(( ان مهما بلغت قوتك ياأبن آدم مصيرك للعش
مهما طار طير وارتفع إلا كما طار وقع ,,,
احيانا تجد الفتاه نفسها في مواقف لاتحسد عليها .. تضطر انها تغير شخصيتها بل تركيبتها كأنثى كي تحصل على ماتريد
لذلك هن فتيات عشن القسوه .. الظلم .. الاجحاف
ليس ممن يتبعن اسمه بعد اسمائهن لا فهاذا الشخص قد غادر الحياه .. هاذا الظلم يحصل من يحملن اسمه بعد اسم ابيهن
وضحى - شيخه - نوره - ساره - هند
تعمقوا في الاسماء جيدآ .. من الوهله الآولى تقولون اسماء عاديه ليس فيها شي .. وكثير من نساء مجتمعاتنا متسميات بها
ولكن هنّ لسن كاغيرهن .. عشن تجارب مريره .. ووقائع أغرب .. وتسلط عادات وتقاليد مريره .. يجب ان يكتون بنارها السليط .. ويلسعن بسواطها المرير.. وتدق أخشمهن في الرمال حتى يرين ان الحياة مريره .. كمرارة وجود الرجل بينهن .. لسن هن من اختارنه بل هو من اختارهن (( ؟؟؟ )) أليس هناك علامة إستفهام توضع !!
اتريدون الجواب تابعوا معي لتعرفوا ماأقصد من حروفي وكلماتي في روايه أقل مايقال عنها انها ستجلب لي مشاكل غير عاديه ..
رواية
( لاصـد قلبي صـــد من دون رجعـــــــــه )
..
للكاتبـــــــــــــــــــــــــــــه $ سهم المملكه $
( لن أحلل ولن أسامح من ينقل هاذه الروايه بتغيير إسمي منها
هاذا وصلى الله وسلم على سيدنا محمد ( عليه أفضل الصلاة والتسليم
لاإله إلا الله
.
سهم المملكه $
.
( لاصد قلبي صد من دون رجعه )
الفصــــــل الأولـــــ ( 1 ) ....
أبشرك ماعاد يوجعني فراق
وأقسى وجع يزول بثواني
عودت قلبي لاحمل هم أوضاق
ارمي ولاأسال عن اللي رماني
وعودت نفسي للمتاهات ماانساق
ولاأسيل دمع عيني واعاني
خل الحياة تروح والعمرارزاق
يمكن معالأيام يضحك زماني
دخلت البيت وهي دايخه وراسها يعورها من لجلجة الحريم اليوم .. استقبلتها نوره وهي خايفه – زين انتس جيتي الحقي خالي موجود ومعه الخمه حقته
رفعت عيونها في وجهه اختها بغضب – وليش تخلينه يدخل يالهبله
نوره – والله مادريت انه دخل ساره الهبله خلت الباب فاتح يوم جت
شيخه بعصبيه – حسبي الله عليه والله لأطين عيشتهم اليوم
اقتحمت المجلس بعصبيه برجلها يوم دزت الباب اللي يعلق وبصعوبه ينفتح .. من كثر مرور السنين اللي شاب منها هالباب المسكين
رفعوا عيونهم لها وبقوة وجهه – ايس هازا كلام يالله يالله داخل
شيخه بعصبيه – يمال الضعفه يالخايس يالمعفن قم خم هالعفن اللي معك واذلف برى ولا والله لأكلم الشرطه
من سمعوا كلمة شرطه قاموا يرتجفون ووقفوا .. لان بعضهم مايحمل الأقامه
خالها – عيب سيخه انا خال انتي عيب كلام كزا
شيخه بعصبيه – اثرك تعرف العيب يمال الضعفه هو وش مقعدك في بيتنا كل شوي وانت مجمع علينا هالخميم نطرد ولا يفيد معك
خالها عبدالستار – هازا بيت اختي ( وينزله دمعتين ) لوهي موجود
انتي مايقدر كلام حق انا كزا
شيخه وفاهمه لحركاته – واختك مو فيه ودعت الحياه معاد لك شي هنا يربطك فينا
عصب خالها وتكلم بالهندي منها مسبه لها ومنه يجمع اصحابه عشان
يطلعون
طلعوا وصكرت الباب وراهم بقوه .. وتأففت تلاقيها من وين ولا من وين
جتها نوره – هاه راحوا
شيخه وهي تمر من جنبها داخله لداخل – ايه ذلفوا .. وينهي وضحى
نوره – خذت هند وراحوا للسوبر ماركت
وقفت شيخه وناظت في نوره – وش عندهم !!
نوره وهي تجلس على الارض وتسند ظهرها على المسنده الباليه – راحت تجيب اغراض الطلبيه
شيخه جلست جنبها وقربت الشنطه تعد الفلوس حقت البسطه
نوره – طلعتي شي اليوم
شيخه وكأنها تتذكر العجوز اللي تهاوشت معها – عجوز زطيه كل
اللي طلعت فيه منها مئة ريال يمال الضعفه وكأني مااستفدت شي
اللي خذيته بعته عليها بنفس السعر
نوره – ووراتس
شيخه – وش اسوي اضطر احيانا يوم تمر الساعات ومايجيني احد
اضطر اني اضحي
ابتسم يوم شاف اخوه مقبل ووقف في مكانه
ضحك صقر وهو ينزل من السياره يوم سمع اخوه يرحب فيه – يالله حي هل المقناص وش غنايمك
صقر – الخير مليان انت بس تعال ساعدني
محمد ضحك – لا دخيلك توني متسبح ومبدل معزوم
صقر – وين !
محمد – بيت ضاوي بن محمد
صقر – اها
محمد – ناد بابو يساعدك والشغالات فيه
صقر – وهو كذلك ظهري يعورني وبروح اريح بخليهم ينزلونه
دخلت وضحى وهي تعرج وهند وراها تحمل اكياس وتساعدها
طلعت هند برقعها وهي تصرخ من الحر – يارب بذوب بذوب
وضحى – الله يعين هاذا ونحن في الدوادمي كيف لو كنا في الرياض
هند وكأنها تحلم – آآآآآخ يالرياض الله يبلغني وآشم ريحة هواها
وضحى – عزالله ماتمنيتي
هند وهي تحط الاكياس على طاولة المطبخ – وش نسوي نحلم على قدنا
دخلت عليهم شيخه وهي معصبه – مابغيتوا
هند – هع انا قلته بنوصل وبتستلمنا شويخ
شيخه – بلاه والله من خالكم هاذا اللي يعكر مزاجي
وضحى وهي توقف عن توزيع الاغراض في الثلاجه – ليه متى جا
شيخه – قبل شوي هو وخمته
هند – افففف متى بيفكنا هالخال من شره
شيخه – مادري ( وسرحت ) .. وضحى طالعت فيها – وش فيك
شيخه – والله مادري ياوضحى افكر في بكره من بيروح معي للأحوال اللي في الرياض علمت ام سعد وقالت بعلم بو سعد وارد لكم خبر
هند نطت – انا انا انا بروح بروح بروح مالي خص
شيخه رفعت حاجب وعصبت – نعم انتي تنطقين هنا بتروح معي نوره
هند عصبت – وليش نوره بالذات
شيخه – لان عندتس مدرسه ولا نسيتي
هند – وساره عرفت
شيخه عصبت بقوه – إن شاءالله بأخذ الأذن منتس انتي وعمتي ساره
هند عطتهم ظهرها وطلعت .. عرفت الامر انحسم وانتهى
وضحى وهي تجمع الأكياس وتحطهم في الدرج .. لان بيجي يوم وبيكون ألهم إستخدام – ومتى بترد ام سعد لنا الخبر
شيخه – بترسل سند ولدها يعلمنا
وضحى انفثت الهواء اللي في صدرها – الحمدالله ياذي البطاقه اللي موراضين يسلمون ألنا الضمان غير فيها
شيخه – الله يعين .. والله انّا ثقلنا على ام سعد وبو سعد الله يجزاهم كل خير
وضحى – آميـــــــــــــــــــــن
دخل البيت وهو مهموم .. لازم يضطر يرد لهالقصر الكئيب اللي عايش فيه لوحده .. جلس على الكنبه وجاه الهندي اللي يشتغل عنده – بابا سلطان احط عشاء
سلطان ناظر فيه – لا ماابي شي بروح ارقد
طلع الدرجات وهو يتحسر وشوي ودمعه ينزل على خده .. مابيقدر ينسى اللي صار لهم مايقدر
وصل جناحه وناظر فيه .. صار للحادثه اربع سنين ومو قادر ينسى مو قادر .. اعتزل اصحابه والعالم .. وقطع بيت جدانه وقاطع عيال خاله وعمامه .. وده لو الموت يأخذه ويلحقهم بس مو كل مايتمنى المرء يدركه الا ليت كل الدنيا بالتمني .. حط راسه وهو في أمل انه يرقد من دون مايأخذ الحبوب اللي تساعده على النوم
الفجر ( اليوم الثاني )
ركبن الجمس الاحمر .. في المرتبه الخلفيه وسند جالس معهن .. وبو سعد وأم سعد راكبين قدام
همست شيخه – الله يجزاكم خير ويجعل مثواكم الجنه ويسخر لكم من يساعدكم على اللي تسوونه لنا
بو سعد بصوته الوقور وروحه الطيبه – يابنتي انتم بحكم بناتي الله يرحم المرحوم ويغفرله ونعم الأخو والله لو أني سامع انكم طالبين من حد غيري يوديكم ان ازعل عليكم زعلن كايد
مرت الساعتين على خير ووصلوا الرياض
يـنـدمل جرح قلب ماتت احلامـة
بس ماضن يبرا جرح الاحـساسي
يـوم صارتمابيـن القـلب والهامة
ويش ابـي بالحـياة اليا انـحـنى راسي
في دار الضمان الاجتماعي
وقفت تعبي البيانات وجنبها نوره – اقول وراها ذا الشهباء تخزتس تسذا
شيخه – بكيفها خليها تخز منا لبكره وش ورانا غير الناس تخزنا وتضحك على اشكالنا
نوره – شيخه انا ودي اني اطلع بطاقة أحوال خاصه فيني بعد
شيخه – اقول يمال الضعفه انتي ناظري وراتس شوفي وش سوينا في ذا المساكين اللي من صباح ربي وهم معنا
لفت نوره ورى .. وشافت ام سعد وولدها سند رقود على الكرسي
نوره ضربت خدها – يالفضيحه
شيخه – اجل حطي لسانتس في حلقتس وانثبري قال وش تبي تطلع بطاقة أحوال
نوره بضيم – وش اسوي بنات الكليه هناك كاشخات في ذا البطاقه
يترززن ابها وانا لاقلوا رزي بطاقتس رزيت الورقه اللي مضمونها نوره بنت ناصر بن فهيد لاتوجد لديها بطاقه لضروف ...
قاطعتها بالحكي شيخه – ياغلي لو تصكتين احسن
نوره – وهو كذالك حطت يدينها في حلقها وسكتت
بينما الموظفه اللي تسمع هالكلام .. اندهشت من هاذا التشابه الواضح
في الاسماء اللي امامها والاسم اللي تعرفه عز المعرفه
في قصر من قصور الرياض
في الجلسه الشعبيه بالتحديد
جالس الشايب الوقور .. اللي غطى الشيب الابيض راسه ولحيته وحواجبه كذالك .. ومقابله له عجوزه وضحى
اقبلت لهم موضي وهي تضحك – يالله حي هالوجيه السمحه صبحكم الله بالخير
كلهم يناظرونها ويبتسمون ويرحمونها كثير بسبة الظرو اللي حصلت لها – صبحها بالرضى
الشايب فهيد – يالله حي شيخة الحريم موضي
موضي حبت على رؤوسهم – يحيك ربي ياجدي
جلست بينهم وتقهويهم
الجده – وراتس مارحتي لشغلتس وانا امتس
موضي – اليوم ياجده عندي مراجعه بالمستشفى لنواف ولدي
الشايب فهيد – افا وراه
موضي – تطعيم بس ياجدي
الجده وضحى – ووينه ابوتس
موضي – ابوي غبش من بدري واخذ اخوي فهيد معه
الجد يضحك – ليتني شفت وجهه اخوتس فهيد يوم خذاه ابوتس
موضي تضحك – اخوي خكري ياجدي مايعرف السلوم خل دواه الابل يقابلها شوي ويهتم فيه ولو يحل مكان آدم هناك كان أزين
الجده تضحك – لو يسمع علمتس بس
اقبلت عليهم وهي تمثل وتضحك – لالالا خيانه يامويضي هالحين قايمه من غبشه وماوعيتيني اقابل هالوجيه السمحه
الجده وهي تضحك – هاه اخذوا جتكم العياره رويم
وهي تقرب أذنها بشكل تمثيلي – اها سمعتس وضيح ان ماخليت هاللي مرتز وزانتس الشيخ فهيد يعرس مااكون ريم بنت سعد
الجده بعياره – ومن اللي بتناظر جدتس عقب هالعمر والشيب ينظح في رأسه
ريم بعياره – هاه هاه سمعت يافهيد اجل يومك تقصد في وضيح ولا تقصد فيني شف شف تعايرك
فهيد وهو مبتسم – بنت سعد عطيتس الشاره ازهميلي بالحرمه
ريم وهي تخبط على صدرها – وانا لها يافهيدان
في قصر ضاحي بن فهيد
وهو يصرخ في الشغاله – ازهميلي إياه بسرعه
الشغاله موفاهمه عليه – شنو بابا
سعد نزل من الدرج الضخم – علامك يبه ورى صوتك يلج في البيت
ضاحي – مصيبه ياسعد وانا ابوك
سعد بخوف – وش مصيبته يبه
ضاحي - ازهملي اخوك محمد ولا صقر خله يجيني لقينا بنات عمك ناصر
سعد بعلامة تعجب !! – وش هو
ضاحي – اييييه نسينا انك ماتدري رح رح قوم حدى اخوانك خله يجيني منيره يامنيره
منيره جتهم من المطبخ – علامك ياضاحي
ضاحي – خلي محمد يجيني
منيره – ليه عسى خير
ضاحي – لقينا بنات ناصر
منيره – اشششش لايسمع احد ويوصل العلم لأبوك انت وش فيك يارجال
ضاحي – فيه ان بنات اخوي هايتات ولانعرف إلهن طريق
وانا ماني بديوث ماعندي غيره عليهن لو معهن رجال بصره بس بنات وهايتات ويحملن إسمنا لا هاذذا اللي ماني راضي فيه ازهميلي واحد فيهم انا في السياره
البـــــارت الثانـــــــــ ( 2 ) ـي
في الشرطه
ضرب المكتب بكفه – وكيف هرب منكم
العسكري – مادري ياطويل العمر كل اللي نعرفه انه من وصل هذاك الدوار ضاع وضيعنا معه
ضاحي – هالحين تسوون تعميم على كل الوحدات والنقاط انها تنتبه زين لانهم اكيد بيخرجون يصدرون هالبضاعه من برى الرياض
العسكري – ابشر طال عمرك علم
ضاحي – زين روح شف شغلك
العسكري دق التحيه وطلع .. جلس على مكتبه مقهور من هالعصابه اللي اشبه بحكايات الجنون كل ماطلعوا وعرفوا طريقهم .. اختفوا في لمح البصر .. بس هو لها وين بيرحون من النقيب ضاحي سعد
في الصالون الأحمر
ركبن وهن مستحيات من العم سعد ومرته الطيبه
العم سعد – يابناتي ولدي سليمان زهم علي ويبانا نتغداء عندهم وشرايتسن ونكمل الطريق عقب الغداء
شيخه بطيب نفس – اللي تبيه ياعم
نوره تهمس لها – ومرته جميله ولسانها الأعوج وعيون سليمانوه اللي تبصبص علينا وين نروح منها
شيخه تهمس وعاضه شفايفها – وشرايتس نتعب العرب ونقول لا اسمحولنا حنا هوانم برنسيسات ودونا للدوادمي .. انتي حماره ولا حماره صبري العجوز متشققه على ولدها والشايب تعب من الطريق
نوره – صدقتس صح
ركب محمد مع ابوه في السياره وشغلها
محمد – متى وصلك العلم ياابوي
ضاحي – قبل شوي كلمني خالد يقول اخته خبرته بهالعلم
محمد – انا ولد ابوي وماقدرت تصرفهن لين نوصل
ضاحي – يقول لا بس بيقدر يجيب اخبارهن ووينهن فيه
محمد – انا لها ياابو محمد بس هالحين وين تبانا نروح
ضاحي – رح لخالد مااني بمرتاح لين اعرف لهن طريق
محمد – على ماقلت يالغالي ولا حتى انا
عند الابل
فهيد وهو واقف وملتف بشماغه من ريحتها .. وسعد يقرص عيونه في ولده – ماهي من هالمراجل اللي تسويه
فهيد فك الشماغ عنه وعطس – ابوي انا معي حساسيه الله يهديك ابي اعرف يعني ماتروح للأبل غير وانا معك
سعد وهو مقهور من ولده – بلاك والله داج وابي اعلمك السلوم اخوك اللي اصغر عنك يخوف بلد وهو ماسك قسم شرطه كامل
وانت داج ايد ورى وايد قدام فضحتني قدام العربان
فهيد تعب من هالاسطوانه اللي الكل يرددها على رأسه – افففف
سعد بعصبيه خوفت فهيد – اذلف اذلف لابركة فيك انت انت اللي بتموتني ناقص عمر رح الله لايردك
فهيد ركض بعيد عن ابوه ويلف شماغه زين عن ريحة الأبل
في بيت سليمان
سليمان يرحب بأمه وأبوه ويقرص عيونه في شيخه ونوره
وجميله عاصبه رأسها لانه محنيته ومغتاظه من شوفتهن
شيخه تهمس لنوره – عدال من زين هالرجل الكمخه اللي تحسب بنموت فيه ويأخذ وحده فينا
نوره – والله من قلة البخت اللي ماطرحه غير في ذا الحرمه
الجثه طول وعرض ووجهه يروع
شيخه مسكت ضحكتها – اششش لاتسمعك ثم تحطك ليمونه في غداها
نوره – اخخخخ ذكرتيني هالحين نبي نأكل من طباخ ذا الآدميه
شيخه – بسم الله عليتس توس تدرين
أم سعد – اقلطن اقلطن يابنات ( وهي ناقده على تصرف جميله اللي مارحبت فيهن )
في بيت ضاحي بن فهيد
نزل فارس مع الدرج وهو يدندن .. شاف امه وسعد جالسين وسعد يحاول يفهم من أمه علم .. ومنيره ماهي راضيه تقول
فارس – السلام عليكم وصباح الخير ياام فارس
سعد لف فمه – اففففففف انت مالقيت تنزل غير هالحزه
فارس بتساؤل – افا ليه وش صاير
سعد – يمه يالله قولي
فارس – وش تقول
سعد – انت انطم لين افهم العلم واعلمك
منيره – وش اقول مثل ماسمعت ابوك عندكم بنات عم ولايعرف لهن طريق
فارس جلس وهو مفهي – بنات عم .. عمي من
منيره – عم مات من زمان عمكم ناصر ماتعرفونه
سعد بتساؤل – عمي ناصر لنا عم اسمه ناصر
منيره – ايه واسكتوا خلاص وانتبهوا لايدري جدكم لانه مايبي يسمع لعمكم هاذا طاري
فارس – ليش وش مسوي عمي
منيره طفشت ووقفت – اففففففف خلاااااااااااااااااص لاتقلبون المواجع لاوصل ابوكم اسألوه هالحين لاتسألوني بروح لغداي لاني نسيته على النار
فارس – اموت واعرف وش قصة هالعم
سعد ناظر فيه بنص عين – يالله امسكوا الفضولي عاد ليش انت هنا ورى مارحت جامعتك
فارس – ماعلي محاضره اليوم افففف لازم تغثني بهالطاري
قام سعد من الصاله .. وطلع فارس جواله ودق على اخوه نايف
نايف اللي خلص إشراف على المرضى وهو في السيب يمشي
فتح الخط – هلا
فارس – المهلي انت وينك
نايف – في المستشفى يعني ويني بالله
فارس – انت دريت
نايف بتساؤل وهو معقد حجانه – عن
فارس – طلع لنا عم اسمه ناصر
نايف بسخريه – صدق والله توك دريت يالله ضف وجهك
فارس – يعني انت تدري
نايف – ايه ادري يالله فارقني وراي عمليه
فارس – زين لاتزف مادري متى تطلع هالنعره الكذابه اللي فيك
نايف – لامنك خليت اللقافه اللي فيك اتركها
فارس وهو لاوي براطمه – زين مع السلامه
نايف صكر من دون مايقول شي
فارس – دائم انت في وادي والعالم كله بوادي يانويف
قبل خمس سنين من هالوقت
محمد بعصبيه – ياجدي اللي تقوله ماينتصدق كيف ماتبي بنات ولدك
فهيد بصوت عالي واللي بالعاده يكون هادي ورزين – اللي سمعتوه ماابي إلهن طاري انا طردت ابوهن قبل خمس وعشرين سنه عقب ماشوه سمعت آل قاسي بسواته
ضاحي يمسك ولده – محمد اطلع وخلني مع جدك وعمك
محمد وهو مقهور – طيب
طلع وسكر الباب وراه
ضاحي – يبه ليش مو راضي تنسى وتسامح هاذولي بنات ولدك
اللي من صلبك كيف ترضى يهيتن ونحن عايشين
فهيد – ابوهن رضى إلهن بالمذله
سعد – ياابوي ابوهن غلط واخذ جزاه يوم طردته بس ابوهن مات وحنا ياعمامهن عايشين
فهيد – انتم كيف تبون تجيبوهن وتعيشوهن وسطنا وأمهن هنديه شغاله
ضاحي – ابوهن حب
فهيد قاطعه – اقطع اقطع سود الله وجهك كيف تقول ذا الحكي قدامي منهي بنته ولا ويش تصير ولا من جايبها لاهي من سلومنا ولا عاداتنا شغاله كانت في بيتي وتصير حرمه لولدي
يخسي مب ذا ولد اللي باع سمعة هله وداسها في التراب
صكروا على ذا السالفه اللي يالله لملمناها ولايطلع هالعلم لأحد
ضاحي – ومحمد اللي عرف طريقهن
فهيد – قله ان جاب ذا البني عندي ينسى انه من صلب فهيد آل قاسي ويبيع سلومنا ويتبع بنات الهنديه وابوهن الأجرب
في الوقت الحاضر
في السياره .. على مشارف منطقة الدوادمي
ام سعد – امسحنها في وجهي يابناتي هاذي جميله وهاذي خلاقينها لاتقدر احد ولا تحترمه وهاذا اللي خلاني انا وعمتسن سعد نترك الرياض ونجي نعيش في هالقريه ويبيع ويشتري في ذا الغنم كله ولا منتها
شيخه – افا ياعمه حنا بناتك وجميله ماتنلام تخاف على رجلها وعاذرينها ياعمه
ابو سعد اللي انبسط من ردهن – الله يكملتسن بعقولتسن يابناتي انشهد ان امتسن ربت يوم ربت
شيخه بحياء – الله يسلمك ياعم ويرحمها
في بيت خالد الساطي
ضاحي – وماعرفت وين بالضبط في الدوادمي
خالد – لا اختي تقول انهن قالن حنا عايشات في الدوادمي وبصعوبه يقدرن يجن هنا ويبن تاريخ طويل عشان مايتعبن في الأوراق وتعديلها
محمد بقهر – ومن جايات معه
خالد – تقول اختي ان معهن حرمه كبيره في السن ومعها ولد صغير
محمد وقف بقهر – يالله يبه مشينا
ابوه يناظر فيه – على وين
محمد بغبن وقهر – بحطك في البيت وبتكل على الدوادمي واكيد بعرف طريقهن مو من كبر الدوادمي
ابوه – خله لين الصبح وبنروح سوى
محمد اللي مقهور ان كل العالم عرفت بسالفتهم – لا انا اللي بروح اجيبهن وانت ارتاح
ضاحي ينفث لهواء اللي بصدره – اللي تشوفه وانا ابوك بس جدك لايدري
محمد – طيب
قبل خمس سنين
انصدم وصكر السماعه وهو مفجوع – ( يالله لنا عم ولا نعرف عنه .. من وين طلع من وين
دخل عليه العسكري – طويل العمر الحادث اللي قبل شوي يقولون انه هو وزوجته توفوا
زادت الفجعه عليه – ايششششششششش ماااات
العسكري حس ان فيه شي – طويل العمر فيك شي
محمد – لا اتكل شف شغلك
بعد فتره
وعقب ماعرف كل شي عن عمه .. وعن بناته
اخذ جواله من مكتبه وطلع عند جده .. وكلم ابوه يسبقه هناك .. وصل القصر حق عمه
لقا جده فهيد وعمه سعد في مجلس الرجال .. وابوه معهم
محمد بصدمه افجعتهم – اخوكم ناصر يطلبكم البيحه
بان الصدمه عليهم .. والصدمه الأكبر ان الشيخ فهيد صرخ بوجهه محمد – اقطـــــــــــــــــــــــــــــع ماعندنا ولد اسمه ناصر
محمد بسخريه – اجل اللي قريته في الورقه صح ا نلك ولد اسمه ناصر بن فهيد آل قاسي
قرب الشايب منه وعطاه كف – انا قلت لك اسكت اسكت
محمد انصدم من هالكف اللي يطلع من شيبه باين ان ظيم الدنيا فيه
محمد عشان ينتقم من الكف ويكوي فيه جده مثل ماكواه بهالكف
( لان محمد قوي وله هيبه تخووووووف جيوش .. ومايرضى احد يغلط عليه )
محمد بقهر – اجل اسمعوا الصدمه ترى عنده خمس بنات ومابينهن ولد كلهن بنات بناااااااااااااااااات ولازم يجن هنا مالهن
والي ومستحيل نخليهن
كلهم انصدموا من اللي سمعوه
ضاحي – وانت كيف عرفت
جلس محمد وحط رجل على رجل – اظاهر نسيت اني في الشرطه واني اعرف قبل أي احد كلمنا احد يقربله طلع وحده من بناته وعرفنا ان مالهن احد
وقف – ايه صح نسيت ان لهم هنا عائله ومو راضيه تعترف فيهن
فهيد يضرب بعصاه الأرض بعصبيه – ومستحيل نعترف فيه وفي بناته
محمد بعصبيه – ياجدي اللي تقوله ماينتصدق كيف ماتبي بنات ولدك
فهيد بصوت عالي واللي بالعاده يكون هادي ورزين – اللي سمعتوه ماابي إلهن طاري انا طردت ابوهن قبل خمس وعشرين سنه عقب ماشوه سمعت آل قاسي بسواته
وصل البيت واستقبلته بنته
خلود – بابا انت جيت تعال شوف خلودي ضربني
محمد بتعب كشر في وجهها .. ضاحي ناظر في ولده واللي يسويه في عياله
ضاحي – انا بضربه حبيبتي بس خلي جدتك تحط الغداء
خلود – طيب ياجدو ( وراحت لجدتها )
ضاحي – على فكره تراني لين هالحين ماسك نفسي خاف الله
وارحمهم تراهم ضعوف هاذولي عيالك متى بتفهم
محمد بعصبيه – ياابوي مااقدر كل ماشفتهم ذكرت وجهه امهم الشؤم فيهم مريموه حسبي الله عليها
ضاحي – وهم وشذنبهم فيك وفي امهم ترى امهم بعد ماتبيهم ولا انتوا تجيبون العيال ثم كل واحد منكم كف يده
محمد بهم – خلاص انا بروح احضر شنطتي وبنزل اتغدا واتكل
ضاحي – زين قواك الله
طلع محمد للدور الثاني واتجه على غرفة اخوه صقر .. طق الباب ودخل .. شاف انه يزر البدله العسكريه
محمد – بتطلع
صقر وهو مشغول في بدلته – ايه زهم علي خلفان يقول ابو سالم يطلبك يوم عرف انك وصلت لان فيه مهمه مايخلصه ولايقدر عليها غيري على كلامه
محمد – وماعرفت وش هي هالمهمه
صقر اتكى على رجل عشان يلبس الجزمه ( الله يكرمكم ) – لا ماعرفت
محمد – يعني ماتقدر تروح معي
صقر رفع عينه – لوين
محمد بسخريه – ترانا لقينا بنات عمك ناصر
صقر نزل عينه يكمل شغله – زين وش المطلوب مني
محمد بقهر – ياقوك ياشيخ اقولك بنات بنات لاوالي وهن ولايا على قولة المصاريه
صقر وقف على التسريحه يمشط شعره – جدي عرف
محمد يجلس على السرير – لا وانتبه لايشم خبر انا وابوي بنجيبهن هنا في البيت من دون مااحد يعرف
صقر حط المشط وضحك
محمد ناظر فيه – وراك تضحك
صقر – انتبه ترى في البيت جاسوس لاتنسى اخوك فارس
محمد – لا فويرس خله علي
صقر الطويل طول فارع يروع انحنى وحب خشم محمد – رح توكل قواك الله وان صار شي كلمني انا في الخدمه
محمد وقف – اجل بروح اجهز شنطتي وبنزل للغداء
محمد طلع ولحقه صقر .. دخل محمد غرفته
وصقر كمل الدرج .. قابل في وجهه نايف
صقر بسخريه – لا صاير في الدنيا شي مارحت لشقتك
ناظره نايف بنص عين وكمل الطريق
صقر كشر ابراطمه وكمل طريقه .. نايف وقفه – ايه بسألك
صقر وقف ولف رقبته بمعنى وش
نايف – صدق بنات عمك حصلتوهم
صقر عدل وقفته وقرب منه .. نفض بأصبعينه على معطف نايف – آه صح نسيت انهم بنات عمي لوحدي
نايف نزل يده وبسخريه – اعرفك انت واخوك محمد مهتمين في هالسالفه بقوه
صقر بقهر – اظاهر دراستك الخارجيه اللي قضيت فيها نص عمرك برى نستك الغيره على محارمك وخلتك ديوث
نايف رص صقر على الجدار .. صقر بسرعه لف يده ورأسه ولصقه بالجدار .. ونايف قام يئن
صقر – انت كيف تسمح لنفسك تمد يدك على صقر اللي حتى الجن هابه وخر عن طريقي نويف ولا والله اسوي شي ماابي اسويه فيك
نايف بتعب – زين فك يمال الجدري هب مو بيد ذي عجرى
صقر فكه – رحمتك بس المره الجايه عدها وشف صقر وش يسوي فيك
نايف بإستحقار – هه تهديد زي وجهك
وراح متجهه لجناحه .. وصقر مسك نفسه لايلحقه ويمردغه في الارض
دخل جناحه وحذف معطفه وانسدح على سريره .. ورجعت فيه الذاكره لبعيد شوي
ايام مكان متخذ صقر مثاله .. كان يحب يسوي مثله ويقلده في كل شي .. حتى كان يتذكر انه كان يبكي إذا ماجت شنطته مثل شنطة صقر اخوه من كثر مكان مفتخر فيه
تذكر اول يوم درس فيه كان يبكي يبي يصف مع صقر اللي كان ذيك السنه يدرس ثالث إبتدائي بس المدرسين رافضين
تذكرانه بكاء بكا موطبيعي لين خلوه يصف معه ودرس في صفه بعد
بعد فتره شوي من هالفتره
تذكر المتوسطه وهوشته مع واحد من العيال وقام مع هاللي يضاربه خوياه وهو لوحده .. تذكر صقر وقوته يوم ضربهم والعيال يوم هجوا من عرفوا ان صقر اخوه لانهم مسمينه الجني
محد يجي يمه و يمشي معه من خوف العيال منه بس إن ثار قلب المدرسه قلب حتى المدير براسه يخاف منه ويومه الأسود اللي يعاديه لانه يسوي اشياء ماتخاطر براس احد ابد
بعد هالفتره بشوي يوم تخرجه من الثانوي وحلمه يسافر برى ويدرس الطب
كان صقر الوحيد اللي يقنع اهله اللي عاداتهم وتقاليدهم راصه شوي عشان يسافر يدرس برى .. ومحمد مو مقتنع بهالفكره ذاك الوقت بس صقر اللي اقنع الجميع بما فيهم الجد واقترحوا بعد ان فهيد ولد عمه سعد يروح معه
انبسط وقعد يتذكر ماخلى شي ماشراه قبل لايسافر ذيك لفتره .. وسافر هو وفهيد مبسوطين .. فهيد اول الفتره اخذ السالفه لعب
ونايف مكان عاجبه وضع ولد عمه .. لين مل فهيد وقال برد للسعوديه .. وودع نايف
لما تذكر نايف عقب كل هاللي صار زفر بضيق .. وحس بالدمعه على وشك الهطول .. قام من سريره وفصخ بلوزته
واخذ الفوطه .. وخش تحت المسبح البارد اللي يقي من حر صيف الرياض
في الدوادمي
وصلن البيت استقبلتهن هند وساره في حوش البيت الشعبي البحت .. لدرجة حتى ارضيته تراب مو بلاط
شيخه – السلام عليكم
ساره وهند مبرطمات
نوره تناظر فيهن – وش فيه وش صاير
ساره الملسونه – اللي صاير انكن ياهوانم تروحون للرياض ولا تخبرونا
شيخه عصبت – لا عمتي ساره تعالي عطيني كف بعد ازين
ساره صكتت
هند بلقافه – كيف الرياض حلو شكلها
نوره – وش بنشوف يعني ترى من الدوادمي للضمان ومن ضمان لبيت سليمانوه اللي يسمعتس يقول خذونا وفرفروا فينا الرياض كلها
ساره – وعوووووووووه رحتوا لجميلان وسليمانوه الحمدالله اجل اني مارحت
شيخه – استغفرالله ياربي انا بروح ارقد ( وقفت ) وينهي وضيح
هند – وينهي يعني تراها تردح في المطبخ
شيخه بققت عينها – عيب استحي وش تردح ترى عندها طلبيات احمدوا النعمه اختنا الكبيره وشايله مسؤولياتنا
ساره – انا اشوف اللي شايل مسؤوليتنا انتي مو وضيح فلوس وضيح تروح ....
قاطعتها شيخه – ضفي هاللسان اللي يلوط الأذان لاتسمعتس ثم والله والله ياساره لو يوصلها اللي تقولينه اني لأذبحتس ناقصة عمر
ساره بخوف – خلاص خلاص فهمت