ما غرام يشرح الصدر طاريه و إلا صدود و عمرنا ما عشقنا للكاتبة صدود كاملة - الصفحة 19

6 - 1 - 2022, 11:39 PM

وعدتك ان لا احبك..
ثم امام القرار الكبير
جبنت..
وعدتك ان لا اعود
وعدت..
وان لا اموت اشتياقا
ومت
وعدت مرارا..
وقررت ان استقيل مرارا
ولا اتذكر اني استقلت..

نزار القبانــي..

صحت من نومها وكل أطرافها بحالة خدر..
عيونها تخونها وماترضى تظل مفتوحة..
عقلها وحواسها تنبها بحالة توتر..
حاولت تتذكر آخر شيء صار معها..
ماقدرت لحتى فتحت عيونها وشافته..

نايم جنبها مستند على ذراعه..
عيونه تتأملها..
ويدهـ تعبث بغرتها..
لحظات مرت عليها وعيونها بعيونه..
هدؤ يسيطر عليهم..
رضى غريب يحسون فيه..
رمشت بعيونها بفزع لما تذكرت إنها في غرفته وهي بنفسها جاته..

شهقت بخوف وجلست بسرعة..
حطت يدها على صدرها..
وناظرت نفسها بإرتباك...
توها وعت على نفسها..
أستوعبت هي وش سوت..
قدمت نفسها له بكل سهولة..
وهي اللي حلفت مايعرفها..
عضتها شفايفها بندم..
أنتي وش سويتي..؟؟
غبيـــة..غبية..

ألتفتت عليه..
وأنتبهت على إبتسامته..
أرتعبت اكثر..
تجمعت الدموع في عيونها..
وارتجفت شفايفها بسبب الغصة اللي خنقتها..
صدت عنه تخفي ملامحها عنه..
وش توقعتي يكون ردت فعله..؟؟
يصدك وهو اللي يتمناك..؟؟
ولا يقدرك ويـ.........

لمت يدينها عليها..
ضمت نفسها لما سيطرت عليها رجفة قوية..
ماقدرت تمنع شهقات مكتوومة ماتطلع..
ماتوصل لقلبه وتحننه عليها..
همس لها من بعيد..
غازي بحنية\مالمستك..

ألتفتت عليه بسرعة بكل جسمها..
قربت منه وركزت عيونها في عيونه..
هديل بخوف\إحــ...ـللــ..ــف..
غازي بهدؤ\والله مالمستك..

صرخت بآآآآهـ مكتومة..
وبعكس كل توقعاته..
لمت يدينها حوالين رقبته وضمته لها بقووووة وهي تبكـــي..
صدقته..حلف وصدقته..
ما استغل غياب وعيها وتملكها..
ماجرحها جرح جديد..
تركه لها وهو اللي يتمناها..
حسسها بإن لها حق ترفض وتقبل..
لها حق تبعد وترجع..
قبلت جبينه وابتعدت عنه بسرعة..

خرجت من غرفته ولا ألتفتت عليه..
سمعت صوت ضحكته مبسووط باللي سوته..
أول مرة تضمه لها بدون إكراهـ منه..
أول مرة تقبله وكأنها تشكـــرهـ..
تركها تبتعد عنه براحتها..
يكفيه لمحت فرح تخيلها بعيونها..

دخلت غرفتها وهي تضحك وتبكي بنفس الوقت..
يحترمني..أنا مو جارية عندهـ..
ماني سلف ودين..ولاجيته بالرخيص..
يهمه رضاي..
بديت تعالجني..
بديت ترجعني لنفســـــــي..

بلحظات فرحها تذكرت ذياب..
كيف أنقذك يا ذياب..؟؟

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛

فديت الي اذآ ابطي
سآل عنــي وينهآ البطــــه ".,
فديت كل الكلام الي رسمه بغمزهـ من عينه
اقول ابطيت آسفة..
يقول لعنبوآ هالبنت و الحشمه ..

سلم على سارة وجلس جنبها..
راكان\وين بطتي..؟؟
لفت وجها عنه ولا كلمته..
راكان\ههههههههه من جدك أنتي زعلانة..؟؟
سارة\لاتكلمني..
راكان\طيب لما اروح مرة ثانية أجيبها لك..
سارة بغرور\شكــراً مانبي منتك..
زوجي بعد تسبدي جابها لي..
راكان\أوووف اجل بعد تسبدس جابها لك..
من وييين أكيد ماهي من شارع الماركات..
سارة بغيض\ولو من سوق أبو ريالين..
أنت وش دخلك..جبت الغالي وعطيته بطتك..
وأنا مسكينة ما أهديتني..
راكان\هههههههه عنبوا ابليس..
ما انتي كنتي معي هناك..
ليه ما اشتريتي اللي خاطرك فيه..؟؟
سارة\قلت أنت بتشتري ماله داعي اقولك..
بس طلعت غلطانة..مافكرت فيني وانا مبحلقة عيوني فيك..
ماحسيت على دمك وقلت ابشري باللي يسرك..
راكان\وانتي خليتي شيء ماقشيتيه..
كاسرتيهم في السعر وجلطتيهم..
ولما جات على خاتم غادة استجنيتي..
سارة تمثل الزعل\مانمت هذاك الليلة..
تسان ابتسي وابتسي..
ابيك تحس على دمك ولاعبرتني..
راكان\هههههههههههه الله يخليك لعين ترجيك يا سويرة..

دخلت غادة سلمت عليهم..
وقربت من سارة وراكان وهي معقدة حواجبها..
غادة بضيق\وخري من جنب بعد تسبدي..
سارة\تعقبين يالبطة..
خذيتي الخاتم وش تبين أكثر..
غادة تمد إصبعها لسارة\قومي قبل اتوطى في مصارينك..
وشوفي الخاتم مزين صوباااعي..
سارة\ياشينه في يدك..
إصبعك مسواك مايحلا عليها..عطيني اجربه..
يدي ريانة وأصابعي كنز..
غادة بسخرية\دا بوووعدك ياولية..
وخري من جنب زوجي اقولك..
راكان بعدها من مكاني..
راكان\يابعد راكان والله..
تعالي ماعليك منها العذوول..

مد يدهـ وبعد سارة من جنبه بدفاشة..
مسك يد غادة وجلسها جنبه..
راكان بمحبة\هلا وغلا..
غادة بدلع\هلا فيك ياقلبي..
سارة\ياتسببببببببدي مايلبق أبد ابد..
غادة بدلع زيادة\لايكون تاخرت عليك حبيبي؟؟
راكان بوله\يابعد حبيبك والله..
تدللي أنتي بس..
سارة\ابي خاتم..
غادة\ركووني باروح المكتب الله يخليك لا تقول لا..
سارة\لعنبوا ابليسكم يالحرييييم..
تدلعين عنده وركوني ومدري وشهو..
عشان تروحين المكتب..
إنثبري مافيه مكتب ولا شغل..
ماعندنا حريم يشتغلون..
بيتك وزوجك أولى فيك من مكتب وخرابيط..
غادة تعض شفايفها\جب لا تخربين تفكيرهـ ركووني ذو عقلية متفتحة..
راكان\خرطي..مافيه مكتب..
قلنا إذا كنتي مرتاحة تروحين المكتب..غير كذا إنسي..
غادة\ياخرابت البيوووت..
ياناشرة الفتن بين الزوجين..
أنتي ماعندك بيت تنثبرين فيه وتفكينا..
كل يوم ناشبة لنا..؟؟
سارة بشهقة\ألحين انا ناشرت فتن يا مبيد الحشرات العائلي..
أنا خرابت بيووت يا كيس السمنت المتنقل..
أنا ياللي خذيتي الخاتم وأنا ظليت ابتسي من الحسرة..
راكان\ههههههههههههههههه
يارب لا تبلانا بكيد الحريم..
كل هذا غل بقلوبكم فديتكم..
طلعوا طلعوا..إعتبروني ماني موجود..
غادة بغرور\لافديتك..أنهيت وصلة اليوم مع ناشرت الفتن..
الحقوودة ليش جبت لي خاتم ماجبت لها..
سارة\مالت بس..
هو عطاك خاتم بس عطى غيرك إسوارة وعقد..
لا تفرحين بنفسك يالمهبوولة..
شفته بعيوني يقز وحدة شقراء عصلاء..
عيونها حمر وشعرها اخضر..
ولابسة اللهم إسترنا ولا تغضب علينا..
ما ابي اخرب بيتك ولا كنت قلت لك كل الحقيقة..
بس حرام انتي حامل مانبي نولدك قبل وقتك..
غادة\تسذووووب..
صح إنها تكذب يا راكان..؟؟
راكان\أكيد تكذب..غيرانة منك يا بطة..
سارة\أجل ليه ما أهديتها العقد والإسوارة؟؟
غادة بقهر\إيه ليه ما اهديتني العقد..
سؤال يقرقع في قلبي ماقلته لك..
وين العقد والإسوارة..إعترف..؟؟
راكان بصدمة\أ...آآم مو عندنا موعد مع الطبيبة اليوم..
جهزي نفسك باوديك بعد المغرب..
سارة الله لا يسلمني إن مررتها لك على خير..

طلع من الصالة بسرعة وسارة تضحك عليه..
سارة\يستاهل اجل يهديك ومايهديني..
آآآهـ ياقلبي والله أرتحت لأني ورطته..
خييييير لا تناظريني كذا..جزاتي كشفته لك..
يالهووووي..

طلعت سارة ورى راكان وهي تضحك على غادة..
اللي كانت جالسة وتضرب أسداس في أخماس وتتوعد في راكان..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛؛؛؛؛؛؛

جلس في المجلس الرجالي المتواضع..
ولاحظ إحراج إبراهيم منه..
سولف معه وقهواهـ..
مسفر بهدؤ\إبراهيم أبي الوالدة في موضوع مهم..
الله يسعدك ممكن تناديها..
إبراهيم بحدة\وليه تبي أمي..؟؟
ومن تكون أنت؟؟
مسفر يبتسم\أنا صاحب أبوك الله يرحمه..
ولازم اكلم أمك..
إبراهيم\الله يرحمه..اللي تبي تقوله لامي وقله لي وأنا اوصله لها..
مسفر\أنت اطلب أمك تجي هنا وتسمع وش بأقول..

قدر يقنع إبراهيم ينادي أمه..
دخلت ام خلود وسلمت عليه من بعيد..
جلست جنب ولدها..
مسفر\أنا مسفر بن نايف الجالي..
مرام تصير خالتي..
ام خلود تبتسم\هلا والله فيك..
إيه عرفتك من تكون..
مسفر\الله يحييك..
والله يا خالة ماني عارف كيف أفهمك الموضوع..
ام خلود بهدؤ\مرام شرحت لي كل شيء ياولدي..
أنت رجال طيب وحطك الله في طريقنا..
ما انكر إني أستغربت كلامها عن الشايب..
وفهمتني ليه سويت اللي سويته..
مسفر تورط\السموحة منك يا ام إبراهيم..
يشهد الله ماقصدت الا كل خير..
ومافي نيتي إلا صالحها وراحتها..
أم خلود\العيب مايجي إلا من هل العيب..
وانت دقيت بابنا وطلبت عندنا..
وإن ربي كتبها لك فهي لك..
مسفر مصدوم\......................
ام خلود\بس طلبتك طلب..
مسفر بهدؤ\تم إن شاء الله..
ام خلود\ابراهيم إطلع يا امك شوي..
ابراهيم\يومه انا اخوها..
ام خلود\لاتعصاني فديتك..

وقف بضيق وطلع من المجلس..
ظل يتحلطم بقهر..
ام خلود\إن الله وفق وكتب لكم الزواج..
أبيك تظل مسفر الشايب لحتى تملكون والله يوفقكم..
مسفر بصدمة\لا يا خالة..
هذي حياة جديدة ومن حقها توافق وهي على بينة..
مايصير نخدعها..أنتي ومرام تفكيركم غلط..
ام خلود\انا امها واعرف مصلحتها..
واعرف بنتي وتفكيرها..لو تدري قبل الملكة إن انت الشايب..
ماراح توافق عليك..
مسفر\إن ماوافقت فهذا قرارها..
ولا احد يقدر يجبرها..
ام خلود\ياولدي همنا كبييير..
خلود أكبرهم بس والله إني شايلة همها اكثر من إخوانها..
مايخفيك خوفها وكرهها لكل رجال يمشي على الارض..
أنت دكتور وقدرت تخليها تحس باخوها اللي هجرته من بعد موت ابوها..
والله ماذكرتك الا بكل خير..
وقالت لولا العيب كانت بتخطبك لنفسها..
ابي اتطمن عليها همها علي كبير..
مسفر بضياع\إن شاء الله كل شيء بيتم على خير..
ام خلود تبتسم\الله يجزاك الجنة وينور دربك ويسعدك ياقادر ياكريم..
تقدر تطلبها من عمامها..باقول لابراهيم يعطيك رقم ولي أمرها..
مسفر محاولة اخيرة\صعب ياخالة اعقد عليها قدام الناس وأنا شايب..
ام خلود براحة\بتكون شايب عندها هي وبس..
موافقتها باعطيكم إياها على مسفر الشايب..
بس الحقيقة بتكون أنت مسفر الطيب..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

6 - 1 - 2022, 11:40 PM

عـلى هونك على قلبي ..
ترآ مآ أقوى تبخـتـارك
دخيلك لا تضيعني..
ترفق بـي .. علـى هونــــك ......!

وقفت بنص الدرج بإرتباك..
لما رفعت راسها وشافته واقف أسفل الدرج..
عيونه تتاملها بلبسها الراقي..
بشعرها المتمرد..
والأهم والأجمل روحها الجديدة..
يشوفها اليوم غير عن كل يوم عرفها فيه..
تنزل الدرج بخطوات هادية مترددة..
ماتدري بدلعها العفوي كيف تذوب قلبه..

أخجلتها نظراته لها..
وتمنت لو مالبست من فساتين صوفي..
اللي أهدتها لها بآخر زيارة لها..
فستان هادي جداً..
مرسوم على جسمها يوصل لتحت الركبة بشوي..
بسيور رفيعة من على الكتف..
لونه وردي..

وقف قدامه وسألت نفسها..
ليـــه مبسوطة ..؟؟
ليه تتجملين لــ المرة الثانية..
وليه نفسك ماخنقها الرعب لما شفتيه..؟؟

أبعدت عيونها عن عيونه بضعف..
ماعندها جرئته ولاقوة مشاعرهـ..
حبه لها واضح بكل رمشة ونظرة يوجها لها..
هي ماتبي حبه بقدر ماتبي الراحة..
وراحتها تاهت عنها ولا تدري وين بتلقاها..
معه.؟؟ أو بعيـــد عنه..؟؟

ماتكلم..ولا هي تكلمت..
حتى إبتسامتها العملية ماقدرت تظهرها..
خافت يحضنها او يحاول يتقرب منها..
ويقتل شيء توهـ بدأ ينمو بداخلها..

ناظرت ذياب بحضن ابوهـ..
مدت يدينها له وهو تعلق برقبتها..
فتح فمه وحطه على خدها..
ضحكتها حركته غصب عنها..
همست بكلمة\بــس..

وانحرجت اكثر من نظرات غازي المركزة عليها..
صدت عنه وتمنت لو تبعد عنه..
لو تظل لحالها من دون مراقبته ووجودهـ..
رجعت ذياب لحضنه وابتعدت عنهم..

أخذت معطفها وحجابها وطلعت من القصر..
سمعت صراخ ذياب يبيها ترجع او تاخذه معها..
بس فكرهـ مخيفة ضايقتها..

نظراته وعدم محاولته مضايقتها..
تنبئها إنه مخبي شيء كبيير..
ليه ماعاقبني على اللي سويته امس..؟؟
ليه يتبسم ويبين إنه طيب..
معقولة يخطط لشـــيء.؟؟
أكيد يخطط..
مو محتاجين أخ لذياب..؟؟
بس انا ما اقدر أعطيه اخ..
فيه حل ثاني أكيد..
وغن ماكان فيه فراح ينعاد اللي صار أمس..
لاني ما اقدر..والله ما اقدر..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛

احتويتك في خفوقي همس محتـاج لجـواب
وارتضيتك حلم ليل وحرف بكفوف الـبريـد ..
كل حرفٍ من حروفك خالط احساسي وذاب
عانقه نبضي وشوقي جاري مجـرى الوريد ..

ناظرت نفسها في المراية..
مبسوووطة بشكلها وروعتها..
تشوف كل شيء فيها غير..
حتى عيونها تتخيل إن لونهم تغير..
ضحكت على تفكيرها..
حطت آخر اللمسات على وجهها..
وناظرت غرفتها برضى تـــام..

أخيـــراً تجرئت تلبس الفستان الابيض..
أستغنت عن الطرحة وباقي التفاصيل..
لبست الفستان وسرحت شعرها..
مكياج أول مرة تسويه..
كانت دائماً تحط هادي ومايغير ملامحها..
بس اليوم زادت جرئة مكياجها واعجبتها النتيجة..

حست قلبها بيوقف لما سمعت خطواته داخل جناحهم..
أبتسمت بحب لما فتح الباب ..
وقف مبهوور بالغرفة وبزوجته..
أبتسم برضى وفرحة كبيـــرة..
كان يظن إنها مستحيل تلبسه بعد ما هددها بالطلاق..
لانها أخفته عن عيونه واعتقد إنها تخلصت منه..

يشوف حبها له وخجلها..
قفل الباب وقرب منها وإبتسامته تزيد..
وقف قبالها وحط يدهـ على كتفها..
رفع وجها له وظل يتأملها لحظات..
راجح بحب\روعة ياروعة..
رشا تبتسم\أحبك من هنا إلى الشمس..
راجح\أحبك من الشمس إلى هنا..

ضحكت بحب وضمته..
لم يدينه عليها وهو يضحك..
لأنها تتذكر مثل ماهو يتذكر..
لما كانت صغيرة تقوله أحبك من هنا إلى الشمس..
وهو يقول لها العكــــــــــس..

كانت بتقوله عن حملــــها..
بس أوهمت نفسها إنها مو متأكدة..
وبسبب ثاني تخاف يعصب عليها او يهاوشها..
هي صارت بخير..
نومها صار طبيعي..
تركت العلاج وهي واثقة بقرارها..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

6 - 1 - 2022, 11:41 PM

ما علمك صوت المطر كيف أحتريك ..؟
و إلا المطر .. ما جاب لي طاري أبد ..!
كم قلت لك في غيبتك وش كثر أبيك
أشتقت لك تقول لي .. وأنا بعد ..!

ركضت تحت المطر وهي تضحك مبسووطة..
وكانها رجعت بزر مايهمها شيء..
وقفت تحت المظلة التابعة لـ الملحق..
وجلست على المرجيحة..

ناظرت لـ القصر وشافته واقف على البلكونة يناظرها..
أشر لها بيدهـ وردت عليه بنفس الإشارة..
ناداها ترجع القصر..
بس هي هزت راسها بالرفض..
غازي بصوت عالي\بتبردين وتدخلين..
هديل بعناد رفعت مفتاح الملحق واشرت فيه له..
ضحك وصرخ عليها\سرووووووق ..
هديل بنفس صراخه\منكم نتعــــــــــــلم..
غازي بجنون\أحبــــــــــــــــــــك..

نزلت راسها ولا ردت عليه..
وكانت ردت فعلها متوقعة له..
عضت شفايفها من شدة خجلها..
وقفت بسرعة لما اشتد المطر..
ودخلت الملحق..
قفلته وتركت المفتاح على الباب..
عشان مايقدر يدخل إذا كان معه سبير..
شغلت التدفئة وتجاهلت كل تفكير يسبب لها ضيق وزعل..

إعتاقه لها لما هي جاته بنفسها..
تعني لها الكثيـــر..
أحيت شيء ميت بداخلها..
أقصت عن بالها فكرة إنه يرفض كونها جثة..
ولو كانت بوعيها ماكان بيتركها..
تبي تظل متفائلة وتفسر أي شيء يصير بينهم بنية طيبة..
ولو إنها تعرف نواياهـ كلها تملكية..

أتصلت على ابوها..
ولما طلبت أمها تعذر لها إنها نايمة..
كلمت عسوولة..
وحاولت تراضيها لانها زعلانة عليهم..
هديل بزعل\طيب أنا وش ذنبي..؟؟
هم ماجابوك لي..قلت لعلي يجيبك بس مارضى..
ام حسين\طلبتيني ولا جابني لك.؟؟
والله يالعصا الليلة تصك جنوبه الوجه الودر..
هو قال إنك مارضيت أجيك..
هديل بتبلي\الكذوووب..يتبلاني يومه لا تصدقينه..
جايب عبيد وسويرة..جننوني هبلو فيني..
ام حسين\أقول أنتي مطولة هناك؟؟
هديل\والله مدري يومه باقي ماقررنا..
نخلص مواعيد ذياب ونرجع بعون الله..
ام حسين\تدرين إن رويكن عطاني عقد وإسوارة..
هديل\هههههههههههه مبروووكة عليك..
ام حسين\ماهي لي يالهبلاء..
عطاني إياها قال هديتك متى مارجعتي..
هديل بإستغراب\هديتي أنا..؟؟
ام حسين\إيه هديتك انتي..
هديل\وليش يهديني..؟؟
ام حسين\يهديك عشان رجوعك بالسلامة انتي وولدك..
تدرين إنها طابت لي..وخاطري فيها..
هديل بخبث\أقووول يا ام حسين..
هديتي حطيها بـ الصندوق لحتى ارجع..
عيب عليك عجوز وش كبرك تسرقين هديتي..
الجدة\ههههههههههههه روحي عسى عيني ماتبكيك..
إيه يومه إضحكي وإنبسطي..الدنيا فانية يا فديتك..

الدنيا فانية..الدنيا فانية..
هزت راسها بعد ماقفلت من عسوولة..
وهي تردد كلمتها..
الدنيا فانية..
صدقتي يومه الدنيا فانية..
ولا يبقى غير وجهه سبحانه وتعالى..
حسيتي إني تغيرت يا عسوولة..
عساني أرجع مثل ماكنت..
إدعي بس إنه يعتقني دوم ماهو يوم..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛؛؛

آخاف لا قآلو النآس وشلونكـــ؟!
آنطق بدون شعوووور ..موجوعه..

ردت على الشيخ بالموافقة..
والتفتت على أمها بخووف..
لما سمعتها تشهق وتبكي ..
خلود بسرعة\خلاص يومه والله اقول لـ الشيخ لا يعقد لنا..
ما ابي الشايب ولا غيرهـ..ابراهيم ناد الشيخ تكفى..
ام خلود تضمها\لا يومه..
أنا فرحانة لك بس شايلة هم زعلك..
خلود مافهمت\لا ان شاء الله ماراح ازعل ولا اشكي منه..
شايب طيب وفيه الخير..
صدقيني مابيظلمني..أنا عرفته وجلست معه..
وبأظل ازور عيادته لحتى احس براحة اكبر..
ام خلود\لا مافيه تروحين لعيادته الا بعد الزواج..
خلود بحيرة\أي زواج..؟؟
ام خلود\حفلة زواجكم..
خلود تضحك\ههههههههه يومه فديتك..
هذا شايب يمكن على الساعة 7 وهو نايم..
لايعرف سهر ولا خرابيط..قالت حفل ههههههههه
ام خلود بإرتباك\لا لازم حفلة..وتنزفين وترقصين بعد..
خلود\أبشري نسوي حفلة ولا يهمك..
وارقص فيها بعد..بس الشايب لازم ينام بدري..
وش رايك نسوي الحفلة والشايب نايم..
حرام اخاف يكون فيه روماتيزم او ضغط وسكر بسم الله عليه..
الله يحفظ لي شايبي..
مرام\ياويلك ياويلك يامسفر ياويلك..
أنا مسافرة مع تركي مابنحضر زواجكم..
خلود\تحضرين غصب عن خشمك..هذا جدك ياللي ماتستحين..
إبراهيم\احم خلوود زوجك يبي يشوفك..
خلود\لبى الشواب ههههههههههههه..يبي يتطمن لا اكون شينة..
مرام\خلوود لا تستهينين فيه تراهـ جــــدي حبيبي..
خلود\جب لاتوصيني على شايبي فديته..
والله مبسوطة لاني تزوجت شايب..
عاقل ومؤدب ودكتووور..
إبراهيم\أي شايب..؟؟
ام خلود\ولا حد..قله بتجيه خلود ينتظر علينا شوي..
خلود تبتسم\يوومه حرام اخليه ينتظر..
يمكن ينام في المجلس ونتوهق فيه..
خليني اشوف وش يبي صارت الساعة ست ونص..
بعد نص ساعة بينام..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

6 - 1 - 2022, 11:41 PM

فزت بمكانها بسرعة لما حست بأرجولها تتحرك..
صرخت بخوف ووقفت بسرعة..
ناظرت فيه وهو يضحك عليها..
لما استوعبت إنه كان يحاول ينيمها على الكنبة..
لأنها كانت نايمة وهي جالسة..
ضربته على كتفه..

هديل بقهر\كيييييف دخلت هنا..
أنا كنت ادري إنك بتجي وسهرانة أنتظرك..
غازي يبتسم\فديت اللي تنتظرني..عشان كذا نايمة وانتي جالسة..
وهذا انا جيت ياقلبي..
هديل بإحراج\ابي اعرف كيف تقدر تدخل هنا..
عشان كذا ظليت سهرانة..
غازي\لااا سر ما اقدر اقوولك..
هديل\بلى علمني..الباب مقفول ماتقدر تدخله منه..
ولا تكذب علي وتقول من الشباك..
قول الصدق..
غازي بتفكير\اممممممم مصممة..؟؟
هديل بحماس\إيه..أبي اعرف..
غازي\مافيه شيء من غير مقابل..
هديل\قلتها لي زمان لما اهديتني عسوولة..
مافيه شيء من غير مقابل..
غازي يبتسم\حلووووو حلوو..
يعني فاهمة اللعبة..
هديل بعناد\مو فاهمة شيء..
ولا تحاول تضيع الموضوع..
كيف تدخل الملحق وهو مقفل..
غازي\اقولك إذا قلتي لي..؟؟
هديل بحذر\أقولك أيش بالضبط..؟؟
غازي بوله\اللي أنتي مخبيته عني..
هديل\مو مخبية عنك شيء..
بلى مخبية عنك أشياء..
غازي\لا مو الأشياء اللي في بالك الحين..
شيء ثاني أمووت وتقولينه..
هديل بشك\مو فاهمة عليك..
شيء..وشيء..تكلم بالعقل..
غازي بحنين\أنا احبك..
وما ابيك تنسين هذا الشيء ابداً..
هديل بخجل\اللي مايهمني أنساهـ..
والحين قلي كيف دخلت..؟؟
غازي\الحمدلله إني عرفت..
كنت بأتهور واسمح لك عني تغيبين..
هديل بخوف\عرفت أيـــش..؟؟
انا مو فاهمة عليك..
غازي\أدري إنك مو فاهمة..
إفهمي شيء واحد..
أنا أحبــــــــــــــــك..

خافت منه..
خافت من ثقته بشيء مجهوول عنها..
ماهو ذياب ولا اخــوهـ..
لا شيء أكبر من إنها تستوعبه..

أنصدمت لما مسك يدها ومشاها معه..
سحبت يدها منه وتراجعت بخطواتها..
غازي\ماتبين تعرفين كيف أدخل هنا..؟؟
هديل بتردد\ما أبي أعرف شيء..
غازي\وانا ابي اعرف كل شيء..

أبتعدت عنه بخوووف..
تبي تصرخ فيه لا تخوفني..
لاتعقدني منك ومني..
كمل جميلك وحررني منك بالكامل..

صدت وتوجهت لـ الباب..
تبي تطلع من الملحق وتروح القصر..
مسكها قبل تطلع..
غازي\وين رايحة..؟؟
هديل\القصر..كيف تركت ذياب لوحدهـ..؟؟
إبعد يدينك باروح..
غازي\لاتروحين في المطر..تعالي من هنا..

مشت وراهـ وتغلب إحساس الفضوول..
على الخووف والإرتباك..
توجه لآخر زاوية في غرفة النوم..
وقفها على الجدار..
وهي تلفتت حواليها تناظر الباب اللي دخل منه..
بس ماكان فيه باب ولا شباك..
رفعت عيونها فيه بقهر..
وهو ابتسم على نظراته..
غازي\اول ابي المقابل..
هديل بصد\ماعندي شيء أعطيك إياهـ..
لا اليوم ولا بعد سنين..
غازي إبتسامته تزيد\ابي المقابل..
بوسة وضمة مثل الصباح..
هديل بإحراج\أي صباح..؟؟
غازي عقد حواجبه\اللي سويتيه الصباح عيديه الحين..
هديل\من عيوني..
ابتسم لها وقرب منها..
بكسته على بطنه بقوووة..
هديل\تبي زيادة..؟؟
بكسته مرة ثانيه وهي مبسووطة..
هديل\كيف دخلت..؟؟
غازي\ههههههههههه
الحمدلله على السلامة..
رجعتي يا فديتك..

انحنى ومسك حلقة مخفية لونها بلون الارضية..
رفعها بقوووة..
وكانت عبارة عن مفتاح لباب ارضي..
نزل ومد يدينه لها..
غازي\تعالي..
هديل بتردد\لا إبعد..أنا انزل لحالي..
غازي\هههههه مابتقدرين الارضية بعيدة عنك..
هديل بعناد\مالك شغل..صح قصيرة بس بأوصل..
إبعد لا تمسكني..
غازي\طيب يا قصيرة إنزلي أشووف..
ولا تكسرين كافي عاهات..
هديل بقهر\أنت العاهة..
غازي\طيب يالله..

جلست ع الأرض ونزلت رجلينها..
درست وضعها وشافت إن طريقتها غلط..
قلبت وضعيتها وشددت يدينها على الأرضية..
تحاول توصل رجلينها لــ الأرض بس ماقدرت توصلها..
هديل\هههههههههه بأطييييح..
غازي\وش أسوي..؟؟
هديل\ههههههههههه والله خلاص ما اقدر..يديني تخوني..
غازي يضحك\يعني وش أسوي..؟؟
هديل\آآآآهـ غااازي إمسكني بالله عليك..
غازي مبسوط\يالبيييه..

أنفكت يدينها وصرخت وهي تحس فيه يمسكها قبل تطيح..
نزلها على الارض وهي ضربته على صدرهـ..
هديل\تبيني امووت..مافيه على قلبك..
غازي\والله عسل..

مشت قدامه وهي ماتدري وين تمشي..
يكلمها ولا ترد عليه..
تبي تكتشف المكان اللي هو مخبيه عنها..
وقفت عند تحفة كبيرة ..
عبست ملامح وجها وتعوذت من الشيطان..
وابتعدت عنها بسرعة..
مشى جنبها وحط يدهـ حوالين خصرها..
غازي\وين رايحة..؟؟
هديل\مالك شغل..
غازي\أبي اعترف لك بشيء..
هديل بنظرات شك\مابيعجبني إعترافك..
ما ابي اسمعك..
غازي\ههههههه تدرين إنك من اول يوم جيتي فيه المزرعة..
كنت انام معك في الملحق..
أحيان ما انام..أظل صاحي وأراقبك..
هديل بهدؤ\لاتكمل..
غازي\كل ليلة تبكين قبل تنامين..
تنامين وتبكين من غير وعي..

بعدت يدينه من حواليها..
ومشت بخطوات كبيرة هاربة منه ومن كلامه..
دخل يدهـ بجيبه..
وطلع الورقة اللي أعطته إياها صوفي..
آخر مرة زارتهم في المزرعة..

قرأ اللي فيها للمرة الألف..
ولازالت نفس المشاعر تنبض في قلبه..
فز بمكانه وركض يدرو عليها لما سمعها تصرخ بصوت عالي وتبكي..

إلى الملتقى بإذن الله تعالى فجر السبت ..

كونوا بخيـــــــــــــــــــــر ..

صدووود’’’

8 - 1 - 2022, 03:53 AM

البارت الخــامس والثمــانــــون ..

كيف استطاعت نفاذاً لقلبي؟
ويا ويح قلبي!
منذ سنين تجمّد كيف يعيشُ

الفتى دون قلبٍ يدقّ؟
ودون دماء تسيلْ؟
تحنطتُ لكنني لم أبح
فمشيت ولم يدر من مرّ بي

أنني دون قلبْ
فمن أين أقبلت ترتجلين القصائد
تستمطرين الكواكب زخة وجدٍ
تثيرين زوبعة في الرميم؟

أنا قد تقاعدت سيدتي
من مطاردة الوهم عبر صحارى الخيال
تقاعدت من رحلتي في تخوم الرجاء
وعبر بحار المخاض المليئة
موجاً عنيفاً
تقاعدت أعلنت للناس أني
قد كنت منذ سنين طوال ومتّ
فمن يفضح السر؟
من يحفر القبر؟

المرحوم بإذن الله تعالى..غازي القصيبي..

بعدت يدينه من حواليها..
ومشت بخطوات كبيرة هاربة منه ومن كلامه..
دخل يدهـ بجيبه..
وطلع الورقة اللي أعطته إياها صوفي..
آخر مرة زارتهم في المزرعة..

تحس بالأرض تحتها مثل الماء..
خطواتها متعثرة هاربة منه..
وهاربة من ذكريات صارحها فيها..
كان يشاركها الملحق باول ايامها..
ينام عندها..؟؟!
يسمعها تبكي..يعني يسمع كلامها وندائها لربها..
لأبوها..ندائها لـ هادي..
يسمع صراخها وهي تشوف كوابيس هو الملك فيها..

كان معي بلحظات خوفي منه ومن المكان..
خوفي من غربة انكتبت علي..
من إنسان غريب عني ومتملكني..
يسهر عندي وينام..
يعني حتى البرد اللي جمدني جمدهـ..

رفعت راسها وهي تحس بضيق وكئابة من المكان..
ماتدل الطريق عشان ترجع..
لازم هو يطلعها..
وبنفس الوقت تبي تظل لحالها..
تبي تسترجع أوقاتها الوحيدة بملحقها..
وكل ذكرى راح تتذكرها بتشركه فيها..

ناظرت حوالينها بإستطلاع..
تنتظرهـ يطلع لها او يناديها..
رجعت على نفس الطريق اللي مشت عليه..
اللي مطمنها إن المكان اللي هم فيه له طريق واحد بس..
مالاحظت وجود متاهات او مداخل غريبة..

ثبتت بمكانها وارهفت سمعها..
سمعت خطوات سريعة تقترب منها..
يرافقها تنفس سريع..
ماشكت يكون غازي..
لان غازي ماتعداها...
فيه شخص وراها يقترب منها بسرررعة..
حاولت تركض..
تبي تهرب منه ..
الخوف سيطر عليها..
صرخت باسمه بصوت عالي..
لما حست بشيء يلتف على أرجولها..
وشيء غريب يلمس ركبها من ورى..

ظلت تصرخ بكل صوتها وهي مغمضة عيونها..
حست بيدن غازي تلمها بقوووة لصدرهـ..
وسمعت صوت ضحكته عاااالي وهو يسمي عليها..
صرخت فيه وهي تبكي بخووف..
هديل بجنون\إبعــــدهـ عنـــــــــــــــــي ..
وخرهـ عني وخــــــــــرهـ..
يوممممممممممممممممممه..
غازي يضحك\ههههههههههه بسم الله عليك..
هششش إهدي مافيه شيء يخووف هششش خوفتيه...

حركت ارجولها بسرعة تبي اللي حوالينها يتركها..
وهي تصرخ بغازي يبعد اللي عليها..
شال يدينه من عليها وانحنى بسرعة..
فك اللي حوالينها وهي أبتعدت بسرعة ووقفت بعيد عنه..
أرتفع وهو شايل ذياب بين يدينه..

كانت ترتجف بمكانها..
والشهقات تمنعها لا تتنفس براحة..
الخوف متحكم فيها ولا فهمت سبب ضحك غازي..
لحتى شافت ذياب بحضنه..
حطت يدينها على فمها بصدمة ..
ولاقدرت تتحكم بدموعها..
قرب منها وهو يبتسم وضمها له وضم ذياب..
حطت وجها بحضن ذياب وبكت بخووف..
وذياب بكى زعلان منها لما صرخت وخوفته..
غازي بحنية\ليه تخوف أمك..كنت بتجلطها يا ابووك..
هديل بصوت باكي\ماعرفت وش يكون..
حسبته كائن..
غازي ماقدر يكتم ضحكته\ههههههههههههههه كائن مرة وحدة..
الحين هذا الذيب كائن غريب..
هديل\والله خفت منه..
وبعدين انت السبب..ليه خليته لحاله..؟؟
غازي\قال يبيك فرحت اجيبك له..

خذته من يدين غازي وضمته لها بقوووة..
بكت غصب عنها..
لازالت تحس برجفة الرعب اللي صابها مسيطرة عليها..
دائماً يضمها ويركض لها لما يشوفها بعد ماتغيب عنه لوقت طويل..
وهي من الظهر هاربة من ابوهـ وجالسة في الملحق..
غازي بحنية\إستهدي بالله ..
هديل بغصة\خووفتـــه مني..
غازي\بينتقم لنفسه بس خليه يستوعب وش سويتي فيه..
هديل تمسح دموعها\ههههههه بيتعلق بشعري اعرفه...
المفروض نتوطاك انا وهو..كيف قدرت تخليه لوحدهـ..
غازي\ماريا كانت معه..
هديل\كيف قدر يدخل هذا المكان..؟؟
انت من وين تدخل..؟؟
غازي\ذيب طالع لأبووهـ.
عرف الطريق مو مثلك كم سنة ماتدلين..
هديل بقهر\ماكنت ادري إن ابوهـ موسوس وجاسوس..
هذي حركات الجواسيس..ليه بنيت هذا الطريق..؟؟
غازي\هههههههههه اتجسس على اروع كنز..
هديل بصد\إختصر..ليه بنيته.؟؟
غازي\وليه ابنيه؟؟مو انا اللي سويته..
اللي بنى القصر بنى هذا الممر معه..
الملحق كان ورشة نحت..وانا سويتها ملحق للقصر..
هديل\امممممم وين الباب الثاني لممرك يالجاسوس..
غازي\تعالي وإكتشفي بنفسك..

اخذ ذياب منها ومشت جنبه..
ألتقوا بماريا عند الباب وكانت مرعوبة..
ماريا\أنا أسفة سيدي..
لقد ركض داخلاً ولم أستطع الإمساك به..
هديل بقهر\ليش مادخلتي وراهـ..
غازي\ماتحب الأماكن الضيقة..تخاف منها..
ماريا\أنا أسفة..
هديل\لو صار فيه شيء..كنت باذبحك أنت ياجلمود..
غازي بنص عين\يعني معصبة عشان ذياب
ولا لانك أنهبلتي من الخوف يالخوافة..؟؟
هديل تشهق\هئئئئئئئئ هذا المكتب..
غازي يبتسم\إيه المكتب..
هديل\الحين ماريا تعرف هذا المكان..؟؟
غازي\ماريا تعرف كل شيء هنا..
لانها عاشت في هذا البيت من سنين طويلة..
وهي اللي دلتني على هذا الممر..
هديل\تدري إنك مجرم..؟؟
غازي بوله\تدرين إنك قمر..؟؟
هديل تبتسم\حالتك اليوم مستعصية..
وش عندك مبسوط..؟؟
غازي\لانك معــي..
هديل\مو على طول..
غازي بهدؤ\مو قلنا نبي أخ لذياب..؟؟
هديل\سنة وينتهي عرضك..
غازي يقرب منها\سنتين..
هديل\يثبت حملي وارجع عند هلي..
وبعدها خذ عيالك وأطلع من حياتي..
غازي\معـــصي ولا تبعدين خطوة..
هديل بجمود\ابي اراجع دكتور ذياب..
غازي\هذا هو قدامك..
هديل بقسوة\سمعتك يادكتور فاشلة جداً..
ما انقذت بنتك فكيف تنقذ ولـــدي..؟؟
غازي\جبارة يا حمامة..
هديل\بعض ماعندكم يا جلمووود..

شالت ذياب وخرجت من المكتب..
وقبل لا تقفل الباب سمعت صوته..
غازي\نيميه بفراشه..
الليلة دور أخوهـ..
هديل بحقد\إحلم على قدك..
وأنا اقرر مو أنت..
غازي يغيضها\إن وقفت عليك ما جاء بعد عشر سنين..

طلعت غرفتها ونامت جنب ذياب وهي ضامته لها..
وعينها على باب الغرفة..
تخاف يدخل عندها..
عاتبت نفسها وين راحت الراحة اللي كانت مصاحبتها طول اليوم..
من اول ماصحت وهو جنبها..
وعرفت إنه مالمسها..
كانت مبسوطة ومرتاحة..
ليه لما واجها بموضوع الطفل الثاني..
تجمدت وقست..؟؟
هي قررت يثبت حملها وترجع لهلها..
تدري ما احد بيرضى بوضعها..
وبنفس الوقت ماتبي تعيش معه مجبوورة..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛

دخلت المجلس وشهقت بقووة لما شافت رجال فيه..
طلعت بسرعة قبل يشوفها أخذت عبايتها وطرحتها..
لبستها وهي معصبة ورجعت المجلس..
ماردت على امها ولا على مرام اللي يسالونها وش صار معها..

خلود\السلام عليكم..
مسفر وقف\وعليكم السلام ورحمة الله..هلا..
خلود بقهر\نعـــم وش تسوي هنا..؟؟
مسفر\؟؟؟؟؟
خلود\جدك وينه..؟؟
مسفر\جدي..؟؟
خلود\إيه جدك..اللي هو زوجي..
مسفر مصدوم\امك ماقالت لك..؟؟
خلود\وش تقولي..؟؟

جلس وهو مصدووم من الموقف اللي أنحط فيه.
كيف يشرح لها إنه هو الشايب او الجد مثل ماتقول..
كان يظن إن أمها او مرام بيقولون لها..
بس شكلهم معتمدين عليه..
مايشوف منها الا عيونها اللي تناظره بكرهـ..
لو تدري انه هو زوجها كيف بتقتله..؟؟
مسفر ابتسم على تفكيره\خلود إجلسي نتفاهم..
خلود\نتفاهم؟؟
أسمع أنا زوجت جدك وبمقام جدتك..
وتفاهم مابينا..جدك وينه..؟؟
مسفر\جدي في السيارة..
خلود\...في السيارة؟؟
مسفر بهدؤ\إيه تعبان وبيرجع البيت..
قال اتفاهم معك بالنيابة عنه..
خلود بقهر\تعبان وانت جالس هنا..؟؟
رجعه البيت يرتاح وياخذ علاجه..
وبكره يجي ونتفاهم..أنت لا تدخل بينا..
مسفر\لا بكره هو بيسافر..
الحين لازم اقولك هو وش يبي منك..
خلود\قوول..
مسفر\طيب إجلسي..
خلود\قوول اللي عندك ومالك شغل..
ولاتنسى ترى أنا جدتك أسمع كلامي..
مسفر\طيب ياجدتي..
زواجكم الإسبوع الجاي موافقة..؟؟
خلود\أدري أمي قالت لي..
مسفر\طيب نبي اللي في خاطرك..
خلود\اللي في خاطري..؟؟
مسفر\إيه جدي يقول إذا عندك شروط أو طلبات هو حاضر..
خلود\سلامته ما ابي شيء..
شغلي مابأتركه محتاجته..
وما ابي نبعد عن هلي..
مسفر\لك اللي تبين..وإذا فيه شيء ثاني لاتترددين..
خلود\لي اللي أبي..؟؟
أنت وش دخلك تقرر..هو اللي يسمح مو أنت..
مسفر بفشلة\احم احم لاني اعرف جدي..
مابيمنعك من الشغل..
خلود بطفش\والحين مع السلامة..
الشايب في السيارة ينتظرك يا مال العافية..
مسفر كاتم ضحكته\فمان الله..

مد يدهـ يبي يصافحها..
وسحبها بسرعة لما شاف عيونها تنبىء بضرب أو شتم..
أشر بيدهـ فمان الله وطلع من المجلس..

جلس في سيارته يضحك بصوت عالي..
يحس كل اللي يصير معه حلم وبيصحى منه..
دخلت مرارم السيارة وظلت تناظره مصدومة من ضحكه..
مسفر\صدق من قال شر البلية مايُضحك..
مرام\دووم الضحكة إن شاء الله..
وش صاير معك..أشوفك لا مفقووش ولا مطعون..
حتى انا ماطقتني ولا توطت في بطني..
كيف تفاهمتوا..؟؟
مسفر\هههههههههههه تقول إنها جدتي..
ههههههههههههه ومتزوجة جدي الشايب..
بعد بكره بتقول ياولدي..هههههههههه
مرام\هههههههههههه هي جدتك..؟؟
مسفر\لاحول ولا قوة الا بالله..
والله شايل همها لما تعرف..
مرام مصدومة\باقي ماعرفت..؟؟ماقلت لها؟؟
مسفر\هههههههه لا ماقلت لها..
شفتها مرتاحة لـ الشايب..
اما أنا تمنت لو تحرقني..
مرام\كييف بتقول لها..؟؟
مسفر\خليها علي هي زوجتي وزوجت الشايب..
مرام\مسفر كان المفروض تقول لها اليوم..
مسفر\ماراح اقولك ليش أنتي ماقلتي لها..
ولا اعاتبك اكثر من اول..
مرام\كان بإمكانك تنهي الموضوع لو مو عاجبك..
مسفر بعصبية\نعـــم كيف انهيه..؟؟
مرام\مو أنت قابلت امها..
ليش ماقلت لها إن الموضوع ماله اساس..
ولا تعيد كلامك إنك أنحرجت معها وماعرفت تتصرف..
أعرفك زين يامسفر ما احد يغلبك في الكلام..
مسفر\مو مسالة غلبتني او غلبتها..
ماني متعود أجرح احد..الحرمة ظنت إني جاي اخطب بنتها..
فكيف بتنصدم إذا قلت لها خالتي ملفقة موضوع من بالها أعذرينا..
مرام\لا مو كذا ياحنون..كنت بتقدر تسحب نفسك من الموضوع..
بس لان السالفة اعجبتك..
ولأن خلود مسيطرة على اغلب تفكيرك هذي الفترة استمريت فيه..
مسفر\لاتسوين محللة نفسيه علي..
لا شاغلة فكري ولا شيء..
وكسر الخواطر ماهو سهل مثل ماتتصورينه..
ماقدرت اكسر في خاطر ام خلود ولا في خاطر خلود..
وسكري الموضوع ولو سمحتي لا تدخلين بيني وبينها..
أنا بافهمها كل شيء..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

8 - 1 - 2022, 03:53 AM

مالهم صوت ..
غربوا والزمان سكوت .. ليتهم ماقربوا
وهقوني بالوصل .. علقوني بالأمل
هذا شيء لايحتمل ..
التجافي موت ..

ألتفتت على صوت عبدالله اللي يناديها..
عبدالله\يومه ليش ما كلمتي عمتي هديل..؟؟
ام علي\كلمتها قبل لا اصلي الظهر..
عبدالله\صدقتك..
ام علي بعصبية\احسن قوول كذابة..؟؟
عبدالله\محشوومة..بس أنتي ماكلمتيها..
ام علي\وانت مالك شغل..
اكلمها او لا..
عبدالله\بلى لي شغل..
لاتحسبيني مو فاهم ولا ادري وش صاير بينكم..
انا سمعت كلامك مع غازي..
ام علي بصدمة\سمعت كلامنا..؟؟
عبدالله\إيه سمعته..
بس هو يكذب عليك..
ام علي بقهر\ولا كلمة يا عبيد..
والله لو عرفت إنك تكلمت عن اللي سمعته مع أحد ما اسامحك..
عبدالله\ماني ناقل كلام..
بس ما ابيك تظلين متضايقة بسبب كذبه عليك..
ام علي\عبييييد..؟؟
عبدالله\هديل وش ذنبها قولي لي..؟؟
ليه تقاطعينها وماتردين عليها..؟؟
ام علي بغصة\إسكت يا عبدالله انت مو فاهم شيء..
عبدالله\قلتي ليه ضربت هديل..؟؟
هو مستحيل يضربها لانه يحبها..
أنا متاكد هو يكذب عليك لما قال إنه ضربها وأوجعها..
شفته كيف يهتم فيها زرتهم في بيتهم يومه والله هو طيب معها كثير..
ام علي تكتم قهرها\صح يا عبدالله..أدري إنه يكذب علي..
مابيضربها ولا بيوجعها..هي زوجته وأم ولدهـ..
عبدالله\طيب ليه انتي زعلانة..؟؟
ام علي\لاني أحب هديل..
أبيها ترجع تعيش عندنا هنا..
ولو يحبها مابيحبها كثري انا..
عبدالله\وغادة تبينها تعيش معك..؟؟
ام علي تبكي\ما ابي الا هديل..
ليتني مارجعت الا وهي معي..
ياخوفي تسوي اللي في بالي..
عبدالله\يومه لا تبكين..تكفين..
ام علي\اطلع من عندي يا عبدالله..
رحم الله والديك أطلع من عندي..

خرج من غرفتها..لا اقتنع بكلامها ولا قدر يقنعها..
هو سمع كلامها مع غازي..
وسمعها كيف تبكي وتترجاه يترك هديل ترجع معها السعودية..
وهو مارضى وحلف مايتركها تروح منه..

طلع جواله واتصل على رقم..
بعد ثواني رد عليه..
عبدالله\السلام عليكم..
عبدالله\وعليكم السلام..أهلاً يا صديقي..
عبدالله\ولكم ولكم..ياماي نيم..وير از غازي..؟؟
عبدالله\هههههههه لا اعرف..لماذا لا تتصل به..؟؟
عبدالله\وت يو مي ذير از يو..
عبدالله\هههههههههه لا افهم ماذا تقول..
عبدالله\عنبوا ابليسك كيف اتكلم معك..؟؟
عبدالله\وجع..
عبدالله\تعقب ماوجع الا في سيقان حرمتك يا القطو..
لو رجال تلبسها عباية وتصكها بوكس تلبس طرحة..
عبدالله\ياصديقي دائماً تتصل بي ولا افهم ماتريد..
إتصل بديل وهي ستخبرني ماذا تريد انت..
عبدالله\وت .. افري دي نو بربلم مع السلامة ياماي نيم..

قفل الجوال وهو مصمم يتعلم اللغة الانجليزية..
وظل يردد في باله من تعلم لغة قوم امن مكرهم.
لايكون يسبني مثل ماسبيته ويضحك علي..
أكيد الهياط ماهو محصور بس فيني..
يالبى سميي بس ولو يسب المهم سميي..
ألحين زوج عمتي كيف القاهـ مايرد علي..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛

هآت همك .. هآت جرح بيـوم هآنـك
و هآك قلبي .. هآك روحي و القوآفي
ولو يجيني مآ يجيني بس .. عشآنـك
بذمتي مآ أقول له : يآ جرح كآفي ..

وقفت بسرعة لما شافته على الخيل جاي لها..
مسحت دموعها بشكل سريع وهفت على وجها بيدينها ..
تحاول تخفي معالم البكاء من عليها..
مشت بعكس إتجاهه بخطوات هادية..
وقفت غصب عنها لما وقف قدامها..
وصار يدور حوالينها..
مد يدهـ لها يناديها تركب معه على الحصان..
غازي\تعالي..
هديل بهدؤ\أبي امشي...أنت روح..
غازي\مدي يدك..مشتاق أتمشى معك..

شاف ترددها ولاحظ ملامحها الباكية..
نزل لها شالها وركبها على الحصان..
ضربت الحصان بسرعة قبل يركب معها..
ضحكت بمرح لما ابتعدت عنه وسمعته يهددها ترجع..
هديل\الضيق في القبوور..تذكر..
غازي يبتسم\إيه اذكر..وقفي لاتبعدين..
هديل\ما ابي صحبتك..

ضربت الحصان أكثر وأبتعدت عنه أمتار طويلة..
كملت طريقها ولا التفتت عليه..
تستاهل مرة ترتكتني بآخر المزرعة من نذالتك يـ النذل..
خلك لحالك الحين..
ياليت تجي عاصفة ويضربك المطر مثل ماضربني بيومها..
يالنذل يـ القاسي يا الجلموود..

وقفت الحصان ونزلت من عليه..
وهي متفاجئة بـ اللي تشوفه..
مشت مبهورة بـشكل المبنى اللي قدامها..
أبتسمت بألم ودموعها تهددها..
حطت يدها على فمها وجلست على ركبها بضعف..

تتذكر لما شال كروم العنب ومنعهم مايزرعونها في المزرعة..
ولما جرد الأرض وصارت غير صالحة لـ الزراعة..
كان يمنعها ما تبتعد عن القصر والإسطبلات..
ماكان يبيها تجي لهذا المكان وتشوف وش يسوي..

سمعت صوت يقترب منها..
ما التفتت لانها تدري مابيكون غيرهـ..
وقف عندها وهو مبتسم بحسرة..
غازي\وقفت بنايته بعد موتك..
كنت بأحرقه مثلك..بس ماطاوعني قلبي..
إحساس البني آدم..لما يذنب يحب يحتفظ بشيء يذكره بذنبه..
أنا احتفظت بأشياء كثير تخصك..
جديلتك..دفتر خواطرك..
صورك اللي اخذتها لك وأنتي ماتدرين..
وأبعدت عسولة عني ماحبيت اشوفها من دونك..
ما احد سألني وينك..؟؟
ولا احد عاتبني..ابوك وهادي عاتبوا نفسهم ولا عاتبوني..
بعد رجوعك اصحى من النوم وأفكر هي صدق حية..
أشك بنفسي وانتي قدامي واقول حلم أو وهم..

مسكت يدهـ ووقفت على ارجولها..
شدت عليها وعيونها في عيونه..
هديل بغصة\مامت..
أبتسم بندم ولم يدينه حوالينها..
ضمها له بقوووة..
بين لها بعض من كل..
وهي مثل مايعرفها..
قلبها يغلب عقلها..
دائماً حنونة..ماتحب الندم يتملك أحد كثر ماتملكها..
هذي ثاني مرة تطمنه..
الأولة لما قالت إن جروح ظهرها ماهي منه..
وهذي الثانية وهو واثق إنه غلط في حساباته..

غازي بحنية\تعالي شوفيه من داخل..
هديل تبتسم\لا مو اليوم..
باشوفه إن شاء الله لما تنهيه..
غازي بمحبة\أعجبك..؟؟!
هديل تغيضه\شوي مو كثير..
غازي\ههههههههههه لو ماقلتي كذا كنت باشك فيك..
هديل تبتسم\لا تجعل إنك تعرفني..
صابت معك هذي المرة..
غازي بوله\وكل مرة..
هديل\اممم ما ابي اشوف نفسي وكذا..
بس الأحرف الناقصة فوق.. V و e ..
صــح ..؟؟
غازي\ومن غيرك يحق له يشوف نفسه..
صـح يا جنوني..

أبتعدت عنه وقربت من البناية..
غازي\أدخلــي..
هديل\لابس أشوفها من برا..
غازي\باين عليك الفضوول ذابحك..
هديل\ليش بنيتها..؟؟
غازي\طلبت شركة البناء تنهيها بسرعة..
كنت راح اجيبك هنا واعترف لك إنك زوجتي..
أنهي المأساة اللي بديتها..
ضيعت الطريق لك..كيف ارضيك وكيف اعترف لك..؟؟
بس الله قدر لنا غير اللي خططت له..
هديل كيف عرفتي إنك زوجتـــي..؟؟!
جاوبيني..

تراجعت بخطواتها وعينها بعينه..
عضت شفايفها واشرت براسها علامة الرفض..
صدت عنه تبي ترجع القصر..
خلنا ننسى..
إذا شفتني ناسية متناسية..
جاملنــــــي..
إنســـى معي..وخلنا نكذب على بعـــض..
طلبتني في يوم نكون اصحـــاب..
خلنا اصحاب لحتى ينقطع اللي بينا وننتهي..
تحمـــلني كثر ماتحملتك زمان..
لا تسألنـــي..عن شيء يضايقك اكثر من ما يضايقني..

رفعت راسها وشافته على حصانه قدامها ومد يدهـ لها..
مدت يدها له ورفعها جلسها قدامه..
حست فيه يضمها أبتسمت غصب عنها ..
غازي\حصانك هرب وخلاك..
ولاني أحبــك باخذك معي..
هديل\الله يكثر خيــرك..

ناظرت المبنى مــرة أخيـــرة..
هناك كان بيعلن لها إنها زوجته..
بيعترف لها..بس مثل ماقال..
الله قدر وحكم بغير اللي خطط له..
حمــامتي..
مبنى زجاجي بشكل حمامة لامة أجنحتها..
تذكر همسه لها بيوم من الأيام..
ناداها الحمامة الكسيـــرة..
وللأسف لازالت كسيـــرة..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

8 - 1 - 2022, 03:54 AM

فديت شمآغكـ الاحمر ..
و عطر العود حين اقبلت ..

طالب بمحبة\مساء الحب يا ام الوليد..
شوق\هلا..
طالب\ماشاء الله الوجه منوور اليوم..
والحالة تمام..
شوق تبتسم\الحمدلله..صرت احسن..
طالب\إيه كذا إبتسمي..
تكشيرتك تخوف..
شوق تذكرهـ\يقولون الولادة صعبة..
طالب\هههههههههه على ذمة القايل..
بما إن النفسية مرتاحة..
جبت لك هدية ماهي قدرك عندي..
شوق تبتسم\هههههههه تو الناس..
طالب عقد حواجبه\لازم تنقدين يعني..
وش اسوي أنتي مكشرة وامك ملازمة عندك..
وانا ابي جو رومنسي..
شوق\طيب يالرومنسي ماتقصر..
يكفيني وجودك..
طالب\الله لايحرمني منك يا ام تيتشر..
تفضلي يالغالية..

أخذت الهدية منه وهي مبتسمة..
فتحت الهدية ..
كانت طقم ذهب راقي..
فتحت البطاقة وتفاجئت بالصورة اللي طاحت..
شالتها وضحكت لما أدركت وش تكون..
طالب\وش رايك فيني قول وفعل..؟؟
شوق نزلت راسها بإحراج\مالك حل أبداً..
طالب\ههههههه..
قلت لك أنتي في حضني وعقبال ولدنا..
وهذا هو جاء الوليد..
شوق\الله يحفظه ويحفظ ابووهـ..
طالب\ويحفظك يا بطة..
شوق\لاتقول بطة..
طالب\واحلى بطة بين بطات العالم كلهم..

رد على جواله قبل تكلمه..
وكان غازي..
سولف معه شوي وعلق على شوق وطريقة ولادتها الجديدة..
طالب\ألحين بتبكي أختك..
خذ سنعها وقل لها تخلي عنها الدموع والهبال..
قال إكتئاب قال مدري وشهو..
شوق\اللهم عافهم مما إبتليتنا..
أخذت الجوال منه وردت على غازي..
شوق\هلا ابو ذياب......الحمدلله طيبة.....لا والله بخير لا تشيل هم.......
هههههههه تعرف طالب يحب يهايط............إيه وصلت هديتك فديتك..........
تعيش وتهدي..........الحمدلله المهم طيبين..؟؟
ألـــو غازي.............ألووو تسمعنـــي............ويـــنك.....؟؟

قفلت الجوال واعطته لطالب..
طالب\وش فيك..؟؟
شوق\أعتقد انقطع الخط..مارد علي..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛

وعدت
بإلغاء عينيك من دفتر الذكريات
ولم اكن أعلم أني سألغي حياتي
ولم اكن أعلم أنك
رغم الخلاف الصغير أنا..
وأني أنت
وعدتك أن لا أحبك
با للحمــــــــاقة
ماذا بنفسي فعلت؟؟!
لقد كنت أكذب من شدة الصدق
والحمد لله أني كذبت ...

نزار القبـــاني ...

سحبت الجوال من يدهـ وقفلت الخط..
وقف مصدوم من حركتها ومن نظراتها..
عقد حواجبه غير راضي بتصرفها أبداً..
هديل ببرود\الحمدلله هي بخير..
ولدها بخيــر..وصلتها الهدايا..
والاهم من هذا كله أمها معاها..
لا الاهم زوجــها معها..
يعطيها دم إذا احتاجت دم..
ويكون متاكد إن الدم بعروقها دم مسلم مو كافر..
يأذن باذون ولــدهـ..ينسبه له ويفرح فيه..
تصحى وهي متاكدة إن هلها حوالينها..
ماهي يتيمة ولا مقطوعة من شجرة..

ندمت لأنها تكلمت..
لانها سمحت لنفسها تعاتبه وتبين له ضعفها بايام ولادتها..
الغصة خنقتها ولا قدرت تكمل كلامها..
نزلت جواله على الكنبة وصدت طالعة من عندهـ..
وقفت لما سمعت صوته..
غازي\إقبال عزالدين عمره 29 سنة..
رجل مغربي مسلم متغرب في إيطاليا..
هو اللي تبرع لك بالدم..
الغيبوبة اللي دخلتي فيها..
كانت بسبب الكسر اللي صار معك براسك..
بعد ماضربك الحصان وفقدتي النظر..
ولدتي طبيعي ومن شد الأعصاب دخلتي بغيبوبة...
طبيبتك قالت لو ولدتي بعملية ماكانت الغيبوبة واردة عندهم..
حيرتهم غيبوبتك وبعد الفحوصات عرفوا السبب..

ياكـــــــثر ما أهمــــك..
ويــاكثر ما اجرحك وتجرحنـــي..
يـــارب آآلف بينا وريحنا..
تعبني وتعبته ..
أصلـــح حالنا ياربي يا حبيبي..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛

أسالك بالله جاوب
سؤالـــــــــــي .؟
وأسألك بالله اصدق
بالجـــــواب
في غيابي مر في بالك
خيـــالي؟
ولا ما يفرق حضوري
والغياب؟ ..

مدت يدها تصافحه..
وقرات عدم الرضا على معالم وجهه..
قربت منه وقبلته على خــدهـ..
ضحك وضمها له بقوووة..
ياسمين\الحمدلله على السلامة..
سلمان\الله يسلمك ياقلبي..
طمنيني كيفك وهديل كيفها..؟؟
ياسمين\الحمدلله إحنا بخير..
ولاتنسى إسمها نرجس..
سلمان\أول ماناديتها هديل..
ألحين صعب اغيرهـ..
ياسمين\هذي رغبت هديل..
سلمان\بعدها زعلانة..؟؟
ياسمين\المسالة مو زعلانة..
هي ماتبي احد يسمي باسمها..
حتى اخوها طلبت منه يغير اسم بنته بس هو مارضى..
سلمان\الله يصلح حالها..
ياسمين\وش سويت في اللي قلت لك..؟؟
سلمان\اممممم صعبة علي يا قلبي..
شهرين كثييير..
ياسمين\سلمان شووف كم سنة مرت..
مشتاقة لأخوي خلينا نروح الله يخليك..
سلمان\ما اقدر هذي الفترة على آخر السنة ممكن نسافر هناك..
ياسمين بزعل\هذا نفس كلامك قبل آخر مرة..
سلمان\جاء الموعد وانتي حامل بآخر شهورك..
وتوك مخلصة نفستك..

تضايقت منه وخرجت من الغرفة..
جلست في الصالة زعلانة وتمنع دموعها..
قرب منها ولم يدهـ على كتفها..
شالت يدهـ عنها بجفاء..
سلمان\مين مزعلك..؟؟
ياسمين بقهر\أنت..
سلمان بمحبة\وش مسوي فيك أنت..
مايستحي كل يومين مزعلك..
ياسمين\مثل ماتحب يا أنت..
إنت مع أهلك مرتاح ومبسوط..
بس أنا حارمني من اهلي..
سلمان\أفا يعني هلي مو هلك..؟؟
ياسمين\لا تحرف كلامي..
أنا محتاجة اشوف أخوي..
سلمان إفهمني..
سلمان بحنية\أووف أنتي ما احد يخبي لك مفاجئة ابد..
إن شاء الله تكون نرجس قادرة ع السفر ونروح لاخوك..
مرتاحة الحين..
ياسمين\يعني مابننتظر سنة..بس شهوور؟؟
سلمان\بس شهور..وش رايك في أنت؟؟
ياسمين\حبيبي انت..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

8 - 1 - 2022, 03:54 AM

تدروون كيــف إنســان يجني على إنسان ..؟؟
يسقيــــه من نبــع الغــلا ليــن يرويه ..
وإذا عرف إنه وصـــــل بـ مرحلة إدمـــان ..
يصـــــد عنه ويهجـــرهـ ما ســـأل فيـــه..

جلست جنب مرام وهي تعدل فستـــانها..
وتحاول تكبت غضبها تحت إحساس الخجل اللي سيطر عليها..
تضايقت ليش ماجاء ياخذها بنفسه من صالة الأفراح..
كل امورهم ومشاويرهم مسفر هو اللي يقضيها..
المهم هو اللي جابه..والحفل هو اللي قايم فيه..
كل شـــي يتدخل فيه..
بينما الشايب ماله ظهور ولا وجود..
مختـــفي عنهم..ولا فكر يسأل..
بدت تندم بصمت على تسرعها وموافقتها لـ الزواج منه..
كانت تظن إنه بيهتم فيها من بعد ماتصير زوجته..
يزورها او يكلمها..
ماتبي رومنسية ولا هدايا ومهر..
تبي حنان ابوها اللي فقدته مفجووعة..

ماكانت تسمع تصويات مرام لها..
ولا رفعت راسها تشوف مسفر اللي ماخذهم الفندق..
حست بالعبرة تخنقها..
تبي أمـــها معها..وحتى لو شايب..
هذي اول مرة تكون مع رجل غريب عنها..
حتى عمامها وأهلها ما تطيقهم ولا كانت تقابلهم..
هدت نفسها وهي تردد..
شايب مسكين تعبان عشان كذا ما اخذها من القاعة..
وارسل شوفيرهـ مسفر الصغير لها..
إيه هو لازم يخدمنا انا جدته وهذاك جدهـ..
فكرت إن الشايب نايم من الساعة 7 وناسي إن الليلة عرسه..
أنبست على تفكييرها براحة..

وصلوا الفندق ونزلت مرام وساعدت خلود تنزل من السيارة..
نزلت وطارت عيونها بمسفر اللي واقف قريب منها..
ويدها في يدهـ..
سحبت يدها منه بسرعة وعيونها تتوعد فيه..
لاحظت نظرات سخرية على وجهه وإبتسامة غريبة..
طنشته ودخلت الفندق مع مرام..
أستئذنت منها مرام إنها بترجع مع تركي اللي كان وراهم في سيارته..
تمسكت فيها خلود وطلبتها تظل معها..
مرام بندم\آسفة ياقلبي سامحيني..
بس مسفر بيوصلك لجناحك..
خلود بغيض\ولا يخطي معي خطوة..وصليني لجدك وبعدها روحي..
مرام\لا ما اقدر مابيسمحون لي أطلع معك..
مسفر يوصلك له لا تخافين..
خلود\أبد ولا يوصلني ولا شيء..
خذيه معك هذا الطايش ماشفتي لما كان بيسوي فينا حادث..
مرام بصدمة\خلوود لاتظلمينه وتتبلين عليه..
خلود\الشايب وينه..؟؟المفروض يستقبلني هنا..
ولا كل هذا نوم يقطع ابليس..
مسفر\يالله ياجدتي..الشايب عطاني مفتاح جناحكم..
أوصلك ويصير خير..

دخلت الأصنصير مقررة ماترد عليه..
عادي يوصلني لجناحي..
مو هو حفيد زوجي يعني يخدم جدهـ وجدته..

مرام\لو خليت امها تعلمها من زمان مو احسن..؟؟
مسفر\تدري مني وتكون معي أحسن..
هذا تركي واقف عند الباب ينتظرك..
فمان الله..
مرام\فمان الله ..الله يوفق بينكم..

دخل وقفل الاصنصير..
أبتعدت عنه ولاحظ حركتها..
وصلوا لجناحهم وهي تزيد رجفتها وخوفها..
فتح الباب ببطاقته..
أشر لها تدخل..
دخلت وزاد نبض قلبها بشكل مخيف..
قفل الباب وهي ناظرت حوالينها بس ماكان لزوجها أثر..
تأكدت إنه نايم ولا يدري عنها..
تنهدت براحة مصاحبها ندم..

فسخت عبايتها ورفعت طرحتها عن وجها..
مشت بهدؤ وتجولت في الجناح..
لاتخافين أنتي عرفتيه طيب..
ويشبه ابووك..حتى سبحته تشبه سبحة ابووك..
إحترميه وإهتمي فيه..
وماراح يعطيك الا حنانه وطيبته..
قررت تدخل غرفة النوم وتشوف اغراضها اللي رتبتها لها مرام..
تبي تبدل الفستان اللي ماشافه زوجها..
ترددت تدخل غرفة النوم خافت يصحى ويشوفها..

لفت راجعة لـ الصالة وهي مقررة..
تنام فيها وبفستانها..تبي هذي الليلة تنتهي..
بندمها وافكارها الفارغة..
شهقت بقوووة واختفى اللون من وجها..
لما شافت مسفر واقف وساند ظهرهـ على باب الجناح..
ويراقبها واقفة قدامه..
هي ظنت إنه طلع من الجناح بعد مادخلت وقفل الباب..
بس مثل ماهو واضح لها..
إنه دخل بعدها وقفل الباب..

من شدة خوفها وصدمتها فقدت توازنها..
جلست على ركبها ولمت يدينها على كتوفها العريانة..
محاولة تستر نحرها صدرها وكتوفها..
هي مو متاكدة إن زوجها في الغرفة القريبة منها..
مو متأكدة إنه ممكن يحس فيها إذا صرخت ونادته..
ماتثق في مسفر الحفيد اللي واقف قدامها..
رجعت لها كل عقدها وكرهها لــ جنس الرجال..
هذا رجل ماخاف ربه ولاحشم عرض جدهـ..

حاولت تصرخ لما شافته يقرب منها..
حاولت توقف وتهرب منه..
بس حست بكل اعضائها تتشنج..
حست بطعم الدم في فمها..
لسانها قسى والمها بشكل قوي..
ركض لها لم يدينه حوالينها..
فسخ شماغه ودخل طرف منه في فمها..
ضمها بقوووة وفك يدينها عن بعض بالغصب..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛

وعدتك
أن لا أبالي بشعرك حين يمر أمامي
وحين تدفق كـ الليل فوق الرصيف
صرخت..

وعدتك
أن أتجاهل عينيك, مهما دعاني الحنين
وحين رأيتهما تمطران نجوما
شهقت...

وعدتك
أن لا اوجه أي رسالة حب إليك
ولكنني رغم أنفي
كتبت...

وعدتك
أن لا أكون بأي مكان تكونين فيه
وحين عرفت بأنك مدعوة للعشاء
ذهبت..

وعدتك
أن لا أحبك
كيف؟
وأني؟
وفي أي يوم تراني وعدت؟
لقد كنت أكذب من شدة الصدق,
والحمد لله أني كذبت..

نزار قبــاني ...

فتحت الورقة تقرأ اللي فيها للمرة الرابعة..
وصلت لها ماريا بطاقة دعوة من غازي..
يطلب منها تعشى معه على بلكونة غرفته..
وختم رسالته بكلمة..إلا الأصفـــر ..

تدري إنها عقدته بـ اللون الأصفر..
ولما لبسته له من قبل كانت توصل له رسالة..
بــ ليلة رجوعها له..
وبـ الليلة اللي راحت لغرفته ونامت عندهـ..

حست إن نهاية هذي الليلة بتكون عندهـ..
خافت ودورت على حبوبها المنومة..
بس مالقتها..تضايقت وهي تدور عليها..
تمالكت نفسها وهي تردد..
مابيجبرني على شيء..
بيحترمني ويحترم رفضي له..
ماهو ضروري أخذ حبوبي معي..
ماراح يجبرني..

ناظرت فستانها الموف..
من مجموعة صوفي اللي خصصتها لها..
قصير ماسك على صدرها بسيور دقيقة..
لبست عقدها الهدية منه..
المكتوب عليه أطهر ذنوبي..
ناظرت الخاتم اللي لبسها إياهـ..
مافسخته الا بيوم عملية ذياب..
ولما صحت كان بإصبعها وهي واثقة هو اللي لبسها إياهـ..

العشاء على بلكونة غرفته مثل ماهو مكتوب في البطاقة..
فتحت باب بلكونتها بهداوة..
وقفت وناظرت بإتجاهـ غرفته..
كان واقف ينتظرها..

قرات المعوذات لما حست بالخوف يتملكها..
وهي تردد كلمة ماراح يجبرني..
قرب منها ومسك يدها وهو يقيمها بنظرات الإعجاب..
قبلها على جبينها وهي ابتعدت عنه بسرعة..

وقفت على حاجز البلكونة..
ظهرها له ويدينها تشد على الحاجز بقوووة..
وقف قريب منها لفها عليه ..
رفع راسها له بس هي غمضت عيونها بسرعة..
لاحظ إرتجافها وعرف إنها خايفة منه..
مرر أصابعه على عقدها..
وهو يبتسم بمحبة..
غازي\أبي اشوف عيونك..ناظريني..
هديل بخوف\أنت اخذت حبوبي..
غازي بهمس\إيه رميتها..
فتحي عيونك..
هديل بندم\ما ابي..
غازي\عشـــاني..

كلمته صدمتها منه..
عشاني..؟؟
تمنت لوتقول مالك شان عندي..
بس عاهدت نفسها تترك التجريح..
لاتجرحه ولا يجرحها..
هذا قرارها وقراهـ..
كانت بتفتح عيونها..
بس سالفة اخو لـ ذياب خوفتها..
فشدت على عيونها اكثـــر ..

تنهد لما لاحظ شدها اقوى على عيونها..
بعد ثواني حست فيه يقبل العقد اللي لابسته..
وبكذا اجبرها تفتح عيونها وتناظرهـ ...

إلى الملتقــــــــــى بإذن الله تعـــــالى فجر الثلاثاء..
إذا قدرت قبل الموعد المحدد فمن عيــوني ما اقصر معكم..

كونوا بخيــــــــــــــــــــر ..

صدووود’’’

8 - 1 - 2022, 03:55 AM

البارت السادس والثمـــانون ..

قفي! لا تتركيني في الرياح
أحارب بالنوازف من جراحي

و مأساة الوجود تحز قلبي
و تلتهم البقية من كفاحي

و في شفتي أبيات حزاني
تغنت-و هي تجهش-للصباح

قفي! لا تحرميني-والليالي
نصال-في ضلوعي-من سلاحي

تنكر لي الصديق فما اندهاشي
و قد قفز العدو إلى اجتياحي

أطالع في الوجوه فلا تريني
سوى رقص السراب على البطاح ..

المرحوم بإذن الله تعالى..غازي القصيبي..

غازي\عشـــاني..

كلمته صدمتها..
عشاني..؟؟
تمنت لوتقول مالك شان عندي..
بس عاهدت نفسها تترك التجريح..
لاتجرحه ولا يجرحها..
هذا قرارها وقرارهـ..
كانت بتفتح عيونها..
بس سالفة اخو لـ ذياب خوفتها..
فشدت على عيونها اكثـــر ..

تنهد لما لاحظ شدها اقوى على عيونها..
بعد ثواني حست فيه يقبل العقد اللي لابسته..
وبكذا اجبرها تفتح عيونها وتناظرهـ ...

غازي بوله\لاتحرميني عيونك النجلاء..
أول سهومك اللي صاوبت جلمود..
هديل بضعف\لاتربكني بكلامك..
غازي\وانا عندي أمل أأثر فيك..؟؟
هديل بصد\لا..إبعد عني..

أبتعدت عنه بسرعة..
ماتحب تسمع همساته..
ولا إحتضانه لها ..
صدها عنه ماهو تغلي..
ولا غرور..
بقدرة الله بتقدر تدفن كل شيء صار بينهم..
وهي واثقة إنه مابيقصر معها..
بيدفن الماضي معها وبينسون أو بيمثلون النسيان..
كل ماحاولت تبدأ معه من جديد..
يصرخ صوت مخنووق جواتها..
أنتي مجبورة تظلين معه..
قبل سنين والحين نفس الحال..
مجبورة على إختيار طريقه..

جلست على المقعد المشترك..
وجلس قريب منها..
نفضت كل افكارها..
وفضلت تتجاهل ذكرياتها معه..

أبتسمت بمرح لما لاحظت عبوسه..
غازي عقد حواجبه\قلت لها مانبي مكرونة..
هديل\تعجبني مكرونتها..
وهي تعرف هذا الشيء..
غازي بوله\آآآآهـ بس ياإني مشتاق لكبسة..
من يدينك انتي..هي مرة سويتيها ولا نسيت طعمها..
هديل\هههههههه يامجرم بعدك تذكر..؟؟
غازي يبتسم\إيه اذكر..
وبعدها تمننتي علي..
أقولك ابي كبسة تقولين روح لامك..
هديل تضحك\انا ماصدقت القى شيء..
أمن فيه عليك واقهرك فيه..
وأنت بكل ثقة يالله سوي كبسة..
غازي\ملحووقة بكرة إن شاء الله ابي كبسة ع الغداء..
هديل بغروور\إحلم على قدك..
غازي\ههههههههه أنتي يا القصيرة ماتشوفيني حجمي وكبري..؟؟
هديل عضت لسانها\ههههههههه بلى اشوفه ماشاء الله..
غازي\وهذا اللي ماشاء الله عليه..
حلمه وش تتوقعين كبـــرهـ..؟؟
هديل بتفكير\اممممممم قد السماء..
غازي بمحبة\قد الحمامة اللي يعشقها..

نزلت عيونها من عيونه بعد ماغمز لها..
ولفت وجها لـ الجهة الثانية وهي مبتسمة بخجل..
مايترك لها فرصة تتكلم معه من غير إحراج..

ألتفتت عليه واحرجتها نظراته اكثر..
هديل بخجل\خلاااااص لا تناظرني..
أبي أتعشى..
غازي ويدهـ على جبينه\
ياشينها لا صرت معجب و خجـلان
خـوف المصـارح لا يجيـب المطمّـه..
اخاف اصـارح بالغـلا ذاك الإنسـان
و ينقلـب جـوو المصـارح مذمّـه..
ويا شينها لا صرت مغرم و زعلان
محد ٍ يراضي قلبـك و محـد يلمـه..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

8 - 1 - 2022, 03:55 AM

دخل وراها وقفل الباب ..
أستند عليه وهو يراقبها تفسخ عبايتها وترفع طرحتها..
لاحظ جمالها ورقة ملامحها...
وانصدم إن كل هذيك المسبات والهواش..
تطلع من وحدة لها ملامح بريئة وناعمة كذا..
صار يشك إن هذي هي خلود اللي كل ماتشوفه تهاوشه..
وتقوله انا جدتك وأنت حفيدي..
كتم ضحكته على فكرة إن هذي تكون جدته..
ظل يراقبها تتجول في الجناح وتستكشف المكان..
وهو متأكد إنها ماشافته ولا انتبهت لوجودهـ..
أبتسم وهو يدري ليه تراقب المكان وتترقب ظهور الشايب زوجها..

كان ناوي يظهر لها بمنظر الشايب ويواجها بحقيقته بهداوة..
بس هو يتبع علاج لحالتها لاكثر من شهر..
من قبل لا يخطبها وهي ماتزور العيادة..
وبعد ماعقد عليها ماظهر لها..
بين لها إن الشايب مهملها..
واللي مهتم بها هو الشاب ..الحفيد المزعوم..

ألتفتت عليه..
ورحمها لما شهقت بخووف وهي تشوفه قدامها..
والمته حركتها لما طاحت على ركبها وتحاول تستر نفسها عن عيونه..
لانها تدري إنه مو زوجها ولا هي حلاله..

أنصدم لما لاحظ معالم التشنج تظهر عليها..
من وجها ليدينها وجسمها اللي يرتعش..
راح لها بسرعة..

حاولت تصرخ لما شافته يقرب منها..
حاولت توقف وتهرب منه..
بس حست بكل اعضائها تتشنج..
حست بطعم الدم في فمها..
لسانها قسى والمها بشكل قوي..
ركض لها لم يدينه حوالينها..
فسخ شماغه ودخل طرف منه في فمها..
ضمها بقوووة وفك يدينها عن بعض بالغصب..

صرخت بصوت مكتوم بسبب اللي في فمها..
ظلت ترتجف وهو يضمها بقووة ويقرأ عليها..
كل افكارها مجنونة..
عنه وعن حالها معه..
زادت حالتها لما حست بيدينه تحتضنها..
وهمساته بأذونها..
تبي أبوها..تبي الشايب اللي تزوجته..
بدت الدنيا تظلم عليها وهي تقاوم..
ماتبي تغفى ماتبي تغيب عن حالها وهو معها..

حفرت اظافرها بيدهـ..
حاولت تخلص نفسها من حضنه..
بس قوته اكبر منها..
واعصابها أتفقت معه واضعفتها..
غمضت عيونها وغابت عن وعيها..

حس فيها تهدأ وتستسلم له..
ارخى يدينه حواليها وسدحها على الارض..
شال طرف شماغه من فمها..
وعاينها بسرعة..
تطمن على حالها..
خاف يكون معها صرع ويقضي عليها بتهورهـ..
بس مرام ماقالت له إنها مريضة..
والي صار معها ردت فعل على خوفها من وجودهـ عندها..
تشنجت من الخوف وهذا شيء وارد..
وفيه ناس يتشنجون من الصدمة..

رفعها عن الارض واخذها لغرفة النوم..
سدحها على السرير وغطاها..
جلس قريب منها يتاملها بحسرة..
مرر اصابعه على خدها..
قلبه يعاتبه على حالها..
كل اللي صار معها خدعة وغدر..
تمنى لو ماوافق أمها ومرام على قرارهم..
لو بين لها كل شيء قبل يعقد عليها..

لاتلوم مرام ..
كنت قادر توقف كل شيء..
كنت قادر تحصل على رفضها وتعفي نفسك من الإحراج قدام أمها..
بس فضولك لها ..
حرضك توافقهم ..
أثارت فضولك بهواشها..
حكمها عليك بـ الإعدام..
وتعلقها فيك كــ أب وبعدها زوج..

قبلها على جبينها وطلع من الغرفة..
جلس في الصالة ويفكر في بكــرهـ كيف يتصرف معها..
كيــف يشرح لها من يكون..
والشايب اللي تزوجته ماله وجود..!!
حالتها صعبة جداً..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

المواضيع المتشابهه لموضوع: ما غرام يشرح الصدر طاريه و إلا صدود و عمرنا ما عشقنا للكاتبة صدود كاملة لموضوع: ما غرام يشرح الصدر طاريه و إلا صدود و عمرنا ما عشقنا للكاتبة صدود كاملة
الموضوع	كاتب الموضوع	المنتدى	مشاركات	آخر مشاركة
سجود السهو	نجمة المساء	نفحات اسلاميه	15	8 - 6 - 2021 12:49 PM
يشرح القلب طاريه ولا صدود وعمرنا ما عشقنا	شيخة الزين	همس عالم حواء	6	1 - 7 - 2018 10:50 PM
فستق صيني	همسة الشوق	همس لعالم النبات والثروه والزراعه والحيوانيه	8	13 - 9 - 2015 06:35 AM
علمو سدني	سجات التهاويل	همس للرياضه السعوديه والخليجيه	3	6 - 3 - 2015 08:50 PM
صور غنى 6 شيوخ في الخليج	علياء	همس للاخبار الفنية العربية والعالمية وصور المشاهير	7	29 - 10 - 2014 03:59 PM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع