قواعد التعامل مع الطفل العنيد
-ماما ينفع أتفرج علي التليفزيون؟
-لأ..لما تخلصي الهوم وورك الأول.
-ماما ينفع أتفرج علي التليفزيون؟
-أيوا طبعًا ينفع ياحبيبتي، أول ماتخلصي الهوم وورك اتفرجي.
ودي القاعدة الأولي من قواعد التربية الأربعة لتسهيل الحياة اليومية مع الطفل العنيد:
مابنقولش لأ أبدًا (لأ بتحسس الطفل انك ضده وبتستفز عناده، الطفل اول مابيسمع كلمة لأ، بيحس أن حريته بتتقيد وأنه لازم يدافع باستماتة عن حقه، فيبدأ يعترض وينفعل ويعند)
القاعدة التانية:
بنطلب اللي عاوزينه منهم بأقل عدد من الكلمات، وبهدوء ومن غير زعيق، ولو رفضو بناخد رد فعل يعني الكلام بيتقال مرة واحدة بس.
مثال:
-من فضلك حبيبي لم ألعابك من الأرض.
-لأ.
-معاك ١٠ دقايق تلم ألعابك، بعدها أي لعبة هتكون ع الأرض هناخدها دولاب ماما ترتاح أسبوع ومش هيكون من حقك تلعب بيها.
لما بنقعد نزيد ونعيد في الكلام ده بيحسسهم أننا سهل نتشد لجدال معاهم، ومابياخدوش كلامنا علي محمل الجد.
القاعدة الثالثة:
هنديله اختيارات، لما بنعمل كده الطفل بيحس أنه القرار في ايده وده بيخليه أهدي و أقل عِند.
مثال:
بنزور ناس أصدقاء وابنك بيلعب مع ولادهم، مش فجأة تقولي ياللا عشان هنروح، قبلها بنص ساعة قوليله:
-حبيبي تحب تلعب مع اصحابك ربع ساعة كمان ولا نص ساعة؟
أيًا كان خياره هنحترمه وهنروح معاه فيه.
القاعدة الرابعة:
لازم نوريه اننا متعاطفين معاه، الطفل العنيد بالذات بيبقي حساس جدًا ومحتاج اللي حواليه يوروه أنهم فاهمين مشاعره، ولما بنطلب منه حاجة بنقوله من فضلك ولو سمحت.
مثال:
المثال اللي فات نبهناه قبل المعاد بوقت واديناله خيارات، دلوقتي هنقول:
-ياالا حبيبي النص ساعة خلصت.
لو بدأ يتعصب ويقول لأ مش عاوز امشي، اديله حضن وقوله:
-أنا عارفة أنك مبسوط باللعب هنا وعارفة أنه صعب عليك أن وقت اللعب يخلص، عشان كده هنيجي هنا تاني، لكن دلوقتي لازم نروح.
العند عند الأطفال مفتاح الابداع والابتكار
سيب ليه مساحه التعبير عن رأيه وفكره
حبوهم وحسسوهم أنهم مميزين وأصحاب قرار
|
|
|
|
عضويتي
قواعد التعامل مع الطفل العنيد 
العرض العادي
