يمسح الدمعه بشكوى للكاتبه هدوئي - الصفحة 2

17 - 4 - 2014, 08:59 AM

* الجـزء التـاسع *

* رايد *

نايف = رح رايد رح بسرعة قبل يروح الرجال لعمله

فجأة هجم عمر على نايف وطرحه بالارض وجلس على بطنه

شوي وهجم سعد على عمر .. وصاروا الثلاثة فوق بعض يتهاوشون

شهقت وابعدت عنهم .. هم اجسامهم اكبر مني وما اقدر افرق بينهم

شفت سعد يضرب عمر مع ظهره بقوة وبعدها طرحه بالارض بجنب نايف

جلس نايف معصب وهجم على عمر وركب فوقه

نايف بصراخ = وش دخلك انت ... متى مارسلناك تكلم ( ورفع يده وعطى عمر بكس )

التفت سعد لي وقام وقرب عندي

سعد = يله يارايد رح

طالعته بخوف ... اخاف اذا قلت لا يهجمون علي مثل ماهجموا على عمر

رايد بخوف = مـ .. مـ .. ماعندي سيارة

سعد معصب = اوهوووووه ياذا السيارة البلشة ... ياخي رح على رجليك

التفتت لعمر ولقيته يحاول يطرح نايف على الارض

رجعت وطالعت سعد بخوف

رايد = طيب انت ونايف معيين تعطوني سياراتكم

سعد = ياخبل افهم ... كم مرة اقولك سيارتي وسيارة نايف انساها ... دبر لك سيارة والا رح على اللموزين ... معطينك الفين ريال ... دبر عمرك .. بسررررعة رح

وراح لنايف يساعده على عمر

نزلت راسي .. ياربي وش هالورطة ... ودي اخذ الالفين بس خايف من عمر ومنصور و الهيئة كلهم يهاوشوني والصراحة اخاف اذا عصيتهم و رحت يطردوني من الاستراحة .. واذا مارحت اخاف من سعد ونايف يهجمون علي مثل ماهجموا على عمر

يعني رحت والا مارحت راح انضرب

رفعت راسي ولقيت سعد ونايف واقفين ويطالعون عمر المتمدد على الارض

التفت نايف لسعد

نايف معصب = ما حد يسلم منه حتى وهو مسخّن ( وانحنى على عمر ومسك فنيلته ) قسم بالله ياعمر اذا تدخلت بيننا وبين رايد اخليك تعرف من هو نايف

سعد = مسويلي فيها ( والتفت لي ) انت لهالحين هنا

خلاص ماني رايح ... ودي اعطيهم الالفين وافتك من هالسالفة .. بس خايف وشلون اقولهم مب رايح

نزلت نظري لعمر ولقيته متمدد وصدره يرتفع وينزل ... توني انتبه انه ماعليه الا ملابسه الداخليه ( سروال وفنيلة )

شهقت ... صح امس عمر طوال اليوم وهو نايم وحرارته مرتفعة ... حتى ماسهر مع الشباب كالعادة

انتبهت على نايف يمسك ذراعي ويجرني

نايف = رح خلصنا .. فاضيلك حنا .. ورانا جامعة

سحبت ذراعي من نايف ورفعت نظري له

رايد بخوف = خلاص مب رايح ... آآآ .. ماعندي سيارة ( وطلعت الالفين من جيبي الامامي ومديتها عليه )

التفت نايف لسعد شوي وبعدها التفت لي معصب وعطاني كف خلاني الف حول نفسي وطاحت الالفين من يدي

نايف بصراخ = مالك كلمة انت .. احيان تقول ابروح واحيان تقول مب رايح .. شايفنا لعبة عندك

مسكت خذي بألم وانا امسك دموعي ماتنزل ... كلهم يعطوني من هالكفوف .. اول عمر والحين نايف ... اذا قلت ابروح عطوني كف واذا قلت مب رايح عطوني كف ثاني .

رديت عليه وانا اجاهد دمعتي

رايد = لا تضرب ... ماني خدام عندك

سعد وعيونه علي = امش نايف امش ... لا تضيع وقتنا مع واحد ماله كلمه ( وانحنى واخذ الالفين من الارض )

نايف بصراخ = كااااان موااافق ... كله من عمر ( وراح لعمر المتمدد وهجم عليه مرة ثانية وجلس على بطنه ) ياكلب خربت الولد علينا ...

عمر بتعب = آآآ ... قم عن بطني ( ومسك يدين نايف يدافع عن نفسه )

جا سعد وابعدهم عن بعض

سعد = امش نايف ... خلنا ندور واحد من الشباب غير هالبزر .. لي يومين عنه وراسي مصدع ... قم خلصنا انت الثاني قم

قام نايف وراح وهو يتوعد عمر ويهدد

وراحوا اخيرا

التفتت لعمر ولقيته على وضعه متمدد ... وصدره يرتفع وينزل من الحمى ويئن

قربت عنده ونزلت نظري اطالعه وانا واقف

انتبهت ان رقبته عليها دم .. عرفت ان واحد منهم خانقه وقت الهوشة .. وبرطمه الفوقي ينزف دم

جلست وحطيت يدي على جبهته ... حرارته مرتفعه مرة

رايد = عمر

فتح عيونه وطالعني شوي وبعدها تلفت يدور نايف وسعد

رايد = راحوا

طالعني عمر وبعدها غمض عيونه مرة ثانية

رايد = عمر ( وحطيت يدي على صدره اهزه ) عمر خلاص انا ماني رايح

عمر وهو مغمض عيونه = الشرهه على اللي يجيب بزر عنده ( وفتح عيونه ) رح هات جوالي

سكتت بزعل ... ماني بزر .. انا رجال .. ويوم من الايام راح اثبت لكم هالشي

قمت ودخلت غرفة التلفزيون ورحت لثوب عمر المعلق بس مالقيت الجوال بجيوب الثوب ... تلفتت ادوره ولقيته على الطاولة الصغيرة اللي بجنب الكنبة اللي ينام عليها عمر

اخذت الجوال وطالعت الساعة

6 الصباح

رجعت لعمر ولقيته على وضعه ماتحرك

عطيته الجوال ... ضغّط فيه شوي وبعدها حطه عند اذنه

عمر بتعب = الووووه .. مشعل تكفى خذلي عذر من الدكتور محمد ... اليوم هو عندنا وهذي اخر محاضرة لي اذا غبتها حرمان على طول ... تكفى رحله وخذ عذر منه ضروري ......... لا مشعل تعبان ماقدر اجي ....... ايه الحرارة مانزلت ... احتريك مشعل اتصل علي اذا كلمت الدكتور محمد ... طيب مع السلامة ( وسكر الجوال ومدد يده بتعب )

رايد = قم رح للحجرة

مد عمر يده لي عشان اقومه

قومته وراح يترنح لغرفة التلفزيون ورحت وراه

انسدح عمر على كنبته وانكمش على نفسه بردان

عمر = لحفني رايد برررد

تلفتت ادور لحاف ... انا وعمر بالعادة ننام بدون لحاف اصلا الجو حار ومانحتاجها

لقيت ثلاث مناشف للشباب فارشينها على ظهر احد الكنبات ... اخذتها ولحفت عمر فيهن

انتبه عمر عى المناشف

عمر بتعب = جايبلي مناشف حق سباحة تلحفني فيها ..

رايد = مافيه لحاف

مارد علي .. غمض عيونه وسكت

رحت وجلست على الكنبة بحزن ... وحطيت يدي على خدي ... الكل يضربني .. لأنهم عارفين اني يتيم ومستقوين علي ... ودي اعتمد على نفسي ... ودي اتوظف

اخذت اكثر من ساعتين وانا مهموم وافكر بحالي فجأة قطع علي رنين جوال عمر

قعد يرن الجوال ويرن و عمر مايرد .. شكله نايم .. قمت والقيت نظره على الجوال

مشعل يتصل بك

رايد = عمر جوالك يرن ... عمر قم

سكت الجوال ورجع يرن مرة ثانية ( مشعل يتصل بك )

احم ... بما انه مشعل انا ابرد عليه

رايد = الووو

مشعل = عمر الدكتور محمد

قاطعته يوم شفت مشعل مانتبه اني رايد

رايد = انا رايد

سكت مشعل شوي

مشعل = رايد ! وين عمر ؟

رايد = نايم

مشعل = هو الى الحين تعبان ؟

رايد = ايه

مشعل بتنهيده = عنده محاضرة مايقدر يغيب عنها ... قومه رايد وقله مشعل يقول لك الدكتور محمد عيا يعطيك عذر يقول اذا غبت عن هالمحاضرة راح يحرمك من الامتحان

رايد = اقومه الحين يعني ؟

مشعل = محاضرته الساعة 11

ابعدت الجوال عن اذني اشوف الساعة ورجعت احط الجوال عند اذني

رايد = بس الساعة الحين 8

مشعل = امممم قومه الساعة 9 ونص وعطه بندول يخفف عنه شوي وعلى بال مايصحصح ومسافة الطريق تكون الساعة وصلت 11

رايد = فيه بندول بالاستراحة ؟

مشعل = لا طبعا مافيه ... رح للصيدليه وجيبله

رايد = ماعندي فلوس ولا سيارة عشان اروح

مشعل بملل = الحين ماعندك الا عمر ... خذ من بوكه ومفتاح سيارته ورح .. يله عندي محاضرة الحين مستعجل مع السلامة

وسكر بوجهي

التفتت لعمر ولقيته الى الحين نايم ويئن من الحرارة

طلعت ورحت عند المسبح .. ابنتظر لين الساعة 9 ونص واروح للصيدلية وبعدها اقوم عمر

* عمر *

انزعجت من رايد وهو يقومني وفتحت عيني ولقيته واقف قدامي ومعه كيسه وكوب ماء

انسدحت على ظهري بتعب وطالعت رايد

عمر = وش تبي خلني انام

مد رايد علي كيسه وكوب الماء

واضح من الكيسة انها من صيدلية ورفعت نظري له

عمر = وش هذا ؟

رايد = جبت لك من الصيدلية بندول .. اتصل مشعل على جوالك يقول الدكتور محمد عيا يعطيك عذر وانه راح يحرمك من الامتحان اذا ماجيت

تأففت من هالدكتور ... مابقلبه رحمه اعوذ بالله

جلست بتعب.. مديت يدي واخذت الكيسه من رايد واكلت البندول

جلس رايد بجنبي على الكنبة وهو ساكت

فجأة مد علي بوك ومفتاح

طالعتهم مستغرب واخذت شوي عشان استوعب وطالعت رايد

عمر = هذا بوكي ومفتاح سيارتي ؟

هز رايد راسه باية

التفتت للبندول وبعدها التفتت لبوكي اللي بيد رايد وبعدها طالعته وعصبت بس مالي حيل اصارخ عليه

عمر = ليه تاخذ من بوكي بدون ماتستاذن

رايد = مشعل قاللي خذ من بوك عمر واشتر بندول

سكتت لان مالي حيل ارادده

عمر = مافيه وقت لازم اروح للمحاضرة الحين

قمت بصعوبة ولبست ثوبي واخذت اغراضي وطلعت بتعب وانا اتأفف من هالدكتور الزفت

الساعة 12 ونص الظهر

طلعت من الجامعة بعد مارتحت شوي بالكفتريا

ركبت سيارتي وشغلتها بس شفت منصور يمشي طالع من البوابة

ضربت البوري عليه عشان ينتبهلي وفعلا انتبه لي وجاني بس لاحظت براس ثاني التفت لي.. وندمت وقتها اني ضربت البوري يوم شفت معاذ وقف و يطالعنا

منصور بابتسامة = هلا والله عمير ... وشلونك مع الحرارة

فتحت الدرج واخذت صورة كرت العايلة الخاص لاهل رايد و نزلت من السيارة

عمر = الحمد الله طيب .. اخذت بندول قبل اجي للجامعة واحس احسن الحين ..( التفتت لمعاذ ومن وقفته شكله يحتريني اخلص من منصور .. اففف ياليتني ماضربت البوري .. مالي خلق لمعاذوه الحين .. التفتت لمنصور مرة ثانية ) آآآ .. منصور ممكن خدمة

منصور مستغرب = آمر

مديت عليه الورقة

عمر = اليوم مالي حيل اروح و ابيك تروح عني للضمان الاجتماعي وتسأل الموظف الاسماء اللي هنا مسجلين بالضمان والا لا ؟

اخذ منصور الورقة مني وفتحها

منصور = هذا كرت عايلة رايد اللي معنا بالاستراحة ؟

هزيت راسي بأية وركبت السيارة يوم حسيت بتعب الوقوف

سكتت منصور وهو يقرا الورقة

منصور = اهاا طيب ... ابروح العصر .. الحين يمديهم سكروا

طالعت معاذ ولقيته الى الحين واقف

عمر = اوكي .. مشكور

راح منصور وشفت معاذ يمشي متوجه لي يوم شاف منصور راح

ريوست بالسيارة قبل يوصل معاذ مالي خلق له بس لسوء حظي وصل قبل ابتعد

معاذ = وقف وقف

وقفت وانا اتأفف

عمر بضيق = افففففففففف وش تبي

دخل معاذ راسه بدريشتي وسكت يوم انتبه للخدوش اللي بوجهي

عمر معصب = وش تطالع ... اخلص علي ابروح

ابتسم معاذ بسخرية = شكلك متهاوش مع احد ... شري ياولد العم مايسلم منك احد

التفتت عنه متضايق

عمر = مالك دخل ( التفتت له و دفعته عن دريشتي ) وخر

حركت السيارة وطلعت من المواقف وعند الاشارة القريبة من الجامعة وقف بجنبي معاذ بسيارته ... عرفت وقتها انه بيروح لبيت جدي

حطيت نفسي اني مانتبهتله ...

صح على طاري جدي مب رايح عندهم اليوم وانا حرارتي مرتفعه وش يفكني من جدتي بعدين

ولعت الاشارة خضراء وحركت ومعاذ يمشي بمحاذاتي ويقرب سيارته لي يعاندي

اذا قللت سرعتي قلل سرعته واذا اسرعت اسرع

قربنا عند المنعطف اللي بعدها هو يلف يمين لبيت جدي وانا اروح سيده لبيتي

اسرعت عشان معاذ يسرع ويلف وافتك من وجهه..

فجأة لف معاذ بسيارته كأنه بيصدمني

انا من الفزعة و المفاجأة .. لفيت الدركسون بقوة ومع السرعة انقلبت سيارتي

حطيت ذراعي على وجهي يوم شفت القزاز الامامي تكسر وصارخت باعلى صوتي يوم حسيت بشي دخل فخذي

مسكت الدركسون بقوة بيديني الثنتين اثبت نفسي على المرتبه .. و حنيت راسي على الدركسون احاول اغطي وجهي يوم شفت قزازة دريشة الراكب تكسرت ... حمدت الله ان دريشتي وقتها كانت مفتوحه

= عمر ... رد علي ... عمر انت بخير ... عمر تكفى رد .. ماكنت اقصد

انتبهت على صوت معاذ يكلمني ويهزني ... رفعت راسي عن الدركسون ... وتلفتت احاول استوعب

لقيت سيارتي واقفة فوق الرصيف الجانبي .. والتفتت لمعاذ وانا الى الحين مفزوع

وقلبي يضرب بقوة ...

معاذ بخوف = عمر .. الحمد الله على سلامتك .. وشفيك ياخي كنت امزح معك

نزلت نظري اطالع صدري وبطني احاول استوعب انا الى الحين حي والا مت

تجمعوا بعض المارة .. واسمع اصواتهم .. طلعوه طلعوه

رفعت راسي للمتجمعين وانا الى الحين مفهي

فتح معاذ الباب بصعوبة بمساعدة واحد ثاني ...

معاذ = اطلع عمر ... ثوبك مليان دم ... تكفى والله ماقصدت

شفت حظني مليان قزاز وثوبي من عند فخذي مليان دم

نزلت بصعوبة من السيارة وانا ماسك فخذي اللي تعورني

عمر بألم = رجلي رجلي ( وجلست بالارض على الرصيف )

جلس معاذ عندي

معاذ = عمر شكلها دخلت فيها قزازة

رفعت راسي اشوف المسافة بين اول مانقلبت الى وقوف السيارة في الرصيف

مسافة قصيرة ... شكل السيارة انقلبت مرة وحدة واعتدلت فوق الرصيف ..

تنهدت احاول اهدي نفسي ... الحمد الله على سلامتي

سمعت احد المتجمعين

= ابتصل على الاسعاف

نط معاذ فازع ورد عليه بخوف

معاذ = لا لا مـ .. مـ .. ماله داعي ... اسعاف ... آآآ .. انا ابوديه للمستشفى

طالعت معاذ وانا ساكت

جلس واحد بجنبي من الجهه الثانية

= الحمد الله على سلامتك ... كنت وراك وشفتك يوم تنقلب ... الحمد الله جت سليمة .. خلني اشوف رجلك ونعالجها لين يجي الاسعاف

التفتت للرجال

عمر = لا مشكور ... ابحتري الشرطة ( والتفتت لمعاذ وكملت ) نتحاسب

معاذ بخوف = عمر .. ماله داعي تكبر السالفة .. خلنا نحلها بيننا ... اذا تدخلت الشرطة تدخلوا ابوي وجدي

ابتسمت كنت عارف انه خايف من ابوه ... ملاحظها على معاذ من زمان وتوني تأكدت

عمر = بس انا كذا والا كذا ابعلّم عمي ( ومسكت فخذي بألم ) آآآخخخ

شفت معاذ رافع جواله لاذنه شوي وجاه رد

معاذ = مصعب تعال تكفى عند الطريق العام للجامعة .......... انت تعال وتعرف بعدين ...

قام معاذ وشكر المتجمعين وطلب منهم كل يروح بطريقه

راحوا وبقى انا ومعاذ جالسين على الرصيف

معاذ = قم عمر اوديك للمستشفى

التفتت لمعاذ احاول اذله

عمر = هات شماغك عشان اوقف النزيف

معاذ = وشماغك وينه ؟

عمر = مدري يمكن بالسيارة بس مابيه يمديه مليان قزاز .. ابي شماغك

ناظرني معاذ شوي وبعدها نزل شماغه وعطانياه ... حطيت شماغ معاذ على فخذي

ما اقدر اضغط على الجرح اكيد داخله قزازة

معاذ = الحين وش قاعد تحتري انت ... قم اوديك للمستشفى

عمر = احتري الشرطة

معاذ بترجي = تكفى عمر خلنا نحلها بيننا

سكتت ومارديت عليه

عشر دقايق وجا مصعب مفزوع يوم شاف سيارتي على الرصيف متكسرة ونزل من سيارته يركض متوجه لنا

مصعب = عمر انت طيب ؟

عمر = اسأل اخوك ... مدري وش كان يقصد يوم لف علي

معاذ = والله ماكنت اقصد شي ... كنت ابي اخوفك بس

جا مصعب وجلس قدامي

مصعب = الحمد الله على سلامتك ... طار قلبي يوم شفت السيارة من بعيد

معاذ = قم عمر خلنا نوديك المستشفى ... قبل تمر شرطة والا شي ... وسيارتك خلها علي انا انقلها بالسطحه

التفتت لمعاذ مستمتع باهانته

عمر = بس انا ابي الشرطة تتدخل وتقيم الخساير

معاذ = سيارتك ماهي متضررة مرة ... تصليح القزاز والسقف شوي متهشم واشياء ثانية بسيطة .. ماله داعي الشرطة

سكتت شوي افكر بطريقة استغله هو واخوه

عمر = طيب اباخذ سيارتك لين تخلص سيارتي

معاذ = طيب مثل ماتبي بس قم

عمر = اممممم طيب وتصليح سيارتي من يدفع خسايرها

معاذ = انا ابحاول اخذ من ابوي واصلحها لك ... تقريبا يبيلها 3000 ريال

التفتت له ...

عمر = وش 3000 ... تصليحها يكلف اكثر واذا كنت مانت مقتنع خلنا نجيب الشرطة تقرر

معاذ = لا لا لا .. ماله داعي الشرطة ( وتنهد ) عمر ماعندي الا مكافأتي... وابوي وجدي الصراحة مابيهم يتدخلون ... عمر تكفى خلنا ندخل سيارتك الورشة ونصلحها على شوي شوي

عمر = ياسلام ... لا سيارتي ابيها تطلع بسرعة ( وسكتت شوي افكر ) طيب شف ... انا عندي اللي يصلح سيارتي واقدر ادخلها الحين وتطلع بوقتها وماراح اقول لعمي وجدي بس بشرط

معاذ = وش

عمر بابتسامة = تعطيني مكافأتك ومكأفاة مصعب كاملة كل شهر ... لين تخلصون اللي عليكم

طير مصعب عيونه فيني

مصعب = وانا وش علي تاخذ مكافأتي ... قسم بالله توني جاي ... ما أذيت احد

معاذ = وكم اللي علينا

عمر = اللي عليكم قيمة تصليح سيارتي ... نوديها الورشة ونشوف كم تكلف طبعا مع الصبغ وقطع الغيار والقزاز وكللللللل شي

معاذ بترجي = طيب خذ نص المكافاة ... ماهي حلوة امد يدي لبوي يصرف علي وعلى سيارتي

عمر بعناد = كل المكافأة ... حقتك وحق مصعب

سكت معاذ وهو منقهر

الفتتت له وابتسمت اغيضه

عمر = وابي سيارتك لين تطلع سيارتي .. صح على فكرة عطني 100 ريال الحين عشان السطحة تاخذ سيارتي للورشة

معاذ معصب = ماني معطيك شي الحين .. انا ابتصل على السطحة

عمر بابتسامة = لا حبيبي لازم انا اشرف على تصليحها بنفسي واشوف كم تكلف

معاذ معصب = بسيطة ياعمر ... قسم بالله لاردها لك ( وقام )

رفعت راسي له

عمر = لك وجه تهدد .. مدري من اللي غلط علي قبل شوي

مارد علي معاذ وراح لسيارته وجاب المفتاح وحذفه بحظني

معاذ منقهر = يله مصعب مشينا

عمر = وين المية

دخل معاذ يده بجيبه وهو معصب وطلع بوكه .. حذف علي المية

والتفت لمصعب

معاذ = يله انت امش

التفت مصعب لاخوه وبعدها التفت لي

مصعب = قم عمر اوديك المستشفى

صارخ معاذ عليه

معاذ بصراخ = خله يذلف... يكفي اللي اخذه

طالعني مصعب شوي وقام متوجه لاخوه وراحوا

قمت بصعوبة واخذت الاغراض المهمة من سيارتي و ركبت سيارة معاذ ورحت للمستشفى

17 - 4 - 2014, 09:00 AM

* الجـزء العاشـر *

قمت بصعوبة واخذت الاغراض المهمة من سيارتي و ركبت سيارة معاذ ورحت للمستشفى

الساعة 5 ونص العصر

طلعت من المستشفى وانا اتأفف من العكاز اللي عطوني اياه

كأني شايب ... معطيني عكاز شيبان ... عكاز اللي نوعه حديدي وتدخل يدك فيه

اكثر شي اشوفه مع الشيبان

سوو خياطه لفخذي ... وكل ماعورتني دعيت على معاذ

والحين ماقدر اوطى عليها ... احس شوي وتنفك الخياطة .. والمشكلة متفشل من عكاز الشيبان هذا

ركبت السيارة وتوجهت للاستراحة

وصلت عند الاستراحة ورميت العكاز ورا الزبالة الكبيرة الموجودة برا ودخلت الاستراحة اعرج

توجهت لغرفة التلفزيون ابي انام ... تعبان ..

بس الصراحة احلى مافي الحادث ان حرارتي خفت شكله من الخوف والفزعة اللي صارت نزلت الحرارة

و المستشفى عطوني مغذي وهم يخاطوا الجرح وهذا ساعدني شوي

اول ماوصلت باب الغرفة طلع بوجهي رايد ماسك بطنه

واول ماشافني شهق

رايد بصدمه = عمر .. وش فيك ؟

قطبت حواجبي مستغرب ... بسم الله مسرع يعرف وانا متأكد انه ماشافني وانا اعرج لاني اول ماشفته بوجهي وقفت

رايد بصدمه = صاير عليك حادث ( واشر على ثوبي )

نزلت نظري للمكان اللي يشر عليه

صح ... نسيت ان ثوبي عليه دم ... المفروض ارجع للبيت وابدل ملابسي بس نسيت

عمر = حادث بسيط ماعليك ... ( ورحت اعرج للكنبة ونزلت ثوبي ورميته بإهمال على الارض وانسدحت على الكنبة بتعب ) رايد ابي انام تعبان ... اذا جوا الشباب قومني .. لا تنسى مثل عادتك

رايد مستغرب = والصلاة ماقومك

سكتت نسيت الصلاة اصلا ... ياربي مدري متى احافظ عليها

عمر = آآآ .. الا طبعا قومني ( وانتبهت على رايد ماسك بطنه ) وش عندك ماسك بطنك

رايد = جوعااااااااااان

عمر = اوووه هذي عادتك يارايد جوعان جوعان .. المهم بس خلني انام

فجأة رن جوالي .. اففففف هذا وقته .. المشكلة جوالي الحين بجيب الثوب ونسيت اطلعه وعاجز اجيبه الحين ... التفتت لرايد اللي واقف

عمر = رايد انت واقف هات ثوبي

مشى رايد وانحنى وطلع الجوال من ثوبي ومده علي

القيت نظره عليه ( الراس الكبير يتصل بك )

استغربت جدي متصل علي الحين

عمر = هلا جدي

جدي = هلا فيك .. عمر وانا جدك المغرب بيجيون رجال عندي تعال ابيك تضيفهم

تلعثمت هذا وقته .. انا اعرج كيف بالله اضيفهم هذولي .. وبعدين تعبان ابي انام

عمر بارتباك = جدي قل لمعاذ والا مصعب يجون يصبون القهوة عنك

جدي = اروح للي بعيد ومسافة 20 كيلو وانت عندي

تأففت وش السوات الحين .. ماقدر اضيفهم وانا اعرج .. والخياطة الى الحين تعورني وماتعودت عليها

جدي = يله تعال ( وسكر بوجهي )

جلس رايد عند رجولي

رايد = وش فيك ؟

عمر متضايق = جدي بيجه رجال ومافيه احد يصب القهوة لهم غيري

قمت متضايق ولبست ثوبي

رايد = وصلني للحارة معك ابي اشوف اخواتي

التفتت لرايد مستغرب

عمر = تقدر تشوفهم الحين ... يمكن يشوفك عمك

رايد = ابنط الجدار اذا راح عمي للمسجد

هزيت راسي بايه وطلعنا

مريت بيتي وبدلت وطلعت لرايد اللي يحتريني بالسيارة

رايد = هذا بيتكم ؟

التفتت لرايد

عمر = بيتكم ؟ اللي يسمعك يقول عشرة حنا .. هو بيتي انا لحالي مامعي احد

التفت رايد لي مستغرب

رايد = مالك احد ابد ؟ ... لا اخوان ولا اخوات ولا احد ابد

عمر = وانت وش رايك ... ماتشوفني 24 ساعة معك بالاستراحة

رايد = بس انا سمعت ان لك ام ... و مرة سمعتك تكلمها بعد

تنهدت وسكتت عنه ... هو كل الوحدة اللي احس فيها بسبب امي ... قبل تتزوج امي كنت احس بالوحدة بس ارحم من الحين ... ارحم بوااااجد

قبل اذا دخلت البيت القى امي واعرف ان فيه احد يحتريني .. وفيه من يرد لي الصوت ... الحين احس اني مقطوع من شجرة ... كل مادخلته احس فيه جنون من كثر ماهو خالي

وصلنا الحارة ونزل رايد ونزلت ... شفت رايد يوقف ورا احدى السيارات

استغربت وش عنده هذا

صارخت بصوت عالي عشان يسمعني

عمر = وش تسوي ؟

رايد = سيارة عمي هنا ... ابحتريه يذن واذا طلع عمي ادخل البيت

هزيت راسي من حال هالولد ... يكسر خاطري بعض الاحيان .. ليه مايروح لخواله ويفك عمره

دخلت البيت وانا اعرج وسلمت على عمتي وجدتي وجدي

واستلموني تحقيق على عرجتي ... كيف ومتى ولماذا وربما

الصراحة احترت وش اقول .. مابي اقول حادث لان الحادث لازم فيها مرور وتأمين ومدري ايش وانا مابلغت واخاف جدي يروح للمرور من وراي واذا ما شاف بلاغ هناك يجيني يحقق معي مرة ثانية وبعدها عاد يعرف انه معاذ

ومابي اخسر مكافأت معاذ ومصعب

بصعوبة تهربت من اسألتهم بكذبة وقلت لهم وانا العب كورة طحت

صح مها استلمتني ضحك وتطنز بس ارحم من اني اخسر مكافأت معاذ ومصعب

المغرب

وانا طالع من المسجد اتصل علي منصور

عمر = هلا منصور

منصور = هلا فيك ... تراني رحت للمشوار اللي قلتلي

صح نسيت اني ارسلته للضمان الاجتماعي

شكلي نسيت كل شي بسبب الخوف و الفزعة والتقلب بالسيارة

عمر = هااااه ووش صار معك

منصور = يارجال قسم بالله لو هذا عمي كان مت قهر

سكتت ... كأني فهمت

منصور = عم رايد ياخذ فلوسهم من وراهم

عمر بتنهيدة = مثل ماكنت متوقع .. عشان كذا عمه معيي يعطي رايد كرتهم العايلي

منصور بعصبية = ياخي وش هالعم ...

عمر = اعلم رايد ؟

منصور = ياخي انا يوم علمني الموظف شوي ويطق فيني عرق ... وش بيسوي رايد لو يدري ... بيموت على طول

سكرت عن منصور وانا محتار اقول لرايد والا لا

دخلت الحارة ودورت بعيوني على رايد وماشفته ... حتى يوم طلعت من البيت ماشفته .. اعلمه ان عمه ياخذ راتب الضمان حقهم

لا لا ماراح اعلمه ... اقهره بس كذا ... اصلا مايقدر يسوي شي وهو توه ماوصل السن القانوني وعمه وليه والقانون مع عمه ..

مرت فترة و تجمعوا الرجال بمجلس جدي وانا بصعوبة اصب لهذا واضيف هذا

وكل ماعورتني فخذي تحسبت على معاذوه التيس ... هين يامعاذ ان ماشفطت فلوسك كلها انت واخوك ما اكون عمر ... سيارتي الى الحين مارحت لها ... بس راح اغير فيها كل شي عشان يكثر تكاليف وكلها على ظهرك يامعاذ

= وين ولد اخوك يابو بندر له شهر او اكثر ماشفناه ؟

انتبهت على سؤال جدي ... ابو بندر ... ابو بندر عم رايد ماغيره ؟

التفتت اراقب الوجوه الموجودة احتري ابو بندر هذا يتكلم ... ابي اعرف شكله

فجأة تكلم احد الموجودين

= آآآآ ... وش تبيني اسوي بهالولد ... صايع .. والا بيتي مفتوح له يروح ويجي على كيفه يابو فهد

طيرت عيوني على هالشايب الكذاب ... اجل بيتك مفتوح له والولد كل ظهر يتسلق الجدران عشان بس يشوف اخواته وفوق هذا انت ماكل حلالهم

الصراحة ودي افرغ هالدله اللي بيدي على راسه

جدي = طيب دورته انت ... تعرف وينه ... الولد لا يضيع تراه الى الحين بسن المراهقة وينخاف عليه

صح انا ماعلمت جدي ان رايد معنا بالاستراحة ... والصراحة متخوف من ردة فعل جدي ...

جدي مايحب شلتي اللي اسهر معهم ... كيف عاد اذا عرف ان هالبزر عندنا ... واخاف جدي اذا سمع عن رايد شي يتهمنا اننا ضيعنا ... اسكت احسن اجل .. مب لازم يدري جدي انه عندنا

ابو بندر = وين تبيني ادوره ... الديرة عريضة كبيرة

طالعت ابو بندر هذا بكره ... قل مانت مهتم اصلا عشان تدوره

جدي = الله يرده ويحفظه ان شاء الله من عيال الحرام ... انتبهله يابو بندر تراه يتيم

ابو بندر = ان شاء الله خير ...

ودي اتدخل بالكلام واحرجه بس اخاف اقول عن فلوس الظمان يقولون وش عرفك واخاف اقول ليش تبيع بيتهم ونفس الشي بيقولون وش عرفك

* رايد *

التفتت لمريم متفاجئ

رايد متفاجئ = خالي جا هنا

مريم = ايه وتهاوش من عمي والحين خالي يدورك

رايد بصراخ = يدورني وش يبي فيني ... ماعندي شي ياخذه

قامت مريم وراحت لباب الملحق وفتحته بشويش وسكرته مرة ثانية

مريم بخوف = آآآ اششش رايد ... آآآ لا يسمعك احد ... وقتك مو مناسب ابد

جت عندي ومسكت يدي

مريم = تكفى رايد رح لخوالي وعيش عندهم

سحبت يدي منها معصب وقمت واقف

رايد معصب = ماني برايح ... مابي اصير بديرة وانتي ودانه بديرة اصلا خالي مثل عمي كلهم طمااعين

مريم = اقصر صوتك ( وكملت تترجاني ) رايد انا تعبانه ... ودانه خلاص ماقدر اتابعها ... رح عند خالي يمكن يقدر يدبرك وتتوظف وترجع تاخذنا ... انا خلاص مالي حيل

قطبت حواجبي مستغرب من كلامها

رايد = ليه وش فيك .؟

حطت مريم يدها على ظهرها وهي تجاهد الدمعة

مريم = لي اسبوعين وظهري يعورني

رايد = رحتي للمستشفى ؟

مريم = وداني عمي للمستشفى بس عطوني موعد ... بس عمي ماوداني للموعد ... عمي اذا وداني مرة مايويني مرة ثانية

رايد = موعدك راح والا باقي ... اقدر ادبر سيارة

رفعت مريم راسي لي وابتسمت

مريم = الله يخليك لي ... لا خلاص فات موعدي ... بس رايد رح اسكن مع خالي

رايد = قلتلك ماني رايح ... خالك وعمك واحد ... وانا ابي اعتمد على نفسي ... انا خلاص كبير وبتشوفين

مريم = وش اشوف ... لك شهرين وانا مدري وين تسكن والا وين تروح ...

رايد معصب = لا تعلمين خالي انك شفتيني ... مابي اشوف احد منهم صدقيني هم مايوبننا هم يبون فلوسنا وبس

مريم = وهي بقت فيها فلوس .. خلاص مالنا شي عشان يطمعون فينا ... رح لخالي

رايد = قلتلك مب رايح ماتفهمين ... خالي يبي يتحكم فيني وعمي يبي يتحكم فيكم

سكتت مريم يوم تعبت من اقناعي

رايد = لا تحاولين .. خلاص انا تعلمت ... عرفت ان ماحد يحبنا ويهتم فينا ... اذا ماعتمدتي انتي على نفسك لا تعتمدين على احد

سكتت مريم وماردت علي وحطت يدها على ظهرها

جلست بجنبها على سريري بالمحلق اللي صار مغبر

رايد = وش فيك مريم ... اشوفك تغيرتي مرة

مريم بحزن = تعبانة نفسيتي تعبانة ... انت مدري وش يصير عليك ودانه مهملتها بسبب هالشغل اللي فوق راسي .. وظهري كل يوم يعورني ... اخاف تضيعون مني انت ودانه

رايد = طيب اذا دبرت سيارة تقدرين تطلعين من البيت وتروحين للمستشفى

التفت مريم لي

مريم بخوف = لا اخاف من عمي

رايد = قوليلهم انك رحتي معي ... ماعلينا منهم

طالعتني مريم وهي تفكر وبعدها هزت راسها بخوف

مريم = لا لا ... انت ماراح يجيك شي بس انا بيضربني عمي اذا رجعت

سكتت منقهر ...

صح اذا رجعت بيضربها عمي... آآآآه يالقهر اخواتي محتاجيني ولاني قادر اسوي شي

قمت وطلعت من البيت وانا مختنق

شفت بندر يلعب بالشارع واندسيت ورا السيارات عشان مايشوفني

وقعدت اطالعه بحقد ... ان ماذوقتك اللي ذقته يابندر

طلعت دموعي غصب عني من القهر ... تلثمت بشماغي واخذت نفس احاول اهدي نفسي ... شبعت دموع ... لو بتنفعني دموعي كان نفعتني من زمان

رحت لسيارة عمر وجلست على الكبوت احتريه .. اجل خالي يدورني .. هه .. بسيطة راح اعلمهم منهو رايد .. ماني محتاج لكم

واحد يبي يتحكم باخواتي والثاني يبي يتحكم فيني ... ماني محتاجكم ... راح اعلمكم منهو رايد

سمعت يذن لصلاة العشاء

دقايق وشفت رجال طالعين من بيت جد عمر ... طيرت عيوني لما شفت عمي من بينهم

نزلت بسرعة من الكبوت ورحت ورا السيارة وانا متلثم

ياليت سيارة عمر مفتوحه كان شغلتها وخليت عمي تحت كفراتها .. اخ يالقهر

شفت بندر ترك البزارين اللي يلعب معهم وركض متوجه لابوه عشان يروح معه للمسجد

بسيطة ياعمي ... احترني راجعلك ..

رجعت وجلست على الكبوت لما شفت الرجال بعدوا

ااااااه مريم حالتها ماهي عاجبتني ... واضح انها تعبانه وتقول عندها موعد فايت

مستعد اوديها بس المشكلة وشلون تطلع من البيت ...

ودي نصير انا ومريم ودانه ببيت لحالنا ونعيش حياتنا بحرية

بس وشلون وانا ماني قادر ادبر نفسي ... انا على عشاي امس مع الشباب ... يومي هذا كله ماكلت شي ..وشلون ابخلّص اخواتي من بيت عمي وانا مامعي حتى ريال واحد

مريم شكلها تغير

شفت عمر يطلع من بيت جده وهو ماسك فخذه ويعرج ... نزلت بصمت ووقفت عند باب الراكب احتري عمر يفتح لي الباب

ركبنا السيارة وعمر يشتكي من عوار رجله

عمر بألم = اخخخخ رجلي تعورني ... حسبي الله عليك يامعاذ ...

التفتت اطالع الشارع من الدريشة اللي عندي وانا متضايق ومابي اكلم احد ... احس ابنفجر

سمعت عمر يكلمني

عمر = شفت عمك كان عندنا ؟

مارديت عليه

عمر = اهاا واضح من اللطمه انك شفته ... صح ؟

هزيت راسي بايه عشان يسكت عني

* عمر *

طالعت رايد مستغرب ... وشفيه هذا اليوم منتفخ و مايرد علي

شغلت السيارة وحركتها ... بس الصراحة معذور ... المشكلة وش بيصير فيه اذا عرف ان عمه ماخذ اسمه واسم اخواته ويستفيد من الضمان من وراهم

فجأة سألني رايد

رايد = عمر ممكن سيارتك بكرة ابي اخذها الصباح

عمر = بكرة الاثنين عندي جامعه ... ليه وش تبي فيها لا يكون نايف وسعد مرسلينك

ماسمعت رد من رايد والتفتت عليه وشفته سرحان وهو الى الحين متلثم

قطبت حواجبي مستغرب ... وشفيه رايد اليوم

طبعا لا يمكن اعطيه السيارة اكيد بيروح عشان شغل نايف وسعد

وصلنا الاستراحة ولقيت منصور ومشعل وبعض الشباب هناك

ومايحتاج الشباب استلموني تحقيق يوم شافوني اعرج ... وعلمتهم اني سويت حادث بس ماقلت انه معاذ لان كلهم يعرفون كرهي لعيال عمي .. واكثر الاحيان يصيرون بصف معاذ ومصعب ودايم يخلوني انا الغلطان وابو المشاكل خاصة مشعل اذا صارت سالفة فيها انا وعيال عمي يحط مشعل سبب المشكلة علي

هو صح يوقف معي وينفذ بعض العمليات معي بحكم اني صديقه بس دايما يلومني ويهاوشني اذا صرنا لحالنا

شفت رايد بعيد عنا وجالس على عشب الملعب لحاله

ملاحظ عليه كل ماراح يشوف اخواته رجع متضايق ... معقول حال اخواته سئ لهالدرجة ... تراهم ماكلين شاربين هناك وش يبي رايد بعد

قطع افكاري عبد الله احد الشباب معنا بالاستراحة

عبد الله = شبااااااااااب راعي الاستراحة معصب يبينا نطلع

قطبت حواجبي مستغرب ..

عبد الله هو المسؤول عن تجميع القطه ويعطيها راعي الاستراحة بس ليه يبينا نطلع

منصور مستغرب = معصب ؟ ليه وش سوينا ؟

احد الشباب = ماله حق يطلعنا تونا معطينه الاجار

عبد الله = الاجار هو مستعد يرجعه لنا بس يبينا نطلع حاولت فيه بس معيي

عمر مستغرب = طيب ليش ... كذا بس من الباب للطاقة

ضحك عبد الله

عبد الله = تدرون ليش ؟ عشان الهيئة مسكت سعد اما نايف سافر قبل يمسكونه

شهقت

عمر مستغرب = الهيئة مسكتهم ؟

عبد الله = مسكت سعد بس ... نايف يقولون اهله انه مسافر ..

عمر = لحظة وشلون مسافر وهو اليوم هو وسعد كانوا هنا الصباح وتهاوشت معهم انا قبل اروح للجامعة

رفع عبد الله يديه يعني هذا اللي عندي

عبد الله = مدري هذي الاخبار اللي جتني ..

سألني احد الشباب = متأكد ياعمر ان نايف كان موجود هنا الصباح

عمر = ايه وتهاوشت معه لانهم كانوا يبون رايد يروح للعامل يجيبلهم اللي هم يبون

مشعل = اووووه الحمد الله ... الله سلم رايد ... شكل الهيئة كانت حاطة كمين وشكل اللي راح سعد وانمسك هناك .... بس السؤال اللي يطرح نفسه نايف وينه ؟

عبد الله = ماعلينا منهم شباب ... يله فضوا الاستراحة خلونا نطلع

منصور = الحين عاد ... خلنا نسهر اليوم وبكرة سلمه المفتاح

عبد الله = لا لا ... لا تبلشني من راعي الاستراحة ... يقول شوهتوا سمعة استراحتي ومعصب علينا

قرب مشعل فمه من اذني وهمس

مشعل = عمر ... رايد ماله مكان يروحله

ابعدت وجهي عن مشعل و طالعته

عمر = انت اللي جبته ... دبر له مكان الحين

مشعل = وين تبيني اوديه ؟

عمر = ببيتك

مشعل = بيتي فيه اهلي ..اخواتي وحريم ابوي .. وين تبي احطه ببيتي صاحي انت؟

عمر = والله عاد دبره انت

تدخلوا الشباب يوم علت اصواتنا انا ومشعل

منصور = وش فيكم انتم ؟

مشعل = منصور ... رايد ماله مكان يروحله وين نوديه ؟

عمر = منصور خذه معك لبيتك ؟

منصور = اخذه لبيتي والى متى ان شاء الله ... هو بالاستراحة له شهرين ... بيتضايقون اهلي منه اذا طول عندنا

عبد الله = على الاقل لين نلقى استراحة نستاجرها

منصور = يعني الى متى ؟

عبد الله = اممممم ... مدري بس اظن مايطول ... اسبوعين ثلاثة لين نلقى اللى يأجرنا استراحته بالشهر

منصور = حنا بصعوبة لقينا الاستراحة هذي ... اكثر اهل الاستراحات مايوافقون يأجرون شباب بالشهر ( والتفت لي ) عمر خذه معك ... ولا تتعذر ندري ان بيتك مافيه احد

التفتوا الشباب كلهم يأيدون منصور

عبد الله = ايه والله صح ... انت بيتك فاضي

مشعل = ايه صح خذه معك

عمر = هيه هيه انت واياه ... عندي امي

مشعل = عميران بلا كذب ... كلنا ندري ان امك متزوجه

عمر معصب = صح متزوجة بس تجي للبيت كل اسبوعين

مط منصور كلمتي مستهزي

منصور = كللللل اسبوعيييييييين

التفتت لمنصور معصب

عمر بعصبية = ايه كل اسبوعين وش فيها

عبد الله = خلونا ننادي رايد ونشوف رايه يمكن يقدر يرجع لعمه ( وصاح باعلى صوته ينادي رايد )

جانا رايد ووقف عندنا يطالع عبد الله بصمت .. ومن نظراته كأنه يحتري عبد الله يقول اللي عنده

عبد الله = رايد راعي الاستراحة يبينا نطلع ... تقدر ترجع لبيت عمك ؟

طير رايد عيونه بعبد الله

سكتنا شوي نحتريه يتكلم بس هو طول ساكت

مشعل = رايد اذا كنت ماتبي ترجع لعمك بيت عمر موجود

التفتت لمشعل وجه العنز ..

عمر = هيه انت على كيفك تعزمه لبيتي ... شاورني اول

مشعل = شاورناك قبل شوي

عمر معصب = بس ماوافقت الى الحين

فجأة مشى رايد مسرع متوجه لبوابة الاستراحة

صحنا فيه ننادي عليه عشان يرجع بس هو مارد علينا وطلع من الاستراحة

احد الشباب = وين بيروح ؟

عبد الله = شكله زعل

قام مشعل وطلع ورا رايد يلحقه

منصور = عمر تكفى خذه معك للبيت والله هالولد يكسر خاطري ...

وقعدوا الشباب يلوموني .... خذه وخذه وحرام عليك ومادري ايش

اففففف والله بلشنا بهالبزر ... قبل قالوا لي انتبه له ياعمر والحين يقولون خذه للبيت ياعمر ... ما باقي الا يقولون رضعه ياعمر

صارخت فيهم عشان يسكتون

عمر = خلااااااص خلاص باخذه معي ... فكونا

قمنا انا ومنصور وطلعنا من الاستراحة ندور رايد

شفنا سيارة مشعل واقفة وتلفتنا ندوره ولقيناه واقف مع رايد بعيد شوي

قربنا لهم وانا اعرج من عوار رجلي

رايد ماسك شماغه بيده ومغطي عيونه بذراعه ويشاهق

رايد بصوت باكي = خلوني مالكم دخل فيني ...

مشعل = خلاص رايد انا ابقول لابوي تقعد عندنا لين يستاجر عبد الله استراحة ثانية

رفع رايد وجهه يطالع مشعل ودموعه على خده ...

رايد = مشكور مشعل بس خلاص انا ابي اعتمد على نفسي .. وبعدين انت بيتك بنفس حارة عمي .. مابي عمي يشوفني

منصور = طيب وين تبي تروح الحين ... صح على فكرة ليه ماتروح لخوالك

التفت رايد لمنصور معصب

رايد بصراخ = لا عمي ولا خالي ... مابي احد منهم ... خلاص خلوني بحالي مالكم دخل فيني ... كلهم بيشوفون منهو رايد ... ( وغطى عيونه بذراعه وبكى )

تلفتنا انا ومنصور ومشعل نطالع بعض

مشيت خطوة عشان اقرب لرايد اكثر ولفيت ذراعي على اكتافه وانحنيت عليه اطالع وجهه

عمر = خلاص رايد ... انا بيتي مافيه احد ... انت تعرف ماعندي لا اخوان ولا اخوات حتى امي متزوجه ...

رفع رايد راسه وابعد يدي عن اكتافه بعنف

رايد بصوت باكي = انا سمعتك تقول لمشعل مانت موافق .. ماني محتاج لكم لا انت ولا غيرك

ومشى يبي يروح بس مسكته قبل يتعداني

عمر = يابن الحلال اصبر .. ( وحطيت يدي على كتفه ) ياخي انا بس طريقة مشعل استفزتني شوي ... يتصرف كأن البيت بيته عشان كذا عصبت ( وطالعت مشعل وبعدها نزلت نظري لرايد اللي منزل راسه بحزن ويشاهق ) حياك الله ببيتي ... انا تراني وحيد لا اخوان ولا اخوات وابيك تسليني بالبيت .. والحين بعد مافيه استراحة اسهر فيها مع الشباب .. والله ابطفش بالبيت لحالي ... تعال تسليني واسليك .. البيت صاير كأنه مهجور وانت على الاقل احسن من هالجنون اللي مستفيده من بيتي

مشعل = افاااا يبي يكحلها عماها

منصور = هههههههه رح يارايد مع عمر تراه يقصد انه خايف من هالجنون ويبيك تجسره هههههههههه

رفع رايد نظره لي يطالعني وهو ساكت

عمر = وش فيك تطالعني ( ولفيت ذراعي على اكتافه وقربته مني ) خلاص موافق تسكن معي ؟ ... والله تراني لحالي بالبيت مامعي احد

فجأة لف رايد يدينه حوالين خصري وضمني وغطى وجهه بصدري وبكى اكثر

تفاجأت من حركته .. والصراحة انحرجت من مشعل ومنصور ... اول مرة احد يضمني كذا

متعود على البكوس والضرب والهواش مع الشباب اما واحد يبكي على صدري اول مرة ... تنهدت رايد مراهق الى الحين

سمعت رايد يتكلم وهو يبكي بس قدرت اميز كلامه

رايد بصوت باكي = ياليتني مت مع امي وابوي

لفيت يدي على رايد وضميته اكثر وابتسمت

عمر = يله مشينا

دخلنا انا ورايد بيتي ... ودخلنا الصاله عند التلفزيون

عمر = حياك رايد

منزل راسه وساكت مانطق بكلمة طوال ماحنا بالسيارة لين وصلنا البيت

جلس على كنب الصاله بصمت

ركبت الدرج بصعوبة ورحت لغرفة امي وقفلتها ... بعض الاحيان اذا كان علي مذاكرة انام بغرفة امي ..

صح على طاري امي يمكن تجي بكرة او بعده ... مر عليها اسبوعين ... لازم انبه عليها

اتصلت على امي وعلمتها ان احد الشباب عندي بالبيت ومايحتاج هي تجي

امي = بس ياوليدي المطبخ اخبره فاضي .. وماجبت لك شي وانا امك

عمر = مايحتاج يمه انا اشتري اللي احتاجه لا تتعبين نفسك .. اقدر ادبر نفسي

امي = وخويك الى متى بيقعد عندك بالبيت

عمر = مدري الصراحة

امك = طيب لا تقطعني ... انا اذا بغيت اشوفك غير اجيك بالبيت .. انت الله يصلحك لا تزورني ولا تسأل عني

عمر = وش اسوي نص اليوم جامعة والنص الثاني نوم ههههههه

امي = الله يهديك

سكرت عن امي ونزلت تحت ومريت المطبخ فعلا فاضي ... انا من يوم تزوجت امي ماطليت على المطبخ وما اهتميت وش ينقصه ... اللهم الثلاجة اشوف امي وش جابت اخذه واروح فيه للاستراحة ...

طلعت لرايد ولقيته جالس و سرحان

جلست بجنبه وسألته

عمر = وش فيك رايد ؟

هز رايد راسه بلا وهو ساكت

صح تذكرت ... سيارتي بالورشة لازم اروح لها الحين واشوف التكاليف عشان بكرة بالجامعة اخذ بطاقات معاذ ومصعب الخاصة للكلية

لا يمكن افوّت الفرصة علي .. ابغير فيها من الى بس عشان تاخذ تكاليف اكثر

قمت واقف والتفتت لرايد ...

عمر = معليش رايد ابروح لسيارتي بالورشة قبل يسكرون ... البيت بيتك خذ راحتك

ساكت وما يرد علي .. تنهدت وطلعت من البيت احاول اسرع بس من وين اقدر اسرع وانا اعرج .. ما اقول الا حسبي الله عليك يامعاذ ..

وبسْسْ ..

17 - 4 - 2014, 09:00 AM

* الجــزء الحــادي عشر *

* عمر *

طلعت من الورشة مستانس ... الحمد الله طلبت يعدلون فيها من الى ... طلبت يحطون زجاج من افضل الانواع ... وطلبت يغيرون كل الكفرات مع ان المتضررة كفرة وحدة بس .. نذاله بمعاذ غيرت الكفرات كلها وطلبت يعدلون الخدوش ويصبغون السيارة كامل ..

هذا غير قطع الغيار الثانية وما اطلب الا قطع الغيار الاصلية والغالية ... المهم مجموع التكاليف 15 الف ...

طالعت الفاتورة اللي اخذتها كدليل اعطيها معاذ عشان يصدقني ... ماش احس التكاليف شوي عليه ...

بكرة ان شاء الله راح اخذ بطاقته وبطاقه مصعب

دخلت البيت ولقيت رايد نايم على الكنبة بالصاله ... تنهدت يوم شفته

وش مصير هالولد ... احس اني نشبت فيه صدق .... صح يكسر خاطري بعض الاحيان بس عاد لازم يرجع لاهله ... الى متى بيظل متشرد كذا

رحت فوق وانا متضايق من رجلي ... تعورني مررررة

غيرت ملابسي ولبست ملابس رياضية ... الثوب يضايقني بالجرح اللي بفخذي وصعب امشي فيه وانا اعرج ... افففف حسبي الله عليك يامعاذ

اخذت الاب توب و نزلت تحت ناوي اطقطق شوي و انام بالصاله عند رايد ... تعودت اصلا النوم على الكنبة ...

الساعة 4 الفجر

تحركت وانا نايم منزعج من ريحة الطبخ و سمعت خرفشه بالمطبخ ..... فتحت عيوني وطالعت الكنبة اللي نام عليها رايد ولقيتها فاضية ... اكيد هو اللي يخرفش بالمطبخ ... عادته بالمطابخ مايخليها ...

فار مطبخ هذا

قمت ورحت للمطبخ اشوف رايد ... ولقيته حاط قدر صغير على الفرن ويحرك اللي فيه بملعقه صغيره

سألته وانا احك راسي مكسل

عمر = وش تسوي

التفت رايد لي

رايد = آآآ ... جوعان ومالقيت بالمطبخ شي اكله ... بس لقيت رز وقاعد اطبخه ( التفت لقدره وبعدها التقت لي ) عمر ماعرفت اضبطه ... كيف يسوون الرز

تقدمت للفرن وطالعت القدر ولقيته ماء يغلي وفيه شوي رز

انا ماعرف اطبخ بعد ... كثر خيري اعرف اسوي شاهي

عمر = امممم حطيت ملح ؟

رايد = ايه ... بس ذقته طلع ماهو حلو

حركت يدي متملل والتفتت ناوي اطلع من المطبخ

عمر = المهم شي يملي بطنك مب لازم يطلع حلو ... المهم بس نعسان ابي انام عندي جامعة بكرة

ورجعت انام

الساعة 10 الصباح في الجامعة

دقيت على معاذ يقابلي عند مدخل مبنى قسمهم

ربع ساعة وجا ... كان معصب وانا عكسه مستانس

معاذ معصب = ذليت ابونا ... اخلص وش تبي ؟

عمر بابتسامة اغيضه = ابي سلامتك حبيبي ( ومديت يدي ) بطاقتك وبطاقك اخوك يالحبيب

طير معاذ عيونه = ول ... امداهم يحددون التكاليف ... الحادث امس .. مسرعهم ؟

عمر = امس دخلت السيارة ووقفت فوق روسهم لين حددوا التكاليف ( وعشان اقهره بالبملغ مديت عليه الفاتوره ) وهذي الفاتورة ..

اخذ معاذ الفاتورة مني وقعدت يقرا وشهق ورفع راسه لي

معاذ = 15 الف صاااااحي انت .. ( ونزل نظره للورقه وبعدها رفع راسه لي مصدوم ) وبعدين وش قطع الغيار والخرابيط اللي انت طالبها ... ياخي قلنا تصلح سيارتك بالاشياء الاساسية بس

حركت اكتافي لا مبالاه

عمر = والله عاد سيارتي واسوي فيها اللي ابي ... بتدفع والا علمت عمي باللي صار امس ... ولا تنسى تراك انت المخطي .. ولا تحدني اوصل الموضوع للشرطة

دفعني معاذ على ورا بقوة منقهر

معاذ معصب = كنت امززززح ... امزح ... امزح ... ابي اخوفك بس ... ياكلب 15 الف من وين ادبرها ...

عضيت على شفايفي بألم ... دفعته لي خلتني اوطى على رجلي اللي تعورني.. حسيت بالخياطة انفكت

رفعت راسي له وحاولت اخفي ملامح وجهي عشان مايعرف انه عورني ويتشمت ... بسيطة يامعاذ ماشفت شي

عمر متضايق = ادفع وانت ساكت والا خليت الشرطة تصفي الحساب بينا

قعد يطالعني معاذ وهو ساكت ومن انفاسه واضح انه منقهر وبقوة

الصراحة خفت من نظراته وسكوته .. من نظراته كأنه يتعودني مع انه ساكت

احم

عمر = آآآ ... يله اخلص علينا .. فاضيلك انا ؟

طلع معاذ محفضته ومد علي بطاقة الصرافه حقته

معاذ = راح اكسر خشمك ياعمر

عمر = اهاا بس ( واخذت البطاقة منه ) وين بطاقة مصعب ؟

معاذ بصراخ = وش تبي بمصعب ... اظن اللي غلط عليك انا مب مصعب

عمر بغرور اغيضه = مكافأتك ماتكفي تجمع 15 الف وانا ابغى فلوسي بسرعة ... واحمد ربك اني وافقت تسدد اقساط .. المفروض يكون كاش عشان تعرف ان الله حق وماتمزح مرة ثانية ... واخلص علي عطني بطاقة مصعب وراي محاظرة

معاذ معصب = الله لا يوفقك

عمر = واياك

طلع جواله واتصل على اخوه وهو منقهر مني

وطلب من اخوه يجي عند مدخل مبنى قسم معاذ

وعرفت من كلام معاذ معه ان مصعب ماهو راضي يعطيني بطاقته

ابتسمت .. احب اشوفهم معصبين ومنقهرين وحالتهم حاله ..

سكر عن اخوه وهو ينافخ ووقف بعيد عني يحتري مصعب

احترينا عشر دقايق وشرف الزفت الثاني ووقف عند اخوه

قربت عندهم وانا ساكت

التفت مصعب لي وهو معصب

مصعب بقهر = انا وش علي ياعمر ... اللي غلط عليك معاذ مب انا .. وش ذنبي

عمر = ذنبك انه اخوك ... هات بطاقتك

مصعب بصراخ = اخذت بطاقه معاذ وتبي بطاقتي بعد ... وحنا من وين لنا .. خذ وحده وخل الثانية لنا .. ماني معطيك بطاقتي لو تلحس السماء

مسك معاذ يد مصعب يترجاه

معاذ = اتركه عنك .. تكفى مصعب نبي نسد فمه .. الكلب يبي يوصلها للشرطة عاد بعدها دبرها عند ابوي وجدي

التفت مصعب وصارخ بوجه اخوه

مصعب = ماكبر راسه علينا الا جدي ... ماني معطيه شي

التفتت لمعاذ احاول اسمع مصعبوه التيس

عمر = خلاص اجل شكلكم ماتبون نحلها بيننا ...

معاذ = كللللل تبن انت ( والتفت لمصعب ) تكفى مصعب تكفى .. انا الغلطان يقالي ابمزح معه ... مادريت انه بهالنذاله .. تكفى مصعب فكنا منه

سكت مصعب والتفت لي يحاول يهدي نفسه ... اخذ شوي وبعدها طلع محفظته

مصعب = خذ ... ( وحذف بطاقته علي وطاحة بالارض ) احاول اعزك واحترمك بس تصرفاتك تكرهني فيك

وراح بس وقف على بعد خطوات بسيطة والتفت لي

مصعب = اترك لنا فرصه نذكرك بخير بعد موتك ... ولو مرة بس ياعمر ولو مرة

وطالعني شوي يحتريني اتكلم .. لفيت وجهي عنه وانا ساكت

بعد ماشاف مني رد راح

معاذ = والله والله ماراح اسكت عنك .. وتشوف

وراح ورا اخوه

نزلت نظري لبطاقة مصعب اللي طاحت بالارض

اترك لنا فرصه نذكرك بخير بعد موتك

بعد موتي ... معقول مالي خير ابد يذكروني فيه

بعد موتي

حاولت اتذكر شي طيب سويته ... لا صلاة بوقتها .. واغاني .. وسهر ووو .. وكرهي لعيال عمي

بعد موتي ... وش بيقولون عني اذا عرفوا اني مت

عمر مات الله لا يرحمه كان شري و موذي .. شهقت

مصعب انا ماكرهكم ... انا ... آآآآ .. انا احسدكم

ايه انا احسدهم .. احسد عيال عمي

لهم اخوان ... لهم اب .. لهم اخوات .. لهم عايلة تحتريهم اذا غابوا ..

انا ماعندي ولا شي .. حتى امي اخذوها مني ... انا ما اكرهم .. احسدهم

انحنيت واخذت البطاقة ورحت اعرج بس ماتحملت عوار رجلي وجلست على اقرب كرسي تحت الشمس

انتبهت ان ثوبي من عند فخذي فيه بقع دم خفيفة بسبب الجرح ... رفعت راسي منحرج من بقع الدم لا يكون احد يشوفها بثوبي

حطيت يدي على فخذي بتفكير سارح .. لو الجرح هذا بمعاذ او مصعب ... بيلقون ام تداريهم .. بيلقون اب ينقلهم بنفسه للمستشفى .. بيلقون اخت تخاف عليهم

انا ماحد جاب خبري حتى يوم شافوني اعرج قدامهم ماحد اهتم .. وبسهولة مشت كذبه بسيطه عليهم .. لو معاذ او مصعب عند امهم و ابوهم بيكشفونها بسرعة .. بس انا لا . ماعندي اب ... ولا عند ام متفرغة

رفعت راسي يوم حسيت دموعي بتطلع .. وين بالجامعة .. فشيله اصيح

رحت اتلفت احاول انسى وقمت بصعوبة رايح لدورة المياة اغسل بقع الدم

الساعة 1 الظهر

طلعت من الجامعة وانا متعكر مزاجي وكلمة مصعب تزن باذني

اترك لنا فرصه نذكرك بخير بعد موتك

سمعت احد يناديني عند المواقف التفتت وكان منصور

منصور = زين اني لحقت عليك قبل تروح

عمر متضايق = وش عندك

منصور = عمر والله انه حجّر علي ماقدرت الا اقوله عن مكانه

قطبت حواجبي مستغرب

عمر = وش ؟

منصور بضيق = نايف

عمر = وش فيه .. انمسك ؟

منصور = ياليت ... بس قبل شوي كان واقف عند سيارتي يحتريني ولما شافني سألني عن رايد

طيرت عيوني

عمر =.. نايف بالجامعة هنا ... ليه مابلغت عليه تجي الهيئة تمسكه

منصور = تبي تنكبني معه ... الهيئة ماسكته ماسكته اذا بغت بس خلهم يحددون مكانه ... مابي ابتلش مع نايف

عمر بملل = طيب وش يبي منك ؟

منصور بضيق = اقولك يبي رايد

عمر = افففففف وش يبي منه بعد ؟

منصور = مدري ... بس اضطريت اقوله انه عندك ...

شهقت

عمر = ياخبل ليش تعلمه ؟

منصور = شسوي حجرلي عند سيارتي لين علمته وشكله معصب .. انتبه منه

التفتت عنه بضيق .. كمل منصور كلامه

منصور = مدري وش يبي من رايد بالضبط ... بس انا علمتك عشان تنتبه لرايد

حركت يدي بضيق

عمر = يصير خير

ورحت لسيارتي و توجهت للبيت وانا سرحان

ليه اخذت من مصعب بطاقته ... وش سوا لي ... معاذ هو اللي ضرني ... ليه أذي مصعب معه

احس بضيق ... افففف ونايف هذا بعد مدري من وين طلع .. وش يبي هذا.. ماخلصنا من سالفة نايف وش يبي من رايد بعد

دخلت البيت ولقيت رايد بالصاله نايم على الكنبة

جلست بتعب وسندت راسي ورا على الكنبة وانا مغمض عيوني بقوة من عوار رجلي

= عمر انت جيت

التفتت لرايد وشفت يعتدل جالس

رايد = مانتبهت عليك يوم دخلت ( وسكت شوي يطالعني ) وش فيك عمر شكلك تعبان

هزيت راسي بلا

عمر = مافيني شي ( وتذكرت شي كنت ناسيه ) صح ماجبت غدا .. كنت ناوي امر المطعم بس نسيت

قام رايد ووقف قدامي ..

رايد = عطني مفتاح السيارة انا ابروح

مديت يدي ومسكت يده وجريته بجنبي عشان يجلس

عمر = اجلس فيه شي ابقوله لك

رايد مستغرب = وش

عمر = تدري ليه حنا طلعنا من الاستراحة

رايد = لا

عمر = سعد مسكته الهيئة وهم يدورون نايف الحين .. شفت كانوا يبون يورطونك

شهق رايد متفاجئ وبعدها نزل راسه بصمت سرحان

عمر مستغرب = وش فيك ؟

رايد بحزن = ليتهم ورطوني معهم .. على الاقل بيصير لي غرفة انام فيها

رفعت حواجبي مستغرب

عمر = خبل انت

رايد = ايه خبل .. لا عندي وظيفة ولا دراسه ولا بيت .. حتى اخواتي يحتاجوني بس لاني بزر ماقدر اسوي لهم شي ( وسكت شوي ) لو القتل حلال كان ماقصرت مع عمي ... ( وسكت يحاول يمنع دموعه تنزل ) بيتنا اهم شي عندنا باعه .. شهرين او اكثر وانا على ثوبي هذا ماغيرته ... بغمضة عين صار ماعندي ولا شي

ومسح دموعه يشكوى

رايد = اذكر ابوي ماكان يردلي طلب ماعمره قهرني مثل مايسوي عمي ... حتى عمي ماكان كذا معنا بس مدري وش غيره علينا ... ابوي اللي ابيه يعطيني كان يعتمد علي بكل شي لاني اكبر عياله بس هو راح .. ليتني رحت معه يااااااااليت

مديت يدي متأثر ومسحت على شعره وضميت راسه على صدري

عمر = خلاص رايد .. انت رجال لازم تعتمد على نفسك ... ( لف رايد يديه على خصري ورص وجه على صدري يبكي ) انت احسن مني رايد .. انت شفت ابوك وتذكر شكله وهذا اهم شي .. صدقني ... حلو لما تذكر شكل ابوك وتذكر مواقفه وتذكر كلامه .. انا ماعمري شفت ابوي ولا اعرف شكله حتى ... ماعندي حتى صورة له ... وفوق هذا ماعندي اخوان ولا اخوات .. انت عندك هدف الحين .. اخواتك يحترونك ... انا ماعندي احد يحتريني .. ماعندي هدف .. حياتي ممله .. مااحس بقيمتي

رفع رايد راسه لي يطالعني ... ابتسمت ومسحت على شعره صار وجهه قريب من وجهي ودموعه على خده .. رايد على كل شي يبكي .. مراهق مابعد قوا قلبه

رايد = انا ادري اني مضايقك .. ادري ان امك ماتقدر تجي هنا عشاني

عمر = امي مالك دخل فيها ... امي متزوجة وعند زوجها تجي هنا وش تسوي ؟

ابتعد رايد عني وهو يهز راسه بلا

رايد = انت مانت فاهم علي

فاهمك بس وش بيدي اسويه

ما اقول الا حسبي الله على عمك اللي بهذلك وبهذلني معك

فجأة سمعت جرس الباب يطق .... شهقت لا يكون هذا نايف ...

التفت رايد لي يسألني

رايد = تحتري احد ؟

التفت رايد وحطيت يدي على فخذه

عمر = اسمع رايد .. نايف يدورك ... مافيه غيره بيجينا الحين ... ابطلع له الحين اصرّفه ... انت لا تطلع تفهم ؟

رايد وهو يمسح دموعه مستغرب = ليه يدورني .؟

عمر بضيق = مو وقتك الحين

وقمت بصعوبة وانا اجر رجلي ... انا متأكد انها انفكت الخياطة حسبي الله عليك يامعاذ

فتحت الباب وكان فعلا نايف متلثم ولما شافني وهو يفك اللثمة

فجأة دفعني على ورا ودخلني داخل البيت وسكر باب الشارع وراه

عضيت على شفايفي بألم ... وطيت على رجلي مرة ثانية .. حطيت يدي على فخذي بألم

طالعت نايف انا معصب منه

عمر = وش تبي ؟

نايف = نادلي رايد ابيه

استغربت واضح انه معصب ... غريب وش مسوي له رايد عشان يعصب هالكثر

عمر = رايد ببيت عمه وش يجيبه عندي ؟

مسكني نايف مع ياقة ثوبي ولصقني على الجدار

نايف = ادري انه عندك ... ( وصرخ بوجهي ) نااااااده لي الحيييين

مسكت يديه ودفعته عني

عمر مصعب = لا تخليني ابلغ الهيئة عليك تجي تقلعك ..

نايف = مو قبل ما اشوف رايد .. وادري ان بيتك مافيه حريم

وراح يركض لداخل البيت

شهقت ...

عمر بصراخ = هيييييه انت

حاولت الحقه وانا اعرج بس هو اسرع مني ودخل البيت وانا الى الحين بالحوش

17 - 4 - 2014, 09:04 AM

* الجزء الثــاني عشــر *

* رايد *

هييييه انت

رفعت راسي يوم سمعت صوت عمر ... غريب من اللي بيجي بهالوقت وليه صارخ عمر عليه ... لا يكون احد من اهله .. والله فشله .. احس اني مضايق عمر احس نفسي عاله عليه

فجأة انفتح الباب اللي يطلع للحوش ...

وشهقت وقمت واقف لما شفت نايف هو اللي فتح الباب

بسم الله الرحمن الرحيم .. وش مدخله هذا هنا

يوم شافني نايف بالصاله وهو يجي يركض متوجه لي

نايف = انت هنا ياااكلب

تراجعت على ورا خايف منه .. شكله معصب

رايد بخوف = نايف ؟

لوا نايف يدي ورا ظهري ومسكني مع رقبتي وخلاني اركع غصب

رايد بخوف = وش .. وش سويت .. آآآآ .. وش تبي

نايف بصراخ = قسم بالله ان ماشربت من دمك الحين ماكون نايف ... جاي تتمسكن عندنا وانت داهيه .. يافتااااااااااان

وصارخت باعلى صوتي يوم لوا يدي اكثر

نايف معصب = ليه تبلغ علينا ياحماااااااااااار

= نااااااااااااااااااااايف

خفف نايف يده عني يوم سمع صوت عمر يناديه

حررت نفسي من نايف وابتعدت عنه وخليت طاولة الصاله الصغيرة الزجاجية بيننا

رايد بخوف = وش فيك انت علي ... ياخي خلاص ماني رايح لاي مكان تبيه .. فكني عاااد

دخل عمر الصاله وهو يعرج ووجه كلامه لنايف

عمر = حتى لو بيتي مافيه حريم مايحق لك تدخل بهالطريقة ... وفارق اطلع برا

طنشه نايف وطالعني بعيون معصبة

نايف = لا تحط نفسك مسكين ... علمني وش سوينا لك عشان تبلغ الهيئة علي وعلى سعد

سكتت مستغرب .. حسبته جاي يبي يرسلني ... والله مابلغت الهيئة .. وش قاعد يقول هذا

رديت عليه مستغرب

رايد = مابلغت الهيئة

عصب نايف اكثر من كلمتي وجا عندي معصب ومسكني مع يدي ولواها ورا ظهري مرة ثانية

نايف بصراخ = ما انمسك سعد الا يوم جيت انت للاستراحة ( ولوا يدي اكثر وصارخت بقوة من عوار يدي .. شوي وابكي ) خل الهيئة تنفعك الحين ياكلب ... جاي تتمسكن عندنا وانت حية من تحت تبن

رايد بألم = والله مابلغت احد ... آآآآ .. ارقامهم ماعرفها وشلون ابلغ .. خلني عورتنييييييييي

جا عمر وحاول يحرر يدي من نايف .. نايف يسحب وعمر يسحب

عمر بصراخ = اترك الولد ... الهيئة من قبل يجي رايد للاستراحة وهي تراقبكم

نايف = العب غيرها حبيبي ... من زمان وانت والشباب تقولون الهيئة تراقب وتراقب وماشافنا سوت شي .. وش معنى يوم جا هالبزر للاستراحة وهي تمسك سعد ؟

عمر = عاد صدفة تحركت الهيئة وهو موجود

عوروني .. كل واحد يسحب يدي من الثاني ... وانا معطيهم ظهري بسبب مسكت نايف لي خلاني غصب اعطيهم ظهري

رايد بألم = والله مابلغت احد ... آآآآآه يدي يدييييييييييييي

عمر بصراخ = ياخي فكّه ( وسحب عمر يدي من نايف بقوة )

واول ماتحررت من نايف .. ركضت واندسيت ورا ظهر عمر

نايف بصراخ = انت لا تتدخل ياعمر

عمر بصراخ = ببيتي وتقول لا تتدخل

شديت ثوب عمر اكثر وغطيت وجهي بظهره بحزن ... ليه يصير معي كذا .. والله مابلغت احد ... بس لأني يتيم يستقوون علي

سمعت صوت نايف

نايف = هو الوحيد من الشباب اللي علمناه مكان البيع واسم العامل وكل شي .. مافيه غيره بلّغ

طليت من ورا عمر ارد عليه ( كلهم اكبر واطول واضخم مني )

رايد بحزن = قسم بالله ماعلمت احد عن مكانه .. وبعدين انا رجعت لك الفلوس يعني هذا دليل اني مارحت

نزل نايف نظره لي وهو ينافخ من العصبية

نايف = ايه ادري انك جاي عندنا تتمسكن والا انت مانت محتاج ولا شي ... ( وحاول يمسكني بس عمر منعه )

عمر = ياخي انت ماتفهم ... يقولك ماهو هو

انتبهت على عمر واقف على رجل وحدة ...

نايف = عمر ابعد ... لا تخليني اتعامل معك باسلوب ثاني ...

عمر بعصبية = وش بتسوي يعني ؟ ... نويفوه انقلع اشوف

نايف = ماراح انقلع الا وانا مبرد كبدي من هالفتّان اللي وراك

عمر = لا تحدني اسوي اللي انت خايف منه وابلّغ الهيئة صدق تجي تاخذك

طليت اناظر نايف مرة ثانية ولقيته يطالع عمر معصب وساكت

عمر = وش تحتري يله انقلع .. براااا

فجأة هجم نايف على عمر

شهقت بخوف وابتعدت عنهم

شفتهم متشبثين ببعض وكل واحد يحاول يطرح الثاني بالارض

تلفتت يمين يسار مدري وش اسوي .. ورجعت اطالعهم بخوف

مع محاولاتهم وشجارهم .. قدر نايف يطرح عمر على الارض ..

شهقت بقوة وحطيت يدي على راسي بصدمة يوم شفت عمر يضرب براسه على الطاولة الزجاجية يوم طرحه نايف وبعدها صار عمر متمدد على الارض بدون حركة

طيرت عيوني وتجمعت الدموع بعيوني باقل من الثانية وصرخت بألم

رايد بصوت باكي = عممممممر

مشيت وانا رجولي يالله تشيلني من الصدمة وجلست عند عمر خايف عليه

متمدد على بطنه .. حطيت يدي على ظهره وهزيته

رايد = عمر .. عمر رد علي صارلك شي

رفعت راسي لنايف ولقيته واقف و منصدم من طيحة عمر على الطاولة

اخذ نايف شوي لين استوعب

نايف بخوف = اوووووه عمر ماكنت اقصد

ابعد نايف الطاولة الصغيرة بسرعة وجلس بمكانها وقلب عمر على ظهره

شهقت لما شفت الدم على الارض .. وعمر مغمى عليه .. مايتحرك

سمعت نايف يهمس

نايف بهمس = ياربي انا وش سويت ( وحط يديه على صدر عمر يهزه ) عمر ماكنت اقصد اطرحك على الطاولة

عمر مغمى عليه .. مغمض عيونه وانفاسه هادية مو كأنه قبل شوي يصارخ ويعصب مع نايف .. مايل راسه ناحيتي وبدا الدم يغطي وجهه

سكتت وانا اشوف الدم يطلع من راس عمر

ريان .. اخوي ريان كانت الاصابة براسه يوم يصير الحادث علينا ... وقتها طلعت من السيارة بصعوبة احبي من الم رجولي ولقيت ريان اخوي متمدد على الارض قريب من سيارتنا .. حبيت على الارض لين وصلته ولقيته وجهه مغطى بالدم مثل عمر كذا ... ريان اخوي اللي اصغر مني بسنه ... اشتقت له

ريااااااان

انحنيت وركبت على عمر اضمه ... ودم عمر يذكرني بامي وابوي وريان واخواني والحادث

حسيت بنايف يجرني مع فنيلتي من ورا بعنف وقومني عن عمر وخلاني اوقف غصب عني

نايف بعصبية = انت السبب

وعطاني كف قوي

حطيت يدي على خدي وانا ساكت و صورة ريان مافارقتني .. صورة امي وابوي والسيارة والاسعاف

التفتت لعمر اشوفه بس فجأة لوا نايف يدي ورا ظهري

نايف = من يوم جيتنا ماشفنا الخير ... ( ولوا يدي اكثر بس الالم اللي بصدري اقوى من اني اصرخ )

دفعني نايف وطحت على الارض وركلني مع بطني

حطيت يدي على بطني وانا ابكي ودموعي على خدي ... انا ضعيف .. بزر متشرد .. ليتني رحت معك ياريان

سمعت نايف يكلمني

نايف = اسمع ياكلب اللي صار هذا كله بسببك وقسم بالله ماشفت مني شي يارايد ...

وراح عند عمر وجلس على الطاولة الصغيرة وهو مبتلش بعمر.. محتار ويفكر مايدري وش يسوي بالورطة

جلست بالارض بحزن وقعدت اطالع عمر

متمدد على ظهره بدون حركة ...

اخذنا ربع ساعة وحنا على حالنا

نايف يفكر وانا ساكت وخايف من كل شي ...

قام نايف و اخذ شماغ طايح بالارض ورماه على وجهي ..

نايف = خذ ... لف راسه نبي ننقله للمستشفى

ابعدت الشماغ عن وجهي وعرفت انه شماغ عمر

جا نايف وجلس قدامي ومسكني مع ذراعي بعنف وقرب وجهه من وجهي

نايف بهمس وبعصبية = نبي ننقله للمستشفى كأنه حادث عادي تعثر وطاح على الطاولة .. اذا قلت لاحد انه انا قسم بالله لتشوف مني شي ماشفته ... .. قل للمستشفى انه تعثر وطاح ... انت تفهم

سكتت ومارديت عليه

نايف = تراني اعرف وين حارة عمك واعرف اختك الصغيرة ... اذا بلغت علي باللي صار ما احد بياكلها الا اختك

شهقت و طيرت عيوني بنايف

رايد = اختي ؟

نايف = ايه اختك ... لا تحسب انك اذا بلغت علي خلاص انتهينا .. لا حبيبي اختك الحلوة عدة مرات اشوفها بالشارع بحارة مشعل وجد عمر وعارفها زين ... اعرف ان البنت العصله المنتفه هذيك هي اختك ... لا تلعب معي عشان ما العب معك .. تفهم ؟

وعطاني كف قوي وقام

حطيت يدي على خدي وانا انفاسي سريعة من الخوف ... دانه .. اذكرها دايم تلعب بالشارع ... لا ... دانه لا

نايف بصراخ = هااااه وش تقول للمستشفى اذا سألوا عن عمر ؟

رديت عليه وانا احس نفسي بتطلع من القهر والخوف

رايد = تـ ... تـ ... تعثر وطاح

نايف = ايه كذا .. وعلم عمر يقول هالكلام .. يله قم ولف راسه

اخذت الشماغ وقمت وتوجهت لعمر المتمدد وجلست على الارض عنده

المكان مليان دم ووجه عمر نصه مغطى بدمه .. مديت يدي ومسحت وجهه بالشماغ وبعدها لفيته على راسه

ناظرت فخذه اللي يعرج منها ولقيت ثوبه من عند الفخذ مليان دم

رفعت راسي لنايف واشرت على فخذ عمر

رايد = رجله مليانه دم بعد

نايف = هذا من الحادث اللي صار له مالنا دخل فيه

جلس نايف من الجهه الثانية من عمر وهو يسألني

نايف = وين مفتاح سيارته ؟

وما انتظر رد مني ... دخل يده بجيب ثوب عمر وطلع مفتاح سيارة عمر وحذف المفتاح علي

نايف = خذ شغل سيارة عمر .. نبي ننقله بسيارته

قمت وانا احس بضيق .. شغلت السيارة ورجعت للصاله

نايف = شفت احد يمشي برا ؟

رفعت راسي .. احاول اتذكر

رايد = آآآ.. مادري مانتبهت

تراجعت على ورا يوم شفت نايف يتقدم لي معصب

نايف بصراخ = اعمى انت ( وضربني كف ) ابروح اشوف واجي .. البس ثوبك خلصني

نزلت نظري اشوف نفسي ويدي على خدي .. صح نسيت اني ماعلي الا الملابس الداخليه .. من يوم دخلت بيت عمر وانا بس نايم او بالمطبخ .. ماطلعت لاي مكان

راح نايف يشوف الشارع .. لبست ثوبي .. وجلست عند عمر وحطيت يدي على صدره

رايد بحزن = عمر انا عاله عليك .. ادري اني سببت لك مشاكل ... منعت امك تجي للبيت بسببي ووتهاوشت مع نايف وسعد بسببي والحين اغمى عليك بسببي

حطيت راسي على صدره بيأس .. ليش يصير معي كذا ... انا ابي اتوظف واعتمد على نفسي وبس ... والله ماقصدي اضر احد ... حتى دانة ماسلمت مني ... مابي اضر اختي ياعمر ... مابــ

= يله قم

رفعت راسي لما سمعت صوت نايف يصارخ علي

رفع نايف عمر مع صدره .. وانا رفعت عمر مع رجليه

وطلعنا من الصاله

سمعت نايف يكلمني

نايف = الحين جاي تصيح ؟ ... انت اللي بديت وبلغت علينا يارايد ... والى الحين ماشفيت غليلي منك ...

سكتت عنه ومارديت ...

ركبنا عمر بالسيارة ومددناه على المرتبة الخلفية

نايف = يالله رح وده للمستشفى ..

رفعت راسه له مستغرب .. لا يكون بيجلس ببيت عمر ياخذ راحته

مشيت بسرعة وسكرت باب بيت عمر عشان نايف مايدخل والتفتت له بصمت

نايف معصب = وش تحتري .

وجا وسحبني بعنف وركبني بسيارة عمر بمكان السواق

مديت يدي ابي اسكر باب السيارة بس فجأة نايف مسك شعري وسحبني ناحيته

و قرب وجهه من وجهي وهمس وهو معصب ويهدد

نايف بعصبية = مثل ماقلتلك .. قلهم عمر تعثر وطاح ... ان علمتهم عني قسم بالله اخليك تصيح على اختك المنتفة ... تراني اعرف شكلها

و دفعني وسكر الباب بقوة

حركت السيارة بسرعة عشان ابعد عنه ...

قسم بالله اخليك تصيح على اختك المنتفة

قسم بالله اخليك تصيح على اختك المنتفة

انتبهت لنفسي ان ابكي بصوت مسموع .. وقفت السيارة بجانب الطريق ونزلت راسي على الدركسون وبكيت اكثر

تعبت .. ابي ارتااااااح

اخذت خمس دقايق وانا على وضعي .. كاره نفسي

رفعت راسي يوم تذكرت عمر .. التفتت ورا ولقيته مغمى عليه وانفاسه هادية

اسف ياعمر .. بس دانة اهم منك ... ماراح اسمح لك تبلغ عن نايف

حركت السيارة ورحت على المستشفى ودخلوا عمر داخل وانا جلست انتظره

ربع ساعة وجاني دكتور مصري

الدكتور = انتا اللي جبت المريض عمر للمستشفى

رايد بحزن = ايه

الدكتور = مين اللي عمل بعمر كده ؟

سكتت شوي لما تذكرت كلام نايف

رايد = تعثر و.. و .. وطاح

الدكتور = اه يعني تعثر من ايه ؟

شوي وابكي .. رفعت راسي للدكتور وسألته

رايد = عمر قام .؟

الدكتور = لأه .. لساتو مغشى عليه .. ماقلتليش تعثر من ايه ؟

نزلت راسي

رايد بحزن = مدري .. كان مستعجل وتعثر بـ .. بـ .. بسلك التلفزيون وطاح على الطاولة .. بس

الدكتور = هوا كده الشباب دائما مستعجل .. خلاص تقدر تروح على بيتك ... عمر بخير

مالي بيت

رفعت راسي للدكتور

رايد = ابي اشوفه

الدكتور = ماينفعش ... خلاص انتا روح ولما يصحى عمر هنده عليك

حركت راسي بلا

رايد = ضروري ابي اشوفه

الدكتور = قلتلك لساتو مغشى عليه .. لما يصحى حتشوفه

وراح

طلعت من المستشفى وانا مدري وين اروح .. مالي بيت .. ولا اهل .. ولا ام ولا اب ... وليت فوق هذا اخواتي يسلمون من شري

رفعت راسي للسماء ... الجو حار ... وتونا بوقت الظهر والشمس حارة

وين اروح ... مافيه استراحة اجلس فيها .. وبيت عمر مابي اروح له .. يكفي عمر اللي جاه بسببي ... هو ماهو اخوي ولا هو قريبي ومابي اصير عاله عليه اكثر من كذا

تلفتت بالسيارات ... الكل متوجه رايح لبيته .. الا انا افكر وين اروح

ياحياة الشقا .. ياحياة الشقا

رجعت للمستشفى وجلست بغرفة الانتظار هارب من حرارة الشمس

قرب يذن المغرب وعمر ماقام

توني سائل عنه ... هم طمنوني بس ليه ماقام الى الحين ؟

اخاف يقوم ويعلمهم عن نايف

اخذت ربع ساعة ورجعت اسال عنه ونفس الشي ماصحى

وهذا حالي رايح جاي رايح جاي لين اذن المغرب

صليت ورحت اسأل عنه واخيرا قالوا لي قام

دخلت عليه وانا فرحان ونفس الشي ابي انبهه واحذره مايعلم عن نايف

وقفت عند سريره واستغربت ... لقيته الى الحين مغمض عيونه وكأنه نايم

ليه يكذبون علي ويقولون قام

رفعت راسي للممرض وسألته

رايد مستغرب = وش فيه .. مو تقولون عمر قام .. اشوفه الى الحين مغمى عليه

رد الممرض علي وهو مشغول بالمغذي

الممرض = مافيه مغمى عليه .. هذا مريض نوم .. الحين هوا فيه يقوم

اخذ الممرض شوي وطلع

نزلت راسي اشوف عمر .. ملفوف راسه بشاش ومكشوف عن صدره العاري

انا السبب ... لو ماجيت عنده في بيته كان ماتهاوش مع نايف .. صح عمر اقشر معي ويضربني ويستحقرني ... بس احسه طيب ... وطوال الشهرين اللي قضيتهم مع عمر بالاستراحة عرفت انه يكره عيال عمه .. يعني هو ماهو اقشر معي انا بس .. يمكن هذا طبعه شري

ليتني شري مثله واخذ حقي بيدي

جلست على سرير عمر لما تذكرت عمي واللي سواه فيني وفي اخواتي

لو ماسكتت له يوم كان يضربني كان ماتمادى معي ... لو صارخت بوجهه وقلت انا رجال اباخذ حقي غصب عنك كان ماباع بيتنا ... ( طلعت دموعي غصب عني ) انا بزر ... انا خواف .. مالي احد اشكيله

مسحت دموعي بيدي وطالعت عمر النايم

حتى عمر ماخليته بحاله .. جلست عنده شهرين وجاه اللي جاه بسببي ..

لاني خواف .. ضعيف

انحنيت على عمر وضميته

رايد بصوت باكي = انا ضعيف ياعمر .. علمني كيف اصير قاسي .. ابي ارتاح من حياتي .. تعبت

وبكيت اكثر مقهوووور

* عمر *

اخخخ راسي ... راسي بينفجر

حسيت بشي ثقيل على صدري ... حاولت اسحب نفس ..

فتحت عيوني وانا مصدع ... اخخخ راسي ..

حاولت استوعب المكان اللي انا فيه ... كل شي ابيض ... سكتت وانا اسمع صوت شخص يشاهق ... تلفتت بعيوني على المكان احاول استوعب

هذا المستشفى ... وش جابني هنا

سحبت نفس متضايق من الشي الثقيل اللي على صدري وانا الى الحين اسمع اللي يشاهق

حركت راسي ابي التفت لمصدر الصوت بس فجأة صدم خدي براس

قطبت حواجبي مستغرب ... رايد .. هذي شوشة رايد ...

صح هالصوت نفس صوته اذا كان يشاهق... حافظها من كثر مايبكي

بس لحظة ليه يبكي ... نايف .. صح وش صار

نايف .. نايف .. طحت على الطاولة بس بعدها وش صار

نايف ...

مديت يدي بضعف وحطيتها على ظهر رايد وهزيته عشان يقوم عني

مصدع .. راسي بنفجر

عمر بتعب = رايد

سكت رايد فجأة يوم سمع صوتي وقام بسرعة يطالعني

رايد بفرح = عمممممممر

وانحنى علي وسلم على خدي وخدي الثاني وطالعني ووجه قريب مني

رايد بفرح = الحمد الله على سلامتك .. انت طحت على الطاولة اللي بالصاله واغمى عليك .. انا اسف عمر .. انا السبب

طالعت رايد مستغرب .. وجهه حزين .. كأن هموم الدنيا على راسه ودموعه على خده .. وش سوا نايف معه عشان يبكي

عمر بتعب = وش صار .؟ ونايف وينه ؟

اعتدل رايد وجلس وحط يده على صدري

رايد = انت طحت على الطاولة

عمر = اقصد اللي بعدها وش صار ؟ ليش تبكي انت الحين ؟

مسح رايد دموعه بحزن ونزل راسه

رايد = انت تهاوشت مع نايف بسببي لو ماكنت ببيتك كان ماصار اللي صار ( والتفت لي يطالعني ) هذي ثاني مرة تتهاوش مع نايف بسببي ... وامك ماتجي بيتها بعد بسببي ... انا اسف عمر ... ادري اني عاله عليك

سكتت مستغرب ... دموعه الحين اربع اربع عشاني ...

سألته اتأكد

عمر مستغرب = عادي رايد ... انا متعود على الهواش مع الشباب كان بسببك والا بدون

سكت ومارد علي ..

غمض عيوني بقوة لما حسيت راسي زادني ألم

فتحت عيوني وطالعت رايد لقيته منزل رايد وسرحان

عمر = وينه الكلب الحين ؟

التفت رايد لي بخوف

رايد = خلاص راح .. ماعليك منه

عمر = وشلون ماعلي منه .. والله لأبلغ عليه .. شايف الدنـ

وقاطعني رايد وحط يده على صدري يترجاني

رايد بترجي = تكفى عمر لا تبلغ عليه .. تكفى طلبتك

طيرت عيوني مستغرب من رايد

عمر = ليه ؟

رايد بصوت باكي = قل لهم انك تعثرت وطحت بس لا تقولهم عن نايف ( وحب راسي بترجي ) الله يخليك عمر

سكتت مستغرب

كمل رايد كلامه يوم شاف شكلي مستغرب

رايد = نايف هددني باختي دانه .. يقول اذا علمتوا علي ماحد بياكلها الا دانه .. تكفى تكفى عمر لا تبلغ عليه .. خايف على دجانه منه ... تكفى عمر تكفى

وحط راسه على صدري وبكى

رايد = انا تعبت ... كل شي ضدي ... انا طلعت من بيت عمي ابي اشتغل واخذ دانه مو اطلع من بيت عمي واضر دانه ... لو ريان حي كان تصرف احسن مني ... بس انا بزر وضعيف وخواف

مديت يدي وحطيتها على راس رايد ومسحت على شعره

عرفت تسكتنا يانايف .. تسويها مافيه شي بعيد عنك يانايف

رفع رايد راسه يطالعني

رايد = تكفى لا تبلغ عنه ... قل انك تعثرت وطحت .. الله يخليك

هزيت راسي بأيه وانا منقهر من نايف ..

ابتسم رايد بفرح وضمني مرة ثانية

رايد = مشكووووور عمر

كذا راح يدمادى .. يدخل بيتي ويعتدي علي وما اقدر اقول له شي عشان من ؟.. عشان .. عشان دانه

ربع ساعة و جا الدكتور يفحصني

الدكتور = لا ماشاء الله دانتا كويس اوي

عمر = اكتبلي خروج الحين دكتور .. ابي اطلع

دكتور = هوا انا حكتب لك خروج من غير ماتطلبش .. ( وكمل يمزح ) احنا مش عاوزينك

ابتسمت

عمر = هذي الساعة المباركة

دكتور = مرة تانية ماتستعجلش وانتا بتمشي .. مش عاوز اشوفك هنا تاني

التفتت على رايد ولقيته سرحان ورجعت التفت على الدكتور

عمر = ان شاء الله

طلعنا من المستشفى وانا اعرج ومعي عكاز لكن هالمرة عكاز عادي ماهو حق الشيبان

خاطوا الجرح اللي بفخذي مرة ثانية ...

والله حاله صار فيني خياطة براسي وفخذي

ينطبق علي كلمة مرقّع

الاربعاء .. الساعة 2 الظهر

طلعت من الجامعة اول ماخلصت محاضراتي ... تعبان ... ومصدع

المشكلة ما اقدر اغيب عن الجامعة حتى لو كنت تعبان ... افففف دكاترة مايرحمون

منصور ومشعل وعبد الله عرفوا باللي صار امس مع نايف

اتصلت علي عمتي مها عشان اجي اتغدى عندهم لكن لأن راسي ملفوف بشاش مابيهم يشوفونه ... واضطريت اتهرب منهم وتعذرت باي شي .. المشكلة الحين امي تبيني اتغدى عندها بكرة ... وهي دايما تتذمر اني ما ازورها يعني لو اتعذر منها بكرة راح تزعل مني .. وش السوات ؟

وصلت بيتي ودخلت و لقيت رايد بالمطبخ و يحاول يطبخ الغدا لكن كالعادة ما اشوف بالقدر الا ماء يغلي ورز يتراقص بالماء

التفتت لرايد اطالعه

عمر = الحين هذا تسميه غدا ؟

ضحك رايد

رايد = ههههههههههههه نعمه

ابتسمت .. مسكين الضحكة ماتنشاف منه الا نادرا

عمر = طف عنه بس .. ابروح اجيب من المطعم

نقز رايد وجا عندي

رايد = عطني المفتاح انا ابروح عنك

تنهدت .. و طلعت مفتاحي وعطيته

عمر = طيب .. و انتبه من نايف

رايد = يأذيني نايف عادي .. بس مايأذي احد بسببي ( ومد يده ) عطني فلوس للغدا

عطيته الفلوس وطلع

عرفت من الشباب ان نايف مايروح الا على اللموزين .. ومايروح لاهله ابد .. ومايمشي بالشارع الا متلثم ... من وين تمسكه الهيئة والشرطة وهو مايستخدم سياره عشان يوقفه تفتيش والا أي شي .. و مايركب السيارة الا كراكب ماهو كسائق

بسيطة يانايف .. اجل دانه هااه

اتصلت على امي .. وقلت لها ان هالاسبوع علي اختبارات ..

والحمد الله مشت عليها ..

17 - 4 - 2014, 09:05 AM

* الجــزء الثــالث عشــر *

‏* عمر *‏

الخميس .. العصر ‏

كنت منسدح على الكنبة وطفشان التلفزيون مافيه شي والنت مليت منه .. ورايد ‏طفشان مثلي وواقف عند باب الشارع ويشوف الرايح والجاي ‏

جلست بسرعة بضيق شوي واطلع من ثيابي من الطفش ‏

عمر = ياااااااااااااربي حيااااتي ممله ... لو كانت امي هنا كان تجلس معي ونسولف ‏‏... افففف ياليت لي اخوان كثار مثل معاذ ومصعب ( وصارخت باعلى صوتي ‏عشان يسمعني اللي واقف بالشارع ) رااااااااااااااااااااااااااااااااااااااااااااااااا اياااااااد ‏

بس فجأة رن جوالي ‏

القيت نظرة عليه ( بيج هاوس يتصل بك ) ‏

عمر = الوووو

‏= السلام عليكم ‏

عمر مستغرب = جدتي !! وعليكم السلام .. ياهلا والله .. وشلونك ياحلى عجوز ‏هههه ‏

جدتي = يالقاطع لا تسأل ولا شي .. وراك ماتجينا وانا جدتك .. ‏

تنهدت ‏

عمر = جده اظن قبل ثلاث ايام كنت عندكم ‏

جدتي = وش فيها اذا جيتنا يوميا ؟ ‏

سكتت ومارديت .. ما احب اشوف عيال عمي هناك .. عمي وعياله بالذات يوميا ‏مسنترين هناك .. بس المشكلة ماحد يفهمني .. ماحد يفهم الشعور اللي احس فيه لما ‏اشوف عمي وعياله وانا بينهم وحيد ‏

جدتي = الوووو ... عمر ؟ ‏

انتبهت لجدتي ‏

عمر = معك ‏

جدتي = تعال الحين الله يهديك ‏

عمر مستغرب = الحين .. ليه ؟ ‏

جدتي = وش اللي ليه .. نبي نشوفك الله يصلحك .. مشكلتك ماتجينا الا بعزيمة ‏

حطيت يدي على الشاش اللي براسي .. توها امس الضربة مايمديني اشيل الشاش ‏عشان مايشوفونها ... ومالي خلق لتحقيقاتهم ‏

تنهدت .. مالي مهرب ‏

عمر = ان شاء الله .. مسافة الطريق وانا عندكم ‏

سكرت عن جدتي وانا متضايق .. والمشكلة معي عكاز بعد .. وش يفكني منهم ومن ‏اسألتهم الحين ‏

قمت ولبست ثوبي واخذت عكازي وطلعت وشفت رايد عند الباب ‏

عمر = رايد ابروح لحارة جدي .. تبي تروح تشوف اخواتك ؟ ‏

التفت لي رايد وتفاجأت بعيونه حمر .. شكله توه باكي ‏

رايد = آآآآ.. لا ما اقدر الحين .. الوقت المناسب لي الظهر ‏

استغربت .... ليه بس الظهر .. بيذبحني الفضول ودي اعرف وضع اخواته ببيت ‏عمهم لهالدرجة مايقدر يشوف اخواته الا الظهر ‏

عمر = طيب وش فيك انت الحين .. شكلك باكي ؟ ‏

هز رايد راسه بلا ‏

رايد بحزن = ولا شي ‏

عمر = طيب انا طالع

‏ وركبت سيارتي بس تفاجأت برايد يفتح بابي ‏

رايد = عمر تكفى اذا شفت دانه قل لها لا تطلع من البيت .. تكفى فهمها قل لها رايد ‏يقولك لا تطلعين من البيت .. ‏

هزيت راسي بايه وحركت السيارة ‏

وصلت حارة جدي ودورت بعيوني على دانه بين البزارين اللي يلعبون بالشارع ‏بس ماشفتها بينهم ‏

و طيرت عيوني لما شفت سوبربان عمي ابو معاذ ‏

عمر = هذي سيارة عمي ... والسوبربان بعد لا يكون الربع كلهم هنا ( تنهدت ) ‏وانا اقول ليش جدتي اتصلت علي تبيني اجي الحين .. ‏

نزلت العقال وعدلت الشماغ بشكل يغطي على الشاش اللي براسي .. بس صعب ‏اغطيه .. طالعه اطراف الشاش من الشماغ ‏

صار شكلي كأني مطوع .. اخذت عكازي ونزلت من السيارة وتفاجأت بباب بيت ‏جدي مسكر ‏

غريب بالعادة دايما الباب ( مطرّف ) ماعلي الا ادزه وادخل ‏

ضربت الجرس وقعدت احتري احد يفتح لي ‏

شوي وطلع بوجهي معاذووووه ‏

اخذت نفس ماسك نفسي .. ونفس الشي معاذ اخذ نفس يوم شافني ‏

صايرين كأننا بانزين ونار .. اذا قربنا من بعض ننفجر ‏

دفعته بيدي على ورا ودخلت للحوش بدون سلام ولا كلام ‏

بس معاذ مسك كتفي بعنف خلاني اوقف ‏

معاذ بعصبية = هيييييييييه انت اصبر .. البيت فيه حريم ‏

التفتت له مستغرب ‏

عمر = نعم ؟ ‏

معاذ = لا تدخل لين اقولك .. يالاعرج ‏

ومشى متعديني ‏

عمر = ما الاعرج غيرك .. وشلون يعني البيت فيه حريم .. جدتي وعمتي اللي ‏داخل وش تبي انت ‏

التفت لي معاذ ‏

معاذ = اقول بس انثبر عندك ... اخواتي وامي داخل .. خلني اشوفك توطوط قبل ‏اقولك ‏

طيرت عيوني فيه .. طالع يبي يذلني و بس ‏

زفرت بضيق ووقفت بالحوش احتري السيد يأمرني بالدخول ‏

شوي وجاني سعود ‏

سعود = حياك عمر ‏

مشيت بعكازي ودخلت الصاله

عمر = السلام عليكم ‏

ووقفت بمكاني متفاجأ لما شفت اللي قدامي ‏

جالسين بالارض على شكل حلقة وظهورهم على الكنبات وبالنص الدلال وصحون ‏حلى كثيرة وصحون فطاير واكواب صغيرة عصيرات وكيكاوات والمكان صاير ‏زحمممممة ‏

جالسين وشكلهم كانوا مندمجين ضحك وسوالف ‏

انجرحت ... انا يمر علي الساعة والساعتين والثلاث مااتكلم مع احد .. يمر علي يوم ‏كامل طفشان وهم عندهم ازعاج ولعب وضحك ‏

بيتي مظلم مافيه احد ... وهــ ‏

‏ = عمر وانا امك وش فيك .. وش هالعكاز .. صاير عليك حادث ؟

انتبهت على صوت امي بين الجالسين .. رفعت حواجبي .. امي هنا ... اووووه ‏صح هي الى الحين مادرت عن اصابة رجلي .. ‏

جدي = وش فيك يابوك لا تسلم ولا شي ‏

نزلت راسي منحرج وتقدمت لجدي وسلمت على راسه ‏

عمر بحزن = السموحة سرحت شوي .. ‏

وبعدها سلمت على جدتي وعمي وعمتي مها ولما وصلت عند امي وسلمت على ‏راسها مسكتني امي بخوف ‏

امي = وليدي عمر .. وش هذا ( واشرت على العكاز ) لا يكون صاير عليك حادث ‏؟ ‏

عمر = لا يمة .. كنت العب كورة وطحت .. بس .. لا تخافين انا بخير ‏

وسلمت من بعيد على مرة عمي ام معاذ ‏

وارتبكت لما شفت مصعب واقف يبي يسلم علي ‏

عمر = آآآ .. هلا مصعب وشلونك ؟ ‏

مصعب = طيب طاب حالك ‏

مدري ليه يأنبني ضميري ناحية مصعب .. مع انه هو واخوه اعتبرهم بالهوا سوا

دورت مكان اجلس فيه بس مالقيت الا مكان فاضي بجنب مرة عمي ومكان ثاني ‏فاضي بجنب الخايس معاذ ‏

وطبيعي ابجلس بجنب معاذ ‏

جلست على الكنبة .. لانه صعب اجلس على الارض بسبب الخياطة اللي برجلي ‏

ومعاذ جالس بالارض بجنبي وظهره على الكنبة

جت امي وجلست على الكنبة بجنبي من الطرف الثاني بخوف ‏

امي = وش فيها بالضبط رجلك .. صرفوا لها علاج ؟ ‏

عمر = مافيها شي .. اصابة بسيطة ( ورفعت يدي احاول اغطي اطراف الشاش ‏بالشماغ عن امي والبقية ) ‏

رفعت نظري لمكان الحلى والفطاير والحوسة اللي بالنص ‏

تنهدت ... بنفس الوقت اللي كنت جالس فيه طفشان هم كانوا يضحكون و مستانسين ‏‏... اخوان .. عايلة وحدة .. وش يمنعهم ‏

‏.. الوحدة بتقضي علي ... ماني قادر اصبر وانا اشوف الفرق بيني وبينهم ‏

صح رايد بديت اتعود عليه واذا راح افتقده بس رايد نفسيته تعبانة ودايم سرحان ‏بظروفه ومشاكله ‏

‏= اوه اوه اوه يولد العم وش اللي براسك ؟ ‏

انتبهت على معاذ اللي جالس تحت بالارض .. ونزلت نظري له ( وحطيت يدي ‏على راسي مرتبك .. جدي وامي اعرفهم اذا شافوا الشاش ماراح يخلوني لين ‏يعرفون وش منه ) ‏

كمل معاذ كلامه وهو يطالعني من تحت ومن ابتسامته واضح انه فرحان ومتشمت ‏

معاذ = وش هالشاش اللي براسك ( وبحركة مفاجئة .. مد يده بسرعة وسحب ‏شماغي بغفله مني ) ‏

شهقت وصارخت عليه ‏

عمر بصراخ = ياحمااااار ( ومسكت رقبة معاذ من ورا ) هات الشماغ ‏

فجأة سمعت نغمات الشهقات من جدتي وعمتي وامي ‏

و استلموني جدي وعمي تحقيق ‏

عمي بخوف = وش هذا ياعمر ؟ ‏

جدي = وش فيه راسك ؟ ‏

مسكتت امي يدي بخوف ‏

امي = وش منه هذا بعد . ؟ ‏

زفرت بضيق .. هذا اللي خايف منه ... وش يفكني منهم الحين ‏

نزلت نظري لمعاذ اللي يطالعني وابتسامة كبيرة على وجهه النحس ‏

رفعت نظري لهم و اضطريت اقولهم وانا يدي على الشاش ‏

عمر = تهاوشت مع واحد وووو .. وعطاني المقسوم ‏

ضحك معاذ وقال بصوت واطي سمعته ‏

معاذ = حلووووووووة ‏

شهقت امي بخوف ‏

امي = حسبي الله عليه جعل يده للكسر ( وحطت يدها على راسي ) يعورك ؟ ‏

جدي بحزم = وش منه تهاوشتوا ؟ ‏

ضحك معاذ اكثر ‏

معاذ = هههههههههههههههههههههههههههههه شرّي طول عمرك شرررري .. انا ‏متأكد ان عمر هو الغلطان .. ابصملكم بالعشرة ههههههههههههههههه ‏

انحنيت وقربت راسي من راس معاذ وهمست باذنه ‏

عمر بهمس = اسكت .. لا تخليني اقولهم ان اللي برجلي بسببك .. وابوك هذا هو ‏موجود ‏

قطع معاذ ضحكته فجأة وهو يسمعني وكملت كلامي ‏

عمر = ابلع لسانك لا اقصه لك ‏

معاذ بهمس = ابروح اشكر اللي فلق راسك ... سوا لي خدمة والله ‏

مها = وش تقولون انت واياه .. تقولون بلوط وعلقم ‏

اعتدلت جالس وسكتت ‏

امي = لا يكون اللي ساكن معك هو اللي ضربك براسك ‏

شهقت .. مو قدام جدي يمه .. جدي مايدري اصلا ان ساكن معي احد .. وش يفكني ‏منه الحين .. ياربي وش اللي خلاني اجي .. كنت مرتاح ‏

جدي مستغرب = عمر .. ساكن معك احد بالبيت ؟ ‏

حطيت يدي على جبهتي .. هذا اللي خايف منه ‏

سألني عمي مستغرب ‏

عمي مستغرب = أجرت بيتك ؟ ‏

التفتت لامي متضايق وهمست لها ‏

عمر = وش يفكني من اسألتهم الحين .. ( والتفتت لهم معصب وصارخت عليهم ) ‏من يوم ماجيت وانتم مستلميني تحقيق ... لا تحدوني ارجع ‏

مسكت امي يدي ووجهت كلامها للبقية ‏

امي = خلاص خلاص .. خلوه .. انا ماصدقت اشوفه ‏

التفتت لجدي ولقيته يطالعني بحزم وساكت .. ‏

بسم الله .. اكيد بعد هالنظرات بيفتح معي محضر .. ‏

سمعت معاذ يهمس ‏

معاذ = عاق حتى بامه .. الله يرفع عنه ولا يبلانا ‏

ضربت رقبته من ورا بقوة واخذت شماغي منه‏

فجأة قامت عمتي مها ‏

مها = انا ابروح للبنات ..( والتفتت لي وهي تضحك ) ههههه اكيد الحين حاقدات ‏عليك ياعمر ... خربت عليهن جمعتنا ‏

قطبت حواجبي و سكتت .. الشرهة على اللي درا عنهن اصلا ‏

جدتي = خليهن يتغطن ويجن .. مافيه احد غريب .. عمر ولد عمهن ‏

نط فجأة معاذ معصب ‏

معاذ = لا ... لا يجن وعمر فيه ‏

مها بزعل = ليه معاذ .. بيصيرن متغطيات ... نفسي نجتمع كلنا والله ‏

معاذ = لااااا ... خلوا لين يذلف عمر ‏

صارخ جدي على معاذ يهاوشه ‏

جدي بصراخ = وش يذلف هذي .. تقول لولد عمك يذلف ... هذا مثل اخوك ( ‏والتفت لمها بحزم ) خليهن يتغطن ويجن يكملن حلاهن .. عمر ماهو غريب ‏

نزلت نظري لمعاذ .. و تنهدت .. لو كان لي اخوات ابغار عليهن مثل معاذ ؟ ... ‏

فجأة طالعني معاذ معصب .. رسمت بوجهي ابتسامة سريعة اغيضه وحركت ‏حواجبي احط نفسي مستانس اني ابشوف اخواته وهو مب راضي ‏

لف معاذ وجهه عني وهو ينافخ ولا يقدر يقول شي قدام جدي وعمي ‏

من زينك ومن زين اخواتك عاد ... كلش ميت عليهن ‏

طلعت مها شوي ورجعت ومعها بنتين وحدة لابسه جلال والثانية عباة على الراس ‏ومتغطيه وجلسن مستحيات ‏

احم .. اعتدلت جالس وانا مدري وين احط عكازي .. اخر شي ركزته على كتفي .. ‏منحرج ماني متعود عليهن ‏

طوال الوقت وجدي وجدتي وعمي وحريمه وعمتي ومصعب وسعود سوالف ‏وضحك ‏

ومعاذ معصب وساكت و البنات مستحيات مني وانا مستحي منهن وصاير ذرب ‏قدامهن ‏

صح انهن اخوات معاذ بس مدري وش يجيني اذا شفت بنات .. ‏

احم .. مدري وين راح كلامي اللي قبل شوي ‏

خاصة اذا كانن متغطيات وماينشاف منهن شي .. تحس بهيبة منهن ‏

شوي شوي دخلت معهم جو .. وبديت اعلق على عمتي المرجوجة وسعود واسولف ‏مواضيع جانبيه مع مصعب ‏

وامي بجنبي كل شوي تعرض علي من الحلى والفطاير وتغصبني إلا اكل ‏

على آذان المغرب ‏

تكلم جدي بصوت عالي ‏

جدي بابتسامة = اليوم عشاكم عندنا .. ما احد يروح الا وهو متعشي ‏

وافق عمي على طول ..‏

التفت لي جدي ‏

جدي = وانت بعد ياعمر ‏

عمر = ان شاء الله ‏

صاحت مها فرحانه ‏

مها = هييييييييييييييه ولهذه المناسبة الكريمة نبي عشانا من المطعم ‏

اعترضت انا كلامها من غير شعور ‏

عمر = لاااااا .. ابي عشا بيت .. مليت من المطعم والله ‏

ضحكوا عمي ومرة عمي علي ‏

و مسكت امي يدي ‏

امي = ياعمري ياوليدي .. مقصرة معك من زمان ماطبختلك ( وقامت واقفة ) ‏خلاص ولا يهمك ماحنا جايبين من المطعم ‏

اعترضت مها معصبة ‏

مها بعصبية = لااااااا ... مالي نفس اطبخ ‏

التفتت امي لمها ‏

امي = اجلسي انتي .. انا الحين ابسويه ‏

نط معاذ بالسالفة ‏

معاذ = انا مع مها نبي من المطعم ‏

سعود = أي والله انا ابي بعد من المطعم ‏

التفت معاذ لي وبعدها التفت لامي ‏

معاذ = عمه ارتاحي انتي ... بعد الصلاة ابجيب انا من براااا ‏

امي = بس عمر يبي طبخ بيت ‏

معاذ = الاكثرية يبون من المطعم ‏

فجأة تدخل جدي ‏

جدي = بس انت واياه ... خلاص نبي عشانا اليوم من البيت ‏

مها بضيق = اووووووووه ‏

ابتسمت امي والتفتت لي ‏

امي = لا تروح لين تتعشى ( والتفتت لمعاذ ومها ) معليش اليوم بس خلوه من البيت ‏وبكرة وعد انا اشتريلكم من المطعم ‏

ومشت تبي تطلع من الصاله .. قامت مرة عمي تبي تطلع مع امي وهي تضحك ‏وتوجه كلامها لامي وهن طالعات ‏

مرة عمي = ههههههه اقول يام عمر ليه ماتزوجينه ‏

ابتسمت مستانس على اقتراح مرة عمي ... ايه هذي الناس اللي تفهم .. بس ماش ‏طلعن وهن يتكلمن عني .. ودي الحقهن واسمع وش يقولن ‏

مصعب = جدي انت دايم تبدي عمر علينا ‏

عمي بصراخ = مصععععععب

معاذ = ومصعب صادق الاكثرية يبون من المطعم وش معنى تاخذون برايه وحنا لا ‏

عمر = ماكنت ادري انكم مشتهين اليوم من برا بس انا صدق مليت من المطاعم ‏والوجبات السريعة ‏

معاذ وهو يشر يده لي بتقليل قيمة = اقول فكنا زين ‏

عمي = خلاص عمر ماعليك منهم ... كل واحد اطول مني وفلوسه بجيبه اللي يبي ‏من المطعم يروح يجيب لنفسه ‏

مها ومعاذ وسعود ومصعب كلهم يطالعوني منقهرين .. التفتت على بنات عمي و ‏بسرعة ابعدت نظري عنهن .. ماشوف شي منهن بس اكيد منقهرات مثل البقية ‏

طلع عمي وجدي للمسجد وطلع مصعب وسعود بعدهم بفترة ‏

اخذت عكازي وطلعت من البيت ووقفت عند مدخل الباب ادور على دانة بين ‏البزارين اللي يلعبون بالشارع .. وين راحت هذي دايما اشوفها تلعب وش معنى ‏اليوم ‏

فجاة دفعني واحد من ورا بغيت اطيح على وجهي ‏

التفتت و اول ماشفت معاذ عصبت ‏

عمر = يااااحمار بغيت اطيح ‏

معاذ = ساد علينا الباب يا الاعرج ‏

وراح متوجه للمسجد ‏

مشيت وراه رايح للمسجد .. اممممم خلني ارفع ضغطه شوي لين نوصل المسجد .. ‏وش وراي ‏

رفعت صوتي عشان يسمعني معاذ اللي يمشي قدامي بمسافة بسيطة ‏

عمر بصوت عالي = اقووووول معاذ وش تبيني اقول لعمي اذا شاف سيارتك معي ‏

وقف معاذ شوي وبعدها التفت لي وهو ماسك اعصابه ‏

معاذ = قلّه عمي عطني كف ‏

ضحكت بقوة على كلمته ‏

عمر = هههههههههههههههههههههههههههههههههههههه حلوة ‏

بعد ربع ساعة طلعت من المسجد ودخلت حارتنا .. ووقفت بمكاني يوم شفت دانه ‏تلعب .. فرحت اخييييييييرا طلعت ‏

مشيت لين وصلت عندها ‏

عمر بابتسامة = دانه ‏

رفعت نظرها لي وتركت يد البنت اللي كانت تلعب معها وهي مستغربة مني ‏

شعرها حوسه ومغطي على وجهها كأنها لها ايام ماحد مشط لها شعرها .. وملابسها ‏هو هو نفس ملابسها اللي اشوفه عليها كل مرة ( بنطلون بني وبلوزة خضرا ) ‏

عمر = تعالي دانه ( ومسكت يدها ومشيت فيها لسيارتي ) ‏

هزيت راسي بأسف .. تجاوبت معي على طول ومشت معي للسيارة ... هذي ‏بسهولة بتنخطف ... ( تنهدت ) عرف نايف كيف يلعب باعصاب رايد ‏

فتحت سيارتي وركبت بمكان السواق وشلت دانه وجلستها على فخذي السليمة ‏

عمر = دانه ( وابعدت شعرها عن وجهها عشان اشوفها زين ) دانه لا تطلعبن من ‏البيت ‏

رفعت دانه نظرها لي مستغربه ‏

دانه = ابلعب ‏

عمر = العبي داخل بيتكم .. ‏

دانه بزعل = لا ابلعب هنا .. البيت ماحد يلعب معي ‏

عمر بتنهيدة = دانه .. رايد يقول لا تطلعـ ‏

وقطعت كلامي اول ماسمعت اسم اخوها ‏

دانه بفرح = لااايد .. ( وقعدت تتلفت تدور رايد ) ‏

وانصدمت يوم شفتها متحمسة تدور اخوها ‏

دانه = ابي لايد ( وتحركت بحظني متحمسه وهي تدوره بعيونها ) وين لااااايد ‏

طالعتها مستغرب ... وش فيها .. معقول كل هذا شوق لاخوها ‏

عمر مستغرب = تبين تشوفين رايد ؟ ‏

دانه = اييييه ( وبرطمت ) وين لاااااح ‏

التفتت لبيت عمها مستغرب ... بيذبحني الفضول وش وضع رايد واخواته داخل ‏هالبيت ‏

قالي رايد مرة انه مايقدر يشوف اخواته الا الظهر ... واشوفه انا كل ماوصلته ‏بسيارتي ... يدخل للبيت متسلق الجدران ياخذ ربع ساعة نص ساعة بالكثير ويطلع ‏على طول .. ومن شوق دانه له الحين واضح انها ماعمرها شافته يوم يتسلل رايد ‏لبيتهم ‏

التفتت لدانه ولقيتها تطالعني ومبرطمه وكأنها تحتريني اطلع رايد من جيبي ‏

ماقدرت امنع نفسي و ضميت دانه لصدري بقوة ‏

آآآآه يارايد .. لك اخت مشتاقة لك وتحتريك .‏

جسمها صغير .. كأني ما اضم شي .. ‏

حبيتها مع خدها و همست باذنها ‏

عمر بهمس = اوعدك يادانة اجره لك من سيقانه واحطه عندك .. اوعدك .. لا تبكيــ ‏

‏= عمممممر ‏

نقزت متفاجأ من صوت مصعب اللي واقف عند باب السواق و مطير عيونه فيني ‏

مصعب منصدم = وش تبي بهالبنت .. وعلى أي اساس تضمها بهالشكل .. اختك ‏هي والا بنتك ؟ ‏

انحرجت وحاولت ادافع عن نفسي ‏

عمر مرتبك = وش فيك مصعب ... بـ .. بــ .. بنيّه صغيرة .. آآآ .. اسلم عليها بس ‏

مصعب = تسلم عليها تضمها ؟ ( والتفت لدانه اللي بحظني وبعدها التفت لي ) والا ‏لانها يتيمه ماخذ راحتك معها ‏

رفعت حواجبي ... حلو قال يتيمة يعني يعرفها .. صح عصبت على شكه فيني بس ‏ريحني يوم قال يتيمه .. اختصر علي الطريق ‏

نزلت دانه من حظني وطلعت من السيارة ووقفت قدام مصعب وانا ماسك يد دانة ‏

عمر = تعرفها ؟ ‏

مصعب بعصبية = مالك دخل فيها .. وخلني اشوفك شايلها بهالشكل ‏

عمر = تعرف اخوها ؟ ‏

مصعب بصراخ = قلت لك مالك دخل ( ونزل نظره لدانه معصب ) روحي العبي ‏و لا تقربين من هذا ‏

عمر = رايد ساكن معي بالبيت ‏

التفت مصعب لي منصدم ‏

مصعب = نعم ؟ ‏

اضطريت اقوله .. انا الغلطان بس مدري وش جاني يوم شفت شوقها لاخوها ‏ومادريت عن نفسي الا وانا ضامها لصدري ‏

عمر = اخوها ساكن معي.. من يوم طرده عمه من البيت وهو معي ... اول كان ‏باستراحتنا ثم ببيتي ‏

مصعب مستغرب = رايد ساكن معك انت ؟ .. من وين تعرفون بعض ؟ ايه .. انا ‏فاقده .. من زمان ماشفته بالحارة ... سألت جدي عنه قال مايدري وينه ‏

هزيت راسي بايه ‏

عمر = جدي مايعرف مين اللي ساكن معي ..( ونزلت نظري لدانه ولقيتها تطالع ‏البزارين ببرائة ) دانه روحي ادخلي للبيت مثل ماقلت ‏

رفعت دانه نظرها لي وبرطمت ‏

دانه بزعل = ابي العب هنا ‏

زفرت بضيق .. وين راح كلامي .. خليت يدها وراحت تركض للبنات اللي يلعبون ‏

التفتت لمصعب ولقيته يطالعني ‏

عمر = وش تطالع ؟ ‏

مصعب = وش اللي خلاك تسكّن رايد معك ؟ ‏

طنشته والتفتت لسيارتي وقفلتها بس سمعت مصعب يكلمني ‏

مصعب = كنت عارف ان قلبك طيب ... ‏

التفتت له بعصبية ‏

عمر = لا تاخذ مقلب ‏

ورحت عنه منحرج .. اول مرة واحد يمدحني ‏

جاني مصعب ولف ذراعه على اكتافي وهو يمشي بجنبي ‏

مصعب = وشلون رايد الحين .. اذكره كان ياخذ جلسات عشان رجوله .. وشلونه ‏الحين ؟ ان شاء الله صار يمشي احسن ‏

ابعدت ذراع مصعب عني بعنف ‏

عمر = يااااخي وخر يدك ماني متحمل ثقلك ... ‏

ومشيت عنه ودخلت داخل البيت ‏

اخر شي توقعته اصارح هالاشكال ‏

يتبع ..!

17 - 4 - 2014, 09:14 AM

دخلت الصاله ولقيت عمتي مها ومعاذ يتكلمون .. واول ماشافتني مها صاحت فيني ‏تبيني اجلس بجنبها ‏

مها = تعاااااال تعااااال ... ابيك بموضوع مههههههم ‏

جلست عندها وانا عارف ان ماعندها ماعند جدتي ‏

دخل بعدي مصعب و على طول صاحت فيه مها نفس الشي ‏

ضحكت على عمتي وعلى هبالها ‏

عمر = ههههههههههه الحين تبيني والا تبين مصعب ؟ ‏

مها بجدية = ابيك انت ومصعب ومعاذ ‏

التفتنا لها كلنا باهتمام ‏

مها = انا كلمت ابوي وعيا .. والحين مافيه قدامي الا انتم تقنعونه ‏

قطبت حواجبي مستغرب واحتريها تكمل ‏

مصعب = نقنعه بأيش ؟ ‏

مها = تقنعونه اخذ قرض ‏

طيرنا عيوننا فيها ‏

عمر = قرض ؟ ‏

معاذ = مها تكلمين جد ؟ .. وشلون تسددين القرض بعدين وانتي مو موظفة ولا شي ‏

مها = ابي افتح مشغل ... ودي بشي يشغلني .. مليت من الفراااااااغ ‏

عمر = تقومين وتاخذين قرض ؟

مصعب = عمتي دوري وظيفة .. خوذي سلف كم الف وابدي تجارة بسيطة اما ‏قرض من احد البنوك صعععععبه ‏

عمر = ايه مها ... وشلون تبين تبدين مشغلك بدين ‏

معاذ = وبعدين بريدة ملياااااانه مشاغل ... عندنا شااااارع كامل كله مشاغل .. اذا ‏مريتي من عند هالشارع ماتشمين الا ريحة شعر محترق ‏

ضحكت انا ومصعب ومها على تعليق معاذ ‏

مها = هههههههه ( وبعدها زفرت بضيق ) يله عااااد ودي بمشغل ابي احس بشي ‏يشغلني ‏

عمر = هذا مخاطرة عمه مب قرض ‏

برطمت مها زعلانه ‏

مها = طيب انا ملييت .. مليت من الفراغ .. ومافيه وظايف اشغل وقتي فيها ... انتم ‏كلكم تروحون وماحد يجلس معي .. امي وابوي ينامون بدري وانا اقعد اقابل ‏الجدران والله مليييييييييييت .. وماعندي احد اسولف معه ‏

سكتت حاس فيها ... ‏

معاذ = عندك الانترنت .. عندك جدي وجدتي وحنا بعد كل شوي داخلين عليكم .. ‏وش تبين بعد ‏

مصعب = طيب مها ليه ماتدخلين دورة او معهد أو أي شي ‏

زفرت مها بضيق وكملت وهي شوي وتبكي ‏

مها = عمري 33 سنة وين تبيني ارجع ادرس وانا بهالعمر ... ماحد حاس فيني .. ‏كلكم لاهين عني ‏

معاذ = قرض لا تفكرين فيه .. مها حنا نبي مصلحتك .. واي وقت تلقينا حولك .. ‏

مها = ابي شي يشغلني ... ‏

مصعب = خوذي سلف من احد نعرفه .. دوري وظيفة .. اطلعي مع صديقاتك .. ‏أي شي ‏

مها = اووووووووووه ليه تبون تحطموني ‏

عمر = مانحطمك ... بس نبيك تدرسين مشروعك وتشوفين هو ينجح والا لا قبل ‏تتهورين وتاخذين قرض ‏

مصعب = ما اعتقد انه بينجح اصلا ‏

معاذ = مدي رجولك على قد لحافك ‏

مها = اووووووه .. ماحد حاااااس فينييييييييي ‏

وقامت مها معصبة وطلعت من الصاله ‏

التفتت لعيال عمي ‏

عمر = وش رايكم تاخذون مها تغير جو عندكم ؟

حرك معاذ يده لي بتقليل قيمه ‏

معاذ = اقول اسكت بس انت ورايك اللي مثل وجهك .. ياخبل وجدي وجدتي مين ‏يقعد عندهم بعدين ‏

عمر = خذوهم معكم بعد يغيرون جو ‏

معاذ = اكرمنا بسكوتك بس ‏

مصعب = صح والله فكرة .. ‏

التفتت لمصعب يوم شفته أيدني ‏

عمر = ايه مصعب قل لجدي يوافق تاخذون مها معكم ‏

التفت مصعب لي بابتسامة ‏

مصعب = انت جدي مايرد لك طلب ... متأكد انه بيوافق اول ماتشور عليه ‏

معاذ = مصعبوه لا تكبر راسه علينا ‏

عمر = على أي اساس اقوله .. هي بتروح لبيتكم ماهو لبيتي .. مب حلوة اعزمها ‏لبيتكم ‏

مصعب بتفكير = امممم طيب ابقول لجدي واشوف بس مب اليوم ‏

معاذ = هييييه انت ( وضربني مع كتفي عشان التفت له ) ‏

التفتت له بعصبية ‏

عمر = اظن لي اسم ‏

معاذ = اقول بس متى بترجع سيارتي .؟ ‏

عمر = اذا حجت البقر على قرونها ‏

معاذ مستغرب = وش تقصد ‏

ابتسمت اغيضه ‏

عمر = ارجعها بمزاجي مب بمزاجك ‏

رفع معاذ قبضته بيعطيني بكس بس حال بيننا مصعب وقام واقف ‏

مصعب = هييييييه هيييييييييييييه ( ومسك يد اخوه ) خلوا هاليوم يمر بدون هوااااش ‏تكفووووووون ( وجلس بمكان مها بيني وبين معاذ ) اعووووذ بالله منكم ‏

على الساعة 11 بالليل ‏

وبعد ماخلصنا من العشا والفلة والسوالف والضحك قام عمي واقف

عمي = يله بكرة جمعه ‏

والتفت لعياله وحريمه ( وكمل بمزح ) ‏

عمي = يله انتوا قووموا ... اسهرتوا شيبانا ‏

‏ قامت امي وجلست بجنبي ‏

امي = تبي شي وانا امك قبل اروح ‏

ابتسمت ‏

عمر = ايه ابي ( والتفتت لعمي ) عمي ماعليك امر انا ابوصل امي بسيارتي ‏

ضحك عمي ورد علي بمزح ‏

عمي = اخاف تضيعها هههههههههههه ‏

مع ان مزحته بايخة بس ضحكت تسليك ‏

عمر = ها ها ها لا ماعليك ‏

طلعوا عمي واهله بعد ماسمح لامي تجلس واوصلها انا لعنيزة ‏

التفتت لامي وهي طالعة من الصاله رايحة لاحد الغرف ‏

تغيرت امي ... صارت اسمن من قبل وصارت ثقيله بسبب الحمل ‏

وابتسمت فرحان يوم تذكرت اخوي اللي بالطريق .. ماني متخيل بيصير لي اخو او ‏اخت .. بعد ماوصل عمري 21 سنة يجيني اخو ( ونزلت راسي وتنهدت ) بس وش ‏الفايدة .. ماراح احس فيه .. هو ببيت وانا ببيت .. الوحدة وراي وراي ‏

جت امي وجلست بجنبي بس على الارض وانا على الكنبة ‏

‏ ماكنت عارف قيمتها يوم كانت عندي .. كنت اسهر ومارجع الا اخر الليل واخليها ‏هي لحالها بالبيت .. وفوق هذا ماكانت تبين لي انها طفشانه من الوحدة .. بالعكس ‏اول مارجع تسألني .. تعشيت ؟ .. ‏

كنت بنعمة.. بس بغبائي رفست هالنعمة وخليتها تفكر بالزواج .. اهتم بخوياي ‏واخليها هي اخر اهتمامي ... ياليتنا نرجع مثل قبل ببيت واحد ‏

جلست بالارض بجنبها ماد رجلي بسبب الجرح ‏

عمر = يمه تسلم يدك على العشا ‏

التفتت امي لي مستانسة ‏

امي = عافية عليك ‏

انسدحت على ظهري وحطيت راسي على فخذها وناظرتها من تحت وانا اضرب ‏بطني اضحكها ‏

عمر = امتلى بطني .. خلينا نسحب على عمي مب لازم تروحين اليوم لعنيزة ‏

امي = هههههههههههههههههههه ‏

‏= عمر ماقلتلي مين اللي ساكن معك ؟ ‏

التفتت لجدي .. كنت عارف ماراح يسكت عني لين اقوله ‏

عمر = هاااه ‏

جدي = انت اجرت بيتك والا وشلون ... مين اللي ساكن معك ؟ ‏

طالعت امي وبعدها التفتت لجدي .. اقوله ؟ .. المشكلة جدي مايحب اخوياي .. ‏يعرف انهم راعين سجاير ومعاكسات ونايف وسعد بعد ماقصروا بالسمعة ‏
وشوي وشوي اكيد بيعرف انه كان معنا بالاستراحة ‏

اخاف اذا قلت له يفتح لي محاضراته .. انت بتخرب الولد ومادري ايش .. اعرفه ‏جدي واعرف تفكيره ‏

هذا غير انه اكيد بيقول لعم رايد ياخذ رايد عنده عشان يبعدونه عن جو الشله ‏الصايعة بنظرهم .. ورايد اصلا مايبي يرجع لعمه ‏

مها = يبه شكله نسى اسم اللي ساكن معه ‏

التفتت لمها وضحكت ‏

عمر = ههههههههههه لا وش دعوة عاد ( والتفتت لجدي ) اممم اللي ساكن معي ‏واحد من خوياي بالجامعة .. اهله .. آآآ .. اهله بالرياض وهو مالقى شقة وسكن ‏معي .. هذا كل شي ‏

هز جدي راسه بايه وسكت .. اخذت نفس .. الحمد الله احسن .. مالي خلق لهواشه ‏

قام جدي وراح ينام ‏

اخذنا نص ساعة انا وامي وجدتي ومها نسولف ‏

وبعدها طلعت انا وامي .. وصلتها لبيتها بعنيزة ورجعت للبيت ‏

وعلى الساعة وحدة دخلت بيتي ولقيت الاخ رايد عليه ملابسه الداخليه كالعادة ‏وجالس بالصالة وسرحان ‏

عمر = اللي ماخذ عقلك يتهنا به ( وجلست على الكنبة وركزت عكازي على ‏الطاولة الصغيرة قدامي ) ‏

انتبه لي رايد وطالعني ببال مشغول ‏

استغربت وش فيه هذا ‏

عمر = وش فيك رايد ؟ ‏

رايد = لا ولا شي ( وانسدح على الكنبة ) من العصر وانت طالع .. مليت لحالي ؟ ‏

قمت واقف وطلعت جوالي من جيبي ونزلت ثوبي ورميته أي كلام على الطاولة ‏الصغيرة وانسدحت على ظهري على الكنبة ‏

عمر بتعب = كنت عند جدي ... ( وتمغطت بكسل ) ‏

التفت رايد لي وكأنه تذكر شي ‏

رايد = صح عمر .. شفت دانه .. علمتها ماتطلع من البيت ؟ ‏

طالعت السقف وتنهدت لما تذكرتها.. هزتني بشوقها لاخوها .. احسده عليها ‏

التفتت لرايد ‏

عمر = رايد .. دانه مافهمت علي .. ‏

رايد بضيق = اوووووووووه .. ‏

سكتت شوي ‏

عمر = اقول .. انت متى اخر مرة شفتها ؟

رايد = ما اجي للبيت الا الظهر .. وكل مرة مايمديني اشوفها ‏

مثل ماتوقعت .. واحد يتسلق الجدارن بعز الظهر مايمدي احد يشوفه ‏

جلست طفشان من رايد ‏

عمر = رايد انت ليش كذا .. الى متى بتخاف من عمك .. شف لك ثلاث شهور ‏تقريبا وانت على هالحال ( وكملت عشان احرّضه ) تدري ان دانة شوي وتبكي ‏تبيك .. البنت اول ماقلت اسمك انهبلت ... والله انك ماتستاهلها ‏

تغير وجه رايد متضايق ‏

رايد = وش تبيني اسوي .. عمي دايم يضربني .. وانا ابي اتوظف واخذهم بس ‏ماعندي كرت العايلة وانت تعرف ‏

عمر = واجه عمك .. رح له وقل ابي كرت عايلتكم .. الى متى بتصير خوااااف ‏

جلس رايد والدنيا مسوده بعيونه ‏

رايد بحزن = اختي الكبيرة طلبت الكرت منه بس هو عيا .. مـ ‏

قاطعته معصب منه ‏

عمر بعصبية = ياخي خل اختك الكبيرة .. انا اقصد انت ليه ماتروحله بنفسك ‏

و سكتت شوي يوم تذكرت الضمان الاجتماعي .. صح .. انا ماعلمته ان عمه ياخذ ‏الضمان ..‏

‏ ابتسمت وكملت عشان اقهره واحرضه يتحرك ‏

عمر بابتسامة = تدري ياخبل ان عمك ياخذ الضمان الاجتماعي حقكم .. تدري ان ‏عمك مايبي يعطيكم الكرت لانه مستفيد من راتب ابوكم ومن الضمان الاجتماعي .. ‏وانت قاعد عندي هنا تون وتحن ‏

طير رايد عيونه فيني ‏

رايد بصدمه = وووششش ؟ ياخذ الضمان ؟ . ( ونزل راسه مستغرب وبعدها ‏طالعني ) انت قلتلي بتشوف هم يصرفون لنا والا لا .. ماقلت انه ياخذه عمي ‏

عمر = سألت وعرفت انه ياخذه ‏

لاحظت وجهه بدا يحمر ويعصب وانفاسه سريعة .. وهو الى الحين مصدوم ‏

وكملت عشان اقهره اكثر ‏

عمر = عمك الحين ياخذ راتبك من الضمان وراتب دانه وراتب اختكم الكبيرة ‏ومايعطيكم شي ‏

شفت عيونه تمتلي دموع .. شوي شوي وسالت دموعه على خده ‏

لفيت وجهي عنه بملل وطولت صوتي اسمّعه ‏

عمر = اففففف هالبزر على كل شي يصيح ( والتفتت له ) ابي مرة بس اشوفك ‏رجال وماتبكي ‏

رفع رايد يده واخذ يحسب باصابعه وهو يشاهق .. حسيته مو بعقله ‏

رايد بصوت باكي = باع بيتنا .. وطردني .. وماخلانا نكمل دراسة .. وياخذ راتب ‏ابوي والحين يـ ( وبكى اكثر ) ‏

كملت عشان استفزه ‏

عمر = ايه باع بيتكم .. وطردك مثل الكلب .. وياخذ راتبكم كلها ... وانت هنا كل ‏شوي تصيح .. ‏

قام رايد واقف واخذ يروح ويجي بالصاله وهو يضرب راسه من القهر ‏

رايد = ليييييه طيب .. وش سويت له انا ... ( التفت لي وهو يشد شعره ) قهرني ‏عمي قهررررررني ( وحط يده على صدره وكأنه ضاق نفسه ) ابي حقي ابي ‏حقيييييي ‏

سكتت ومارديت عليه ‏

اخذنا شوي ورايد مايدري وش يسوي ‏

اشوفه ياما جلس على الكنبة ياما قام رايح جاي وهو يسب ويشتم ‏

طالعت رايد واهو واقف عند الجدار ويشتكي ‏

‏ رايد وهو يبكي = ياخذ راتبي وفوق هذا عيااااا يخليني اكمل دراستي بخيل ( ‏وضرب راسه بقوة ) بخيل .. بخيل .. بخيل ( وزاد بكاه اكثر وغطا وجهه على ‏الجدار وهو واقف ) ‏

تنهدت .. وعساه يتحرك عاد .. رايد خواف ومراهق ‏

اخذت جوالي وطالعت الساعة ‏

‏1 ونص ‏

افففف اخر الليل وانا مانمت الى الحين .. رفعت راسي لرايد ولقيته يكلم نفسه وهو ‏الى الحين مغطي وجهه ‏

انسدحت على الكنبة على ظهري وحطيت يديني تحت راسي وانا اسمعه يكلم نفسه ‏

رايد = مايعطيني ريال واحد .. يمر علي يوم يومين جوعااااان .. حرمني من كل ‏شي .. ابي حقيييي .. الله ياخذه .. والله لاذبحه ....... ‏

وقعد يسب ويشتم .. خله ينقهر شوي وبكرة اباخذه لدانه مثل ماوعدت البنت .. ‏وابتسمت لما تذكرتها .. ياحلوها ياناس .. حجمها صغير .. ( تنهدت ) بس لو احد ‏يهتم فيها بتطلع احلى ... مشكلتها ماعندها اخوان كفو .. الاخت الكبيرة مدري وش ‏قصتها ورايد ولد خواف ... ‏

ماسمعت لرايد صوت والتفتت له مستغرب .. ولقيته واقف بنص الصاله ويفكر ‏وانفاسه سريعه من العصبية والقهر ‏

رفعت حواجبي مستغرب ... وش يفكر فيه هذا ‏

عمر مستغرب = وش فيك تنّحت ؟ ‏

مارد علي وشكله ماسمعني اصلا ‏

شكله ماعنده ماعند جدتي .. طولت صوتي عشان يسمعني ‏

عمر = رااااااااااااايد ‏

طالعني بنظرات غريبة كأنه شوي ويهجم علي ‏

حسيت من نظراته كأني اللي اخذت حقهم ‏

عمر باستغراب = بسم الله وش فيك تطالعني كذا ‏

همس رايد وصدره يرتفع وينزل من القهر ‏

رايد بهمس = ابي حقي وحق اخواني ‏

سكتت شوي وبعدها رديت اتطنز عليه ‏

عمر = لحظة لحظة خلني ادوره هنا يمكن طاح مني وانا مادري ( ورحت اتلفت ‏بالارض اتطنز عليه ) هه هه هذا هو امسكه امسكه ( واشرت لمكان تحت رجوله ) ‏

رفعت نظري له ولقيته يطالعني و ساكت وهو معصب و الى الحين واقف بنص ‏الصاله ماتحرك .. ‏

يطالعني وكأنه مايطالعني .. انا عارف انه منقهر بس ابيه يتحرك .. ابيه يروح لعمه ‏وياخذ كرت عايلتهم .. او ياخذ راتب ابوهم او أي شي المهم يتصرف ‏

حركت يدي له بتقليل قيمه ‏

عمر = طف اللمبة بس ابنام ‏

ونمت على جنبي معطي رايد ظهري .. اخذنا شوي وانا اسمع خطوات رايد رايح ‏جاي ‏

واول ماغفوت سمعت خرفشة قريبة مني وبعدها سمعت صوت مفاتيح ‏

التفتت مستغرب ولقيت ثوبي طايح على الارض .. ورايد مو موجود .. جلست ‏واخذت ثوبي وانا اتحسس مكان المفاتيح ‏

شهقت .. وين مفاتيح السيارة ‏

اخذت عكازي وقمت واقف ‏

عمر مستغرب = بسم الله وين راح هذا ( ورفعت صوتي شوي اناديه ) راااايد ‏

طلعت من الصاله ادوره .. بس سمعت صوت خرفشة بالمطبخ ‏

مشيت خطوة بس تفاجأت برايد يطلع من المطبخ وهو يركض ‏

وشهقت مطير عيوني لما شفت بيده سكينة حجم كبير ‏

‏ عمر = هيييييييييييييه رااااايد .. وش بتسوي يامجنووووووووون ‏

بس ماعبرني وطلع للحوش ‏

رحت اعرج بسرعة احاول الحقه ‏

عمر = راااايد .. رااااايد ... لا لا راااايد .. راااايد اسمعني ‏

وصل رايد عند باب الشارع والتفت لي معصب ودموعه على خده .. ووجه السكينه ‏لي ‏

رايد = خلنيييي .. مالك دخل فيني ... ‏

عمر = رااايد تعوذ من الشيطان وهات المفتاح ( ومشيت خطوات بس صاح فيني ) ‏

رايد بصراخ = لااااا تقررررب ‏

وقفت باول الحوش ... ورايد عند باب الشارع بمسافة قريبة شوي مني وحمدت الله ‏ان حوشنا صغير ‏

الحوش مظلم وماينور علينا الا لمبات الشوارع القوية .. واشوف رايد بوضوح .. ‏ماعليه الا ملابسه الداخلية .. بيده اليسرى المفتاح .. طالعت السكينة اللي بيده اليمنى ‏خايف من تهوره ‏

انا اعرف اني استفز اللي قدامي باسلوبي .. ياما خليت مصعب ومعاذ يعصبون ‏وياما تهاوشت مع شباب بسبب اسلوبي بس ماتوقعت لهالدرجة .. ابيه يتحرك صح ‏بس مايتحرك بجنون مثله الحين ‏

عمر = رايد تتوقع بتاخذ حقك كذا ؟ ‏

رايد بصراخ = مالك دخل مالك دخل ... لا تجي وراااي .. خلني بحاااالي .. ابروح ‏اشغل السيارة ياويلك اذا تبعتني ياعمر يااااااااويلك .. ‏

مشيت خطوة بس وقفت بمكاني يوم شفت رايد يحرك السكينة لي بعصبية ‏

رايد = لا تقرررب اقول لا تقررررب ‏

يحرك السكينة بشكل افقي وبقوة .. اذا قربت له و لمستني سكينته بتقطني نصفين .. ‏

ارتبكت خايف ‏

عمر مرتبك = نـ .. نـزل السكين .. رايد ‏

رايد بصراخ = لاااااااااااااا .. والله لاذبحه ... والله لاعلمكم منهو راااايد ‏

عمر = ماراح تستفيد شي .. الشرطة على طول بتقبض عليك ‏

رايد = ماعلي من احد ... خلنيييي عمر خلنيييييييي ‏

وش اسوي الحين .. كيف اخذ السكينة منه .. مشيت خطوة بس صارخ علي رايد ‏بصوت عالي وهو يمشي على ورا لين لصق ظهره بالباب

رايد = والله لاحذف السكينة عليك .. خلنييييييي .. ابعد عنييييي ‏

التفت رايد على الباب وبعدها التفت لي بسرعة .. وبيده اليسرى اللي ماسكة المفتاح ‏تحسس على مقبض الباب وعيونه علي ‏

رايد = لا تتبعنيييييي .. ابروح اشغل السيارة .. ارجع .. مابيك تتبعني ‏

رفعت يدي اليسرى احاول اهديه ‏

عمر = رايد لحظة لحظة .. خلنا نفــ ‏

قاطعني رايد يسكتني ‏

رايد = ابروح لعمي والله لاذبحه ... اذلف اذلف ‏

عمر مرتبك = طيب طيب مثل ماتبي .. بس البس ثوبك على الاقل ( وابتسمت ‏مرتبك ) بتطلع كذا ؟ ‏

رايد = مالك دخل .. لا تتبعني .. ارجع ارجع .. والله لاحذف السكينة عليك اذا ‏قربت مني ( ورفع السكينة فوق .. شوي و يحذفها علي ) ‏

شهقت .. ياربي وش اسوي مع هالمتهور ...

17 - 4 - 2014, 09:14 AM

* الجــزء الرابــع عشــر *

رايد بصراخ = لاااااااااااااا .. والله لاذبحه ... والله لاعلمكم منهو راااايد ‏

عمر = ماراح تستفيد شي .. الشرطة على طول بتقبض عليك ‏

رايد = ماعلي من احد ... خلنيييي عمر خلنيييييييي ‏

وش اسوي الحين .. كيف اخذ السكينة منه .. مشيت خطوة بس صارخ علي رايد ‏بصوت عالي وهو يمشي على ورا لين لصق ظهره بالباب

رايد = والله لاحذف السكينة عليك .. خلنييييييي .. ابعد عنييييي ‏

التفت رايد على الباب وبعدها التفت لي بسرعة .. وبيده اليسرى اللي ماسكة المفتاح ‏تحسس على مقبض الباب وعيونه علي ‏

رايد = لا تتبعنيييييي .. ابروح اشغل السيارة .. ارجع .. مابيك تتبعني ‏

رفعت يدي اليسرى احاول اهديه ‏

عمر = رايد لحظة لحظة .. خلنا نفــ ‏

قاطعني رايد يسكتني ‏

رايد = ابروح لعمي والله لاذبحه ... اذلف اذلف ‏

عمر مرتبك = طيب طيب مثل ماتبي .. بس البس ثوبك على الاقل ( وابتسمت ‏مرتبك ) بتطلع كذا ؟ ‏

رايد = مالك دخل .. لا تتبعني .. ارجع ارجع .. والله لاحذف السكينة عليك اذا ‏قربت مني ( ورفع السكينة فوق .. شوي و يحذفها علي ) ‏

شهقت .. ياربي وش اسوي مع هالمتهور ... ‏

تذكرت عكازي اللي معي .. وضغطت بيدي على العكاز

عمر = رايد مب كذا تحل مشاكلك مع عمك ‏

رايد = مااااااااااالك دخل ... مااااااااعلي منكم ‏

قطبت حواجبي اخوفه ورفعت عكازي فوق ‏

عمر بعصبية = ترا بعكازي الحين ... نزل السكينه اشوف ‏

‏ ومشيت خطوة بس وقفت بمكاني يوم شفت رايد يحرك السكينة بقوة عشان ما ‏اقرب منه ‏

رايد بصراخ = ياااويلك .. لا تقرب ‏

خايف يحذف السكينة علي صدق ... رايد مب بعقله ‏

عمر = آآآآ .. طيب ابروح معك ( ومشيت خطوة احاول اقرب منه اكثر ) ‏

صاح رايد فيني ‏

رايد بصراخ = لااااااااااااااااااا تقررررررررررب ‏

وقفت بمكاني وانا الى الحين رافع عكازي فوق ‏

عمر = رايد السيارة مب لي ‏

رايد بعصبية = مالك دخل .. والله لاذبحه ‏

عيني مع السكينة اللي يحركها رايد بجنون .. بيجني على نفسه هالخبل ‏

اخذت نفس وبحركة سريعة مشيت بخطوات طويلة و هويت بعكازي بقوة على يد ‏رايد اللي ماسكة السكينة ‏

صاح رايد باعلى صوته بألم ومسك يده اللي ضربتها بالعكاز وطاحت السكينة ‏بمسافة قريبة منه ‏

حذفت عكازي وهجمت على رايد وطرحته بالارض وركبت فوقه.. حاولت اجلس ‏على بطنه بس ماقدرت بسبب الجرح اللي برجلي .. وحشرته بالارض متمدد فوقه ‏عشان اثبته بالارض ومايتحرك ‏

عمر بصراخ = خبل انت ... كذا بتاخذ حقك ؟ ‏

بكى رايد اكثر بقلة حيلة وهو تحتي ومنقهر ‏

رايد = وخررر مالك دخل .. خلني ارووووووح ( وصاح بألم ) آآآآآه يدي يدي

عمر بعصبية = وش قالك عقلك ... بتذبح عمك... ماتستفيد الا القصاص يابقرة

ضرب رايد راسه بالارض منقهر ‏

رايد وهو يبكي = قهرني قهرني قهرني ..( يعيد الكلمة وهو يضرب راسه بالارض ‏بقوة من القهر ) ‏

بسرعة حطيت يدي تحت راسه عن الارض وتنهدت ‏

عمر = خلاص رايد .. حقك بيرجع وشوله منقهر ‏

رايد وهو يبكي = ياكل من فلوسي وانا جوعان .. يلبس هو وعياله من فلوسي وانا ‏ماعندي الا ثوبي اللي ماغيرته من ثلاث شهور ... ابي حقي .. ابي ارجع لاخواني ‏

وبكى بصوت مسموع ‏

عمر = حقك بيرجعلك بس ماهو بطريقتك هذي ‏

رايد بصراخ = وخر .. يدي تعورنيييي ‏

انا اثقل منه وهو عصاليك واصغر مني .. انقلبت على جنبي ونزلت عنه وبعدها ‏جلست على الارض ‏

التفتت على رايد ولقيته ماسك يده اليمنى اللي ضربتها بالعكاز والى الحين مستلقي ‏على ظهره .. ‏

كسر خاطري والله ‏

عمر = خلاص رايد قم ندخل ‏

انبطح رايد على بطنه على الارض وغطى وجهه بذراعه بيأس وقعد يبكي بصوت ‏مسموع ‏

تنهدت .. لا حول ولا قوة الا بالله ‏

تلفتت ادور المفتاح ولقيته تحت الباب .. ولأننا قريبين من الباب انسدحت على ‏ظهري ومديت يدي واخذت المفتاح وجلست مرة ثانية ‏

حطيت يدي على فخذي يوم حسيت بعوارها .. يارب ماتنفك الخياطة مرة ثانية .. ‏ابي اتشافى منها بسرعة تعبت وانا اعرج .. حسبي الله عليك بامعاذ ‏

التفتت لرايد ولقيته الى الحين على وضعه يبكي ‏

حطيت يدي على ظهره ‏

عمر = خلاص رايد قم ياشيخ .. تراك تعبتني معك .. حقك بتاخذه ( وهمست ‏بصوت خفيف ) ولو بعد حين ‏

مارد علي ‏

مسكت ذراعه وجلسته غصب ‏

دموعه اربع اربع ووجهه احمر ‏

رايد بصوت باكي = ابي ارجع بيتنا بالرياض .. عمي بااااعه .. ( وطالعني بيأس ‏وعيونه حمر ) ماخلا لي شي ..‏

عمر = خلاص اهدا الحين ( وحطيت يدي على كتفه ) قم ندخل البيت وارتاح ‏وبكرة لها الف حلال ‏

حط رايد يده اليسرى على صدره يوم حس بضيق بنفسه ‏

رايد = ماااالي بيت .. عمي باع بيتنا ( وزاد بكاه اكثر ) ‏

حسيت بتطلع دموعي من شكله .. يالله يسحب نفسه من القهر .. ودموعه مغطيه ‏وجهه .. وصوت بكاه وهو منقهر يكسر خاطري ‏

رفعت نظري للسماء .. احاول امنع دموعي ماتنزل.. واخذت نفس اهدي نفسي ‏
‏ ‏
طالعت رايد مرة ثانية وهو الى الحين يبكي .. وماقدرت امنع نفسي سحبته لصدري ‏وضميته ولفيت يديني حولينه ‏
‏ ‏
عمر بهمس = خلاص رايد ‏

صح خواف .. ودايم مفهي لكن مسكين .. متشرد وما بيده ريال ‏

لف رايد يده اليسرى على رقبتي وتشبث فيني وغطى وجهه على كتفي وهو يبكي ‏

رايد = ابي حقي عمر ... ليه ياخذ راتب ابوي لييييه ... هو ابوي انا ماهو ابوه عمر ‏والله ماهو ابوووه .. ‏

رصيت رايد اكثر متأثر من اسلوبه في الكلام .. رايد مراهق .. صغير .. يصفقه ‏عمه على هواه ‏

رايد وهو يبكي = ليتني مت بالحادث ليتني مت ‏

رفعت يدي ومسحت دمعتي اللي طلعت غصب عني .. ‏
كيف ارجع حقه ... مابيدي شي اسويه ‏

ابعدت رايد عني وقمت واقف وقومته غصب وانا ساكت ماتكلمت بكلمة ( خانقتني ‏العبرة ) ‏

دخلنا البيت وقدت رايد للكنبة اللي بالصاله وجلسته عليها ... بس رايد انسدح على ‏طول وغطى وجهه بأرضية الكنبة عني وهو ماسك يده اللي ضربتها بالعكاز ‏

اعتدلت واقف واخذت نفس اهدي نفسي .. رحت للطاولة الصغيرة ووخرت ثوبي ‏عنها واخذتها وحطيتها قدام كنبة رايد وجلست على الطاولة ‏

عمر = رايد لا تفكر باللي فكرت فيه مرة ثانية ‏

مغطي وجهه عني وما اسمع الا صوت مشاهقته

انتبهت انه الى الحين ماسك يده .. تنهدت شكلي عورته .. مديت يدي وسحبت يده ‏اليمنى عشان اشوفها ‏

عمر = وش فيها يدك .. لا يكون عورتك ؟

سحب رايد يده مني وضمها لصدره ‏

رايد بصوت باكي = خلني بحالي ‏

عمر = خلني اوديك الطوارئ يشوفونها ‏

رايد = لا .. مالك دخل فيني .. خلني ‏

جلست شوي وانا اطالعه .. شسوات الحين .. اخاف يتهور مرة ثانية .. ما اقدر اثق ‏بعقله الحين .. ‏

قمت وطلعت من الصاله ... من اليوم ورايح لازم مايطلع الا بعلمي ‏

قفلت الباب الداخلي اللي يطلع للحوش .. ورحت للباب الداخلي الخلفي وقفلته ‏

البابين هذولي بس هم اللي يطلعون للحوش .. ومن اليوم ورايح راح احبسه ..... ‏ياربي الحين وشلون اوديه بكرة لدانة .. ‏

تنهدت لما تذكرت دانة وهمست ‏

عمر بهمس = دانه .. اخوك مجنون ‏

الجمعة .. الساعة 11 ونص ‏

قمت من النوم مكسل .. التفتت لمكان رايد ولقيته نايم على وضعه امس ‏

انا مانمت الا بعد الفجر ... طار النوم عني بعد جنون رايد امس ومانمت الا بعد ‏الفجر حتى الصلاة ماصليتها الا في البيت ‏

رحت للمطبخ وانا اعرج .. جوعان .. بس كالعادة مالقيت شي ينفع للاكل جاهز ‏

الا يعيني احتري وقت الغدا

رجعت للصاله وجلست على الكنبة مكسل .. التفتت على رايد .. وشلون الحين .. ‏كيف يشوف دانه من دون مايمر على عمه .. ‏

اخذت الريموت وقعدت اقلب في القنوات وبالي مشغول

شوي و تحرك رايد فجأة ورفع راسه يطالعني وبعدها جلس ‏

ابتسمت ‏

عمر = صح النوم ‏

مارد علي وقام واقف وطلع من الصاله ‏

عمر مستغرب = وين رااايح ؟‏

رايد = للحمام ‏

عشر دقايق ورجع .. لاحظت عليه مايحرك يده اليمنى ‏

عمر = يدك الى الحين تعورك ؟ ‏

جلس رايد على الكنبة بهدوء ‏

رايد = شوي ‏

قمت وجلست بجنبه وحطيت يدي على كتفه ‏

عمر = هونها وتهون ‏

يطالع الارض بحزن وساكت ‏

عمر = رايد اسمعني زين ... ( التفتت للتلفون ورجعت التفت لرايد ) متى اخر مرة ‏كلمت اختك الكبيرة على التلفون ؟ ‏

رايد بحزن = ماعمري كلمتها .. ( وتغير صوته ) هي يالله يالله تكلم خوالي ‏

طيرت عيوني مستغرب بس سكتت ولا علقت ‏

عمر = طيب كلمها الحين وخذ اخواتك واطلعوا على السيارة لاي مكان .. وتكلموا ‏براحتكم ‏

التفت رايد مستغرب ‏

رايد = وشلون اخذهم .. عمي ماراح يسمح لهم ‏

عمر = مب على كيفه .. انت اخوهم .. ماهن طلعات مع واحد غريب .. وماله حق ‏يمنعك ... ( نزلت يدي عن كتفه ومسحت على ظهره ) انت مشكلتك ماعندك وسط ‏‏.. يإما خايف من عمك مرة يأما بتخلص عليه مرة وحدة .. ماتعرف تواجه عمك ‏بعقل ؟ خذ اخواتك لاي مكان وتكلموا وبعدها رجعهم للبيت .. فيها شي غلط هذي ؟ ‏

هز رايد راسه بلا و بيأس ‏

رايد = انت مانت فاهم شي ‏

عمر = فهمني طيب ‏

رايد بضيق = مرة اختي الكبيرة بغت المستشفى .. قلت لها ابوديك بس هي خايفة ‏من عمي .. تقول انت ماراح يجيك شي .. بس هي راح يضربونها اذا طلعت من ‏دون علمهم ‏

عمر = وليش تطلع من دون علمهم ؟ ‏

التفت رايد يطالعني مستغرب ‏

رايد = وشلون اجل اخذها للمستشفى ‏

عمر = اتصل على عمك بالتلفون وقل ياعم ابي اخذ فلانه للمستشفى .. و بس ‏

رايد بصراخ = بعيي ‏

عمر = وليه يعيي مب على كيفه .. اخت طالعه مع اخوها .. فيها شي ؟ مشكلتك انك ‏خايف منه .. ابن امه يعيي ... وماله حق اصلا يعيي .. ‏

سكتت رايد يفكر و سكتت انا .. الصراحة ابي اسأله ليه اخته الكبيرة تبي المستشفى ‏بس خفت يعصب علي اذا سألت عن خصوصياتها .. لو دانه اقدر اسأله عنها بس ‏اخته الكبيرة صعبة ‏

ورفعت حواجبي لما تذكرت شي .. صح رايد قالي مرة يوم كنا بالاستراحة ان اخته ‏مجنونة او حاجة زي كذا ... والحين يبي يوديها المستشفى .. لا يكون اخته الكبيرة ‏مختلة عقليا ‏

طالعت رايد ولقيته الى الحين متردد ‏

عمر = يله اتصل عليهم الحين .. وقل بكرة ابي اخذ فلانه للمستشفى ‏

التفتت رايد لي بخوف = وبيوافق ؟ ‏

تمللت منه ‏

عمر بملل = ومن اليوم وش اقول ؟ اقولك ماله حق يوافق او مايوافق .. انت اخوها ‏‏... يله رح كلمهم ‏

رايد بتردد = طيب وشلون اخدهم ماعندي سيارة ‏

عمر = خذ سيارتي .. يله قم كلمهم ‏

قام رايد وجلس على الكنبة القريبة من التلفون وحط التلفون بحظنه .. ورفع راسه ‏كأنه يفكر ‏

عمر = وش فيك ؟ ‏

رايد وهو يفكر = احاول اتذكر رقمهم ‏

اخذ عشر دقايق ورايد يتصل وكل شوي يرد عليه رقم غلط ويرجع يحاول بارقام ‏قريبة من رقمهم لين اخيرا جابه صح ‏

رايد = الوووو .. هذا بيت ابو بندر ؟ ...... آآآ .. عطيني عمي ........ ايه انا رايد ‏‏......... عطيني عمي ابكلمه ...... لا الحين ابيه عطينيااه ........ تو الصلاة باقي ‏عليها انا بس ابكلمه شوي ......... ( رفع رايد نظره لي وهمس يوجه كلامه لي ) ‏الحين بيكلمني ‏

هزيت راسي بايه اشجعه ‏

فجأة ارتبك رايد والتلفون باذنه ‏

رايد مرتبك = الووووو .. عمي انا رايد ( وسكت شوي يسمع كلام عمه ) انا مب ‏صايع انت اللي طردتني يعني انت اللي صيعتني مب انا ‏

هزيت راسي من اسلوب رايد بالكلام ‏

رايد = ابي اخذ اخواتي بكرة ... ابي اخذهم بالسيارة .... ليه ... اباخذهم شوي ‏وارجعهم .... مب على سيارتك بسيارة خويي ... ليه لا طيب ؟ ....... ( رفع نظره ‏لي وبعدها نزل نظره للارض وهمس باسم اخته عشان ما اسمعه ) مريم تبي ‏المستشفى ( ورجع صوته طبيعي ) وانا بوديها واباخذ دانه معنا ‏

بغيت اضحك على اسلوبه .. انا شفت اسمها بكرت عايلتهم .. واعرف ان اسمها ‏مريم .. الغبي وشوله يهمس باسمها عني خايف اعرف اسمها يعني ؟ .. شكله نسى ‏انه عطاني كرت العايلة بنفسه .. صدق بزر .. يذكرني يوم كنا مراهين بالمتوسط ‏كل واحد يتحدى الثاني باسم امه .. انا عرفت اسم ام فلان وانا عرفت اسم ام علان ‏

انتبهت على صرخة رايد ‏

رايد بصراخ = ليه لا طيب ليه لا ( وتغير صوته ) انت ليه معنا كذا وش سوينا لك ‏

اشرت لرايد بيدي عشان يطالعني وهمست له ‏

عمر = قل هن اخواتي واتحداك تمنعنا .. رايد خلك قوي

نزل رايد نظره للارض وعاد كلامي لعمه

رايد = هن اخواتي واتحداك تمنعنا ... ابجي بكرة واخذهم ... ( سكت شوي يسمع ‏عمه وبعدها رفع صوته منقهر ) الا ابخذهم .. ( وتغير وجهه شوي ويبكي ) ‏

يوم شفته قرب يبكي .. اشرت له بيدي بسرعة يعني سكر بوجهه .. ما ابي عمه ‏يعرف انه ضعيف وعلى طول يبكي ‏

سكر رايد السماعة وطالعني وهو شوي ويبكي ‏

رايد = عيااا

عمر بعصبية = وش فيك انت ... اقولك خلك قوي .. تقوم تبكي ‏

رايد وهو يمش خشمه بيده = مابكيت ‏

عمر = شوي وتبكي ‏

لف رايد وجهه عني وسكت ‏

عمر بتنهيدة = وش قال ؟ ‏

رد علي رايد وهو لاف وجهه عني ‏

رايد = يقول انت صايع مابيك تاخذهم

عمر = ماعليك منه ... بكرة انا وانت نروح لحارة جدي تاخذ انت السيارة وتاخذ ‏اخواتك وروحوا للمكان اللي تبون ‏

التفت رايد بيأس ‏

رايد = بس هو عيا ‏

عمر = ماعليك منه اقول ... هن اخواتك وانت اخوهم .. انت بس كلم اختك وحددلها ‏الوقت عشان تصير جاهزة ‏

التفت رايد لي ‏

رايد = وشلون اكلمها ماراح يعطوني اياها اكلمها ‏

عمر = ماعندها جوال ؟ ‏

رايد = لا ‏

سكتت افكر .. فجأة سمعت الجامع يذن للجمعة ‏

عمر = نشوف بعدين وشلون تكلمها .. قم تروش ‏

طاعني رايد و راح يتسبح .. ماطلبت منه يروح يتروش لله .. ابي أي شي يشغله ‏عني عشان افتح البيبان الداخليه ولا يحس اني حابسه ‏

استغليت غيابه ورحت افتح الباب الداخلي للحوش ... مدام اني عنده ماله داعي اقفل ‏عليه ... اما اذا رحت للجامعة وقتها صح اقفل عليه وهو مايدري ‏

طلعت للحوش ولقيت السكينة وعكازي طايحات بالارض على وضعهم البارح ‏

اخذتهم ودخلت البيت .. تسبحت وطلعنا للجامع انا ورايد ‏

الساعة 2 الظهر ‏

جالسين بالارض انا ورايد ونتغدى وكالعادة غدا مطعم ‏

ماد رجلي بسبب الجرح ورايد جالس بالارض مقابلني وياكل بشراهه .. وكل ماحط ‏لقمة بفمه شكا من يده اليمنى ‏

رايد بعد ماحط اللقمة بفمه = يدي تعورني ‏

عمر وعيني على الصحن = احسن عشان مرة ثانية ماتفكر مثل تفكيرك امس ‏

رايد = انت دفش تضرب بقوة ‏

رفعت راسي له ‏

عمر = والله مادري من اللي امس شوي و يقطعني شرايح لحم .. المهم ماعلينا .. ‏اسمع .. وشلون الحين تكلم اختك الكبيرة تتجهز تطلعون بكرة بالسيارة ؟ ‏

رايد = يالله يالله كلمت عمي بالتلفون تبيني اكلمها هي .. مافيه الا اروح لها اليوم ‏للبيت مثل دايم واقولها تتجهز بكرة ‏

طيرت عيوني .. هه بعد جنونه امس بيدخل بيت عمه .. يحلم ‏

عمر = تحلّم بس تحلّم .. روحه لبيت عمك انسى ‏

رايد مستغرب = ليه وشلون اشوف اختي اجل ؟ ‏

عمر = وانا مقترح عليك تاخذهم بالسيارة ليه .. عشان تشوفهم بعيد عن عمك .. ‏انت بعد خبالك امس .. انسى تدخل بيت عمك مرة ثانية .. تفهم ؟ ‏

رايد = ماني مسوي شي .. بس ابشوف اختي واقولها تطلع بكرة .. ابكلمها مثل ‏العادة بالملحق وقت الظهر ... هم دايم بهالوقت يتغدون مايدرون عنا اننا بالملحق ‏

اهااا عشان كذا مايروح لاخواته الا الظهر .. عشان وقت غداهم ‏

تنهدت وسكتت شوي افكر ‏

عمر بتفكير = امممم اسمع المغرب نروح لحارة جدي .. امس دانه ماطلعت تلعب ‏بالشارع الا المغرب .. خذ ورقة واكتب لاختك الكبيرة وارسلها مع دانه ‏

ابتسم رايد بفرح ‏

رايد = صح .. فكرة ‏

ابتسمت معجب بذكائي ‏

عمر وانا نافخ صدري = طول عمري ذكي ‏

خلصنا من الغدا وجلسنا على التلفزيون نتفرج وكل واحد معه بيبسيه ‏

فجأة التفت رايد لي ‏

رايد = صح عمر .. امس الساعة 10 بالليل جا نايف و طق جرس الباب وطوّل ‏وهو يطق ‏

التفتت لرايد منصدم ‏

عمر = لا يكون فتحتله ‏

رايد = لا انا مافتحت الباب .. بس رحت فوق لغرفتك اشوف منهو وشفته نايف ‏

سكتت منقهر من نايف .. هذا الى الحين مانمسك ‏

عمر = وش يحسب نفسه هذا .. اببلغ عليه ( واخذت جوالي ) ‏

رايد بخوف = لا لا لا .. تكفى لا تبلغ ‏

التفت معصب من رايد هالخواف ‏

عمر بعصبية = ياخي وش فيك خايف منه ‏

رايد بخوف = قلتلك هددني بدانه ‏

عمر بصراخ = تراك معطيه اكبر من حجمه ... ياخبل مايقدر يسوي شي .. اصلا ‏راح ينمسك .. وش بيسوي وهو ممسوك ‏

رايد = هو قال لا تحسب اذا بلغت علي اننا انتهينا ... يمكن يرسل احد .. وبعدين هو ‏صح راح يمسكونه بس شهر شهرين و يطلع ‏

سكتت .. صح كلامه ... اذا مسكته الهيئة شهر شهرين نقول خمس شهور وياخذون ‏منه تعهد ويطلعونه ... صح ... نايف وسعد مشكلتهم ماهي كبيرة عشان ينسجنون ‏سنه سنتين ... هم بس يشترون من العامل ‏

نزلت جوالي على الطاولة الصغيرة وانا افكر بنايف وسعد ‏

نقز رايد يوم سمعنا جرس الباب فجأة .. والتفت لي بخوف ‏

رايد = اكيد هذا نايف ‏

التفتت لرايد منصدم

عمر = اذكر القط يجيك ينط .. وش جابه الحين ‏

رايد = انا ادري ‏

نزلت البيبسي اللي بيدي وقمت ‏

عمر = خلك هنا ابروح اشوف ‏

رايد = بتفتحله ؟ ‏

مارديت عليه واخذت عكازي .. راح احتاج هالعكاز اكيد و طلعت للحوش .. وش ‏يحسب نفسه هذا .. انا راح اربيه ... على باله اني مثل رايد خواف ... افتحله وافتح ‏لابوه .. ويأنا ياهو ‏

وفتحت باب الشارع معصب وكلي استعداد للهوشه والبكوس ‏

فجأة شفت وجه مصعب قدامي ‏

عمر مستغرب = مصعب ؟ ‏

ابتسم مصعب ‏

مصعب بابتسامة = السلام عليكم .. جيت اشوف ضيفك ‏

قطبت حواجبي .. ضيفي ؟ ‏

تذكرت اني علمت مصعب عن رايد .. ‏

حط مصعب يده على صدري ووخرني عن طريقه ودخل الحوش متوجه داخل ‏البيت ‏

التفتت لمصعب ‏

عمر = هيييييه انت على وين .. اظني الى الحين ماسمحتلك تدخل ‏

التفت مصعب لي وابتسم بمرح ‏

مصعب = يابن الحلال مابيننا رسميات ... وبعدين بيتك مافيه حريم .. عادي ادخل ‏على طول .. ياخي مافيها شي ‏

التفتت للباب وسكرته بقوة معصب .. مسكوها علي .. بيتك مافيه حريم بيتك مافيه ‏حريم ... اخ يالقهر صاير بيتي سبيل لكل من هب ودب .. اول نايف والحين ‏مصعب وقبلهم اغصبوني الشباب اسكن رايد عندي .. ليه .. لان بيتي مافيه حريم ‏

صدق البيت اللي مافيه حريم يصير ماله هيبه .. يصير عش للي ماله عش ‏

التفتت لمصعب ‏

عمر بعصبية = حتى ولو مافيه حريم .. مالك حق تدرعم بهالشكل ‏

ومشيت قدامه اعرج .. سمعت مصعب يكلمني وهو يمشي وراي ‏

مصعب = طيب وش فيك معصب ... ‏

دخلنا الصاله عند رايد ‏

قام رايد منصدم يوم شاف مصعب ... واخذ شوي عشان يستوعب ‏

مصعب بفرح = رايد عاش من شافك ... ( ولما شاف رايد واقف وفاهي ) وش ‏فيك ماعرفتني ؟ ‏

ضحك رايد بفرح وراح لمصعب وسلم عليه ‏

رايد = مصعب اشتقتلك والله ... ‏

مصعب = ههههههه .. وينك يارجال ( والتفت لي ) اثرك ساكن مع ولد عمي وانا ‏اخر من يعلم ‏

جلست على الكنبة وقعدت اتفرج عليهم ‏

واقفين بنص الصاله .. ‏

رايد = مصعب دايم اتمنى اشوفك واشكرك على كل اللي سويته معي ... انت ‏الوحيد اللي وقف معي لين امشي مرة ثانية على رجولي .. ‏

مصعب = يارجال ماسوينا شي ... وينك اختفيت ؟ انا سمعت ان عمك طردك ‏

نزل رايد راسه بحزن ‏

رايد = ايه ‏

عمر = بتظلون واقفين كذا ‏

التفت مصعب لي وضحك .. ‏

مصعب = ههههههههههه والله عمر اخر شي تخيلته رايد يسكن معك هههههههههه ‏

وجا وجلس بجنبي على الكنبة ‏

رفعت حواجبي وانا اطالعه .. على كل شي يضحك هذا .. الحمد الله والشكر ‏
واحد على كل شي يصيح والثاني على كل شي يضحك ‏

جا رايد وجلس على الطاولة الصغيرة قدامنا ‏

رايد = مصعب .. انا من زمان اعرف ان عمر ولد عمك ... ‏

قرب مصعب وجهه من رايد ‏

مصعب = صح تعال .. وشلونها رجولك .. خلصت جلساتك بالمستشفى ؟ ‏

وقعدوا يتبادلون الاخبار بينهم .. وانا جالس واتسمع لهم ويوم خلصوا من بعض .. ‏التفت مصعب لي ومد يده وحطها على الشاش اللي براسي ‏

مصعب = وانت ماعلمتنا امس من وش هذا ؟ ‏

نزلت يده عني بضيق ‏

عمر = لا تحشر خشمك واجد ‏

‏ شفت بطرف عيني مصعب يطالعني و ساكت وكأنه انجرح من معاملتي معه قدام ‏رايد ‏

قام رايد يوم شاف وضعنا ووجه كلامه لمصعب ‏

رايد = آآآآ .. مصعب .. ابروح اسوي شاهي.. دقايق ‏

وطلع من الصاله ‏

اخذنا شوي وانا ومصعب ساكتين... انا اطالع التلفزيون وساكت .. ومصعب الى ‏الحين يطالعني وساكت ‏

فجأة همس لي مصعب بصوت خفيف ‏

مصعب بهمس = عمر .. انت ليه معي كذا .؟ ‏

مارديت ‏

مصعب = احاول اتقرب لك بس انت تبعد ‏

مارديت ‏

مصعب = يوم عرفت انك ضفيت هاليتيم عندك ... فرحت قلت والله عمر كبير بس ‏يبي نتعرف عليه اكثر ... امس طوال الليل افكر فيك اقول لنفسي انا عارف ان ولد ‏عمي طيب بس كثرة الهوشات بينا من يوم كنا صغار بعدتنا عن بعض ‏

نزلت راسي وانا اسمعه ‏

مصعب = مشكلتنا كبرنا والى الحين الهوشات بيننا ‏

وسكت يحتريني اتكلم بس مارديت عليه ‏

مصعب = صدقني عمر لو اشوف هالشاش براس اخوي معاذ والا سعود افزعله ‏وماهي بعيدة يكون هذا اخر يوم بعمره ... ونفس الشي معاذ وسعود معي لو كنت ‏انا المتضرر .. بس انت مين يفزعلك .. ماعندك اخو عضيد لك بهالدنيا ... وفوق ‏هذا متكبر ومغرور على عيال عمك ... انا مستعد افزعلك على اللي ضربك واكون ‏سندك بس انت بعدتني عنك والى الحين تبعدني عنك ‏

همست بألم ‏

عمر بهمس = ما احتاج لاحد .. من يوم طلعت على الدنيا مالي سند .. من يوم ‏طلعت على الدنيا وانا وحيد .. من يوم كنا صغار لما نتهاوش اشوفك انت ومعاذ ‏توقفون مع بعض وانا لحالي بينكم جت على هذي ( واشرت على الجرح براسي ) ‏‏... ما احتاج لك ولا لغيرك ... واللي ضربني اقدر اخذ حقي منه .. اتطمن ما ‏احتاجك ‏

مصعب = شفت يوم اقولك متكبر .. ماتصدقني ‏

عمر = وفوق هذا اخذتوا امي الانسانة الوحيدة اللي ساكنه معي .. كأنـــ

انفعل مصعب وقاطعني بصراخ ‏

مصعب بصراخ = اللي يسمعك يقول انا اللي ماخذها ... ابوي بغى حرمة ثانية ‏وماشاف الا امك انسب وحدة له .. لا تتعذر بامك .. انت هذا اسلوبك معنا من قبل ‏مايتزوجون امك وابوي ‏

رفعت راسي اطالع التلفزيون وهمست ‏

عمر = لا تطول صوتك علي ... شف اسلوب معاذ معي ثم تعال كلمني .. ( ‏والتفتت له ) عمرك وقفت بوجه اخوك عشاني ؟ ‏

مصعب بتحدي = هذا انت قلتها اخوي ‏

طالعته منجرح بس تكمتها بصدري ( والتفتت للتلفزيون ) صح معه حق اخوه .. انا ‏وحيد واببقى طول عمري وحيد ‏

مصعب = معاذ على الاقل مايغلط على احد وماهو مغرور مثلك ‏

ابتسمت بسخرية ‏

عمر = هه صح مايغلط .. لدرجة اني ما انقلبت بسيارتي ابد ‏

مصعب = ذيك المرة كانت مزحة وماكان يقصد ... وفوق هذا انت حشرتني مع ‏معاذ واخذت مكافئتي وانا مالي ذنب ( وسكت شوي ) عمر انا ولد عمك وامد يدي ‏لك ومستعد افزعلك للي ضربك او لأي شي تبيه .. بس لا تردني ‏

عمر = ماحتاجك ‏

مصعب = عمر صف قلبك شوي ‏

مارديت ‏

مصعب بتنهيدة = ليه قلبك اسود ‏

جيت ابرد عليه بس سكتت يوم شفت رايد يدخل علينا ومعه صينية الشاهي ‏

‏* رايد * ‏

نزلت الصينية على الطاولة الصغيرة ومسكت يدي اللي عورتني من شيلة الصينية ‏والتفتت لعمر و مصعب .. سمعت صوت مصعب عالي وانا بالمطبخ بس ماميزت ‏منه شي ... والحين سكتوا يوم شافوني ... احس الجو متكهرب بينهم ‏

صبيت شاهي ومديته على عمر بس حرك يده يعني مابي ‏

ومديته على مصعب واخذها ‏

اعتدلت واقف محتار اروح عشان يكملون كلامهم والا اقعد ... انا اعرف ان عمر ‏يكره عيال عمه .. بس وش اللي بينهم وليه .. مدري ‏

طالعت عمر ولقيته منزل راسه ويلعب بالعكاز اللي راكزها على كتفه ‏

اخيرا قررت اجلس عندهم عشان مصعب بس .. من زمان عنه .. صبيت لنفسي ‏شاهي وجلست على كنبة مستقله عنهم ‏

نزل مصعب الشاهي على الطاولة الصغيرة والتفت لي بابتسامة ‏

مصعب = رايد من زمان وانت هنا ؟ ‏

هزيت راسي بلا وانا اشوف عمر الى الحين سرحان ‏

رايد = لا .. ( وطالعت مصعب ) كنت باستراحة شباب بس صارت مشكلة ‏بالاستراحة وجيت هنا مع عمر ( وابتسمت له ) مصعب انت جاي هنا صدفة والا ‏انت عارف اني هنا ؟ ‏

التفت مصعب لعمر وبعدها التفت لي ‏

مصعب = علمني امس عمر انك هنا ( وسكت شوي ) اقول رايد مين اللي فالق ‏عمر براسه ... تعرفه انت ؟ ‏

التفت عمر لمصعب ‏

عمر = ياهو انت حشري ‏

مصعب = حشري احسن من مغرور ومتكبر ( والتفت لي يحتريني اجاوب ) ‏

ابتسمت معجب بمصعب .. الصراحة احبه اكثر من عمر ‏

رايد = تهاوش مع نايف ‏

قطب مصعب حواجبه مستغرب وعدل نظارته ‏

مصعب مستغرب = مين نايف .. وليه ؟ اخاف ولد عمي هو الغلطان كعادته .. رايد ‏تعرف سبب الهوشة انت ؟ ‏

التفت عمر للتلفزيون ووجه كلامه لمصعب ‏

عمر = مالت عليك ... تقول ابفزعلك واخر شي تبي تحطني انا الغلطان ‏

التفت مصعب لعمر وهمس ‏

مصعب بهمس = انا ماقلت انك غلطان انا ابي اعرف سبب الهوشة بس ‏

عمر وعينه على التلفزيون = اكرمني بسكوتك ما ابي منك شي ‏

تدخلت بالكلام قبل يتهاوشون والصراحة ماعجبني اسلوب عمر مع مصعب ‏

رايد = آآآآ .. نايف كان يبيني وعمر يبي يدافع عني وتهاوش مع نايف وطاح على ‏الطاولة هذي ( واشرت على الطاولة الصغيرة ) .. بس ‏

مصعب = كان يبيك انت ؟ ‏

رايد = ايه ... وعمر تهاوش مع نايف يدافع عني .. بس هذي كل السالفة ‏

ابتسم مصعب والتفت باعجاب لعمر وسكت وهو يطالعه‏

بس عمر ماعبره ولا التفت له ... يطالع التلفزيون وساكت ‏

مصعب بفرح = راعي فزعات ولد عمي ( والتفت لي بمرح ) هذي العناوين عطني ‏التفاصيل ‏

ضحكت مستانس ومعجب فيه .. يمزح ويضحك احسن من عمر اللي ماعمري شفته ‏يمزح وفوق هذا دفش ‏

و قبل ارد عليه .. التفت عمر لمصعب وصارخ بوجهه ‏

عمر بصراخ = ياخي انت احد مسلطك علينا .. وش تفاصيله اللي تبي .. شفت رايد ‏خلاص توكل على الله .. وبعدين ياهدر فيه احد يجي وقت القايلة .. ابي انام ‏

تضايقت من اسلوب عمر مع مصعب ... ليه كذا ياعمر .. مصعب مايستاهل اللي ‏يطرده بس سكتت ما اقدر اتدخل .. البيت بيت عمر مااقدر اقول شي ‏

مصعب = رح فوق ونام .. ماحد منعك ( اخذ شاهيه وقام وجلس بالكنبة اللي بجنبي ‏والتفت لي ) ما عليك منه .. علمني بكل السالفة ‏

التفتت لعمر ولقيته يطالع مصعب وهو معصب .. ورجعت التفت لمصعب وعلمته ‏عن نايف بكل شي .. انه يشري خمر من عامل وكان يرسلني وووووووو الى اخر ‏شي .. يوم يطق نايف الباب علي امس وعمر ماهو موجود ‏

مصعب مستغرب = امس جاك هنا بالبيت بعد ؟ .. يعني شكله مصر اللي اسمه ‏نايف هذا ؟ ‏

رايد = ايه .. بس مادري وش يبي مني .. والله اني ماعلمت الهيئة بس هو عيا ‏يصدق ‏

التفت مصعب لعمر = نايف هذا يدرس معنا بالجامعة ؟ ‏

عمر بضيق وهو يطالع التلفزيون = خلك على جنب مالك دخل فيه ‏

مصعب = يله عاد .. معنا بالجامعة والا لا ؟ ‏

التفت عمر معصب ‏

عمر = ياهو انت نشبه ( وزفر بضيق ) ايه كان .. بس الحين مايجي عشان الهيئة ‏ماتمسكه ‏

مصعب = خلاص عطوني اسمه كامل وانا ابلغ عليه ‏

شهقت وصحت بصوت عالي ‏

رايد = لااااااااااا .. هو مهددني باختي دانه .. تكفى لا تبلغ عليه ‏

وعلمته بكل شي ‏

مصعب بعصبية = حقير .. اثره بعد يعرف اختك ‏

قعدنا فترةو انا ومصعب نسولف ونتكلم ‏

شفت عمر ينعس وهو جالس .. اخذ شوي وانسدح على الكنبة وهو متضايق ‏

عمر = افففففففف هذا ماهو ناوي يروح ... ( والتفت لمصعب ) ودي انام ياهووووو ‏‏.. توكل على الله رح ‏

قرب مصعب راسه لي وهمس

مصعب = الله يعينك عليه .. وشلون متحمله انت

ضحكت بس ماعلقت ‏

اخذنا شوي وانا ومصعب نكمل سواليف .. احيان عن نايف واحيان عن حقي اللي ‏اخذه عمي واحيان وشلون اعتمد على نفسي وارجع لاخواتي ‏

لين اذن العصر وحنا الى الحين نسولف ‏

التفتنا لعمر ولقيناه متمدد على الكنبة و نايم ‏

استغليت الفرصة وقربت لمصعب وهمست باذنه خايف من عمر يسمعني ‏

رايد بهمس = مصعب لا يكون زعلت من اسلوب عمر ... تراه هو كذا دفش ‏

تنهد مصعب وهو يطالع عمر ‏

مصعب بهمس = انا اعرف انه يعاني من الوحدة بس مشكلته مغرور ومايحب الا ‏نفسه ‏

رايد = لا بالعكس هو طيب .. ‏

مصعب = عجزت افهمه ( والتفت لي وقام ) المهم انا طالع ‏

وصلته للحوش وعطاني رقم جواله بورقه وراح .. يقول اذا احتجتني او جاكم نايف ‏اتصل علي

دخلت البيت وانا مستانس بزيارة مصعب .. ولقيت عمر الى الحين نايم ‏

المغرب ‏

طلعنا انا وعمر لحارة عمي .. وان شاء الله القى دانه تلعب بالشارع وارسل لمريم ‏رساله معها مثل خطة عمر ... مدري ليه خايف من عمي ... ماراح يسمح لها تطلع ‏معي ‏
تنهدت متضايق .. اذا تذكرت كلام عمر تشجعت بس على طول يرجع لي الخوف ‏مرة ثانية ‏

على قولت عمر اخت واخوها طالعين مع بعض فيها شي ... سترك يارب ‏

17 - 4 - 2014, 09:15 AM

* الجزء الخامس عشر *

وصلنا الحارة وفرحت لما شفت دانه تلعب مع بنت صغيرة ما اعرفها ‏

وقف عمر السيارة قدام بيت جده ونزلت ‏

رايد = دااانه ‏

التفتت لي دانه وجت تركض .. جلست لمستواها وضميتها .. والله من زمان عنها ‏

شلتها ورحت لعمر اللي جالس بالسيارة ودانه لافه رجليها على خصري وتوزع ‏قبلات على وجهي من حماسها ‏

ركبت السيارة وانا اضحك عليها ‏

رايد = ههههه دانه .. ( وحبيتها مع خدها مشتاق لها ) ‏

جلستها على حظني ودانه كل شوي تسأل وينك .. وليه ماتجي .. ومادري ايش ‏

قاطعتها ‏

رايد = وش تسوين برا ؟ ‏

دانه = العب ‏

التفتت لعمر ولقيته متركي على بابه و عاقد يديه قدام صدره و يطالعنا مبتسم ‏وساكت ‏

رايد = ابكتب لاختي الحين .. معك ورقة وقلم ؟ ‏

التفت عمر للمرتبة الخلفية واخذ من دفاتر الجامعة واخذ قلمه ومدهم علي ‏

عمر = خذ وعطني دانه ‏

اخذت الدفتر و عطيته دانه وجلسها بحظنه ‏

شقيت ورقة من الدفتر وبديت اكتب ‏

‏( مريم انا رايد .. ابجي بكرة ونطلع انا وانتي ودانه بالسيارة ونروح للمستشفى .. ‏اذكرك كنتي تعبانه .. وبعدها بنروح لاي مكان المهم نجلس مع بعض .. تجهزي ‏بكرة ابي امرك الظهر الساعة .... )‏

وقعدت افكر صح الساعة كم يجي عمر من الجامعة .. التفتت لعمر اسأله ولقيته ‏يدغدغ دانه وكل ماضحكت دانه ضحك هو ‏

رايد = عمر ... بكرة متى تطلع من الجامعة ؟ ‏

التفت لي عمر ‏

عمر = اممم الساعة 2 ‏

رايد بخيبة امل = الساعة 2 مايمدينا على المستشفى ... ‏

سكت عمر وهو يطالعني مستغرب ‏

عمر = مستشفى ؟ .. ليه وش فيها اختك بالضبط .. ‏

سكتت ومارديت ... انا بنفسي مدري وش فيها .. اذكرها اخر مرة شفتها تشتكي من ‏ظهرها وقالت ان لها موعد فايت ‏

انتبهت على صوت عمر يغير السالفة وحسيته انحرج من سؤاله ... يقول لمصعب ‏انه حشري وهو حشري مثله ‏

عمر = آآآ ... اقدر اطلع الساعة 12 .. عادي اخر محاضرة عندي مو مهمة ‏

نزلت نظري للرساله وكملت ‏

‏(تجهزي بكرة ابي امرك الظهر الساعة 12 .. ردي علي بنفس الورقة وعطيها دانه ‏‏... وانا بالشارع احتري ردك ) ‏

صفطت الورقة واخذت دانه من عمر وجلستها بحظني وقعدت افهمها ‏

رايد = دانه عطي الوقة هذي آآآآ ( والتفتت لعمر ولقيته يطالعنا .. قربت فمي من ‏اذن دانه وهمست ) عطي الورقة هذي مريم ( وابعدت عنها بس سمعت ضحكت ‏عمر والتفتت له مستغرب ) وش فيك تضحك ؟ ‏

عمر وهو ماسك ضحكته = لا ولا شي ‏

استغربت وش فيه هذا .. التفتت لدانه مطنشه ‏

رايد = لا يشوفها احد الورقة هذي .. ترا اذا شافها احد بيضربونك .. هااااه فهمتي ‏

دانه بخوف = يضربوني ( وبرطمت )‏

رايد = ايه ( وقربت وجهي لوجهها ) عطيها بس مريم ... لا احد يشوفها معك ‏

وخليتها توقف على ركبها وهي بحظني وحطيت الورقة بجيب بنطلونها البني ‏

‏ رايد = ومريم بتعطيك ورقة هاتيها لي ( وطالعت دانه شاك انها فهمت شي ) دانه ‏فهمتي علي ‏

هزت دانه راسها بايه ‏

طلعتها من السيارة وراحت تركض داخل البيت ‏

وجلسنا نحتري ... التفتت لعمر ‏

رايد = عمر ما انت داخل بيت جدك ؟

عمر = لا

وجلسنا بالسايرة ساكتين ‏

اخذت اكثر من ربع ساعة احتري على جمر ... ومتوتر ‏

‏ واخيرا طلعت لنا دانه تركض ‏

فتحنا باب السيارة لها ودخلت من عندي واخذت الورقة منها اقرا رساله مريم ‏

‏( احمد الله واشكره انك بخير والله ماانام الليل خايفة عليك
‏ ياعمري ياخوي ما اقدر اطلع معك وش يفكني من عمي اذا رجعت تعبت منهم ابي ‏اذا طلعت اطلع مرة وحدة ولا ارجع ) ‏

بغيت ابكي من رسالتها ... عصرت الورقة بيدي منقهر ‏

ودي اطلعها واريحها منهم الحين بس كيييييف ‏

انتبهت على صوت عمر ‏

عمر = وش فيك ؟ ‏

التقتت لعمر ودانه بحظنه وانا اجاهد دمعتي .. ‏

رايد بحزن = تقول خايفة من عمي اذا رجعت ‏

عمر = مسوين جريمة انتم ؟ ياخي ذكرها انك اخوها شفها يمكن ناسية ‏

نزلت نظري للورقة ومارديت على استهزاء عمر ‏

عمر = اكتب لها وفهمها انك اتصلت على عمك امس وعطيته خبر وبعدين هي ‏طالعه معك ماهو مع غريب ‏

صح نسيت اقولها اني اتصلت على عمي ‏

شقيت ورقة ثانية من دفتر عمر وبديت اكتب ‏

‏( مريم انا امس اتصلت على عمي وقلت له اني ابي اخذك .. وبعدين انتي بتطلعين ‏معي .. ( وتذكرت كلمة عمر وكتبت نفس الكلام لها ) اخت طالعة مع اخوها فيها ‏شي .. ماعليكي منه .. اتحداه يسوي شي وهو عنده خبر اني ابمرك بكرة .. تجهزي ‏بس بكرة ابي امرك الظهر الساعة 12 ) ‏

وعطيت الورقة دانه وراحت تركض داخل البيت ‏

عشر دقايق وجت دانه واخذت الورقة منها اقرا رد مريم ‏

‏( صح كلامك بس والله خايفة ‏
طيب الشكوى لله عشانك بس ابطلع و ابي اخذ اخبارك ياخوي ‏
بس رايد ابيك تآجل الطلعة انا عندي موعد بعد يومين وعمي ماهو فاضي يوديني ‏
خل الطلعة بعد يومين ) ‏

‏ التفت لعمر ولقيته منحني على دانه ويحبحبها ‏

رايد = عمر خلاص بعد يومين بنطلع .. اختي عندها موعد بعد يومين ‏

رفع عمر راسه من دانة والتفت لي ‏

عمر = طيب اطلعوا بكرة وتمشوا وبعد يومين اطلعوا روحوا للمستشفى ( وحط يده ‏علي يدي ) اكسر الخوف اللي بقلبك وقلب اخواتك ... اطلعوا وخلوا عمكم يفهم انكم ‏مانتوا خايفين منه ... قو قلبك ياشيخ ‏

طالعت عمر افكر بكلامه ‏

اكسر الخوف .. صح ماعلينا من عمي .. ماحنا ماخذين منه شي .. السايرة سيارة ‏عمر وماعلينا من احد ‏

نزلت نظري و شقيت ورقة من دفتر عمر وكتبت ‏

‏( طيب بكرة نطلع نتمشى ونشوف بعض .. وبعد يومين نطلع للمستشفى .. من ‏زمان عنك وعن دانه .. من زمان ماجلسنا مع بعض ... لا تخلين عمي يسيطر علينا ‏‏... يكفي اللي اخذه منا ... خلينا نطلع بكرة العصر ونتمشى و بعد يومين نطلع ‏لموعدك الظهر ... تكفين اطلعي معي انا بعد ابي اخذ اخبارك .. بالملحق ماناخذ ‏راحتنا ) ‏

وارسلت الورقة مع دانه اللي بدت تطفش من كثر مانرسلها ‏

شوي وجت دانه ورمت علي الورقة بزعل وهي بحظني ‏

دانه = حلاث تعبت ‏

مارديت عليها واخذت الورقة اقرا

‏ اما عمر ضحك منها واخذها من حظني وطلع من السيارة وهو شايلها ووجه كلامه ‏لي ‏

عمر = اباخذها للدكان ( و اخذ عكازه و سكر باب السواق وراح ) ‏

و بديت اقرا كلام مريم ‏

‏( معك حق كلامك شجعني ياخوي خلاص اتحمل كل شي المهم اجلس معك واخذ ‏اخبارك ) ‏

عصرت الورقة بيدي وماقدرت امنع دموعي .. وش تقصد بكلامها ( اتحمل كل ‏شي) ‏

‏ مريم خوفها بمحله .. انا بعد خايف ‏
مريم اذا رجعت لبيت عمي اكيد بيهاوشها وماهو بعيدة يضربها ‏
خايف .. و اذا تذكرت كلام عمر تشجعت ‏

مسحت دموعي بسرعة يوم ركب عمر ودانه السيارة ‏

عمر = هاه بشر ؟ ‏

جت دانه وركبت بحظني فرحانه توريني الكيس اللي معها ‏

دانه = لايد شووف ( ورفعت الكيس بوجهي فرحانه ) ‏

هزيت براسي لها بايه وانا متضايق ‏

رايد بحزن = خلاص العصر بنطلع ‏

عمر = يعني خلاص نمشي ؟ ‏

هزيت راسي بايه ‏

عمر = وبكرة العصر نجي هنا تاخذ انت اخواتك وانا ابقعد عند جدي لين ترجع ‏السيارة ‏

هزيت راسي بايه وانا ساكت ‏

وبصعوبة تهربنا من دانه و طلعنا من الحارة.. دانة عيت تنزل من السيارة وبكت ‏يوم عرفت اني ابروح ‏

رجعنا البيت وانا متحمس للطلعة مع اخواتي .. حتى النوم طار عني ‏

السبت ‏

بعد صلاة العصر مباشرة

واقف فوق راس عمر اللي نايم بالصالة على الكنبة ‏

زفرت بضيق وطفش ... عمر نايم على جنبه ومغطي وجهه على ظهر الكنبة ‏كعادته ‏

من يوم جا من الجامعة تغدا و نام وطفشت من كثر ما اصيح عليه اقومه ‏

قومته قبل الصلاة وماقام .. رحت اصلي ورجعت وهو الى الحين نايم .. نومه ثقيل ‏وانا تأخرت على مريم ‏

مشكلته لزم علي ماروح لحارة عمي لحالي .. واذا سألته ليه .. يقول مزاج .. يقهر ‏عمر احيان ... احسه يتحكم فيني ... والمشكلة ما اقدر اقوله لا ... لاني ببساطة ‏محتاجه ... ‏

مليت صدري هواء وصارخت باعلى صوتي ‏

رايد بصراخ = عومااااااااااااااااااااار ‏

تحرك عمر بكسل وانقلب على ظهره وناظرني بعيون نعسانة ‏

عمر بكسل = اففففف احد مسلطك علي ... ياخي رح المطبخ هذا هو من هنا ( ‏ورجع ينقلب على جنبه ) خلني انام ‏

مديت يديني الثنتين وقلبته على ظهره وانا معصب ومستعجل ‏

رايد = احد قالك ابي المطبخ قم بسرعة .. الناس صلوا وانت الى الحين نايم ... قم ‏تأخرت ابي ارووووووح ‏

و اخذت ثوبه استعجله ‏

رايد = يله البس ثوبك ( بس لقيته نايم على ظهره .. صارخت معصب ) ‏بسررررعة عوماااااااااااااااار ‏

اخيرا جلس بكسل ‏

رميت عليه ثوبه بس عمر وخره عنه وقام وطلع من الصاله ‏

رايد بزعل = بسرعة عمر تأخرت ؟ ‏

عمر بصوت نعسان = ابروح اصلي .. شغل السيارة انت لين اجي ‏

رحت لثوب عمر واخذت المفتاح من جيبه ورحت للشارع .. شغلت السيارة ‏ورجعت للصاله احتري عمر ‏

دخل عمر الصاله ولبس ثوبه ‏

وقفت .. وقلت استعجله ‏

رايد = يله عمر تأخرت .. يمديهم يحتروني اخواتي ‏

التفت لي وعمر وطلع بوكه من جيبه .. وطلع منها خمس مية ومدها علي ‏

طالعت الخمس مية مستغرب وبعدها رفعت نظري لعمر ‏

رايد = وش هذا ؟ ‏

عمر بابتسامة = عشان دانه .. رح تمشى فيهم واشتر لكم اللي تبون ‏

شهقت مستغرب ونزلت راسي منحرج ‏

رايد = لا مشكور .. اهم شي السيارة ‏

تقدم عمر لي وهو يعرج ودخل الخمس مية بجيبي الامامي ‏

عمر = يابن الحلال قلت عشان دانه مب لك ‏

سكتت مدري وش اقول .. ومن احراجي وفرحتي باول خمسمية بحياتي ضميته ‏ولفيت يديني حولين خصره وغطيت وجهي بصدره .. الصراحة جت بوقتها ‏محتاجها .. انا على ثوبي من يوم طلعت من بيت عمي وصار اكثره متمزق من كثر ‏الغسل واللبس .. ‏

سمعت عمر يضحك وحط يده يمسح على راسي ‏

عمر = هههههه يله مشينا ( وابعدني عنه ) ولا تنسى شماغك ‏

واخذ عكازه و طلع من الصاله .. تبعته وانا ارد عليه ‏

رايد = اصلا من قبل مانويت اخذ الشماغ ‏

واخيرا طلعنا .. وصلنا الحارة ووقفنا السيارة بجنب بيت جد عمر وقعدنا نحتري ‏مريم و دانه ‏

التفتت لعمر ‏

رايد = عمر كم رقم تلفون بيتك ؟ ‏

التفت عمر لي مستغرب ‏

عمر مستغرب = تلفون بيتي ؟ ليه ؟ ‏

رايد = انا ماعندي جوال .. ابي اعطي اختي الكبيرة الرقم ‏

طير عمر عيونه فيني ‏

عمر = تبي تعطي اختك رقم بيتي تتصل عليه ؟ ‏

رايد = وش اسوي ماعندي حل الا كذا .. ابي اعطيها الرقم تتصل علي اذا ‏احتاجتني ‏

سكتت شوي ‏

عمر = اهاا طيب .. ‏

طلعت له الورقة الوحيدة اللي بجيبي اللي فيها رقم مصعب .. ومديت الورقة على ‏عمر ‏

رايد = اكتب الرقم هنا ‏

اخذ عمر الورقة وشاف رقم الجوال ‏

عمر مستغرب = مين رقمه هذا ؟ ‏

التفتت له مستغرب .. معقول مايعرف رقم ولد عمه ‏

رايد مستغرب = ماتعرفه ؟ ‏

حرك عمر يده يعني مدري وهو يحاول يتذكر ‏

عمر = ما احفظ ارقام الجوالات .. من رقمه ؟ ‏

رايد = رقم مصعب ‏

مارد علي و رسم عمر خط تحته وبعدها كتب رقم بيته ‏

و فرحت لما شفت دانه طلعت وقعدت تتلفت .. طلعت راسي من الدريشة وناديتها ‏

رايد = داااااااااااااااااااااانه ‏

جت تركض لنا وشفت مريم تطلع من البيت وعليها عبايتها وواضح من مشيتها ورا ‏دانه انها مرتبكه وواضح انها لابسه عبايتها بسرعة .. العباية مايلة ... طرف اطول ‏من طرف ‏

نزل عمر على طول واخذ عكازه ووقف عند باب جده مبتعد عنا .. نزلت انا ‏واخذت مكان عمر بمكان السواق ‏

ركبت دانه ومريم وسكروا الباب وعلى طول التفتت لي مريم و مسكت يدي ومن ‏صوتها واضح انها خايفه وانفاسها سريعه .. كانها من اليوم تركض ‏

مريم = راااايد .. وشلونك ياخوي .. والله قلبي ياكلني عليك .. مدري وين تنام ووين ‏تاكل ووش تسوي ‏

رايد = انا بخير ... الحين انا ساكن مع واحد من الشباب وخليت الاستراحة ( ‏والتفتت لعمر و لقيته الى الحين واقف عند باب جده ويطالعنا ورجعت التفت لمريم ‏‏) مريم اذكرك تعبانة .. وشلونك الحين ؟ ‏

سندت مريم ظهرها على المرتبه وتنهدت تنهيدة من قلب ‏

مريم = آآآآه ... بصعوبة طلعت من البيت .. اخذت مكنسة و طلعت للحوش يعنني ‏ابكنس ( وحطت يدها على صدرها ) اووووه والله خايفة وشلون ابرجع .. ( ‏والتفتت لي
‏) بسرعة امش .. ( والتفتت باضطراب مرة ثانية لبيت عمي ) ياربي وشلون ارجع ‏خاااااااااايفة .. مخليني خدامه عندهم ... على الاقل الخدامه تاخذ راتب ... انا اشتغل ‏على الفاضي .. تعبت والله منهم يارايد ... ابي اطلع من عندهم ‏

سكتت منقهر وحركت السيارة بصمت ... وشفت عمر يدخل بيت جده اول ماشافني ‏حركت السيارة ... مافهمت تصرفه ... ليه مادخل بيته الا لما تأكد اني حركت .. و ‏نفس الشي يوم لزم علي ماروح لبيت عمي الا وهو معي .. معقول عشان تهديدي ‏لعمي يوم اخذ السكينة ذيك الليلة .. طيب هو وش عليه .. حاجة بيني وبين عمي ‏بالعكس بيرتاح مني ... عجزت افهمه عمر .. ‏

اخذت الطريق العام وسألت مريم ‏

رايد = مريم حاولتي تاخذين كرت العايلة من عمي ؟ .. تكفين محتاجه مررررة ابي ‏الكرت ‏

سكتت شوي احتريها ترد بس ماجاني الا صوتها وهي تبكي ... التفتت لها بس ما ‏اشوف منها شي متغطيه .. رجعت اطالع قدام .. خلاص فهمت ‏

زفرت بضيق ياربي وش اسوي مع هالعم ... اكل حلالنا ومانعنا من اثباتاتنا عشان ‏هالراتب اللي ياخذه ‏

انتبهت على صوت مريم وهي تبكي ‏

مريم = ادري انك ماراح تلقى وظيفة ولا شي بدون كرت العايلة ... انا عندهم ‏اغسل واكنس واطبخ واي خطأ يحطونه على راسي ... وبنات عمك دلوعات من ‏يوم ماجيت عندهم شالوا يدهن من الشغل ... قبل كنت اراددهم واطلب حقي الحين ‏احس تبلدت .. حتى دانه اهملتها ... قبل اذا سمعتها تبكي من شهد والا بندر اقوم ‏ادافع عنها ... الحين اشوفها تبكي .. تجوع .. تموت .. ما اتحرك ... انت املي يارايد ‏تكفى دبر عمرك .. سو أي شي ... رح لخوالي تكفى ( وبكت ) ‏

طلعت دموعي وانا اسوق .. منقهر .. احس صدري يغلي .. رديت عليها ‏

رايد بصوت باكي = خوالي مثل عمي .. لا تغترين فيهم ... انتي تذكرين عمي ‏ماكان كذا معنا ... وبعد امي وابوي تغير علينا ... خوالي نفس الشي ‏

ورفعت يدي امسح دموعي عشان اشوف الطريق ‏

مريم = انت تقدر تروح لهم لحالك .. يمكن يدبرونك ويلقون لك وظيفة بالرياض ... ‏انا ودانه خلاص محكوم علينا بالاعدام ... عمي هو ولينا حتى لو بغينا نروح ‏لخوالي .. الشرع والقانون مع عمي .. تكفى رايد رح لخوالي .. انت الوحيد اللي ‏تقدر تطلعني من هنا ‏

رايد بصراخ منقهر = مااااابي اروح لاحد منهم ... مانبيهم ... عمي وخوالي واحد ‏‏... ( واخذت نفس احاول اهدي نفسي ) ابحاول ادور وظيفة يمكن احد يوظفني ‏بدون اثبات ( وبكيت يائس عارف ما احد بيوظف شخص بدون اثبات ) ‏

بكت مريم من ردي ‏

فجأة سمعت دانه اللي جالسه بين المرتبتين ‏

دانه = ليه تبكون ( وبرطمت ) ‏

ماحد رد عليها .. كل واحد يفكر بهمه ‏

مر عشر دقايق وحنا ساكتين ‏

وقفت السيارة عند مواقف حديقة عامة و فاضية ‏

نزلنا وجلسنا على العشب ودانه راحت تلعب ‏

مريم = رايد من سيارته هذي ؟ ‏

رايد = سيارة خويي اللي انا ساكن معه ‏

مريم = له سيارة ؟ .. اجل اكيد هو اكبر منك ؟ ‏

رايد = ايه .. يدرس بالجامعة اظن بثاني جامعة ‏

شهقت مريم و حطت يدها على يدي خايفة ‏

مريم بخوف = لا يضيعونك الشباب ... ابعد عن الحرام .( والتفتت للسيارة اللي ‏واقفة قدامنا وبعدها التفتت لي ) بثاني جامعة هذا اكبر حتى مني ... وش يجلسك ‏معه ... وبعدين تعال .. وشلون تقول ساكن معه ... ماله اهل هذا ساكنين معه بالبيت ‏؟ ‏

رايد = لا ماله اهل ‏

ابعدت مريم يدها عني وحسيت انها تفاجأت .. ماشوف تعابير وجهها من الغطا ‏

مريم مستغربه = كيف ماله اهل ... رايد مافيه احد ماله اهل .. اكيد هو ضاحك ‏عليك ... وماهي بعيدة يصير بيته فيه بلاوي .. والله اني خايفة عليك ( وصارخت ‏منفعله ) اطلع من بيته اكيد فيه شي ‏

رايد = مريم وش فيك اكلتيني بقشوري ‏

مريم بخوف = اطلع من بيته ... يكذب عليك مافيه احد ماله اهل ‏

رايد = له ام ومتزوجه وابوه متوفي من يوم هو صغير وماله اخوان ولا اخوات ... ‏وجده يكون جار عمي ‏

سكتت مريم شوي وبعدها ‏

مريم = ولو انتبه منه ‏

طنشت كلامها وطلعت الورقة اللي فيها الارقام من جيبي ‏

رايد = المهم .. خوذي الرقم هذا احفظيه ‏

اخذت مريم الورقة مني ورفعت راسها لي وقالت بفرح ‏

مريم بفرح = هذا جوالك ؟ ‏

رفعت حواجبي ... ابيها تشوف رقم البيت .. راح بالها لرقم جوال مصعب ‏

رايد = لااا .. ماعندي جوال .. احفظي الرقم هذا ( واشرت لها على رقم بيت عمر ‏‏) ‏

مريم = هذا رقم بيت .. من بيته هذا ؟ ‏

رايد = رقم البيت اللي ساكن فيه .. شوفي اذا بغيتيني لا تتصلين عليه لين ارد .. لا ‏‏.. عطيني رنة رنتين واعرف انه انتي وعاد من بكرة خلي دانه تطلع المغرب .. ‏واكون انا موجود ونتراسل بالاوراق مثل اليوم ‏

سكتت مريم تفكر ‏

مريم = بس ما اقدر اخذ التلفون الا اذا ناموا ... يعني من الساعة 2 الى الفجر اقدر ‏اتصل عليك .. غيره ما اقدر ... تعرف انت مرة عمي قشرا معي .. التلفزيون يالله ‏يالله اشوفه .. اذا شافتني جالسة تحاول تطلع شغل غصب .. حتى لو مافيه شغل ‏تروح ترسلني وتطلع شغل ‏

رايد بقهر = طلعت روحها ‏

مريم = آمين ‏

رايد = طيب عادي اتصلي باخر الليل .. اصلا انا 24 ساعة فاضي .. بعض ‏الاحيان اسهر ماعندي شي .. بس مثل ماقلت عطيني رنة رنتين وسكري .. عشان ‏اعرف انه انتي وبكرة مثل ماقلت تلقيني المغرب عندكم بالحارة طلعي دانه لي ‏

تنهدت مريم بحزن = ان شاء الله ( وسكتت شوي ) طيب ما اقدر اكلمك ؟

رايد = لا .. هذا بيت خويي .. مابيك تكلمين فيه اخاف اصير ماني موجود ويرد ‏عليك هو ‏

سمعت ضحكة صغيرة من مريم ‏

رايد مستغرب = ليش تضحكين ؟ ‏

ضحكت اكثر يوم سألتها ‏

مريم = ههههههههههه والله وكبرت يارايد وتعرف تغااار هههههه ‏

لفيت وجهي عنها اشوف دانه وسكتت ماعندي رد .. ليه مب شايفين رجال ‏

صح على طاري دانه .. التفتت لمريم ‏

رايد = مريم حاولي تخلين دانه ماتطلع للشارع ‏

مريم = الحمد الله والشكر مو انت تقول قبل شوي خليها تطلع للشارع المغرب ‏

رفعت حواجبي مستغرب من مريم .. وش فيها اختي ماكانت بهالغباء هذا ‏

رايد مستغرب = خليها تطلع للشارع بعد ماتتصلين علي .. يعني اليوم اللي اتصلتي ‏علي فيه .. من بكرة تخلينها تطلع ... اما اليوم اللي ماتتصلين علي لا تخلينها تطلع ‏‏.. فهمتي ؟ ‏

مريم = لا بالعكس الشارع احسن لها من بيت عمي ... ‏

طيرت عيوني فيها وسكتت ‏

مريم = حتى انت اشوفك مرتاح وانت بالشارع ... آآآآه ياليتيني اقدر اطلع مثلكم ... ‏صح قلبي ياكلني عليكم ... بس احسن لكم والله ... ابي اطير مثلكم ( ورفعت يديها ‏مثل الطير ونزلتهم على طول ) لا لا .. ودي اصير مثل القطاوة اللي بالشارع ‏هههههه ‏

فتحت فمي منصدم من اسلوب مريم في الكلام ‏

نزلت راسي ... وانا منقهر .. وش فيها مريم ... ما كانت كذا .. احسها صارت ‏مهبولة .. ( تنهدت بحزن ) اذكرها كانت تسرح واجد قبل يطردني عمي والحين ‏اسلوبها ماهو عاجبني .. اقولها لا تخلين دانه تطلع تقول الشارع احسن لها .. فيه ‏بنت تقول كذا .. ووش قالت .. قالت تبي تصير قطو ... هذا تمني بالله .. ماكانت كذا ‏مريم .. كانت تذاكر لنا وتحل واجباتنا وامي وابوي يشاورنها بامور كثيرة ... الحين ‏الكلام اعيده ويالله تفهم .. ونص كلامها احسه غبي ‏

اخذنا شوي و ركبنا السيارة ورحنا ناكل أي شي بالخمسمية اللي عطانياها عمر ... ‏ابتسمت لما تذكرته .. والله هالعمر يلعب فيني على كيفه احيان اقول مافي بقلبه ‏رحمه .. عدة مرات يضربني ويرسلني ويتطنز علي ويتحكم فيني واحيان يواسيني ‏ويعلمني ويدافع عني ‏

المهم خلنا نروح نستمتع شوي .. اذكر يوم كنت عند عمي كنت اجوع ويمر علي ‏اليوم واليومين مااكلت شي .. واخواتي الى الحين عنده يعني اكيد اخواتي جوعانات ‏‏.. شريت لنا اكل دسم وكثير عشانهن .. ابيه يبقى ببطوننا مدة طويله لاننا اكيد ‏بنرجع على الجوع وعلى الايام الصعبة ‏

شرينا و رجعنا للحديقة على اذان المغرب ... وقررنا انا ومريم مانرجع للبيت الا ‏الساعة 10 او 11 بالليل ... خربانه خربانه .. نبي نستانس ونسولف ونتمشى ‏ولاحقين على عمي اللي بيفرقنا ‏

جالسين على العشب وكل واحد معه صحنه الا دانه صحنين ‏
انا ومريم نسولف وناكل ودانه مطنشتنا وتاكل بشفاحة ‏

رفعت راسي لمريم وحنا ناكل ‏

رايد = مريم خوالي يتصلون عليك ؟

مريم = ايه خالي عبد الرحمن يتصل بس ماكلمه براحتي النسرة عندي .. تصدق ‏مرة شكيت له والكلبة قرصتني وانا اكلم وقعدت تشر لي وانا اكلم يعني ياويلك .. ‏وصار صدق ياويلي .. يوم جا عمي علمته قالت اني اسب عمي عند خالي وتعرف ‏عاد انت عمي ماقصر ‏

رايد = قصر الله عمره ‏

مريم = آميييييييييين ‏

رايد = وبناتها الكلبات يضايقنك بشي ‏

مريم = نوف حليلة .. وبدور مادري وشلون اممممم يعني لا تهش ولا تنش . ‏مطنشة الكل .. بس كلهن يسمعن كلام امهن بكل شي .. وامهم مدلعتهن تصدق ‏مايسون شي ابد معي ... كل شي انا اللي اسويه .. لا واللي يقهر احيان اسمع عمتي ‏يوم تكلم بالتلفون مااسمع الا هالمدح ببناتها ... كذب عيني عينك .. وهن اظن حتى ‏شاهي مايعرفن يسونه ‏

سكتت شوي وقربت اللقمة بفمي .. وقبل اكل تذكرت شي ورفعت راسي مرة ثانية ‏لمريم ‏

رايد = صح على طاري الشاهي ( وابتسمت ) وشلون تطبخون الرز ؟ ‏

ماشوف وجه مريم بسبب الغطا ... بس طلعت يدها من تحت الغطوة بعد ماكلت ‏لقمتها ‏

مريم مستغربة = الرز ... ليه تسأل ؟

رايد = ببيت خويي مافيه احد يطبخ الا انا ... خويي يكون بالجامعة الصباح ومافيه ‏الا انا ... وكل ماسويت الرز يطلع مب زين ‏

و قعدت مريم تشرح لي وانا اسأل .. ليه تقريبا فهمت ‏

رايد وانا اهز راسي = طيب بكرة اطبق واشوف ‏

بس المشكلة نص اللي قالته مريم مب متوفر عندنا بالمطبخ او يمكن انا ماعرفه ‏وشو بالضبط ‏

17 - 4 - 2014, 09:16 AM

بعد صلاة العشا ‏

طلعنا انا واخواتي من الحديقة ورحنا نتمشى على السيارة بالشوارع ونتذكر ايام ‏اول وبدت مريم شوي شوي تنسى خوفها من عمي وصرنا نتمشى و نعلق ونسولف ‏ونضحك ونعدد الفروق بين الرياض مسقط راسنا وبريدة مكان عذابنا ‏

فجأة طلبت مني مريم وحنا نتمشى بالسيارة ‏

مريم = ورني بيت خويك اللي انت ساكن معه ‏

التفتت لمريم مستغرب ‏

رايد = ليه ؟ ‏

مريم = بس ابي اشوفه .. مدري ليه احس بيت خويك فيه بلاوي ... ماني متطمنه

رايد = ويعني اذا شفتي البيت من برا بتعرفين هو فيه بلاوي والا لا ؟ ( وسكتت ‏شوي وكملت بصدمه ) لا يكون بتدخلينه ؟ ‏

مريم = لا مب داخلته .. بس ابي اشوفه ... ودنا له ‏

لفيت بالسيارة متوجه لبيت عمر وكملت مريم كلامها ‏

مريم = ماهو داخل مزاجي ... وشلون واحد اكبر مني ومنك يدخلك بيته وفوق هذا ‏مايعرفك ( والتفتت لي ) ياخذ منك فلوس ؟ ‏

رايد = من وين لي ؟ ‏

مريم بتفكير = عمرك لاحظت شي ببيته ‏

رديت عليها متضايق ‏

رايد = اوووووه مريم وش فيك .. مافيه شي ببيته .. وش بيصير يعني فيه .. ‏وبعدين شكلك مانتبهتي من وين جبت الفلوس اللي تعشينا فيها ؟ ‏

مريم = ماهي فلوسك هذي ؟ ‏

رايد = لا ماهي فلوسي .. من وين لي انا اصلا .. لا اشتغل ولا شي واثباتي عند ‏عمك .. الفلوس هذي من عمر ‏

مريم = مين عمر .. هو خويك هذا اللي ساكن معه ؟ ‏

رايد = ايه ‏

مريم = اسمه عمر ؟

رايد = ايه .. ‏

مريم = ولو .. انتبه منه ... انت اخوي الصغير والله خايفة عليك ولولا ضروفنا كان ‏ماخليتك تسكن عند واحد مانعرفه .. ( وسكتت شوي ) وفوق هذا توك عمرك 15 ‏ينضحك عليك بسرعة ‏

التفتت لمريم معصب ‏

رايد = اوووووووه وش فيك علي انتي اليوم .. وين تبيني اروح .. بالشارع ‏

مريم = عند خوالك مو عند واحد مانعرفه ‏

رايد = خوالك مثل عمك ... كم مرة اقولك ماني رايح وبعدين تعالي عمري 16 مو ‏‏15 ‏

سكتت مريم وسكتت ... بس الصراحة خلتني اشكك ... عمر مقفل وحدة من الغرف ‏اللي فوق ... من يوم جيت عنده والغرفة مقفله ‏

وش الغرفة ذيك ؟ وانا الصراحة ماعمري سألته عنها .. بيته ومايحق لي اتكلم ... لا ‏يكون مريم معها حق وفيها شي هالغرفة ‏

وصلنا بيت عمر ووقفنا السيارة قدام بابه والتفتت لمريم ‏

رايد = هذا هو البيت ... هه ارتحتي ‏

كشفت مريم غطا نقابها وقعدت تطالع البيت وتطالع الحارة والبيوت بشكل عام .. ‏كأنها تتفحص المكان ‏

مريم = اممممم تخيلته بيصير بعيد عن بيوت الحارة ‏

رايد = انتي شكاكة .. البيوت كلها متلاصقة ‏

مريم بتنهيدة = يابعد المسافة عن بيت عمي يارايد .. انت ساكن ببيت وحنا ساكنين ‏ببيت ... ما اقول الا حسبي الله على عمي ‏

تنهدت وسكتت ورجعت بالسيارة وسألت مريم محتار ‏

رايد = وين نروح الحين ؟ ‏

مريم = كم الساعة ؟ ‏

ناظرت ساعة السيارة ‏

رايد = 10 ‏

شهقت مريم بخوف ‏

مريم = ياويلي الساعة عشرة وانا مارجعت ‏

رديت عليها وانا خايف من عمي .. خايف عليها منه .. ‏

رايد = ماسويتي شي غلط .. انا وانتي مع بعض .. ( وزفرت بضيق ) ليه احس ‏كأننا مسوين جريمة ‏

مريم وهي شوي وتبكي من الخوف ‏

مريم = العصر ماكان موجود هو ... الحين اذا رجع للبيت وعلموه اني ماني ‏موجودة بيقلب البيت علي .. ( وكملت وهي تضرب خدها ) ياويلي ياويلي .. ‏رجعني رايد تكفى خلاص ... عجزت ارتاح ‏

حتى انا عجزت ارتاح ... من العصر وحنا على اعصابنا مدري ليه .. حاولنا نكون ‏طبيعين ونحط نفسنا انه ماعلينا من احد بس عجزنا نرتاح ‏

عدت كلام عمر احاول اطمن نفسي واطمن مريم ‏

رايد = اخت واخوها فيها شي ؟ ‏

مريم = مافيها شي .. بس عند عمي فيها مليون شي ... ياليتني ماطلعت ... وش ‏بيفكني منه ‏

التفتت لمريم يوم تذكرت ‏

رايد = انا اتصلت عليه وقلتله اني اباخذك على السيارة ؟

مريم = ايه علمتني نوف .. بس عمي عيا ... عمي مب راضي اني اطلع ‏

سكتت .. ايه هو عيا بس مو من حقه يعيي ... الى متى بيتحكم فينا ‏

كملت مريم كلامها ‏

مريم = اصلا هم يبون يدفنوني بالحيا كل شي عندهم لا لا لا ... اطبخ واكنس ‏واغسل واذا فتحت فمي ياويلي ... عمي ماهمه الا راتب ابوي وعمتي ماترتاح الا ‏اذا شافتني اشتغل ... كل واحد له طاقة .. انا مليت والله مليت ابي اطلع ابي استانس ‏ابي ارجع مثل قبل ( وبكت ) ‏

اخذت طريق الرجوع لبيت عمي وانا افكر وش بيصير بعد شوي ‏

وكل ماقربنا زادت مريم خوف وتوتر ووترتني معها ‏

وصلنا الحارة ووقفت السيارة قدام بيت جد عمر و التفتت لمريم مرتبك .. الحارة ‏فاضية الا من كم طفلين يلعبون بعيد عنا شوي ‏

التفتت لمريم متوتر وتكلمت بدون عقل من الخوف ‏

رايد = مريم .. طرت علي فكرة ... ووو ... وش رايك نروح للرياض عند خوالي ‏الحين ... ‏

رفعت مريم يدها كأنها تدعي وهي مرتبكه ‏

مريم = ياااااااااااااااااااالييييييييييييت .. بس ما اقدر عمي بياخذني من شوشتي ‏ويرجعنا عنده ... ارجع بكرامتي احسن ( وفركت يديها من الخوف ) رايد انزل ‏معي خايفة ‏

التفتت لبيت عمي اطالعه بخوف ‏

رايد = اكيد ابنزل ( والتفتت للمرتبة الخلفية اطالع دانه وشفتها نايمة ) دانه نايمة ‏

ماردت علي مريم ومتردده تنزل من الخوف ‏

رايد = خلينا نروح لخوالي الحين ... ماتطلع الشمس والا وحنا عندهم ‏

مريم بصوت باكي = ودي اروح لخوالي .. بس عمي ماراح يخليني بحالي انا ودانه ‏الشرع والقانون معه مو مع خوالي ... ( والتفتت لي وحطت يدها الباردة على يدي ) ‏رايد انت تقدر تروح لخوالي .. عمي مايقدر يفتح فمه عليك ... اما انا ودانه لا ... ‏تكفى رح يمكن تتوظف ‏

سحبت يدي من يدها ‏

رايد = مابي اروح لحالي .. كم مرة اقولك خوالي مب رايح لهم لحالي ... تروحون ‏معي انتي ودانه ايه .. اما انا بديرة وانتم بديرة لا ... ( وسكتت شوي ) اصلا خوالي ‏مثل عمي ‏

سكتت احس تفكيري مشتت مابي اروح لخوالي وبنفس الوقت ابي اروح عشان ‏اخواتي ‏

انا ماني محتاجلهم وماني واثق فيهم ‏

مدت مريم يدها وفتحت الباب بتوتر ‏

مريم = خلنا ننزل ... يارب عمي نايم الحين ‏

نزلت مريم ووقفت تحتريني انزل ‏

نزلت وفتحت الباب الخلفي ودخلت راسي وحبيت دانه وقعدت اقومها من النوم لين ‏قامت وطلعتها من السيارة وهي تفرك عيونها من النعاس ‏

مشينا لبيت عمي والخوف مسيطر علي وعلى مريم ‏

مريم خايفة من عمي وانا خايف عليها من عمي ... انا اقدر احط رجلي واهج اذا بغا ‏يضربني بس المشكلة مريم وشلون ‏

ضربت مريم الباب بيد ترجف وهي تسمي وتتعوذ وتدعي ‏

وانا واقف وراها احتري وماسك يد دانه ‏

اخذنا خمس دقايق مااحد فتح .. كلمت لمريم بفرح ‏

رايد = شكلهم مايبونا ... خلاص خلينا نروح لخوالي بالرياض يمكن هم ارحم من ‏عمي ‏

ماامداني اخلص من كلامي والا الباب ينفتح ويطلع لنا عمي معصب والشرار يطلع ‏من عيونه وشهقت لما شفت الخيزرانه بيده ‏

التفت عمي لمريم ‏

عمي معصب وبصراخ = جيتي يالكلبة ... تطلعين بدون علمي ‏

ورفع الخيزرانه وضربها بالشارع ‏

ابتعدت مريم عن خيزرانته وهي تبكي بصوت مسموع وجت وراي تحتمي فيني ‏

تدخلت احاول ادافع ‏

رايد بخوف = هي طلعت معي ... ماطلعت مع واحد غريب والله العظيم ‏

التفت عمي لي وصارخ بوجهي ‏

عمي = انا ماني قايل لك بالتلفون ماتطلع معك يالصايع ( ورفع الخيزارنة وضربني ‏فيها بقوة ) ‏

حطيت يدي على ذراعي بمكان لسعة الخيزرانة ‏

بكت دانه بخوف تحتري دورها ‏

صارخت على عمي منقهر ‏

رايد = انا ماني صايع ... ندخل ونطلع على كيفنا ... ماسوينا شي غلط ‏

عمي معصب = لا ياقليل الادب ‏

ورفع الخيزارنه مرة ثانية يبي يضربني ‏

بس هجيت وخليت سيارته الجيب الواقفة قدام الباب بيني وبينه واطالعه من عند ‏الكبوت ومريم واقفة بمكانها بخوف ‏

رايد بقهر = ليه انت معنا كذا ... الله ياخذك ... الله يقصر عمرك يالشايب ‏

عمي = اذا اخذتهم مرة ثانية بدون علمي مايحصلك خير ياصايع .. فارق
‏( والتفت لمريم وحرك الخيزارنه قدامها ) ادخلي اشوف ( وفسح الطريق لها وهو ‏يهز الخيزرانه قدامها ) ‏

مريم وقفت خايفة تبي تدخل وخايفة من الخيزرانه ‏

مريم وهي تبكي = اخر مرة والله اخر مرة ‏

صارخ عمي بصوت عالي خلا مريم تنقز من الخوف ودخلت واول ماتعدته وهو ‏يضربها بالخيزارنه على ظهرها وسمعت صرخت مريم ‏

ونزل نظره لدانه وسحب يدها وجرها داخل البيت ‏

التفت لي معصب ‏

عمي = اذلف لا بارك الله فيك ‏

وسكر الباب بوجهي ‏

وقفت وانا اطالع الباب واسمع صوت عمي وصراخه بالحوش ‏

طلعت دموعي منقهر وانا اسمع صوت مريم تدافع عن نفسها بدون ما اميز كلامها ‏

رحت للباب وقعدت اضربه واصارخ ‏

رايد = افتح افتح .. مالك حق علينا .. ماسوينا شي غلط .. افتح افتح ‏

وقفت عن ضرب الباب احاول اميز اصواتهم ‏

مااسمع الا صوت عمي يصارخ ويهاوش ‏

تلفتت وانا اضرب صدري من القهر .. مدري وش اسوي عشان مريم ‏

وبدون تفكير .. ركبت على سيارة عمي الجيب لواقفة قدام البيت وتسلقت الجدار ‏وطليت براسي عليهم ‏

الحوش مظلم الا من انوار درايش البيت وانوار الشارع .. تقدرت اميز ‏

شفت عمي واقف ويصارخ ويهاوش وهو ماسك شعر مريم ويضربها بالخيزارنه ‏

ومرت عمي واقفه وراه تحاول تهدي عمي ‏

وبنات عمي وبندر واقفين عند الباب الداخلي يراقبون الموقف .. ‏

ما احد انتبه لراسي اللي يطل عليهم .. و اشوف نوف وبدور ومرة عمي كاشفات ‏

مرة عمي = بس يارجال فضحتنا مب بالحوش ‏

التفت عمي لمرته وصارخ بوجهها ‏

عمي = هالكلبة بتعلم بناتي الهياتة ... تطلع بدون ماادري ... ( والتفت لمريم ورفع ‏الخيزرانه عليها وضربها على ظهرها ) ‏

صرخت مريم تبكي وهي تتلوى وتحاول تفك نفسها منه ‏

ركضت وحدة من بنات عمي وجت ورا مريم ... اشوفها بس مادري ايهم نوف او ‏بدور ‏

‏= يبه هي راحت مع رايد .. تكفى يبه خلاص ( وبكت ) فكها ‏

صارخ عمي عليها ورفع الخيزارنه على بنته وضربها خلاها تبتعد عنه ‏

عمي بعصبية = خلني اشوف وحدة منكن تسوي سواتها .. والله لاذبحها ... هالمرة ‏راحت مع رايد .. المرة الثانية مع مين ‏

انقهرت منه ورفعت رجلي اتسلق على حافة الجدار واعتدلت جالس على الجدار ‏

انتبه لي بندر واشر لي ‏

بندر = رااااايد ‏

صارخت بعمي بصوت عالي ‏

رايد بصراخ = اختي اشرف منك ومن بناتك ‏

انتبهوا لي كلهم ودخلوا بنات عمي عني داخل البيت ‏

ومرة عمي رفعت شيلتها على وجهها تتغطى عني ‏

ترك عمي مريم وجا عند الجدار اللي جالس عليه ورفع راسه يطالعني ‏

عمي بعصبية = انزل يالكلب .. فارق للشارع .. يالصايع مابي اشوفك هنا ‏

شفت مريم استغلت الفرصة وراحت تركض ودخلت البيت وهي تبكي .. نزلت ‏نظري لعمي وانا انفاسي سريعة من القهر ‏

وهمست ارد عليه وقلبي مليان غبن ‏

رايد بهمس = هين .. الله يحرق قلبك بعيالك ... هين هين والله لأخلي بندر يشوف ‏اللي انا شفته ‏

صارخ عمي علي مرة ثانية ونزلت من الجدار مابغى اسمع صوته ‏
نزلت على سيارة عمي ... وبعدها نزلت على الارض .. ووقفت وانا اتذكر شكل ‏مريم ... اكيد عمي دخل البيت وراها بيكمل عليها ‏

طلعت دموعي منقهر من عجزي .. سندت ظهري على الجدار بيأس وحطيت يدي ‏على صدري احس بكتمة من القهر ... ‏

مريم تعبت منهم .. تحتريني اتوظف وترتاح من هالعذاب ... بس انا ضعيف ... ‏بزر ... جلست بالارض بيأس وغطيت وجهي بركبي وبكيت اكثر ‏

ياليتني مت ... ياليتني كنت بدال ريان ‏

ودي اتوطف .. ودي اخذ اخواتي ونرجع للرياض ‏

والله لوريك ياعمي .. والله لاذبحك ... والله لذوق بندر اللي ذوقتني .. والله لاذبحك ‏ياكلب ‏

رفعت راسي وقمت واقف بسرعة و منقهر وتلفتت ادور أي شي .. أي شي يبرد ‏كبدي ,,, شفت حصاه بعيدة شوي ورحت اركض واخذتها وحذفتها بدون تفكير ‏على سيارة عمي الجيب وكسرت القزازة الامامية ‏

‏ وصارخت باعلى صوتي ‏

رايد = اوريييييييييييييييييييييييييييك ‏

وقفت بنص الحارة وانا اشوف سيارة عمي وقزازها المتكسر مدري وش اسوي .. ‏ودي اقهره مثل ماقهرني .. نزلت راسي بحزن وتوجهت لسيارة عمر وركبت ‏بمكان الراكب وانا افكر بمريم ‏

وش تسوي مريم الحين .. طالعت ساعة السيارة 11 ‏

اخاف الى الحين يضربها ... كيف الحين بتروح معي للمستشفى مثل ما اتفقنا ‏

ضربت راسي منقهر عدة مرات ‏

رايد = وش تسوي وش تسوي

وبكيت .. عجزت اسكت احاول ماابكي بس غصب عني مو بيدي ... احاول اهدي ‏نفسي.. بس كل ماتذكرت مريم بكيت ‏

حطيت يدي على صدري احس بكتمة ‏

اخذت نفس احاول اهدي نفسي ومسحت دموعي بيدي ... نزلت من السيارة ورحت ‏اضرب باب بيت جد عمر عشان يطلعلي عمر ونرجع للبيت ‏

17 - 4 - 2014, 09:17 AM

[COLOR="Navy"]

‏* عمر * ‏

واقف قدام المراية وافك الشاش اللي براسي .. ضايقـني .. نزلت الشاش ونزلت ‏اللزقة اللي على الخياطة و زفرت بضيق .. اففففف الله يخسهم محلقين جزء بسيط ‏من شعري عشان الخياطة .. جاي الجرح بالطول من الجهه اليمين ... من بداية ‏منابت الشعر لين نص جبهتي بالطول ... ‏

رجعت اللزقة ورجعت الف الشاش مرة ثانية على راسي ... ارجع الشاش على ‏راسي احسن .. على الاقل استر اللي محلقينه ‏

رجعت للصاله وانا اطالع ساعة جوالي ... الساعة 11 وربع ورايد ماجا الى الحين ‏

وين راح هذا هو واخواته .. من العصر الى الحين تمشيات ... ماصارت ‏

جلست بجنب عمتي مها اللي جالسة تطقطق واول ماجلست بجنبها عادت علي ‏اسطوانتها اللي ادخوتني فيها من العصر ‏

مها = هاااااااه عمر تكفى قل لابوي يوافق اخذ قرض ‏

زفرت بضيق ‏

عمر = اففففففففففففففف مشكلتك ماتفهمين ‏

وفجأة سمعنا صوت الجرس .. فرحت جا بوقته .. الحين اقدرافتك من لح عمتي ... ‏من العصر تبيني اكلم جدي بموضوعها ‏

اخذت شماغي و قمت ومشيت اعرج وقبل اطلع من الصاله ‏

مها بترجي = ماردييييييييييييت علي .. كلم ابوي ... هو يسمع منك على طول ‏

التفتت لها وانا واقف عند مدخل الصاله ‏

عمر = مها وش رايك تكلمين مصعب ومعاذ هم بعد يعرفون يقنعون جدي .. ‏وبعدين جدي اذا قال لا مايقول ايه ‏

مها = انت مايردلك طلب ( وكملت بترجي ) تكفى تكفى اقنعه انت ‏

عمر = الباب يطق اكيد خويي ابروح افتح ...‏

وهجيت عنها ‏

من العصر اول ماجيت عندهم وهي تزن براسي .. واذا دخل جدي وجدتي سكتت ‏واذا راحوا رجعت تزن ‏

بعد ماتعشينا جلست اسولف مع جدي وجدتي ومها كل شوي تشر لي بعيونها طوال ‏الجلسة يعني افتح الموضوع من جدي ‏

حاولت افتح الموضوع عشانها بس اتراجع .. لاني اصلا انا ماني مقتنع ‏
كيف اقنع جدي وانا ماني مقتنع ‏

وبعد ماراح جدي وجدتي ينامون ... قمت انفذ بجلدي عن عمتي ورحت عند ‏المغاسل افك الشاش عن راسي .. المهم اسوي أي شي اتهرب منها ‏

والحمد الله اول مارجعت للصاله عند مها طق الجرس .. اكيد هذا رايد جا بوقته ‏يخلصني من زن عمتي ‏

فتحت الباب وفعلا كان رايد .. بس وقفت متفاجأ من شكله ‏

عمر مستغرب = وش فيك ؟ ‏

مارد علي وراح للسيارة وركب بمكان الراكب بصمت ‏

بسم الله وش فيه هذا .. خلصنا من مها جا رايد ‏

ثوبه وسخ .. ومن ورا واضح انه كان جالس على الارض .. حتى من عند الظهر ‏وسخ ‏

سكرت باب جدي وركبت السيارة بمكان السواق .. وتذكرت اني نسيت عكازي ... ‏افففف ابي اهج عن مها ونسيت العكاز ‏

يالله مب لازم .. بكرة بعد مااطلع من الجامعة امرهم واخذه ومنها اتغدى عندهم .. ‏حذفت شماغي بالمرتبة الخلفية و التفتت لرايد ولقيته يطالع بيت عمه بحزن ‏

عمر = وش فيك انت ... حسبتك بتجي مستانس ‏

مارد علي ولف وجهه عني اكثر ‏

عمر = اللهم سكنهم مساكنهم ‏

حركت السيارة وطلعت من الحارة ‏

تعدينا اشارتين والاخ منتفخ ... وش قصته هذا ... كل ماشاف اخواته يرجع معصب ‏ونفسه بخشمه ‏

التفتت له ومديت يدي ومسكت خشمه اسده .. وقلدت صوت تنسيم كفر السيارات ‏

عمر = فششششششششششششششش ‏

ابعد رايد يدي عن خشمه بعنف .. وتأفف وهو ساكت ورجع يلتفت للدريشة اللي ‏بجنبه بصمت ‏

عمر = وش فيك خلني انسمك شوي ‏

مارد علي .. ‏

تنهدت ودي اعرف وضع اخواته ببيت عمه ... الفضول بيذبحني ... كل مارجع ‏رايد من عندهم وهو منتفخ ومنقهر .. الفرق الوحيد انه اليوم مابكى قدامي ‏

مديت يدي وانا اسوق ومسكت ذقنه وخليته يلتفت لي ‏

عمر = اشوف .. غريبة مابكيت اليوم ‏

ابعد رايد يدي وهو يطالعني معصب .. وعيونه حمر كأنه توه باكي ‏

رايد = اسكت عني ‏

والتفت مرة ثانية للدريشة اللي بجنبه ‏

التفتت قدام اطالع الطريق وشفت مدرسة عيال على يدي اليمين ... لفيت لها ووقفت ‏السيارة عند المواقف وطفيتها والتفتت لرايد اطالعه وهو لاف وجهه عني الى الحين ‏

ظل على حاله وانا على حالي ساكت واطالعه واحتريه يقول اللي مضايقه ... ‏

اخيرا التفت رايد لي و طالعني شوي ‏

بس فجأة فتح بابه ونزل بصمت وراح ورا السيارة وجلس على الشنطة ‏

التفتت على ورا اشوفه ... معطيني ظهره و يطالع السيارات الرايحة والجاية ‏

‏ نزلت من السيارة ووقفت عنده .. لقيته يطالع السيارات بحزن ‏

تنهدت وتساندت بيدي على الشنطة وانا واقف وقعدت اطالع السيارات ‏

السيارات تمشي على الطريق السريع ومشوته ... ماتسمع الا صوت السيارات ‏المميز لما تمر من عندك وهي مسرعة ‏

فجأة سمعت صوت رايد الحزين ‏

رايد بحزن = احيان اتمنى يكون القتل حلال ‏

التفتت له ولقيت دموعه على خده وهو يطالع السيارت بصمت ... ماخلصنا من ‏هالسالفة .. رجع يفكر بالقتل مرة ثانية ‏

التفتت للسيارات وانا افكر وشلون اسأله عن اخواته ووضعهم ‏

عمر = شفت عمك اليوم ؟ ‏

سمعته يرد علي بهمس بصعوبة سمعته ‏

رايد بهمس = ايه ‏

عمر = طلبت بطاقة اثباتك منه ؟ ‏

مارد علي والتفتت له وعدت السؤال عليه ‏

عمر = طلبت بطاقة العايلة حقكم منه ؟ ‏

‏ سالت دموعه اكثر وبكى بصمت وهو يطالع السيارات ويشاهق ‏

واخذ شوي وهو ساكت وانا احتري .. واخيرا رد علي وهو يمسح دموعه بيده ‏

رايد بصوت باكي = ماطلبته منه ... ماجا ببالي اطلبه يوم شفته .. اصلا هو خلا لي ‏فرصة اتكلم واقول شي ... على طول ضربني وضرب اختي الكبيـ ( وماقدر يكمل ‏بكى اكثر وغطى وجهه بذراعه وانحنى على ركبه وقعد يبكي بصوت مسموع ) ‏

التفتت للسيارات افكر واحاول استوعب كلامه .. ضربه وضرب اخته .. ليه طيب؟ ‏

التفتت له وتنهدت .. جالس على شنطة السيارة ويبكي وهو بالشارع ... قربت منه ‏ووقفت قدامه و مديت يدي ومسحت على ظهره ‏

عمر = خلاص يارجال حنا بالشارع .. عيب تبكي ‏

تكلم رايد وهو مغطي بوجهه بركبه وماميزت وش يقول ‏

تنهدت مدري وشلون اسكته .. جلست على شنطة السيارة بجنبه وقعدت اطالع ‏السيارات الرايحة والجاية واحتري رايد يسكت .. ‏

ابي اعرف عمه هذا من وش .. انا ادري انه من مصلحته يكون بطاقة عايلة رايد ‏معه بس الحين وشلون رايد ياخذه منه ... اقول لرايد يروح يشتكي عليه ... بس ‏وشلون ؟ ‏

البنات مع عمه ورايد لحاله لو اشتكى بيقترحون عليه واحد من اثنين ياما رايد يرجع ‏له والا يترك الكرت مع عمه عشان البنات ‏

اصلا عمه وليهم .. يعني لو مثلا اشتكى رايد عليه بالشرطة بيقولون هذا قاصر ‏وبيرجعونه لعمه غصب عنه المهم البنات مايطلعون من عند عمهن ورايد مايبي ‏يرجع وبنفس الوقت يبي اثباته واللي زاد الطين بله عمره اصغر من استخراج ‏بطاقة احوال ... مايقصون بطاقة احوال الا اذا جا عمره 18 سنة ورايد عمره 15 ‏مدري 16 ‏

انتبهت على الطريق انه بدا يخف من السيارات .. التفتت لرايد ولقيته الى الحين ‏يبكي .. امممم اقول لرايد يخلي عمه يدور له وظيفة بما ان الاثبات عنده ‏

صح .. حل مؤقت ‏

مديت يدي ولفيتها على اكتاف رايد وقربته مني ‏

عمر = رايد .. قل لعمك يدور لك وظيفة .. اعتقد هو الوحيد اللي يقدر يقدم لك على ‏أي وظيفة عشان اثباتك عنده ‏

رفع رايد راسه معصب وهو يبكي ويشاهق ‏

رايد بصراخ = هو ماودا اختي للمستشفى تبيه يدور لي على وظيفة ... ( وحط يده ‏على صدره واخذ نفس ) يوم قلته اباخذ اخواتي عيا ... وشلون لو اقوله اباخذ بطاقة ‏العايلة( ومسح دموعه بيديه الثنتين ) اليوم ضربني اول ماشافني مع اني غبت عنه ‏‏3 شهور ( ورفع اصابعه الثلاث بقهر ) وشفه اول ماشافني ضربني ( وقعد يضرب ‏راسه عدت مرات منقهر ) هذا مو عم هذا كلب كلب ‏

وقعد يكرر كلمة كلب مع كل ضربه .. وانحنى مرة ثانية يبكي ‏

نزلت راسي ... انا بنعمه .. صح اني يتيم مثله ووحيد بس اللي يشوف مصيبة غيره ‏تهون عليه مصيبته ... اعمامي كل واحد يدور رضاي من يوم انا صغير وماهم ‏مقصرين عني بشي ‏

وفوق هذا انا شري مع عيال عمي واستنذل فيهم وادور اللي يزعلهم ويعصبهم .. ‏صدق اني بطران ‏

غمضت عيوني وانا اسمع صوت رايد وهو يبكي بصوت مسموع ومقهور ‏

رفعت راسي للسماء يوم حسيت بدموعي بتنزل .. كسر خاطري بصوته ‏

التفتت له ومسحت على راسه وقربت فمي من اذنه وهو مغطي وجهه بركبه ‏وهمست له اواسيه ‏

عمر بهمس = خلاص رايد ... خلنا نرجع للبيت ... والله بياخذ حقك منه .. انت ‏تحسب انه بيطول على حاله .. صدقني حقك وحق اخواتك بيرجع ... وبعدين انت ‏ببيتي ساكن وماكل وشارب ما انت محتاج لعمك ‏

رفع رايد راسه بسرعة و معصب والتفت لي ‏

رايد بصراخ = بس انا ابي اخذ اخواتي منه ... مابيهم يصيرون عنده ساعة وحدة ‏

عمر = حتى لو لقيت وظيفة ماتقدر تاخذ اخواتك منه ‏

طير رايد عيونه فيني ‏

رايد = ليه ‏

تنهدت وشلون افهمه هذا .. اخاف يشوتني برجله ‏

عمر = انت توك صغير .. ماتقدر تفتح بيت وتحط اخواتك لحالهم فيه .. فاهم علي ‏

سكت رايد شوي وهو يطالعني معصب ‏

رايد = انا ماني صغير .. ماني بزر ... ( ونزل من الشنطة والتفتت لي وهو يشر ‏بسبابته علي كأنه يهدد ) بتشوفون منهو رااااايد ... والله لاحرقكم كلكم .. ‏

مسكت سبابته وابتسمت ‏

عمر بابتسامة = تحرقني انا بعد ... وانا وش علي ؟ ‏

سحب رايد سبابته من يدي وهو معصب والتفت للطريق وهو ينافخ ‏

رايد = كلكم تقولون انا بزر .‏

نزلت من الشنطة ولفيت ذراعي على اكتافه وانا ماسك ضحكتي ‏

عمر بابتسامة = خلاص يابن الحلال ما انت بزر .. انت رجاااااال ( ورفعت بيدي ‏فوق اتطنز عليه وكملت كأني اكلم طفل ) انت كبييييييييييييييييير مرة ( وضحكت ) ‏

رفع رايد نظره لي معصب وابعد ذراعي عنه بعنف وراح للسيارة وركب بمكان ‏الراكب ‏

سكتت ... احم .. ماخلي طبعي .. لازم اتطنز واخلي اللي قدامي يعصب حتى لو هذا ‏مو وقته ‏

ركبت بمكان السواق واخذنا طريق البيت والاخ الى الحين منتفخ ‏

اول مادخلت الحارة شفت من بعيد الشخص الواقف عند باب بيتي ... متلثم ومن ‏الزول شكله نايف ‏

اشرت بيدي عليه وسألت رايد ‏

عمر = هذا نايف ؟ ‏

دقق رايد نظره شوي وشهق ‏

رايد = أي والله نايف ‏

زفرت بضيق ‏

عمر = وش يبي هذا بعد .. تراه زودها ( والتفتت لرايد وانا امشي بالسيارة على ‏شوي شوي قبل نوصل نايف ) ماني متحمل غثاه .. اببلغ عليه ونرتاح منه ودانه ‏ماعليها شر ان شاء الله ‏

التفت رايد لي وسكت شوي وهو يطالعني وبعدها التفت يطالع قدام ‏

رايد = بلغ ... اصلا كل شي خسرته مافيه شي اخاف عليه ‏

سكتت عنه ... ماحد يقدر يكلمه هذا مع نفسيته الزفت ‏

طلعت جوالي ابتصل على الهيئة بس تذكرت اني ماني حافظ أي رقم للهيئة ‏

عمر بعصبية = اوووووووه ... ماعندي رقمهم ‏

سكت رايد ومارد علي ‏

طالعت ساعة الجوال .. وحدة وربع ‏

صح الهيئة مايداومون الحين .. الساعة وحدة اخر الليل .. من بيرد علي بهالوقت ‏بالله ... اففففف .. بلشت بهالنايف هذا ‏

التفت نايف المتلثم لنا يوم قربنا عنده .. وقفت السيارة قدام بيتي ونزلت ونزل رايد ‏

اول مانزل رايد من السيارة وسكر بابه .. توجه له نايف معصب ومسك ذراع رايد ‏بعنف ‏

نايف = هيييييييييييييه انت يالفتاااااان .. انت سبب كل الي انا فيه الحين ... ابي ‏فلوس عطني فلوووووس ‏

رايد وهو يحاول يحرر ذراعه = مامعي شي ... لو معي شي ماشفت هذا حالي ... ‏خلني ( والتفت لي يبيني افزعله ) عمر ‏

تأففت بضيق وقفلت سيارتي و درت حولين السيارة وانا اعرج ومتنرفز من نايف ‏اللي زودها ‏

حلت بين نايف ورايد ... نايف قدامي ورايد وراي ‏

عمر = انت الحين وش شايف نفسك ؟ ماتحس انك زودتها ؟ ‏

نايف وعينه على الشاش اللي براسي = انت اصفط على جنب لاتخليني افتح راسك ‏مرة ثانية ‏

عصبت وصارخت بوجهه ‏

عمر = انت وش تبي الحين ... فاااااارق ياخي فااااااارق ( ودفعته على ورا ) انقلع ‏

نايف وهو متلثم = ابي البزر اللي وراك يعطيني فلوس ... مامعي شي مفلّس ولي ‏يومين ماكلت شي ... كل البلاوي اللي طاحت على راسي بسبب هالفتان اللي وراك ‏

سمعت رايد يرد عليه وهو الى الحين وراي ‏

رايد = ماهو انا اللي بلغت .. اقسم بالله ماهو انا ‏

التفتت لرايد ومسكت ذراعه وجريته معي ‏

عمر = امش خلنا ندخل وماعليك منه ‏

بس وقف نايف قدامي ‏

نايف = ماتدخلون لين تعطوني فلوس ... ابي فلوس .. لو مية ... خمسين أي شي ‏

عمر = شايفني ابوك انا ( ودفعته على ورا ) وخر ‏

وتعديناه وقبل اوصل الباب و بغفله مني سحب نايف رايد بعنف ولصقه على كبوت ‏سيارتي وقعد يفتش جيوب رايد .. ورايد يصارخ و يحاول يفلت منه بس جسمه ‏محشور بين السيارة ونايف ... شفت يد نايف استقرت باحد جيوب رايد الجانبية ‏ورايد يصارخ ‏

رايد بصراخ = خلنييييي ..... هذا من عووووومررررر .. والله مامعي غيرها

‏.... قربت لهم وانا مستغرب على وش يتهاوشون .. وعرفت من مسكت رايد لجيبه ‏ومحاولة نايف يدخل يده بجيب رايد ان هالجيب هذا فيه فلوس
صح تذكرت انا معطي رايد خمسمية اليوم ... قهر تروح الخمسمية لهالخايس ... ‏جيت ورا نايف معصب ولفيت ذراعي على رقبته وسحبته بقوة وطرحته بالارض ‏

مسكت ذراع رايد بسرعة وجريته للباب .. وطلعت مفتاح البيت من جيبي باستعجال ‏‏.. بس مامداني احدد المفتاح الا ونايف راكب على ظهري ولاف ذراعه على رقبتي ‏

اخذ رايد المفتاح من يدي بسرعة وفتح الباب ‏

حسيت خياطة فخذي بتنفك وانا معتمد عليها بسبب ثقل نايف علي

ركعت عشان اطرح نايف عن ظهري ‏

عمر بألم = نااااااايف انزل ... خنقـتني ‏

دفع رايد نايف بيديه الثنتين وطرحه على الارض ‏

اعتدلت واقف وانا ماسك فخذي بألم والتفتت لرايد بسرعة

عمر بألم = ادخل ادخل بسرعة وسكر الباب وراك ‏

نفذ رايد كلامي ودخل وسكر الباب وراه ‏

التفتت لنايف اللي جالس بالارض بعد ماطاح من ظهري ويطالع الباب اللي دخل ‏منه رايد .. فجأة التفت لي معصب ‏

نايف معصب = وش مغيرك علي انت ؟ ... ياخي مابيك ... ابي هالفتان يعطيني ‏فلوس .. لي يومين ماكلت شي وابوي تبرا مني وما انام عند اخوياي الا بالدس .. ‏كله من هالبزر الفتان ‏

عمر = ياخي يقولك مو هو اللي بلغ ... تفهم انت والا ماتفهم ‏

قام نايف واقف واخذ شماغه اللي طاح بالارض وتلثم فيه مرة ثانية ‏

نايف = الكلب مخباته مليانه فلووووس ... يإما تفتح لي الباب الحين اخذ الفلوس منه ‏والا انت عطني ‏

رفعت حواجبي بسخرية ‏

عمر = لا ياشيخ ‏

نايف معصب = ماني متحرك من هنا لين تعطوني فلووووووووس يأنت ياهو ‏

حركت اكتافي اغيضه ‏

عمر = بكيفك لا تروح

سكت نايف يطالعني وهو منقهر ‏

تلفتت يمين ويسار اشوف اذا كان فيه احد بالشارع ... المشكلة حارتي هادية مو مثل ‏حارة جدي .. وقت العصر حارتي تصير شبه فاضية كيف عاد الحين بوقت متأخر ‏

نايف معصب = خل رايد يطلع ( وجا عند الباب وقعد يضرب الباب بقوة وينادي ) ‏رااااايد اطلع ادري انك ورا الباب اطلع ‏

قطبت حواجبي مستغرب .. رايد ورا الباب الى الحين ؟ ‏

ابتعدت شوي .. وانحنيت اطالع من تحت الباب وفعلا شفت ظل رايد ورا الباب ‏

اعتدلت واقف وحطيت يدي على ذقني افكر .. هذا الحين وش يفكنا منه ... ابلغ ‏الشرطة عليه يجون ياخذونه .. هذا مصر ان رايد هو اللي بلغ .. رفعت راسي ‏لدرايش جاري ابو احمد ... فضحنا نايف ازعج العالم بنص هالليول ‏

نزلت نظري وطالعت نايف وانا افكر وشلون اخليه يطس عنا ‏

عمر = نايف ماهو رايد اللي بلغ ... انا اعرف منهو ؟ ‏

وقف نايف عن ضرب الباب يوم سمعني والتفت لي مستغرب

نايف = ماهو رايد ... مين اجل ؟ ‏

سكتت افكر مدري من اقول ... اقوله منصور والا عبدالله .. والا اقول مشعل .. ‏على الاقل هذولي يقدرون يدبرون نفسهم مو مثل رايد ... بس اخاف ينشب بحلقهم ‏مثل ماهو ناشب بحلقنا الحين واخاف يزعلون مني اذا عرفوا اني اتهمتهم ‏

انتبهت على صرخة نايف بوجهي

نايف بصراخ = تكلم ميييييين ؟ ‏

عمر = قلتلك ماهو رايد وخلاص ‏

نايف بعصبية = تستهبل انت ... مافيه الا رايد ... من دخل استراحتنا مسكوا سعد .. ‏والحين انا متبهذل بسبته .. هو الوحيد اللي علمناه عن مكان العامل اللي يبيع مافيه ‏غيره ‏

ابتسمت اغيضه ‏

عمر = يقولون الشباب انك ماتستخدم سيارتك وماتمشي بالشارع الا متلثم واهلك ‏ماتروحلهم وحالتك حاله .. هو صدق ؟ ههههههههههههههههههههه

ضحكت احاول اقهره ‏

نايف = وش عليك انت ... علمني اذا كان ماهو رايد منهو اجل اللي بلغ علي وعلى ‏سعد ؟

عضيت شفايفي متورط مدري وش اقول .. ‏

عمر = ياخي خلاص قلتلك ماهو رايد ... انت بس شايفه ماله احد قلت خلني افرد ‏عضلاتي عليه .. والا رايد وين والهيئة وين ‏

سكت نايف مستغرب ‏

نايف = اجل مين ؟ ‏

سكتت ومارديت ‏

صارخ نايف مرة ثانية معصب ‏

نايف = وش فييييك سااااكت .. علمني مييييييييين ؟ ‏

ياربي وش يفكني منه الحين ... مين اقول ؟ ‏

عمر = احم .. ياخي الهيئة من زمان وهي تراقبك انت وسعد ... ماحد بلغ ‏

عصب نايف زيادة ‏

نايف = تستهبل انت ... توك تقول انا اعرف مين اللي بلغ ؟ علمنيي مييييييين ‏

سكتت متورط ... وسكتت افكر ‏

و بعدين تعال ليه انا خايف منه ... لا هو ولا عشرة امثاله يخوفوني ‏

احم .. ونفخت صدري بتحدي ‏

عمر = انا ‏

طير نايف بعيونه فيني منصدم ‏

نايف = انت ؟ ‏

بكرة لازم اروح للهيئة بعد مااطلع من الجامعة وابلغ عليه .. يفكوني منه ... مافيه ‏الا كذا ... هذا مستقوي على رايد .. على الاقل انا مايقدر يستقوي علي واقدر ارد له ‏الصاع صاعين ‏

ابتسمت اغيضه ‏

عمر = ايه انا

قعد يطالعني نايف وهو ساكت .. ماشوف الا عيونه بسبب اللثمة ‏

‏ فجأة هجم علي وعطاني بكس وطرحني بالارض وجلس على بطني وقعد يعطيني ‏من هالكفوف ‏

مسكت يديه وحاولت اطرحه عني ‏

غمضت عيوني بقوة لما حسيت بسايل يبلل الشاش الملفوف على فخذي ‏

عمر بألم = انزل نااااااااايف ... رجليييييييي ‏

نايف معصب = وش دخلك انت تبلغ علينا ... شاربين على حسابك والا ببيتك وش ‏عليك منااااااا ان شاء الله نمووت وش عليك انت ‏

وسحب يديه مني وعطاني بكس حسيت بدوخة من قوتها ‏

مسكت يديه مرة ثانية وطالعته ‏

عمر بعصبية = واببلغ عليك الشرطة مو بس الهيئة .. انزل عنيييييي .. قسم لاروح ‏بكرة واعلمهم علييييييك ‏

سحب نايف يديه مني وانحنى علي وضربني على الجرح اللي براسي ‏

لاشعوريا صارخت متعور .. وغطيت وجهي بذراعي عن نايف .. بس الكلب قعد ‏يحاول يفك الشاش اللي على راسي بيد ويضربني على وجهي وذراعي بيده الثانية ‏ويسب ويشتم ‏

عطيته بكس على وجهه عشان اشغله عن فك الشاش ... وقعدت اضرب عشوائي ‏

فجأة شفت الباب يفتح ويطلع منه رايد وجا مسرع وركل نايف بقوة برجله ودفعه ‏عن بطني وطرحه بالارض ‏

جلست بسرعة وانا دايخ ووقفت بمساعدة رايد ‏

التفتت لنايف وانا حاط يدي على مكان الجرح براسي وانفاسي سريعة من العصبية ‏والدوخة ‏

عمر بألم = قسم بالله لاوقفك عند حدك ( وحطت يدي على فمي يوم حسيت بطعم ‏الدم ) ‏

رايد بعصبية = والله اذا مارحت من هنا اخلي هذي على راسك ( ورفع العصا اللي ‏معه ) ‏

التفتت لرايد توني انتبه ان معه عصا .. رجعت التفت لنايف اللي الى الحين جالس ‏بالارض ويطالعني وهو معصب ومنقهر ‏

من نظراته لي كأنه يهدد ‏

عمر = وش تطالع .. يله فاااااارق ... فضحتنا عند الجيران ( واخذت العصا من ‏رايد وهشيتها قدام نايف اتطنز عليه واغيضه ) يالله هش هش ‏

قام نايف و انفاسه سريعة من العصبية .. اخذ شماغه من الارض والتفت لي ‏

نايف = بسيطة ياعمر ... بسيطة .. ماتوقعتها منك تبلغ علينا .. ابوي تبرا مني ‏بسببك .. بس والله لاطلع حرتي فيك ‏

عمر = اقول ورنا عرض اكتافك بس ( وحركت العصا قدامه ) وبكرة ابسلملك على ‏الشرطة حبيبي ( وابتسمت اغيضه بس اختفت ابتسامتي يوم عورني برطمي) ‏

قعد يطالعني نايف منقهر وساكت ... الصراحة خفت من نظراته لي... يطالعني ‏وصدره يرتفع وينزل من العصبية وكأنه يتهيألي ان عيونه حمر ‏

فجأة همس نايف ‏

نايف بهمس = انت سلملي على الشرطة وانا ابسلملك على واحد ثاني اهم منهم ... ‏وتشوف ‏

وراح ‏

طالعته مستغرب وهو معطينا ظهره ويمشي بسرعة ‏

يسلملي على واحد ثاني ... مين يقصد .؟ .. مافهمت شي ‏

التفتت لرايد مستغرب ويدي على الجرح براسي ‏

عمر مستغرب = وش يقصد ؟ ‏

رفع رايد نظره لي مستغرب مثلي ‏

رايد = مدري ( ومسك يدي وجرني ) ادخل عمر .. راسك وفمك يطلع منهم دم ‏

نزلت نظري لفخذي .. وشفت ثوبي من عند الفخذ فيه بقع دم ... وكملت ‏

عمر بتنهيدة = ورجلي ‏

دخلنا البيت ورحت على طول للمغاسل وانا اتوكأ بالعصا ... ورايد وراي ‏

طالعت نفسي بالمراية و تضايقت .. برطمي السفلي منجرح .. والشاش اللي براسي ‏مب موجود واللزقة مليانه دم .. ‏

فكيت اللزقة وقعدت اغسل وجهي .. وكل مامسحت وجهي بالماء تعورت ‏

عمر بألم = اخ حسبي الله عليه .. عليه كفوف تعوووور ( ورفعت راسي للمراية ‏اشوف مكان تحت عيني يعورني ) والله لأبلغ عليه بكرة .. مب ساكتله ( ورجعت ‏اغسل وجهي ورايد واقف عندي وساكت ) اخ آي آي كسر فكي ‏

سمعت رايد يسألني ‏

رايد = عمر انت اللي بلغت الهيئة ؟ ‏

رفعت راسي اطالع المراية اغسل مكان الخياطة ورديت عليه ‏

عمر = لا ‏

رايد = بس انا سمعتك تقول لنايف انه انت ‏

التفتت له ورشيت على وجهه ماء ‏

‏ عمر = عشانك ياخبل ...‏

‏ ابتسم رايد وهو يطالعني ‏

عمر = نايف كل شوي يوطوط عندنا مستقوي عليك .. اما انا .. ابن امه يسوي شي ‏‏.. اجل جايني يطلب فلوس .. شافك ساكت له استقوى ‏

رايد = انا مب ساكت عشانه .. انا بس خايف على دانه منه ‏

رجعت اغسل وجهي بدون مارد عليه ‏

رايد = عمر نزل ثوبك ابغسله ‏

رفعت راسي بعد ماخلصت واخذت العصا .. بس رايد اخذها مني على طول ‏

رايد = هذي عصا مكنستكم .. لقيت مكنسة يالحوش واخذت عصاها .. الحين ‏ارجعها .. نزل ثوبك ابغسله ‏

اخذت اغراضي و نزلت ثوبي وعطيته اياه ورحت للصاله وانا اعرج وافكر بكلام ‏نايف ‏

مين يقصد ... مين هذا اللي بـيسلملي عليه ؟ ‏

هو اكيد احد من الشباب .. بس ماني فاهم كيف يعني يسلملي عليه .. كل الشباب انا ‏اشوفهم شبه يومي بالجامعة ‏

اسأل منصور ومشعل وعبدالله بكرة بالجامعة يمكن يفهمون قصده ‏

شوي ورجع رايد عليه ملابسه الداخليه ‏

عمر = رح هات شنطة الاسعافات .. ابي الف راسي ‏

قرب رايد لي وانحنى و انا جالس على الكنبة وقرب وجهه مني يطالع الجرح ‏براسي .. ‏

رايد = الخياطة مانفكت بس يطلع منها دم ( واعتدل واقف ) وين الشنطة هذي ؟ ‏

سكتت ... مدري وينهي ... بيتي بعد امي صاير حوسه .. الغرفة اللي ماندخلها ‏مغبررررة واللي ندخلها محيوسه .. هذا غير المطبخ اللي نص اغراضه بالصاله .. ‏والمطبخ نفسه محيوس .. نص الصحون والاواني وسخه .. مانغسل الا اللي نحتاجه ‏‏.. واللي استخدمناه وخلصنا منه وسخ الى الحين لين عاد يجي وقته ونستخدمه مرة ‏ثانية ‏

والصاله الصراحة ماينجلس فيها .. بطانيتي وبطانية رايد اذا قمنا حشرناهم ورا احد ‏الكنبات ... والصحون اللي اكلنا فيها اخر مرة موجود الى الحين بالصاله .. ‏

بيتي بعد مادخله رايد وصارت امي ماتقدر تجيه تنظفه وترتبه مثل عادتها قبل يجي ‏رايد صار يرثى له .. وانا ورايد زين نعرف نسوي شاهي .. حتى رايد اللي يعنني ‏يعرف يطبخ غداه يطلع مثل وجهه .. واكثر الاحيان اضطر اجيب من برا ‏

رفعت راسي لرايد .. ‏

عمر = مدري .. شف دور بالغرف لين تلقاه ( وحطيت يدي على فخذي وكملت ‏بقهر ) اخاف الخياطة هنا انفتك .. مرتين خاطوها مابي يخطونها مرة ثالثة ... ابيها ‏تبرا بسرعة وافتك .. تعبت وانا اعرج ‏

راح رايد يدور الشنطة وانا قعدت امسح الدم بالمناديل ‏

اهاا صح يمكن نايف يقصد سعد .... صح اكيد سعد ... بس وشلون بيشوفه ويسلملي ‏عليه على قولته وسعد ممسوك عند الهيئة ... لا لا اكيد يقصد احد ثاني .. بس مين ؟ ‏

ربع ساعة ورجع رايد طفشان ‏

رايد = عمر مالقيتها ‏

حركت يدي بصمت يعني خلاص مب لازم وانا افكر بكلام نايف ‏

جلس رايد بجنبي ساكت .. وبعدها سألني متردد ‏

رايد = عمر .. آآآ .. فيه غرفة بجنب غرفتك مقفلة .. آآآ ... وش الغرفة هذي ؟

التفتت لرايد مستغرب ‏

عمر = هذا انت قلتها مقفلة .. مالك دخل فيها ‏

رايد = ليه وش فيها هي ؟ ‏

عمر = مافيها شي .. غرفه عادية .. ‏

رايد = آآآ .. طيب يمكن فيها شنطة الاسعافات ... عطني مفتاحها اجيب الشنطة ‏واطلع على طول ‏

عمر = لا ياشيخ ... وش يجيب الشنطة لها .. وبعدين خلاص مابي شي .. بكرة ‏اجيب شاش جديد وانا راجع من الجامعة ‏

رايد = طيب ليه وش فيها الغرفة .. ليه ماتبيني ادخلها ؟ ‏

رفعت حواجبي مستغرب من رايد واسألته ‏

عمر = وش عندك انت اليوم مع هالغرفة ؟

لف رايد وجهه عني ‏

رايد = لا ولا شي ‏

طالعته مستغرب .. وش عنده هذا يسأل عن غرفة امي ... والا لأنها مقفلة اعجبته .. ‏عنده الغرف الباقية اذا كان وده بغرفه .. صدق بزارين اخر زمن ‏

عمر = قم عن الكنبة .. ابنام ‏

قام رايد واقف و تمددت بتعب ‏

التفتت لرايد ولقيته يطالعني وهو واقف ‏

عمر = صح رايد قبل انسى .. انا بكرة ابتأخر .. تغدى لا تحتريني .. بكرة بعد ‏ماطلع من الجامعة ابمر الشرطة ابلغ على نايف ‏

طالعني رايد شوي وبعدها راح بصمت للكنبه اللي ينام عليها وجلس ‏

وقّـتت جوالي على وقت الجامعة ونزلته على الطاولة الصغيرة ونمت ‏

المواضيع المتشابهه لموضوع: يمسح الدمعه بشكوى للكاتبه هدوئي لموضوع: يمسح الدمعه بشكوى للكاتبه هدوئي
الموضوع	كاتب الموضوع	المنتدى	مشاركات	آخر مشاركة
حمدالله يتقدم بشكوى رسمية للانضباط ضد تاليسكا	نجوم همس	همس للرياضه السعوديه والخليجيه	6	18 - 2 - 2022 04:39 AM
خاطره اما للجنة ثمن للكاتبه	همسة الشوق	همس الصوتيات و المرئيات الإسلامية	6	19 - 8 - 2015 01:16 PM
اصبح هدوئي سرا من اسراري	إنسااانة عنيدة	همس موبايلات الاندرويد	8	23 - 1 - 2014 04:39 AM
تنكس بنوتته هيوني	أحساس أنثي	همس الشعر و الشيلات الصوتيه	8	27 - 8 - 2012 05:04 AM
حبيبتي انتي تسكني في اعماقي	عاشق الرومانسية مودي	همس عذب الكلام والخواطر المنقوله	6	4 - 9 - 2011 10:34 PM

طلبات الإشراف
	إذا كنت قادراً على الإشراف في شبكة همس الشوق شريطة ان تكون مشاركاتك من فوق [ 5000 مواضيع وردود ]

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع