قصتي مع البوية عذاب

#1 30 - 5 - 2021, 05:14 PM

لسلام عليكم و رحمة الله و بركاته

بنات أنا بدش بالموضوع على طول ........................

أنا بنت كنت عايشة معظم حياتي بالخارج و قبل فترة ستنين تقريبا ردينا لديرتنا لما يييت هني كان في وايد أشياء غريبة علي

ومصطلحات غريبة علي و ما أعرف شنو معناها بالظبط حتى أنه في بعض الحجي الكويتي مافهمه و أقعد أسأل أمي شنو

يعني هذا (مثل الهبل ) و أنا طبعي طيبة واااايد (مداح نفسه يبي رفسه ) و الله طيبة لدرجة أن أمي تقولي الناس بيظنون
إنج غبية (عموما )

دشيت الجامعة و هي أول سنة لي بالكويت كنت مستانسة بالبنات و حاسة بالأفة بينهم من بعد غربة طويلة (لكن .....)

كان في بنية دائما أشوفها بروحها و أحس ان البنات يكرهوها و طبعا أنا (سفيرة السلام ) كسرت خاطري فرحت

و كلمتها و قلتلها أي شي تبين أنا حاضرة و هذا رقم تلفوني و صارت تدق لي كل يوم و تسأل عني وصرنا رفيجات

بس بعدها حسيت أن البنات الثانيات بعدو عني و ماصارو يكلموني فرحت و حاجيتهم شنو السالفة و ليش و شسبب

قالولي إذا ظليتي مع هالبنية لانحن رفيجاتج ولا نبي نعرفج (إنزين ليش علموني )أهي أش سوت لكم ؟؟؟؟

جان يقولولي هذي (بوية ) :eek:

شنو يعني (بوية ؟؟؟؟مافهمت ؟؟؟؟) يعني طبعا الكل حسبني أستهبل أكو أحد مايعرف شنو يعني البويات ؟؟؟؟؟؟؟؟؟؟؟؟

و لما قالولي و اشرحولي المعنى آنا تسبهت :eek: حسيت إني ( أكبر أبقرة في الكرة الأرضية )

حسيت إني (كمخة ) مثل ماقالت لي أمي يعني مادري شاقول !!!!!!!!!. لما قعدت أفكر فيها و في لبسها و في حركاتها

أنا كنت أظن هالشي عادي أو موضة هني ما كنت أدري (بااااامووووووت ) اتصالها لي كل يوم الصبح تقولي صباح الخير

و في الليل و كل شي كل شي جان قدامي بس ولا لحظة خطر لي أنه في شي موطبيعي أكيد لبسها وحركاتها كانت شوي

غريبة بس كنت أقول هاذي الموضة لا ولو تدرون (هديت لها بعيد ميلادها تنورة و أكسسوارات !!!!!!!!!!! :krkrkr: )
بذمتكم شفتو أغبى مني (مستحيل )

عموما عزمت أني أقطع علاقتي فيها خو البنت سمعة و الناس مالها غير المظاهر بس أشلو ن؟؟؟؟؟ البنت لاصقة فيني حيل

كلمت رفيجتي و قلت لها روحي كلميها و قولي لها أني مو من هالنوع و إني ماكنت فاهمة السالفة صح و أنه خلاص مابي

أي علاقة تربطني فيها (مع أني طول فترة صداقتنا ما ظهرت لي أي شي ولا سوت لي أي شي يثير الريبة ؟يمكن لأني طول

الوقت أتكلم معاها عن الدين وسوالف البنات كانت تبي تاخذني شوية شوية )

وصارلي شي غريب قبل اليوم إلي أتفقنا فيه على أن رفيحتي تروح و تكلمها(البوية ) حلمت أن هالبوية واقفة تناظرني

وشكلها مخيف حده و أنا أتعوذ من الشيطان ليما صحيت من النوم مخترعة و مصممة على أني أقطع علاقتي فيها للأبد

بس لو تدرون أش صار لما رفيجتي كلمتها ( أني خلاص مابي تكون بينا أي علاقة )

آه آه آه آه آآآآآآآآآآآآآآآآآآآآآآآآه وألف آه عالمصيبة إلي صارت :eh_s(2):
راحت رفيجتي ثاني يوم و كلمتها

قالت لها أن السافلة كيت و كيت و البنية مو من هالنوع و أنها خلاص ماتبي يكون لها أي علاقة بينكم

البوية : وهي ليش مايت تكلمني ليش بعثتج أنتي خلها تيي بروحها و تقولي هالحجي وبعدها يصير خير

يات رفيجتي و وصلتلي الكلام و أنا ميتة من الخوف ماأدري شسوي البنات من كثر ماحاجوني عنها خرعوني منها

(و على فكرة طول الصبح و هي تدق علي و أنا مسكرة جهازي ) و كنت قاعدة مع البنات أفكر شاقول لها

ش أحاجيها و الله خايفة و مفتشلة و حدي متوهجة جان أسمع صوتها وراي تقولي ...............

مشاعل وينج عيزت و أنا دق عليج جهازج كله مغلق خير صاير شي ؟

( طبعا أختكم أم الهبل أش سويت ؟؟؟؟؟؟؟؟؟؟؟) ابتسمت أبتسامة عريييييييضة و قلت لها كاني هني مافيني شي !!!!!

و انا الله العالم بحالتي (كلي أرجف حدي مدوده مادري بعدني ماخططت شاقول ؟؟؟؟؟؟؟؟؟)

البوية : أنزين ممكن أتكلم معاج بروحنا

مشاعل داخل قلبي اقول (لاااااااااااااااااااالالااااااااااااااامابي ):eh_s(16)::eh_s(16)::eh_s(16):

مشاعل : أي أكيد ألحين ؟؟؟؟؟ البوية : ألحين ؟؟؟؟؟؟؟؟؟؟؟

عموما رحنا و قعدنا في الكافتيريا و رفيجاتي على طاولة قريبة يمبي (خو طفادةة ميتين يبون يعرفون أش بيصير )

أول ماقعدنا قلت لها (يقوة ) سمعيني أنا ماكنت أعرف السالفة ما كنت أدري عن أي شي انا بنية مالي في هالسوالف

البوية : شوي شوي يبى عن أي شي تتحجين أنا مو فاهمة

مشاعل : أنا أدري أن إنتي بوية ( جنة خبر الموسم :nbvppw:) و انا كنت أعاملج على أنج أختي و بس

البوية : و شلي صار يعني أنا حتى أعتبرج أختي و حتى لو كنت بوية أنا كنت أحبج مثل أختي و بس و كلام البنات هذيلي

مالك شغل فيه . أحنا بنظل رفيجات و خوات

مشاعل : يعني أنتي عادي عندج تكونين بوية نفس مايقولون

البوية : أي أش فيها يعني

مشاعل : بصراحة أنا ماأقدر أصير رفيجتج أنا مابي الناس تتحجى عني إذا إنتي تشوفين هالشي عادي فكل المجتمع يشوفه غلط أنا آسفة بس خلاص ياريت كل وحدة منا تروح بطريقها و جنة ماعرفنا بعض (جنة فيلم أبيض و أسود مو)

بعدها قمت من الكرسي عشان أطلع جان تمسكني من إيدي بقوة موطبيعية و تقول

البوية : إنتي أش عبالج دخول الحمام زي خروجه أنا لي شهرين مرافجتج و آخرتها تهديني و تمشين قعدي أحسلج

إذا ما تبين فضايح قعدي و لا بتشوفين الويج الثاني حقي إلي مايعجبج

أنا طقتني البوهة تسبهت و من كثر دهشتي و خوفي ماعدت أسمع شي غير دقات قلبي البنية أقلبت و جنها وحش مر

في بالي الحلم إلي حلمته البارحة قعدت و أنا حاسة إني مو بحسي ما أدري شي لي قاعد يصير لي وليش أنا بالذات

و الله ماكان بنيتي تجاهها إلا الخير ماكنت أدري عن البويات ولا أي شي شنو ذنبي أنا ماسويت أي شي

ييت بقول شي : أنا مااسمحل........

البوية : بلعي العافية و حطي لسانج بلهاتج أحسلج و لاتظنين أن خمة هالبقعة هذين (على رفيجاتي ) رح ينفعونج

خلي الموضوع بينا أحسن آنا ماشية و بادق عليج بعدين ديري بالج ماتردين أنا عديتها لج اليوم الصبح لأن بعدج

ماتعرفيني عدل هاااا سمعتتني زين مع السلامة ياااا حياتي هههههههههه

ومشت عني و تركتني بخوفي و عجزي و إندهاشي (شيلي قاعد يصير لي ؟؟؟؟؟؟؟؟؟؟؟)
هدتني و طلعت من الكافيتيريا و أنا على قعدتي ماحرك ساكنة مرعوبة خايفة أحس إيديني تجمدت ماني مستوعبة

شيلي صارليما ألحين و إيدي تعورني من قوة شدتها لي و أنا على حالي هذا ييو ريفيجاتي حوالي

مشاعل أش فيج ؟ أش قالت لج ؟ ماعليج منها ما تقدر تسوي شي ؟ أنا باراويج فيها بس لا تزعلين روحج ؟

كل هذا و أنا ساكتة ما اتكلم بس لو تكلمت جان و دي أقول

وينكم عني من شهرين ؟ ليش ما نبهتوني ؟ ليش ما قلتولي ؟ليش ما وخرتوني عنها ؟ ليش ليش ؟

بس ظليت ساكتة ما تكلم ما ادري ليش ؟ أحس ريجي ناشف و حلقي ماني قادرة أفكة ! ( عموما )

رديت البيت و أنا مو على طبيعتي كلش ماسلمت و لا حاييت أمي إلي يات و راي مسكينة ( أش فيج يمى ؟ )

مافيني شي بس راسي يعورني بانام ؟؟ هذيج اللحظة دق التيلفون و من كثر خرعتي سكرته من غير قصد

مشاعل ( في قلبي ): أمبي أمبي أمبي سكرته :eh_s(2)::eh_s(2)::eh_s(2):

طلعت أمي من الغرفة و دقيت عليها بسرعة بس ماردت دقيت و دقيت ودقيت بس ماردت

ما أقدر أوصف لكم شعوري هذيج الساعة مليون فكرة و فكرة مرت على راسي ما أدري أس بتسوي فيني

أكيد عندها صوري أكيد رح تفضحني أنزين أمي أبوي أش باقولهم أش رح يكون شعورهم وهم حاطين آمالهم

علي و أخواني و كل أهلي و كل الناس رح أصير حجوة في حلوقهم ( لحظات أتمنيت في كل لحظة فيها الموت )

مليون مرة و مرة . و فجأءة أمي أسمع أمي تناديني أخترعت

مشاعل ( في قلبي ) : يما يمكن أحد موصلها شي يمكن لأ أكيد الصور و صلتها يمى يمى :eh_s(11):

رحت أنا ريولي ماتشيلني من الخوف وبصوت مرتجف ( هلا يمى بغيتيني ؟؟؟)

أمي ( أي يمى رفيجتج يات وينج صارلي ساعة و أنا أناديج ؟؟؟)

مشاعل (منو هذي إلي تييني بهالوقت ؟؟؟) دخلت الصالة ولا أشوفها قدامي واقفة بكل جرأءة ببيتي

و تحاجي أمي و تسلم عليها بكل و قاحة و بصوت بارد لازلت للحين أسمعه قالت لي

( أشلونج مشاعل و لهت عليج أكيد إنتي مثلي بعد صح!!!!!!!!!!!!!!)

أمي تقول : يحليلها رفيجتج تهبل الله يديم المحبة بينكم

كل هذا و أنا متسبهة و ساكتة و مادريت بروحي إلا طايحة بالصالة من كثر التعب و الخوف

من المصير المجهول
طحت في الصالة و ماحسيت بروحي إلا بعد ساعات نمت فيها وماصحيت إلا على صوت البوية وهي تقول

لأمي : خلاص خالتي ماقدر أتأخر أكثر من جذي أنا باروح و بعدين أدق عليها

وطلعت و طلعت أمي و راها فتحت عيوني و أنا متأكدة أن إلي صارلي ماكان كابوس كان واقع الشعور داخلي ما ٌقدر

أوصفه حزن وهم و نكد متمنية أموت الحين بس كل هذا مارح يفيدني لازم أفكر أش باسوي خاصة أن ألحين فترة

أمتحانات مابي أسقط على آخر السنة بعد كل التعب إلي تعبته في أولها قمت و تيددت و صليت ركعتين و ماني

قادرة أكمل الحمد من كثر البجي ماني شايفة السجادة من كثر دموعي و بعدها قعدت أستغفر و أدعي و أدعي

لما الساعة ( 11 ) دق تلفوني لا تشوفون حالتي من سمعت رنته حدي حدي متوهجة بس لازم أرد و أحط حد للمهزلة

ماني قادرة أقول ألو بعد شدة قلتلها ( ألو ؟؟؟)

البوية : الحمد لله على سلا متج تصدقين ماقدرت أنام ولا يغمض لي جفن إلا لما أطمن عليج أشلونج حياتي

إن شاء الله أحسن ؟؟

مشاعل ؛ أش تبين مني خلصيني أش تبين ؟؟

البوية : شوفي ياحلوة أنا مابي منج شي آنا ودي نظل رفيجات و بس

مشاعل : بعد إلي شفته منج و إلي سمعته عنج مايشرفني إني أكون رفيجتج و مابي أي صلة فيج .

البوية : موبعلى كيفج غصين عليج بتصيرين رفيجتي ترى صورج عندي و بغمضة عين أنشرهم و أفضحج بالديرة

كلها أحسلج طاوعيني بعدين آنا مابي منج أي شي

مشاعل ( و أنا ابجي ) : حرام عليج ليش تسوين فيني جذي آنا ما أذيتج بشي

البوية : يلااااا لو موتبكين لو تموتين جدامي مارح أغير كلامي و أبي ردج باجر .

وصكت التلفون على و يهي وآنا باموت من البجي ماني قادرة أكلم أمي و ماعندي خوات أقولهم كلهم أخوان و لا

عندي رفيجة أوثق فيها ما أدري شاسوي ماادري بامووووت قعدت أصلي و أبجي مانمت هذيج اليلة كلش و قررت قرار

مصيري وماعندي غيره حل
طلع الصبح و أنا بعدني مانمت يومين مرو علي جنهم سنتين تيددت و صليت الفجر و أنا مقررة القرار المصيري

ماعندي غيره عقدت أنطر و أنطر ليما دقت الساعة (7) دقيت عليها ماقدرت أنطرها ليما أهي تدق خلاص باموت

مشاعل : ألو

البوية : ألو هلا و الله بأحلى مشاعل بالدنيا كلها ماصدق هذ............

مشاعل : أنا موافقة على إلي تبينه بس عندي شرط

البوية : يه شرط واحد بس ههههههههه تشرطي يبى على كيفج و أعتبريني موافقة من ألحين جم مشاعل عندي آنا

مشاعل : شرطي أنج ماتيين صوبي ولا تقربين يمبي في الجامعة و لا جنة نعرف بعض مو عشان شي بس

عشان رفيجاتي مابيهم يشكون بشي

البوية : بس جدي حاضر يبى أفا عليج بس أنتي الغالية آنا ماصدقت ترضين علي

مشاعل : مع السلامة .

كل كلمة قالتها لي جنها سجين تقطعني تذبحني تذبح برآءتي مافي لساني غير كلمة يالله خذني يالله خذني

طول الطر يج للجامعة أمية فكرة و فكرة يت على بالي بس ماكان في حل ثاني عشان آنا موقدها ولا

أقدر أضحي بكل شي في لحظة لأ خلاص آنا ألحين بحاول أركز في محاضراتي عشان أنجح و بس هذا إلي

رح يكون في بالي بس ( قاعدة أقص على روحي ) روحي إلي قتلتها طيبتها و سذاجتها .

ووصلت للكلية و أنا أقول بسري لازم أركز في محاضراتي كل شي بيكون تماما باذن الله لازم أنجح لازم

لكن.................

أول ويه شفته من طلعت من سيارتي كانت أهي تبتسم لي و ماسكة بييدها وردة حمرا من شفتها أنخبصت

صورتها تخليني مشمئزة من كل الدنيا أبي أذبحها و أذبح عمري و أفتك . وطيت راسي و مشيت جني ما

أعرفها جان تطرش لي مسج مكتوب فيه ( أنتي اليوم أحلى من كل يوم ياحبي )

كل كلمة كانت مثل السجين تقطع فيني أبي أموت و أدعي الله ياخذني بس خلاص تعبت و الله تعبت
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!!!!!!!!!!!!!!!!!!!!!!!!!!!!
الأيام الماضية مرت علي جنها سنين كبرتني فوق عمري بوايد كل يوم يمر أحس بروحي باموت من القهر و الألم

أكابد كل هذا بروحي ماحد يعرف ولا أبي أحد يعرف بس الكل ملاحظ التغير المفاجأ فيني و الكل حاسب أنها الأمتحانات

بس ماحد يدري غيري و غيرها و غير الله رب العالمين ...............................

مرو أسبوعين كل يوم تتصل فيني تبي أطلع معاها أو تييني البيت بس كل يوم أتعذر لها بالأمتحانات أو بأن عندنا ضيوف

و البيت مليان كل يوم أتعذر لها بعذر و أترجيها تسامحني و أوعدها أن بعد الأمتحانات أطلع معاها ( و سبحان الله )

رضت بس شرطت أنها تتصل علي كل يوم و ماكان عندي خيار غير ني أوافق أني أسمع الصوت إلي يقتلني كل يوم

(وااااااااااااي أش كثر تهذر و تجرج و الله أحيانا أحس إني أتكلم مع بطل فيلم هندي من كثر المغامرات إلي تقولي عنها

و حيانا أحس إن كلامها لي يقتلني و يقطعني تقطع و أموت كل يوم أرد عليها ألف مرة بس مابيدي حيلة غير المماطلة )

و صار شي يميت من الضحك و الله أن شر البلية مايضحك . يوم و أنا في الجامعة قاعدة أذاكر و أحاول كثر ما أقدر

أركز جان تييني بنية شكلها الله لا راواكم و قفت جدامي و شكلها معصبة حيل وقالت لي ( إنتي مشاعل ؟؟؟ )

مشاعل : أي آنا خبر في شي ؟؟

( وخري عن فلانة أحسن لج هذي رفيجتي آنا من زمان و مارح أسمح لج تاخذينها مني )_ آنا مصاحبة شاروخان وآنا مادري _

آنا !!!لا تسألون أش صار فيني ماقدرت أوقف من الضحك و هي قاعدة تهددو تهدد ليما طخت وراحت و آنا قاعدة

أضحك ضحكت لي حد البجي بجيت من كل قلبي على حالي و على سذاجتي إلي وقعتني في هالمشكلة و عرفتني

على هالأشكال .

عموما أيام الأمتحانات تمر يوم ورا يوم و أنا تقريبا على حافة الفشل مادري من أقعد على ورقة الأمتحان أحل سؤال

و أسرح معظم الوقت قصبن عني مايوقظني غير صوت الجرس و ماني قارة أذاكر عدل من الهم إلي على قلبي

صورتها ماتفارق خيالي أحس نفسي مذلة و ماني قادرة أسوي شي أنزين الأمتحانات أقربت تنتهي و أنا ماادري أش

باقولها عقب مارح أطلع معاها أكيد بس رح تنشر صوري و تفضحني بين الناس ( على فكرة الصور إلي أخذتها

لي أهي صور عادية كانت تصورني و هي في بيتي لأنها كانت تيي عشان أذاكرلها و أساعدها في دروسها حسبي الله

عليها بس تدرون الفوتو شوب شي يسوي حسبي الله و نعم الوكيل !)

في اليوم القبل الأخير من الأمتحانات كان باجي لنا مادتين و نخلص و آنا على حالي التعيس تتصل علي و مضطرة أرد

دخلت قاعة الأمتحان حليت إلي قدرت عليه و سلمت الورقة و طلعت قاعدة سرحانة أفكر أش بسوي و بكرة آخر يوم من

الأمتحانات يات لي بنية و قالت لي ( لو سمحتي إنتي مشاعل !!) و الله كرهت أسمي !!!

مشاعل : إي آنا خيرأ كو مصيبة يديدة بعد منو إنتي !!

البنت : آنا ياية أقولج شغلة بس لا تعصبين آنا مالي شغل ؟؟؟

مشاعل : ( كلامها خبصني موتني أحس جسمي كله يرجف و شوي و رح يغمى علي ) تحجي أش صاير

البنت : أنتي بنية معروفة في الجامعة بأدبج و أخلاقج و الكل يعرف أهلج نعم الأهل عشان جدي آنا قررت آيي أقولج

مشاعل : ( هذيج الساعة آنا خلاااااااااااااااااااااااص خلاااص قلت بنفسي رحت فيها خلاااص )

البنت : فلانة_البوية _ قاعدة تحجي عليج و تقول أن عندها صورج و إنج مرافجتها و قالت عنج كلام مو شي

بصراحة الكل ماحد صدق بس أهي قالت أنها رح تأكد لنا هالشي وآناكن................

مشاعل : راوتكم أي صورة لأي شي ....... البنية : لأ بس شكلها ناوية عليج و أنا ياية أنصحج و أقول..........

خلاص كل شي أنتهى عرفت أني لازم أتصرف خلاص ماكو و قت بعد . شعور الغضب إلي تملكني ماله حدود

إييدي ترجف أمشي بين الناس في الجامعة من غير شعور قاعدة أدور لها أبي أشوفها و ينها ما أدري أش بسوي

ولا أدري أش بقول لها بس هذيج الساعة كنت أبي أشوفها دورت عليها في كل مكان مالقيتها ليما و صلت للكافتيريا

دشيت و جان ألقاها قاعدة تتحجى في التيلفون و تضحك مشيت و قربت يمبها و آنا ما أسمع من حوالي غير دقات

قلبي لما قربت عليها سمعت اسمي يعني قاعدة تتحجي عني ... ( ماعليج منها هذي رح أمسح فيها اأرض هههه)

ومن غير شعور و من دون ماحس بروحي بكل الألم إلي في قلبي و الضعف و الإنكسار و الذل و القهر

شديتها من شعرها من كل قلبي و طيحتها الأرض و قعدت فوقها و جان أصكها كف ورا كف بكل قوتي

كل كف كان ثمن اللحظات إلي قضيتها بالمحاتاه ثمن كل دمعة نزلت من عيني ثمن كل مرة تمنيت فيها الموت بسبتها

ثمن كل مكالمة أضطريت أسمع صوتها قهر أسابيع فرغته بوييها و من دون أي و عي أكفخهاو أقول لها موتي موتي

موتي لكن للأسف البنات أمسكوني و شالوها من تحتي و آنا أبجي و قولهم هدوني ماحد له شغل بس الكل ماسكني

البوية مغشي عليها و في و سط هالزحمة شفت ( سبحان الله ) طاحت عيني على موبايلها خذيته بسرعة و أنحشت

ركبت سيارتي أسوقها مادري لوين بس أبي أهرب لي مكان مادري و ين .

و صفطت سيارتي في مكان ماأتذكره حطيت راسي على السكان _المقود _ و قاعدة أبجي من قلبي فرحنة لأني طقيتها

بس خايفة مادري أش صار فيها فتحت جنطتي أدور على كلينيكس جان أشوف موبايلها (تذكرت أني خذيته ) أخذته

و فتحته الله لا يراويكم البلاوي السودة إلي فيه المهم قعدت أدور على صوري ليما حصلتها أخيرا و مسحتها

أخيرا أخيرا ماني مصدقة والله ماني مصدقة كل إلي صار صوري معاي خلاص ماتقدر تبتزني بعد ألحين بجيت

طول الطريق أبجي من الفرح و أحمد الله إلي ماخذلني فرحانة جنة جبل من الهموم طاح و أنزاح عن صدري مهما قلت

ومهما و صفت مستحيل أكتب شعوري ساعتها كنت مثل إلي بيعدمونه و أخيرا شالو حبل المشنقة من عليه

رديت البيت و أنا ويهي متفخ من كثر البجيو الطق قابلتني أمي ( أش فيج يمى منو طاقج شنو هذا إلي على ويهج )

مشاعل ( آنا انطقيت!! آنا طقيت طقيتها ليما و بردت جبدي فيها !!!) رن التيلفون الجامعة متصلة تبيني البوية

نقلوها المستشفى بس عادي ماصار فيها شي غير دوخة و كدمات على ويهها رحت الجامعة و قلتلهم كل إلي صار

و ماصدقوني كانوا لازم ياخذون أقوال البوية و بعدها باسبوع رحت الجامعة دخلت مكتب الأدارة و جان أشوفها جدامي

أهي و رفيجتها جان تيي تبي تطقني مسكت أيدها و قلت لها نزلي أيدج خلاص راح الوقت إلي ترفعين فيه

صوتج أو إيدج علي وعلى فكرة موبايلج في الحفظ و الصون بس نطلع من هني أعطيج إياه بس الشريحة الله يرحمها

هههههههههه سكتت ماتحجت ولا نطقت ولا بكلمة . أخيرا انتقم لكل إلي سوته فيني أخيرا رديت كبريائي و مسحت

فيها اأرض. الجامعة سامحتني لأن البوية أعترفت بالي سوته فيني ( لأني هددتها بأني أودي موبايلهاو فضايحها لأهلها)

تصدقون صرت أهدد بعد ماكنت أتهدد . البوية أفصلوها من الجامعة لأنها أطلعت معاها سوابق في هاللأمور و طلعت

البنت أختصاصية في أبتزاز البنات . و أنا سقطت بمادتين و عدتهم و مشى الحال ورديت مشاعل مالت قبل لأ صرت أقوى

من أول يوايد صارت شخصيتي أقوى من أول هديت الطيبة الزايدة و السذاجة إلي مالها غذر بهالزمن و أهلي للحين

مايدرون عن السالفة و لايدرون أش سبب طقي للبنية و لا هم مصدقين إني طقيتها أصلا .

هذي قصتي تبون تقولون عنها فيلم هندي و لا مسلسل كويتي و لا مصري ............. ( كيفكم )

آنا مايهمني غير شي واحد بس ........................

آنا ماكتبت هالقصة عشان أنشهر بالمنتدى مثل ماالبعض قالوبالعكس و الله العالم أنه ماعندي و قت لها الشي . أنابس أبي

أوصل لكم رسالة الكل يعرفها بس مايطبقها ألاو هي

أحنا عايشين في مجتمع ظالم قاسي مايرحم البنية أبدا ولا يسامحها على إلي سوته حتى لو ماكان لها يدفيه و بالمقابل يعطي

الريال كل الحق ف أنه يغلط لا ويقدم له الأعذار بعد عشان جدي لازم تعرفون

الطيبة الزايدة غباء والقانون لايحمي المغفلين يعني آنا لو لاقدر الله هلبنية نشرت صورتي و أنفضحت أش كنت باقول للعالم

ماكنت أدري من رح يعطيني عذر من رح يسامحني ماحد كنت رح أتعاقب على طيبتي كنت رح لأتحاسب على

غلطة ماهي بغلطتي بس لأني كنت طيبة أو بمعنى أحرى غبية .بس الله مايخيب راجي

أحم الله مليون مرة أن كل شي عدا على خير و أتمنى أن ماحد يشوف إلي شفت أبد أبد أبد .

منقول الموضوع

الموضوع الأصلي : قصتي مع البوية عذاب || الكاتب : الماسه عمان || المصدر : شبكة همس الشوق

31 - 5 - 2021, 01:58 AM

قصة من صميم الواقع
تحاكي احداث اجتماعية موجودة
نتاثر بها جميعا
سلم نقلك المتميز
يعطيك الف عافية على هذا الاتحاف الرائع
دمت ودام العطاء
لك تقديري

31 - 5 - 2021, 06:07 AM

سلمت يداك على الطرح الطيب
لاعدمنـآ هذا التميز
يعطيكـ ربي العآفيهـ
بـ إنتظارجديدك بكل شوق
ودي ووردي

31 - 5 - 2021, 09:22 AM

شكرا لمروركم

4 - 6 - 2021, 05:26 AM

الله يعطيك العافيه

لاعدمنا جديدك
مودتي

13 - 6 - 2021, 08:14 PM

سَلِمَتْ يدآك على رَوْعَة الطَّرْحْ
وَسَلِمَ لنآ ذوقك الراقي عَلَى جَمَآلِ الاختيار
لَگـ ولــ حضُورِكْ الجميل كُلَّ الشُّكْرِ والتقدير
اسأل البآري لك سعآدة دائمة
وِدِّي وتقْدِيري لِـ سٌمُوكْ

1 - 7 - 2021, 05:11 AM

تَحية تلطفهآ قلوب طيبة ونقٌية
آ‘لتميزٍ لآ يقفٌ عندْ أولْ خطوٍة إبدآعٌ
بلْ يتعدآه في إستمرآرٍ آلعَطآءْ

المواضيع المتشابهه لموضوع: قصتي مع البوية عذاب لموضوع: قصتي مع البوية عذاب
الموضوع	كاتب الموضوع	المنتدى	مشاركات	آخر مشاركة
المكياج المناسب للعيون البنية	همسه الشوق	همس عالم حواء	6	14 - 10 - 2017 04:55 AM
البنية كلها حنية البنية بتعاكس فيا البنية هلا هلا	همسه الشوق	همس للاسره والطفل	2	30 - 7 - 2016 05:20 PM
المكياج المناسب للعيون البنية	همسه الشوق	همس عالم حواء	4	27 - 7 - 2015 05:06 AM
ساعزف لك قصتي	سجات التهاويل	همس الشعر والقوافي	7	12 - 2 - 2015 10:26 AM
با اختصر قصتي	إنكسآر ♪`	همس الشعر والقوافي	5	14 - 8 - 2012 07:24 PM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع