لله من قلب بدت فيه الأنواع
تاخذ به أفكاره هجوس وتناويع
دويت بأفكارٍ كبيرات ووساع
وآشوف كل رواية جالها ريع
مير ان راعي كلمة الصدق بتاع
أهل الصداقة للتحدي مفاريع
الصدق له مع سايد الحق مطلاع
والكذب له مع غير يمّة مطاليع
كم واحد مغريه رايه ولو ضاع
في خاطره عنده لمن ضاع تسنيع
وكم واحد للي يشيرون مطواع
للي عطاه الراي ممنون ومطيع
قلبه ليا شاروا هل العرف سماع
أخذ من الأريا ثمرها بلا بيع
وكثر التجارب درس والدرس نفاع
فيها لذربين الرجاجيل ترفيع
احرص على ربعه شريفين الأطباع
لوهم من الأجناب فيهم منافيع
كم نازحٍ يشرى والأقراب تنباع
بيعة رجا ماهيب بيعة تقاطيع
لاتستوي بالغيض صارم وجزاع
على رفيق شفت منه التواجيع
لاعاش من دايم على الربع صعصاع
ومقطعٍ جيبه يدين الفراريع
وان طعت راي اللي درس كل الأوضاع
الميز هو مصراع كل المصاريع
رجلٍ بلا ميزٍ ولو طال له باع
يضيّع افعاله من الجهل تضييع
واحذر تصير لمن وثق فيك خداع
ترى أقشر الحالات حال الخداديع
الخدع لو راعيه بالزود طماع
تراه مثل زراعة مالها ريع
من طاب لك بالمد قدم له الصاع
ولاتفتخر كانك تعرف المواضيع
عضويتي
الصدق له مع سايد الحق مطلاع 
العرض العادي
