هو الحب يا عمري شويه - الصفحة 8

11 - 7 - 2014, 11:50 AM

الجوهرة : شتقول خالتي !
ريم: ولا شيء تقول تعالي تغدي في بيتنا بعدين .. لان امي عندها .. بيتجين وياي !
الجوهرة : لا لا مستحيل اليوم امي مسوية هريس ! واااي احبة !!
هيا : انا معزومه عند اموول اليوم .. من زمان ما شفتها
ريم: هههههه حق المتن .. لا لا انا مسويه رجيم ..
الجوهرة : لا تحاولين بالحالتين مو حلوة .. اقول وصلنا خل ننزل !
ريم: شوفو كل وحدة فينا تاخذ غربة عشان نخلص بسرعه
الجوهرة : اوك انا باروح حق الشيبس والايس كريم..
ريم: وانا العاصير والبيبسي ..
هيا: انا باخذ حلويات .. ..
الجوهرة: والله جنا مو شايفين خير !
ريم: ههههههه ليش احنا كل يوم نجي الجمعية !
الجوهرة: الحمد لله والشكر ! والله نفشل ..
---------------------
كانت قاعدة في غرفتها وتتصفح الالبوم .. البوم قديم اخر مره فتحته يوم العزا .. ما تدري ليش صايرة تتذكر الموضوع بستمرار .. تحبس الدمعه وما تبي تحسس احد بمشاعرها .. وينج يا يمه والله اني اشتقت لج .. اه اصعب احساس يوم تفقد حد من هلك ام كان ولا ابو .. احساس صعب .. ! بدت تشوف صورها وهي صغيرة والدمعه ماليه عينها .. وابوها المسكين من يوم وفاه امها وهو متغير .. متغير وايد ! مو هو ابوي الي اعرفة.. كأن شايل هموم الدنيا كلها على راسها .. الله يخليك لي يا يبة .!
اخ وينج يا امي .. والله اني اشتقت لج .. ليش تركتيني . " وكملت صياحها .. "
اشوف الكل ويا امه في الاعياد في المناسبات في الجمعات الا احنا .. صحيح انهم يعاملونا زين واحسن من الاول بس .. بس انا عارفه ان هاي كله شفقة .. اي نعم شفقة .. شفقة وبس ! يا رب خل لنا ابوي .. وعطة الصحة احنا من غيرة ما نسوى شيء .. خصوصا بعد وفاه امي . انا باروح ثالث ، احس اني محتاجة لحضن . محتاجة لحد يخفف علي صعوبة هالايام الجاية ، يا رب !!
كملت صياحها على السرير لين ما جاتها النودة ورقدت وهي مو حاسة بشيء لا بألم ولا بحرقة ولا بشى .. غطت بنوم عميق لدرجة ان لما امل حاولت تقومها عشان يطلعون ما قامت ، ويوم ابوها قومها للعشا ما قامت بعد .
الكل حس ان فيها شيء غريب حتى الجدة ، بس فضلوا انها تقعد بروحا هالمشاعر ممكن تقل بيوم من الايام بس مستحيل تخافي
ما في شيء اغلى في العالم من الام والااب .. أدري ان العيال غالين بس .. الصراحة ما أدري في اعتقادي لحد الحين ان الام والاب اغلى يوم اجرب يكون لي عيال بارد لكم خبر !
تشوف الالبوم وتتذكر مناسبة كل صورة .. كل صورة لها قصة شكل ، ام العنود وأمل كانت تحب التصوير عشان جي كانت تصور وايد ، وكل وحدة من البنات لها البوم خاص فيها .
----------------
كان لاهي بالشغل ، الشغل تضاعف هاليومين خصوصا ان خالد صاير ما يداوم كثير وإذا داوم اغلب وقته يقضية بالمصانع .. اخ بس متى يرجع جاسم يمسك جزء من الشغل نفس قبل .. جاسم بعد ما رجع من لندن فضل انه ياخذ فترة اجازة واشيك على شركه لندن مع ال

11 - 7 - 2014, 11:50 AM

كان لاهي بالشغل ، الشغل تضاعف هاليومين خصوصا ان خالد صاير ما يداوم كثير وإذا داوم اغلب وقته يقضية بالمصانع .. اخ بس متى يرجع جاسم يمسك جزء من الشغل نفس قبل .. جاسم بعد ما رجع من لندن فضل انه ياخذ فترة اجازة واشيك على شركه لندن مع المدير الجديد من البيت .. على اساس انه مستعد اذا في اي اخطاء ولا حاجة .. بس لان المدير الجديد من العايله فلازم حد منهك يروح على الاقل في السنه مرتين او ثلاث يشيك الحسابات .. وأي قرار يتأخذ في الشكره لازم تكون بموافقة احد الشركاء الي بالدوحة ..
(( الله يهداه خلود وينه هذا .. وراشد بعد ما داوم اليوم .. لا حول ولا قوه الا بالله ... )) قام من المكتب عشان يروح مقر شغله الرئيسي .. الشغل كان موزع بين افراد العايله .. جاسم وخالد ماسكين الشركات الخارجية دوامهم الاساسي بالدحة بس بين كل فترة لازم يروحون يشيكون على الشركات ، وخالد الحين في مصر على فكرة .. طلال ماسك فرع السد .. وابو عبدالله وراشد ماسكين الفرع الرئيسي اما خالد فمسؤول عن المصانع .. كان معصب على حسابات مجدي لانها كلها غلط لا ويبيني اوقع عليها بعد .. هذا لازم يتحول للتحقيق وكل الملفات تتاجع .. كل شيء غلط .. انا اشلون كنت احياننا اوقع من غير لا اقرى .. الظاهر اني في ورطه كبيرة !!
جات السكرتيرة بعد ما ضغط على الانتركم ..
- شنو استاز
- مايا .. ابيج تنادين المحامي ، ومدير الحسابات ، وعمر " مدير شؤون الموظفين" ، وصالح
- في مسج معين بدي أولو
- لا بس قولي لهم اني طالبهم ضروري .. وانتي لازم تحظرين
- اوك ..
رن جواله اول ما طلعت السكرتيرة .. شاف المتصل رقم غريب اول مرة يشوفة بس من فتح الخط عرف انه في ايطاليا .. تذكر ان دانه وجاسم هناك .. خاف ليكون صاير شيء قوي رد والخوف مالي قلبة .
- hello
- هلااااااا بولد اخوي .. يا خطير هلو بعد .. الله يرحم ايام اول يوم انجليزيتك مكسرة
- هههههههه اما انجليزيتي مكسرة انت عبالك دارس بالهند .. تراني كنت وياك !
- وانت ما تخليني انسى هالمرحله المشؤومه من حياتي !
- الا اقول .. ليش ما تتصل من جوالك
- ضاع " طبعا ما قاله على الحقيقة " ، انا الحين اتصل من الفندق الي في روما
- دام وصلتوا روما معناته راح ترجعون قريب
- جاسم المفروض باجر طيارتنا .. بس مفكر اروح لبنان !
- ليش صاير شيء !
- قبل لا اتصل فيك كلمت خليفة وقالي ان في مشاكل كبيرة مع الفرع المصري .. وانت لا تنسى ضروري اروح لبنان نهاية الشهر على اساس محتاجين موضفين .. وهلامور لازم بنفسي اشرف عليها ..
- بس باقي على نهية الشهر !
- خليفة حتمال ينقل مدير الفرع بلبنان حق مصر .. لان فرع لبنان ماشي تمام بعكس مصر . بس ما له داعي نسبق الاحداث !
- اها .. ومتى الرجعه ان شاء الله ..

11 - 7 - 2014, 11:51 AM

- ما راح اطول بلبنان 4 ايام يمكن ، وخليت طيارتي اليوم بعد ساعتين تقريبا !
- اي .. تروحون وتردون بالسلامه .. الا شلونها خالتي !
- لو سمعتك الحين بتعصب
- هههههه داري انا ابي احرها بالعماله .. ليش هي مو جنبك ! صار لها يومين جدتي تدق عليها وجوالها مشغول ما ادري مسكر شيء جي
- اي اي ضايع بعد ..
- انتوا شسالفتكم مع الجواويل كل شيء ضايع .. اخاف انتو تضيعون بعد
- خخ ما يضحك .. كاهي خالتك ..
دانه : طلوووووول انت ما تستحي كم مرة اقولك لا تقولي خالتي .. تحسسني بأني عيوز .. انا اصغر منك ترى !
طلال : هههههه انتي الله يهداج الي تبين تصغرين نفسك بالغصب .. الا شسالفه جوالج يقولون ضايع !
دانه " لفت على جاسم مستغربة ": جوالي ضايع !
جاسم" هاي الي بتفضحنا .. اشر لها بيدة يعني انا الي قلت جي "
دانه: اي اي ما ادري انسرق !
طلال: اها .. المهم اشلونج حبيبتي .. عشاج مرتاحة
دانه: الحمد لله
طلال: دودو دقي على يدتي .. كالنت تحاتيج لان ما تردين ع الجوال
دانه/: كان جوالها مشغول فكلمت خليفة عشان يطمنها علي !
طلال: يله عيل باي حبيبتي اشوفج بعد اربع ايام ..
دانه: باي فديتك !
سكرت الخط واتفتت صوبة الي كان يطالعها ويتصنع العصبية !
- ليش تتفدينه ..
دانه: مو ولد اختي .. ومثل اخوي
جاسم: بس بعد انا اغار !
دانه: كيفك غار .. (( ولفت وياها وهي تبتسم .. اما هو فجد انقهر ))
جاسم (( دواك محد قالك تسوي نفسك جميل بثينه .. )): هاي بدال ما تراضيني
دانه " اووه وش اقوله هذا .. والله احراج .. لا دانو خلاص قوي قلبج": يا قلبي انت مستحيل تزعل مني .. انت تحبني (( ورمشت بعيونها بسرعه تتصنع الدلع ..))
جاسم " فديتها تجنن .. بس لازم اسوي نفسي ثقيل " : وععع ما يليق !
دانه " احترت من قلب " /: انت وبعدين معاك .. يله روح حاسب الهوتيل .. وقول لهم ياخذون اغراضنا .. مب لازم نروح المطار !
جاسم " تستاهل .. حد قالم ترد جي .. بس والله احب اتهاوش وياها .. اتجنن في جميع الحالات " : ان شاء الله عمتي !
ضحكت عليه وهو يمثل الخضوع المطلق .. لا وطالع من الغرفه وهو منزل راسه يا بلفيت حاس بالذنب .. نسدحت على السرير وهي تفكر من كان يصدق ان كل هاي بيصير .. لو حد قالي هالسالفه العام جان تهاوشت وياه .. معقوله انا وجاسم توصل العلاقه بينا لكذا .. الله لا يغير علينا .. والله بديت ارتاح معاه .. شكله طيب غير عن الصورة الي كنت راسمتها له

11 - 7 - 2014, 11:52 AM

طلع من المصنع قبل لا يخلص الدوام .. حس انه بيختنق خلاص زهق من الشغل .. كان يناظر الساعه وينتظر الساعه تجي 3 بفارغ الصبر ، فتتح النت في الشغل وما كانت داخله .. ما عرف شيسوي .. ما حب يروح الفرع الرئيسي لانه اكيد راح ينزف من قبل ابوه ولا عمه .. وحتى طلال لانه ماسك الشغل كامل هالايام ..
لقى السيارة تودية بطريق البيت .. فقرر انه يزور جدته .. حتى الجمعه هالاسبوع ما راح لها .. كان معزوم على الغدا بالميلس .. ولا قدر يمر عليها بالليل !
خالد(( مو مشكله اضيع ساعتين هني واروح البيت بعدين عشانها .. )) : السلام عليكم
نروح حق امل الي كانت قاعدة بالصاله على المنتدى ، تنتظرة متى يدخل .. امس يوم قالها نتلاقى الساعه ثلاث بغت اتقوله لا خل نتلاقي قبل .. بس تذكرت شغله ، وانه صار له فترة طويله يا ما يداوم يا يتاخر ! اكيد راح يسونله سالفه .. سمعت صوت ولد عمها وهو يسلم خلت الابتوب بالصاله وركضت تنادي جدتها وتجيب الشيله !
اما خالد كح وسلم ودخل الصاله على اساس البنات يروحون يجيبون شيلتهم ولا يتغطون ولا حاجة .. قعد اشوي ولا لفت نظرة الابتوب الي كان موجود على الكرسي المجابل التلفزيون .. الكرسي الي دوم جدته تحب تقعد عليه .. يا ترى وين يدتي الحين معقوله تكون لحد الحين بالمطبخ ولا طالعه .. قعد ينادي على جته .. واول ما سمع ردها راح صوب الابتوب .. قال بيدخل ع المسن يمكن تكون قاعدة ولا شيء .. خصوصا ان هاي فترة اجازة مو جامعات ودوامات .. بس لفت نظرة المنتدى الي كان مفتوح عليه ..
سبحان الله نفس ستايل منتدانا .. ما هقيتها منك يا صلوحي " مدير المنتدى" ، رفح الصفحة لفوق حب يشوف اسم المنتدى عشان يواجه المدير بالحقيقة بس المنتدى كان هو نفسة اسم منتداه .. لا مستحيل !
شاف الرابط اي نعم هذا نفس الرابط .. نفس الرابط الي انا حافظة عن غيب .. يا ترى شالسالفه .. معقوله يدتي تكون مشاركه بالمنتدى من دون ما ادري .. لا اشدعوه هاي بالغصب تعلمت على التفزيون .. التفت لاسم العضو ، يمكن يكون يعرفه ولا حاجة !
--------------------
كانت شوق في غرفتها وهي جد معصبة .. لا مو معصبة بس الا تصارخ وتهاوش حسن اخوها بصوت عالي ..
شوق : افف منك .. انت شنو عبالك كل شيء لعبة .. هذا جوال يا بابا جوااااااااااااااااااااااااااال
طبعا حسن ما فهم شيء واكتفى ان يصيح بصوت عالي .. بس شوق ولا هامها كانت جد محتره على جوالها لانه جديد .. ما كمل شهر كان هديه من ابوها بمناسبة نجاحها السنه !
جات مها وهي تركض ..
مها (( وهي رايحة صوت حسن وتحاول تهديه )): شسويتي باخوج بعد !
شوق : يمه لازم انا الي اسوي .. اسئليه هو !
مها " بعصبية " : شوقو تكلمي احين لج ما تشوفين حالته !
شوق: كسر جوالي!
مها : سو ..
شوق : سو .. سووو . سو كسرت راسه ..
مها " فقدت السيطرة على اعصابها " : شوقو هذا اخوي .. حد يهاوش ولا يطق اخوه عل�

11 - 7 - 2014, 11:53 AM

مها " فقدت السيطرة على اعصابها " : شوقو هذا اخوي .. حد يهاوش ولا يطق اخوه على سبة جوال !
شوق : بس يمه هذا جوالي الجديد .. وما نزل بالدوحة !
مها : واذا ابوج مسافر .. قولي له يجيبلج الي تبينه .. مو تهاوشن اخوج على شيء ما يسوى
شوق : ههههههه يمه الله يهداج ابوي رايح مصر .. حد يشتري جوال من مصر .. هذول كل شيء عندهم متاخر.. تلاقين الموديل لحد الحين ما وصل !
مها: اوكي اشتريه من النت ولا ودية يعدلونه لو عاجبج وايد .. بس مو تهاوشين حبيبي !
شوق:/ يمممممممممممممممممممممممممه ..
مها: شوفي ! يا ويلج ان صيحتي اخوج مرة ثانية فاهمه .. الحين انتي الكبيرة ، تحطين عقلج بعقل ياهل .. بزر !
--------------

نرجع حق خالد الي كان متفاجأ .. لف صوب اسم العضو وياليته ما لف .. عصب ، بغى ياخذ الابتوب ويكسرة لولا ان جدته دخلت عليه وشافته بهالحاله !
ام محمد: وانت بعد قعدت على هذا الجهاز .. انا ما ادري شسوى فيكم !
خالد" وهو شارد" : يدتي .. هذا لابتوب من
ام محمد: يمكن حق امل .. لانها كانت قاعدة هني وبعدين نادتني !
انا غبي .. انا حمار ّ! كان ودة يصارخ ويقولها بصوت عالي .. انا اشلون ما انتبهت على تشابه الاسم .. نفس الاسم .. نفس القصة تقريبا ! انا كنت ادري ان الدوحة صغيرة بس عمري ما توقعتها صغيرة لهالدرجة .. كان وده يبكي . يصارخ .. يناديها ويعطيها كف يبرد حرته .
استئذن من جدته وطلع بهدوء .. جدته استغربت .. شفيه هذا كأن جاي يسلم على الكمبيوتر مو على جدته !
ركب السيارة وهو حاس انه ضايع .. ما يدري وين يروح ما يبي يدخل البيت ويحط عينه بعين ابوه .. ولا يبي يروح الشركه عشان ما يشوف عمه .. ويبي يطلع من هالمكان عشان ما يشوف احد يعرفة .. ركب السيارة ومسك طريق الشمال !! يبي يروح بعيد .. اي نعم بعيد !!
اشوي الا دموعه بغت تنزل .. معقوله انا اسوي جي في عرضي .. في الناس الي استظافوني وربوني كأني واحد من عيالهم ! لواهم كان الله يعلم بحالي مع بيت عمي ! وبهالطريقة ارد لهم معروفة .. صج اني انسان خاين وما استحي ! ولا في حد يسوي جي في الي يساعده ومد له يدة .. مدولي يدهم وانا صغير وربوني .. وفي النهاية اتعرف على بنتهم !

11 - 7 - 2014, 11:54 AM

اخ بس اخ .. كانت دموعه تزل وصت لومه لنفسة وكان يمشي بصورة جنونية .. ما انتبه لعدد الاشارات الي تعداها .. ولا كم مخالفه مسكها الرادار .. كل الي يبي يسويه انه يبتعد ! اي نعم يبتعد .. لولا ان الانتحار كان انتحر .. مو ضعق ايمان ولكن من الحيا .. اي نعم من الحيا .. اشلون راح اقددر اروح بيتهم واسكن معاهم.. واحط عيني بعينهم وانا اسوي شيء غلط من وراهم .. انا لو عمي درا ممكن يذبح امل .. كل شيء مسموح الا الحرام والغلط !
بس انت غبي يا خالد .. ! ليش كلمتها كنت تدري ان غلط .. حلال على بنات الناس وحرام على عرضك .. لا لا انا كانت نيتي شرسفة عمري ما طلبت منها معلومات خاصة .. عمري ما حفظت معلوماتها الخاصة مثل اسمها ورقم تلفونها .. وهي كانت محترمه ما قالت لي غير اسمها الاول .. حتى بيتهم باي منطقة ما قالته .. انا لو كنت ابي اعرف معلومات عنها .. كنت باعرف بكل سهوله .. الموضوع لا صعب ولا حاجة ..! ولكن انا احترمت خصوصياتها ّ!
لا يا خالد .. لا ! لتدافع على نفسك انت انسان ما تستحق ! لا تقول الشيطان لان انت السبب . اي نعم انت السبب في كل شيء !
اخ صدمه .. والله العظيم صدمه !
رجع لوعيه اخيرا . ووقف السيارة ونزل .. صحيح ان الجو حار واسد .. بس ما همه .. كان ودة يرتاح .. كانت السياير الي في الدرب قليله جدا .. بس الكل لما يمر وشوفة يستغر .. رجال موقف سيارته ويمشي ودموعه على خدة .. الكل استغرب !
بس خالد مصدوم .. ما عرف وش يسوي .. ما يبي يروح البيت .. ما يبي يكلم حد ... ما يبي يكلمها .. اي نعم .. ما يبي يكلمها !
كفاية الي جاه من وراء علاقتي فيها .. لازم انسى .. لازم انسى !
بس راح تقدر تنسى .. وراح تكون العلاقة الي بينهم علاقة حب عابرة .. وامل وشلي راح يصير فيها .. راح تكتشف الموضوع ولا ..!

11 - 7 - 2014, 11:55 AM

الجزء الثالث عشر ..
كانت تطير .. وتطير .. بس الغريب انها تسمع احد يقولها يله يله ! شنو هاذيله يبوني اطير اعلى مثلا .. بس ما اقدر .. هاي اعلى ارتفاع ممكن اوصل له .. فبس منو هم انا ما اشوف احد تحتي ! فتحت عيونها بهدوء شديد .. شافت سقف غرفتها .. ولحد الحين هي تطير بس هالمرة تطير بدفاشة .. اشوي اشوي ولا شافت الجوهرة قاعدة تنط على السرير .. وهي تصارخ يله يله !!
- هيييييييي انتي شتسوين
- ما بغيتي اتقومين جنج من اهل الكهف ..
- هيييي روحي ابي ارقد ..
الجوهرة : عندو قومي ترى جدتي بتذبح توها زافة امل لانها ما رضت تقوم ..
العنود : اففف منكم شتبون .. هاي اجازتي المفروض ارتاح .. بعد شهرين انا ثالث
الجوهرة: شدخل !!
العنود: شنو . لازم استفيد من هالوقت ! لازم ارتاح ! لازم استمتع !
الجوهرة: اقول زهقتيني .. يله قومي غسلي ويهج . قبل لا جدتي تيجي !
توها كانت بتدخل الحمام – وانتوا بكرامه – ولا لفت للجوهرة لانها نادتها ,,
العنود: نعم
الجوهرة: ترا البوم الصور رجعته للكبت لو جدتي شافته بيحز بخاطرها وبتعتقد انكم مب مرتاحين اهني ..
ابتسمت للجوهرة .. معاها حق .. جدتها وابوها والعايله كلها بلا استثناء اتسوي المستحيل عشان ما يفقدون امهم .. الكل عايش معاناتهم ... حتى بعد مرور سنتين يحاولون ما يحسسونهم ان في شيء ناقص .. اما امل كانت متضايقة وما لها بارض اتسوي اي شيء .. وعصبت اكثر يوم شافت جدتها جاية الغرفة بالعصا تحاول تقومها بالغصب .. شنو هاذيل من يقوم الساعه 7 الصبح عبالهم دياي " دجاج" ..
- يممممممممه شالسالفه ابي ارقد ..
- اموول .. قومي .. مب تبغون تروحون المزرعه ! يله بنوديكم المزرعه ليش ما تقومون ..
- يدتي الساعه 7 الصبح ابي ارقد امس ما رقدت !
- اي بس شار تناقزين من مكان لي مكان .. وصوت هالاغاني عالية .. ! يله البسي وقومي ! انا باروح اشوف ماريا وسالمية >> تقصد الخدم
قامت من النوم وهي متكاسله .. شافت المسن لقته بعده ما دخل .. شافت المنتدى هم ما دخل ما عرفت شتسوي .. تلقائيا فتحت الجريدة ع النت .. دخلت على مرقع ال 4 جرايد .. تشوف صفحة الوفيات والحوادث .. اكيد صار له شيء .. هي ما تعرف اسمه الكامل .. كل الي تعرفه ان اسمه خالد واسم ابوه احمد.. بس الحمد لله ما كان في حد اسمه خالد الا واحد عمره 67 متوفي .. خالد قالها اسمه واسم ابوه بس عمرها ما سالته عن عايلته عشان يقولها .. ولا عمرها اسئلته عن اي شيء خاص .. هي متاكده اذا سئلته كان بيقولها .. بس بعد اكيد كان راح يسالها نفس السؤال .. وهي ما تبي تحطه في موقف مضطرة تكذب عليه او تقوله ما اقدر اقولك .. انت تجاوزت الخط الاحمر !
نروح حق العنود الي كانت ترتب اغراضها مع الجوهرة وتحط الافلام بالشنطة بسرعه امس ما قدرت تسوي ولا شيء نفسيتها ما كانت تسمح لها ..

11 - 7 - 2014, 11:56 AM

العنود: الا وين ريم ..
الجوهرة : ريم بتجي ويا شوق وامل بعد اشوي .. اتقول تحس انها بتتهاوش ويا يدتي الييوم
العنود: ليش هي شمسوية !
الجوهرة: ولا شيء .. بس خاطرها تسبح بالبرجه ..
العنود: الله يعينها عيل ! الا كم يوم بنقعد هناك !
الجوهرة: ولا يوم
العنود" بطلت عيونها بطريقة كرتونية " : شنو انتوا عورتو راسنا بنروح وبنروح وما بنبات بعد !
الجوهرة : عمي براهيم امس اقترح ان العايله كلها تسافر ويا بعض احلى من قعدت المزرعه .. بس بيروحون المزرعه اليوم علشان خاطرنا !
العنود: والله فلله دايم افكار عمي براهيم حلوة .. متى بنروح ّ!
الجوهرة: لحد الحين ما قرروا .. بس جدتي مصممه ان الكل يروح حتى الصبيان .. فأكيد بيكون قبل نص 8 لان دانه راح تبدا جامعتها .. وريم السنه راح تشتغل بالاوقاف نهاية 8 لمده اسبوعين !
العنود : الصبيان ! عيل شكلنا السنه مب رايحين مكان !! هذيل حق المزرعه الي بالدوحة سووا سالفه وقالوا مب رايحين ! وبعدين بعد يومين طلول بيسافر ويا ربعه !
الجوهرة: صج وين بيروح !
العنود: ما ادري على ما اعتقد لندن
الجوهرة : هههههههه وين دانوا عنه
العنود: لا اعتقد تخطت هالمرحة هي تزوجت خلاص ّ!
الجوهرة: مستحيل .. ريم امس كلمتها !
العنود: شتقول !
الجوهرة: ولا شيء مفيد بس انها راحت لبنان .. وبترد باجر ان شاء الله !
العنود: الا تعالي ! امل مالها حس .. انا بانزل الشنطة تحت وانتي روحي لها !
الجوهرة : اوك !!
--------------
طلع من السايرة وهو يبي يرقد .. تفاجأ ان دريول " سايق"بيت جدة واقف في الحوش هالوقت .. اعتقد ان البنات ما عنهم مدرسة ليش هذا واقف .. راح يبي يدخل بيتهم لان اخر شيء يبي يشوفه هو هي ! بس للاسف شافته جدته قبل لا يدخل .. لف ويه وشاف البنات متوجهين للسيارة .. كانت لابسة نظارة شمسية كبيرة وايد .. تغطي كل عيونها .. كان شكلها حزين ما انتبهت له ركبت السيارة بسرعه مع العنود والجوهرة ..
خالد " من دون نفس" : هلا جدتي
ام محمد: وين كنت
خالد: يدتي لا تسوين لي تحقيق والله ما لي بارض
ام محمد بعصبية: انت ما تستحي يا ولد .. حد يكلم جدته بهالطريقة !
خالد من دون نفس : انتي مب جدتي !
(( صدم الكل بهالكلام .. حتى الجوهرة بطلت فمها يوم قال جي .. حتى العنود .. اما الجده نادته كذا مرة بعصبية .. اول مرة يشوفون الجدة معصبة .. حتى امل الي ما كانت منتبهه انتبهت وتفاجأت من رده .. خالد يحب جدته وايد ))

11 - 7 - 2014, 11:56 AM

دخل البيت وهو زعلان .. زعلان من كل شيء من نفسة من امل من العالم كله .. بس عصب اكثر من الكلمه الي قالها لجدته .. معقوله اقول لها .. عمري ما تخيلت ! هي اكثر وحدة احبها بالعايله .. على عصبيتها وعنادها ..بس ارتاح لها كثير .. لما تصيدني مشكله ولا حاجه اروح لها هي اول وحدة .. حتى قبل لا اكلم امي ولا ربعي ! لا حول ولا قوه الا بالله ! الشيطان قص علي لي قلت هالكلمه ...
انا لازم اعتذر لها .. بس هي طلعت الحين .. جرب يتصل عليها كذا مره بس محد كان يرد عليه .. في النهاية ردت الجوهرة وقالت انها ما تبي تكلمه !
-----------------
ركبت السيارة وهي تركض جد تأخرت والجوهرة من اشوي داقة عليها وكانت معصبة تقول احنا مضطرين ننظف ويا الخدامات وانتي نايمه .. الا رن جوالها ,,
امل: ردي !
ريم: بعد اشوي لماا نوصل بادق عليها .. الحمد لله ان المزرعه قريبة ..
شوق: قريبة .. انتي تستهبلين ! ربع ساعه بالطريق !
ريم: اي انتي ما جربتي تروحين مدرسة بعديه عن بيتكم .. انا كان بين مدرستي وبيتنا نص ساعه حشى سفر مو مدرسة ..
شوق: يا كثر المدارس الي بالدوحة بس انتي الله يهداج الي يسمع يقول ما في غيرها !
ريم: الا خالتي .. اخبار خالي خليفة
مها: والله الحمد لله تمام .. بيرجع نهاية الاسبوع ان شاء الله
ريم: زيــــــن هالمره ما طول .. العادة بالشهور !
شوق: اي احسن .. والله اشتقت له فديته ابوي ! انتي ريمووووو ردي على جوالج زهقتنا !
ريم" اووف منج ، ما بتخلوني اتكلم على راحتي .. كل اشوي اسكتي " : الووووووو .. هلا والله .. هلا بسهر
سهر: هلا بج يا عمري ..
ريم: انا اكيد امي داعيتلي مكلمتني 4 ما ادري 5 مرات بالشهر .. يا شيخة كانت تمر شهور قبل لا نكلمج
سهر : ترى مو لجل عيونج .. بس عشان دانو سافرت وما صارت ترد علي
ريم: افااااااا ! هاي وانا مستانسة اقول اخيرا صار عندي صديقة سعودية مثل دانوو
سهر: يا قلبي انتي من زمان صديقتي ..
ريم: تدرين باجر ولا الي بعدة دوينه بترد
سهر: صج .. زين زين لاني محتاجت لها
ريم: لو شيء مهم ترى ممكن اساعدج
سهر: سويت بحث عن الجامعات .. صحيح ان تخصصي موجود في كل مكان بس الصراحة ما حبيت ارجع خصوصا ان نوافو وابوي منعوني ارجع السعودية بروحي .. انتي تعرفين ان ابوي انتهت مدته بعد ابو دانه ب 3 شهور
ريم: اوك
سهر: المدينه الي ساكنه فيها ما بها جامعات اجنبية قوية .. فاقترح نواف اني اروح اي مدينه ثانية او اسافر للخليج . او لبنان
ريم: وقلتي بتجين لقطر َ!
سهر: والله طلعتي ذكية .. يس يس راح اجي لقطر
ريم: بس اقول ..!
سهر: هلا
ريم: جامعاتنا مو كلها قويه .. حتى جامعات السعودية قوية وجامعات لبنان اقوى واقوى
سهر: شوفي وين ما رحت ما باعرف فيها احد ، لان اغلب شلتنا ضلت بلندن بس انا ودانه واماني رجعنا .. اماني تزوجت وعاشت في باريس
ريم: اوك ..

11 - 7 - 2014, 11:57 AM

سهر: وبس .. صعب اني اروح مكان جديد وما عرف فيه احد .. ما في غير قطر .. تراني عايشة حوالي 12 سنه في لندن .. الفترة مو قليله ..ّ!
ريم: ههه على الاقل عشتي ببلادج فترة
سهر: انتي عبال كل الناس مثل خالتج .. والله اني كنت ازفها .. بس ما ترضى تجي .. تقول انا قطرية اول ما اقعد باتعود على عاداتهم ! واغلب عاداتهم نطبقها بالبيت عندنا .. ما في شيء جديد !
ريم: والله انج صادقة .. الا انتي وين الحين
سهر: يمكن بعد 10 ايام راح اكون عندكم .. انا بالبيت الحين !
ريم: ان شاء الله .. اقول انتي بتحولين الاوراق لكارنجي قطر مثل دوينه ولا بتحولين في جامعه ثانية ..
سهر : لا لا ويا خالتج .. راح اضل على نفس تخصصي .. تدرين كان خاطري ادرس في الجامعه الامريكية في الشارجة !
ريم: وليش ما رحتي ..
سهر: ما عرف هناك .. عجزت ابدا حياه جديدة بروحي
مها " وهي تضغط على يد ريم وتكلمها بصوت واطي" : اقول وصلنا سكري !
ريم: اقول سهووووووره يله باي يا عمري .. راح اشتئلك !
سهر: كذابه !
ريم: ههههههه مشكله انج فاهمتني
سهر: صادقت دانو لمدة 5 سنين .. اعرفج عدل يا قلبي !

المواضيع المتشابهه لموضوع: هو الحب يا عمري شويه لموضوع: هو الحب يا عمري شويه
الموضوع	كاتب الموضوع	المنتدى	مشاركات	آخر مشاركة
حسك تسرق التفكير من فكري و حسك كل عمري الجاي من عمري	همسه الشوق	همس عالم حواء	6	15 - 8 - 2021 04:59 AM
ما يجوز هذي زوجه سمره هذي زوجه بيضا ابو تركي راس تنوره	جروح الم	همس الشعر و الشيلات الصوتيه	4	22 - 7 - 2015 07:25 AM
ابي نسى معك عمري واعيش الحب في عمرك	استثنائيه	همس الشعر والقوافي	6	16 - 5 - 2013 01:40 PM
قصة خيانة زوجه	..غمـــزة دلــع..	همس للقصص وحكايات وروايات	4	20 - 4 - 2011 12:39 PM
مذكرات زوجه	الريم..	همس للقصص وحكايات وروايات	2	6 - 1 - 2011 01:14 PM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع