روايه ودك تنامين نامي - الصفحة 8

27 - 3 - 2014, 10:42 PM

الجزء التاسع :.عدا الويكند على خير .. والكل كان مرتاح فيه تقريبا ما عدا بيت ابو سعود اللي المشاكل فيه كانت تزداد يوم عن يوم .... دلع اللي كانت كل يوم تسمع سب وكلام ام سعود عنها .. وسعود اللي ماصار يقعد ف البيت ابد من جهة ثانية .. ولينا وصديقتها سمر اللي بدت علاقتهم تتحسن ببعض .. وسالم الوحيد اللي عايش فيهم بسلام .... اما بيت ابو رائد .. فرائد كلم امه وابوه بموضوع الخطبة وامه وابوه فرحوا فيه مرة وافتخروا فيه .. خصوصا بعد ما عروفوا انه كان يشتغل طول الفترة اللي عدت ويجمع فلوس عشان يبني مستقبله .. ووافقوا على طول وقرووا يروحون يوم الاثنين ويخطبون له ..... وعسى هالفرحة تدووووم ...بين ابو فيصل الجو كالعادة عندهم .. لما يكون ابو فيصل موجود .. تكون المشاكل قايمة ومشتعلة .. اما لما يروح .. يخيم الهدوء والهم عليه .. هذا غير الضرب والسب اللي تلقاه نسايم كل يوم من زوجها اللي مو مقدرها .. بيت ابو بندر كان الاحسن من بين البيوت اللي قبله .. بندر رجع لشغله بكل همه ونشاط من بعد روحة البحر.. اما ثامر قدم استقالته وقاعد يشتغل الحين ف ورشة ابوه مع رائد ومبسووط مرة .. اما دانة فما تدري عن ولاشي بموضوع الخطبة ... احمد .... نفسيته كل يوم تزداد سوء عن سوء .. صح ذاك اليوم تحسنت .. بس رجعت وساءت اكثر .. خصوصا انه الويكند ولكل يطلعون مع ربعهم .. الاهو .. اضطر يطلع ويتعشى لوحده ... اروى بدت شوي شوي تحاول تطلع من الحزن اللي هي فيه .. صح احيان تمر عليها ذكريات تخليها تكتئب .. س هي قاعدة تحاول عشان تقوي قلبها وتتحمل وترضى بالمكتوب .. وطبعا كل هذا بمساعدة صديقتها غادة .. ___________________________________(( بعد 3 ايام ... يوم الاحد .. بيت ابو عوض ))( الساعة 3 العصر )دخلت اروى البيت .. وطلعت فوق تصاااارخ : يمااااااااا .... يمااااا... ام عوض جات تركض خايفة : بسم الله... شصاااير...؟!؟!؟!اروى بفرح : الحقي .. الحقي .. هذا آخر اسبووووع ... والله آخر اسبووووع ...!!!!!ام عوض: ليش...؟؟؟اروى تناقز : لانه بعدها عندنا اجازة عيد الاضحى ....... وناااااااااسة ...!!؟!؟ام عوض ابتسمت : هههههههه مبروك .. يللا ما بقى غير 3 ايام .. هانت اروى : واااااااااو ... نبي نسافر هالمرة ... نبغى نروح عند خالتي .. الله يخلييييييك .. والله زهق هنا ... !!!ام عوض : انتي الحين خلصي مدرسة وبنشوووف .... يللا روحي غيري عشان تجي تتغدي ............___________________________________(( بيت ابو رائد .. ))( الساعة 7 بالليل )نزل رائد لابس ملابسه عشان يروح الورشة ... وشاف امه وابوه وريم قاعدين ف الصالة ... ويسولفون .....ابتسم رائد : السلاااااااااااام .. شتسووون ...؟؟ريم : نحش فيك....قعد جنب اخته : في ايش بتحشين ..؟؟ كامل والكمال لله الحمدلله .... !!!!ريم : يا ربيييييي الخقاااق اللي رافع خشمه ..؟؟ لايكون محسب نفسك انريكي وانا مدري....؟؟؟ام رائد : يخسي انريكي قدام ولدي .. ما يسوى شعره وحدة من شعر رائد والله ..!!ريم : انفخيه انتي .. نفخ ع الفاضي .. القرد بعيون امه غزال.... ابو رائد : وبعيووون ابوه رجاااااااال ..... خخخخخخخريم حطت يدها على خصرها : لا والله ... اشوف قمتوا علي ... بس معليش .. هالمرة بعديها لانه معرس .. بس لمرة الجاية حسابي معاكم ابتسم رائد يوم تذكر الموضوع ... ام رائد : ها يا رائد ..؟؟ متاكد انك تبغى تخطب..؟؟؟ ترى الخطبة مو لعبة .. مو تفشلنا قدام الناس...... اعقل وفكر زين .. ولاحق ... ما وراك شي ... رائد : لا يا يما .. انا فكرت بهالشي زين .. وقررت .. وخلاص ماني متراجع عن شي .. ابو رائد : يا رائد انا اعرف حركاتك .. اخاف تسود وجهي قدام العرب ... رائد : يا يبا والله قلت لك متاكد .. وانا بنفسي اللي طلبت منكم هالشي ريم : حراام عليكم ... كسر خاطري الولد والله .. روحوا اخطبوله ... رائد : كفووو والله اختي .. سمعتوا ..؟؟ هذا الكلام .!..!.!ام رائد فرحت : الله يتمم هالفرحة عليكم دووووم الكل : آميــــــــــــــن ...........!! ___________________________________( ( بيت ابو سعود ))( الساعة 9 بالليل )كان بيت ابو سعود تقريبا فاضي ... الا من دلع اللي الطلعة ممنوعة عليها للابد مادامت ساكنة بهالبيت .. هذا هو القانون الجديد اللي حطته ام سعود عشان تحاول تخرب على دلع حياتها وتدمرها بشكل نهائي .... سالم كان طالع مع ربعه ... لينا عندها حفلة ف بيت صديقتها .. وسعود كالعادة برى ..ام سعود ف المشغل حقها ..وابوسعود ف الاستراحة مع ربعه العجايز .. وهي قاعدة ف غرفتها وتقرا لها ديوان شعر لفيصل اليامي تحاول تسلي نفسه فيه .. لين ما سمعت صوت الباب اللي تحت ينفتح ويدخل احد ....سكرت الديوان واخذته بيدها ونزلت تشوف من فيهم اللي جا .. يمكن تحصل واحد يونسها ع الاقل... بس لما طلت من فوق ما شافت احد .. بس سمعت اصوات رجول تمشي ..نزلت على الدرج وكانت لابسة بيجاما سوادا بس التي شيرت حقها وردي .. وشعرها مفتوح ومبعثر وطبعا مو ممشط لانها مالها خلق تسوي أي شي ف شكلها ..المهم نزلت تحت وشافت واحد ما شافته من زمان .. من حوالي يومين .. شافت واحد واقف ومعطيها ظهره ويدخن .... ويوم حس بوجودها لف.... سعود باتغراب : هذا انتي ...؟؟تحنحنت دلع وراحت على طول للمطبخ من دون ما ترد عليه ... وهو ما صدق خبر ولحقها على طول .... دخل وسكر الباب .... دلع سكرت عيونها وقالت بجدية : سعود ..!! افتح الباب اشوف واطلع برى .. ترى محد ف البيت .. وانا ابغى اخذلي ماي واروح غرفتي .. سعود عقد حواجبه : طيب وش اسويلك..؟؟؟دلع : وخر عن الباب لو سمحت .. ولاتكلمني باي موضوع .. ترى اللي فيني مكفيني .. ضحك سعود والتفت على الطاولة وشاف الديوان .. وبلقافة منه اخذ الديوان وفتحه وقام يقرا اللي فيه قدام دلع بصوت عالي ... يا عمري الدنيا ماتسوى تنام وخاطرك زعلانولابه شي يستاهل يخلي قلبك يعانيطلبتك .. كان لي خاطر تبعّد عنك الاحزانفديت عيونك الحلوة .. تبسم لو علشانيحبيبي صارلي مدة اشوفك تايه .. وحيرانوانا والله لو شفتك حزين .. تزود احزانيانا احبك ولا ودي تعيش بدنيتك .. ندمانترى الايام محسوبة وتالي ذا العمر فاني تصدق .. بسمتك والله تفرح خاطري الولهانيطير من الفرح قلبي.. واصير بعالم ثانيولامن شفتك بضيقة .. احس اني انا الغلطاناعاتب نفسي بنفسي ولو ما كنت انا الجانيغلاك بداخل عروقي ولا يوصل غلاك انسانيمر الوقت ويثبتلك .. غلاك ان الله .. احياني بضحي بعمري لعيونك تنام انتا وانا سهران وانادي جروحك القلبي .. وتجي واحد .. ورى الثاني سكت وهي سكتت.. وجا وقت لحظة الصمت ... الاثنين يطالعون ف بعض .. وولا واحد يعرف ليش هالمشاكل قاعدة تصير وليش كل اللي صار صار ..؟؟سعود خاطره يمسح اللي سواه .. ويبدا من جديدودلع وها بحياة سعيدة بعيدة عن المشاكل والظلم ... والكل يغني على ليلاااااااااااه .... دلع انتبهت لنفسها : ا... ممكن الديوان ...؟؟ سعود : ا.. أي .. خذي .. عطاها الديوان .. وهي طلعت لغرفتها .. وهو قعد ف المطبخ .. مايدري وش جاه.. من قرا القصيدة .. حس انه دلع هي المعنية فيها .. حس انه خاطرها احد يقول لها هالكلام .. شاف نظراتها له وهو يقرا القصيدة .. شاف دموعها اللي بدت تتجمع وترسم خطوط على خدودها شوي شوي وهي تحاول تمسحهم قد ما تقدر عشان ما يبينون ضعفها.. حس ف هالقصيدة معاناة دلع .. حس انه كل بيت مكتوب عنها .. ويروي احداث صارت لها .. تسند على الطاولة وقعد يفكر .... سعود : ياربي ساعدني ... ياربي والله اني ظالم هالبنت مرررة .. وشلون ياربي...؟؟ وشلون اصحح غلطتي ..؟؟ والله اني ندمان وعارف اني غلطت بحقها كثير ... بس ماني قادر ... ماني قادر اعرف الشي الصح اللي لازم اسويه ... !!

27 - 3 - 2014, 10:49 PM

___________________________________(( بيت ابو بندر .. الصالة ))( الساعة 11 ونص بالليل )كان ابو بندر قاعد مع ام بندر واحمد .. ابو بندر : المهم انا الولد كلمني انا واحمد ... ويقول بيجي هو واهله بكرا ويخطبون رسمي ...ام بندر : مدري والله يابو بندر.. بس انا ما اعرفهم صراحة .. بس بنت عمه اعرفها واعرف امها .. اما هم ما اعرفهم وما اقدر احكم عليهم والله احمد : انتوا لا تستعجلوا .. الرجال بكرة بيجي هو واهله .. وبنشوووف ساعتها .. ( على الدرج )كانت دانة قاعدة وتسمع اللي ينقال وقلبها يدق زي الطبل ... ماهي عارفة ليش...؟؟دانة " يا ويليييييييييي ... السالفة فيها خطة وزواج .... لا لا لا مو صاحي هذا .. بعد كل اللصار من بيننا يبغاني ..؟؟ الحين انا احسبه صايع طلع يبغى ياخذني ..؟؟ لا لا لا مو معقولة .. اكيد يبغى يسوي فيني مقلب ولا شي .. او يبغى يورطني او ينتقم مني لاني ما عطيته وجه .... يوووووووو ه.... والله بموووت من الخوف .. ماني مصدقة اللي يصير.... ليش..؟؟ ليش انا ليش..؟؟؟ صح استانست لاني بديت احسه حلو وشخصية .. بس مو لدرجة انه يخطبني واتزوجه واعيش معااااااااااه ........اففففف .. والله لو اقعد على هالحال بنفر راسي وبصير مجنووونة احسنلي اطلع انام لانه بكر علي دوام ف الجامعة ... ولما ارجع يحلها الف حلااااااااال .... "طلعت دانة لغرفتها ونامت تحاول تتناسى سالفة رائد وانه بكرة بيجي ويخطبها رسمي من اهلها ............(( اليوم الثاني .. يوم الاثنين .. ))( الساعة 11 الصباح )كان رائد كااااشخ والحالة حالة .. ورايح للورشة .. كان وده ما يدوام اليوم لين ما تنتهي سالفة الخطبة ف الليل .. بس بيقولون عنه انه من اولها بدى باللعب والبطالة .. بحيث انه الكل للحين مو واثقين فيه ولازم يتبت لهم انه خلاص صار رجال وقرر يستقر ويكون بيت وعائلة ..... ويوم وصل الورشة..........دخل وشاف الورشة كالمعتاد .. الشغل ما يوقف .. والزباين والشركات كثيرة .. واول حس بيد ناصر على كتفه : هلا والله .. حلوة الكشخة بس ف المان والزمان الغلط .. يللا تحرك وطلع طلبية شركة عبدالله (.....) عشان يودونها .. رائد ابتسم : هههههه هلا والله بخير الحمدلله .. صباح النور......!!!!! راح لمكتب ابو بندر اللي ف آخر الورشة وشافه قاعد يحسب شي...رائد مبتسم : السلاااام عليكم ...........!!رفع ابو بندر راسه وابتسم : ه.. هلا رائد وعليكم السلام ... رائد : شخبارك ابو بندر..؟؟ عساك بخير....؟؟ ابو بندر : الحمدلله انت وش اخبارك ...؟؟ رائد : والله الحمدلله بخير.... ابو بندر :والوالد شلونه ...؟؟ رائد : بخير الحمدلله ..... يسلم عليكابو بندر : الله يسلمه ... رائئد : يللا اعذرني وراي شغل ...ابو بندر : روح الله وياك ... وناديلي جاسم لما تشوفه .. ابغاه بموضوع .. رائد : ابشر ... ___________________________________

27 - 3 - 2014, 10:51 PM

___________________________________(( المدرسة .. الحصة الخامسة ))( الساعة 12 الظهر )كان مقرر اليوم كل وحدة تسوي عرض عائلتها وتعرضه قدام البنات ... وكل وحدة من البنات كانت متحمسة مررررة ... ويتهاوشون على مين تبدا اول ..المهم وبدوا البنات عرض لين ما جا دور غادة ... قامت غادة مبتسمة ووقفت قدام الكمبيوتر تعرض العرض .. وهي تشرح وتوصف اهلها.. غادة : هذا ابوي ... طيب وحنون .. وما يقول لنا لأ .. وامي الطيبة .. مسكينة نطلع قرونها وماتسوي لنا شي.. وطبعا تراها صبووورة مرة وبالها طويل.. اما اختي سمر .. وش اقول ووش اخلي..؟؟ حبووبة .. جنية .. هبل وموب صاحية .. وصح احيان تكون مزعجة .. بس احبها في كل الاحوال .... وووووووو ......بسصفقوا البنات لها ورجعت مكانها مستانسة .. وجا دور اروى اللي ما كانت الفكرة عاجبتها بالمرة ... قامت وهي مغصوبة وراسمة ابتسامة مجاملة على وجهها .. وبدت بالعرض... اروى : ا... ابوي وامي .. تكلمت عنهم كثير لين ما احس انكم عرفتوا كل شي عنهم .. بس انا اليومما بتكلم عن امي وابوي .. بتكلم عن انسان ثاني .. امي وابوي ناس عاديين .. بس الانسان اللي مكانه ف حياتي غير .. وهو غالي مرة علي.. هو اخوي .. اخوي من فتحت عيني على الدنيا كان موجود .. كان سند لي وانا اكبر يوم بعد يوم .. كان حنون وطيب معاي وباه طويل.. قد ما اسوي فيه .. يسامح ويطول باله .. ( دمعت عيونها ) .. اخوي .. اطيب اخو على وجه الارض بوجهة نظري انا .. طموح ومحترم .. ومحبووب من اللي حوله .. للحين اتذكر يوم مرضت وشلون شالني ووداني المستشفى يركض .. وشلون يتعب كل يوم وهو واقف ف الشمس ينتظرني لما اطلع من المدرسة .. وشلون يضحك معاي لما نكون رايقين وما ورانا شي.. وشلون نطلع مع بعض ونتمشى .. كل هالاشياء غالية على قلبي ومميزة .. وولا عمري بنساها ...الابلة : طيب دامك كذا تحبين اخوك.. قوليله .. فيي ناس ما يقولون لاخوانهم انهم يحبونهم .. قوليله انت اخوي وانا احبك .. وعطيه هدية احسها بتكون حلوة منك .. اروى باسف : والله كان ودي .. لو كان هنا كان غرقته بالهدايا .... الابلة : يدرس برى صح...؟؟ ارى باسف اكثر وطاحت دمعتها : مات وهو راجع من الكويت .. صدمته سيارة ومات .. ندمت الابلة لانها فكرت تسال هالبنت وتضغط عليها : ا... والله آسفة.. ما ادريابتسمت اروى مجاملة : ا.. لا عادي .. الله يرحمه الابلة للبنات : اروى لها خمس درجات كاملة .. عرضها ماشالله .. صور وطرح وطريقة كلام ولا اروع منها ... !!!!!!!!___________________________________(( بيت ابو بندر .. مجلس الرجال ))( الساعة 8 بعد صلاة العشا )ابو رائد : واحنا هنا يابو بندر عشان ودنا نخطب بنتكم لولدنا رائد ... ابو بندر : هذي الساعة الماركة يابو رائد .. احنا ما عندنا شي على رائد .. ماشالله عليه رجال ولا الف رجال.. وكل من يتمناه .. بس الراي الاول والاخير للبنت .. ابو رائد : ماعندنا ي مشكلة .. انتوا شاوروها .. وخلوها تاخذ راحتها .. مانا مستعجلين.. ابو بندر : انشالله .. والله يكتب اللي فيه الخير... وقعدوا يسولفون ... ( عند الحريم )قعدت دانة اللي كانت كاشخة وهي مستحية ف المجلس عند الحريم بعد ما سلمت على ام رائد .. ام رائد : ماشالله .. وش هالزين ؟؟ الله يحفظك ياربام دانة : الله يخليك يارب .. الزين زينك .. دانة حدها مستحية : تسلمين ...

27 - 3 - 2014, 10:53 PM

بعد اسبوووع .. دانة شاورتها امها ف السالفة .. ورجع شاورها ابوها .. بس هي كانت مترددة .. بس ف النهاية تبعت قلبها ووافقت .. والملكة تحددت بعد العيد باسبوعين .. اما بندر .. فجاته قضية شباب ف شقة ومعاهم خمر .. وبنات .. وقاعد يشتغل عليها .. اما اروى فقرر ابوها يسافرون لدبي ويقضون فيها الاجازة .. ويغيرون جو ويطلعون من الكآبة اللي هم فيها .. احمد .. عايش حياته شغل ونوم .. ما يسوي أي شي.. يقوم .. يداوم .. يرجع ياكل .. وينام .. ماله خلق لاي شي.. رائد .. اللي مين قده .. خاطب وبيملك قريب.. طبعا شاد الحيل بالشغل وخصوصا بعد المنصب الحلو اللي عطاه اياه ابو بندر ف الورشة .. يوم عينه ابو بندر نائب له .. دلع المسكينة ماصار عليها شي.. انطوت على عمرها يوم درت انه 2 خطبوها وام سعود اضطرت تكذب على ابو سعود وتقول له انها مو موافقة ويرفضهم .. هذا غي الكلام والاهانات اللي تسمعها كل يوم .. عشان كذا ... صارت كل ما تقوم من النوم .. تاكل وترجع تنام .. وما تقوم الا للصلاة .. سعود اليوم بيطلعون خالد من المستشفى وهو من الصباح مطيح عنده بالمستشفى .. لانه اذا راح خالد البيت ما بيقدر يزوره عشان خالد عنده خوات .. واكيد اهله بيكونون حوله ... فيصل حقده يزداد على ابوه يوم بعد يوم .. خصوصا بعد ما صار يعرف القصص اللي يسويها في نسايم زوجته .. واللي سواها ف امه اول .. ويحاول قد ما يقدر ما يخلي خواته يتعلقون ف ابوهم عشان ما يطيح من عينهم لما يعرفون حقيقته .. ___________________________________(( المستشفى .. يوم الاثنين ))( الساعة 1 الظهر )خالد وقف على رجلينه اخيرا من بعد مدة .. بس طبعا الله يخلي العكازات ...!!!!سعود يصفق : الحمدلله على السلامة ... خالد : اسكت احس اني بزر اول مرة يمشي.....سعود : معليييييييييييه ... كلها فترة وتعدي انشالله .. خالد : ابوي وين؟؟؟سعود : راح يخلص اوراقك ويوقعها .. المهم شوووف .. ما اوصيك .. متى ما فضيت كلمني .. طيب..؟؟ مو تقطعني.....!!!خالد : افااا عليك .. انشالله .. ونااااااااسة سعود : شفيك شفيك .. انتبه لاتطيح بس من الفرحخالد : بشوفها بشوفه .. بتجي تزورني .. وبشوفها .. سعود : خخخخ شوف شكلك اول ... والله تفشل.. لاتخليها تشوفك كذا .. تتخرع والله خالد : كل تبن .. ولا بهالعصا على راسك الحين .. سعود : مستانس انت على هالعصا .... خالد : من اليوم سلاحي .... أي كلمة وعلى طول بدون تفاهم.. على الراس .. سعود : ههههههههههه خبل ..!!!___________________________________(( مجمع وافي .. ف الامارات << فدييييييتها ))( الساعة 8 )كانت ام اروى واروى قاعدين يتمشون ف المجمع ويشترون من كل شي يشوفونه قدامهم .. وابو اروى كان قاعد ف الكافتيريا ينتظهرهم يخلصوووون ... مروا على محل ملابس ودخلت ام اروى تتفرج .. بعدين نادت اروى ام اروى : اروى... شوفي هذ لووونها حلوواروى سكتت شوي وقامت تطالع ف البلوزة باهتمام ... وسرحت... ام اروى استغربت : بسم الله عليك وش جاااك؟؟ اكلمك انا .. اروى انتبهت : ها..؟؟ لا ولاشي ..بس هذا نفس اللون حق الفستان اللي اشتراه لي عوض للعيد اللي فاات .. من جا طاري عوض تركت ام اروى البلوزة وطلعت من المحل .. اما اروى .. فتندمت على نها تذكرت امها بالسالفة .. ولحقتها .. اروى : يماا .. يما .... ام اروى تحاول تمسك الصيحة بدون ما تلف : نعم....؟؟ اروى قابلتها : يما والله آسفة ما كان ودي اذكرك .. ام اروى نزلت دموعها وبدى يسيل الكحل حقها : ادري .. ادري حبيبتي .. بس ما اقدر .. من اسمع اسمه اصيح .. احس قلبي ينعصر بقوة ...!!!!اروى ودموعها ف عيونها : يما . يقولون آيس كريم الامارات يجنن .. شرايك ناخذلنا منه؟ام اروى تحاول تستانس : يللا .. بس على حسابك .. اروى : هههه مو مشكلة .. نعديها هالمرة لك يا منالووو .. !!!!___________________________________(( بيت ابو سعود .. ))( الساعة 11 .... )التفت دلع على الباب اللي قاعد ينفتح .. وقامت ... الا تدخل لينا وام سعود وسالم وراهم .... وخلوا الباب مفتوح .. لينا تسلم على دلع : السلااااااااام .... عسى تاخرنا؟؟؟دلع : وعليكم السلام .. لا ابد .. ( تكلم ام سعود ) خالتي شلون كان مشواركم ...؟؟ ام سعود باحتقار : وانتي وش دخلك..؟؟ ومين انتي عشان تساليني ها؟؟ خليك بحالك احسنلك .. ولاتتدخلين في اللي ما يخصك ...فاهمة ؟؟ وطلعت فوووق مخلية دلع مستغربة ومجروحة من تصرف ام سعود معاها ... سالم قرب : ما عليك منها.. خليها مجنووونة هذي .. انتي شخبارك..؟؟ طولنا عليك صح؟؟دلع ابتسمت مجاملة : لا ما عليك .. اهم شي انتوا انبسطتوا .. !!!!بعد دقيقة دخل ابو سعود ... ابو سعود : السلام عليكم ..... الكل : وعليكم السلام .... دلع : وعليكم السلام ... هلا عمي ... ابو سعود : هلا ببنتي ..شخبارك..؟؟ ها عسى صرتي احسن ... ؟؟ خف الصداع ..؟دلع : ا.. أي الحمدلله .. ابو سعود : عاد المرة الجاية خذي بندول من الليل عشان ما يجيك صداع ويروح عليك المشوار طيب..؟؟ دلع ابتسمت : انشالله .. ابو سعود : يللا انا بطلع ارتاح .. من الصباح وانا افرفر بهالقروود ف الشوارع والبيوت .. ذبحوني .. ماخلوا بيت ما راحوه ولا مكان ما نزلوا فيه ... خخخخخخخخخ لينا : لا والله .... لازم نتمشى ولا شلووون ؟؟ابو سعود : اسكتي اسكتي واللي يعافيك .. انا رايح انام ... تصبحون على خير.. الكل : وانت من أهل الخير..

27 - 3 - 2014, 10:53 PM

(( اليوم الثاني .. بيت ابو رائد ))( الساعة 1 الظهر )كانت ريم قاعدة ف الحوش برى تسقي الورود حقتها .. ( ريم .. بنت عمرها 22 .. تدرس في جامعة الامير محمد بن فهد .. برمجة كمبيوتر .. طولها حلو .. وجسمها احلى .. شعرها بني غامق يوصل لنص ظهرها .. وفيه كم خصلة شقرا .. وجهها ناعم مرة .. بشرتها ناعمة لدرجة مو طبيعية!! .. وشفايفها ورديةبشكل عااام .. ناعمة وحلوة .. ريم وحدة تمووووت في شي اسمه وروود .. وحساسة مرة .. بس عندها كبرياء مرررة .. خصوصا انها بنت عبدالهادي اللي محد قدها ... وهي معتبرة نفسها زي الاميرة ... يعني لازم تكون في احسن شكل .. سواء ف البيت ولا برى البيت .. عشان كذا دايما تكون منتبهة لوزنها .. هذا غير مشوار السوق كل يومين .. والكريمات والمرطبات اللي تحطها على وجهها ف البيت .. وطبعا ما تعرف شي بالمطبخ .. )بعد ما خلصت سقي الزرع قعدت على الكرسي الموجود ف الحوش الكبير اللي ف بيتهم .. تقرا مجلة ... وفجأة انفتح الباب حق البيت ..ودخلت سيارة سودا مرسيدس .. اتغربت ريم .. ريم : ؟؟ وش هالسيارة..؟؟ ما اذكر رائد سيارته كذا ... نزل واحد طويل من السيارة .. اسمر ولابس شماغ ونظارة شمسية .. ومعاه ملفات .. سكر السيارة .. ومشى متوجه للباب بدون ما بنتبه لها ... قامت ريم معصبة من هالانسان .. شلون يدخل البيت كذا ..؟؟ عسى ما شر!!!ريم تصارخ : هييييي انت ... !!التفت احمد ويوم شاف ريم نزل راسه : ا .. اوووه .. آسف ما انتبهتلك ... معذرة ريم معصبة : ياخي بعد ايش..؟؟ بعد ما دخلت ووقفت سيارتك ونزلت منها .. لاااا .. وماشي لبيت بعد ...!!!!احمد : ااا... اختي انا قلت لك آسف .. بعدين انا متعود اجي كل يوم بهالوقت ومحد يكون موجود بالبيت ... محد قال لي اليوم انه في احد بالبيت غير ابو رائد ... طالعت فيه ريم .. وانتبهت لشكله ولوجهه ... يوم شافها احمد ماترد رفع عيونه وشافها واقفة تطالع فيه وهي ساكتة وارتبك زيادة "هذي وش فيها واقفة كذا .. لو جا احد الحين وشافها واقفة معاي وش بيقووول ..؟؟ احسن لي امشي ... " احمد : ا... لو سمحتي استاذن انا عندي شغل .. ووو .. آسف مرة ثانية .. ريم انتبهت لنفسها : ا.. انا بدخل البيت .. دقيقة وادخل عشان اكون مريت لغرفتي.. تعرف المكتب وين..؟؟ احمد : أي ما يحتاج .... دخلت ريم البيت بسرعة وطلعت لغرفتها فوووق وسكرت الباب ... ريم : يا ويلي ....... وش هالرزة والكشخة ...؟!؟!!؟؟!!؟ ما قد شفت واحد ثقيل زيه .. خصوصا وانه في بنت بملابسها وهي كاشفة واقفة قدامه وتكلمه ...!!!! يا قلبي علييييييه ... وعلى النظرة اللي نزلها ع الارض بس ...!!!!! وااااااااااي يخقق .. فديييييييييت المؤدبين انا .. !!!!(( مكتب المحاماة .. ))( الساعة 6 المغرب .. )كان بندر مندمج ويقرا ملف القضية الجديدة اللي مستلمها .. واللي متورط فيها حوالي 11 شباب ... صادوهم في شقة مع بنات وخمر .. بس للحين محد اعترف وقال مين صاحب الشقة .. وخصوصا انهم مسجلينها باسم مو معروف وولاموجود اصلا... يعني احتمال السالفة فيها مساعدة من ناس لهم مناصب .. وبعد ما شاف الشباب وتعرف على اسمائهم وسجلاتهم .. اكتشف انه كل الشباب عيال عز ونعمة .. يعني اغنياء .. دخل حمد : السلااااام عليكم بندر وهو منزل راسه يقرا ويكتب : هلا والله حمد ... تفضلحمد : شتسوي..؟؟ بندر : القضية الجديدة ...حمد قعد : شقة 18 ...؟؟ بندر بدون ما يرفع راسه : أي .. ( رفع راسه ) اكتشفت شي!!!حمد : وشوو ..؟؟ بندر : كل الشباب اللي متورطين عيال نعمة وفلوووس .. وعيال كبارية ف السوق والاسهم بعد ..... حمد : اوووف .. من عذر صارلهم سنتين محد صادهم .. اكيد وراهم ناس وظهووور بندر : اكيد .. وهذا اللي متاكد منه .. لانه الشقة مسجلة باسم واحد ماله وجود اصلا.. حمد : ايي .. عااااادي .. دامهم اغنيا .. توقع أي شي.. بندر : وفي شي ثاني بعد ... حمد : شنو بعد ...؟؟ بندر : البنات اللي كانوا موجودات ف الشقة حمد : شفيهم ..؟؟ بندر : كلهم يوم استجوبوهم قالوا انه وحدة كانت تقص عليهم وتقول انها بتدورلهم عرسان .. وبعدين تطلب تقابلهم ف الشقة .. ويوم يروحون .. يمسكونهم الشباب ويصورونهم ويصيرون يهددونهم بفضح صورهم اذا ما صاروا يجون كل اسبوع او كل يومين ويحتفلون معاهم .....!!!! حمد : اوووووووووف ...!!!! ووووجع ... طيب عرفوا مين الحرمة بنت الكلب...!؟!؟بندر : أي .. وهي بنفسها اعترفت .. بس تعرف المشكلة ايش..؟؟ حمد : ها...؟؟ بندر : طلعوا قاصين عليها وقايلين لها اسماء غير اسماءهم .. يعني معطينها اسماء مو موجودة عشان ما تفضحهم ..... وهي اصلا ذاكرتها موب شي .. يعني لما نسالها عن اشكالهم تقعد تقكر ساعتين وما ناخذ منها شي.... ابدحمد يفكر : والله ضبطوووها زين .. موب هينيييين ... !!بندر : بس وين يروحون .. جايبهم جايبهم .. انا اوريهم .. ___________________________________(( بيت ابو بندر ))( الساعة 11 بالليل )رجع احمد من الشكرة ووقف سيارته .. وشاف ثامر قاعد ف السيارة ... نزل وراح لسيارة ثامر ودق القزازة ...فز ثامر وقتح القزااااز : بسم الله من وين طلعتلي...؟؟ احمد : خخخخخ شتسوي ف السيارة .. الله يهديك انا استغربت يوم شفتك .. ثامر يفرك عيونه : آآه فيني النووووم .. والله الدوام يتعب .. الله يهدي ابوي بس.. غصب اشتغل قبل ما اخلص دراسة ...؟!؟!؟!!؟ شي يذبح الواحد والله احمد : هههه معليش معليش .. خلك رجال ... ثامر : اركب اركب خلينا نسولف شوي على راحتنا ... ركب احمد وسكروا القزاز والابواب وتسند كل واحد على الكرسي.. ثامر : خخخخخخ من يطلع معاي بكرة الراشد ...؟؟ احمد : ليش وش عنك...؟؟؟ثامر : يااااخي طفشان وما بقى غير 3 ايام على عيد الاضحى .. قلت نتسوق ونستانس بنفس الوقت .... احمد يضحك : هه ووين الوناسة ف الراشد ...؟؟ ثامر : طبعا ف البولوتوص...!!!احمد : بلوتوص...؟!؟!؟ الله يخس وجهك اسمه بلوتووووث .. يا غبي .. ثامر : اقووول اعرف الكلمة بس بلوتوص احلى ف النطق .. احمد : أي هين .. صرف صرف .. هذا كله من تاثير قناة الساحة عليك والله .. انا شكلي بحذفها .. صايرلنا واحد من صحراء الربع الخالي ... خخخخخخ ثامر : أي ح .. شرايكم نروح البر....؟!؟!احمد : انطم انطم .. عليك مشاوير زي وجهك .. الحين توك تقول باقي 3 ايام ع لعيد .. تبغى تروح وتصير فحمة قبل العيد .. بالعكس من الحين لاتحلق .. عشان تسويلك سكسوووكة ... ثامر : لا ما ابي .. انا بخليه ديرتي .. احمد : والله انك غبي ... اكشخ شي السكسوووكة .. طيب سوي لك تفلة ع الاقل .. ثامر : لا مابي ... بندر بيسويها ... احمد : خلااااص يبا .. استسلم .. سوي اللي تبغاه .... سكتوا الاثنين شوي .. بعدين قال ثامر ...ثامر : تصدق ابوووي حسبها صح ...احمد : ليش..؟؟ ثامر : من يوم بدينا بالدوامات نادرا ما غازلنا ورحنا نرقم ... معجزة ..!!!!!احمد : خخخخخخخخ هذا اللي همك .. ثامر : والله العظيم ربي يشهد انه هالشي كان تفكيري انا وبندر 24 ساعة ف البيت بعد لجامعة .. من نطلع نروح مدارس الثانوية .. وبعد العصر الواجهة او نشوف لنا سوق من الاسواق ... احمد : شفت ابووك شلون يفكر زين .... ؟؟ كفووو اخوووي والله ..ثامر : اعصااابك يللي كلك ادب .. احمد : خخخخخ بس ما اوصل زيكم .. صح اغازل .. بس مو كل من هب ودب .. ثامر : يا سلااااااااام ... احمد : أي والله .. بس اللي تدخل مزاجي اغازلها .. بعدين ما الحقها واقط عليها الرقم انا .. شافني ما شفت خير زيك انت واخوك ..؟؟ لا يا بابا .. انا اذا عجبتني البنت .. اطلعها لين ما تنتبهلي .. واذا طالعتني .. اعطيها نظرة خطيرة كذا تذوووب قلبها وامشي عنها ... ولو لحقتني ولا طالعتني زيادة احقرها ولا كانها موجودة ..ثامر : اما...!؟!؟؟!؟؟! امحق مغازل بس..... احمد : خخخخخ مغازل الامراء .. ههههههههههههههثامر : هههههههههههه احمد : أي صح ... اليوم شفت وحدة ... ثامر عدل جلسته : ايووووووووووه .. ؟؟؟احمد : هههه بسم الله ... المهم .. انا داخل بيت ابو رائد .. دايم ادخله الظهر ومحد يكون موجود .. المهم دخلت ووقفت سيارتي ونزلت الملفات معاي ... ويوم توني جاي بدخل البيت الا اسمع صراخ وحدةمن وراي ... تجمدت .. ولله احرااااج... لفيت عليها وتصدق طالعتلي بملابسها العادية وشعرها المفتوح والمكياج وكل شي ... ثامر : اووووف اووووف .. عاد انت هنا قزيت البنت زين .... احمد : لاااا .. مدري ليش انحرجت ونزلت عيوني بالارض .. هي تتكلم وتهاوشني ليش ما انتبه انه يمكن يكون في ناس ف البيت .. وانا اسمع ومنزل راسي بالارض .. بعدين يوم شرحت لها اني كل يوم اجي ... سكتت وما ردت .. بس كانت للحين واقفة قدامي وما تحركت .. فرفعت راسي اشوف وش صار ع البنت .. الا واحصلها نازلة تطالع فيني من فوووق لتحت ... ثامر : ههههههاااااااي ... ذاااابت البنت .. أي عاااااد انت مسوي محترم ومؤدب قدامها .. اكيد بتخق ....!!!احمد : هههههه بس تبي الصرااااحة .. والله حلوة ... وحلووووة بقوووة بعد ... ثامر : ايوووه .. بعد بعد يالمؤدب يللي ما طالعتها ونزلت عيونك ف الارضاحمد : هههههه لا والله ما طالعت فيها كثير ..كم ثانية بس.. ثامر : ماشالللله ... بس..!؟!؟؟ انا بعلم عليك ابوووها .. احمد : هههههه روح علم .. بنته اللي جات وكلمتني ووقفت قدامي وهي كاشفة .. مو انا .. انا كنت ماشي في حال سبيلي وبدخل البيت ... !!!ثامر : هههه انزل انزل بس .. مو كاننا طولنا .. احمد : يللا

28 - 3 - 2014, 06:19 AM

روآيةة ججججميله سَبق وقريتهآ ~

يعطِيكك آلعَآففيه ~

ودّي ..

28 - 3 - 2014, 11:28 AM

يوم الثلاثاء .. باقي يومين ع العيد .. ))( الساعة 10 الصباح .. )الكل كان مشغول بتجهيزات العيد .. ملابس .. ذبيحة .. ترتيب البيت .. والضيافة .. وغيرها من هالشياء الضرووورية .. وبما ان الوقت يركض بسرعة .. اعطى ابو سعود وابو رائد اجازة لكل اللي يشتغلون عندهم .. وسكروا الشركتين ... (( بيت ابو سعود .. ))( الساعة 10 ونص )ابو سعود : يا سعوووووووووووود ... سعووووووووود .. جات لينا تركض : نايم يا بابا ... ابو سعود : للحين ما قام...؟؟؟ لينا : لأ ... لسه ... عصب ابو سعود وطلع لغرفة سعود ... ودخل وشال عنه الشرشف... ابو سعود : سعووود!!!! قوووم اشوف يللي ما تنعطى وجه ... قوووووووووووم ...!!!سعود بثقل : هممم .... شفيكم ..؟؟ شصاير....؟؟ ابو سعود معصب ومستعجل : مالت عليك من ولد ... قووووم جعلك ما نمت انشالله .. انا مو قايلك تقوم اليوم بدري عشان توروح معاي نجيب الذبايح ...؟؟ !!!! ها...؟؟ سعود قام ببطئ : يووووه ... نسيت والله يا يبا ... ابو سعود : نساك الهنا انشالله .... قوووم الحين .. معاك 5 دقايق وتكون تحت ف السيارة .. فهمت ..؟؟ والا والله ما يصير لك خير ... طلع ابو سعود من الغرفة وقام سعود بسرعة يلبس ملابسه .. وبعد 10 دقايق .. كان ابو سعود وولده على الطريق رايحين يشترون الذبايح___________________________________(( بيت ابو بندر ..))( الساعة 5 العصر )دانة : يماااااااا ... يللا عاد .. ام دانة : طيب اصبري بحط اغراضي ف الشنطة ... دانة :انتي ليش تطلعيهم اصلا ...؟؟!!ام دانة : يوووووه ... دانة انزلي تحت لاخلصت بنزلدانة : بسرررررررررررعةنزلت دانة بعبايتها تحت .. وقعدت تستنى امها لين ما تخلص لبس وترتيب شنطتها .. ويروحون يشترون الملابس والاغراض اللي يبغونها .. بندر : اوووخص .. وش عندك لابسة عباتك....؟؟ دانة : بنروح انا وامي السوووق ... وانت بتودينا بندر : صدق والله ..؟؟ توني ادري... دانة : أي والله ... امي قالت .. بندر : امري لله ... بس تدخلوني معاكم ...دانة : طيب ... نزلت ام دانة وطلعوا السوووق ... ___________________________________(( بيت ابو رائد ))( بعد ساعة )رجع رائد وابوه من صلاة المغرب .. وهم ف الطريق للبيت .. رائد : يبا عمي صالح ما بيعيد هنا...؟؟ ابو رائد : يا رائد عمك صالح الله يعينه ويصبره بس.. مسكين والله من مت عوض الله يرحمه وهو الفرح ما شافه .. ما تشوووفه ترك البلد من اول اجازة وطلع .. يبغى يغير جو هو وبنته وزوجته .. الله يصبرهم بس...!!!!رائد : يعني بيعيدون ف الامارات ....؟؟ابو رائد : أي .. احسنلهم والله .. خل ينسوون السالفة شوي .. ويوم وصلوا البيت .... ريم : صليتوواااا ......؟؟رائد : لأ .. رحنا الدسكو ورجعنا ...!!!!ريم : ها ها ها ما تضحك....!!رائد : مدري عنك يعني .. شايفتني رايح انا وابوي متوضيين .. وش رايحين نسوي ..؟؟ ريم : أي صح بابا ... ابو رائد : هلا بابا حبيبتي .... ريم : بابا انا بروح انا وماما الحين السووووق .. باقيلي كم غرض ومكياج ...ابو رائد : رووحي يا بابا .. ولا تخلين شي في خاطرك .. عندك فلوس ف الحساب ولا خلصت ...؟؟ ريم : باقي شوي .. ابو رائد بدون ما يتكلم طلع بطاقة ثانية من جيبه ومدها لها : خذي والباسوورد برسلك اياه بالجوال عشان رائد ما يعرفه .. رائد : ما احتااااج اصلا .. الله يخلي ابو بندر والشغل اللي عطاني اياااه جات ام رائد : فدييييييييييييييتك يا ولدي .. هذا الرجال ولا بلاااش ابو رائد : هههههه القرد بعين امه غزااال .. ريم : خخخخخخخخخخ ام رائد : لا والله .. اصلا ولدي ما شالله عليه .. كل بنات الدنيا يتمنووونه .. فديته والله طالع وسيم علي .. ابو رائد بنص عين : عليك انتي ..؟؟ متاكدة ...؟ام رائد : أي علي انا .. اجل طالع عليك ...؟؟؟ من وين ماخذ منك انشالله .. ابو رائد بغرووور : خشمه السيف هذا من وين جايبه غير مني يعني ..؟؟ انتي خشمك مو مستقيم .... !!!ام رائد : لا والله ... الحين انا خشمي مو مستقيم ...!؟!؟!؟رائد : خخ يا جماعة هدوا .. انتوا وراكم سوووق ... وانا وراي اسلم ابو بندر الحسابات عشان بنقفل اليوم الورشة ...ابو رائد : اجل روح من الحين .. خلص شغلك بدري ومر على الخياط شوووف وش صار على ثيابك وثيابي.... رائد : خلاص انشالله ... انا رايح تامروني بشي...؟؟الكل : سلامتك ... ___________________________________(( بيت ابو سعود ))( الساعة 8 بالليل )كانت دلع قاعدة في غرفتها ... يوم دخلت عليها لينا تركض ... دلع : بسم الله .. شوي شوي .. وش فيك..؟؟لينا : بسررررررررعة ... معك 3 دقايق وتكونين لابسة ... دلع باستغراب : لييييييش؟؟؟لينا : امي تقووول ... بسرررعة .. بنروح نشتري ملابس العيد .. دلع : مابي .. روحوا انتوا ... عندي ملابس كثيرة ما لبستها .. ماله داعي اشتري .. لينا سحبتها : قوومي بس بلا حركااااات ... يللا بسرعة .. لا تخلين امي تعصب علينا .. ترى والله اذا عصبت بيخرب علينا المشوار ... دلع غصب عنها : افففف ... طيب.. بس تعالي ...؟لينا عند الباب : نعم ..؟ دلع : مين بيروح معانا ..؟؟؟لينا : ها...؟؟ ما فهمت ...؟؟دلع : يعني سعود ولا سالم بيروحون معانا .... لينا نقزت من الفرح : محد يا حلوة .... وهذا احلى شي ... !!!دلع ابتسمت مجاملة : هههههههه أي صدق وناااسة .. يللا هذاني جاية . ..طلعت لينا من الغرفة ... ودلع غيرت ملابسها ... وطلعت معاهم ...___________________________________(( ف الامارات .... دبي .. ))( الساعة 10 بالليل )كانوا عائلة ابو اروى ف المطعم يتعشووون ويسولفوون ... ابو اروى : هاا.... منال .. ترجعون نعيد ف لاشرقية ولا نعيد هنا ... ام اوى : كيفك .. انا ما عندي مشكلة ..اروى : لا بابا .. نعيد هنا احسن .. مالي خلق ارجع هناااك .. زهق مرررة .. ام اروى : ليش تبغى ترجع ...؟؟ ابو اروى : انا ما ابغى ارجع .. بس يمكن انتوا ما تبغوا تعيدو الا مع اهلكم .. ها يا منى.. انا عشانك اسال .. لانك يمكن تبغي تعيدين على اهلك .. ام اروى : وش هالكلام يابو اروى انت واروى اهلي .. وبعدين انا مستانسة هنا .. واذا بتقعدون بقعد معاكم .. واذا بترجعون بعد برجع معاكم ...ابو اروى ابتسم : فديتك والله .. دومك تعرفين الاصووول .. بس زين طمنتيني لاني كنت خايف احرمك العيد مع اهلك ... اروى : يبا .. نبغى نغير .. صارلنا حوالي 4 ايام ف دبي ...ابو اروى : وين تروحون يعني ...؟؟اروى : ابو ظبي .. او العين .. ابو اروى شرايك يا منى؟؟ام اروى : اللي تشوفونه ..

28 - 3 - 2014, 11:29 AM

نهاية الجزء التاسع .. وش تتوقعون بيصير ف العيد .. ؟؟ هل بيمر عااادي .. ولا بيكون هناك احداث...؟؟ بندر والقضية ...؟؟رائد ودانة وآخر التطورات ..؟؟سمر ولينا....؟؟ وفيصل وش صاار عليه ..؟؟

28 - 3 - 2014, 11:29 AM

الجزء العاشر :.الاياام تركض .. وابطال قصتنا (منهمكين)<< هالكلمة متعووب عليها خخخخخبالشغل والتجهيزات للعيد .. اما دانة فكان الشغل مضاعف .. لانه ملكتها بعد العيد باسبوعين ... اما بيت ابو سعود .. فكان الهدوء مخيم ع الجو .. لانه الكل مشغول ومو فاضي حق المشاكل والمشاحنات .... (( اول ايام عيد الاضحى ... بيت ابو رائد ))( الساعة 12 الظهر )من الصباح وبيت ابو رائد بدت فيه الزحمة .. الناس والمعارف اللي جوا من كل مكان عشان يعيدون على ابو رائد .. وهذا غير ربع رائد اللي ما يخلصوووون ... مبارك : كل عام وانت بخير.. رائد : هلا والله مبارك الله يبارك فيك .. مبارك : وينك يا رجال...؟؟ قطعتنا بالمرة .. ما سمعنا صوتك ولا شفنلك من زماااااااان .. رائد : تعرف الشغل .. والدوام .. والحين انا خطبت وملكتي بعد اسبوعين انشالله .. مبارك ما عجبه الوضع : افاااا.. خطبت ..؟؟ ليش...؟؟ هذا وانت تقول ماني متزوج قبل ما اصك الثلاثين.. !!!!!!رائد : ههههه كلام طيش.. مبارك يطنز : والحين انت مسوي فيه عاقل وفاهم..؟؟رائد يمشيها له لانه ضيف : أي اكيد .. وش بقى ..؟؟ اشتغلت وبتزوج قريب انشالله .. خلاص لازم استقر وامشي مستقيم .. مبارك لصديقه اللي جنبه : افااااااا ... خلااص .. راح الرجال ..رائد : هههه أي راااح ؟؟ ياخي هذاني موجود بس بكون اكثر مسؤوولية شوي ... شوي الا تدخل سيارة ثامر وكان راكب حنبه بندر .. واو ما شافهم رائد فرح .. لانه حصل شي يفكه من الرجال الغثة الي نشبله .. هو ما صدق يفتك منهم .. يجووون له الحين؟؟نزل ثامر يعدل ثووبه : السلااااااااام عليكم راح رائد يسلم عليه : هلا والله وعليكم السلام ... ثامر : كل عام وانت بخير.... رائد : وانت بخير .. ش هالكشخة يا شيخ ...؟؟ غطيت علينا ..!؟؟!ثامر بخقة وهو يرمي شماغه لورى ظهره : أي والله .. تدري الدنيا عيد .. لازم نكون شوي رزة ... بندر : تكفى لاتمدحه .. نافخ خشمه علينا من الصباااح .. راح رائد يسلم على بندر : هههه خليه يضحك على نفسه شوي .. بندر : ههههه كل عام وانت بخير ... رائد : وانت بخير وصحة وسلامة ... من العايدين الفايزين انشالله ... ثامر : افففف .. كل هالزحمة بس ف الحوووش .. اجل داخل البيت وشلووون ..؟؟رائد : ههههه قول ما شالله ....ثامر : ما قلنا شي ما شالله .. عن تاكلنا بس .. المهم وين عمي وابو عوض ..؟؟رائد :ابو عوض مسافر ... ف الامارات مع العائلة .. بندر : افاا...!! ما بيعيد هنا...؟؟ ليش...؟؟ رائد : خلها على الله يا بندر .. الجرال مو طايق البلد والبيت من بعد موت عوض الله يرحمه .. تدري بعد ما مر على موت عوض الا شهر او اقل بعد ثامر :والله العظيم يا رائد .. ما قد زعلت على احد قد ما زعلت على عوض .. والله كان رجال بمعنى الكلمة .. واعي فزعو ونشمي زي ما يقولون اخواننا .. رائد : هههههه من اخواننا ...؟؟بندر : واحد من قبيلة الفلان الفلاني في صحراء الربع الخالي خخخخخخ رائد : خخخ تعجبني والللللله ......!!!بندر : ههه تسلم .. المهم .. نبغى نسلم على عمي... رائد : حياكم ... راحوا بندر وثامر وسلموا على ابو رائد وقعدوا معاه شوي .. وبعدين استاذنوا وراحوا يعيدون على باقي معارفهم واقاربهم ... ___________________________________(( بيت ابو سعود ))( بعد ربع ساعة )بيت ابو سعود ما كان وضعه مختلف مرة عن بيت ابو رائد .. البيت كان مليان ناس ومعارف واصحاب ابوسعود وحريم ام سعووود .. والكل ف البيت كان واقف على قد وساق زي ما يقولون .. حتى دلع اللي قررت بينها وبين نفسها تستانس ف العيد وتنسى هموومها لـ 3 ايام ع الاقل .. لانها صدق تبغى ترتاح شوي .. عشان كذا .. جهزت نفسها للعيد تحهيز كامل .. ملابس واغراض ومكياج وكله على حساب ابو سعود اللي ما بخل عليها بشي .. وكان دايم يوصيها اذا بغت شي تقوله .... وهذا الشي ساعد نفستها عشان تتحسن كان ف المطبخ تشوف الخدامات وش يسوون ... دلع : يا ميري... ميري : نأم ............؟؟دلع : تقول ماما باسمة ودي زيادة فناجين قهوة ... وطلعيلي ودلتين عشان اصب فيهم القهوةميري : تيب ... طلعت ميري الصينية وحطت عليها فناجين .. وطلعت دلتين حق دلع اللي كانت تسوي القهوة ... دلع ابتسمت : شكرا .. خلاص روحي كملي شغلك انا بوديها ..ميري : تيب ماما ... اخذت دلع الصينية وجات بتطلع من المطبخ الا بصوت من عند الباب الخارجي يقول : سووا زيادة قهوة ..........!!!التفتت دلع وشافت سعود واقف وماسك جواله يقلب فيه والظاهر انه ما نتبه لها .. ويوم حس انه مافي رد دخل المطبخ .....سعوود : يا ميــــ.........انقطع كلامه يوم شاف دلع .. كانت لابسة تنورة قصيرة بيضا وعليها نقش بالاخضر .. وبلوزة خضرا حلوة وناعمة .. وكانت فاتحة شعرها وحاطة مكياج .. سعود : ا..... سوري ما دريت انك هنا.. دلع حطت الصينية على الطاولة : ناقصكم قهوة...؟؟ سعود استغرب من معاملة دلع : ا.... أي لو سمحتيابتسمت دلع : خذ هذي وان بسوي ثنتين زيادة ... سعود مستغرب : ا ...ا .. لا خلاص عادي .. خلي ميري تسوي ثنتين وهذي وديها ..دلع : اقولك خذ هذي بدون نقاش يللا .. انا بسوي زيادة .. سكت سعود وشال الصينية ... لدقيقة حس انه انسان مجنوووون ... او مهستر .. دلع : شفيك واقف...؟؟ روووح الناس ينتظرووون سعود انتبه لعمره انه ماتحرك وللحين واقف بالمطبخ : ا... طيب شكرا طلع سعود من المطبخ وهو متلخبط من فوق لتحت ... اما دلع فرجعت سوت لها قهوة وودتها للحريم .. ___________________________________(( بيت الجدة مزنة ))( الساعة 6 المغرب )مزنة : يا مها ... خلاص عاااد يكفي مناقز يمين يسار .... اقعدي مكانك...!!!مها : يما يا حبيبتي .. الدنيا عيد .. مزنة : عيد ..؟؟ ادري ان الدنيا عيد شايفتني مجنووونة ..؟؟ انا ما قلت لك لا تفرحين .. اقولك اهجدي شوي .. بسك يمين يسار .. من الصباح رايحة جاية مها : يا يما والله مستااانسة والجمعة حلووووة مزنة عصبت : قسم بالله يا تقعدين زي باقي البنات العاقلين يا والله بذبحك .. مها تضحك : ههههههه طيب خلاااص .. ولا تزعلين يا قمر .. راحت مها وقعدت مع خواتها وبنات خالتها الثانيات .. ( مها ... بنت خالة دانة .. عمرها 19 سنة هبلة .. وماتوزن كلامها .. وتعتبر انها احسن وحدة ف الدنيا ومحد قدها .. وان الكل اصغر منها .. وما تسمع كلام احد .. كلمتها لازم تمشي .. هذا غير انها تجرح الناس بكلمات بسيطة وتقول انها ما سوت شي ) قعدت جنب اختها سهى.. سهى : اعقلي يا ماما ... شوفي انس شلون قاعدين بادب .. ما غير انتي اللي تناقزين ...... مها : كيفيييي... انتي وش عليك..؟؟ اقول .. وين زوجك عنك خليه يجي يضفك عن وجهي .... !!!!سهى : !!!!!! قاعدة في بيتك انا..؟؟ يا ماما انا قاعدة في بيت اهلي .. متى ما بغيت اطلع بطلع .... مها : شوووف .... متهاوشة مع زوجك يعني ..؟؟ سهى : اعووذ بالله ... الله لايقووول ياا حمارة لاتفاولين علينا .... مها : هههههه خلاص اعصابك اعصابك ... ( سهى اخت مها .. عمرها 26 سنة .. متزوجة عبدالعزيز .. صارلها سنتين .. وعندها ولد اسمه فارس .. ).......: خلاص عااد وخري عن اختك .. خلصتي من امي جيتي لسهى ..؟!؟!التفت مها بضيق لخلود بنت خالتها اللي اصغر منها بسنتين ... مها : انتي من كلمك ..؟؟ اختي وانا حرة .. وبعدين جدتي مستانسة علي .. ومحد طلب فزعتك فاهمة ..؟؟؟ خلود بخقة : استغفرالله ... صراحة احس بمعاناة اختك .. لو وحدة زيك تج كذا تكلمني والله لا اعطيها كف .......!!!!!دانة : ههههه هدي يا آلاء .. البنت تمزح مع اختها ما صار شي ... خلود : انا اقووول رأيي لااكثر مها بقهر : ومجد طلب رايك .. خلي رايك لامك الحقيقية فاهمة ..؟؟ هي اولى فيه ..؟؟ كل من ف المجلس سكت .. يوم طلعت خلود والدمعة بعيووونها .... دانة بعتب : الله يهديك يا مها ماكان لازم تقولين لها كذا ... مها : هي اللي مصختها .. الحين مين دخلها ف السالفة دانة : انتي حاقرتها وخليتها بروحها محد يسولف معاها ولا شي .. بعدين ما كانلازم تجرحينها كذا قدامنا ....مها : احسن .. خليها تحس بالقهر اللي احس فيه لما اشووووفها دانة فتحت عيونها ع الاخير وقامت تاشر لمها انه اخت خلود الصغيرة موجودة معاهم .. وتسمع الكلام .. مها : عهود يا قلبي .. معليش تروحين تجيبين موووية .....؟؟عهود ( 15 سنة ) قامت : قولي انك تبغيني اطلع وبطلع .. اصلا انا ما اقعد مع ناس يهينون اختي .. والمشكلة انهم ما شافوا نفسهم اول ... !!!مها قامت تقلدها وتتطنز ... اما عهود فطلعت تقعد مع امها والحريم ابركلها من القعدة مع مها ولسانها الطويل .. ( ف الحوش )كانت خلود قاعدة على الدرج وتمسح دموعها وتحاول توقف صياااح ... هي كل ما تجي هالبيت تسمع كلام التجريح والتنقيص ... ( خلود .. 19 سنة .. تدرس في جامعة فيصل برمجة ونظم معلومات على الكمبيوتر .. حبوووبة وطيبة مررررة .. وناعمة .. بيضا وشعرها لكتوفها اسود ونااعم .. مرة نحيفة .. وعيونها خضرا ..وطولها حلو ... حساااسة مرررة .. وتنجرح بسرعة .. خلود عاشت مع امها وابوها .. بس امها ما كانت مهتمة بسالفة الامووومة مرة .. عشان كذا تطلقت من ابوها وابوها تزوج خالة دانة .. بدرية .. وجاب منها عهوود اللي صارت تحب خلود وتعتبرها اختها من امها .. )حست بكره شديد لامها .. اللي ما جابت لها خير في هالدنيا .. تركتها وهي صغيرة وراحت تزوجت واحد ثاني اغنى من ابوها .. خلتها بروحها وراحت .. قامت بقهر واخذت اقرب صندل عند الباب وحذفته بكل قهر وهي مسكرة عيوونها ....................: آآآآآآآآآآآآآآآآآآآآآآآآآيــــــــــــــــــــــــ ــــــــــفتحت عيونها الثنتين ع الاخير .. وشافت واحد واقف قدامها .. لابس ثوب وشماغ طايح ع الارض .. وماسك راسه من الالم ...حطت يدينها على فمها تلقائيا : اوووه ... آسفة .. لف الرجال عليها .. بس ما عرفها .. وقرب زيادة وهي خافت ورجعت على ورى شوي .. بندر : ا ... انتي عهود ولا مها ...؟؟ خلود بخجل واضح من اللي سوته : لا... انا خلود .. بندر يحك راسه بالم ويبتسم : والنعم والله ... بس .. حشى موب يد .. خلود انحرجت مرة وكان خاطرها تشرد في اي لحظة بس الطريق الوحيد للبيت كان من قدام بندر ..........بندر : ما شالله .. صايرة حرمة والله ... كبرتي .. خلود : ا .. أي .. حتى انت .. بندر : خخخ اتحدى تعرفيني حتى ... انتي اصلا ما تعرفيني .. ولاقد يوم شفتينيخلود رفعت حاجب : ليش انت مو ثامر .....؟بندر : ههههاااااااااااي ضحكتيني .. لا يا حلوة انا مو ثامر ... معاك بندر .. اخو ثامر التوأم .. الكبير طبعا ... خلود : ا... طيب تشرفنا .. انا لازم ادخل الحين .. جات بتمشي خلود الا بندر يمسك يدها بسرعة ..... حست بيدها تجمدت .. وحست لسانها انعقد .. بندر : لحظة ... !!!!لفت عليه باستغراب وخوف....... بندر : هههه وش فيه وجهك صار اصفر ...؟؟ لاتخافين والله ما باكلك .. بس بغيت اقولك انه حتى انا تشرفت بمعرفتك ...... ضحكت خلود على غبااااء بندر ... وسحبت يدها وركضت بسرعة للبيت وقلبها يدق مرررة .. اما بندر فكانت كم دقيقة كافية انه تخلي عقله يطير...

28 - 3 - 2014, 11:30 AM

(( ثاني ايام عيد الاضحى .. بيت ابو سعود ))( الساعة 2 الظهر )في ثاني يوم عيد .. جو حريم وصديقات باسمة اللي ما قدروا يجون اول يوم .. وقعدوا يسولفون ويحشون في خلق الله ..... وبين المعازيم كان في وحدة ملقووووفة مرة وتحب تصير خطابة .. ويوم شافت دلع نازلة بفستان وردي ناعم وعليه شريطة بيضا من الوسط .... الحرمة : يا ام سعووودام سعوود : سمي .. الحرمة : ماشالله على دلع كبرت وصارت حرمة ماشالله .. ما فكرتي تزوجينها ...؟؟؟دلع انصدمت وتجمدت ملامحها ..... ام سعود تصرف : هههه الله يهديك لسة ما جاها نصيبها اللي يناسبها والله ... وبدوا الحريم ...وحدة : انا اعرف لك ام فلان قالت مرة قدامنا انها تبغى وحدة كذا صغيرة وحلوة واخلاق .. شرايك اقوولها ...؟؟الثانية : لااا .... ان ابغاها لولد اختي .. والله ما شالله عليه .. شغل ومسؤوولية ويقدر يدير باله عليها ...!!!!!الثالثة : اسكتوا واللي يعافيكم .... دلع ماهال االا ولدي علي....!!!!الرابعة : .................................................. ..............................وقعدوا الحريم يتكلمون عن هالموضوع وام سعود ساكتة ومو عارفة وش ترد عليهم .. ودلع شالت نفسها وطلعت الحوش على طول ... مستغلة فرصة انه بو سعود طلع مع سالم وسعود من شوي يعيدون على واحد مريض ف المستشفى ... قعدت على الكراسي الموجودة ف الحوش تفكر .. دلع " ياترى .. انا في يوم بتزوج؟؟ .. ولا هالشي مو ممكن ..؟؟ بس .. ا.. انا وش ذنبي .. الله يسامحك يا سعود بس على اللي سويته فيني .. يالتيك حسيت بغلطتك وكبرها قبل لاتسويها .. كانا انا الحين بخير .. وبسعادة .... !!! "شوي الا يدخل فيصل الحوش ... ويشوفها قاعدة .... وبحكم انه دلع لابسة قصير .. ماعرفت وش تسوي ..؟؟ تدخل ولا تقعد عاادي خصوصا انها للي دخل مو شخص غريب ... و ف النهاية حست انها تحتاج احد يقعد معاها شوي عشان كذا ما تحركت ...تقدم فيصل وهو لابس نظارته الشمسية وثوبه وشماغه : السلااااااااام .... دلع : وعليكم السلاااام ... وش هالكشخة ..؟؟ قلنا امس لانه اول يوم لازم تكشخ ... بس اليوم ليش...؟؟ فيصل قعد ع الكرسي اللي جنبها : والله العيد لسه ما خلص ... وللحين الفرحة فيني .. خليني عايش جو ...... دلع : ههههه شخبار خواتك ..؟؟ فيصل فصخ نظارته : بخير الحمدلله ... امس ابوي وداهم الملاهي عشان يلعبون شوي .. والحمدلله استانسوا مرة ... دلع : الحمدلله ..... ونسايم ...؟؟ فيصل : مم ... عادي .. فرحانة لفرحتنا .. بس تعرفين زعلانة شوي لانها ما شافت اهلها من زمااان ... اكيد بتحط بخاطرها .. بس ع العمووم ماهي راضية تبين هالشي .. دلع بحزن : الله يعينها يارب ويرحمها ابوووك شوي فيصل باستنكار : ابوي يرحم ..؟!؟!؟! خخخخ ماعرفتي ابووي والله .. دلع : انت لاتقول كذا .. ادعي ربك يهديه .. شوي الا تطلع لينا تدور دلع .. وكانت فستان اسود ضيق وقصير .. وفقاتحة شعرها اللي طول شوي .. وحاطة كحل وروج احمر فاقع .... لينا : دلــــــــــــــــــ.... سكتت شوي يوم شافت سالم موجودة وهي طالعة كذا ..دلع : هههههه تعالي محد غريب.... استحت لينا لانها طالعة كذا ووقفت مكانها متصنمة : ا....ا ..... دلع باستغراب : شفيك يا بنت...؟؟ اقولك تعالي اقعدي ...فيصل : ههههه شايفة جني شكلها .. اشّرت لينا بنعوومة على فيصل متفاجأة : هذا انت ..؟؟ والله متغير شكلك .. فيصل : ههههههههههههه حلو صح ..؟؟ لينا فصخت الحيا وقربت تقرص خدوووده : يا قلبووووووووووووووووس ... والله تزنن ..!!!!!دلع متفاجأة : خخخخخخ يا بنت عيب ... وين الحيا اللي من شوي .. ؟؟؟ لينا قعدت وحطت رجل على رجل قدام فيصل ... فيصل طالعها من فوق لتحت : نعم ..؟؟ مين الاخت الكريمة ..؟؟ لينا ماسكة عمرها عن تطيح بالارض : مم .. معجبة .. فيصل : فديت المعجبااات انا ... سكتوا الثنتين وفتحوا عيونهم ع الاخير ... دلع تصارخ : هيييييي .... هي انت .. عسى ما شر ..؟؟ لاتخليني اطلعك برى ... ترى سالم مو موجود ... فيصل : خلاص خلاص .. توبة توبة ... بس كنت ابدي رأيي ... لا اكثرلينا صار وجهها احمممممممممممممر ... دلع : مرة ثانية رأيك حطه بقلبك .. لينا عصبت : خلااااص عاااد .. ما تسوى ع الولد قال رأيه ... بعدين ليش محترة ..؟؟ امدحها تكفى فيصل عشان تفكنا وتسكت....!!!!فيصل : خخخخخخخ لا مافي .. الغزل بس للحلوين ....!!!!!!!!!!!!لينا شوي ويغمى عليها ... اول مرة احد يمدحها كذا.. وخصوصا انه واحد كاشخ ع الاخير وصاير مرة حلوووووو.... وقفت دلع : قوم اشووووووف فيصل : هههه شفيها هذي ..؟؟دلع : قووووووووم فيصل : ليش.....؟؟؟ دلع سحبتها من يده وقومتها .... ودفته للباب ... دلع : لما يجي سالم بقوله يتصل فيك عشان تجي .. انا بدون سالم ما تجي طيب..؟؟ فيصل : افاااا طردة ..؟!؟!دلع : طردة ونص بعد .. اجل قاعد تغازل اختي قدامي ..؟؟ انا الغلطانة اللي خليتها تطلع قدامك كذاااا ... فيصل : غيرااانة ..؟؟؟دلع : مااااااااالت عليييييييييك انت وياها .... يللا برى .. لما تتعلم كيف تتكلم بخليك تدخل ... فيصل : آخر كلااااااام ...؟؟دلع : ههه أي آخر كلام ....... فيصل مسوي زعلان: طيب يا دلع ... حسابك جاي انشالله .. اجل انا انطرد من بيت ابوي هااا ...؟؟ دلع تدفه للباب : بيت ابوك في حي ( ..... ) ... يللا روح طلع فيصل ورجعت دلع تضحك وقعدت على الكرسي ..... تخز فلينا .. لينا تنرفزت : ليش تطالعيني كذااا ...؟؟دلع رافعة حاجب : لا والللللله .. مسوية بريئة انتي بعد ......؟؟؟لينا : حرام عليك والله ما سويت شي .. بعدين ترى كان يمزح ...دلع : يمزح ..؟؟ مجد يمزح بهالطريقة .. لاتعلم شلون يمزح زي الناس خليته يدخل .. لينا : خخخخخخ اللي يقول بيسمع كلامك الحين ... والله لايدخل غصب عنك وعني .. دلع : يجرب ويشوف وش بيصير له ههههه .. انا اوريه ... سكتوا الثنتين شوي ... لينا : دلعدلع : ها.......؟؟لينا : مو كانه صاير حلووووو ؟؟؟؟دلع : طبيعي صار رجال .. بدى يحلى الحين .. اصبري عليه سنتين .. او ثلاثة ويصير يجنن ... سرحت لينا تفكر شلون بيصير بعد كم سنة .... دلع قامت : هههههههه مالت عليك انتي وياه .. اشف قمنا نحب ونعجب بعد .. ؟؟!!لينا : انقلعيييييييييي ....!!! ما تنعطين وجه ... انا الغلطانة اكلمك دخلت دلع داخل وخلت لينا برى تفكر وتسرح على كيفها .... ___________________________________

المواضيع المتشابهه لموضوع: روايه ودك تنامين نامي لموضوع: روايه ودك تنامين نامي
الموضوع	كاتب الموضوع	المنتدى	مشاركات	آخر مشاركة
يمد لي يده وامد له روحي	حنين الأشواق	همس عالم حواء	5	8 - 11 - 2023 03:30 PM
نامي بصدري	نجمة الليل	همس الشعر والقوافي	6	25 - 3 - 2023 05:41 AM
والي خلق دم بعالي السموات	النورسيه	همس الشعر والقوافي	4	28 - 11 - 2020 04:08 PM
والد المعاصي	شيخة الزين	نفحات اسلاميه	6	10 - 5 - 2019 09:10 PM
روايه روحي لك وحدك للكاتبه ريم الحجر روايه رائعه لا تفوتكم	جروح الم	همس للقصص وحكايات وروايات	81	8 - 6 - 2018 01:02 PM

الذين يشاهدون محتوى الموضوع الآن : 8 ( الأعضاء 0 والزوار 8)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع