هو الحب يا عمري شويه

#1 8 - 7 - 2014, 11:16 AM

هو الحب يا عمري شويه

" هو الحـــــــــــب يا عمري شويــــــهـ "

تنقضي ايام .. نعيش من خلالها انواع من السعادة , وربما بعض من الحزن , لا نعرف بل لا نفكر في الطرف الاخر , وننسى حقيقة مشاعرنا نحوه ..
نعتقد بان ما يجمعنا لا تكون سوا مشاعر اخوة او حتى صداقة ,
لم نفكر بانها قد تحولت الى حب .. نعم الحب .. انها ليست عاطفة او شعور من السهل الاستهانه به , فهو قد يقلب حياه الشخص الاخر رأسا على عقب ..
وربما نتاخر كثيرا في البوح عن مشاعرنا للطرف الاخر .. عندما يكون الوقت قد مضى بالفعل .. ولم يعد يجمعنا به سوا الذكرياات ..
لا ادري ..
هل سنستطيع اللحاق به والبوح عن حقيقة مشاعرنا نحوة ..
او ستنطوي هذة الصفحة .. وستصبح في عداد الاموات ..

دانه قطرية

الموضوع الأصلي :‎ هو الحب يا عمري شويه || الكاتب : || المصدر : شبكة همس الشوق

8 - 7 - 2014, 11:17 AM

الشخصيات :
ام محمد: مرة كبيرة في السن , بس اتحب تتدخل في كل صغيرة وكبيرة في العايله , متمسكة بعاداتهم القديمه وايد , بس بلحظة تنقلب وتصير حنونه , لو حد عصا لها طلب ما يلوم الا نفسة , ممكن تقعد اتحن علية لين الصبح , او تضربة بعصاتها وترتاح . مات ريلها وربت عيالها وكبرتهم .. عندها 3 صبيان ..
الاخ الاول :
محمد : ( ابو عبدالله ) عمره ( 66سنه )
عصبي وايد وايد . يحب ايمشى الامور على كيفه , بس مع هاي طيب كثير ويحب عايلته ما يبي يكسر اي كلمه لامه , من زود حبة في امه .. كان ماسك شغل العايله ولكن فضل انه يتقاعد ويمسك الشغل للعيال ..
زوجته ام عبدالله (هيا) : في حالها , بعيدة عن المشاكل , توها السنه متقاعدة ومتملله من القعدة بروحها في البيت
عندهم 3 عيال .. .
عبدالله : اب حنون طيب , عايلته هي اول اهتماماته , متزوج وهو صغير اشوي يوم كان عمرة 20 سنه , متزوج بنت عمة نور وعندهم 3 عيال ..
جاسم: بحكم دراسته في الخارج , هو متفتح وهاي الموضوع فاتح مشاكل كثيرة مع ابوة , وجدته بس علاقته قوية وايد مع عمه براهيم يعتبرة ابوة الثاني مو عمه .
الجوهرة : اخر العنقود ومدلعه وايد وايد خصوصا من قبل جدتها , لانهم مسمينها عليها , اي شيء تبيه تروح تطلبة من جدتها لانها تدري محد بينفذة لها غيرها .. عمرها 20 سنه .. تخصص هندسة صناعية جامعه قطر ..
الاخ الثاني :
ابراهيم : ( ابو خليفه ) عمره 60 سنه ..
هو سفير في لندن من حوالي شهر انتهت مدة شغله هناك . واضطر يرجع الدوحة بعد غياب دام 21 سنه . وما كان يرجع فيهم الا في الاجازات , اب حنون ..ايعرف مصلحة عياله وممكن انه يجبرهم عند الضرورة , لو شايف ان الموضوع فيه مصلتهم ؟؟
ام خليفة(عائشة) : تراها اتصير اخت ام عبدالله ..
عصبية .. بس مع هاي طيبة وايد .. وممكن ان الواحد ايقص عليها بكلمه
نور : بنتهم الكبيرة .. متزوجة عبدالله .. عندهم 3 عيال .. تفهم خوانها لو ما تكلموا حنونه عليهم وايد .. يعتبرونها امهم الثانية عيالها ...
طلال : 23 سنه .. يشتغل مع ابوة وعيال عمة في الشركة .. صديق جاسم الروح بالروح
ريم: 20 سنه .. رفيجة دانه والجوهرة الروح بالروح تدرس في جامعه قطر هندسة صناعية .. والجوهرة معاها
فهد : اخر العنقود 15 سنه .. الحياه حلوة عنه .. واهم شيء لعب الكورة هههه
خليفه : عصبي كثير ما يتفاهم , عكس ابوة تماما محد يقدر ايكلمه , بس مع هاي مدلع بندته تدليع مو طبيعي عندة بنت اسمها شوق عمرها 14 سنه .وولد اسمه حسن عمرة 3 سنين. اسم مرته مها ..
دانه : دلوعه ابوها .. تعيش هلايام مرحلة غريبة بحكم انها عايشة طول عمرها في لندن بحكم شغل ابوها , وما كانت تحب تجي الدوحة مع اهلها ايام الاجازات , وكانت تفضل تقعد هناك والي يساعدها ان طلال كان يدرس هناك ذيج الفترة .. عمرها 20 سنه .. رفيجة ريم والجوهرة مع انها مختلفة عنهم اشوي .. هادية وايد .. تمت صداقتهم مع بعض رغم ان الجوهرة ما شافت دانه الا مرتين في حياتها لانها ما كانت تجي لندن وايد ودانه ما تحب اتزور الدوحة كثير .. بس كانت دايم تتصل فيهم .. تخصصها اداة اعمال .. كارنجي ميلون
الاخ الثالث :
راشد : (45) سنه
زوجته متوفية من سنتين عايش مع امه في الدوحة , تربطع علاقة قوية مع عبد الله .. عشان تقارب السن مع ان عبد الله اكبر منه ..
عنده بنتين ..
امل : 20 سنه .. تخصص انجليزي .. مع دانه وريم والجوهرة بنفس الجامعه .. بس هي مب وايد معاهم .. ومتحترة من دانه لانها توها جاية الدوحة ومع هاي الكل ايحبها ويحب يقعد وياها ..
العنود : 17 سنه .. ثالث ثانوي .. ناعمه .. وهادية وفي حالها .. الكل ايحبها ويحب يقعد معاها لطيبة قلبها .. ادعوا لها تجيب نسبة ههههه ..

8 - 7 - 2014, 11:18 AM

الفصل الاول ..
دخلت في الظلام وشافتها قاعدة بروحها .. لا حول ولا قوة الا بالله .. هاي لين متى بتسوي بعمرها جي .. ما يسوى علينا .. كانت قاعدة ع السرير وتسمع اغنية انسى لماجد المهندس ..
فتحت الليتات .. ودشت
نور: دانه .. دانه .. دانوووووووووووووووووووو
دانه : هلا ..
نور: شعندج قاعدة في الظلام ..
دانه: لا ولا شيء ..
نور: دانوا بتتكلمين ولا اشلون ..
دانه: اففففففف .. اتكلم شاقول يعني .. مو حرام عليكم الي تسونه فيني .. نور انا مستحيل استحمل هالعيشة .. تعبت والله العظيم تعبت .. اتكلم شاقول انا في حد ما كلمته .. نور والي سلمج كلمي ابوي !!
نور: اكلم ابوي شاقوله .. اقوله بنتك المحترمه ما تبي تعيش وياكم تبي تهاجر واتروح لندن ..!! بالله عليج هاي كلام ناس عاقلين ..
دانه : نور حبيبتي افهميني .. انا من يوم ما وعيت ع الدنيا وانا هناك .. ما جيت الدوحة الا مرة .. يوم ولادتج بفهد .. وبنفس الوقت صادف عرس خليفه بس !!
نور: وهاي غلطت ابوي كان مدلعج وايد ..
دانه: لا دلع ولا شيء .. بس حضي كان حلو .. كل ما اقولهم انا مب رايحة ايكون في حد بيتم .. يا ابوي يطلع له شغل .. يا طلال ايكون هناك ..
نور: اقول بلا كلام زايد وافهمي حبيبتي .. روحة وعيشة هناك مافي .. يا دانه صار لج 3 شهور هني .. خلاص .. المفروض اتكونين تاقلمتي ع العيشة هني ..
دانه: نور اتعرفين لما تعيشين طول عمرج بمكان وفجأه تنتقلين .. انا تاقلمت ما اقولج لاء .. بس مشتاقة للقعدة هناك .. مشتاقة لجامعتي . لربعي .. لبيتنا لكل شيء ..
نور: يا يمه ... هالكلام الي تقولينه انسية حبيبتي .. ابوي وامي ما عاجبهم حالج .. اهتمي بدراستج بمستقبلج .. وان شاء الله في الاجازات شي طبيعي بتروحين هناك .. اما تحولين هناك مرة ثانية ما في .. سفر بروحج لا تحلمين ..
دانه: الا فهد متى ان شاء الله يروح الجامعه !!!!!!!!!!!!!!!!!
نور: بعد سنتين ليش ..
دانه: افففففف باكون متخرجة ..
نور: ومتزوجة ان شاء الله ..
دانه: شهالكلام الله يهداج .. انا هني مب قادرة اتاقلم تبيني اتزوج .. مستحيل اعيش هني افففففف
نور: دانووووووو انتي الحجي معاج ضايع .. تعالي تحت الكل يسأل عنج .
دانه: ان شاء الله ام طلال اي اوامر ثانية ..
نور: سلامتج حبيبتي ..

كانوا قاعدين في الصاله الفوقية من الملل ولا عارفين شيسون ..
الجوهرة : ريمي .. ريم .. شتسوين صار لج ساعه ..
ريم: يعني شاسوي .. قاعدة اكلم العنوود ..
الجورة : اند واي ..
ريم: ليكون ريلي وانا ما دري شدخلج ..
الجوهرة : وانتي كل ما قلنا شيء قلتي ريلي الله يعين هالريل الي بياخذج ..
ريم : والله يحمد ربه .. ايحصله الريم بنت عبدالله ..
الجوهرة : اقول بلا هذرة زايدة خالتج وين ..
ريم: اي خاله !! ما عندنا خوال في العايله ههههههههههه
الجوهرة: عبالج اتنكتين ويا الوية .. دانوووووو وين خل اتجي بالمرة ..

8 - 7 - 2014, 11:19 AM

ريم : دقيت عليها ما ترد .. يمكن الجوال ع السايلنت ولا شيء ..
الجوهرة : تصدقين ملل ..
ريم: ادري !!
الجوهرة : اقوووووول متى بيبون نور ..
ريم: والله لوعتوا جبدي مع هالنور مالكم .. ما ادري ..
الجوهرة: حرام عليج والله المسلسل ايهبل ..
ريم: ههههههههه افففف اتصدقين حتى امي عائشة اتشوفه ..
الجوهرة: ههههههههههههههههه ..
ريم: وبعدين توها الساعه 7 .. باقي على المسلسل مالكم ..
الجوهرة: هههههههههههه شفيج معصبة كله مالكم مالكم .. تيكت ايزي يا عزيزي الحياه حلوة ..
فهد: السلام وعليكم ..
الجوهرة: عليكم السلام مرحبا الساع
فهد: هههههههههههه ريموووو شسالفت عمتج اليوم ..
ريم: والله ما ادري عنها يا زول هههههههههههههههههه ..
الجوهرة: هييي انت وين رايح ..
فهد: رايح اسلم على امي هيا .. ليش !!!!!!
الجوهرة: لا سلامتك .. ......... اقول ريمي
ريم وهي قاعدة اتقلب بالتلفزيون وبدون نفس : هلااااااااااا
الجوهرة: اشلونها دانوا الحين ..
ريم: اتصدقين ما دري .. اخر مرة كلمتها اول امس .. وكانت عادية ..
الجوهرة : بس هي جد ما عندها سالفه ..
ريم: شنو ما عندها سالفه .. مرة وحدة الحياه تغيرت عليها .. هي هناك كانت حياتها غير .. اسئليني انا .. جامعه مختلفة ربع مختلفين .. حتى في ابسط الاشياء مثل السواقة .. تراها كانت تسوق هناك .. تطلع على كيفها .. جات هني خليفة منعها من السواقه .. يدي قالها ما في طلعه بروحج .. ربعها تغيروا فجأه .. راحت مكان ما تعرف في حد .. حتى اهلها اول مرة اتشوفهم ..
الجوهرة: ادري .. بس بعد .. ليش ما تيي تقعد ويانا اتسولف ..
ريم: ههههههههههههه سكتي هي اول يوم جات في بيتكم شافتت يدتي من يومها حرمه ما تجي مرة ثانية ..
الجوهرة : ليــــــــش ..
ريم: هههههههههه اسكتي اول ما دشت عاد خبرج هي ما تعرف خالد منو ولا تعرف جاسم .. عبالها عمامي او شيء جي .. فصخت العباية ودخلت اتصارخ عندها الحياه حلوة ..
الجوهرة: افففففف .. ويدتي بدت مناحة شطول ..
ريم: ههههههههههههه والله يدتي ضحكتني .. مع عصاتها .. ههههههههه مسكينه دودو ..
الجوهرة: والله ما تنلام .. ولا تجي اتدرعم مني والطريج .. بس معقوله ما تعرف خواني ..
ريم: يعني بذمتج هي متى شافتهم .. اخر مرة يوم احنا صغار يوم سافرنا جميع للندن .. حتى انا لولا انهم عمامي جان ما عرفتهم ..
- هاااااااااااااااااااااااااي
ريم: ههههههههه هلا والله .. جان ما يتي ..
العنود: والله ما بغيت بس كسرتوا خاطري هههههههههه
الجوهرة: الا وين امل ..
العنود : كانت نايمه .. بس اسكتوا امسكتني يدتي .. ما بغت اتطلعني الا بطلعت الروح افففف
الجوهرة: هههههه ليش ..
العنود: منو هناك .. انزين شيسون .. يمه ليكون الصبيان هناك .. انزين سلمي اول ما تدخلين وبوسي راس عمامج ..
ريم: هههههههههه فديتها عيوزتنا والله ..
العنود: اقول انتوا جايبيني اهني اناظر

8 - 7 - 2014, 11:19 AM

العنود: اقول انتوا جايبيني اهني اناظركم .. ما عندكم افلام شيء .. سوالف !!!!
الجوهرة: ههههههههههه شجاب الافلام للسوالف ..
العنود: اهو .. شيء انسوية ..
ريم: يختي الاجازة ملل .. مفكرة اكلم ابوي ايسفرنا ....
العنود: ايسفرج بروحج واحناااا..
ريم: تذكرين من كم سنه يوم رحنا كلنا لندن ويا بعض .. والله كانت احلى سفرة .. خل نقنعهم ايسونها لنا .
العنود: ههههههههه اية والله كانت احلى سفرة .. وبعد عشان دانوووو ما تحن علينا ودوني لندن ودوني لندن ههههههه ..
الجوهرة: هههههههههههههه
بو عبدالله : السلام عليكم ..
ريم: وعليكم السلام هلا يدي ..
راحوا البنات ايحبون راس ابوهم ويسلمون عليه ..
بو عبدالله: الجوهرة يبة جاسم وينه ..
الجوهرة: طالع .. يبه توها الساعه 8 ونص
بو عبدالله : انزين دقي على اخوج قوليله ابوي يبيك ضروري ..
-------------------------------------------------------------
كانوا العايله كلها متجمعه .. دانه وابراهيم وعائشة ونور وطلال ..
ابراهيم : ها يا دانه .. اشفيج يبة معصبة وقاعدة في حالج ..
دانه: لا يبه سلامتك ..
مال طلال على دانه الي كانت قاعدة جمبه ..
طلال: دانوووووو خلاص .. لا تعورين راسج الي تبينه ما راح ايصير ..
دانه: طلال احس نفسي متملله .. كله محبوسة بالبيت , ومفي حد ايطلعني وغير جي ما عندي ربع اقعد وياهم .. اففففففف
طلال: بس جي هاي الي مضايقج .. طلعه واطلعج تامرين امر .. وربع عندج البنات وعندج صديق وهو انا .. هاي الشيء ما راح اتحصلينه برع الدوحة ( وغمز لها )
دانه: ههههههههههههههههه الله يقطع بليسك ..
نور (( وهي تبتسم )) : اخيرا شفناج تضحكين ..
طلال: اية انا ناوي اطلع دانوووو .. يالله الشيخة دانه قومي .
دانه: ويـــــــــن
طلال: تطلعين ولا لاء .. يله عشان اتعرفين ان الحياه في الدوحة ما تعوض مو تقولين لي لندن وما دري شنو ..
دانه: ههههههههه اوكي دقيقة البس واجي ..
----------------------------------------------
جاسم: السلام عليكم ..
ريم والعنود : وعليكم السلام ..
جاسم: شالسالفه !!! ووين الجوهرة
دخلت الجوهرة وهي شاله مجموعه افلام ..
الجوهرة: فديتني اول ما تدخل تسال عني !!!!!
جاسم: من زينج .. شالسالفه ليش داقه ..
الجوهرة: مو انا الي ابيك ابوووووي ..
جاسم ( والاستغراب مالي وجهه): ابوووي !!!!!!!!!!!!!!!!!!!!!!
ريم: جسووم روح ل يدي بسرعه تراه بيعصب ..
--------------------
جات لهم دانه وهي تركض ..
ام خليفة: يمه اشوي اشوي ..
ابو خليفة : ههههههههه خليها تستانس يا مرة .. ما بغينا انشوف الضحكه على وجها
دانه: طلول يله ..
طلال: بل ما يسوى علي .. اتفضلي الشيخة دانه .. مع السلامه ..
كلهم : مع السلامه ..
نور: انزين يبة وهو متى كلمك بالموضوع ..
بو خليفة : والله انس بالليل يا بنيتي بس احنا مترددين وايد ..
ام خليفة: تبي الصراحة يا ابراهيم الريال ما يعيبة شيء وما ينرد ..
نور: اية والله يا يبى انا مع امي .

8 - 7 - 2014, 11:20 AM

ابو خليفة: بس البنت لحد الحين صغيرة ..
ام خليفة: لا البنت لا صغيرة ولا شيء انا يوم كنت كبرها كانت نور في حضني ..
نور: والله ما ادري شاقول .. الريال ما ينعاب وحرام انردة .. انا افكر فيها .. اشلون بتقدرر تتاقلم دام هي على العيشة هني مسوتلنا سالفه ..
ام خليفة: شوفي يا يمه اختج مدلعه .. ما بيعدلها غير الزواج .. ولا شله هالدلع كله .. كل الناس عاشو هناك .. وردوا وكملوا حياتهم طبيعي .. محد فكر مثلها ..
--------------------------
جاسم: يبة انت شقاعد اتقول .. مستحيل مستحيل
ابو عبدالله: شوف يا ولدي هاي عين العقل .. لازم اتسوية ..
جاسم(( وبدا صوته يرتفع)): يبى انت بتدمر حياتي .. انت شقاعد اتقول .. قلت لك مستحيل الي انت اتقوله ..
ابو عبدالله: لا ترفع صوتك على ابوك فاهم ..
جاسم: السموحة يبى ..
ابو عبدالله: شوف يا ولدي .. هذة بنت عمك .. وانت لازم تاخذها .. وبعدين هذا كلام جدك الله يرحمه ..
جاسم: ويدي شنو ايمشي الكلام على كيفة .. يدي مات يا بية مااااات ..
ابو عبدالله(( وبدى ايعصب)): شوف يا جاسم .. انا تكلمت معاك بالطيب .. بتاخذها يعني تاخذها .. وبعدين انا كلمت ابوها عن الموضوع والخطبة تمت مو ناقص غير موافقة البنت ..
جاسم: شنووووو والمعرس اخر من يعلم مثلا .. يبى انت شقاعد اتقول .. هذة حياتي مستقبلي .. اشلون اقضية مع وحدة ما عرفها .. معرفتي فيها ما تتعدى السلام .. هذا وانا ما اذكر اني شفتها بعد ..
ابو عبدالله: استح على وجهك .. واحنا من متى انشوف الحريم قبل لا نخطبهم هاااا .. مب عيب عليك اتقول هالكلام الفاضي ..
(( طلع وهو مب عارف شيسوي .. اسودت الدنيا في ويهة اي سودت هو يعرف بحجم المشاكل مع ابوة .. وانهم دوم يتهاوشون بس مو لهالدرجة .. مب لدرجة ان يخطبله من دون علمه ابوه حطاه جدام الامر الواقع .. وهو محتاروضايع ومو عارف شيسوي))

يا ترى اشلون راح اتكون حياه دانه في المستقبل .. هل راح يصير شيء جديد ؟؟
منو هالشخص الي متقدم لدانه واهها مترددينن ايخبرونها بالموضوع ولا لاء ؟؟
شسالفه جاسم .. وشنو راح ايكون قرراة بيوافق ولا بيتصرف تصرف ثاني ؟؟

8 - 7 - 2014, 11:20 AM

الفصل الثاني ..

كان قاعد ع البحر .. المكان الوحيد الي يرتاح فية , ويحب يقعد فية , يقدر ايفضف ويقوله كل الي يبية , ليش انا ليش ....... شهالحركة البايخة .. الحين معقوله ابوي ويدتي يتصرفون هالتصرف .. انزين انا شذنبي .. هي شذنبها !!! تعيش مع واحد ما يدانيها ...
- جاسم .. خرعتني شالسالفه ...............
جاسم (بدون اي اهتمام حتى ما شال عينه من ع البحر ): هلا خالد
خالد: جاسم شفيك !!!!!!!!!
جاسم: ما قالو لك ..
خالد: عن شنو ..
جاسم : ابوي ويدتي خطبولي دانه .......
خالد: هههههههههههههههههههههههههههههههههههه
جاسم: لحظة لحظة انا محتر وشايل الدنيا فوق راسي وانت تضحك الحين شلي يضحك بالله عليك ..
خالد: انت شلي معصبك .. عادي مصيرك بتتزوج .. وبتتزوج بهالطريقة بعد .. ليش انت معتقد انهم بيخلونك تختارها وما دري شنو ..
جاسم: ما قلت جي .. بس دانه لا لا ......
خالد: ليش انت شايف عليها شيء .
جاسم: يا خي يعني ما تشوفها .. ما تصلح لي مدلعه وايد وفوق هاي متربية برع ..
خالد: عن هالحجي الفاضي .. انت طول عمرك كنت تبي وحدة متفتحة اشوي .. وفوق هاي دانه تربية عمك .. الي معزته من معزة ابوك عندك .. شوف جسوم لو تبي رايي دانه اكثر وحدة تنفع لك ......
جاسم: انت شنوووووووو (( وبدى يعصب ويرفع صوته)) بتذبحنت اقولك ما بيها .. ما بيها .. ليش ما خطبوهااا لك ..
(( اكيـــــــــــد ما تعرفون من خالد .. بدري هههههههه ... خالد هو اخو جاسم من الرضاعه .. وما يفترقون نهائيا من يوم وهمه صغار .. خالد وحيد امه وابوة .. توفوا من يوم وهو صغار وربته خالته الي هي ام عبدالله .. ))
----------------------------------------------
طلال(( وهو يصرخ)): دانوووووووو وقفي مب جي ..
دانه (( بخوف)) : ما دري اشلون اشلون ...
طلال: انتي بتودينا بستين داهية .. اكاه البيت ادخلي اشوي اشوي ..
دانه: عبالك ما عرف اسوق .. ترا كنت اسوق بلندن .. افففففف بس انتوا سياراتكم مب طبيعية ..
طلال: الشره مب عليك على الي اقولج سوقي ..
دانه: افففففف وانت ليش معصب .. يله كاني جدام بيت جدي تنزل هني ..
طلال: انتي الي بتنزلين هني ..
دانه: شنوووووووووووووو
طلال: دانو عن العبط انتي في حديقة بيتكم البيوت احذا بعض ..
دانه: بس بعد ...
(( الجد قبل لا يتوفى كان مسوي بيوت لعياله جنبهم على اساس ان يكونون كلهم عندهم نفس الحديقة .. الا ابو عبدالله .. الي كان بيته يبعد حوالي شارعين .. كان بيته كبير وشاري اراضي لعياله حوله عشان ما يبعدون .. عبدالله , وجاسم (وطلال وخالد)الي يعدهم عياله ..
جاسم قاعدين يأثثون بيته الحين ))

8 - 7 - 2014, 11:21 AM

طلال: يله انزلي ..
دانه: لاااااااا .. وقف عند باب بيتنا ..
طلال: دانووووووو يله
دانه: نو نو نو
(( يرن تلفون السياره بهاللحظة ))
طلال: الووووووووووووو
خالد: هلا بو عبدالله ..
طلال: اهلين خالد ..
خالد: وينك في ..
طلال: بيت جدي العود ليش في شيء ..
خالد: ترانا في الكوفي شوب لو حاب اتجي .. من زمان عنك ..
طلال: لا يا شيخ ولا كنا ويا بعض بالدوام .. يله اخلص من المشكله الي جدامي واجي ..
خالد: ههههههههههه مع السلامه ..
دانه: يله وصلني عشان اتروح لربعك ..
طلال: دانو والله مب فاضي .. (( يشوف ساعه السيارة)) دانوووووووو ترى الساعه 10
دانه: شنووووووو .. بسرعه بسرعه .. يله
طلال ( ببرود اعصاب): نو
دانه: اووووف ما منك فايدة .. خل انزل واعلم امك عن حركاتك .. باي
طلال: ههههههههههه
(( والمسكينه راحت تركض ركيض ما تبي اتفوت المسلسل .. حتى رفعت عبايتها وركضت هههههههه))
--------------------------------------------
كانت الجدة قاعدة جدام التلفزون تشرب قهوتها .. الا وامل تجي ..
امل: السلام عليكم ..
ام محمد: وعليكم السلام يمه ....
امل: اشلونج يدتي ..
ام محمد: وي .. الحمد لله يمه .. امل وينج في من الصبح ؟؟
امل: يدتي كنت نايمه خبرج ما عندنا شيء انسوية بالبيت ..
ام محمد: ورااااا ما رحتي مع اختج عند البنات ..
امل: ليش عندوووو طلعت ..
ام محمد: اية يمه راحت بيت عمج محمد ..
امل: اووووووووووووووووف
ام محمد (( بعصبية)): املوو وصمخ مو عيب عليج اتقولين جي جدام يدتج .. وبعدين اشفية بيت عمج هاااا..
امل: يدووو انا ما قلت شيء ..
ام محمد: وهالتافأف .. شنوووووووو ها ..
امل: يدو سلامتج بس متملله ما في اسويه ..
العنووووووود: هاااااااي every body
الجدة: العنووووود .. وصمخ شهالكلماات .. تدرين اني ما حب لغة الشقر والحمر
العنود: هههههههههههههههههههههههههههاي
امل: الساعه 11 بدري
العنود: كنت في بيت عمي شفيج .. وبعدين طالعنا نور وطلعت ويا ريمو هي راحت بيت يدها وانا رديت بيتنا ..
الجدة: اية يمه صله الرحم زينه وانا امج .. انا رايحة انام ..
امل(( وهي اتقوم عشان اتساعد جدتها على المشي)) : دانوووو كانت هناك
العنود: لا .. اتصلت فيها الجوهرة وقالت انها طالعه ويا طلال ..
امل: اهااااااا,,
----------------------------

8 - 7 - 2014, 11:22 AM

----------------------------
كانت قاعدة جدام التلفزيوون .. وهي متحسرة على الحلقة مسكينه نور وايد متعذبة مع مهند بس عابدين هالدب .. كل شيء من تحت راسة اوووووف ايحر .. لو اشوفه جدامي اعطية طراق معتبر والله العظيم ..
(( ولا تسمع حد ايناديها من المكتب ))
- دانه .. دانه
دانه: نعم يمى ..
ام خليفة: تعالي اشوي حبيبتي ..
اففففف .. شيبون هاذيله الحين .. بروحي مقهورة والسبة هالحلقة الغبية ..
دانه: هاي مامي .. دادي .. في شيء
ابو خليفة: استريحي اشوي دودو
قعدت بهدوء على الكرسي الي مجابل امها وابوها وهي متخرعه اكيد في شيء ولا جان ما نادوني بهالطريقة .. بس ...... شنو .... اوف لو نهال جدامي كان ذبحتها هي بعد .. دانوا عقلي .. اف هاي مسلسل .. شوفي امج وابوج شيبون ..
دانه: امر يبة .. في شيء
ابو خليفة: شوفي يا بنيتي .. انتي كبرتي ما شاء الله عليج .. في ناس يبون يخطبونج ..
دانه: لاء .. يبة انا مو موافقة
ام خليفة: اسمعي يا بنيتي .. الي خاطبج هو جاسم ولد عمج ..
دانه: سووووو .. مام نو .. اي كانت( mom. No I can't (
ابو خليفة: يا بنتي هذا ولد عمج ..
دانه: يبى يعني عشانه ولد عمي لازم اوافق بالغصب .. انا مو موافقة يبى ..
ام خليفة: انزين يا بنيتي استخيري وان شاء الله ما يصير الا الخير
دانه(( وفي عيونها الصيحة خلاص)) : يمه انا قلت قرار نهائي .. شقالولج اروح اتزوج خلطبيطة ..
ابو خليفة(( وهو جد بدى يعصب )): شوفي يا بنيتي هذا ولد عمج .. يعني محد راح ايعرف قدرج ومكانتج كثرة .. وجاسم ولدي واعرفه زين بيحطج على عينج وراسج .. فكري بهدوء ووزني الامور براسج .. لاني عطيت الريايل كلمه ومستحيل اتراجع عنها ..
دانه: يعني شنو يبى بتجبرني ..........
ابو خليفة: لو كنتي هبله وما تعرفين مصلحتج شيء طبيعي اجبرج .. ولا اخليج اتضيعين نفسج .. هذا ريال ما ينرد وانا ابوج .. كفاية اني مربيه على ايدي ..
دانه(( وهي تصارخ )): لاء لاء . يبى انا مو موافقة اول شيء اتجيبوني هني بالغصب .. وبعدين اتزوجوني بالغصب .. انا شنو ما لي راي .. ما اقدر اتحكم في حياتي ..
ابو خليفة (( عصب عليها )): دانـــــــــــــــــــــــــه .. جب ولا كلمه .. انجلعي براااااااااا
------------------------------
كانت اتفرفر في التلفزيون .. اما اختها كانت اتشوف اخر اخبار المنتدى ..
امل: اوووووووووف باجر الاربعاء ..
العنود: يعني ..
امل: يعني ميلس الرجاجيل يا فالحة .. واكيد بنات عمج بيجون عندنا .. عشان يدتي
العنود: خل ايجون مو احسن من هالملل الي قاعدين فيه على الاقل نقد وياهم ..انا لو ربع جدتي جاو الحين باروح ابسط عندهم ..
امل: هههههههههههههههاي .. بنات عمج ما عندي معاهم اي مشكله .. بس دانو هاي ما ادانيها .
العنود: حرام عليج والله انها طيبة ..
امل: لا طيبة ولا شيء .. اتحر !! اتسوي نفسها مسكينه عشان الكل ايحبها ..

8 - 7 - 2014, 11:23 AM

العنود: امووووووووول لا تقولين جي .. تراها صج مسكينه وفي حالها ..
راشد: شيسون بناتي الحلوين ..
العنود: هلا يبى اخبارك ((؟ راحت حبة راسة .. وطبعا امل سوت مثلها))
راشد: الحمد لله يبى .. الا وين جدتكم
العنود: راحت تنام ..
راشد: امل .. جيبي لي قلاص ماي
امل : ان شاء الله ..
راشد: وانتي يا بنتي يا العنود جاهزة يبى للدوام ..
العنود: ههههههههه اية يبى بس لين الحين باقي شهر ونص للاجازة .. والله ما ودي اداوم احس باكون في فيلم رعب ههههههههههههه
راشد: ههههههههههههههههههههه .....
-----------------------------------------------

المواضيع المتشابهه لموضوع: هو الحب يا عمري شويه لموضوع: هو الحب يا عمري شويه
الموضوع	كاتب الموضوع	المنتدى	مشاركات	آخر مشاركة
حسك تسرق التفكير من فكري و حسك كل عمري الجاي من عمري	همسه الشوق	همس عالم حواء	6	15 - 8 - 2021 04:59 AM
امواج زوجه	همسه الشوق	همس للحياة الزوجية	4	29 - 7 - 2015 02:55 PM
ما يجوز هذي زوجه سمره هذي زوجه بيضا ابو تركي راس تنوره	جروح الم	همس الشعر و الشيلات الصوتيه	4	22 - 7 - 2015 07:25 AM
ابي نسى معك عمري واعيش الحب في عمرك	استثنائيه	همس الشعر والقوافي	6	16 - 5 - 2013 01:40 PM
مذكرات زوجه	الريم..	همس للقصص وحكايات وروايات	2	6 - 1 - 2011 01:14 PM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع

هو الحب يا عمري شويه

همس للقصص وحكايات وروايات