ديوان الشاعرة الراسية - الصفحة 3

#1 13 - 4 - 2025, 04:29 PM

حمد بن راجح

بسم خلاقي اببدا بذو النعم رب الجلاله
صاحب افضال ومكارم كاسية كل البريه

العظيم اللي كريم الطيب من جوده وفاله
والله انه فالسما والخير ياتينا هنيه

الشعر اسرج خيوله والقلم فلة عقاله
والمعاني من خفوقي والنظم شغلة ايديه

والقصيد علوم طيب تحتوي علم بحاله
سردها لو ان يطول ماتحوطه الأبجديه

والشكاله غير والله . غير عن معنى الشكاله
الشكاله في ( حمد راجح ) مواريها قويه

اصل وفصل ومبادي والعلا فخر يناله
عزوة للي تعزوا وانتخى يطلب خويه

وصله للشامخ المعروف واسرد هالرساله
قول بنه ماورد مثله ولابه حد زيه

الكريم اللي عطت يمناه واخفت عن شماله
السخي اللي يحب الجود ويدينه نديه

لاعطا مدة كريم حالف يفني حلاله
كن مابين الحلال وبينه حروب وقضيه

اشهد انه عند عينه صاغر قيمة رياله
مومن ان الله وهب له وهبة عظمى جليه

فاتح بيته سبيل وتارك ماله سباله
لانصاه الضيف لافي ماسأل سبة مجيه

وان شكى ضيفه سنينه او تشكى من لياله
فز ( ابو راجح ) بكبره يابخت من صار فيه

ينهض لضيفه ويفزع قبل لايحط البياله
وقبل لايرتد طرفه يخجله طيب العطيه

كل صعب يجيه مقدور من الخالق سهاله
باذن ربي الطيب عنده والعلوم الأجوديه

أبشر أبشر كلمة له دايم تختم مقاله
قبل لاتطلب عطيتك واستمع لي لو شويه

لو يجور الوقت مره او يطول في الأماله
لاتعداني فديتك دون ماتميل عليه

وكان ماتقدر تجيني والزمن عقد حباله
جيتك لبيتك أخ فزاع مايطلب جزيه

قلت ابمدح طيب كف غرق الكل بهماله
غيمة من عند ربي بالعطايا موسميه

جعلني ما ابكي عليه وجعلني ما ابكي عياله
وجعل روحي دون روحه دام ذا الدنيا مديه

وقلت انا هذي الشكاله. غير عن معنى الشكاله
الشكاله في ( الفهيدي ) غير عن كل البريه

الموضوع الأصلي : ديوان الشاعرة الراسية || الكاتب : همس الشوق || المصدر : شبكة همس الشوق

13 - 4 - 2025, 09:04 PM

متصفحك يشع بالنور الوضاء
الذى يضئ كالمصباح فى ليلة ظلماء
دائما يشرق بكلما هو جديد
ويلبس حله من الاناقه والتجديد
سلامي وتحياتي

13 - 4 - 2025, 10:45 PM

في خاطري حزنٍ له سنين مكبوت

في خاطري حزنٍ له سنين مكبوت
ذي بحته تظهر على الصوت تاره

اي والله ان عودي من الهم منحوت
راحت مشاريط الدكاتر خساره

من طاوله همه جفى نفسه القوت
لامن بلع ريقه يحس بمراره

تلعب به الدنيا مع جرة الصوت
وتمسك عليه من الطواري خفاره

وقامت هواجيسه تلوته بعد لوت
مثل الفلك لامن سبح في مداره

كنه يصارع سكرة الموت للموت
وضلوع صدره ولعت به شراره

وكنه من الضيقه غدى وسط تابوت
وش ينفع الموجوع فكةّ زراره

ويلاه ياعصرٍمضى فيه بخوت
كلن على وضح النقى شب ناره

من جرب الفرقا من الغدر مبهوت
عزي لقلبه لاجهرنا حماره

العشق خلى كامل العقل مسلوت
ماينفعه طب البدو في الحضاره

13 - 4 - 2025, 10:48 PM

بكره عليك تدور صقعات بقعا

بكره عليك تدور صقعات بقعا
وتشرب من الكاس المنمق كلامه

يضعفني احساسي ولو كنت شجعا
وتهزمني جيوش العقل بالندامه

وتغتالني عينٍ من الحزن دمعا
وظلم الحياه اللي تهين الكرامه

وطعنة رفيق في قفا الروح شنعا
لا باغتك والليل مسدل ظلامه

وان كان هالدنيا بهالوقت فدعا
فأنا دروبي كل ابوها استقامه

ما الله خلقني للمخاليق خنعا
وانا سليلة من يطش العمامه

واللي رفع سبع السماوات سبعا
اني اكرم خطوتي عن حرامه

وكم درعة في هالزمن جات ترعا
ورجال هذا الوقت مثل النعامه

وكلن بيحصد ماتعب فيه زرعا
وبيعلمه وقته يثمن كلامه

13 - 4 - 2025, 10:52 PM

‏
بنت ياميه واهني كل يامي

بنت ياميه واهني كل يامي
كل عام وياام في عزٍ وخير

‏صوب نجران الفخر سقت احترامي
دولةٍ تصيّر اللي ما يصير

‏وان بغيت العز في عدة اسامي
مالنجران الكرم اية خشير

من ثراها لين هامات الغمامي
شيء فآخر شي فآخر م الاخير

لو تشوف المجد في البلدان ضامي
ورده نجران وتشوف المصير

كل بذرٍ في ثرى نجران نامي
تنبت شجرته ويشبع كل طير

مايضام اللي خذاها له حزامي
مايضام اللي وردها بير بير

من كبير القوم لين اصغر فطامي
المراجل عندهم فطرة صغير

نارهم مثل الوغى والسيف حامي
وطيبهم غطى على الجمع الغفير

والله ان المدح مايوفي كلامي
لن نجران الفخر شي كبير

13 - 4 - 2025, 10:58 PM

الوعد باكر اليامن هزك الطاري

الوعد باكر اليامن هزك الطاري
وترياقك المر مره من معاليقه

الوعد باكر وحانت لحظة ابحاري
الله يعوض خفوق قل توفيقه

اشرب من البحر هذي زبدة اخباري
ولي مع الليل لا خان بمواثيقه

لا غرك الصبح ليل البارحه عاري
والغيم الابيض زمان ما بلع ريقه

اعكف على الشعر ردد جملة اشعاري
وصل نذرته حرام حل تفريقه

يطول فيك المدى ماتلحق اعذاري
الله خلقنا ويفرق في مخاليقه

ودعتك الله بعين رمشها ساري
والحر لا من كفخ ماسبقه يعيقه

يا مضرم النار ما انت الصادق الضاري
ودعتك الله بقلب ماهوى الضيقه

والفارس اللي لفاني بيح اسراري
اموت واظما لشوف الجمره تريقه

اموت لا ذاب ثلجه من لظى ناري
بدر لمع ف الظلام وحل توثيقه

الوعد باكر يجيبك صوت جهاري
لا غرب القرب صوتك عز ترشيقه

الوعد باكر وباكر مالكم طاري
وترياقي العذب عذبات معاليقه

13 - 4 - 2025, 11:02 PM

اقتباس:

المشاركة الأصلية كتبت بواسطة عشقي عيونك

حنا نصون أهل الوجيه المفاليح
ومن صاننا لو عاند الوقت ماطاح

نسرح اللي بايع الحب تسريح
عندي الكرامه رفرفت مثل الأرواح

بيتين من الشعر يعادلن ديوان
لو القصيد بنشرى وينباع
ماشريت غيرهم
صح انسان الشاعره
وسلم بنان الاقل
ودي واحترامي

13 - 4 - 2025, 11:02 PM

يمه على الظن فوق ولا تحاتيني

يمه على الظن فوق ولا تحاتيني

بموت ما تنحني لاكبر بشر هامه

ابيك لا جيت ببكي حيل ضميني
وخليني ابكي على صدرك وهندامه

يمه ذبحني الحزن محد يواسيني
امي بطعنة ظهر واقوم منضامه

والطعنه الي تغلغل في شراييني
ما تذبح الا على قول البدو هلامه

صوتك اليا مت يا يماه يحييني
قولة هلو من شفاهك تركز القامه

لبا معاليق قلبك يا مناديني
لبيه لبيه يا قلبي وصاممه

اذا سمعتي قصيدي فيك حييني
واكبر شياطين شعري يعلن اسلامه

واذا زعلتي عليه لا تحاكيني
والله لا ابوس القدم واصر خدامه

يمه فديتك بقربك بس داويني
داوي يتيم تخلو عنه اعمامه

يفدونك فروخ قلبي مع محبيني
ويفداك عمري وما اقبل من ايامه

ويفداك دمع على خدي يصحيني
ويفداك قلبي وما حوله من عظامه

يمه فديتك اليا من جيت حبيني
وانا من الراس بنزل لا خمص اقدامه

13 - 4 - 2025, 11:05 PM

ضاقت الدنيا الوسيعه في عيوني

ضاقت الدنيا الوسيعه في عيوني
واصبحت عندي مثل مثقال ذره

ياصباح الدمع الاسود ياشجوني
بالقدر آمنت في خيره وشره

اشهدان ها.. صدق ماخابت ظنوني
شفت في وقت الضحى كل المجره

واعدوني واعدوني واعدوني
جعل مايبقى لهم ف الارض جره

جعل قومٍ جاو من دونه ودوني
ماتشوف عيونهم لحظة مسره

هيضوني لعنبوهم هيضوني
بالقصيد اللي غدا فالكبد حره

كل ماواعدت ربعٍ خالفوني
مابقى فالخُرج من حلفي مبره

وين ما وجهت يامكثر طعوني
كنها جيشٍ تمركز في مقره

آه يا(بخوت) صوبه ماخذوني
وين يام ووين قحطانن ومُره

وين فزعة ربعي اللي مانسوني
وينها بقولها الفين مره

ضاقت فياض الوسيعه وابهتوني
واصبحت عندي مثل مثقال ذره

ياصباح الدمع الاسود ياعيوني
بالقدر آمنت في خيره وشره

14 - 4 - 2025, 11:23 AM

ابشر بها لعنبو منهو عصى شورك

ابشر بها لعنبو منهو عصى شورك

ابر بشورٍ على فرقاك يغريني

الساعه المباركه يوم انطفى نورك
لوحت تبغى الفراق وقلت من عيني

اشرب من البعد لن تفيّض بحورك
يكفيك ما جاك وما جاني يكفيني

لا تحسب ان الغلا بيزيد من جورك
ياجايرٍ الهوى ماهوب معنيني

وش انت يالي عصنك ابرك مهورك
وش موقعك في حياتي بن مغليني

خل السوالف وعطني صافي شعورك
في مهرةٍ طاحتك والناس ممسيني

خلت لك السرج وراحت وانت ف كسورك
تدعي المجبر ولا حولك مداويني

ادوارنا ادبرت والقابله دورك
يجيبك الليل الاغبر وانت توحيني

افطن لهرجي ترا مانيب مسحورك
جحر دعسته ودابه التوى فيني

في ليلةٍ ما تشوف عيوننا جحورك
والشاهد الله ليالينا تبريني

الحر له كفخه من باقي طيورك
يكفخ بعرض السما كفخة معيفيني

ذي زبدة الهرج مليتك من غرورك
ولوك بدمي بقطع كل شراييني

المواضيع المتشابهه لموضوع: ديوان الشاعرة الراسية لموضوع: ديوان الشاعرة الراسية
الموضوع	كاتب الموضوع	المنتدى	مشاركات	آخر مشاركة
الشاعرة حوراء الهميلي	همسه الشوق	همس دواوين الشعراء	14	15 - 1 - 2025 04:24 PM
الشاعرة سكينة الشريف	همسه الشوق	همس دواوين الشعراء	28	15 - 1 - 2025 04:22 PM
الشاعرة والاديبة الفلسطينية مي زيادة	ناطق العبيدي	همس شخصيات لها بصمة في التاريخ	2	21 - 12 - 2024 07:01 PM
الشاعرة حكاية رق قصيدة ياعونة الله داء علي البريكي	استثنائيه	همس الشعر و الشيلات الصوتيه	8	25 - 8 - 2013 03:53 PM
الشاعرة قمر الجاسم والشاعر عبدالرحمن الشمري	وتين الورد	همس الشعر و الشيلات الصوتيه	9	13 - 8 - 2012 10:13 PM

طلبات الإشراف
	إذا كنت قادراً على الإشراف في شبكة همس الشوق شريطة ان تكون مشاركاتك من فوق [ 5000 مواضيع وردود ]

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع