رواية فارس احلامي مشاعل وطلال

12 - 8 - 2014, 04:32 PM

لمياء: طلال خلاص انساها,, الف وحده تتمناك ,,, واولهم غاده بنت عمتي,, لاتضيع عمرك ووقتك مع وحده مرتبطه
طلال يطالع لمياء بعصبيه: لمو انا ماجبتك هنا ع شان تحبطيني ,, انا جبتك معاي انتي ونواف ع شان تساعدوني اني اكره بندر بحياته,, ونصايحك انا في غنى عنها
نواف: طلال ايش رايك ندخل غرفته ونربطه ونخليك تطلع تتمشى مع ميشو ,, وخليه هو مسكين بغرفته يبكي
طلال مع انه كان معصب بس ضحك ع كلام نواف البرئ
طلال: لمو يا انك تساعديني او اطلعي من الموضوع كله ولاتدخلي
لمياء تحب طلال مره وماودها تزعله: اوكي انا راح انضم لحزبكم ,,, بس ايش راح تسوو
طلال:قدامنا يوم واحد بس لان رحلتنا ورحلتهم بكره الفجر
لمياء بصدمه: وجايبنا من الرياض لهنا ع شان تنكد ع بندر بيوم واحد
نواف: لميوه احمدي ربك هو مسفرك ع حسابه ومسكنك وماكلك يالدبا
لمياء: دبا بعينك ,, اصلا انا نحيفه
نواف يبي يقهرها : هههههه ,, اجل ليش تشتركي بدايت سنتر وانتي نحيفه
لمياء: اسكت بس انت ايش عرفك اصلا انا احافظ ع جسمي
كانت لمياء مليانه شوي وكانت تعاني لان كل بيتهم نحاف ومهتمين بالرشاقه,, ع شان كذا كانوا يجبروها تسوي دايت ع شان ما تفشلهم
طلال قفلت معاه ايش خلاه يجيبهم معاه ,,كله ع شان يساعدوه ينتقم من بندر ,,, وهم الحين يتطاقوا
طلال : ممكن تتركوا مشاكلكم لحد مانرجع
نواف : دور لمياء الحين ,, انا خليت ميشو تجي هنا
طلال كان يفكر كيف يقهر بندر
حس طلال انه مكتوم وحب يطلع يشم هواء,, وقف عند بوابه الاوتيل ,,, وشاف مشاعل مع بندر ,,, بالكوفي الي قدام الاوتيل,,وكان بندر يطالع مشاعل بكل سعاده وحب,, ومشاعل كانت مستحيه
طلال مات من القهر ,, حس بالغيره تاكله اكل,, انقهر من مشاعل لانها جالسه مع بندر وتبتسم له,,المفروض تضربه مو تبتسم له,, حقد عليها وانقهر ,, الغيره مو مخليته يركز ع شي,, مرت بجنبه بنت المانيه مقبوله نوعا ما,,, طالعها طلال وخطرت ع باله خطه ماكان يعرف مدى نجاحها
طلال: هاي
البنت تتلفت تدور لمين يقول هاي ولما عرفت انها لها ,, ابتسمت لطلال والي انجنت ع وسامته : هاي
طلال: are you sara
البنت : no
طلال : oh , I am sorry
طلال حركات مسوي مشبه ,, والبنت ماكذبت خبر قامت تتميلح عند طلال,, وهو ماقصر انواع الغزل فيها,, طلب منها انه يعزمها ع كوفي ,, هي انجنت من الفرحه
دخلت معاه الكوفي ,, وكان ماسكها مع خصرها وهي شوي وتضمه
جلس بالطاوله الي قدام مشاعل,, مشاعل في البدايه مانتبهت,, بس لما شافت شكل طلال مع هالبنت ,,, الغيره اشتعلت بركان بقلبها,,, جد وقح جايب بنت هنا قدامها,, كان طلال مو معبرها ولاحتى يطالعها

12 - 8 - 2014, 05:04 PM

بندر: ايش رايك ناجل رحلتنا شوي ,,, انا مبسوط هنا خاصه اني معاك
مشاعل كانت مشغوله بمراقبه طلال مع هالبنت القبيحه ع قوله مشاعل: هاه
بندر انتبه لسرحانها ,, وانها تطالع شي ورى
التفت ع المكان,, ومثل ماتوقع طلال كان موجود مع بنت
بندر التفت ع مشاعل : هذا ايش جابه هنا
مشاعل كانت راح تقوم ع طلال وتضربه من الغيره والقهر الي حست فيهم,,ومن ناحيه طلال كان مبسوط لانه يبيها تحس بنار الغيره الي هو حاس فيها
مشاعل: بندر قوم خلنا نرجع الاوتيل
بندر حس ان مشاعل مقهوره ع شان البنت الي مع طلال وماحب يضايقها : يله حبيبتي
واختفي بندر مع مشاعل داخل الاوتيل
ولما وصل الاصنصير كان فاضي ,, دخلت مشاعل وبندر وكان راح يتقفل ,,, بس بهاللحظه جت يد صغيره ووقفت الباب ودخل نواف
وكان الاصنصير مافيه الانواف ومشاعل وبندر
نواف: هاي ميشو
مشاعل: هاي نواف
نواف: ميشو تدري انك حلوه مره ويبي لك تتزوجي واحد حلو مثل اخوي طلال
مشاعل سكتت ,, ايش جابه هذا اكيد طلالوه يبي ينرفز بندر
بندر: طيب ياشاطر لاتنسى تقول لاخوك ترى ميشو زواجها الاسبوع هذا اذا وده يحظر يقول لي ع شان ارسل له كروت دعوه
انفتح الاصنصير وطلعوا ثلاثتهم
نواف: لا ليش تعطيه كرت لانه هو العريس
ورجع نواف دخل الاصنصير
00000000000000000000000000000000000000000000000000 00000
اما طلال اول مااختفت مشاعل ترك هالبنت الالمانيه لوحدها والي استغربت تصرف طلال الغريب
طلال دخل الاوتيل,, لقى نواف يركض
طلال: ايش فيك تركض
نواف وهو بصعوبه يتنفس من الركض : بندر يقول انه راح يتزوج مشاعل هالاسبوع
طلال جلس بالوبي يفكر
نواف: طلال ماراح تسوي شي؟؟؟؟
طلال:اكيد راح اسوي اشياء مو شي
نواف: طيب تحرك الحين خلنا نروح نضربه
طلال: نواف الامور ماتنحل بالضرب فيه حلول احسن وامتع
نواف: انا بصراحه اكره بندر هذا ثقيل دم ومسوي نفسه قوي
لمياء قطعت عليهم سوالفهم
لمياء: اقول,,, عندي خطه لكم تجنن
نواف وطلال طالعوا بعض بصدمه ,,, من شوي كانت تنصح والحين تخطط
قالت لهم لمياء ع خطتها والي اعجبتهم مرررررررره,, وقرروا ينفذوها بوقت الغداء

12 - 8 - 2014, 05:05 PM

سعود دق ع مشاعل
سعود: ميشو حبيبتي ماتبي ننزل نتغدا
مشاعل: اوكي بس عطني 10 دقايق واكون جاهزه
سعود: اوكي انا راح اتصل ع بندر واقول له ينزل
مشاعل: اوكي
لبست مشاعل بسرعه كانت ميته جوع خاصه لانها مافطرت زين بسبب طلالوه
طلعت مشاعل من غرفتها من بعد ماكلمها بندر وقال لها انهم يستنوها تحت
سعود وبندر جالسين بالوبي يستنوا مشاعل
سعود: ايش رايك وين نروح نتغدا
بندر: والله ياسعود مدري,, تعرف انا اول مره اجي هنا
سعود: تدري احسن شي نطلب من التاكسي هو الي يودينا اي مطعم قريب
قاطعهم طلال بكل ادب : وليش تطلبوا من التاكسي وانا موجود
سعود وبندر التفتوا لطلال,,بندر كان معصب من لقافه طلال,اما سعود مستغرب ايش هالي قاط وجهه
طلال مد يده لسعود يسلم : معك طلال الـ.. ((وياشر ع لمياء)) ,, وهذا اختي لمياء صاحبه اختك مشاعل
مد يده سعود: هلا والله طلال
طلال بكل ادب : طبعا الاخ بندر تعرفت عليه بالصباح
بندر يتصنع الابتسامه: ايه
طلال: اختي بالصدفه شافت مشاعل اليوم الصباح وقت الفطور,, وفرصه سعيده الي شفناكم هنا,,,الواحد هنا يحس بالغربه ويحن لاهل ديرته
سعود اعجب باسلوب طلال,, واعجبه ستايل طلال: احنا والله اسعد
طلال: احنا رايحين نتغداء اذا تبو تخاونا ,, وترى انا ادل المانيا شارع شارع,, يعني ماراح اضيعكم
سعود اعجبه قدره طلال ع التحكم بالامور: والله لنا الشرف
انفتح باب الاصنصير وطلعت منه مشاعل والي انصدمت من طلال ,,, كان يسولف مع اخوها سعود,,, ايش يبي هالمجنون
كانت مشاعل لابسه جينز وتيشرت بنك مسكر من فوق وكان معطيها شكل طفولي
اما طلال ابهر مشاعل بلبسه,, كان لابس جينز لووست,, وقميص ابيض مخطط بخطوط سماويه خفيفه معطيته شكل جذاب وخطير
لمياء كانت اسرع من اي شخص وعلى طول سموت نفسها صاحبه مشاعل من 100000 سنه وضمتها بقوه
لمياء: هاااي ميشو ,, تصدقي شفتك الصباح والحين انا ميته شوق عليك
مشاعل استغربت اسلوب لمياء وعرفت انها خطه من خطط طلالوه
مشاعل: هاي لمو,,كيفك؟؟؟
لمياء: تمام بشوفتك
سعود: ميشو حبيبتي طلال يعرف مطعم حلو ,, ايش رايك نروح معاهم
مشاعل: لالا اخاف نضايقهم
طلال: لا بالعكس هالشي يسعدنا
سعود استغرب سكوت بندر ,,, شك ان بنرد عنده حاله نفسيه وانه يستحي من الغرباء لوووووووووووووول
طلعوا برا الاوتيل,, وكان طلال متصل ع السواق ,, لانهم يعرفوا سواق كويس بالمانيا وكان السواق تركي,,, لما يجوا المانيا كانوا يستاجروه,,, طبعا كانوا يستاجروا سياره من الاوتيل وكان نوعها بي ام دبليو بس فكر طلال ان السياره راح تكون صغيره عليهم فقرر انه يستاجر ليموزين
سعود اول ماشاف السياره انصدم ,, توقعها سياره متواضعه
ركبوا بالسياره ومن حظ مشاعل الشين ان طلال كان قدامها ,,, طبعا الموزين جلساتها غير السياره العاديه كان فيه مقعد يكفي لثلاث �

12 - 8 - 2014, 05:06 PM

ركبوا بالسياره ومن حظ مشاعل الشين ان طلال كان قدامها ,,, طبعا الموزين جلساتها غير السياره العاديه كان فيه مقعد يكفي لثلاث اشخاص ومقابله مقعد ثاني يكفي لثلاث اشخاص
كانت مشاعل جالسه ع يمين لمياء ونواف
اما مواجههم طلال وجنبه سعود واخر شي بندر,, وكان وجه طلال بوجه مشاعل وكانه قاصد هالحركه,, وكانت رجله قريبه من رجلها وكل شوي يدوس رجلها ويجننها
واحيانا يسوي نفسه يصلح جزمته ويقرص مشاعل مع رجلها,, وكانت تكتم الصرخه ع شان مايحس سعود
واخيرا وصلوا للمطعم والي كلهم استمتعوا باكله,,, وكان سعود منسجم مره مع طلال ,, واعجته شخصيته وثقته بنفسه
بعد الاكل قرر طلال انه ياخذ بهم لفه لاحلى الاماكن بالمانيا,, وكانت خطت لمياء ناجحه بتفوق,, لان بندر طول الوقت ساكت وقافله معاه,, وطلال تحققت امنيته ان مشاعل تكون معاه يوم كامل ,, حتى لو اخوها معاهم
لفوا مناطق واماكن كثير ,,,, وكان سعود مستمتع بهالجوله والي كان معاهم واحد خبير بهالبلد,, وماكان مظطر يوقف بكل مكان ويسال
وهم بالسياره,, مو عارفين وين يروحوا ,, لان الاراء مو وحده
بندر يبي يرجع للاوتيل لانه تعبان ع قولته,,, اما لمياء تبي السوق,, مشاعل ساكته,, سعود ماعنده مشكله اي مكان بس اهم شي مايرجع للاوتيل,, طلال يفكر وين يوديهم
قطع عليهم ارائهم البايخه واصدر حكم انهم الحين يودوه للملاهي,, وغمز لطلال
نواف: بندر اذا تبي نخلي السواق يوديك للاوتيل اوكي
بندر مجرد تفكيره ان راح يخلي مشاعل مع هالحقير وقف شعر راسه
بندر: لالا راح اروح معاكم
نواف: مو من شوي تقول انك تعبان
سعود مات ضحك ع خبث نواف ,,مع انه صغير بس ذكي
بندر: لا مو مشكله
راحوا للملاهي والي كانت كبيره
نواف: يله سعود تعال اركب معاي((نواف متعود يركب الالعاب الصعبه))
سعود: لا شكلها تخوف
نواف: انت رجال ولا لا؟؟؟
سعود: هههههههه ايش تشوف
نواف: انا اشوف رجال ,, بس اثبت لنا وتعال
طلال: ههههههههههه ,, نواف اسكت لاتخليه يتهور ويركب
نواف:هههههههههههه
سعود :يعني انت ونواف راح تركبوا
طلال: اكيد
نواف: تعال ولاتصير خواف
سعود توكل ع الله وقرر يركب
طلال: لمو ومشاعل تعالوا اركبوا معانا
سعود: لا ميشو لاتركبي عشان عيونك
مشاعل: اصلا مستحيل اركب ليش بايعه نفسي انا
لمياء: يله جايه اركب معاكم
سعود التفت ع بندر
سعود: بندر تعال اركب
بندر: لا يارجال انا اخاف

12 - 8 - 2014, 05:07 PM

طلال يطالعه بتحدي: تخاف,ههههههه هالكلمه المفروض ماتطلع من رجال
بندر انقهر وحس انها تحدي
بندر: من قال اني اخاف ,,, انا ماخاف من هالعبه ,, بس انا اخاف ماتكون عليها صيانه كويسه
سعود مات ضحك: عذر اقبح من ذنب
طلال مسك يد سعود: تعال يارجال شكله خواف
ودلخلوا العبه,, التفت طلال ع بندر وعطاه نظره احتقار
بندر بنفسه" الحين اخاف من لعبه وهو يسوي نفسه عند مشاعل قوي ومايخاف وتلقاه ميت خوف,,حتى اخته لمياء ركبت وبدون تردد,,, لازم اتغلب ع خوفي واركب,,, واثبت له اني ماخاف,, كلها دقيقه وتوقف"
راح يركض ودخل اللعبه
مشاعل: بندر راح تركب
بندر بكل فخر: ايه مصدقه اني اخاف اصلا انا متعود اركب هالالعاب
طلال مثل ماتوقع لقى بندر واقف جنبه يبي يلعب
ركب سعود وبندر جنب بعض ,, ونواف وطلال ركبوا ورى
طلال بهمس: متاكد انك ماتخاف من هاللعبه
نواف بهمس: لا يابن الحلال ركبتها الف مره ,, انت روح بسرعه قبل يشغلوا اللعبه
طلال: اوكي
طلال طلع من اللعبه بدون مايحس فيه احد,, انتظر لما اشتغلت اللعبه وراح يكمل خطت نواف الخبل ,, كان مخطط انه يركب سعود وبندر ويخلي طلال يجلس مع مشاعل لوحدهم
كانت مشاعل جالسه ع كرسي قدام اللعبه
جلس جنبها وهي مالتفت ع بالها مو طلال ,, لانها كانت تحسب طلال معاهم
لما جلس قال: تمني لخطيبك الرقيق رحله موفقه لمده ربع ساعه
مشاعل خافت : طلال انت مو معاهم؟؟؟
طلال يطالعها بحب: معقوله افوت ع نفسي فرصه اجلس فيها مع احلى ورده
مشاعل قفلت معاها معصبت من طلال لانه جالس يلعب ببندر وكانه لعبه بين يده ,,, انتبهت لكمله طلال ربع ساعه انجنت
مشاعل بصدمه: ربع ساعه؟؟
طلال: ايه اللعبه هذي غير انها سريعه ومخيفه ماراح تخليك الا بعد ربع ساعه ويمكن نص
مشاعل : وليش تخليهم يركبوا ,, ع شان كذا نزلت
طلال: بصراحه انا مليت من كثر ماركبها مع نوافوه,, ومستحيل اخليك لوحدك,, بس بندر الي تمدحيه شوفيه ركب وخلاك
مشاعل: حرام عليك تخليهم يركبوا
طلال تضايق: لاتخافي عليه ماراح يموت
مشاعل: عشان كذا تقنعهم يركبوا
طلال يبتسم: تتوقعي ساعه اقنعهم ع شان سواد عيونهم
مشاعل انقهرت من خبثه,, بس بنفس الوقت فرحت لانها معاه
قامت مشاعل تمشي بعيد عنه ,, مشى معاها ووقفت
مشاعل: طلال اتركني مابي امشي معاك,, ابي اكون لوحدي
طلال يرفع يدينه يستسلم : اوكي

12 - 8 - 2014, 05:07 PM

مشت خطوتين ووقفت بسرعه لان طلال وقف قدامها
حاولت تروح يمين ولف هو يمين يسد عليها الطريق,, لفت يسار ولف معاها ,, حطت يدينها ع خصرها وطالعته
مشاعل: طلالوه وبعدين
جلس طلال ع الارض من الضحك وكانت ضحكته عاليه مثل ضحكاته في الاوتيل صدق خبل ومرجوج
طلال: تصدقين اول مره تعجبني طلالوه كذا,, بالله ابي طلالوه ثانيه
مشاعل: اوووووووه جد انك فاضي,, ارجع للعبه احسن اكيد انتهوا
طلال قام بسرعه يلحقها : ههههههه,, تلقينه الحين في كينيا
مشاعل باستغراب : كينيا
طلال وهو ميت من الضحك : هههههههه من سرع اللعبه اكيد وصلته كينيا ,, تلقينه الحين يتشهد ولا فكر فيك,, وبعدين لسى ماخلصت 5 دقايق واللعبه قلت لك ماراح تعتقهم الا بعد ربع ساعه
مشاعل ولعت من طلال قهرها ,, حركاته بايخه
مشاعل تطالع الارض من التعصيب: طيب ممكن تبعد عن طريقي
طلال يهز راسه وكانه يقول لا
وفجاءه طلال شال مشاعل وكانها طفل بين يدينه وصار يركض بها ويدور بها
مشاعل: طلال نزلني ,, طلالوه ياحقير نزلني
وكانت تسمع صوت ضحكاته تملا المكان ,, وصوت دقات قلبها من الخوف ومن تاثير قرب طلال منها
مشاعل: الله يخليك نزلني ,, طلال بليززززززززززززز
حاولت تقاوم وتضربه برجلها بس كان اقوى من انها تقدر تهزه
وخيرا وقف طلال من الركض بجنب محل ايس كريم ونزلها ,, كان يتنفس بصعوبه من اثر الركض ومن اثر شيل مشاعل,,
طلال: تتذكري لما ضربتني بالكيكه انا الحين ابي اضربك بالايسكريم
مشاعل عطت طلال كف ,,, وتركته
طلال انصدم اول مره وحده تمد يدها عليه
مشاعل تعبت من الركض وماتدري وين تروح ,, حست انها ضايعه ,, خافت ,, هي الحين بمكان مجهول ولاتعرف انقليش,, مين تسال,, حتى اسم اللعبه ماتعرفه ,, وين تروح,, دورت ع طلال ماكان موجود,, يالله ايش تسوي ,, وين تروح,, صارت تدور بالملاهي مو عارفه وين تروح,,, بدت تبكي من الخوف ,,, حست بخوف يقتلها ,, غريبه بمكان ماتعرفه,,, طالعت ساعتها راح ع اللعبه ربع ساعه اكيد الحين نزلوا من اللعبه,, يارب تلقاهم,, وقفت مكانها ونزلت دموعها من الخوف
مشاعل تصارخ وهي تبكي: طلااااااااااااااااااااااااال ,, طلاااااااااال,, سعوووووووود
فيه احد قرصها مع ضهرها , التفتت بسرعه لقت طلال بوجهها,, من الخوف والرعب والضياع الي حست فيه,, وبدون ماتحس ضمت طلال
طلال كان ابواب السعاده انفتحت له ,,, ضمها بقوووه ,, وبحنان صار يمسح ع شعرها
طلال بحنان : ميشو لاتبكي ,, لاتخافي انا معاك,, وماراح اخليك ابد ,,, انا كنت وراك طول الوقت ,, مستحيل اخليك تضيعي,, ميشو لاتبكي خلاص انا جنبك
مشاعل : طلال لاتتركني ,,انا خايفه,, خلك معاي ,, طلال احبك
طلال كان مبسوط بهالكلمات ومو مصدق انها تطلع من مشاعل ,, كان وده ياخذها ويهرب بها بعيد عن اي شخص مكان مايكون فيه الا هو وهي
بعدت مشاعل عن حظن طلال بخوف لما سمع

12 - 8 - 2014, 05:09 PM

بعدت مشاعل عن حظن طلال بخوف لما سمعت صوت نواف
نواف: طلال وينكم سعود وبندر يدوروا عليكم
طلال: يعني المحروس رجع مامات باللعبه
نواف: لا والله مامات ,, انشالله الجايات اكثر
طلال : ههههههههههه
مشاعل بتانيب : طلال
طلال يرفع يده باستسلام: اوكي اسف
راحوا لاماكن اللعبه وكان لون بندر اخظر من التعصيب لووووووووول,, عرف ان طلال كان مخطط عشان يجلس مع مشاعل لوحدهم
اما سعود كان هادي
سعود: ماشالله هذا الي مايخاف اشوفك نزلت
طلال: هم نزلوني قالوا اللعبه ماتستحمل وزنك
سعود: ههههههههههههه, ابو التصريفه
طلال: سلك لي يارجال
بندر يتصنع المرح : يعني انت مو رجال لانك خواف
طلال: مو مهم اني اصير رجال عند الناس اهم شي اني رجال بنظر نفسي وبنظر حبيبتي
سعود استغرب جرئه طلال
تعشوا بالملاهي وبعدين رجعوا للاوتيل ,, كان سعود مره مبسوط بعلاقته الجديده مع طلال واخذ رقمه ع شان يزوره بالرياض
باللوبي
طلال يتصنع البراءه: احنا بكره رحلتنا الفجر((كان حاجز بنفس رحله مشاعل))
سعود: نفس رحلتنا ,, والله حلو نتخاوى بالطياره
طلال: والله من حظنا
طلع بندر وسعود ومشاعل غرفهم
بدلت مشاعل ملابسها وسمعت التلفون يدق
مشاعل بنفسها" هذا اكيد بندر اف منه ,, اكيد يبي يشتكي لي طلال"
مشاعل: الو
طلال: هلا بصاحبه احلا حظن بالدنيا
مشاعل انحرجت ,, ولاتقدر تهزئه لانها هي الي حظنته,, ايش راح يقول عنها انها وصخه ومو متربيه
مشاعل: طلال انت عارف اني كنت خايفه,, وماحسيت بالي سويته
طلال: وكلمه احبك ماكنتي بعد حاسه فيها
مشاعل: طلال ايش تبي
طلال: ابي اتفق معاك اننا نبعد بندر عن طريقنا
مشاعل: لاتحسب اني ع شان اليوم راح اتخلى عن بندر
طلال بعصبيه : يعني راح تستمري معاه
مشاعل: طبعا
طلال: اوكي خليه ينفعك
وقفل الخط بوجهها

12 - 8 - 2014, 05:10 PM

مشاعل حست بخوف ,, اول مره طلال يقفل بوجهها ,, واول مره يعصب عليها,, يالله اكيد زعل ,,, وما راح يدق عليها مره ثانيه,, بس ليش هي خايفه مايدق احسن ع الاقل ع شان تقدر تعيش مع بندر بسلام
قطع عليها افكارها صوت التلفون,, ردت بسرعه ع امل انه طلال
مشاعل: الو
طلال: ميشو نسيت اقول لك ,, تبي بندر لما اطلعه من حياتك احطه بكيس والا بعلبه
هالمره مشاعل قفلت بوجه طلال,, يالله مجنون هذا مايمل
كان لازم يطلعوا من الاوتيل الساعه 1 لان رحلتهم 3 الفجر,, حاولت تنام شوي تريح جسمها وماقدرت ,, لما تتذكر حظن طلال يطير النوم من عينها ,, كان احلا حظن حست فيه ,, ومو عارفه كيف تجرات وحظنته, بس كان حنون وحست ان طلال يحبها من قلب
0000000000000000000000000000000
في الطياره كان طلال مثل الهم ع قلب بندر ,, كان بندر جالس بالوسط وبجنبه نواف ,, اما ع يمين بندر كان جالس طلال بجنب لمياء وع اليسار سعود جنب مشاعل
انقهر من بين كل هالركاب مالقوا يحطوا جنبه الا هالبزر الكريه
نواف: هيه انت بعد يدك عن الكرسي حقي
بندر طالع يده كان طرف يده لامس الكرسي حق نواف, قال خلني اشيله ولاادخل في مشاكل مع هالمشكلجي
نواف: لاتتنفس قدام وجهي, اخاف يجيني مرض منك
بندر اتشت اخلاقه مايدري ايش يبي هالبزر منه
دعى ربه انه يصبره لما يوصلوا بالسلامه وينتهي هالكابوس
كانت الرحله ممتعه بالنسبه لطلال لان مشاعل بنفس الطياره ومو بعيده عنه,, اما سعود كان نايم,,, ومشاعل بين فتره والثانيه تسرق نظره ع مكان طلال وتتامله وتامل رجولته ,, وشكله الجذاب
ولمياء كانت مثل الراديو الي مايتسكر ,,, ازعجت طلال من كلامها الي ماينتهي والي حست ان الفرصه نزلت لها من السماء طلال جنبها,, اول مره يجلس يسمع سوالفها عن صاحباتها ومغامراتهم بالمدرسه ومع المدرسات,, طلال طفش منها وكان وده يرميها عند الطيار لما يوصلوا,, توسع صدره بالطريق
وصلوا اخيرا للرياض
راحت مشاعل ولمياء للحمام يلبسوا عبايتهم
لمياء: مدري ليش نلبسها الحين كل الي بالطياره شافونا
مشاعل: هههههههه
راحت مشاعل ع مكانها
وكانت لابسه العبايه ومتحجبه
اما لمياء كانت لابسه العبايه وراميه الطرحه ع كتوفها ,, استغربت مشاعل لان طلال كان يطلب منها انها تتغطى واخته حتى الحجاب مو متحجبه
طلال انتبه لنظرات مشاعل وصار ياشر لها بانها تغطي وجهها
طالعته باحتقار ورمت الطرحه ع كتوفها عناد فيه

12 - 8 - 2014, 05:10 PM

مشعل: لو سمحت اخوي متى توصل الرحله الي جايه من المانيا
الموضف: الحين توها وصلت
مشعل: مشكور
راح مشعل يركض ع شان يستقبل اخته والي اشتاق لها من قلب
بدوا الناس يطلعوا من الطياره ,, واخيرا شاف مشاعل ماسكه يد سعود ووراهم بندر
ركض ع مشاعل وضمها ,, مشاعل ماقدرت تتحمل كانت مره مشتاقه لمشعل وبكت بحظنه
مشعل: خلاص ميشو خلي دموع شوي لماما
مشاعل:هههههههههه مره اشتقت لكم
مشعل: واحنا اكثر ,,الحمدلله ع سلامتك يانورنا
مشاعل:طبعا انا نوركم انت مشعل يعني شعله وحده ,, اما انا مشاعل يعني شعلات كثيره
مشعل: هههههههههههههه
سعود: ميشو وين تعلمتي ثقل الدم فيه؟؟؟؟
مشاعل تتصنع الضحك: هاهاها
التفتت ع الصوت الي سمعته
طلال : انشالله نشوفكم ع خير يا سعود
سعود: طلال معاك رقمي والا
طلال: ايه ,,, طبعا نبيكم تزورونا انشالله
سعود: انشالله قريب,,, طلال هذا اخوي مشعل
طلال مد يده لمشعل: هلا ومرحبا مشعل
مشعل سلم ع طلال وابتسم له: هلا بك
سعود: مشعل هذا طلال الـ...
مشعل: تشرفنا
طلال: الشرف لي
مشعل: تفضل معانا ياطلال نوصلك
طلال: لاوالله ماودي اضايقكم وبعدين معاي الاهل ,,, وعموما السواق ينتظرنا برا ,, فرصه سعيده والله الي جمعتنا
سعود: احنا اسعد وترى مالي شغل فيك انت مواعدني انك تسير علي
طلال: ابشر ماطلبت شي اتشرف بدخول بيتكم يالغالي
سعود: الله يسلمك
طلال: مع السلامه
سعود ومشعل: مع السلامه
قبل يمشي طلال رمى نظره لمشاعل نستها هي وين او هي مين,, كانت تحبه بكل عيوبه واخطائه
00000000000000000000000000000000000000000000000000 000000
طلعوا ووقفوا عند بوابه المطار ينتظروا مشعل يجيب سيارته من الباركينق ,, شافوا سياره بنتلي جديده وكان فيها سواق ونزل يركض يفتح الابواب لطلال ونواف ولمياء,, ويركب الشناط
سعود: مشالله هذي سياره طلال ,, والله شكل الولد كاش
بندر بدون نفس: ايه
مشعل وقف ورا سياره طلال
ركب بندر قدام اما سعود ومشاعل ركبوا ورا
انتظروا لما سواق طلال حرك السياره ومشوا ,, وكانوا في طريقهم للبيت
سعود: مشاعل صاحبتك لمياء امها عربيه؟؟؟
مشاعل: لا ليش
سعود: حسيت ملامحهم مو عربيه ,, ماشالله طلال وسيم مره
بندر قفلت اخلاقه من جد انقهر ومات قهر ,,جالس يمدح طلال قدام مشاعل صدق وقح ولايراعي شعوره
مشعل: والله اول ماقلت لي هذا طلال انصدمت حسبته بيتكلم انقليش ماتوقعت ابد انه عربي
سعود فرح ان احد يشاركه رايه وتحمس: مشعل ماتحس كانه ممثل اجنبي
مشعل: ياخي احسه يشبه الي مع نانسي عجرم بفيديو كليبها
مشاعل تحمست: اي فيديو كليب؟؟؟
مشعل: ياناسي هواك
سعود: ايه صادق فيه لمحه منه,, بس طلال احلى
مشعل: هههههه ايش عندك شكلك معجب في الولد
سعود: هههههههههههه لا بس انا يعجبني الرجال الي يهتم بلبسه وجسمه ووسامته , وطلال احس انه لبيس صح
كانوا يتكلموا عن وسامته طلال عند

12 - 8 - 2014, 05:11 PM

كانوا يتكلموا عن وسامته طلال عند مشاعل وهالشي يقتلها ,,, هي تحاول تنساه وهم يصعبوا عليها الموضوع
مشعل يلتفت ع بندر: بندر ايش عندك ساكت
بندر: مافيه شي اتكلم فيه
مشعل حس بتوتر بندر بس ماكان يعرف ايش فيه ,, ما دري ان طاري طلال يسبب له قهر ويزيد حقده ع طلال
00000000000000000000000000000000000000000000000000 000000
نواف : كفك ياطلال
طلال عطاه يده وضربها نواف
لمياء: وربي انكم خبيثين ,, حرام عليكم الولد راح ينجن من القهر
طلال: خليه ينجن احسن علشان لما اخذ ميشو منه مايتعذب هههههههه
نواف: ههههههه,, ايه ونروح نزوره بمستشفى المجانين,, ونعطيه حلاوه بالفلفل خلها تشوي لسانه
طلال: الا قول نعطيه سم يقتله ويريحنا منه
نواف: لا ياغبي ندخل سجن عشان واحد مجنون
لمياء: يعني صدقتوا انه انجن الحين
طلال ونواف:هههههههههههههه
دق تلفون السياره ,, رد طلال
طلال: الو
ابو طلال: الحمدلله ع السلامه
طلال: الله يسلمك ,, شلونك بابا
ابو طلال: الحمدلله شلونك انت وشلون لميا ونواف
طلال: يبه عن الف والدوران انت متصل تتطمن ع نواف حبيب قلبك
ابو طلال يتجاهل اتهام ولده : ليش مقفل موبايلك
طلال تذكر موبايله : ايه بابا ذكرتني موبايلي ,, قفلته بالطياره ونسيت افتحه
ابو طلال: طيب عطني نواف
طلال: ابشر((ويكلم نواف)) نوافوه خذ ابوي يبيك
نواف:الحين نوافوه والا هناك العم نواف,, انا اوريك اذا ماقلت لبابا ع خططك
طلال سكر فم نواف: قسم بالله اذا قلت لابوي والله لدفنك هنا بالسياره
نواف يحاول يبعد يد طلال: امممم اممممممم
لمياء : طلال بعد يدك بتموته
طلال فك يده: بس اسمع طاري ميشو عند ابوي شوف ايش اسوي لك
نواف: طيب خلاص فكني
نواف اخذ التلفون: هلا بابا
ابو طلال: هلا بحبيبي هلا بولدي الغالي
نواف: بابا اشتقت لك
ابو طلال: انا الي راح يموتني الشوق ,, مره ثانيه لاتروح وتخلي بابا لوحده هنا
نواف: انت يابابا تسافر وتخليني دايما
انحرج ابو طلال: المهم حبيبي اذا جيت راح تلقى مفاجاه تنتظرك
نواف كان راح ينجن من الفرحه عارف مفاجات ابوه دايما حلوه: ايش هالمفاجاه يابابا
ابو طلال: لو قلت لك ايش هي ماراح تكون مفاجاه
قفل نواف من ابوه وهو متحمس يبي يعرف ايش هالمفاجاه
نواف يكلم السواق : منصور بسررررعه
منصور: ابشر طال عمرك
طلال: ايش الي ابشر تصدقه انت,, انشالله اذا طلع معاك وقال لك اسرع تسرع
نواف: ايه وليش مايسرع
طلال: وليش يسرع
نواف: بابا شاري لي مفاجاه وابي اوصل بسرعه
طلال: تبي توصل للبيت والا تبي توصل للقبر؟؟؟ منصور لاتسرع , وانت يانوافوه انا اوريك اذا طلعت من البيت هذا وجهي اجل اسرع هاه
نواف يحط رجل ع رجل: ههههههه ماتقدر تمنعني من الطلعه
طلال يلتفت عليه: وليش انشالله
نواف: انا ماسك عليك شي ,, واذا فضحتني راح افضحك
طلال ضحك ع نواف,, اعوذ بالله محد يقدر عليه,, كانت فكرته حلو�

المواضيع المتشابهه لموضوع: رواية فارس احلامي مشاعل وطلال لموضوع: رواية فارس احلامي مشاعل وطلال
الموضوع	كاتب الموضوع	المنتدى	مشاركات	آخر مشاركة
قصة رومانسية بعنوان فارس احلامي	همسه الشوق	همس للقصص وحكايات وروايات	1	30 - 11 - 2021 03:27 AM
رواية وانتبه لك ترى روحي معك رواية سعوديه للكاتبه	الحب ياسمين	همس للقصص وحكايات وروايات	9	4 - 4 - 2019 10:13 AM
رواية فهد و نوره رواية رومنسية سعودية كاملة	سجات التهاويل	همس للقصص وحكايات وروايات	23	8 - 6 - 2018 01:07 PM
رواية مشاعل	الحب ياسمين	همس للقصص وحكايات وروايات	8	12 - 6 - 2013 01:25 PM
فارس احلامي	ملكة الثلج	همس عذب الكلام والخواطر المنقوله	5	28 - 6 - 2011 12:39 AM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع

رواية فارس احلامي مشاعل وطلال

همس للقصص وحكايات وروايات