روايه ودك تنامين نامي - الصفحة 11

28 - 3 - 2014, 02:31 PM

(( مركز التوقيف ... ))( الساعة 5 المغرب )سعود وقف منصدم : يبا انت وش تقوووول ....؟؟؟؟؟ ابو سعود معصب : زي ما سمعت .. لاتحسبني اهبل ما دريت بالسالفة ... امك قالت لي كل شي صااار بالتفصيل .... الله يفشلك بس .... ما اقووول غير سود الله وجهك زي ما سودت وجهي .... اربي فيك واتعب وآخرتها تسوي سواتك ...؟؟؟ انت تعرف وش يعني عرضك .... تعرف عرضك وش يعني ...؟؟؟؟ من العصبية مسك ابو سعود ولده وحطه على الجدار بقوة وقال : يا غبي عرضك يعني سمعتك ... يعني شرفك .... يعني حيااااتك .. تفهم ولا لأ...؟؟؟ تفهم ولا لأ...؟؟ انت من وين جاااي...؟؟ انا وش سويت عشان يجيني ولد زيك ... وربي ولا عمري سويت ف اهلي زي ما سويت فيني ... الله يخزيك بس .. ما اقووول غير الله يخزيك ... سعود وخر يدين ابوووه عنه بقوة ووقف منزل راسه ف الارض .. ما توقع الامور توصل لهالدرجة ... خلاااص .. شكله هذي بداية حياة ثانية بالنسبة له ... حياة يكرهه فيها كل الناس اللي حوووله... ومافي ولا واحد واقف جنبه .... ابو سعود : للمعلومية .. انا بطلعك من هالمكان .. مع انه المكان الوحيد اللي يناسب الناس اشكالك ... بس انا بطلعك عشان تاخذ الكلبة اللي ما تربت بنت خالتك معاك وتذلف معاها لشقة تتعفن فيها انت وياها ... بعد اللي سويتوه ...لا يمكن اخليك لا انت ولا هي ف البيت .... فتح سعود عيونه الثنتين ع الاخير .. كان يبغى يقووول انه دلع مالها دخل .. وانه هو اللي تسبب في كل هذا ... بس كان خاايف مرة ... لا يصير في شي اكبر من اللي بيصير فيه الحين .. عشان كذا اكتفى بالصمت .... بس بعدين يوم تذكر انه ابوووه قال انه بياخذها... فعصب ...سعود : ومن قالك باخذها ....؟؟ لا ماني ماخذها .. انا اصلا ما ابغاها ... ابو سعود عصب بزياادة : ودامك ما تبغاها ليش سويت فيها كذا ليييش.....؟؟؟ تحمل اللي بيجيك الحين ... بتاخذها بتاخذها .. مدام راسي يشم الهوا.... سعود بعناد : ماني ماخذها فهمت ...؟؟ انا طول عمري عشت على كيفي .. ما بتجي الحين تقول لي اسوي شي ما ابغاه ...!!!!!!!!!عصب ابو سعود وعطاااااااااه بوكس على فكه وخلى الدم يطلع من اسنانه ... ابو سعود : لما اقولك بتاخذها .. بتاخذها .. ولا بخليك تتعفن في هالسجن ... فاهم ؟؟ أي صح .. ومن اليوم .. لا انا ابوووك ولا اعرفك ... وبيتي ما تدخله طول ما انا عايش...!!طلع ابو سعود من السجن وترك سعود متحير ... مو عارف وش يسوي ... ما يبغى ياخذ دلع .. ويبغى الفكة من هالسجن ... وخايف من الحياة الجديدة اللي تنتظره بعد طلعته ... سعود " طيب يا باسمووووو .. سويتيها وقلتيله ..؟؟ انا اورييييييييك " ___________________________________(( بيت ابو غادة ))( الساعة 8 بالليل )كان ابو غادة قاعد ف الصلة مع زوجته ويطالع الاخبار ..... ام غادة : بتروح اليوم ..؟؟؟ابو غادة : ليش...؟؟ ام غادة : لأ بس اذا ما عندك شي .. فكرت نرووح نتعشى ف مكان لانه البنات زهقانين شوي .....ابو غادة على طوووول : لا لا لا .. خلاص مافي طلعة .. حكاية الدشرة والصياعة اللي كل يومين هذي ينسوووها ... انا عطيتهم وجه زيادة وعطيتهم حرية وطلعوا مو قدها .. من اليوم ورايح طلعة غير يوم الجمعة معانا انا وياك مافي .... ام غادة : ليش طيـــ..قاطعها : انا قلت لك مافي ... يعني مافي ... بعدين انا اليوم بروح .. ومو اطلع منها وتروحين تدقين على صديقاتك تجيبينهم من هنا .. فاهمة ..؟؟ صديقاتك هذوولي اللي عندهم عياال زي الجن ما ابغاهم يدخلون بيتي مرة ثانية طيب...؟؟ام غادة : ابراهيم انت وش فيك ...؟؟ابو غادة : مافيني شي .. السالفة كلها اني ما عرفت ادير هالبيت بالشكل الصح .. والحين بمشيه زي الناس ... كل شي بيشي زي ما انا ابغى .. انا ابني واتعب وآخرتها يجون عيال زي الجن يكسرون بيتي مافي ... فهمتي ..؟؟ خليني اشووووفك عازمة وحدة بدون ما تقولين لي ... وبعدين السواق .. لا اشوووفكم طالعين معاه بدون ما تقولون لي فاهمة ..؟؟ والله العظيم ترى اسفره ولا اخليه دقيقة وحدة ...سكتت ام غادة متعجبة .. ولا عمرها شافت زوجها بهالعصبية والتخلف ... بس اللي كان ماخذ تفكيررها ... هو شلووون زوجها صار كذا .. ايش اللي خلاه يصير بهالعصبية والمزاجية هذي ...؟؟

28 - 3 - 2014, 02:31 PM

(( بعد 3 ايام .. يوم الاحد .. جامعة محمد بن فهد ))( الساعة 2 الظهر )ريم : ماني طالعة يعني ماني طالعة ..صديقتها بدور : ليش..؟؟ الحين المسكين جاي ياخذك مع انه ها مو شغله ... وتخلينه ينقع ف الشمس طووول هالوقت .. اقووول اطلعي بلا دلع زاااايدريم : ماني طالعة .. وربي استحي ... استحي مررررررة .. ما اقدر اقعد دقيقة وحدة معاه ... ما يعطي والحد وجه ... ولا يلتفت عليك ولا يكلمك ... ودايم لاف وجهه ولا يطالعك .....بدوور : يا بقرة يا غبية .. هذا لانه رجال محترم ... محترم نفسه ومحترمك ومحترم ابووك اللي عطاه الثقة ... تبغين يجيك واحد 24 ساعة يطالع فيك من فوووق لتحت وطاق معاك ميااانة ...؟!؟!ريم : والله اهون من احمد ..... ع الاقل ما استحي قداااااامه ... هذا الكلمة يالله تطلع مني لما اشوووووفه ... ولا عمري كنت استحي بس من عرفت هالانسان صرت مررررة استحي ..... ما ابغى .. ماني رايحة لا تقنعيني ... بروح معاك اليوم ...بدووور : يا غبية بمر بجيب اخووووي من الثانوية ..ريم : عااادي .. اخوك ما استحي منه ... بدور : لا والله ... اقوووول انتي ما ينفع معاك الدلع .. امشي ..مسكتها بدور وسحبتها لين وصلوا عند الباب .. عطتها شنطتها بدوور : يللا انقلعي .. امشي قدامي اشوووف ... اذا الواحد عطاك وجه بتمصخينها ... يللا قادمي ..... ريم : ماني رايحة لاتحلمين .... دفتها بدور لين شافت ريم السيارة ......ريم بصراخ : يا ويلييييييي....!!!بدور : انتي يالهبلة شفيك ....؟؟ ريم : لا لا لا والله حراام.... لابس ثوب وشماااغ ... ماني راكبة مااني راكبة .. والله اموووت ما اقدر ...بدور : خخخخخخ .... يللا اتهني ف الرجعة ... بكلمك اليوم ... باايتركت بدور ريم وراحت ركبت سيارتها وراحت عنها .. وخلت ريم ماعندها حل ثاني غير تركب .... ريم : اهئ اهئ ... الحين وش اسوووووي ... انا اوريك يا بدوووور .... بركب يعني وش اسوي بروحي الحين ..؟؟؟مشت شوي شوي ويوم قربت من السيارة ... جاها سؤال ثااني حيرها ريم : يووووه ... الحين وين اركب ..؟؟ قدا ولا ورى ...؟؟ نسيت اسال بدووور ... يا ويلي الحين وش اسووووي ..؟؟؟ اخاف اركب قدام يقول اني مو متربية .. واخاف اركب ورى وتكون ف السالف اهانة له .. خصوصا انه مو سواق...... افففف ... بسوي اللي طبيعتي تقول لي سويه ...... مشت وفتحت باب السيارة اللي قدام وركبت : السلام عليكم ..احمد بدون ما يلتفت : وعليكم السلام .... وبدون ما يطالعها ... شغل السيارة ومشى .... ريم " اففف... الله يعيني على هالطريق الطووييييييل .. متى يخلص واوصل البيت ... المشكلة انه هالانسان ثقيل ... ولا كاني ف السيارة ... " احمد كان يسوووق بهدوووء ... وكانه محد معاااه ف السيارة ... مشغل الاغاني بس موطي الصوووت .. وساكت ... لا يتكلم .. ولا يلتفت ... واذا بغى يشوووف شي من جهة ريم .. يلف لفة صغيرة بس بدون ما يطالعها .. وعلى طول يشيل عينه بسرعة .. ويوم مروا على باسكن روووبنز ... نست ريم انه احمد اللي يسوق فيها .. ريم : وقف وقف .. ابغى باااسكــ ( سكتت )تذكرت انه احمد معاها وهو اللي يسوق فيها وانحرجت مررررررة ... وقف احمد السيارة ولف شوي شوي عليها .. رفع حاجب واحد وقال : بغيتي شي...؟؟ ريم " !!!!! لا لا لا .. هذا بيموتني اليوووم ... حرااام عليه .. ليش يسوي هالحركااااااااااااااااااااااااااااااات ..؟؟؟ وربي مرة يخقق .... اهئ اهئ ....... " : ها ..؟؟ لا .. ل .. لا ولا شي .. كمل ....عقد احمد حواجبه : اكمل وشو ...؟؟ريم " هذا ليش كذا ..؟؟؟ والله كانه عارض ازياااء او ممثل ... بصييييييييييييييح " : ا.. لا .....ل ... ك .. يعني كمل الطريق ولا شي .... انتبه احمد لباسكن رونبز وابتسم : تبغين آيس كريم ...؟؟؟ ريم خقت " ارحمممممني !! " : ها ...؟؟ لا خلاص ماله داعي .... بخلي رائد يجيبلي بالليل .... لف احمد وجهه وهو مبتسم ابتسااامة تخقق .. فتح باب السيارة ونزل .. سكر الباب وقال من فتحة القزاز : اقفلي الباب لين ارجع ... ولا تفتحيه لاحد طيب...؟؟ ريم يالله تنطق : ط .. طيب ... راح احمد ودخل باسكن روبنز .. اما ريم فكانت قريب وتستخف ف السيارة .... ريم مسكت راسها مندهشة : هذا من وين جاااااااااي...؟؟؟ بصيح من جد بعد شوي ... لازم يحط مراية يشوف شكله وهو يتكلم ... عليه حركاااااااااات ... وربي انا ما اقدر كذا اركب معاه كل مرة ...ااحس بيغمى علي .... جما واخلاق ورزة وثقل وادب وووو ..... شهااامة <<< متعوووب عليها هالكلمة شوي الا رجع احمد وبيده كيس وكان لابس نظارته الشمسية... دق الباب حق السيارة عشان تنتبه ريم .. ويوم انتبهت فتحت الباب وقلبها يدق بقووووة .. دخل احمد وسكر الباب بعدين مد لها الكيس بابتسامة خفيفة : تفضلي.. ما ادري وش تحبين عشان كذا جبتلك اكثر من نووع ... ريم تطالعه وتطالع نظارته الشمسية اللي طالعة دمااااار عليه ..... وما ردت عليه .. احمد مستغرب : ا... احم ... ريم انتبهت : ا.. ها..؟؟ ( ابتسمت ) شكرا ... ما تقصر ... احمد لف وشغل السيارة : العفووو ... ذاااااابت ريم في كرسيها .... فقررت تشغل نفسها .. فتحت الكيس وشافت كل الانواع اللي تحبها .. وما عرفت وش تختاااار ... ريم : وااااو .. كل الانواع اللي احبها ... وش آكل الحين ...؟؟ احمد ابتسم بدون ما يلف : اللي تبغيه ... ريم اختارت اللي بنكهة الجاموكا الموند فدج .... ريم بابتسامة : انت ما تبغى ..؟؟احمد وهو يسوق: لا شكرا ... رجعت ريم حقها للكيس وسكرته وقعدت.. وانتبه لحركتها احمد ... لف عليها بكل هدوء مستغرب .... احمد : ما عجبك ...؟؟ريم منحرجة : لا والله ... بس.. ما اعرف آكل بروحي ... احمد ابتسم : والله لو اني ما اسووق ما بقول لأ .. بس لاني اسوووق فصعبة السواقة مع الاكل .... ريم بعفوية : طيب سهلة .. وقف على جنب .. ناكل وبعدين نكمل الطريق .. سكت احمد ولف وجهه يسوق ... وبعدها بدقيقة جاته الضحكة ... وما قدر يكتمها ... ابتسم وبانت اسنااانه ....ريم رفعت حاجب : لا والله .... ايش اللي يضحك الحين ..؟؟ احمد هز راسه : هههه لا ولاشي ... تذكرت شي وما قدرت امسك ضحكتي .. ريم ابتسمت" واااي على الضحكة .. يازينك والله " لف احمد وشافها مبتسمة .. فوقف السيارة على جنب ... احمد : عطيني اللي بالفانيليا ... ابتسمت ريم وطلعت اللي بالفانيليا من الكيس .. وعطته الملعقة والكلينكس .. وبعدا طلعت حقها وبدوا الاثنين ياكلون الآيس كريم .... وبعدها كملوا مشوارهم لبيت ابو رائد .. والسوالف شوي شوي تدخل بينهم ....

28 - 3 - 2014, 02:33 PM

(( بيت ابو فيصل .. ))( الساعة 7 بالليل )كان ابو فيصل قاعد ف غرفته يركب الكبك ف كم ثوووبه يوم دق جواله ...شال الجوال ورد على طول .... ابو فيصل : الوووووو ابو نسايم : الووو ... السلام عليكم ... ابو فيصل : وعليكم السلام ... من معاااااي ...؟؟ ابو نسايم : حتى صوتي نسيته يا عسمااااان ( عثمان ) ...؟؟ ابو فيصل : ايواااا.. هلا هلا والله بعمي .... معذرة توني قايم من النوم وماني مميز شي.... ابو نسايم معصب : ليش انتا بس لما تقوووم من النوم ما تميز..؟؟؟ ما انتا طول الوقت مو مميز ....ابو فيصل : افاااا .. ليش كل هالكلام يا عمي ..؟؟؟ابو نسايم : وانتا خليت فييها عم ..؟؟؟ انتا اصلا واحد قليل اصل ما تعرف الواجب والعادات ..... كدا .. كدا تحرمنا من بنتنا...؟؟؟ 4 سنين ... 4سنين يا زاااالم ( ظالم )؟؟ ابو فيصل قلب وجهه : يا عمي هذي زوجتي وانا حر وين اوديها ووين اجيبها ... بعدين والله مشغووول وما حصلت وقت ......ابو نسايم يصارخ : لأ .... لا تقول ما عندي وقت ... عندك وقت للويسكي وللفودكا وللخرابيط هدي ولا عندك وقت تخلينا نشوووف بنتنا ..؟؟؟ هادا مو كلام يا عسمااااان ..ابو فيصل : يا عمي لو سمحت .. هذا مو من شغلك .. انا انشغل بللي ابغاه .. وزوجتي اوديها المكان اللي ابغاه .. ما تجي انت وتعلمني وين اوديها ووين اجيبها .. مع احترامي لك طبعا ....!!!!!!!!!ابو نسايم : شووووف انتا .. انا ماني داق اطلب منك ولا اترجاااك .. انا جاي أأمرك امر .. وانتا تعرف ازا انا امرت بشي لازم ينفز ( يتنفذ ) .. ابغاك تجيبلي بنتي جدة في اقرب وقت فاهم ..؟؟ وعلى اقرب طياارة .. ولا ما بيننا الا المحاكم .... فاهم ...؟؟ وانت تعرف سمعتك اللي ما تساعد في أي قضية حتى لو كنت فيها مزلوووم ( مظلوم ).... والله لا اكتبك تعهد عند الشيخ ... فاهم ..؟؟قفل ابو نسايم بوجهه بعد ما عطاه زفة محترمة .... وابو فيصل عصب مرة ..ابو فيصل : طيب.. طيب .. بنشوووف من اللي ف النهاية بيفووز يا انا يا انت يالجدواااي .. ( يقلد ابو نسايم ) لاااااازم يتنففففز ...!!!!!!!

28 - 3 - 2014, 02:36 PM

(( بعد يومين ... يوم الاثنين .. شركة ابو سعود )( الساعة 11 ونص الصباح )كان ابو سعود قاعد في مكتبه يوم دق تليفونه ... رد : الووو ...الضابط مشاري : الو السلام عليكم ..ابو سعود : وعليكم السلام ...الضابط : ا .. الاخ عبدالله الـ ( ..... )ابو سعود : أي ...الضابط : كيف الحال..؟؟ معاك الضابط مشاري من قسم التوقيف ... ابو سعود : ايوا.... هلا والله .. كيف الحال...؟ الضابط : بخير الله يسلمك .. ماعليك شر .. بغيت ابشرك انه ولدك سعود طلع بريء .. وماله دخل ف السالفة .. والتحقيق كله كان بس عشان امن المجتمع لا اكثر ... ابو سعود بطنازة : والله..؟؟ زيين ... يعني بتطلعووونه..؟؟ الضابط : أي .. بس لازم تجي انت تاخذه .. لانه نحتاج توقيعك ... ابو سعود : خلاص انا جاي الساعة 1 الظهر ... الضابط : مو مشكلة ... وآسفين من جديد على اللي صار .... ابو سعود : حصل خير ... مع السلامة...سكر ابو سعود من الضابط " من زين الخبر يبشرني مع وجهه ...!!!! " ودق على ام سعود اللي ردت ... ام سعود : الوووو ... ابو سعود : الو هلا....ام سعود : هلا عبدالله .... كيف الحال...ابو سعود : الحمدلله ... اسمعي... ولدك اليوم بيطلعونه من التوقيف .. ابغاك تجمعين لي اغراضه ف شنطة وحدة .... واغراض الكلبة دلع ف شنطة ثانية ... ام سعود : من الحين ..؟؟ابو سعود : ما ابغاااهم ف بيتي ما تفهمين..؟؟ام سعود : طيب ما قلنا شي .. حتى انا ما ابغاهم ... بس شلون بنطلعهم من البيت... ابو سعود : خلاص شوفي .. انتي لك جمايل على صديقاتك صح ...؟؟ ام سعود : أي... ابو سعود : شوفي .. كلمي وحدة ولا ثنتين ... وخليهم يبدون يحجزو قاعة ويوصون على الاكل ويفصلون فستان والخرابيط هذي .. وعطيهم فلووس على كل هذا...باسمة تفكر : انت كذا شايف...؟؟ابو سعود متنرفز : اكيد كذا شايف... اجل تبغينا نقعد نتعب على ابو اثنين ما يستاهلوا ...؟؟ لا يا باسمة .. انا اصرف فلوووس ماعندي مشكلة ... بس اهتم ف اثنين ما يسوون ريال عندي لأ ... شوفيلك حل ... وكلمس وحدة من اللي تعرفينهم .. وحدة محتاجة كذا وماعندها فلووس ... على طول بتسويلك ... ما بتقووول لأ .. !!ام سعود ركبت براسها الفكرة : أي والله صدق .. حلوو .. خلاص انا عني كم وحدة محتاجة كذا .... بشوفهم واردلك خبرابو سعود :طيب .. يللا مع السلامة ... ام سعود : ف امان الله ... سكرت ام سعود من ابو سعود وبدت شغلها على طووووووول .... ___________________________________(( جامعة محمد بن فهد ))( الساعة 12 ونص الظهر )بدور : طيب وبعدين.....؟؟؟ريم : وش اسوي اضطريت اركب قدام .. ما كان عندي خيار ثاني...بدور فاتحة عيونها الثنتين : لا تقووولين ...!!!! يا هبلة ...!!ريم : اففففففف .. والله انتي ما فهمتيني وقلتيلي .. وش دراني انا .. احسها اهانة له لو ركبت ورىبدور : غبية غبية غبيةريم بنص عين: انتي الحين ليش محترة ... انا اللي ركبت ولا انتي..؟؟ بدور : شوووف ...!؟!؟ مالت عليك وعلى للي بيسألك .. خلاص ما ابغى اعرف وش صاار بعدين ... انطمي ولا تكلميني ...سكتت بدور مسوية زعلانة .. بس ريم تعرف الطريقة عشان تخليها تفرح وتناقز بعد ... ريم : ما تبغين تعرفين وش صار يوم نزل يجيب لي آيس كريم ..؟؟ فتحت بدور عيونها الثنتين ع الاخير .. بس سوت نفسها ثقيلة : لأ .. ما يهمني.. ريم : ولا سوم وقفنا بنص الطريق عشان ناكل الآيس كريم ودقيناها سوالف.... بدور لفت وجهها الجهة الثانية : لأ ... مو مهمريم راحت ووقفت قدامها بحماااس : ولا يووم نزل وفتح لي الباب حقي يوم وصلنا البيت...!؟!؟!؟بدور وصلت معاها فنقزت قدام ريم : احلفي...!!!! ريم متحمسة : واللللللله ... اقووولك رجال من فوووقه لتحته ... !!!بدور مسكتها من يدها وقعدتها : لا لا لا .. السالفة يبغالها قعدة ... ريم : هههههههه شفتي شلوووون .. اعرفلك انا ... ___________________________________(( مركز التوقيف ))( الساعة 2 الظهر )سكر سعود الشنطة اللي كانت اغراضه فيها ... وشالها على كتفه بينما الضابط كان يفتح له الباب .... الضابط مبتسم : تفضل.... الحمدلله على السلامة ... سعود بابتسامة خفيفة مجاملة : الله يسلمك ...طلع من الزنزانة اللي كان فيها ومشى ورى الضابط وهو ميت من الخوووف .. مو داري وش بيصير فيه الحين ... واول ما شاف ابوووه .. طاح قلبه ببطنه .. كان ابوه واقف ومعقد حواجبه .. ويتكلم مع الضابط مشاري .... سعود " الله يستر ... ما اقووول غير الله يستر ... " سلم على الضابط مشاري بعد ما امره ابوووه يسلم عليه ... وبعدها مشى مع ابوووه وركب السيارة ...ف السيارة ... سعود : وين رايحين...؟؟ابو سعود بدون ما يلتفت : البيت ... بس لا تفرح .. معاك كم يوم بس .. وبعدين تنقلع انت وهالحيوااانة بنت خالتك بعيد .... سعود لف وجهه : افففف...... انقهر ابو سعود منه ... ووقف السيارةابو سعود لف وجه سعود له : انت مين محسب نفسك ..؟؟ ولك وجه تتكلم بعد اللي سويته ..؟؟ انت ما تعرف ربك ..؟؟؟ ناسي انه فوقك رب..؟؟ ها..؟؟ نسيت انه في رب بيحاسبك على كل شي سويته ف هالدنيا ..؟؟؟ نسييييييت ...؟!؟!؟ والله حرام عليك العيشة ف هالدنيا والله حرااام ... انت امثاالك الموت ارحملهم من العيشة ... ع الاقل يرتاحوا من الذنوووب ويريحوووا خلق الله معاهم .... سكت سعود مو عارف يرد على ابوووه .. توه حس بكبر الاغلاط اللي كان يسويها .. توه تذكر ربه ... توه تذكر الذنوووب اللي ارتكبها .... ما بقول انه ما تلوم .. بس بعد ما بقول انه تلوم مرة .. يعني السالفة دقيقتين وبعدين رجع لعناااده ... ويوم وصلوا البيت ... نزل وهو حاقد مرررة على امه ... امه اللي كانت السبب في كل اللي هو فيه الحين .. كان يحس انه الامور صارت كذا بسبب امه ... لو امه كانت معاه وهو صغير وعطته الحنان الكافي .. كان ما صار فيه اللي صار الحين ... لو انها ما قالت لابوه عن السالفة كان هو الحين حالته اهون من هالحالة ... كان ع الاقل دلع ما بتتحمل المصيبة هذي معاه ... يكفيها اللي جاها ... دخل البيت وجات الخدامة اخذت منه الشنطة عشان تطلها فوووق لغرفته ... وبعدها جات امه ... باسمة : هلا عبدالله ....ابو سعود : هلا باسمة ... الغدا جاهز...؟؟ باسمة : أي .... الخدامة قاعدة تحطه على الطاولة .. بين ما تغير يكون جاهز .. ابو سعود معصب : زين ... خذي هالكلب ... ووديه غرفته .. ما ابغى اشوووفه لين يطلع من هالبيت .... باسمة مسوية معصبة على ولدها بعد : طيب.... سمعت ابووك وش يقووول..؟؟ ابو سعود صرخ على سعود : فهمت ..؟؟!؟!؟ ما ابغى اشوووف خلقتك ف البيت لين ما تطلع منه ... فاهم ..؟؟ اكلك وشربك كله ف الغرفة .. او مو قدام وجهي... حاول تتفاداني قد ما تقدر عشان ما تسمع اللي ما يسرك ...سعود متخرع ومنتفض في مكانه .. اول مرة يشوف ابوووه معصب عليه كذا : ا.. ان .. انشالله .... وطلع على طوووول لغرفته وسكر عليه الباب ...... ___________________________________

28 - 3 - 2014, 02:37 PM

(( بيت ابو فيصل ))( الساعة 9 بالليل )كان فيصل قاعد مار من الصالة وطالع من البيت ... يوم دق التليفون ...راح ورد : الوووابو نسايم : سلاااامو عليكم ... فيصل : وعليكم السلام .... ابو نسايم : ا... مين معايااا ..؟؟ فيصل مستغرب : انت مين ..؟؟؟ ابو نسايم : ايوااا .. انتا فيصل ..؟؟؟؟ فيصل : أي ... مين معاي..؟ ابو نسايم : معاك عمك عبدالوهااب ... ابو نسايم ..فيصل : ا... يا هلا .. هلا والله ... آسف ما عرفتك ...ابو نسايم : مو مشكلة يا ولدي.. انتا ما تعرفني عشان كذا انا عازرك ... قوللي كيف حالك...؟؟فيصل: بخير الحمدلله ...ابو نسايم : أي سنة صرت..؟؟فيصل : والله ثالث ثانوي .. آخر سنة .... ابو نسايم : ماشالله ... كبرت والله ... صرت رجال .. يالله شد حيلك .. السنة الجاية حتكون جامعة ....فيصل : انشالله ... لاتوصي حريصابو نسايم : باارك الله فيك يا ابني ... اقولك ... نسايم فين ...؟؟ فيصل : ا... نسايم موجودة لحظة بس... ترك فيصل السماعة .. وجا بيطلع فووق ينادي نسايم ..بس شاف ابوووه ف الطريق وهو نازل... ابو فيصل : وين رايح...؟؟فيصل بدون نفس : بنادي نسايم .. ابوها على التليفون ...ابو فيصل مسك فيصل من يده : اول شي لما اكلمك توقف وتطالعني وتكلمني ... ثاني شي لاتناديها ... اتركهافيصل بملل : ابووها على التليفون شلون اخليه ...ابو فيصل : انا بعمك شلون تخليه ...نزل ابو فيصل وسكر السماعة بوجه ابو نسايم ...ابو فيصل بصرامة : واذا دق مرة ثانية اياني وياك ترد عليه ... فاهم ..؟؟ هذا واحد مجنووون .... فيصل " لااااا.... يعني انت اللي صاحي الحين..؟؟ مالت عليك وعلى شكلك " سكت فيصل وطلع من البيت بدون اهتمام .... وترك ابوووه ونسايم يدبرون نفسهم ...

28 - 3 - 2014, 02:38 PM

(( اليوم الثاني ... يوم الثلاثاء .. سيارة رائد ))( الساعة 11 ونص الظهر )دخل السيارة بوناااسة ... طلع جواله ... ودق على دانة متحمس ... دانة : الو ....رائد : فديت هالصوووت وراعيه انا ... شخبارك ..؟؟ دانة : هههههه بخير .. وانت شخبارك ..؟؟ رائد : والله مستاااانس ... الا قولي متشقق ..... دانة : لااااا اجل السالفة فيها شي ... قووول وش صار ومخليك فرحان كذا ....؟؟؟ رائد : طيب بقووولك .. توني كنت ف شركة السياحة ....دانة بحماااس : طيب ... ايواا ... كمل.... كمل كمل كمل ....رائد : هههههه شفتي شلوون.. حتى انتي تحمستي قبل ما تسمعين وش السالفة حتى ...... دانة : خلاااص عاد قووول .. رائد : قعدت اشوووف ف الدليل السياحي .. وادور لنا بلد حلووو نروح نستانس فيها انا واتني ف شهر العسل .... دانة حمر خدها .. بس كانت مستانسة : طيب ...؟؟ ووش حصلت...؟ رائد : انت قولي وين تبغي تروحين..؟؟ دانة : اا.... رائد .. انا ما تفرق معاي ... اهم شي اكووون معاك ... رائد سند راسه ع الكرسي : اخخخخ ... ليتنا متزوجين .. كان انا طايح فيك بوسات الحين على هالكلام الحلووو ... بس المقررووود ... مقروووود ...!!!!!!دانة راحت فيها : !!!!!!! رااائد بس... حراام عليك .. وربي ما بتخليني اقولك كذا من جديد ..... رائد : ههههه خلاص خلاص ... خلاص ما اعيدها .. تووووبة ... فديتك دانة .. وربي احبك .. دانة : طيب لاتصرف .. ايش الاماكن الحلوة اللي حصلتها ....؟؟ رائد : والله في كذا مكان معقووول ورهيب ... بس شوفي .. انا خاطري بجزر .. شرايك...؟؟ عشان نكون لوحدنا كذا .. بعيد عن الناس والازعاااج .. تعرفين برووحنا يعني .... !!!!!!دانة : ههههههه وانا اقول كذا بعد ... أي شي على البحر... رائد : تمااام ... اجل متفقين ...دانة : توكل على الله ... رائد : آآآآآآآآآه بس لسة مطولين ... اقووول ورى ما نقدم موعد العرس شوي .. ها..؟؟؟ يعني نخليه الشهر الجاي ....؟؟ دانة : هااااأ..؟؟ لا لا لا لا انا يا دوووووب اتجهز ... حرااام عليك .. رائد : والله يا دانة مرة مطول ... دانة : مالي دخل ... اصبر شوي رؤووودي .. والله العجلة ما تنفع .....رائد تنهد : هـــ ... انا مو مصبرني غير رؤوودي هذي ... بصبر .. وش اقدر اسوي يعني؟؟ امرنا لله ..!!!!___________________________________(( جامعة محمد بن فهد ))( الساعة 1 الظهر )ركبت ريم السيارة ..... ريم مبتسمة : السلاااااااااااام .... احمد بدون ما يطالعها بس ابتسم هالمرة : وعليكم السلام ... شغل السيارة ومشى .... و ف الطريق... ريم : احمد ... ممكن طلب..؟؟التفت عليها احمد باستفهام ..... ريم مستحية : م ... ممكن يعني لو ما يزعجك الوضع ... تحط على الاف ام ؟؟.. ازهق انا ف السيارة اذا مافيها اغاني .... وخصوصا الطريق طويل.... بدون لا كلمة .. مد احمد يده وفتح الاف ام ... وعلا الصووت ...احمد : كذا زين ...؟ريم : حلووو .. بعد كم دقيقة ...احمد وهو يسوق : ترى ما بوديك البيت ...ريم باستغراب : ها..؟؟ شلووون ..؟احمد ابتسم : هههه شوي شوي .. لحظة بقولك .. اتصل فيني ابوك من شوي .. وقال لي انه اوديك بيت عمك صالح ... ريم : ليش...؟؟ احمد مد شفايفه قدام ورفع حواجبه دلاله على انه ما يعرف شي ....ريم " ياقلبيييي ... شوفوا شكله شلووون .. كانه بزر والله ... واااااي "احمد : ههههه اقول ... ريم : شفيك ...؟احمد : بس سؤال ...ممكن ...؟؟ريم " اخيرا كلمني ... ونااسة " : ها...؟؟ احمد ولا يطالع فيها حتى : انتي الحين جريئة كذا ..؟؟ ولا بس معاي ..؟ ريم " !!!! وش اقووول الحين .. " : ا.. لا.. مو كذا .. بس .. ا .. انا كذا على الطبيعة .. احمد لف عليها وفصخ النظارة : يعني موبس قدامي تصيرين كذا ...؟؟ ريم " بصييييييح ... لأ .. لأ .. لا يفصخها قدامي .. بمووووت .. نفس .. ابغى اتنفس .." :ما فهمت ... كيف يعني ... ؟؟ احمد : يعني ... تقعدين تتاملين ف الناس كذا ..؟؟ ريم حمر وجهها واتفشلت " وييييي ... وش هالفشلة ..!؟!؟!؟ ... يا ربييي .. وين اودي وجهي الحين .... " وعلى طوووول لفت ريم وجهها للجهة الثانية ولا ردت عليه ... وهو رجع يركز ف سواقته .... وبعد ربع ساعة ... ويوم وصل بيت ابو عوض ... دخل السيارة .. ويوم دخلها جاله شعووور غريب ... شعووور بالشووووق لهذا المكان .. حس برهبة من دخل السيارة ف الحوش ... شاف الاشجار اللي ف البيت تتحرك مع الهوا ... شاف العصافير اللي قاعدة على الاسوار ... وشاف النافورة اللي وسط البيت .. وشاف السيارة اللي واقفة ف الزاوية .... سياااارة اعز انسان ... سيارة عوض ... ريم : يا هووو ... ترى بنزل ... احمد اتنبه : ها..؟؟ ا .. اوكي انزلي .. تبغين شي..؟؟ ريم : لا .. مشكور على التوصيلة ..جات ريم بتنزل ... احمد : ا... اقول .. ريم التفتت : نعم ...؟ احمد : ا... سوري اذا كنت ثقلت عليك بسؤالي اللي سالتك اياه اول ... ريم ابتسمت : ما عليك.... ابتسم احمد .. اما ريم فنزلت ودخلت بيت عمها ... اما احمد .. فنزل من السيارة .. ما قدر قلبه يطاوعه يطلع بدون ما يسلم على صديقه ... قرب من السيارة .. ومع كل خطوة قلبه يدق بشوووق وحنين لعوض .. يدق لصديقه اللي عاش معاه نص عمره ... قرب من السيارة ولمسها .. كانت مغطية بالغباااااار من فوقها لتحتها .. سيارة عوض اللي كان يعتني فيها وينظفها اول باول وما يحب احد يوصخها او يقرب منها .. صارت في خبر كان ... احمد : عوض .. وينك يا اخوي ..؟؟ وينك تشوف سيارتك وش صار عليها ..؟؟ وينك ما تشوف الغبار مغطيها ..؟؟ وينك ما تشووووف شلون راميينها ف زاوية الحو ومحد يعتني فيها ...؟؟ وينك ما تطلع فيها كل يوم ونروح نتمشى مع بعض .. ويييينك ..؟؟ قطعت وجه احمد ابتسامة قهر .. وحزن .. ويوم حس انه العبرة شوي وتخنقه .. رجع لسيارته بسرعة وطلع من البيت باقصى سرعة ممكنة ... ___________________________________

28 - 3 - 2014, 02:40 PM

(( بيت ابو سعود ))( الساعة 4 العصر )فتح سعود الباب شوي يوم سمع صوت احد ف الممر .. وشاف لينا ... سعود : بس ... بس ... التفتت له لينا .. واشرلها تجي .. فراحت عنده تشووف وش يبغى ..؟؟لينا : نعم اخ سعووود ...؟؟ سعود مستغرب : وانتي ليش تكلميني كذا ..؟؟ وش سويت لك انتي بعد ...؟لينا : وش سويت ..؟؟ وتسال بعد ..؟؟ يكفي خليت سمعتنا على كل لساان .. تخيل اليوم البنات ما عندهم سالفة غير انه سعود وشلته بيدخلون السجن ... شرايك.؟؟ شلون تبغاني اكلمك بعد كل هذا ..؟؟سعود : افففف ... انا ما خلصت من ابو وامك تطلعين لي انتي ..؟؟ لينا جات بتطلع : يوووه ... انت محد يتكلم معاك ... سعود مسكها : تعااالي .. بس قوليلي .. امي وابوي وين ..؟؟ لينا : امي وابوي نايمين ف الغرفة ... سعود : وانتي وين رايحة بهالعباااية ...؟؟ لينا : افففف ... مع انه مو شغلك .. بس بقولك .. انا بروح مع سالم وفيصل السوبر ماركت .... بعد في سؤاال ..؟؟ تراني مستعجلة ...سعود : مااالت عليك وعلى وجهك .. روحي روحي .. روحي انقلعي ... طلعت لينا من الغرفة .. ومن البيت كله .... اما سعود .. فكان يبغى يشوووف دلع وش صار عليها ... ووش قالولها .. طلع من الغرفة شوي شوي .. ومشى لغرفتها ... دق الباب .. محد رد ... وبعد كم ثانية انفتح الباب ... واول ما شافت دلع سعود شهقت بصوت عالي وصل لآخر البيت ... دلع : هــــــــــــــــــي ... انت متى رجعت ..؟؟ ما سجنووووك ..؟؟؟؟ مسكها سعود من فمها ودخلها الغرفة وسكر الباب .. وبعدين تركها ... سعود : انطمي فضحتينا .... !!!!!دلع شردت لآخر الغرفة : وش تسوي ف البيت ..؟؟ هربت من التوقيف..؟؟ ها..؟؟ تكلم.. سعود يهمس : بقولك كل شي بس وطي صوووتط لاتفضحينا وتجي العنكبوووت مع زوجها الحين وتصير الفضيحة فضيحتين ... ترانا على الحديدة انا وياك .. شوي ونروح فيها ....دلع فاتحة عيونها الثنتين ع الاخير : انت وش تقووول ..؟؟ شسالفة ...؟؟ سعود التفت على الباب يتاكد مافي احد .. يوم تاكد ... رجع يتكلم ..سعود : اسمعي... ما قالووولك شي..؟؟ دلع : شي عن ايش..؟؟ وش تقووول انت ... تكلم ... سعود تنرفز : اففففف .. شوفي لاتجننيني .. محد قالك شي عن اللي صار ..؟؟ دلع بتموووت خوف : ايش اللي صار ....؟؟ سعود : عني انا وياك .. محد قالك شي .... دلع : لأ ... ليش..؟؟ اصلا انا صارلي 4 ايام ما نزلت وقعدت معاهم ... سعود : افف .... يعني ما تدرين شي ... دلع : لأ ... شصااااااير ..؟؟ سعود : اخاف اقووولك تحمعين اهل الحارة علينا بصراااخك ... واخاف اسكت وتنصدمين بعدين وتسوين لي فلم هندي ...... دلع : تكلم .. قوووول .. ما بصااارخ والله .... سعود : شوووفي .. بالمختصر ... ابوي درى عن سالفتي انا وياك ... ويبغى يطردنا من البيت ... ولانه ما يقدر يسوي هالشي لانه الناس بتتكلم عليه ... فبيزوجنا انا وياك غصب وبيسكننا بشقة بعيد عنه .. وعن عياله وزوجته ............!!!!فتحت دلع عيونها ع الاخير .. وما عرفت تقول ولا كلمة وحدة ... وحتى رجولها ما قدرت تشيلها ... انهارت على الارض .. مو مصدقة اللي يصير .... سعود قرب بسرعة منها .. حسب انه اغمى عليها ... جا بيقومها بس هي وخرته عنهادلع مسكرة على اسنانها : وخخخخخر عني .. اياني وياك تلمسني .. فاهم ..؟؟ سعود قام ووخر عنها ..... وطالعها بترقب .. مو عارف وش ممكن تسوي الحين .. قعدت دلع على الارض .. وبسرعة حمر خشمها ووجهها .. وبدت الدموووع تمتلي ف عينها ... لين ما نزلت .. واعلنت بداية صياااح دلع ... سعود : يووووه .. بدت عااد ... الحين مين يوقفها هذي ...؟؟؟ دلع التفتت عليه بحقد : ولا كلمة .. ولا اسمع حرف واحد منك ... انت بالذات الاخير اللي اتمنى اشوووفه هاللحظة .. سعود : لا حوووول.. الحين جزاتي جاي اقوووولك .. كان خليتك على غباااءك ما تدرين عن السالفة احسن .... دلع : نعم ...؟؟؟ لاااااااااا ... صحيح والله ..؟؟ جزاااك الله خير .. ما تقصر ... مشكووووور.. مشكوووور لانك قاعد تدمر حياتي يوم بعد يوووم ... اول شي دمرتني كبنت ... وبعدين دمرتني كأم .. وبعدين دمرتني كطالبة متعلمة .. والحين تدمرني كوحدة مو متزوجة وتبغاني آخذك غصب عني ..... ؟؟؟؟؟؟؟ شلووون آخذك شلووون ..؟؟ فهمني شلون بعيش معاك..؟ بعد كل اللي سويته فيني وتتوقع انظر لك نظرة واحد من اهلي .. كنظرة واحد يقرب لي... كنظرة بني آآآآآدم ........!!!!!!!!!!! سعود قلب وجهه وما عجبه الكلام... ففتح باب الغرفة وطلع وخلاها تكمل صياحهها مع نفسها ومه الجدار .. اما هو .. فما كان يقدر يسوي شي غير انه يروح لخالد صديقه اللي ما شافه من زمان .. ولا يدري وش صار عليه ............ وقعدت دلع ف الغرفة منهااااااااااااارة ... ماهي عارفة وش بيصير عليها .. بعد ما بدت تتقبل الوضع والحياة اللي خي عايشة فيها تنقلب العيشة فوووق تحت عليها وتصير مع واحد زي سعود ... واحد دمر حياااتها ومستقبلها وسمعتها ... واحد ما جاها منه غير المشاكل والهمووووم ...؟؟؟ ___________________________________(( سيارة سعود ))( الساعة 4 ونص العصر )وقف سعود سيارته قدام بيت خالد .. اخذ جواله ودق عليه ... وبعد كم دقيقة ..خالد : الوووووسعود : الوو ..هلا خالد استانس : سعوووود ..؟!؟!؟ من وين تكلمني ..؟؟ سعود : من سيارتي اللي واقفة قدام بيتكم ... خالد : طلعت ..؟!؟!؟!؟سعود : أي طلعت .. طلعوووني .. خالد : لحظة لحظة انا جايك الحين ...وبعد كم دقيقة طلع خالد من البيت باسرع ما عنده ... ويوم وصل لباب سيارة سعود .. فتحه وسحب سعود على برى وحضنه ف الشارع وقدام الناس بقووووة .... خالد : الحمدلله على السلامة .... الحمدلله .... سعود : الله يسلمك ... خالد : وحشتنا يا رجااال.. وربي كنت بموووت من الخوف عليك ... سعود : اركب اركب .. خلينا نروح كوفي شووب واقولك السالفة كلها ... وبعد ابغاك ف الموضوع .. ابغى رايك فيه ... خالد : خلااص اوكي .. تجي بسيارتي ..؟؟؟سعود : لااا .. تعال اركب يللا . تراني مستعجل .. وبقولك ف الطريق ليش... ركب خالد مع سعود ف السيارة ... وبدى سعوود يقول لخالد كل شي ... من دخل التوقيف ... لين سالفته مع دلع ف الغرف من شوي ... ___________________________________نهاية الجزء الثالث عشر ... ياترى وش بيكون موقف ورأي خالد بالسالفة ؟؟ بندر وش بتكون ردة فعله لما يدري انه سعود طلع ؟؟ اروى وينها ..؟؟ ووش بيصير عليها ف الاجزاء الجاية ؟؟ وابو فيصل ..؟؟ وش بيصير عليه وعلى نسايم ..؟؟ ابو غادة ..؟؟ وتاليتها معاه..؟؟ ودلع ومسلسل المعاناة هذا لمتى بيستمر ؟؟ هالاسئلة الطويلة .. اجوبتها انشالله .. ف الجزء الجاي ..

28 - 3 - 2014, 02:40 PM

( الساعة 5 الا ربع )خالد : انت وش تقوووول ..؟؟؟ صدق ...؟؟سعود : والله العظيم ما اكذب ... يعني بدال ما يطردني من البيت وتخرب سمعتنا ... بيزوجني دلع ويخليني اسكن معاها بشقة او بيت او مدري وشوو ... المهم لوحدنا ... خالد : ودلع ..؟؟سعود : شفيها ..؟؟خالد : ايش رايها بهالموضوع ..؟؟سعود بطنازة : هههه ما تدري .. اليوم يوم جيت اكلمها ... اكتشفت انها ما تدري ربي وين حاطها... عايشة كذا ... ويو قلت لها ... طبعا سوت الفلم الهندي حقها .. صياح .. وانا وش سويت ..؟؟ وليش تسوي فيني كذا ..؟؟ يعني من هالكلام اللي كانت تسمعني اياه اول .... خالد : تتطنز مع وجهك..؟؟ انت مقدر الوضع اللي هي فيه ولا مو مقدر ...؟؟ ما تدري هي اصلا وش صار فيها بسببك...؟؟ ما تدري....؟؟ سعود بزهق : لا تبدى انت بعد .. ماني ناقصك ...!!خالد : لا من جد .. خليني اشرحلك الوضع لانك مو فاهم شي من السالفة .. انت منت فاهم غير انك انت اللي بمشكلة وتعاني ... بس دلع... منت حااس انها تتعذب من زمان وانت الحين بتزيد عليها العذاااب .. اول شي ..كنت ما ترحمها بلسانك واسلوووبك ... وبعدين اخذت منها اغلى شي وهو شرفها ... يعني خليتها ما تسوى ريال ...!!!!! وبعدين البنت بسببك .. انحرمت من التليفون والطلعة والفرحة والدراسة .. والحين ... بتخليها بعد .. تتحمل غلطتك وتعيش مع الانسان اللي امنيتها الوحيدة ف هالدنيا انها تكون بعيدة عنه قد ما تقدر .... !!!!! وش رايك الحين..؟؟ وش ردة فعلك بعد كل هذا ها..؟؟؟ ولا عمري تخيلتك كذا يا سعود .. مع كل اللي كنا نسويه .. ما توقعتك كذا اناني .. انا دومي اعرفك حساااس وقلبك طيب حتى لما تغلط .. بس مو كذا .. مو كذا ابد ..... !!!!!!سعود سكت ولف وجهه عن خالد .. ما يقدر يطالع فيه ويواجهه ... لانه كل اللي قاله خالد صح ... وكل هالاشياء كان سعود حاطها ف باله ... بس يتجاهلها دوووم..خالد : انت لازم تصلح الوضع باي طريقة .... أي طريقة يا سعود ... جتى لو اضطريت تعيش تعيس طووول حياتك بس عشان تخلي بنت خالتك اللي انت جرحتها عايشة براحة وامان ..... سوي أي شي .. دوس على كل رغباتك .. بس خليها تفرح .. ترى كل هذا بيكون برقبتك يوم القيامة ... كل دمعة بتنزل من عيونها بسببك .. بيحاسبك ربك عليها .... حط هالشي ف بالك ... سعود : انت تغيرت مرة يا خالد .... صرت تتكلم كانك ابوووي ... خالد : لانه ابووك سوى اللي ما بيسويه ابو غيره .. ابو غيره كان ضربك ضرب انت وياها لين ما تموووتوا ... بس ابووك تصرف بعقل وحسبها صح ... سعود : والحين ايش اسوي ..؟؟؟ قول لي ... حلها لي ..خالد : انا ما قدر افكر بدلك ... بس انت شغل مخك شوي ... وبتحصل حل انشالله ... سعود : تدري ايش اللي بيفرحها ...؟؟ اني اموووت ... اذا مت احسها بتفتك مني وترتاح ف هالحياة وتعيش فرحانة .... خالد : هههه لا عاد الا هالحل ... ترانا نبغااك لاتموت ... ما قلنا كذا .. حلها بطريقة صح .. اوو ... يمكن اللي يشوووفه ابووك يكون انفعلك وانفع لها ... ف انهاية .. من بياخذها؟؟ سكت سعود وفكر زين ... هالشي ما حطه ف باله ابد .. مين بياخذها..؟؟ مين بيرضى يتزوجها ..؟؟ سؤال صعب والاجابة وحدة ... محد ......!!!!!!___________________________________(( بيت ابوسعود .. غرفة دلع ))( الساعة 5 ونص )كانت دلع قاعدة ف غرفتها ... تطالع الشارع من الشباك ... وتتحسر على هالحياة .. وعلى كل معروف سوته للناس .. توها بس عرفت .. انه ممهما سويت للناس ما بيرضوون .. وف أي لحظة بنقلبون ضدك ... دخلت لينا ....لينا : هااااااااي ... افففف والله هالدراااسة تعبتني اليووووم .. احس خاطري انتحر ...لفت دلع وجهها كله دموووع : انا اللي ابغى انتحر والله ...!!!!لينا شهقت : هيــ .... دلع شفيك تصيحين ...؟؟ ها..؟؟ مين مضايقك .. وربي لا اوريه ... سعووود صح ..؟؟ هذا وتوه ماله نص يوم راجع البيت وبدا يسوي مشاكل ..؟؟ انا اوريه ... ما عليك .. وربي لا اعلم بابا ..... دلع تصيح بحضن لينا : لينا خلاااص يا لينا ... انا خلاص تعبت .. وربي تعبت .. ما عدت اقدر اعيش ... والله ما اقدر ... يطفي والله يكفي اللي بيصير فيني ... لينا تمسح على شعرها : خلاص .. خلاص دلع .. انتي اهدي شوي .. اهدي حبيبتي وقوليلي وش فيك ..؟؟ شفيك شصار لك ..؟؟ ليش كل هالزعل..؟؟ دلع رفع راسها وقالت بصعوووبة : لينا .. تخيلي .. بيزوجوني سعووود تخيلي .. انا آخذ سعوود ..؟؟ مستحيل يا لينا .. والله مستحيل .. انا ما ابغى سعووود ما ابغاه ... وربي ما ابغاه .. ما احبه .. والله ما احبه .... لينا منصدمة : ايش..؟؟ سعووود اخوي ما غيره ..؟؟ لا تقولين ...!!!! هذا أيش تاخذين فيه ...؟؟؟ وربي لا شكل ولا اخلاق ولا رجووولة ولا شي ...!!!!دلع : و .. والله ... خالتي وعمي يقولون بيزوجوني اياه غصب .... لينا : طيب ليش...؟؟ .... ليش فجأة هالقرار طلع ..؟؟ ان ا قايلة امي تحوووس بعقل ابوووي هاليومين مو لله ... اكيد قايلة له كم كلمة وفرت فيها مخه .... انا ادري عنها هالعنكبوووت .... دلع : آآآآآآآآآه يا لينا ... لينا موتيني ... الله يخليك اذبحيني .. سمميني .. أي شي .. بس ما آخذ سعود الله يخليك .... لينا : خلاص .. ششش ... اهدي انتي .. بهالهدواة كل شي ينحل ...!!!___________________________________(( بيت ابو بندر ))( الساعة 8 بالليل )نزلت دانة من فوووق بعد ما خلصت مكالمتها مع رائد .. اللي كل يوم صار يكلمه ويسولف معاها ... ابو بندر : اخيرا نزلتي ..؟؟؟ انتي طول يوومك على التليفووون ..؟؟دانة : هههه السلام ...ابو بندر + ام بندر + ثامر : وعليكم السلام ....ام بندر : كنتي تكلمين رائد ..؟؟دانة مستحية : ا.. أي.. ابو بندر : اكيد يعني .. شوفينا نازلة شاقة الوجه ... اكيد كلمت زوووجها ... دانة حمر وجهها ..ثامر : ويووو ... والله ونستحي احنا ... خخخخخ دانة خزته بقوة ...ثامر : وشفيك تخزين ها...؟؟ شقلنا ..؟؟ دانة : ماما .. بابا ... ثامر : كااااااااااااااااااااااااااااااااااك ...دانة : انت وش فيك ..؟؟ شقلت انا عشان تصحك ..؟؟ثامر : الحين وش كبرك تقولين ماما وبابا ..؟؟؟دانة : افف ... طيب .. يما .. يبا .. ام بندر : ههه شفيك حبيبتي ...؟؟؟ دانة : رائد صارله كم يوم يقول لي يبغى يقدم العرس ...ام بندر : وش فيه مستعجل هذا ..؟؟ قوليله اصبر .. دانة : انا قلت له بس هووو مرة ملزم ... ام بندر : وش رايك يابو بندر ..؟؟ شوف هالولد .. البنت تحتاج وقت .... ابو بندر : انا رائد لو يبغاها هاللحظة حلاله .. زوجته وهو حر .. الحين يقدر يجي وياخذها.. ام بندر : هوو .!..!!!! وتجهيز البنت .. والقستان .. والقاعة والديكووور وبطاقات الدعوة..؟ ابو بندر : انا مالي دخل .. انتوا شوفوا وش يناسبكم .. وانا بس بساعد ... العرس عرس البنت .. خليها تقرر كيف تبغاه يكون ...ام بندر : وانتي شرايك ف الموضوع ...؟دانة : يما انا ما عندي مشكلة يصير بعد شهر ونص .. او شهرين ... ام بندر مسكت راسها : يا لطيف ...!!!!!! وين شهر ونص ..؟؟ ما يكفي ... ابو بندر : اجل مو بس رائد اللي مستعجل .. الا حتى بنتك مستعجلة بعد خخخخخ ___________________________________

28 - 3 - 2014, 02:41 PM

(( مكتب حمد للمحاماة ))( الساعة 9 بالليل )دخل بندر معصب على حمد ....حمد : بسم الله ... شفيك ....؟؟بندر : طلعوووه .... حمد : مين هو ..؟؟بندر : سعود بن عبدالله الـ( ..... )حمد ضحك : هههه اجل اخيرا استخدم ابوووه الواسطة .. غيربة خلاه ابوووع ف التوقيف ... بندر : شلوووووون ..؟؟حمد : شلون شلون يعني ..؟؟بندر : سعووود له يد ف السالفة .. وهو اللي مستاجر الشقة .. انا متاكد مية بالمية .. شلون يطلع من القضية بهالسهووولة ..؟!؟؟!حمد : عادي... امثال ابووه اللي وراهم ناس وواسطات .. اكيد بيسووون كثير اشياء زي كذا ....بندر : والحين...؟؟حمد : الحين الباقيين بيتحاكموا .. وهو بيطلع ويكمل حياته عادي ..بندر : أي صح .. اتصل فيني المركز اليوم ... يقولون في وحدة تعرف شكل واحد من اللي كانوا يجون الشقة مع سعود ... بس مو من الموجودين ف التوقيف ... حمد : يعني هم الحين يدورون عليه ..؟؟بندر : أي... وانشالله قريب يمسكوووه .... حمد : طيب انت اللي وكلتك .. شصااار لها بالضبط ...؟؟بندر : اسمها وفاء .. تقول انه وحدة من اللي معاهم بالجامعة وصادوها الشرطة ف الشقة .. عزمتها هي وكم وحدة من صديقاتها .. ويوم راحوا .. حصلوا شباب ف الشقة .. ماقدروا يطلعون .. اغتصبووهم وصورووهم .. وهدووهم ان ماا جووو لما يتصلون فيهم .. راح يفضحووهم وينشرون صورهم ... حمد : لا حول ولا قوة الا بالله ... بندر حبيبي ... شد حيلك .. واستعمل كل دليل صغير وكبير ضدهم ف المحكمة .. طيب..؟؟ انا اثق فيك ... بندر : تسلم.. بكون عند حسن ظنك انشالله ....

28 - 3 - 2014, 02:43 PM

(( بيت ابو سعود .. يوم الاربعاء ))( الساعة 6 ونص الصباح )كانت لينا قاعدة تفطر الصباح على الطاولة ... مع سالم ... جات ام سعوود : خلصتوا ...؟؟ يللا بسرعة وراكم دوامات ...لينا زعلانة : قلت لك ما ابغى اروووح ...ام سعود : انتي وش فيك اليوم ...؟؟ ليش ما تبغي تروحين ...؟؟لينا : اففف ... ما ابغى اقووولك .. ولا تسوين نفسك طيبة زياادة ... ترى ما يليق عليك هالدووور ...ام سعود : انتي شتقولين ..؟؟ اقول تراني امك .. تادبي انتي وتكلميني .. فاهمة ..؟ ماني اصغر عيالك .... لينا عصبت : أي صح صح ... آسفين .. حقك علينا .. ابوووس رجلك ويدك بعد..!؟!؟لاتقعدين تمثلين علينا هالادوووار السخيفة .. ترانا عارفين انه انتي ولا عمرك صرتي كذا الا اذا يغيتي توصلين لشي ....ام سعود رافعة حاجب : شقصدك ...؟؟لينا : بتقنعيني انه هالتمثيلية اللي مسويتها مو عشان تقنعين ابوي يوافق على زواج سعود ودلع......؟؟؟!!؟!!!!؟ والله لو تحلفين لي من اليوم لبكرة ماني مصدقتك ... !!!!ام سعود : لينا ... هذا مو شغلك ...؟ وخلصي اكلك بسرعة لانك تخرتي .. لينا : تكفيييييييين ... ارحميني .. وش اللي شغل ف هالبيت ..؟؟ كل واحد عايش فهالبيت له حق يقول رايه ف كل شي ... طيب..؟؟ ما تجين انتي وتقررين وتقولين انه مو من حقي ..... فاهمة ...؟؟ام سعود : والله العظيم كلمة ثانية اني لا انزل فيك ضرب ... تفهمين ولا لأ..؟؟ سالم قام وكانه الوضع مو عاجبه : اقوول لينا .. قومي قومي ... هذي ما ناخذ منها لاحق ولا باطل .. قومي بنتاخر...قامت لينا وهي تطالع امها بكل استحقار ... ومشيت مع اخوها لدواماتهم .. ما ام سعود فوقفت منصدمة من معاملة عيالها لها ... ولا عمرهم سمعووها هالكلام ولا عالوها بهالاسلوووب ..؟؟ام سعود " اكيد دلع فرت مخهم .. طيب يا دلع ... انا اوريك ... والله وربي اللي بعالي سماه... انك بتاخذين سعود بتاخذينه ... وما اكون باسمة ان ما اخذتيه ... !! "

المواضيع المتشابهه لموضوع: روايه ودك تنامين نامي لموضوع: روايه ودك تنامين نامي
الموضوع	كاتب الموضوع	المنتدى	مشاركات	آخر مشاركة
يمد لي يده وامد له روحي	حنين الأشواق	همس عالم حواء	5	8 - 11 - 2023 03:30 PM
نامي بصدري	نجمة الليل	همس الشعر والقوافي	6	25 - 3 - 2023 05:41 AM
والي خلق دم بعالي السموات	النورسيه	همس الشعر والقوافي	4	28 - 11 - 2020 04:08 PM
والد المعاصي	شيخة الزين	نفحات اسلاميه	6	10 - 5 - 2019 09:10 PM
روايه روحي لك وحدك للكاتبه ريم الحجر روايه رائعه لا تفوتكم	جروح الم	همس للقصص وحكايات وروايات	81	8 - 6 - 2018 01:02 PM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع