروح معكم
لفوا كلهم يناظرونها وتوترت نجد : اقصد بروح معكم لاهلي بسلم عليهم
راضي: اجل يلا اللبسي
لبست نجد بعجله وهي حتى ما تدري كيف لبست نقابها حتى شنطتها من السرعه نستها بس عطتها ام راضي واخذتها وركضت ورا راضي وابو راضي وهي الود ودها تروح معهم لهايف بس ضاق صدرها وهي تشوف بيتهم دخلت وهي حتى ماودها تشوف احد ودها تركض لنفس الشباك وتناظر هايف
وكملوا ابو راضي وراضي لبيت ابو زيد
.................••............
في مجلس ابو زيد
اللي كان مكتض برجال الجماعه اللي يزورون هايف وكل واحد يحط له حل من راسه
وهايف اللي جالس بصمت وهو عيونه ذبلانه ووجهه اصفر وشارد
ابو تركي اللي جاء معه شيخ ومصر انه يقراء عليه وهايف جدا مستسلم كان مطلق يمين هايف والشيخ يساره وهو حاط يده على صدر هايف اللي مفتوحه ازاريره وصوت الشيخ يقرا ويقرا
والكل ساااكت وطبعا حسين وزيد اللي كانوا على الباب واول ماشافوا ابو راضي وراضي جمدوا
ماقدروا حتى يتحركون وكانت كارثه ان راضي جاي
حسين لف بهمس : زيد وش نسوي
زيد: صرفهم صرفهم يا حسين
حسين : وش اقول
ما مداهم يفكرون الا دخل ابو راضي وراضي وبكل صوت جهوري قالوا : السلام عليكم
ولفوا كل المجلس يناظرونهم وابو زيد وابو فايز وعيالهم كانو يناظرون برعب وصدمه
في هاذي اللحظه كان الشيخ يقرا ايه معينه لها تأثيييير لكن فز هايف واتسعت عيييونه اول ما سمع صوت ابو راضي وراضي اللي لو يموت ما ينساه ارتفعت شهقات صدره وبدا صوته المكتووووم يطلع ولكن كل المجلس لف لهايف اللي فز واقف وهو عيونه حمرا وصوته المقهور يتمتم بكلمات وفز الشيخ وهو يصيح في مطلق :امسكه امسكه
والكل جمد متوقعين هايف تأثر بالقراءه و مطلق اللي اول ماشاف راضي مسك هايف وهو يحمد ربه انه الشيخ فيه وهايف اللي يتفلت وهو لو يمسك واضي يدفنه كان يصرخ في مطلق والشيخ بقهر وصوت رايح: فكووووني وللله لذبحه والله والللله فكووووني
ابو راضي وراضي ما كانوا يدرون ان هالكلام لهم ولا احد اصلا كان يدري بالعكس بدا المجلس ينفض متوقعين انه الجني يتكلم على لسان هايف اللي من قهره تغير صوتته ولا احد فاهم الوضع الا اهل هايف
انقهر هايف من الشيخ اللي ماسكه ودفه بكل قوته وقهره وهنا فعلا هجوا كللل اللي بالمجلس بما فيهم مؤيد اللي زبن عند امه وهو مرتعب
ابو راضي اول ماشاف هذا الوضع قرر انه ينسحب هو وولده وهم مايدرون وش السالفه
الشيخ وقف وهو يجمع اغراضه : خله يهدا وبعدين ارجع له يا ابو زيد
وطلع الشيخ وفضى المجلس وهو يدف مطلق بغضب : يا مطلق يامطلق بكل قوة وجهت جاي يا مطلق
مطلق : هايف تعوذ من ابليس يا هايف
وقف ابو زيد اللي صرخ في هايف : اسمعني عاد اترك الضعف وفز على حيلك مثل الرجال انا ما ربيتك عشان تنسدح هنا مثل الحرييييييم قم قم
ابو فايز: يابو زيد تعوذ من ابليس لا تزيد الطين بله
فايز : عمي هد الله يخليك
هايف بصراخ :ايييه صح ربيتني يا يبه لكن الحين تنسى ولدك اللي المفروض توقف معه ضد الدنيا لكن ما عليه ماعليه بقوم وبروح بعد لكن صدقني ان اخر يوم لي في بيتك هو ذا اليوم
طلع هايف بقهر وطلع مطلق وراه وهومعصب بعد ماقال : ليتك يا يبه كثر ما اهتميت بتربيتنا وفضيحة الناس تهتم بقلوبنا وتداري خواطرنا اكثر من هالناس
ابو زيد اللي كان يهاوش بضيق وغضب : ما ربيتكم رجال شديدين رجال ينشد فيكم الظهر عشان يكسر ظهوركم حب بنت لكن انا الغلطان انا
ابو فايز : يا ابو زيد ما كل شي يجي بالشده ولا يجي بالهواش والكبرياء
زيد : خلاص يا جماعه تعوذوا من ابليس
مؤيد اللي رجع بخوف : وينه هايف!؟ لايكون طار فيه الجني !!!
الكل حرفيا صاروا يناظرونه ( ��)
ابو زيد : والله لو ما تنقلع عني لطيرك انا
فايز اللي قال ببتسامه خفيفه: تعال يا مؤيد الله يهديك وش جنيه
مؤيد: شفتوا يصارخ وكذا والشيخ يقراء
زيد اللي جلس بيأس : والله يا مؤيد احتاج عقلك هذا هالفتره مريح راسك ولا انك فاهم شي
..................••............
في بيت ابو نجد
نجد اللي ما تدري كيف تهربت من امها وركضت لغرفتها دخلت وهي تقفل الباب وركضت تفتح الشباك وكانت تشوف المجلس ولكن اول مافتحت كانت تشوف الناس يطلعون مفجوعين من مجلس ابو زيد وراضي وابوه واقفين بصدمهه وبعدها طلعوا مستغربين وطاح قلب نجد ما تدري وش تسوي وش الحل ؟وش صار ؟ هايف بخير ولا لا !؟ وش سوا اول ماشاف راضي !؟ لكن طلعوا ابو راضي وراضي سالمين وبعدها طلع الشيخ اللي يعدل مشلحه وبعدها بفتره طلع هايف اللي ملفوف راسه وهو يترنح بمشيته
وشهقت نجد ورجعت وهي تسكر الشباك او مادقت امها الباب
ام نجد: وش بلاتس انتي !؟
نجد : كنت ابي اعدل ملابسسي
ام نجد وخرت عباية نجد وشهقت : وش ذا يابنت وين الفساتين الحلوه اللي اشتريتها لتس لايكون رحتي لناس كذا فضحتينا عندهم بخلاقينتس ذي
نجد سكرت عبايتها بكرهه : ما احد يستاهل اكشخ له واللبس له ولاا اني لابسه شي عدل وبفضحكم عشان تعرفون كيف تغصبوني
ام نجد اللي من الصدمه مدت يدها وهي تطبع كف على خد نجد اللي شهقت بصدمه
ام نجد : الظاهر اني ماعرفت اربيتس يا قليله الادب لكن والله وهذاني احلف لو ما تعدلين اني لاقول لابوتس امسك بنتك وشف وش بلاها والله يا نجد اني لوريتس شغلتس والله واياني واياتس اسمع انتس مهبلتن بنفستس كذا عندهم تسمعين
نجد اللي بكت : وش بلاي يمه بلاي انكم زوجتوني واحد اكبر مني بسنين زوجتوني انسان مريض عقلي وغصب علي وتبوني اضحك واستانس
ام نجد : اذا فيه احد خبل هو انتي اعنبوا حيتس انتي اخذتي زينه الشباب عقل وثقل وجاه ومال وتقولين مريض اسمعيني عاد معتس خمس دقايق تعدلين فيها وجهتس وشكلتس والا والله لها الخيزانه اكسرها على ظهرتس
طلعت وتركت نجد اللي كانت تبكي بقهر وهي تصرخ: هذا استقبال ام لبنتها بالله عليتس
سكرت الباب وهي تبكي وركضت تدور على هايف
.................••............
في بيت ابو زيد
عند هايف اللي ركب سيارته بقهر وهو يصيح على مطلق : وخخخخخر عني يا مطلق وخر
مطلق ؛ وين بتروح انجنيت
هايف : معاد لي جلسه هنا مستحيل اجلس هنا بعد
مطلق : طيب طيب انا اوديك وين بتروح
هايف بقهر: بطلع من هالديره اللي خنقتني
ام زيد : وين بتروح يا وليدي وين بتروح وتخليني اخاف عليك
هايف بحزن: الحين خفتوا علي يمه الحين
مطلق : يمه حبيبتي ادخلي انا بروح معاه
نزل مطلق هايف وركب وهو يسوق فيه وطلعوا والكل مايدري وين بيروحون
اما هايف اللي كانت الديره ماهي سايعته وكارهها بشكل وطلب مطلق يوديه الخبر وخصوصا ان ابو فرج والعيال مايدرون باللي صار لهايف الا رؤوس اقلام فقط مايعرفون التفاصيل
ماكان من مطلق الا انه يطيع هايف عل وعسى يسلى ويصير احسن .................••............
في بيت ابو نجد
نجد اللي فتحت الشباك بس الصدمه ان هايف راح قدام عينها وهي ماتدري وين راح سكرت الشباك بحزن وهي تمسح دموعها عدلت شكلها ونزلت وهي لابسه وانقذها من يد امها جيت ابوها وراضي وسلمت عليه وطلعت مع راضي بكرهه الدنيا وهي تتمنى يصدف طريقهم هايف
كان ودها تسأل راضي وش اللي صار لكن انصدمت اول ماقال راضي : نجد انتم ماعاد تتواصلون مع اهل ابو زيد بعد اللي صار بينكم صح
نجد اللي كان المفروض تطنشه لكن ماقدرت وقالت بخوف: لا ما نتواصل معهم ليه وش صاير
راضي اللي فرح انه اخيرا حصل موضوع يناقشها فيه حتى لو نكد : ابد اسولف مع عمي من شوي عن اللي صار لهايف وقال مايدري عنه
نجد بصوت يرتجف :وش صار له !
راضي مد يده ببتسامه: ما ودي اخوفك بس الظاهر انه فيه شي خطير
نجد سحبت يدها وهي تسمعه يعلمها باللي صار وكان ودها تخنقه بدل هايف اللي ماقدر يوصل له
من بعد ما عرفت طنشت راضي بشكل نهائي ولا عاد ترد
ولف راضي بضيق :رجعنا على طير ياللي
نجد تكتفت وماردت
راضي : طيب ، اسمعيني جهزي نفسك بنروح جده وبخلص لي كم شغله ومن بعدها بنروح شهر العسل
نجد : مابي اروح لمكان بجلس هنا
راضي بحده: صبرت لك هاليومين وقلت مسكينه وخايفه لكن الظاهر ماهو خوف قد ماهو تمرد وعدم رضا لذلك اسمعيني زين وافهميني وحطي في بالك ان ماسكت خوفا منك ولا تزوجتك اربي اطفال من جديد واداري وادلل اتركي هالدلال اللي مايودي ديره واعتدلي وكلميني زين
نجد خافت انه يقلب عليها ويسوي فيها شي وكانت تتعمد تستفزه عشان يطقها وتروح لابوها وتطلب الطلاق لكن سكتت لين توصل الفندق
اما راضي رجع لمكالمته العمليه الممله
................••............
المغرب وفي الخبر
عند العيال كان مشاري يدور في حوش ابو فرج بضيق : انا للحين ماني مستوعب وشلون نجد تزوجت
متعب : والله ماني شايل هم الا هم صدمة هايف
ابو فرج: وش قالكم مطلق بالضبط
مشاري : كل اللي قاله ان نجد تزوجت وهايف تعبان شوي وازمه وتعدي
مقبل : مع انه مب وقته بس مطلق ذا عليه اختصارات شديده فقع قلبي عجزت اطلع منه قصه كامله كلها كلمه ورد غطاها نشف ريقي
مايمديهم يردون عليه الا وقفت السياره عند باب عمارتهم ونط سعود : هايف يا شباب
تركوا كل شي بيدهم وركضوا له واولهم ابو فرج اللي اول ماشاف وجهه هايف انهااار بدوره وجلس وشد عليه متعب بضيق وهو يقول: تكفى ياعمي لاتغرق الغرقان اكثر
تقدم هايف لابوفرج وجلس وهو يحضنه بحزن الدنيا : ماكانت قصتي مثل قصتك الدنيا ماعطتني نجد الدنيا اخذت من كل شي واخذت مني نجد
حضنه ابو فرج وهو حزين : بيجبر الله كسرك يا هايف يا ولدي وبيعوضك كل خير
هايف اللي كان راسه في حضن ابو فرج ردد بصوت حزين : راح الخير مع نجد يوم راحت بأذني سمعتهم يزفونها لغيري
مشاري ركض وهوي يسند هايف ويوقفه بحزن : هااايف يا اخوك لا تنكسر لاتنكسر واللي مايبيك انت ماتبيه
هايف اللي ناظر مشاري بحزن: بس انت تدري ان نجد تبيني
مشاري: ما كتب لك ربي فيها نصيب
هايف جلس بهدت حييييل : اااااه من النصييييب ااااااه
متعب شد على كتف هايف :هونها وتهون ياهايف
سعود اللي بهاللحظات ابد ماقدر يتمالك نفسه وهو حزن هايف على نجد ذكره بحزنه على زوجته اللي توفت ابتعد بعياله بعد ماسلم عليهم وهو الحزن ياكل صدره
اما مطلق سلم على الشباب واستاذن انه بيكلم ويرجع
والشباب كلهم جلسوا جنب هايف بصدمه من تفاصيل القصه اللي يقولها
اما مطلق اللي كلم سلمى وقالت له ان امه ارتفع ضغطها واخذوها للمستشفى بس الحين هي بخير وفالبيت وقلق مطلق كثييير وخاف ورجع لهايف وهو ماوده يخوفه
مشاري : مطلق تعال تقهوا اكيد انك تعبان
مطلق جلس بقلق : لا يعطيك العافيه مابي شي
ابو فرج: اكيد انهم جوعانين استعجل العشاء يا وليد
مطلق سكت وهو يقول يمكن هايف يرضى وياكل وكان مطلق متوتر مايقدر يترك هايف ولا يقدر يجلس يحاتي امه ولكن تلاشى كل خوفه على هايف وهو يشوف ابو فرج اللي اجبره بحنيه انه ياكل ويقوي نفسه ومشاري اللي يدرايه مثل عيونه وهو يواسيه صح بشده لكن مثل البلسم ومتعب اللي رغم جديته الا انه كان جدا حنون وهو يتكلم مع هايف بطريقه ايجابيه تهون الموضوع على هايف اما مقبل اللي مابين فتره وفتره يرمي له كم مزحه ويبتسم لها هايف اما وليد اللي كان ساكت وهو مايحب ابد يتعمق في جروح الفقد وسعود اللي رجع بعد ما هدا وهو وعياله عند هايف وكأنهم يسلونه شوي وطبعا ام فرج اللي لبست عبايتها وجت وهي تسمي على هايف وتقرا عليه
وطبعا عرف مطلق انه بأيدي امينه ورغم انه كل شي يقوم ويتصل ويرجع
وانتبه له هايف : مطلق احد فيه شي
مطلق اللي بان توتره : لا مافيه شي ارتاح انت
هايف ؛ مطلق اعرفك يا مطلق
ابو فرج: وش مقلقك يا مطلق
مطلق بضيق : ابد امي ارتفع عندها الضغط شوي بس طيبه ماعليها
فز هايف يبعد عزيز من حضنه وقال بتعب :ليه وش صار لها !؟
مطلق : وليه بعد يا هايف وش تنتظر من امي وهي تشوف حالك المهم انها بخير وطيبه
هايف غمض بضيق : عطني بكلمها
مطلق :طيب
اتصل هايف بخوف على امه وردت سلمى : هلا
هايف : عطيني امي بسرعه
ام زيد سحبت الجوال : هايف يا امي يا حبيبي انت بخير
هايف :بخير يا الغاليه بخييير انتي وش فيتس
ام زيد : موجعني قلبي عليك يا ولدي
هايف : يمه يا حبيبتي لا يوجعتس قلبتس كفايه قلبي علي مابي اخاف عليتس بعد وانتي لاتخافين علي انا بخير
ام زيد.: لا تحمل قلبك يمه فوق طاقته وتتعبه ربي بيعوضك كل خير
هايف قال بمقصد يطمن امه: اكيد يمه المهم انتي لا تضيقين
ام زيد : ابشر يمه انتبه لنفسك
هايف : ابشري
سكر الجوال هايف ولف على مطلق : لازم تروح لامي
مطلق بحده: اروح واتركك بلحالك معصي ! لو تموت ماعاد اروح واخليك
هايف ببتسامه ضيق: وش بيصير فيني يا مطلق اكثر من اللي صار بموت !؟ مايفرق معي
مطلق : هاااايف اترك هالكلام
هايف قرب وهو يحضنه: عزاي في اللي يصير ان لي اخو مثلك يا مطلق
مطلق شد عليه وهو يخبط على كتفه: انا معك في كل شي ماعليك
هايف: ادري عشان كذا روح وخلك عند امي اخوانك ماينشد بهم الظهر
مطلق نزل راسه بضيق :الله يسامحهم
مشاري جاء : مطلق اذا ما انت بمرتاح ارجع لديره وتطمن على امك ولا تخاف هايف بعيونا وباذن الله مايصير له شي
مطلق : اي والله اني متطمن عليه معكم بس مقدر اخليه
متعب : لا تشيل هم تقدرتقدر ونموت ولا يصيب هايف شي روح وتطمن على امك وبترجع وتحصله بخير ولا بخير بالحيل بعد
ابتدوا كلهم يأكدون هالشي لمطلق بما فيهم هايف صح كان مهددددود حيله بس وده مطلق يروح عند امه وهو من بعد اللي صار انهدمت ثقته في ابوه واخوانه
بعد تردد رجع مطلق مع طريقه وهو قلبه شايل هم هايف وهم امه وهم كيف يرجع نجد لهايف كيف يفتك من راضي
................••............
في الفندق
نجد للي كانت مهما حاولت تستفز راضي كان مطنشها وجالس لشغله والييين استفزته بأخر محاولاتها اللي مرت وهي تدعس على سلك شاحن اللاب وانطفى وطار كل شغل راضي اللي وقف بغضب الدنيا واتسعت عيونه بقهر وهو يصرخ بقهر: وش سويتي يا غبييييييه
ناظرته نجد برعب ارتجف منه قلبها وهي تشوفه بمنظر عصبيه ما عمرها مرت على نجد اللي ماتعودت على مثل هالعصبيه وهالصراخ
رفع راضي يده وهو ناوي يكفخها كف يطير عقلها بس تمالك نفسه بالقوه ولف هو يحاول يهدا ورجع وهو يسحبها من ذراعها فتح الاب وهو يوريها ان كل شي طار : ناظري وش سويتي ناظري تدرين وش سويتي طيرتي شغل انكسر ظهري عليه عشان يكون لي مستقبل وعشان اعيشك مثل العالم لكن واضح انك مايفرق معك شي اسمعيني زين وفهميني ادري ان كل هالتصرفات انتي متعمده تستفزيني فيها لكن الحين بتقولين لي سبب هالتصرفات والا والله لخلي ليلك اسود من شعرك
نجد اللي كانت تنتظر الفرصه بس خايفه : ما ابيك طلقني ما ابيك
طارت عيون راضي بصدمه : وشو !! مهبوله انتي في انسانه صاحيه تطلب الطلاق وهي عروس
نجد : ياخي من قالك اني صاحيه مانيب صاحيه طلقني وارتاح وريحني
ابتعد راضي عنها وهو يقيسها بنظره وكأنه يبي يكتشف كل شي ممكن هي تخبيه ورفضها القطعي له وش هالسبب اللي يخليها تصيح في وجهه وتقول طلقني
اما نجد جلست وهي تمسح دموعها: الله يخليك الله يخليك اتركني بحالي انا ما ابيك لا تأذيني ولا أذيك ادري مالك ذنب وانا بعد مالي ذنب
راضي اللي كان ساكت بصدمه وهو يناظرها بذهول
.................••............
اما في بيت ابو زيد
وقف مطلق اللي كان الوقت متاخر وهو ما قال لاحد انه جاء دخل البيت وكان كله ظلام وهدوء وعرف انهم بخير وما عندهم اي مشكله ترك كل شي بتعب وهو خلاص يحس انه من التعب كتوفه بالارض دخل قفل باب بيتهم واتجهه لغرفته وهو متوقع اديم نايمه مع البنات نزل ثوبه ودخل وهو يتروش يمكن يخف تعبه ولبس وطلع وارتمى على السرير بتعتب ولكن فز اول ما سمع صراخ تحته ويدين تضربه وهي تصارخ وعرف صوت اديم وكان يناديها وهي ماتسمعه من الصراخ بالقوه مسك مطلق يدينها : اديم بسم لله عليييتس وش بلاتس
اديم اللي كانت بتنام مع البنات بس انزعجت من عبود اللي كان مريض ويبكي وقررت تهج لغرفتها وتنام براحه ولكن اول ما دخلت بلحافها وتغطت سمعت صوت نويصر برا وماتت من الخوف وهي متلحففه برعب وغفت ولكن فزت على الهبده اللي جتها وصرخت برعب لكن اول ما سمعت صوت مطلق هنا انهارت وهي تضربه بقهر : مططططلق حرام عليك ليش لييييش تحب تفجعني حرام عليك
مطلق : والله ما دريت انا بعد انفجعت مثلتس وش دراني انتس بتنامين بلحالتس وانا مانيب فيه
اديم وهي تبكي فكت يدها من يدين مطلق ولا شعوريا ألجمت مطلق وحضنته بخوف : على بالي انك نويصر المجنون كان قلبي بيتوقف
مطلق اللي في هاللحظه حس ان قلبه هو بيتوقف ابتسم بألم من وجع دقات قلبه وخضع بكل جبروته وقوته بين يدين اديم وهو يحتضنها : بسم لله عليتس وعلى قلبتس والله ما دريت والا كان اطلع احب راس نويصر هاللي نافعني والله
اديم وخرت عنه بقهر واحراج لكن شدها ومطلق اللي انسدح بتعب : امزح معتس وش بلاتس
اديم مسحت وجهها : كيف جيت ! مب على اساس تجلس بالخبر مع هايف
مطلق اللي كان حاط يد اديم على صدره وهو يمسح عليها بيده : كنت بس ان هايف يوم عرف ان امي مريضه اصر اني ارجع عندها وانا بعد ما ارتحت وقلت ابعد شوي عن هايف يمكن يصحى لنفسه شوي
اديم : للحين تعبان !
مطلق : مقهووور اكثر من انه تعبان بس بتعدي
اديم : طيب وش بتسون
مطلق : مدري تلف مخي وانا ادور حل ما يأذي لا نجد ولا هايف بس ما لقيت
اديم : اصبروا شوي يمكن يصير شي
مطلق وهو اللي بدت عيونه تسكر بتعب : هذا هو المهم اني ميت تعب بنام
اديم : طيب تكفى قبل تنام اطرد نويصر اقلقني عجزت انام
مطلق وهو يشد اللحاف من ورا ظهرها ويسكر الكشاف : خليتس معي وانسي نويصر وبيروح
سكتت اديم اللي رغم خوفها من نويصر الا انه يتلاشى بوجود مطلق
.................••............
في الخبر
عند هايف اللي بعد ما ناموا كل العيال كان هو ومشاري جالسين بالسطح وهم مسكرين كل الانوار وقدامهم بس بيالات شاهي وكان مشاري يحاول يشتت السوالف ولكن مايقدر لان كل سالفه توصل لنجد بطريقة ما
مشاري بتساؤل : يعني الحين ما عاد بتروح لديره
شد هايف على بيالة الشاهي بضيق : تدري ليه سميت نجد بذا الاسم
مشاري : لييه !؟
هايف : انا ديرتي نجد واحب ديرتي ووطني بالحيل ويوم سميت نجد وحبيتها مب بس عطيتها هالاسم لا انا عطيتها مقام انها تكون هي ديرتي وهي وطني وهي بنتي وهي حبيبتي وهي زوجتي وهي المرجع والملاذ اللي اترك الدنيا واجي له بس يوم زوجوها اخذوا كل شي مني حتى وطني
مشاري بضيق وحزن : ما عليه وانا اخوك ربك ادرى بقلبك ان شاء الله انه بيرجع لك نجد وتفرح فيها
هايف : يارب اني استودعك اياها يارب
مشاري : اللي ماني فاهمه وشلون ما دريت انت!؟
هايف : والله مدري يا مشاري هذا اللي مجنني اصلا كيف نجد ما علمتني واحيان اقول جوالي خربان ومقفل اتوقع انها دقت وانا ما رديت ويا هد حيلي كانها دقت وانا ما دريت ياويل قلبي اذا نجد استنجدت بي وما انجدتها
مشاري : يا هايف لا تحمل قلبك الذنب اكثر من كذا واعرف لو ربي كاتب انها لك لو تزوج مليون رجال بترجع له واذا ربي مب كاتب لو تدري ملييييون مره وتقلب الدنيا ماهي لك
هايف حط يده على راسه بضيق وهو مهما يحاول يتجاهل وينسى ما يقدر اقل شي وده بخبر عن نجد على الاقل اذا هي بخير او لا عجز يرتاح ويطمن قلبه ..................••............
في الفندق
عند نجد اللي عجزت تحدد ردة فعل راضي اللي تكتف وهو باقي يناظرها وقال بهدوء : يعني انتي ما تبين الزواج وانجبرتي علي وانتي اصلا ماتبيني صح !؟
نجد خافت من نبرته وبعد تردد قالت : ايه
ضحك راضي وهو يحط يدينه ورا ظهره : وليه ما قلتي لابوك هالكلام !؟ هاااه ! وين ابو نجد ما باع الدنيا لخاطر بنته !؟ ولا جايه تمشين هالاسطوانه علي وتتوقعين مني اسكت واحن واقول مسكينه واطلق واقول روحي !؟ لذا الدرجه انا غبي !؟اول بعقلك هالصغير تبين تلعبين علي !؟ نجد انصدمت من كلامه وهي تناظره بذهول وكيف صدق طلع وجهه الحقيقي وهنا فعلاً خافت وعجزت ترد عليه
وقرب راضي وهو يسحب وجهها ثبت دقنها بيده وهو يهمس بإستهزاء : بتقنعيني ان ابوك ما رماك علي رمي !؟ بتقنعيني انه ما زوجك غصب عليك وبهالسرعه الا يبي يتخلص منك !؟ والله اعلم على وشو بيرميك علي
لا شعوريا صرخت نجد وهي تضربه كف من بعد ما تفلت على وجهه من كل قلبها طلعت الاول التالي بقلبها : انا اشرف منك يا قليل الادب ياواطي
بعد هالكف راضي ما عاد شاف وهو يسدد لنجد الكف الاول والثاني وهو يصرخ فيها بأبشع الكلمات واحقرها ونجد اللي تصيح بصدمه وخوف وقهر وبحركه مقصوده من راضي اللي بقهر الدنيا من اللي صار مسك شعر نجد وهو يضرب راسها بالجدار وهو يبي يبرد قلبه لكن انصدم اول ما انقطع صراخ نجد وارتخى جسمها ولا يثبتها الا يده اللي ماسكتها من شعرها
واتسعت عيون راضي بذهول وصدمه فكها وطاحت وهي يناظرها بخوف وجهها مليان دم ابتعد وهو مصدوم تعثر بالسلك وطاح وهو للحين يناظر رجع يركض يناديها بس كانت ابد ما ترد
.
.
.
.
انتهىâ™¥

5 - 11 - 2024, 09:39 PM

البــارت التـاسـع والعشـريــن ...
.
.
.
في الخبر
عند هايف اللي بالقوه اقنعه مشاري ينام وانسدح بجنب مشاري اللي كان حريص جدا على جرح هايف ويداويه وبعدها لفه وانسدحوا بهدوء
وغفى هايف ولكن فز اول ما دخلت له نجد بحلمه تستنجده وتبكي وتردد اسمه وهي تقول ( لا تخليني اموت ) فتح عيونه برعب وهو يصرخ: نججججد
مشاري فز وهو يمسكه: هايف بسم لله عليك علامك
هايف اللي رمى اللحاف عنه وفز وهو يفتح الشباك اول ما حس انه اختنق : نجد يا مشاري نجد
مشاري: وش بلاها نجد يا هايف
هايف : مدري مدري اكيد انها مب بخييير يا مشاري اكيد
مشاري : يا هايف فهمني وش فيك اتصلت عليك فيها شي !؟
هايف : لا لا حلمت فيها تناديني يا مشاري تنادي تقول لا تخليني اموت
مشاري: تعوذ من ابليس يا هايف بس انت وسوست وخفت وان شاء الله مافيها شي
هايف : دق دق على مطلق
مشاري اخذ الجوال منه :يا هايف يا حبيبي تعوذ من ابليس واجلس وش تبيه يسوي مطلق المسكين وش يدريه وينها نجد واذا هي بخير ولا لا وبعدين مسكين من صبح الله يمتر الخطوط رايح جاي وتعبان معك خله يرتاح ولا تقلقه وطعني نجد مافيها شي بأذن الله بس انت خايف عليها وشايل همها وتحلم بها تعوذ من ابليس واركد
هايف الللي ماهو مرتاح في صدره قلق : يا مشاري افهمني انا ماني مرتاح
مشاري بهدوء : من يوم تزوجت نجد ما ارتاح قلبك وخوفك عليها وتوترك بسبب انك شفت راضي اليوم وانك انحست وحنيت لها وبعدت عن الديره اسمعني وانا اخوك خذ سجادتك وبسطها وصل ركعتين وبترتاح وادع ربي انه يحفظ نجد ولا تخاف
تحرك هايف في محله وهو ماسك راسه اللي يحس ان كل مكان فيه ينبض توضى ورجع ياخذ السجاده وهو يدري ماله حل الا ربه
مشاري اللي كان متكتف وهو ما يدري وش يسوي بحال هايف ذا ما توقع ان حاله واصل لهالمرحله طلع يجيب له مويه ورجع وجلس وهو يسمع هايف يدعي ولا له حل الا انه يردد وراه ( امين يارب امين )
.................••............
في الفندق
عند راضي اللي يحاول يصحي نجد من ساعه بس اببببد ما صحت تورط وخاف وتقدم وهو يحط يده عند خشمها ما حسها تتنفس اتسعت عيونه وقرب وهو يشوف نفسها جدا ضعيف من اثر النزيف سحبها وهو يرفعها لحفها وهو خايف انها تموت لانه ما ضربها ضرب عادي كان جنوني ركب السياره وهو مرتبك طار فيها للمستشفى وهو كل شوي يلتفت ويشوف اذا حيه او ماتت اول ماحط يده على عرقها ماكان فيه نبض لف عليها بخوف وهو يناديها ويهزها بخوف ولكن رفع راسه اول ما حس السياره مالت واصوات البواري وقبل يتدارك الوضع صرخ اول ما ارتطمت سيارته بشاحنه و لا عاد شاف شي بعدها اول ما انقلبت السياره ومع الاسف تعرض لحادث جدا جدا بشع وومن حسن حظ نجد انها طارت من السياره ولا كانت مع راضي اللي تعجنت فيه السياره ووقفوا الناس وهم يركضون ويستدعون الاسعافات والشرطه وفي ثواني تعبى الطريق بالاسعاف
.................••............
الفجر في الخبر
هايف اللي قضى ليله بين سجادته وادعيته واول ما صلى الفجر طلع بيمشي وهو يحس بأختناق لكن لف اول ما حس احد يحط ذراعه على كتفه
مشاري ببتسامه:مالك مفر مني وراك وراك
ابتسم هايف بضيق : الله لا يحرمني منك
مشاري: للحين ما ارتحت
هايف :يعني بمشي شوي يمكن يخف ضيقي
مشاري : نروح البحر
هايف : الظاهر وقته
طلعوا متجهيين للبحر ولا هي الا ثواني واتصل مطلق بمشاري يتطمن على هايف وقاله مشاري انه بخير بس مسوس شوي وطبعا مطلق اللي كلم هايف شوي يهديه وهدا هايف بعد كلامهم
................••............
وفي بيت ابو زيد
اللي كانوا مجتمعين كلهم بالحوش يفطرون وقف ابو زيد: حسيين يلا على العزبه وانت محسن قم للمحل ورح يا زيد معه
محسن :ومطلق يبه
ابو زيد: خلص شغلك بس مالك شغل بغيرك
مطلق اللي كان زعلان على الكل بشكل عام ولا يكلمهم كثير وجالس يفطر بجنب مؤيد اللي يسولف لمطلق
وفايز اللي اخذ ريوف واهله ورجعوا
ابو زيد: مطلق اخلص وروح انت ومؤيد وقضوا للبيت
مطلق رغم زعله : ابشر
وقفوا كلهم يستعدون لطلعه ودخل مطلق : سلمى وين اغراضكم اللي تحتاجونها اكتبيها
سلمى : كتبتها اديم كلها شفها عندك
العمه حصه: مطلق كلمت هايف !؟
مطلق : ايه ايه بخير وطيب
ام زيد : وش صار معه !؟
مطلق قرب وهو يبوس راس امه : حبيبتي يا يمه هايف يقول دامتس انتي بخير هو بخير
ام زيد: ياربي تجبر قلبه يارب
الكل : امين
شريفه : يمه انا بروح بس تكفين طمنوني عن هايف
سلمى: ابشري
مطلق اخذ اغراض شرييفه يطلعها لتركي اللي اخذها
وطلعت شريفه الحزينه ولف تركي عليها : شريفه لا تضيقين ان شاء الله اخوتس بيطيب وبيصير زين
شريفه ناظرته بحزن وهو مايدري وش فيه هايف:ان شاء الله يا تركي
تركي : اهم شي لا تضيقين يا عيون تركي تراتس ان ضقتي تضيق الدنيا علي وابشري والله لدور دواء هايف واجيبه اهم شي انتي انتبهي لنفستس وتراني اخذت رقم مشاري من مطلق عشان نتطمن على هايف
شريفه ابتسمت: ماتقصر يا تركي الله يخليك ذخر
ابتسم تركي بحب لشريفه واهلها
.................••............
في المطبخ
عند مطلق اللي رجع مستعجل : اديييم وينتس وين الاغراض بروح
اديم لفت تناظره: وش بلاك طاير خلاص خلصتها باقي بس اكتب اغراضي
مطلق تكتف بإنتظار : يلا عجلي
اديم اللي كانت متربعه وهي قالبه المنديل وحاطه الورقه عليه وتكتب وجلس مطلق مقابلها وهو يقرا الطلبات ورفع راسه لها : وش ذا !؟
اديم ناظرته : مكرونه فوتتشيني
مطلق : وش ذي
اديم حطت يدها على خدها تدور معنى تشرح له :مكرونه بس هي ايطاليه يعني تقولهم اسمها ويعطونك اياها
مطلق : لازم ايطاليه ذي!؟
اديم ضحكت : ايه
مطلق بيأس: يعني لازم اروح سوبرماركت فالمدينه
اديم ضحكت : اي لانك ما بتحصلها فالديره
مطلق : لازم هي والله تعبان مالي حيل ابد
اديم : والله اشتهيتها امس فجاءه لكن يلا ما عليه نأجلها
مطلق فز : لا والله دام اشتهيتها اروح المريخ اجيبها بعد كم اديم عندي
اديم انحرجت ووقفت معه :لا والله بعدين مب الحين اصلا ..
مطلق وهو يدخل الورقه بجيبه : بس خلاص تبشرين اجيبها لتس
اديم ابتسمت و تهورت للحظه وهي اخذت حركه سلمى الخايسه وسحبت ذراع مطلق تهزه بمزح : ويلوموني فيك
طارت عيون مطلق بصدمه ونزلت يدها اديم: الله ياخذ سلمى عودتني عليها
ضحك مطلق الللي مايحتاج يبذل جهد وهو يراقب ما كان فيه احد حولهم حط يده من ورا كتف اديم وهو يشدها له وهزها بضحك: وانا من يلومني فييييتس
اديم انصدمت ولا مدامهم استانسوا الا شهقت سلمى: حسبيي الله على رومانسية الشياب الخايسه من عطاكم الحق تاخذون حركتي
مطلق ترك اديم بأحراج لكن اخذ لعبة عبود وحذفها على سلمى اللي تهاوش واديم تقطعت من الاحراج وهي تدري سلمى بتفضح بها
.................••.....................
فالمستشفى
عند راضي ونجد اللي اسعفوهم ودخلوهم العلميات وهم يتصلون بأهلهم ولا حصلوا الا رقم ابو راضي
وعند ابو راضي اللي اول ما وصل له الاتصال ركض لبيت ابو نجد وهو يدق الباب بذعر
ومطلق اللي كان واقف هو ومؤيد يشغلون السياره ناظرهم بأستغراب وهو يشوف ارتباك ابو راضي
وطلع ابو نجد: بسم لله علامك يارجال روعتني
ابو راضي وهوخايف : اللحق معي اللحق معي راضي ونجد صار لهم حادث
ابو نجد بصدمه: ابك انت وش تقول !؟متى !وش صار فيهم ؟!نجد فيها شي!
انشدت مسامع مطلق لهم وهو متسعه عيونه بذهول
ابو راضي: مدري مدري
ابو نجد اللي هو بعد ارتبك وهم مايدرون وشلون يروحون وخصوصا انهم شياب وارتبكوا
مطلق اللي رمى المفتاح على مؤيد: ادخل البيت ولا تجيب طاري تسمعني
وركض لهم: ابو راضي خير وش فيك!؟
ابو راضي لف لمطلق اللي كأنه مرسل لهم من سماء : جيت وجابك الله يا مطلق تعال يا ولدي خذنا للمسشفى رجليني ماعاد تشيلني
مطلق : ابشر ابشر بس وش فيكم !؟
ابو راضي : راضي صاير له حادث هو ومرته ومدري وش فيهم
مطلق اخذ مفتاح ابو راضي : يلا يلا
ابو نجد اللي كان متردد يروح مع مطلق بس قال مطلق : ابو نجد الجار للجار وانت عمي
ابو نجد اهتز من هالكلمه وتقدم يركب وهو منحرج من احترام عيال ابو زيد له وفرعاتهم معه مهما كانت الظروف
اما مطلق صحيح انه من كل قلبه يبي يفزع لكن موضوع نجد يهمه كثييير عشان خاطر هايف
اخذ العنوان من ابو راضي وطار وهو يدعي ان نجد مايصير لها شي لان هايف بيموت
................••............
في المستشفى
عند راضي اللي كان في العمليات وفي حاله جدا جدا مزرييه
اما نجد اللي بعد كانت بنفس المكان وهي تعاني هي بعد
دخلوا مطلق ومعاه ابو نجد وابو راضي وهم شبه يركضون ويسألون وكان مطلق اول ما يسأل يسأل عن نجد ولكن محد عطاه اي تفيصل
كان مطلق محتار يتصل بهايف ولا ينتظر لين يحصل خبر بس كان فعلا خايف من توتر الدكاتره
لكن ما يمديه يتردد الا شاف الدكتور : لو سمحتوا من فيكم والد نجد مشعل
ابو نجد : انا انا
مطلق وقف معه وجنبه : ان شاء الله مافيه شي خطير يا دكتور
الدكتور: انت تصير لها
مطلق لف يناظر ابو نجد ولكن قال بقوه وصدق: انا اخوها
حس ابو نجد للحظه ان فعلا مهما صار كان المفروض ما يفقد الامل من ابو زيد وعياله وانهم هم سند نجد بعده
الدكتور : طيب تعالوا معي للمكتب
دخلوا معه وجلسوا بتوتر
ابو نجد : تكلم يا دكتور تكفى لا تخوفني
الدكتور بتردد وضيق : اول شي بنتكم ما تضررت من الحادث كثير الا كسر باليد اليمنى
ابو نجد : الحمدلله
مطلق اللي توه بيفرح بس انتبه لملامح الدكتور : فيه شي ثاني يادكتور
الدكتور ينزل الاوراق : بنتكم متزوجه صح !؟
ابو نجد : ايييه
الدكتور : بعد المعاينه شفنا عليها اثار ضرب
وقف مطلق بغضب: وشششششو
ابو نجد : وش تقول يا دكتور وشلون !؟
الدكتور :زي ما قلت لك هذا غير الحال اللي هي فيه من علامات تدل انها تعرضت لضرب
مطلق : لا يا راضي يا ابن الكلب
ابو نجد :وينها بشوفها
الدكتور : اجلسوا اجلسوا باقي ما انتهيت
ابو نجد :وش يادكتور تكفى قل وريحني
الدكتور : تعرضت لضربه في مقدمة الرأس قريبه من العين وتضررت عيونها كثير
مطلق اتسعت عيونه وهو يتكي على مكتب الدكتور : شلون يعني تضررت عيونها
الدكتور بهدوء : ننتظرها تصحى واحتمال 70ظھ انه يكون عمى
جمد مطلق وابو نجد جلس وهو يمسك بذراع مطلق
.................••............
وفي بيت ابو زيد
رجع مؤيد وقابله ابو زيد وهو يسأله عن مطلق وبلغه مؤيد انه راح مع ابو راضي وابو نجد
وانهبل ابو زيد والكل ينتظر
ابو زيد : وين راح هالردي وين راح بيجيب لي مصيبه انا افتك من واحد ويبتليني الثاني
زيد: ما يرد يا يبه
محسن: والله اني علمتك يا يبه فيه بس ما طعت
زيد: خلك فحالك انت
ابو زيد: دق على الحمار قله يجي ولا يبتليني بدمه
ام زيد اللي كانت خايفه ان مطلق يسوي شي : يارببي انك تحفظه وتهديه وتكفيه شر نفسه وشر من فيه شر ياربي
زيد: مؤيد ماتدري وين راح!
مؤيد : والله مدري مدري ياخالي رمى المفتاح وركض معهم على سيارتهم
زيد: يمكن احد مريض شي
ابو زيد : يااااا شق جيبي من ذا العيال
.................••............
في الخبر
عند هايف اللي بعد ما رجعوا كان يتصل بمطلق ما يرد وشال هم فعلا شال هم وهو يحس انه من الضيقه وده يصييييييح
جلس بجنب الباب بضيق وجاء سعود اللي راجع من دوامه : هايف وش فيك
مشاري طلع وهو يجلس جنب هايف : وش بلاك وانا اخوك قلبت ضب جالس عند الباب بعز القوايل
هايف : مابي ادخل ضايق صدري
سعود :وش مضيق صدرك
اتكى هايف على الباب وهو يقول بضيق وهو الحين جاء دور قصيده يجسد حزنه
(‏ضايقٍ صدري وفي عيني احرّ الدموع
‏واتحرّى ادناة فرصة عشان اهلّها
فاقدٍ لي ضلع واحد وفي صدري ضلوع
‏لو رجع لي قلت هاكم ضلوعي كلها .)
سعود نزل راسه بحزن : اي والله صح لسانك لو رجع لي قلت هاكم ضلوعي كلها
مشاري : بيرجع ياهايف بإذن الله يرجع بس انت اهدى
وقف هايف : عجزت اهدى يا مشاري ومطلق ما يرد علي واقلقني
مشاري : ارجع اتصل يمكن مشغول
وقف هايف وهو يدق على مطلق بقلق
.................••............
في المستشفى
عند مطلق اللي كان مصدوم رجوله مب قادره تشيله كان ساند ابو نجد اللي من الصدمه يصيح وقف بغضب وهو متجهه لابو راضي : والله والله ليدفع ولدك ثمن فعله
ابو راضي اللي مب فاهم شي : وش بلاك يا ابو نجد
مطلق : ابو نجد اجلس اجلس لا تتعب نفسك
ابو نجد : والله والله لاخذ حق بنتي منه
مطلق رفع يده يأشر بغضب لابو نجد : عاذرينك بمصيبتك ولكن كل شي سواه ولدك الخسيس ب نجد بيناخذ حقه وافي ومجمل تسمع !
ابو راضي : وانت وش عليك بنجد من متى عرفتوا نجد
مطلق : يصحى راضي وبتعرف متى عرفانهم
اخذ ابو نجد وراحوا يجلسون قريب غرفة نجد ولا اهتموا براضي وابوه ولا لهم هم الا يأدبون راضي
وابتعد مطلق بضيق وهو يشوف رقم هايف لا شعوريا حس العبره خنقته لو عرف هايف وش بيصير فيه وش بيسوي بالقوه تماسك نفسه
ورد بصوت تعبان : هلا يا عين اخوك
هايف اللي كانت كلمة مطلق بلسم على قلبه: يابعد روح اخوك يامطلق وينك من اليوم اتصل بك ما ترد وش فيه صوتك
مطلق اللي صدت يمسح وجهه بضيق وهو بعيونه وضع ابو نجد اللي يمسع دموعه ويدعي
هايف حس : مطلق وش فيك وراك حزين
مطلق : ابد متضايق شوي
هايف : انت يا مطلق حرام يوجعك شي وتضيق انت المفروض تضحك عمرك كله
مطلق قال لا شعوريا وهو جدا حزين على هايف ونجد وهو يبي يطلع اللي بقلبه بأي طريقه :
ياعين اخوك اعذره لاطاحت دموعه
‏مايوجع النشمي الا طيحة النشمي
‏اناعشانك حـزين ولـوعتي لـوعه
‏تبيني اضحك على شانك على خشمي
هايف ابتسم :النشمي بخير دامك وراه يا النشمي
مطلق اللي كان بيقول بس حب اول شي يتاكد بوضع نجد واذا صار لها شي بيقوله وبيخليه ياخذ روح راضي بيده
هايف : ماعرفت شي عن نجد
مطلق : لا هذاني احاول وهذا اللي مضيقني
هايف : تكفى يا مطلق لا تقصر
مطلق : ابشر ابشر يلا انت ارتاح وانا بروح لامي
هايف ما ارتاح الا بعد ما طمنه مطلق ولو انه فيه قلبه قلق سكر وهو يحاول يهدا ومايفكر
ورجع مطلق يجلس بجنب ابو نجد وهو مايرد على اي اتصال .................••............
مرت الساعات
ومطلق وابو نجد ينتظرون وفي بيت ابو زيد ينتظرون خبر من مطلق اللي ما يدرون وينه
اما عند ابو راضي اللي قالوا من بدري ان ولده في حاله جدا جدا جدا خطيره ونسبة حياته جداً ضئيله كان جالس بلحاله وبحيره مايدري وش قلب ابو نجد ومطلق عليه وهوخايف ان راضي ولده الوحيد يصير له شي .................••............
في بيت ابو زيد
وعند اديم اللي من كثر ما عمها ابو زيد توتر وقلق وصار يهاوش ومر الوقت ومطلق ما منه خبر خافت وخافت حيل رفعت جوالها تدق على مطلق اللي مارد الا بعد ثالث مكالمه: اديم وش فيتس تدقين كذا
اديم : مطلق انت وينك
مطلق : وش فيه صوتس !؟ ليه خايفه !؟
اديم : كلنا خايفين مؤيد يقول رحت مع ابو راضي وابو نجد لا يكون سويت شي خطير يا مطلق تكفى يا مطلق انتبه
مطلق : لا اله الا الله من مؤيد الزفت ! من قالتس بسوي شي يا بنت الحلال
اديم : اجل ليش رحت
مطلق بهدوء : اسمعيني علميهم ما سويت شي لا يخافون على الفاضي وامي لا يرتفع ضغطها قولي لها راح مع ابو راضي يحتاجه بشغله وبس
اديم: ليه طيب ما جيت للحين
مطلق : بتأخر شوي قولي لهم ماني عند ابو راضي ولا ابو نجد بخلص شغل وارجع بس وانتي ماله داعي تخافين يلا سلام
سكر مطلق ووقفت اديم وهي ماهي فاهمه شي وراح لابو زيد وزيد اللي جالسين بتوتر
اديم : عمي كلمت مطلق
لف ابو زيد عليها: وينه ما يرد علينا قليل العقل
اديم : يقول انه ماهو عند ابو نجد وابو راضي هو صح راح مع ابو راضي طلبه في شغله وانه الحين عنده شغل بيتاخر فيه
ابو زيد : حسبي لله ونعم الوكيل انا ربي بلاني بناس مرضى
زيد : وليه ما يرد علينا
اديم: كان جواله صامت
سكتوا كلهم ولفوا وراحت اديم تطمن ام زيد
................••............
بعد ساعات من الانتظار
طلع الدكتور وهو ينادي ابو نجد لان نجد صحت تمنى مطلق لو ييقدر يدخل وقف متكتف وهو يمشي بالممرات وينتظر لكن وقف اول ماشاف الدكتور يكلم ابو راضي بأسى وطاح ابو راضي وهو يقول : لا يااااااراضي لااااا يا ولدي
مطلق اللي اتسعت عيونه وهو خايف ان راضي يموت ومحد اخذ حق نجد منه
وركض لدكتور وهو يمسكه: دكتور دكتور راضي وش صار له يادكتور
الدكتور : ما قدرنا ابد ننقذه كان متعرض لاصابات خطيره نزف كثير
مطلق بقلة صبر : مات ولا لا
الدكتور : مات الله يرحمه ويعوض شبابه
صد مطلق وهو يغمض بقهر وحزن بنفس الوقت وهو يحط يده على راسه راح وهو يراقب ابو راضي اللي منهار وماعرف مطلق يواسيه ولا يخنقه بدال ولده بس مهما كان هذا موت محد يقدر يشمت فيه
.................••............
في الطرف الثاني من المستشفى
عند ابو نجد نجدد اللي صحت وكانت تون بألم وهي تبكي وتنادي : يمممه يبببه
ابو نجد اللي تقدم وهو يمسك يدها ويسمح على راسها : بسم لله عليتس يا ابوي بسم لله عليتس لا تخافين انا جنبتس
نجد اللي انهارت وهي تتذكر كل شي صار فيها وعيونها مسكره: يبه تكفى وخر اللي على عيوني بقولك وش سوا راضي فيني يبه
ابو نجد : والله والله لاخذ حقتس من ذا الخسيس يا بنتي بس انتي لا تبكين لا تخافين ابوتس معتس
نجد بإنهيار وهي تمسك يد ابوها: تكفى يبه لا ترجعني عنده تكفى
ابو نجد : ابشري ابشري
الدكتور: نجد لو سمحتي ممكن تهدين عشان افتح اللي بعيونك
نجد اللي كانت ترتجف ببكي سكتت وهي للحين ماسكه ابوها وقرب الدكتور وهو يفتح الشاش ولين انتهى ونجد باقي ما فتحت عيونه كان في جبينها جرح عمييييييييق وانتظرت نجد وهي تقول : شيلوه كله
الدكتور التفت لابو نجد ولف على نجد بضيق : نجد افتحي عينك بشويش وقولي لي وش تشوفين
نجد اللي بدت عيونها ترمش بسرعه وهي تحاول تفتحها وعيونها مليانه دموع قرب الدكتور يمسح عيونها بقطن وهو يقول : وش تشوفين
نجد مدت يدها تتحسس عيونها : ما اشوف شي مب قادره اشوف شي ظلام
ابو نجد : تكفى يا دكتور
الدكتور اشر له يهديها ولا يرعبها : نجد حاولي تسكرين عيونك بقوه وتفتحينها بشويش
حاولت نجد وحاولت مره واثنين وثلاث لكن قالت بصوت يرجف :ما شوف شي
ابو نجد اللي حط شماغه على وجهه وانهار اما الدكتور قرب وهو يقول : اسمعييني يانحد وتقبلي الموضوع بهدوء انتي اصابة راسك سببت لك عمى لكن ابيك تصبرين وتعرفين ان الله اذاا احب عبد ابتلاه ولا تيأسين والله قادر يرجع نظرك
كان الدكتور يتكلم بسرعه يبي يهديها لكن بعد صمت الصدمه صرخت نجد بكل صوتها وهي تبكي : لاااااا لاااااا تكفى لا تقول كذا لااااا تكفى مابي انعمي الله يخليك مابي انعمي
ابو نجد حضنها وهو يمسح على راسها: يا حبيبتي يا نجد لا تسوين كذا ربي بيكون معك لا تجزعين وانا ابوتسس
نجد رفعت راسها وهي تدور صوت ابوها وبكت وهي تقول بحرقه: قلت من قبل يا يبه قلت لك تكفى مابيه قلت مابي راضي لا تجبرني عليه قلت لا تكسرني يبه رضيت الحين شوف وش سوا فيني وليت بس سوا كذا راضي حتى شكك فيني وفيك وبتربيتي وشرفي رضيت الحين يبه
كانت مقهوره ومنهاره وهي تعاتب ابوها اللي فعلا انكسر قلبه وهو يصيح معها وقرب الدكتور يعطيها مهدي عشان يقدر يلف عيونها والجرح
وطلع ابو نجد وهو منهااااار وركض له مطلق : وش صار ياعمي
ابو نجد اللي كان منهار وهو يمسك بيدين مطلق : اخذوا عيون بنتي اخذوا عيون نجد
هنا مطلق تدمر نفسياً عجز انه يقوي قلبه حزن فعلا على نجد وهو وده يذبح ابو نجد وابو راضي وراضي
اابتعد ابو نجد وهو يقول بغضب: الله ليدفع ثمن فعلته الكلب والله لاخذ روحه والله
مسكه مطلق بهدوء: ما يحتاج تاخذ روحه خذاها ربي
لف ابو نجد بصدمه : وشوووو وش تقول مات
مطلق بحزن : مات
مطلق اللي اصلا اتصل بفلاح وحميد يجون ويكونون مع ابو راضي وشوي ووصلوا وراحوا لابو راضي وهو اللي طايح بأرضه ويبكي ويتوجد على ولده
اما مطلق اللي بعد ما اخذ الخبر الصادم من ابو نجد خلاه يجلس وراح مع العيال عند ابو راضي ورفعوه وهم يهدونه وهو منهار ويرتجاهم يدخل يشوف ولده
ورفضوا فلاح وحميد يدخلون بعد كلام الدكاتره ان ما يدخل الا اللي قلبه قوي ودخل مطلق وهو ساند ابو راضي وابد ما كان مطلق شامت ابد بس كان فيه قهر من راضي اللي سواه ماهو سهل ابد
اول ما طلعوا لهم راضي وقام الدكتور يبلغهم كيف كانت حالته ان بعض اطرافه انقطعت اثر الحادث وكشفوا عن وجهه راضي لف مطلق وهو صاد من بشاعة المنظر وهو فعلا مشووهه الحادث لدرجة ان ابوه انكر وهو يبكي ويقول انه مب ولده لين شاف وحمه في بطن راضي وهويته وتأكد انه ولده وطاح تحت السرير يبكي بإنهيار ومطلق اللي يحس انه داخ
بالقوه رفع ابو راضي وطلعوا اول ما سلمه فلاح وحميد راح يجلس وهو يغمض بقوه مايبي يذكر كيف كان راضي
بعد الموقف وقع ابو راضي على اجراءات راضي كلها وهم ينتظرون الدفن والصلاه عليه بكره
اما مطلق اللي طلع بعد ما ترك ابو نجد مرافق عند نجد وهو معاد تحمل خلاص وصار لازم لازم يبلغ هايف مسك طريقه لديره وهو يحس انه دايخ ................••............
وفي بيت ابو زيد
بعد ما هدى الوضع وتأخر الوقت كانوا سلمى واديم ينتظرون مطلق
اديم : انا ما خفت الا يوم سمعت صوته احسه عنده شي فيه مصيبه
سلمى: لا تخوفيني والله اني بالقوه ماسكه نفسي
فزت اديم على نور سيارته : جاء جاء
طلعوا له وهو ينادونه بسرعه دخل مطلق وهو مقطب ولاف شماغه على وجهه
اديم : مطلق وين تاخرت ! اشغلتنا عليك وخوفتنا
مطلق :مافيني شي عطيني مويه و فيفادول
ركضت سلمى تجيبها وجلس جنب اديم : وش فيك وين رحت وراك كذا
مطلق : وين ابوي
اديم : دخل ينتظرك ، تكفى مطلق قلنا وش فيه
مطلق عجز يقولهم الخبر يحس قلوبهم ما تحمل بس ماتركوه
مطلق بهدوء : راضي سواء حادث ومات
شهقوا كلهم وهم يناظرون مطلق بصدمه
مطلق : السالفه طويله اقولها لكم شوي بس هذا هو الخبر وخلوني اروح لابوي قبل يجي واسكتوا لا تفجعون احد
وقف مطلق وراح واديم وسلمى في قمة صدمتهم
دخل مطلق لصاله وشاف ابوه اللي للحين ما نام واهله كلهم ينتظرون
وقف ابو زيد بغضب: انت وينك بتذبحني انت وييينك من صبح الله وش تبي مع ذا الاوادم هاه
مطلق : يبه اهدى اديم جتك وقالت لك رحت معهم بشغله
محسن: وش الشغله اللي مايقدرون التجار يسوونها الا معك
زيد: محسسسن اقصر صوتك خلاص
مطلق : اجلس واسمعني يبه
ابو زيد بردت عظامه : وش بلاك وراك متلطم اخوك صاير له شي
مطلق : لا لا هايف بخير
زيد: انطق يامطلق وش صاير
مطلق : راضي صار له حادث وتوفى الله يرحمه
ام زيد : يا ويلي
الكل ارتفعت اصواتهم بصدمه بس سحب ابو زيد مطلق من ثوبه : لا يكون انت ذابحه ياللي ما تخاف الله
مطلق : لا حول ولا قوة الا بالله وش ابي به اذبحه انا ما نهبلت للحين بس وانا طالع سمعت ابو راضي يعلم ابو نجد وهم محتاسين قلت اوديهم وجلست مع الرجال لين جيت الحين
زيد: نجد معه !؟
مطلق : ايه
كلهم يناظرون مطلق ينتظرونه يتكلم وقال مطلق : نجد ما تضررت من الحادث كثير
الكل بما فيهم ابو زيد : اشوى الحمدلله
مطلق : بس انها جات لها ضربه براسها وانعمت
ام زيد : لا اله الا الله
ابو زيد : يا وجهه الله
واختلفت الردود منصدمه وبعد موجة اسأله قرر مطلق انه ينسحب وراح لغرفته وهو يفكر وشلون يعلم هايف
اما الباقين صح كل واحد راح لفراشه بس محد قدر ينام من الرعب ................••............
في غرفة مطلق
عند اديم اللي دخلت الغرفه وراحت وهي تجلس بجنب مطلق بحزن: مطلق وش بيصير الحين
مطلق : مدري يا اديم مدري انا افكر كيف اعلم هايف
اديم : اخاف يتأزم بعد
مطلق ناظر اديم بحيره : ما رح يتأزم من عماها كثر ما بيتأزم من سبب عماها
اديم : حادث وش بيسوي هايف يعني
مطلق بهدوء وهو يحط يده على يد اديم عشان بعد ما تخاف : وان قلت لتس ماهوب حادث
اديم بخوف : شلون يعني
مطلق بدى يحكي لها اللي يعرفه وشهقت اديم لا شعوريا : حسبي لله عليه
مطلق : اديم الرجال مات لا تحسبين عليه
اديم: وشلون قدر يسوي كذا
مطلق : مدري اكيد فيه شي
اديم : وبتقول لهايف عن راضي ولا بتسكت وتقول حادث
مطلق : اكيد بقوله لكن هايف من غير شي منهبل والله لو عرف باللي صار الظاهر يجي من الخبر على رجله من القهر
اديم :لو ما تقوله وتقهره اكثر
مطلق :عشان ما اقهره لازم اني اقول
سكتت اديم من كمية الحزن اللي يمر فيهم هالايام او مب حزن كثر ماهو لخبطة مشاعر بس قالت وهي تجلس بجنب مطلق ببتسامه : دامك معه خلاص بأذن الله بيتعتبرها ازمه وتعدي
ابتسم مطلق : ان شاء الله نامي انتي يلا تعبتي من الصبح
اديم: مدري وشلون انام من بعد ذا كله صراحه
مطلق : سمي بالله ولا تخافين انا هنا
اديم ضحكت: والله نومي على صوت نويصر صار ارحم مليون مره من هالاحداث
ضحك مطلق وهو يعتدل وبعد شوي نامت بتعب ومطلق اللي عجزت عينه تغفى اكثر من نص ساعه وهو بس ينتظر الصبح
واول ما صلى الفجر اخذ اغراضه وطلع متجهه لهايف بالخبر وماكانت الخبر تبعد الا 3 ساعات عنهم
................••............
في الخبر
عند هايف اللي من فتره وهو هالنوم ما يتهنى به ومايصدق بس يطلع الصبح عشان يسوي اي شي اي شغل يتعبه ويخليه ينام ما يحس بنفسه
كان واقف في حديقة ابو فرج وهو يسقيها
ابو فرج: يعطيك العافيه اترك عنك وتعال افطر
هايف : يعافيك وبالعافيه مالي نفس
وقف ابو فرج وهو ياخذه بالقوه : اجلس بس يوم جيت للخبر وانت ماشاء الله عليك منتعم والحين ناظر وجهك وشكلك صرت هيكل اجلس بس اجلس
هايف: لا تجبرني تكفى
ابو فرج: هاااايف اخلص
ام فرج جت وهي معاها كوب حليب : اترك الشاهي وخذ هذا حليب فيه عسل بينفعك ويسندك
قطب هايف وقبل يرفض دخل مشاري اللي جاء يدوره وقال بمزح : وليدي هنا
ضحك ابو فرج: ايه تعال خله يشرب الحليب
مشاري : الله هاذي اللحظه المفضله تدري اني انتظر سعود يناديني عشان يخليني اقنع دحوم يشربه الحين صار فيه نفر ثاني
هايف: لا تكفون والله ما ابي
مشاري : بتشرب طيب ولا كيف
بعد اصرارهم شربه هايف ولكن ليته ما شرب وهو ترجع به الذاكره لزماان من كثر ما انقذ نجد من هالحليب اللي ما تحبه وامها تجبرها عليه وبحكم ان هايف كان عندهم 24 ساعه كان يشرب الحليب عن نجد ويترك لها اقل من الربع عشان اذا حلفت انها شربته ماتكذب
نزل الكوب بضيق وهو يسمع مشاري يخطط لطلعة للبحر
وجاء سعود وهو ينزل عياله عندهم وراح لدوامه ومتعب جاء وهو يعطي هايف ورقة الاجازه عن الدوام لين يتشافى جرحه
اما وليد اللي ماكأن عنده هم الا زواجه وتجهيز زواجه ابد مايشوفونه لاهي فيها
اما مقبل اللي مثل عادته ماله تأثير كثير الا بالاكل
................••............
وعند ابو راضي فالمستشفى
اللي طلعوا راضي للمقبره وراح ابو نجد بس تأدية واجب
واجتمعوا الناس والكل بيحضرون الصلاة عليه ويدفنونه
وهم ينتظرون كان ابو نجد مغبون من راضي لكن سبحان الله شاف بعيونه وش صار لنجد والظلم اللي صار والموت هذا كله رجعه لذنب اللي ارتكبه قبل سنين وهذا عقابه
اما ابو راضي كان جدا منهار والكل حوله يهديه
وابو زيد اللي واقف بطرف مايدري وين بيروح يواسي ابو نجد ولا يعزي ابو راضي ولكن غلبه كبريائه وراح لابو راضي وترك ابو نجد ................••............
عند مطلق وصل للخبر اخيراً
وكان الوقت بدري وقف وهو يرتب شماغه يحاول يطلع بشكل يهيء لهايف ان كل شي بخير وبعد تردد تقدم متجهه لشقة الشباب ولكن وقف ابو فرج اللي شافه : هنا يا مطلق هنا
هايف فز وهو ينزل عزيز : مطلق وش جابه
مطلق اتجهه لهم ببتسامه متصنعه: السلام عليكم
سلم على ابو فرج واتجهه لهايف وسلم عليه :هايف كيف جرحك
هايف : بخير انت وش جابك !؟
ابو فرج: هذا حكي يا هايف الله يهديك
هايف توتر : لا والله حياك الله بس ان شاء لله خير
مطلق : ان شاء الله خير
ابو فرج: اقلط يامطلق
دخل مطلق وهم يتقهوون ومطلق يحاول يمشي الوضع بكل هدوء
هايف : مطلق عندك شي ! انا ادري بس قول وش صاير
مطلق دخل من باب ينفعه شوي: ما قلت لك ربي بيرجع لك نجد
هايف فز قلبه وهو يشد على ذراع مطلق : تكفى يا مطلق بشرني بخير
مطلق : ان شاء للله خير يا هايف حتى لو الثمن غالي
ابو فرج: مطلق اشرح يا ولدي بالتفصيل ترا قلوبنا ما تحمل
مطلق نزل راسه : امس ... ( بلغهم بحادث راضي وان راضي مات وقف هايف وانرسمت ملامح الفرج على وجهه ولكن رغم كرهه العظيم لراضي وان نجد تحررت منه بس مافرح لموته
ابو فرج: لله يرحمه ويغفر له ويصبر قلب ابوه وامه
الكل : امين
هايف اللي بدا الامل ينتشر بصدره وهو يحس ان نجد رجعت له بس تذكر ولف برعب :مطلق لايكون نجد معه
مطلق نزل راسه : ايه بس هي بخير وما تضررت كثير مجرد كسر بيدها اليمنى هايف: حمدلله على كل حال الحمدلله
مطلق : بس فيه شي ثاني
هايف ناظر بضعف وقال مطلق وهو عيونه بعيون هايف وماسك يده : تعرضت نجد لضربه على راسها وتضررت عيونها
هايف غمض : شلون يعني
مطلق وهو صعب عليه يقول: سبب لها عمى
هايف اتسعت عيونه وقال بذهول : وششش تخربط انت وش تخربط شلون نجد تنعمي وشلون توك تقول ما تأذت من الحادث يا مطلق
مطلق مسك ذراع هايف بهدوء : بس ما تأذت من الحادث
هايف لف ببتسامه رعب وترقب: من آذاها
مطلق بهدوء : راضي
سحب هايف يده من مطلق وهو يدفه بغضب : يخسي هالكلب يأذي نجد والله والله لطلع عيونه ييدي واالله والله لاخذ روحه والله انه ما يسلم وشلووون وشلون هالكلب يسوي كذا وشلون يطقها ابن الكللبب من هو عشان يمد يده على على نجد والله لقصها قص والله
ابو فرج: يا هايف اذكر الله يا ولدي واعقل
هايف اللي من القهر نسى ان راضي مات ونسى انه حتى لو بغى مايقدر يوصل له: وش اعقل وش اعقل كيف اعقل كيف تبيييني اعقل يقولك طقها يقولك اعمى نجد الله يعميييه
ابو فرج: هايف الرجاللل مات لا تدعي عليه يا هايف
مطلق : تعوذ من ابليس يا هايف وانتبه لا تغلط الرجال عطاه االله جزاه ومات بحادث يوجع الصخر قطعه تقطيع ما يحتاج انك تدعي بعد انت الحين خل همك نجد
جلس هايف بهدت حيل : ااااه يا نجد وش صار فيتس يا نجد وش صار فيني
مطلق : هايف اذكر الله واصبر وان شاء الله شدة وتزول
هايف وقف وهو يسحب شماغه: امش امش بنروح الرياض امش
ابو فرج: يا هايف اصبر خل اخوك يرتاح اقل شي
مطلق : لا انا مرتاح بس ياهايف لازم تعرف انك لازم تهدا هالظروف ابد مب في صفك لو صار شي لا سمح الله وطلع موضوع راضي الكل بيقولون ليش طقها !؟ وتوهم مالهم ايام معرسين !؟ وش مسويه! واذا انت طلعت بعد اكيد الناس بتحكي ولا بتستفيد الا انك تضيع نفسك وتضيع نجد
هايف : يخسون يتكلمون على نجد بحرف والله لاحرق الديره بهم والله
مطلق : هايف انا جيتك هنا ما ابيك تنجن ولا عاد افكر الحين بذات لازم تكون حريص ومنتبه عشان نجد مب عشانك
مشاري اللي توه رجع مع دحوم اول ماشاف وضعهم وهايف فاللي جالس وهو ماسك راسه ومطلق متكتف وابو فرج اللي جالس بعد بضيق دخل برعب: خير اللهم اجعله خير وش فيهم
الكل ناظروه واتجهه مشاري يسلم على مطلق اللي اعطاه الاخبار بشكل مختصر وانصدم انصدم مشاري
هايف تحرك وهو محروق قلبه على نجد : يلا يلا يا مطلق بنروح
مطلق : يلا
ابو فرج: انتبهوا يا عيال هايف لا تهور
هايف اللي صد يمسح دموعه اللي تباغته : زين
مشاري: وين بتروحون انتظروا بس ابدل واجي معكم
مطلق : لا تعب نفسك يا مشاري
مشاري : وش اللي لا اتعب نفسي هايف تعبان من غير شي وانت انهد حيلك من الخط رايح جاي اصبروا بس خمس دقايق مانيب مطول
ركض مشاري وهو يبدل ملابسه ورجع ركب معهم وهو للحين مصدوم وهو يشوف هايف مقهور ومتضايق ومغبون ومطلق يحاول يهديه
وقال مشاري من باب يلطف الجو : هايف ينخاف منك والله نفسك طيرة الرجال ومات عساني ماخذ شي تبيه انت
كلهم ناظروا مشاري وضحك مطلق :توني انتبه والله فعلاً نفسك يا هايف قويه
هايف ابتسم بإستهزاء: نفسي ما نفعتني خير في تكسير جوفي
سكتوا وهو يراقبون الطريق بهدوء اما هايف كان وده لو راضي ما مات والله مايتركه لو ياخذ فيه قصاص
وكان هايف شايل هم كبيير هم نجد اذا عرفت انها انعمت وش بتسوي وده لو يقدر يشيل حزنها بصدره ولا تضيق ولا تزعل ولا تبكي عيونها
.
.
.
انتهى â™¥