قصدك عذابي لاتوصي حريص=الزمن مايقصر وأنت فيك ابركه
لاتعاند تراني صرت مثل القريص=ماحدٍ راح يمه والعذاب انهكه
لمعة الشوق فيني مثل لمع الفصيص=والقدم سقتها لك والطريق اسلكه
قانصٍ لك وطحت برمش عينك قنيص=يوم شفته غدا بالقلب صوت ادبكه
جيت بافر منك واثر مالي محيص=اثر سهمك تعدا للحشا وادهكه
اشهد اٍنك بقدرك وبغلاتك بخيص=من كثر زود حبك طحت وسط اشبكه
خل قلبي بحبك ياغناتي يهيص=بين روحي وروحك وقف المعركه
ماهو بشرط من دش البحر صار غيص=كم وكم واحدٍ شاف البحر واربكه
اشتوت كبدي وصارت ابعدك حميص=وقرقعة قلبي ابصدري تقول اٍتنكه
الأمل اٍنطفأ نوره وباقي بصيص=والعمر فات دوره والزمان ادركه
صح قلت أبتعد لاشك منت ابرخيص=ما تناساك عقلي دام فيه اٍحركه
ما يأثر عذولٍ جى.. عيونه نفيص=راح مني وكفه بالقهر يفركه
ياحبيبٍ جعلني من غلاته خبيص=له عيوني وطن والروح له مملكه
ما علي غير شوفك يا حياتي نقيص=هاك خيط المحبه وابيديك امسكه
بين همٍ وتفكيرٍ وحظٍ عويص=كل من قال خله . قلت كيف اتركه ؟
كيف اخلي حبيبٍ في المحبه خليص ؟=فارضٍ اٍحترامه والحنان اٍملكه
لوجعل لي رسالة وسط مخبأ القميص=ادري اٍن التجافي والزعل فبركه
ويوم قلت ابتعد والله منت برخيص=كيف يرخص مقام اللي هواه اٍحبكه ؟
عضويتي
كان قصدك عذابي لا توصي حريص 
]
العرض العادي
