رواية فارس احلامي مشاعل وطلال

12 - 8 - 2014, 06:34 PM

نزلت نجود وخايفه ماتدري ايش تقول لمشعل وام مشعل,, نزلت عينها بالارض لما وصلت الصاله ع شان ماتظطر تناظر بعيون ام بندر وساره المتسائله,,, دخلت عند مشعل وام مشعل
مشعل : هاه عقلتيها
نجود تحاول تهدي الامور : بصراحه مشاعل مو راضيه تنزل او توافق لانها استخارت وربي ردها عن الزواج ,, ماندري يمكن يكون احسن لها
مشعل معصب : انتي بعد ايش الي احسن لها
نجود : ترفض الحين ولا ترفضه بعد الملكه ولا بعد الزواج, صح ولا لا
مشعل : حسبي الله عليها من بنت
دخل عند الرجال مايدري ايش يقول
دخل وكان منزل راسه بالارض
بندر قام من الفرحه اخيرا مشاعل صارت زوجته
ابو بندر مد يده لبندر: مبروك يابندر
بندر حب راس ابوه: الله يبارك فيك
الشيخ : مبروك يابندر
بندر: الله يبارك فيك
سعود : مبروك يالنسيب
بندر : الله يبارك فيك ((وغمز له)) عقبالك
سعود بتسم: الله يسمع منك
مشعل انصدم من الموقف وزاد صعوبه
مشعل: والله يابو بندر مدري ايش اقول لكم
وقفت الايدي عن السلام والمباركه,,, وكل ينتظر مشعل يكمل كلامه
مشعل: بصراحه البنت سودت وجهي
بندر بخوف: ايش صاير؟؟
مشعل: والله البنت قبل تجون كانت مبسوطه وتنتظركم بفرح,, بس لما جاء دور التوقيع,, رفضت,, مدري ايش صاير لها
ابو بندر: شلون رفضت ,, مو هي قالت للشيخ انها موافقه
مشعل: وهذا الي جنني
بندر كان ساكت وشاك ان ساره وطلال لهم علاقه بالموضوع
مشعل: انا جد اسف ومدري ايش اقول لكم
الشيخ حاول يهدي الامور: الخيره فيما اختاره الله,, يمكن كان شر لهم انهم يرتبطوا ببعض,, لله حكمه في كل شي سبحانه,,, والله يعوضكم انشالله
ابو بندر يحاول يكتم غضبه : ماصار الا كل خير,,, انا برا انتظرك يابندر , دق ع اهلك يطلعون
مشعل: والله اسفين يابو بندر بس تعرف مانقدر نغصبها
ابو بندر سكت وطلع بدون مايقول مع السلامه
بعده طلع الشيخ
بندر: مشعل ايش قاعد تقول ,, اكيد فيه لبس بالموضوع,, مشاعل كانت موافقه ,,, ايش الي تغير ,, يوقف الموضوع ع توقيع
مشعل: والله علمي علمك,,, والله اني منحرج منك ومدري ايش اقول لك
بندر منصدم ومقهور : يامشعل اكيد الموضوع فيه شي,, فيه احد لعب براسها وغير رايها,,, مو معقوله شخص يرفض كذا بدون مبرر
مشعل ساكت لانه عارف ان بندر منصدم وجالس يقول كلام مايقصده
بندر: بصراحه ماتوقعت هالحركه تسوها فيني,, سودتوا وجهي عند ابوي
مشعل: والله يابندر انا اسف ومدري ايش اقول ,, لكن ماباليد حيله,, ولو عندي بنت وربي ازوجها لك بدون مهر ,, وانا كلي فخر اني اناسبك,,, بس تعرف مشاعل مالي عليها سلطه
بندر: ايش الي مالك سلطه عليها,, اغصبها مو ع كيفها ترفض وتقبل الناس,, روح اجبرها
سعود تدخل اخيرا : الزواج مايجي بالغصب يابندر الله يهديك,,, وبعدين مشاعل قررت انها ترفض هالزواج واكيد لها اسباب ومبررات
بندر يطالع سعود بحقد: اكيد لها مبررات, �

12 - 8 - 2014, 06:34 PM

بندر يطالع سعود بحقد: اكيد لها مبررات, وانا عارفها كويس
سعود ومشعل منصدمين: وايش هي؟؟
بندر: لان اختكم المصون تحب واحد,, وانا حاولت اني اتغاضى عن هالشي واسامحها لاني احبها,, بس اظاهر اختكم مهووسه بالغزل والكلام الفاضي وماتبي ترتبط باحد ع شان مايخرب عليها علاقاتها
سعود فاار دمه : اخس واقطع يالكلب,, اختي اشرف منك ياحقير,, اطلع برا,, وانا مالوم اختي لما رفضتك
مشعل: بندر عيب عليك تقول هالكلام,, انت ببتنا وجاي تتزوج اختنا ,, عيب هالكلام يطلع منك
سعود: ولو اختي مثل ماتقول ليش جيت تزوجها ,,, الحمدلله انها ماتزوجتك
بندر يبي ينتقم من طلال ومشاعل : هههههه,, اذا مو مصدقين اسالوا طلال
مشعل وسعود: طلال؟؟؟؟
بندر: ايه طلال
مشعل تذكر رساله مشاعل الي كانت كاتبها لساره والي تقول فيها ان سبب انتحار مشاعل طلال؟؟ مشعل بيذبحه الفضول مين طلال؟؟ وتاكد ان كلام بندر صدق
مشعل: مين طلال؟؟
بندر: طلال هذا واحد يموت فيه سعود,, وتعرفونه كلكم زين
سعود منصدم: انا اعرفه؟؟؟
بندر: ايه طلال الـ.. الي كان معانا بالمانيا ,,, يكون بعلمك لاهو اخو صديقتها ولا شي,,,, هو خويها وحبيبها ,, ومسافر معاها ع شان مايتركها ,, وانا كنت عارف وساكت ,, لاني احبها وابي استر عليها,, لكن ماتستاهل
مشعل منصدم : طلال معقوله
سعود: انت كذاب وحقير,, تطلع من بيتنا او نطردك
بندر : لا راح اطلع لان مايشرفني اكون ببيت ناس مايعرفوا يربوا بنتهم
وطلع بندر وترك سعود ومشعل مصدوووووومين
00000000000000000000000000000000000000000000000000 00000
في الصاله
كانت ام بندر وساره ساكتين ينتظروا ام مشعل او نجود يتكلموا,, بس فضلوا انهم مايجيبوا طاري رفض مشاعل لبندر ,, ولما يطلعوا اكيد راح يعرفوا من ابو بندر وبندر
دق موبايل ساره
ساره: الو
بندر بصراخ : اطلعي من بيت هالكلاب
ساره منصدمه: بندر ايش فيك؟؟؟؟
بندر: اطلعي الحين بسرعه
ساره: اوكي
وقفلت وهي منصدمه
ساره: ماما بندر يقول اطلعوا
ام بندر مصدومه: ليش ايش فيه؟؟؟؟
ساره: ماادري
عرفوا ان فيه شي لان ام مشعل ونجود كانوا ساكتين ,, طلعوا بكل هدوء

12 - 8 - 2014, 06:35 PM

في بيت مشاعل
سعود كان يركض وراء مشعل : وين طالع مشعل استنى؟؟؟
مشعل: بروح أأدبها الحيوانه,,, وانا اقول هالطلال نظراته مو طبيعيه ,,, الحين اعلمها شلون الادب ع شان تحرم طلال واي زفت تكلمه
سعود: مشعل استنى بالتفاهم
مشعل وصل عند باب مشاعل
وهذا الي كانت خايفه منه سمعت صوت صراخ قرب من غرفتها ,, هذا مشعل اكيد يبي يضربها
مشعل كان يطق الباب باقوى ما عنده : افتحي يامشاعل ,, افتحي الباب لاكسره
مشاعل ماتت خوف وقررت انها تسكت يمكن يفقد الامل ويروح
مشعل: قسم بالله اذا مافتحي لاكسر الباب
سعود: هد نفسك يابن الحلال خلنا نتفاهم معاها
مشعل: مافيه تفاهم مع هالحقيره
ام مشعل اخيرا وصلت لهم: مشعل الله يهديك خلاص ,,, اتركها الي فيها مكفيها
مشعل: الي فيها مكفيها ولا جالسه تكلم طلال الكلب
ام مشعل: ايش طلال هذا بعد
مشاعل لما سمعت اسم طلال انجنت ,,, ايش عرف مشعل بطلال,,, معقوله بندر حقير لهدرجه وفضحها,,, اذا هو الي قال لاخوانها فهو احقر انسان ع وجه الارض ,,, والحمدلله انها رفضته
سعود: يابن الحلال انت تصدق بندر ,,, اصلا هو مقهور لان مشاعل رفضته وحب ينتقم منها وهذا انت يالخبل صدقته
صوت مشعل اختفى ,, شكله اقتنع بكلام سعود ورجع غرفته,, بس كلها ثواني ورجع معاه الرساله حقت مشاعل
مشعل: مقهور هاه,, اقرى اختك ايش كاتبه,, كنت ساكت ع امل ان الاخلاق تجيب نتيجه معاها
سعود يقرا الرساله وهو مصدوم: ايش هالكلام؟؟؟ ايش معناه؟؟؟
مشعل: الاخت قبل تنتحر كتبت رساله وداع لصاحبتها ساره,, وطبعا واضح ان سبب انتحارها كان طلال
سعود مررره مصدوم ,, طول ماهم بالمانيا كانت مشاعل تكذب عليه هي وطلال,, كانوا يمثلوا البراءه وهم مع بعض,,, راح تفكير سعود لما كانوا باللعبه وكيف طلال اصر انهم يركبوا اللعبه,, ونزل ع شان يكون لوحده مع مشاعل,, وكيف انهم جلسوا فتره يدوروا عليهم ,,, ابد ماتوقع من مشاعل هالحركه
مشعل رجع حاول يكسر الباب
مشاعل ميته خوف,,, سمعتهم يتكلمو عن الرساله ,,, خلاص كل شي انفضح,,, ولازم تواجههم
00000000000000000000000000000000000000000000000000 00000
في سياره بندر
بعد ماقال ابو بندر لام بندر وساره الموضوع كله
ساره جواها كانت حزينه ع اخوها ,, بس شعور الفرح كان يغلب ع الحزن لان مشاعل اخيرا اكتشفت ان طلال صادق,, بس متى وكيف عرفت؟؟؟
على طول ارسل لطلال رساله
" مبروك عليك مشاعل,, الله يوفقكم"
بندر: ساره انسي ان عندك خويه اسمها مشاعل
ساره عصبت: لا والله ع شان رفضتك خلاص اتركها,, لاحبيبي هذي صاحبتي من زمان
ابو بندر: والله لو اعرف ان بينكم اي اتصال لامنعك من الطلعه واخذ موبايلك,,بعد مابقى الا هذي تروحي لوحده خربانه,, واهلها مايعرفوا يربوا بناتهم
ساره منصدمه من الكلام:خربانه؟؟؟ ايش هالكلام يابابا
ابو بندر: طلعت تعرف واحد اسمه طلال ع شان كذا رفضت بندر
ساره مقهو

12 - 8 - 2014, 06:36 PM

ابو بندر: طلعت تعرف واحد اسمه طلال ع شان كذا رفضت بندر
ساره مقهوره اكيد هذا بندر الي قال لهم: وايش عرفك ؟؟؟؟
ابو بندر: هي اعترفت لبندر
ساره تبي تنتقم لمشاعل: واذا ولدك فيه خير ليش يتزوج وحده خربانه
الكلمه هذي سكتت الكل,, كانوا طول الطريق ساكتين
وصلوا اخيرا للبيت
نزلوا كلهم الا بندر ,, كان يفكر وحاقد ع طلال الي اخذ منه حبه الاول والاخير مشاعل,, وهو انتقم من مشاعل واكيد انها الحين تعاني مع اخوانها,, بس الدور ع طلال,, شغل سيارته واتجهه لبيت طلال
00000000000000000000000000000000000000000000000000 00000
في بيت طلال
كانت حاله طلال يبكي لها الصديق والعدو,,, كان عازل نفسه بغرفته,, يتذكر مشاعل باول مره شافها وكيف اهانها ,, وكيف كانت واقفه عند سيارته بكل براءه,,, غمض عيونه واستسلم للبكاء والدموع
طلال:ااااه يالقهر,, اكيد الحين مشاعل زوجه بندر ,, اكيد جالسه معاه,, اكيد يطالعها.,, ويحكي معاها,,, الحين تتذكرني والا نستني,, مبسوطه وهي جنب بندر والا حزينه,,, اكيد يطالعها وهي تطالعه,, اكيد قال لها احبك
كان عايش بحسرته والمه وحزنه ,, سمع صوت رساله,, قام ع امل ان الرساله تكون من ساره وتقول فيها ان مشاعل رفضت بندر
فتح الرساله وفعلا كانت من ساره ,, كان خايف من الي مكتوب
" مبروك عليك مشاعل,, الله يوفقكم"
مااااااااااااات قهر وحسره اكيد كانت راح ترسل المسج لبندر اخوها وغلطت,,, خلاص مشاعل تزوجت, بكىىىىىىىىىىى ,,, وخطر ع باله غسان,, هو سبب حزنه والمه,,, ياليته يروح يقتله ويرتاح
راح غرفه الجلوس وطاحت يده ع ورقه كانت مطويه فتحها ,,وكانت صورته الي رسمتها مشاعل ,, حن لمشاعل اكثر ,, رمى الصوره ووراها رمى الطاوله والتحف الي عليها ,,, والكنبات ,, حتى التيلفزيون ماسلم من يده,, بدى يكسر ويخرب ,,, يمكن يهدا شوي,, كان يرمي كل شي تطيح عينه عليه,,, وصرخ من الالم ,, كان الم بقلبه,,, الم يمنعه من السعاده,, جرح ينزف,,, حلم ضايع,, خيبه امل,,, هذي كانت حاله طلال
00000000000000000000000000000000000000000000000000 00000
مشاعل قررت تواجههم ,, صح ان مشعل كان معصب لابعد الحدود,, بس كانت تبي تنهي هالموضوع للابد
طلعت من غرفتها ,, كانت يد مشعل اول شي يستقبلها,, اول مره احد يمد يده عليها,, كيف تجرا ,,, لو كان ابوها عايش , لو كانت امها عايشه,, يمكن ماسمحوا لهالشي يصير,,,
كان سعود يحاول يمنع يد مشعل ,, ولكن فيه ضربات توصل لمشاعل وضربات يوقفها سعود
مشعل وهو معصب : كيف عرفتي طلال ياحيوانه كيف؟؟؟
مشاعل في نفسها"طلال طلال طلال دايما طلال هو السبب بكل مشاكلي"
استسلمت لضرب مشعل ع امل ان هالشي يهديه,,, والكل كان يامرها تدخل غرفتها ,, لما يهدا مشعل
ماسمعت اي كلام ,,, نزلت تحت وكان مشعل يلحقها,,, طلعت برا الفله, واتجهت لبيت ام سلطان
مشاعل تصارخ: خلاص انا هذا بيتي وماراح تشوف وجهي اذا هالشي يرضيك
مشعل: وعلى ب�

12 - 8 - 2014, 06:37 PM

مشاعل تصارخ: خلاص انا هذا بيتي وماراح تشوف وجهي اذا هالشي يرضيك
مشعل: وعلى بالك اخليك تسكني مع هالحقيره ,, علشان تاخذي راحتك ع الاخر مع طلال
مشاعل تبكي : مشعل انت لما سالتني عن طلال ماانكرت,, وقلت لك الحقيقه, بس وربي الحين مايربطني به اي شي
مشعل: وسفرته معاك المانيا؟؟؟
مشاعل انصدمت كيف مشعل قدر يعرف ان طلال هو نفسه الي شافه بالمطار : وربي ماكنت اعرف انه راح يكون هناك
مشعل: لاياشيخه,, علي انا , هاتي موبايلك
مشاعل : لاتخاف مااخذته معاي,,, تلقاه بالغرفه
مشعل: والله لو ادري انك طلعتي من البيت لاحش رجولك حش
سعود: خلاص مشعل انا راح اتفاهم معاها,,انت اطلع من الموضوع
مشعل رجع للبيت معصب وقافله معاه,,, راح يدور ع موبايل مشاعل
00000000000000000000000000000000000000000000000000 00000
بندر توجه لبيت طلال ,, يبي ينتقم منه,, بس مو عارف شلون,, احسن طريقه انها ينتقم منه عن طريق ابوه
نزل للبوابه
بندر: السلام عليكم
البواب: عليكم السلام
بندر: لو سمحت ابو طلال موجود؟؟؟
البواب: من نقول له
بندر: بندر ,, وقول له اني ابيه بموضوع ضروري يخص شخص يعز عليه
البواب: ابشر
راح يسال ويتاكد ويستذأن من ابو طلال,,, وطبعا هو سمح لهم يدخلوه ,,, كان يبي يعرف مين هالانسان الغريب الغامض
بعد مادخل استقبله ابو طلال بالحديقه
ابو طلال: هلا ولدي مين انت؟؟؟
بندر يبتسم: انا واحد فاعل خير وخايف ع طلال
ابو طلال زاد استغرابه وتساؤله: طلال؟؟؟ليش ايش فيه طلال؟؟؟
بندر: بصراحه ولدك مفتون ببنت,, وهي طامعه بفلوسه
ابو طلال: طيب
بندر: طلال صار مثل المسحور بها,,, لدرجه انها تطلب منه اي طلب وينفذه,,, يمكن انت مستغرب ليش رجع من امريكا وماادار مؤسستكم الي بامريكا
ابو طلال: ممكن تتكلم بوضوح لاني ماحب الالغاز
بندر: صدقني اني منحرج اني اقول لك هالكلام بس من كثر ماعز طلال مابي احد يضره
ابوطلال: يا انك تتكلم بوضوح او ارجع من مكان ماجيت
بندر: طلال رجع من امريكا لانها اامرته انه يرجع
ابو طلال بلهجه حاده: ولدي محد يامره
بندر: للاسف مشاعل تتحكم فيه وكانها خاتم باصبعها,,, وياليت الموضوع ع كذا وبس,,, انا خايف ان طلال يخسركم كل ماتملكون
يابو طلال ,,, طلال خلاص مفتون باهالبنت لدرجه انه لما عرف ان شركتهم راح تنهار ,,, اشترى نصها مع انه عارف انها خساره كبيره له ,,, ومو بس كذا حمل نفسه كل الديون الي ع الشركه والي تزيد عن 15 مليون
طلال يابو طلال ,, دفع 15 مليون لها ع شان شركتهم المنهاره ,,, وانا خايف انها تلعب عليه اكثر ,, لازم توقفهم عند حدهم وتنهي هالعلاقه
ابو طلال منصدم: وانت ايش عرفك بهالكلام؟؟؟
بندر: انا صاحبه,,, ومادوي يخسر كل ماعنده ع شان وحده ماتسوي
ابو طلال: لو اعرف ان كلامك كل كذب راح تندم
بندر طلع بطاقته وورى ابو طلال اسمه وكل المعلومات ع شان يتاكد انه مو خايف وانه صادق
ا

12 - 8 - 2014, 06:38 PM

ابو طلال انجن وعصب ع طلال ,,, معقوله ولده العاقل يسوي كذا ,, الي يعتمد على الله ثم عليه,, كان ينبهر بذكاء ولده وفطنته,,, معقوله بنت تقدر تلعب عليه,, كان معصب مره واتجه لغرفه المكتب
وسواء اتصال يعرف به كم طلال سحب هالشهرين وانصدم بالرقم الي سمعه والي ياكد كلام بندر,, في ظرف شهرين سحب 16 مليون ,,, معقوله طلال
ابو طلال عصب من طلال وراح لغرفته يبي يواجهه
00000000000000000000000000000000000000000000000000 00000
بندر حس ان انتقامه انتهى ,, والحين بس حس بالراحه
00000000000000000000000000000000000000000000000000 00000
مشاعل كانت بغرفتها تبكي ع الي صار وع طلال الي من عرفته وهي ماتشوف الى المشاكل
دخل عليها فهد
فهد: ميشو ليش تبكي,,, علشانك تزوجتي؟؟؟
مشاعل تحاول تبتسم : لا حبيبي ماتزوجت
فهد: ليش مو زوجك جاء اليوم؟؟
مشاعل: مو زوجي,,, انا خلاص قررت قرار اني ماراح اتزوج ابد
فهد يبتسم: يعني خلاص ماراح تتركينا ,, ميشو كنا نبكي انا وفيصل وسلطان امس لانك راح تتركينا وتتزوجي وامي راح تضربنا
مشاعل حست بتأنيب الضمير كيف كانت راح تتزوج وتتركهم,,كانت انانيه وتفكر بنفسها
مشاعل: اوعدك ماتزوج ابد وراح اكون معاكم دايما
00000000000000000000000000000000000000000000000000 00000
مشعل كان يقلب بالرسايل بموبايل مشاعل وانصدم بالرسايل الي قراها كانت من طلال,, مشاعل تجاهلتها مثل كل رسايل طلال والي ماتحضى من مشاعل الا بالحذف اوالتطنيش
كانت الرسايل تقول
"ميشو حبيبتي لايخدعك بندر بنصيبه من الشركه,, انا الي اشتريت نصيب ابو سليمان ,, لايحسسك بانك مدينه له بشي"
الرساله الثانيه
"اذا مو مصدقيتني اسالي اخوانك عن اوراق الشركه,, واعرفي هي مسجله باسم مين"
الرساله الثالثه
" ميشو لاتتزوجي بندر لانه مايستاهلك,, ميشو المفروض احنا الي نكون مع بعض ,, انتي زوجتي وحبيبتي"
الرساله الرابعه
" فكري زين مو معقوله واحد طبيعي يدفع ملايين ع شان ينقذ شركه منهاره الا لانه يحبك وبجنون ,, احبك"
كان مشعل شبه منهار,, مصدوم ومو مصدق,, ايش هالاشيا ءالي كل شوي تطلع ,, حقايق تطلع وبعدين يطلع شي يكذبها,, حب يتحول لغش,,, كذب يتحول لصدق,,, خيانه تتحول لاخلاص
كان حاقد ع طلال بشكل مو طبيعي ,, بس الحين هو منصدم من تصرفاته,, بس الي تاكد منه ان كل حقده وكرهه انصب ع بندر,, بس لازم يتاكد من الاوراق
ايش هالغباء الي يملكه ,,لدرجه انه ماشاف الاوراق الي تثبت ملكيه بندر لنص الشركه
طلع يركض يدور ع سعود
مشعل : سعود سعوووووووووووووووووود
سعود : ايش فيك تصارخ
مشعل: تعالي معاي للشركه
سعود منصدم: الحين؟؟؟
مشعل: سعود انت شفت الاوراق الي تخص ملكيته بندر لنص الشركه
سعود: لا ع حسب علمي انها معاك
مشعل: لا مو معاي
سعود: غريبه بندر كان يقول لي انها معاك؟؟؟
مشعل: كذاب ولا عمري سالت عنها
سعود: ايش قصده بهالحركه
مشعل: تعالي بسرعه ع الشركه
لما كانو

12 - 8 - 2014, 06:38 PM

سعود: غريبه بندر كان يقول لي انها معاك؟؟؟
مشعل: كذاب ولا عمري سالت عنها
سعود: ايش قصده بهالحركه
مشعل: تعالي بسرعه ع الشركه
لما كانوا بالسياره مشعل شرح لسعود موضوع الرسايل,,وماقدروا يفسروا تصرف طلال,, مو معقوله يكون ع شان مشاعل اكيد له غرض كبير
00000000000000000000000000000000000000000000000000 00000
ابو طلال واقف عند باب غرفه طلال: طلال افتح
طلال قام غسل وجهه من اثر الدموع وفتح لابوه
ابو طلال كان بركان قبل يفتح طلال بس بمجرد ماشاف وجه طلال وكان احد كب عليه مويه بارده,, كان ابو طلال يحترم طلال ويحبه لانه بنظره رجل من كان عمره 5 سنوات ماكان يبكي ,, حتى لما ينجرح او ينضرب ماكانت الدمعه تنزل بعكس الاطفال,,, كان قوي وهالشي خلى ابو طلال يفتخر بولده ويعجب بشخصيته,, كان قوي لدرجه انه مايهزه شي ,, واول مره يشوف طلال منهار,,, اش صاير ,, وايش فيه,, ابو طلال خذ طلال بحظنه
وكان طلال ينتظر هالحركه من ابوه,, لانه ظمه واستسلم للبكاء,, كان يطلع كل الي بصدره,,, يبكي ع صدر ابوه,,, ابو طلال انفجع ع طلال,,, اكيد صار شي كبير يخلي طلال ينهار لهدرجه,, كان بكاء طلال يهز الغرفه,, كان صراخ مختلط ببكاء بعبرات,, مع اهات وانات
ابو طلال ماقدر يتحمل ونزلت دمعته ع طلال وبعد عنه يبي يشوف وجهه
ابو طلال بخوف : طلال بسم الله عليك ايش فيك,, تعبان,, طلال تكلم ايش فيك,, طلال لاتجنني
طلال وهو يبكي: بابا انا تعبان لاتتركني ,, لاتسوي مثلها وتتركني
ابو طلال تذكر كلام بندر ,, اكيد نفس البنت الي قال عنها بندر
ابو طلال رجع للجديه شوي: مين هي الي تركتك؟؟؟ طلال تكلم
طلال: بابا ميشو تركتني وتزوجت بندر
ابو طلال مو عارف السالفه ايش دخل بندر,, توه جاء يحكي عن بنت تبي تضر طلال,, متى تزوج ؟؟؟ومين هي؟؟؟ وهل هي نفس البنت؟؟؟
ابو طلال: حبيبي ارتاح واحكي لي ايش الي صار
طلال: خلاص الكلام ماينفع الحين هي متزوجه ولازم اتركها بحالها ,,, مابي اهدم بيتها وحياتها
ابو طلال: مين هي
طلال سكت ورجع للبكاء
ابو طلال بنظرات حاده: هي نفس البنت الي دفعت لها 16 مليون؟؟
طلال منصدم ايش عرف ابوه: بابا كيف عرفت؟؟؟
ابوطلال: طلال بصراحه كنت اظنك رجال ومافيه احد يقدر يلعب عليك ,, لكن للاسف طلعت غبي ومجرد بنت انتهازيه لعبت عليك واخذت فلوسك وتركتك بحسراتك
طلال يهاجم ابوه: ميشو مو انتهازيه ,, بعدين الفلوس الي دفعتها فلوسي,, لاتخاف مااخذت منك شي,,, هذي فلوسي الي جمعتها من محلاتي ومن شغلي بالاسهم
ابو طلال: انا ماهمني فلوسي او فلوسك,, لكن مساله ان بنت بكل بساطه تجي وتلعب عليك هذا الشي الي ماكنت اتوقعه ,, بعدين انت مجنون تدفع 16 مليون لوحده ,,, هذا تعبك بهالسهوله تضيعه
طلال: بابا الحمدلله عندي خير,, وبعدين هذي فلوسي وانا حر فيها
ابو طلال: هذا رد ترده علي
طلال ندم ع كلامه ولهجته مع ابوه: بابا الله

12 - 8 - 2014, 06:40 PM

ابو طلال: هذا رد ترده علي
طلال ندم ع كلامه ولهجته مع ابوه: بابا الله يخليك اتركني الحين انا مو عارفه ايش اقول,, بابا ((بحسره قالها)) تخيل حبيبه عمرك تروح وتخليك
طلال حن ع ولده وع حالته ,, وتقطع قلبه عليه,, لانه يعرف طلال حكيم ومافيه شي يهزه,,, واكيد مشاعل تعني له الكثير ع شان كذا هو منهار,,, ولازم يساعده
ابو طلال: ممكن افهم الموضوع كويس
طلال شرح له كل شي من بدايته مع مشاعل لليوم
ابو طلال: اسمح لي انت غلطان
طلال: ليش يابابا؟؟؟
ابو طلال: انت الي عطيت المجال لبندر يلعب دور البطل معاها ومع اهلها
طلال: بابا انا ماكنت اقدر اطلع بالصوره لاني ماعرفهم ولان مشاعل ماراح تقبل اعتذاري
ابو طلال يفكر: بس لحظه انت تقول ان البنت تزوجت؟؟؟
طلال بحسره : اليوم
ابوطلال على طول قال لطلال عن بندر وانه جاء يقول له كل شي,, استغرب طلال تصرفه المفروض يكون سعيد لانه تزوج مشاعل
ابو طلال: لاتكون مشاعل رفضته ع شان كذا يبي ينتقم منك
طلال على طول فكر بساره هي الوحيده الي تقدر تساعده
دق عليها
طلال: هلا ساره
ساره: اهلين,, هاه بشر ايش صار
طلال استغرب من ساره: انتي الي لازم تقولي لي ايش صار؟؟؟
ساره : مدري احنا طلعنا من عندهم ,, بس اظن مشعل اخوها كان معصب وخايفه انه يسوى لها شي,, ومقدر ادق عليها لان بندر منعني اني اكلمها
طلال: مشعل معصب ,,, و وبندر منعك تدقي عليها,, ايش السالفه
ساره مستغربه: ليش ميشو ماكلمتك اليوم
طلال: لا
ساره تضحك :ههههههههه,, اجل لي الحلاوه
طلال قلبه يدق بقوه: ساره تكفين تكلمي
ساره: ميشو رفضت بندر
طلال رمى التلفون وراح يركض ع غرفته وينط من السرير ويصارخ ,,بما ان الباب كان مفتوح ,, الصوت جذب نواف الي كان يلعب بالحديقه,, وجاء يركض وشاف حال طلال ,, وعلى طول صار ينطط معاه بالسرير
ابو طلال ضحك عليهم,, وعرف ان مشاعل ماتزوجت ,, استغرب وتحمس اكثر لشوفه هالبنت ,,, هالبنت الي تقدر تغير حال طلال من حزن مميت الى فرح وسعاده
طلال وقف وحاول يثبت انفاسه: الحين انا اطامر ع شان فرحان انت ايش تبي تنط معاي
نواف: ياغبي اشاركك الفرحه ههههههههههه
طلال شال نواف ,, وصار ينط ع السرير ونواف بين يديه
ابو طلال : البنت ع الخط
طلال نزل نواف وراح يركض
طلال يتنفس بصعوبه : هلا سارونه
ساره: هههههههه مسوين حفله ببيتكم
طلال: لا الحفله بقلبي
ساره: هههههههههههه
طلال : طيب سارونه اروح اخطبها الحين؟؟؟
ساره : مجنون انت ,, اظن انها متمشكله مع اهلها لان بندر يقول ان مشعل معصب مره
طلال: احسن ياليته يضربها
ساره منصدمه: حرام عليك
طلال: ع شان تحرم تتزوج غيري
قفل طلال والفرحه ماليه قلبه
ابو طلال : والحين دورك انت تحرك
طلال: ايش اسوي؟؟؟
ابو طلال: خلنا نروح نزور اخوانها ونشرح لهم الموضوع ,, وبعدين نخطبها لك
طلال: بابا ايش رايك بكره الصباح؟؟؟
ا�

12 - 8 - 2014, 06:41 PM

ابو طلال: اوكي خلاص نطلع من المؤسسه 10 ونمر ع شركتهم ,, اقصد شركتكم
ضحك ابو طلال وطلال,, حتى نوافوه الخبل شاركهم الضحك مع انه مايعرف ايش السالفه
00000000000000000000000000000000000000000000000000 00000
وصل مشعل وسعود الشركه ,, تعبوا وهم يدورا ع العقد والي مافكروا يطالعوه بسبب ثقتهم الزايده ببندر
وبعد تعب ,, وصلوا اخيرا للعقد ,,, وكان سعود اول من وصله
سعود: مشعل لقيته
مشعل: هاه باسم مين؟؟؟
سعود يطالع مشعل بصدمه: طلال
مشعل: عطني رقم طلال الحقير
سعود: مشعل اهدا ,, وليش حقير شوف ايش سوا لنا الشركه الحمدلله رجعت تشتغل احسن من اول والربح صار اكثر من الايام الي كان ابوي هو الي يديرها
مشعل: خاننا وكلم اختنا
سعود: ترى بفضل الله ثم بفضله مشاعل تشوف,, ولو هو يلعب معاها ومعانا ماكان خسر عليها كل هالفلوس
مشعل: طيب ليش ماجاء يخطبها اذا يحبها
سعود: مدري بس اظن فيه بينه وبين مشاعل مشكله لان الرسايل تدل ع كذا,, ويبدوا لي ان بندر هو السبب
مشعل: واحنا الي كنا ممتنين له
سعود: مشعل خلني اروح لطلال اكلمه,, وافهم منه الموضوع
مشعل: ليش وانا مو اخوها؟؟
سعود: انت عصبي,, خلني انا اروح اتفاهم معاه
مشعل: رجلي ع رجلك,, ولاتخاف راح اتحكم باعصابي
سعود: اوكي بكره انشالله راح نروح له
مشعل: لا الحين,, مافيني صبر لبكره
سعود: يامشعل الحين متاخرين من اصبح افلح,, وخلني اتكلم مع مشاعل يمكن اقدر افهم منها شي
سعود: اوكي
00000000000000000000000000000000000000000000000000 0000
طلال كانت الفرحه مو قادره تخليه يجلس مكانه ,, كان يلف الحديقه كلها وهو يركض وراه نواف يحاول يجاريه في الركض,, وكانت لمياء واقفه ع الشباك تطالعهم,, وهم يلفوا ع البيت
لمياء: الله جالسين تركضوا وماتنادوني
نواف يصارخ لها ع شان تسمعه: لمو تعالي بسرعه ابي اسابقك لاني ماقدرت اسبق طلال
لمياء نزلت تركض, وصاروا المجانين الثلاثه,,, طلال يركض ويصارخ من الفرحه,, ووراه نواف ولمياء,, واذا صرخ طلال يصرخ نواف ولمياء معاه وهم مايدور ايش السالفه
00000000000000000000000000000000000000000000000000 00000

12 - 8 - 2014, 06:42 PM

سعود كان واقف عند غرفه مشاعل في بيت ام سلطان:مشاعل؟؟؟
مشاعل: هلا سعود
سعود: ممكن ادخل
مشاعل تمسح دموعها: تفضل
سعود دخل ع مشاعل وجلس جنبها ,,, وكان ساكت,, بعد فتره مد لها الورقه الي تخص الشركه واشر ع اسم طلال الي ينص ع انه يملك نص شركهتم
سعود: ممكن تفسري لي سبب وجود هالاسم؟؟؟
مشاعل طالعت الورقه وشافت اسم طلال.,,. رجعت تتامل الورقه,,كانت ورقه عقد للشركه,, ظلت دقايق تتامل الورقه مو قادره تصدق,,, كل كلام بندر كذب,, وطلال كان صادق معاها لاخر لحظه ,,, ساره حاولت تفهمها مو قادره تفهم,, كانت مسكره اذنها لاي كلام,,, كانت واثقه ببندر,, بس طلع كذاب,,, معنى هالكلام ان طلال هو المسئول عن عمليتها وعن سفرتها كلها ,, معقوله طلال يسوي كل هذا علشانها,, تذكرت سفرته معاها ووقفت معاها بكل وقت ,, كان موجود دايما معاها بس هي الي مو قادره تحس,, ومو قادره تقتنع الى بالكلام الي في بالها,,, ممكن لاي انسان غبي يعرف ويكتشف ان طلال يسوي كل شي علشانها,, شلون ماحست شلون ماعرفت,,, معقوله طلال؟؟؟ طلال يسوي كل هذا؟؟
مشاعل رفعت عينها لسعود وهي تبكي: طلال هو الي شرا الشركه
سعود يتاملها: يعني ماكنتي تعرفي
مشاعل: لا بندر كان يقول لي ان طلال كذاب ويحاول يخرب زواجي, وانه هو الي اشترى الشركه وهو الي كان مسئول عن علاجي
سعود: للاسف بندر كذاب,, وطلال كان هو صاحب هالوقفات الانسانيه معاك ومعانا,,, بس مشاعل ايش علاقتك بطلال
مشاعل حبت تحرج سعود: مثل علاقتك بهنوف
سعود: بس هنوف راح تكون زوجتي
مشاعل: طلال عرض علي الزواج وانا رفضت
سعود: ليش؟؟
مشاعل: لاني كنت اتوقعه كذاب وصدقت بندر
سعود: وقلبك وين ؟؟؟ عند بندر او طلال؟؟؟
مشاعل ابعدت عينها عن اخوها
سعود: ميشو خليك صريحه معاي انا مو مشعل,,, اذا انتي تحبي طلال لازم يجي يخطبك,, او انك تنسيه
مشاعل: هو مايعرف اني رفضت بندر
سعود: انا ومشعل بكره راح نروح له ونعطيه خبر اننا عرفنا كل شي,, وقتها الدور راح يكون دوره ,, اذا يبيك راح يخطبك
مشاعل ابتسمت غصب عنها: متى راح تروحوا بكره
سعود يغمز لها: اشوفك متحمسه؟؟؟
مشاعل تحاول تكون عاديه : لاعادي
سعود: عموما راح نروح له بكره المغرب انشالله
وطلع من عندها ,, كانت احلى ليله بحيات مشاعل,,, اخيرا هي وحبيبها طلال راح يجتمعون من جديد ,, يا الله قد ايش عانت بهالدنيا وخلاص تبي ترتاح,, حبيبها طلال كانت شاكه فيه وماعطته فرصه يدافع عن نفسه,,دايما ظالمته,, اخيرا جا الوقت الي تتصافا فيه القلوب ,,تمنت ان معاها موبايل وتدق عليه تتاسف منه,, ماقدرت تنام طول الليل تحلم فيه وتفكر بالبيت الي راح يجمعهم ,, اخيرااااا
00000000000000000000000000000000000000000000000000 00000
طلال تعب من الركض والصراخ,, وكان يبي ينام بدري ع شان وراه بكره موعد مهم مرررره ومصيري بالنسبه له,, راح يقابل اخوان مشاعل ويش�

المواضيع المتشابهه لموضوع: رواية فارس احلامي مشاعل وطلال لموضوع: رواية فارس احلامي مشاعل وطلال
الموضوع	كاتب الموضوع	المنتدى	مشاركات	آخر مشاركة
قصة رومانسية بعنوان فارس احلامي	همسه الشوق	همس للقصص وحكايات وروايات	1	30 - 11 - 2021 03:27 AM
رواية وانتبه لك ترى روحي معك رواية سعوديه للكاتبه	الحب ياسمين	همس للقصص وحكايات وروايات	9	4 - 4 - 2019 10:13 AM
رواية فهد و نوره رواية رومنسية سعودية كاملة	سجات التهاويل	همس للقصص وحكايات وروايات	23	8 - 6 - 2018 01:07 PM
رواية مشاعل	الحب ياسمين	همس للقصص وحكايات وروايات	8	12 - 6 - 2013 01:25 PM
فارس احلامي	ملكة الثلج	همس عذب الكلام والخواطر المنقوله	5	28 - 6 - 2011 12:39 AM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع

رواية فارس احلامي مشاعل وطلال

همس للقصص وحكايات وروايات