13 - 4 - 2025, 01:15 PM
|
#2 |
رد: ديوان الشاعرة الراسية
وين اقفي بس ياكبر المصيبه
المسا بارد وجمرك ما يدفي
والليالي سود ودروبي صعيبه
والقراح اللي حسبت انه يكفي
شحت أيدينٍ تجيبه من قليبه
يبست شفاهي.. وحظي مايوفي
والغدير ان ما سقاني ويش أبيبه
ليلةٍ كان اللقا ماهو بشفي
جا يعاتبني على قلة نصيبه
كل ماونيت منه قال قفي
وين اقفي بس ياكبر المصيبه
البلا ماكل موجوعٍ يخفي
خاصةٍ لاجت جروحه من حبيبه
والوسايد دمعها عيا يجفي
والشتاعيّا سحابه عن شعيبه
يوم ذقت المر قال:القلب عفي
اه والدنيا ظواهرها غريبه
الشتا قارس .. وقربك ما يدفي
والليالي سود ودروبك مريبه
| | |
التعديل الأخير تم بواسطة الــســاهر ; 13 - 4 - 2025 الساعة 03:43 PM
 | |
13 - 4 - 2025, 01:23 PM
|
#3 |
رد: ديوان الشاعرة الراسية
زند الرجوله
تثير بي الجنون وانتثرلك شوق ياجدي
بي المحاني واحترق كلي على شانك
على زند الرجوله واقفه ياشيخ من قدي
زهيت بميزةٍ ذلت شموخك لي وعصيانك
ابا اصوغ القصايد لك بلاحد ولاردي
وابا اسوق الركايب لك تهز ركاب وجدانك
سيوفك كلها حكلى واناعيوني لهاحدي
ورى ماتسنن سيوفك وتطلق صهوة حصانك
ابتحداك ياجدي وابيك اليوم متحدي
على جمع الملا ف ظنك من اللي يكسب رهانك
انا غندورة ماللغرور فداخلي حدي
وعلى عرش العناد اطلب تمرجحني بميزانك
انا جامح ولا صخيت لأطلق فارس سدي
ولازعزع شعاع النفس يالمجنون هجرانك
اناسمي "الراسيه" ياللي على السادات متعدي
ولو طرفي دنا لمثلك يحطم شامل اركانك
انا اسمي "الراسيه" غصبا على من كان هو ضدي
وابي تعرف ترى ساسي يزعزع ساس جدرانك
نثرت اغلى سيوف الموت تسجد لك على خدي
ابي ترفع لي الهامه واعلي ف الملا شانك
انا ودي اسوق الهجن لعيونك وما ودي
اخاف ضعونهم تشغل عن الشعار شيطانك
انا من جدي احيا بك واحيا فيك من جدي
واموت ان ولعت ذروة جناني ذروة جنانك
ابا اسرح جنون العشق اشد خطامها شدي
واشب اقصا ضلوعي لك وابحرقهم على شانك
| | |
| |
13 - 4 - 2025, 03:48 PM
|
#4 |
 
رد: ديوان الشاعرة الراسية
 أحس إنه غبي
رحت ادور في وجيه عداي للخوه صديق
لين ضاقت بي يميني ومليت تعبي
أحسبني لاتعزويت بلقالي رفيق
لارفيق .. ولاعدو ولاحتى صبي
آه ياثقل الخطاوي على ذاك الطريق
طحت من طولي على الدرب الأمحق بركبي
للزمن مبدا ومبداي ما أظنه يفيق
لعنبو مبدأ الصراحه احس انه غبي
البحر تحت السفينه وهي شبة حريق
والسما تمطر وذا الغيم مافاد لهبي
والحياة وفلسفتها وفزعات الفريق
علموني كيف الأجناب تطمع في عنبي
يامضاوي يامضاوي يازفرات الشهيق
ماحدن غيرك اليا راح يبكيه هدبي
من خلق وجه الليالي وانا مالي شقيق
غير حزنن لالفاني تلقاني يحبي
قمت البي لالمحته واذا اقفا اضيق
ضيقة اللي شايف الضيم في وجه أعربي
ولالفاني فز قلبي مثل فزة عشيق
جا يرحب بي وانا اموووت لاقال ارحبي
ارحبي يالعنبو الموت فعيون الغريق
يهبي شعرن يخذلك وانا حي يهبي
الشعر لوهو مقيد بفكه لك طليق
والرسن بيديك وانتي تمني واطلبي
اقسمي باللي خلقني وبالبيت العتيق
والا فريها على مصر وحياة النبي
اني بحضرة جنابك اذا جيتي اليق
والا فضيها وقولي قطيعه وش تبي
وأهجريني يضرب الحب والجرح العميق
هجرة اللي ماوفا لي ولا طال شنبي
احسبني لاتعزويت بلقالي رفيق
لارفيق ولاعدو ..ولاحتى صبي
من عرفت الدمع الأسود وانا حزني صديق
لعنبو حزنن اليا طحت ماوقا ركبي
 | | |
| |
13 - 4 - 2025, 03:50 PM
|
#5 |
رد: ديوان الشاعرة الراسية
البركان الثائر يعارضني
قام عجمي(ن) مافعله باللحوني
الشري بأعيون عدوانه يذره
كل كائد عند ابن عمش يهوني
غاص غبات البحر ثم جاب دره
من رجال(ن)تنثني دون الظعوني
ومن فزع للراسيه لله دره
والقبايل مثل همال المزوني
من سهل صنعاء ايلين جبال حره
اخذي العنوان والا التيلفوني
قلتها وانتي يابنت العم حره
فزعتي ماهيب كشار السنوني
فزعتي فيها المسره والمضره
للذين يبهتون ويظلموني
الله الخلاق ماشي(ن) يغره
كانها بالدين سددنا الديوني
وكانها بالجاه مره لاتشره
السهر شوفيه بأطراف الجفوني
ناصحش مبحوح صوته لو يجره
طي حالش مثل طيات الشنوني
راسيه وانتي على رايش مصره
وقلبش اللي من بعض ناس امغبوني
الصبر حلوه يجي من بعد مره
مانشيل الرأس من فوق المتوني
وكل قلب(ن) ماكشفنا ويش سره
فزعتي ماهيب كشار السنوني
فزعتي فيها المسره والمضره
| | |
| |
13 - 4 - 2025, 03:58 PM
|
#6 |
رد: ديوان الشاعرة الراسية
علمو
علمو من لا تعلم ترى مالي خشير
النزاهه في يميني وانا بنت النزيه
ما احني الهامه لعبد وانا ذنبي كبير
ولو سجدت اسجد لرب يلبي داعييه
ياولد شيخ القبيله ترى فراشي حصير
والدي لاأمسيت جنبه ثنى لي ساعديه
لا تلحفت بحراير ولا شفت الحرير
ولا لبست الذهب الأحمر ولاني برتجيه
زينتي ياشيخ ما هي من زكاة الوزير
ولا ثمنها في زمنا ريال ولا جنيه
زينتي من ربي اللي شفا عبد ضرير
نعمة ينعم بها اللي هنيه وسعديه
ما اتباهى في جمالي على الجمع الغفير
لكنن روحي جميله وشكلي ما عليه
ما عرضت السلعه اللي لها شانن خطير
ولا تغطرست بجمالي على هذي وذيه
ولا نسيت اليوم سلمي وعرفي والسعير
لعنبو من ضاع عرفه ويلعن شاهديه
| | |
| |
13 - 4 - 2025, 04:02 PM
|
#7 |
رد: ديوان الشاعرة الراسية
العطش المتورط بالحلال
اما تموت لظماي او تشربن كلي
والا نتلاقى وكلن يشرب الثاني
كم ليلة ما رشفت الماي ياخلي
يبسن حنايا الضلوع وجيت شفقاني
اهرجك لا متى ياصاحبي قلي
الى متى الموت لا شفتك تغشاني
ياعلقم الحب لا عز الشهد من لي
وياهمي اللي يهز اعماق وجداني
جيت العب الحب هلي بي وانا اهلي
جيت ارمس شوي واسمع صوتك الحاني
واضحيت واثر الليالي سيفها سلي
يامسرع الوقت كنه رعشة اجفاني
وهمست لي بالغرام وصحت لك علي
علي ترى الهمس يامضنوني اشقاني
تكفى دخيلك ترى حرم اللقاحلي
تعال غن القصايد بس علشاني
تعال زل الهوى من رعشتي زلي
زل الهوى ما تحمل سكرة اعياني
ياخل والله لو انك شاربٍ ذلي
يموت قلبك عطش ما يموت رياني
تعال اشرب ظماك اواشربن كلي
خلنا نتلاقى وكلن يرشف الثاني
| | |
| |
13 - 4 - 2025, 04:04 PM
|
#8 |
رد: ديوان الشاعرة الراسية
بايع شعب الجزيره على شعب العراق
جيت كنك شحة الماي ما بليت ريق
ورحت كنك زاد يوم ولاذقنا مذاق
من ورى عوج الحنايا على قلبي تويق
كنك اللي يفرج الضيق يوم الكون ضاق
التويت بجمرة العشق واشتب الحريق
لين ذاب الثلج الأبيض وراق الموت راق
حالي اللي من عنا الحب ما سر الصديق
شارب كاس التلاقي وافكر بالفراق
يرجفن سهم بقلبي غدا جرحه عميق
رمية من يد (شيخ) كسب رهن السباق
واهنيك في خفوق غدا دمه يريق
واهنيك في عيونن بكت يوم التلاق
اه ياسيد الرجاجيل وش عندي يليق
كان قلبي ماخذنه ولا حل الوفاق
لامتى وانا على الجال مطروح غريق
لا متى ودموع عيني تهامل للعناق
ارحمن يالله عسى القلب من نومه يفيق
ارحم اللي من فراقك على قبره يساق
ارحم اللي مايبي الجاه والأصل العريق
بايع شعب الجزيره على شعب العراق
ما غفت عيني ولا ذقت طعماً للمليق
اشهد ان بعدك عذاب وذل ما يطاق
اه ياشحة مزون لها لون البريق
ارعدت فوق الحنايا ولا ذقنا مذاق
| | |
| |
13 - 4 - 2025, 04:12 PM
|
#9 |
رد: ديوان الشاعرة الراسية
يا علي
دريت اني وحيد بالملا محدن اباغيني
اخايل في غيابك لهفة المطرود للخوه
تخايلي بروق يا علي قامت تخاويني
تحايلني على المسرى بليلٍ تنطفي ضوه
هموم سحبها تمطر ويرعد جوها فيني
هلا بالحزن لامنه لفاني صادق نوه
نصيتك وادري انك راحل منته مماليني
وغترني حظي الخاين بكونن ضاق بي جوه
بغيتك يايبه عونن اذا ضاقت تسليني
تداويني من جروحن بظهري جات من قوه
ودريت اني وحيد بالملا محدن اباغيني
اخايل في غيابك لهفة المطرود للخوه
وسريت بعاتم دمعه على خدي يباريني
اجر الاه من جرحن بقلبي ماشفى توه
اهوجس كيف يادنيا مع حظي تعاديني
رمادك ماخفى جمرن لهيبه ماكنن جوه
على جال الرماد اشكي قريب جا يبكيني
قريب لكنن بيني وبينه يا يبه هوه
ياليته ماخذا مني وعودا لو يخليني
ياويلي من لظا بعدن ترك في ضامري اوه
صرخ في داخلي جرحن صياحه ماينسيني
يجوز بشرعكم قتلي واذا جاز الشرع سوه | | |
| |
13 - 4 - 2025, 04:24 PM
|
#10 |
رد: ديوان الشاعرة الراسية
العطش المتورط بالحلال
اما تموت لظماي او تشربن كلي
والا نتلاقى وكلن يشرب الثاني
كم ليلة ما رشفت الماي ياخلي
يبسن حنايا الضلوع وجيت شفقاني
اهرجك لا متى ياصاحبي قلي
الى متى الموت لا شفتك تغشاني
ياعلقم الحب لا عز الشهد من لي
وياهمي اللي يهز اعماق وجداني
جيت العب الحب هلي بي وانا اهلي
جيت ارمس شوي واسمع صوتك الحاني
واضحيت واثر الليالي سيفها سلي
يامسرع الوقت كنه رعشة اجفاني
وهمست لي بالغرام وصحت لك علي
علي ترى الهمس يامضنوني اشقاني
تكفى دخيلك ترى حرم اللقاحلي
تعال غن القصايد بس علشاني
تعال زل الهوى من رعشتي زلي
زل الهوى ما تحمل سكرة اعياني
ياخل والله لو انك شارب ذلي
يموت قلبك عطش ما يموت رياني
تعال اشرب ظماك اواشربن كلي
خلنا نتلاقى وكلن يرشف الثاني
| | |
| |
الذين يشاهدون محتوى الموضوع الآن : 1 ( الأعضاء 0 والزوار 1) | | | 
الأعضاء الذين قاموا بتقييم هذا الموضوع : 0
| لم يقوم أحد بتقييم هذا الموضوع | 
تعليمات المشاركة
| لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك
كود HTML معطلة
| | | الساعة الآن 11:31 AM sitemap
| | | | | | | | |
عضويتي
العرض المتطور
