رواية العابث ال خير في هذا الزمان

17 - 11 - 2020, 02:39 AM

البارت 106

في امستردام ،،،

رامز التفت بسرعه للحارس ؛ هربوا
الحارس بفهاوه رفع عيونه لباب الطوارئ
كان مفتوح على اخره
رجع ناظر رامز : والحل طال عمرك !
رامز بحده رفع رجله وضرب الحارس بقوه في بطنه : انا اقول هربوا يعني روح وراهم ماتفهم !! ماتفهم ؟!! الخطأ مني انا اللي جايبك لو ماخذ غيرك كان من زمان وهم تحت عيني
بصوت عالي صرخ :
بسرعه وش تنتظر !!!!!
الحارس : انتظر تنهي كلامك طال عمرك
رامز غمض بقوه وعيونه يحس انها بتطلع من راسه من الغضب والضيق
الحارس بسرعه ركض للباب ونزل الدرج
بخطوات سريعه وهو مو فاهم ليش يطاردون رائد ؟
معقوله حتى اخوه مابيسلم منه ! يلتفت في المكان والهواء قوي وفيه
زخات مطر ناعمه وريحة الارض ورد ومطر
نزل لاخر الدرج كان فيه طريقين
واحد للمواقف والثاني
يخرجك للشارع الرئيسي
اتصل بسرعه على رامز
وهو محتار وين يروح !
رامز بحده : تعال تعال
انا الثور لو خذيتك مره ثانيه
قفل بوجهه تنهد بحسره ورجع من درج الطوارئ
لـ فوق ..

فالجناح ..
رامز يفتش في اغراض رائد وريتان
وشكوكه كلها تأكدت
وصار اخوه بنظره خاين
وفي محل الاعداء لا شأن للايام ولا السنين ، انا احملك في داخلي من موقف
وبموقف ايضاً اُنهيــك وكأنك لم تكُن ( يوعدني يزوجني البنت يروح يتزوجها ؟ طيب والله ي رائد لاخليك تندم على
الدقيقه اللي لعبت فيها معي انا اخوك وكذا تسوي كيف لو عدوك ! )
رجع لصالة الجلوس
واخذ جوال رائد وطلع من الجناح والحارس وراه يركض وانقطعت انفاسه ..

' في المواقف ..

انفاسه ترتفع تاره وتنخفض تاره اخرى
مثبت راسه على طرف إحدى السيارات وهو يكاد ان يُجن من تحاشد الحسرات بصدره لم أؤذي احد في ظل المحافظه عليهم أذيت نفسي ، في وقت كان الجميع يظن ان حالي بخير
كانت النزاعات تشُب وتتقاتل في صدري
لم يعلم احد كم يكلفني الامر لكي ابدو بخير وبهذه القوه رغم هذا الثبات الذي اظهره حتى في هذه اللحظة
لم اكن بحاجه لشئ اكثر من كلمة مطمئنة واحده تميل لقلبي برقة ، تزيل عن كتفي ثقل هذا العالم
تنهد والتفت لها تجلس بجواره
وكف يدها قريب من فمها
واصابعها تحديداً الاظافر
تقضمها بخوف ورهبه
أطال بها النظر ومن ثُم انتزع يدها بهدوء من فمها
حتى التفتت له بخوف : تتوقع وش بيسوي اذا لقانا ؟
رائد ابتسم : اذا تركنا حيّين نعمه وخير
انكتمت انفاسها بصدرها
ووجهها وضح عليه الخوف
همس ليستفز كل خليه فيها : مو انتِ اللي تقرر وتخيط وتلبس حليها وفكري في مخرج
فتح ازارير قميصه الاولى والارض بأتساعها
تضيق ما أخذ ادويته ولا اكل زي الناس وقف ببطء واتجه
لسلة النفايات " اكرم القارئ " في زاوية
المواقف
ليرجع كل مافي بطنه شعر بأن حنجرته تشكي له ايضاً تعيش معه سوء الموقف
تضببت الرؤيه لديه وحاول ان يصمد في وقوفه ويعود لها بخطوات
ثابته
على بُعد ظ،ظيمنع خطوات توقف بقدم مُثقله
انتبه لها تقرب له : فيك شيء !
همس ببطء وكبرياء رجل شرقي تمتزج
بسخرية الموقف :شوفتك تدوخ !
ابتسمت وضحكت : لدرجة رامز بيطلع
لنا الحين صايرين ندوخ
رائد تنهد ورجع للسياره وجلس بجوارها
وريتان ظلت واقفه تناظره بصمت
ادركت سوء فعلتها هي احرقت شيء كبير كان بين اخوان وبنفس الوقت هم احرقوا روحها
معقوله تعادلوا !

17 - 11 - 2020, 02:41 AM

اابارت 107

قربت لرائد وجلست جنبه بمسافه بسيطه
وبهمس : وش النهايه ؟ طمني رائد ترى وربي روحي تعبت
هز راسه بـ لا : ماعليك
مابيصير شيء
ريتان بتفكير : رائد سلاحك وينه !
رائد التفت لها بسرعه : سلاح ! اي سلاح
ريتان : واحنا فالمطار رن الجرس تبع التفتيش عندك وحتى ان الحراس والشرطه استنفروا كلهم ووجهوا سلاحهم عليك
رائد ميل راسه : وبعدها ! طلعت سلاح او لا ؟
ريتان بأستغراب : لا طلعت ورقه واعطيتهم
وراحوا
رائد هز راسه : خلاص يعني مافيه سلاح
ريتان بقهر : وليش رن الجرس ؟
رائد هز راسه بالنفي : شيء مالك دخل فيه
ريتان بنص عين ناظرته وصدت وهي تهمس : ليتهم خذوك
مسك ضحكته : نعم !!! قلتي شيء
ريتان بتكشيره : لا ماقلت شيء
صد عنها وغمض وذكرى قديمه تعود لذهنه (((( قبل سنتين وبعد وفاة والدهم كان رامز ثاير وببدايه ادمانه حاول يهديه ويرجعه لعقله ماكان فيه حل
الا يقفل عليه بمكان لحد مايخف مفعول
الادمان
خصوصاً انه بدأ يتعاقد مع شركات اسلحه وخراب
خايف عليه لدرجة انه ترك كل شيء وظل مقابله بس يهتم بأكله ونومه وصحته كأنه الشخص الوحيد اللي فقد ابوه وليس رائد هو ايضاً اخوه وتجرع
سوء الفراق ومُره
الام فقدها في طفولته والان الاب حاول يعوض رامز لكن العقل ماكان بيده كان عقله شبه مغسول ماعاد فيه امل يرجع من جديد لوعيه
مر شهر عليهم كل يوم فيه حرب وضرب لاجل الاكل والنوم حتى المويه ضرب
العلاج ضرب
مافيه امل ياخذ رامز شيء بدون مايهجم على
رائد ..
' دخل عليه بهدوء في يومه الاخير من الشهر الاول نزل علاجاته وفطوره على الطاوله
وجلس مقابله بأبتسامه مرحه اخويه
وعيونه تتضح فيها معارك الحزن
والغُربه : هاه ! كيفك اليوم ؟
رامز وعينيه تحيط بها الهالات السوداء ونظرة شر تظهر فيها : بخير لين شفتك
رائد كشر وبنص عين : ترى اخوك انا على فكره مو يهودي ولا كافر
لاجل تكرهني كذا انا تهمني مصلحتك تهمني صحتك رامز مابقى لي سند غيرك ابوي مات ابيك معي اخوي عضيدي ابيك بخير وصحه
مابي تفشلنا وتسود وجيهنا لو ابوي حي وشافك كذا مابيرحمك
بيذبحك ، مابيرضيه وضعك رامز رفع كفه وبحركة ادمان واضحة
مرر ظهر كف يده اليمنى على انفه : ويعني ؟ ترى كل ذا مايهم
مايهمني انا الا تطلعني
ماتشوفني بخير طلعني يا اخي تعبت منك ومن ذا البيت المعفن
رائد تنهد : بنروح لبيتنا !
رامز بموافقه : ايه مابي اجلس هنا
وقف رائد : خذ فطورك وادويتك ونروح على طول
رامز : وعد !
رائد : اوعدك
خرج من عند رامز لغرفته ورتب بعض الاغراض
ابوه كان وحيد ماعنده اخوان واهله وجماعته في الشرقيه وصار عزاه
هناك وجلسوا في بيت جدتهم وحالياً بيرجعون لبيتهم اللي في الرياض
المهجور من ظ،ظيمنع سنين لاسباب كانوا يجهلونها
كانوا يجهلون سبب رفض ابوهم الرجعه
للرياض وتحديداً لبيتهم
يعيشون بشقق وفنادق ولا يروحون بيتهم بس بعد ماتزوج ريتان عرف السبب كان البيت مع الاسف " مسكون " ( بسم الله الرحمن الرحيم ) ..

17 - 11 - 2020, 02:43 AM

البارت 108

خرجوا من الشرقيه للرياض بسيارة رائد يجلس رامز بجوار
يسولف ويضحك كلمه بكامل عقله وكلمه ماتنفهم
بمجرد وصولهم للرياض
وتحديداً لبيتهم فتح الحارس الكبير بالسن
البوابه ودخلوا
هدوء وخالي من الحياه
حتى الحديقة اشجارها ميته ومتشابكة والمسبح كله طحالب سوداء
من جفافها
مرعب بأختصار دخلوا للبيت
وتجولوا فيه كان عادي جداً ومايثير الشك
طلعوا للدور العلوي وكل واحد دخل غرفته
دقائق وخرج رائد لرامز يبي ينبهه على ادويته
لكن مالقاه وكان فيه صوت بالطابق السفلي
نزل بسرعه خوف انه هرب لكن الباب مقفل والمفتاح عليه ومكتب ابوهم مفتوح دخل بهدوء
وعيونه تنتقل بالمكان : رامز !!!!
غمض بقوه من حس بشيء يخترق كتفه اليسار ويصل لقلبه
فقد الحياه ولونها خلال ثواني سقط على الارض مرمي وانفاسه المتسارعه تقل تدريجياً
ورامز واقف وراه وبيده المسدس
ابتسم بخبث وطلع من البيت بسرعه قابله الحارس وانصدم من شاف السلاح في ايده
لكن تجاوزه رامز وهرب
والحارس دخل للبيت وشاف رائد
اتصل على الاسعاف ووصلوا بعد وقت
طويل بالنسبه لرائد اللي ينزف ..

رجع لواقعه على همس ريتان المرتجف : جـ....ـاء غرست وجهها بكتف رائد اللي ملامحه متجمده وينتظر رامز يجي يوقف قدامه
ومثل ما اطلق عليه قبل يطلق عليه الحين ..

عند خالد وختام ...
خرجوا من شارع هوليود
وجوال كل واحد منهم يحتفظ بصور كثيره للثاني
ضحكة ، نظره ، غمزة
(( كيف يمكن للوقت ان يضمك معي الله يديمك لي )) ختام ضامه ذراع خالد
وتبتسم برقه : الحمدلله اليوم كان مره جميل
خالد ابتسم : فعلاً ولو ان فيه حركات ودي اكسر رقبتك قبل تسوينها لكن نمشيها
ختام وقفت وبتأفف : نعم ؟ كل شيء اسويه مايعجبك ! قول لي وش يعجبك طيب ؟
خالد ضحك
خنام : تكلم تكلم
خالد بورطه همس ؛ كلك تعجبيني خلاص
ختام بابتسامة : صدق !!!
خالد تجمدت ملامحه بربكة : هاه !
ءءء
رن جواله وطلعه بسرعه كانت امه رد بضحكة : هلا والله
ختام تنهدت بقهر متأكده انه ماراح يجاوب على سؤالها بس بتحده
وبتجبره غصباً عنه بيجاوب
اشرت له : بكلمها
خالد اعطاها الجوال بدون مايقول لامه
انها هي : هلا خالتي كيف صحتك ؟
ام خالد من الروعه والخوف ضربت صدرها : هاو ! من انتي خويلد وينه ؟
ختام ضحكت بنعومه : خالتي انا ختام
ام خالد ابتسمت : يمه فديتك آخبارك ! جعلك بخير طمنيني عنك ي روح خالتك
ختام : تمام اشتقت لك مره ولـ بُشرى مع انها ماتستاهل
بُشرى بصوت عالي من وراء امها : ايه ؟ غصباً عنك تشتاقين
ختام شهقت : عندك الحين
ام خالد ضحكت : ايه كل شوي محاربتني ماتخليني اخذ راحتي
بُشرى بخبث : ايه ماتاخذين راحتك مثل خويلد ..

17 - 11 - 2020, 02:44 AM

البارت 109

بُشرى بخبث : ايه ماتاخذين راحتك
مثل خويلد
خالد بلع ريقه بتوتر وهو خايف ان بُشرى تقول كلام اكثر وتسمع ختام
اخذ الجوال بسرعه : يمه اكلمك بعدين الحين مشغول فديت راسك
ام خالد بحنيه : طيب سلم على البنيه
خالد : من عيوني ياعيوني
قفل وهو يسمع حلطمة بُشرى لكن طنشها
التفت لـ ختام ؛ يلا !
ختام بنظرات طويله وهي تلعب برجلها
اليسار : ليش ماتقول لي كذا !
خالد انصدم : وش !
ختام ببساطه : عيوني وقلبي ؟
فديتك ؟ احبك !
خالد شهق ورمش بسرعه
وعيونه متعلقه فيها ويحس قلبه بيطير
من مكانه
ختام بنظرات طويله : انت تقول نكون اصدقاء ! بتنصحني ! صح طيب لو انكسرت القاعده وصار فيه اختلاف شوي وصرنا حبايب مايجوز !
اقول لك شيء
خالد رفع كفه بوجهها يقاطعها : اشششش
مابي اسمع شيء يكفي اللي سمعته ختام مابي اخسرك
ختام قربت له وببحه ودموعها تنزل : انا احبك ..

‏على خلاف ماتسأله النساء في العاده "اتحبني"؟ ‏انا أسألك: هل تشعر بأني أحبك؟ ‏وكيف تعرف اني حين اقولها اعنيها؟ ‏وحين لااقولها ، كيف تعرف اني لااخفيها؟
‏أنا أحبك.. هل يعني هذا لك شيئاً؟ هل تتذكر هذه الكلمه من مكان ما؟
هل تجعل قلبك يخفق بقوه مثلما
كان بمقدورها سابقاً، كما تفعل بي إلى الآن !
‏هل تدرك معنى أن احبك في وسط
مزاجي السيء أن لا أرغب بالحديث
والتواجد حول أحدٍ حينها عداك؟. '

ختام قربت له وببحه ودموعها تنزل : انا احبك
خالد غمض بقوه وختام ضربت بجبينها على صدره فوق قلبه
نبضاته المرتفعه كادت ان تقتلع قلبه وتسقطه
كلمة منها كان اثرها ان تُنصف قلبه وتهدره
رجع خطوه على وراء يحاول ينزع تأثيرها عنه بغضب رفعت عينيها المحمره المرتعشه
وصدرها يعتلي بالنبض :
لا تبدأ معي كذا لا تضغط علي اعيش شعور عكس اللي بقلبي انا ما عمري عاملتك مثل اخوي
انت كنت بعيوني غير من اول مره شفتك فيها من اول مره كنت غير
ومازلت بقلبي غير خالد لا تتعب روحي ترى انا فعلاً ماعندي غير هالكلام لاتجرب تستخف فيني ..
يطيل النظر فيها بعينيها الصادقة جداً الحبيبه لقلبه كيف نفهم بعض ؟ كيف !
تكاثرت الدموع في محاجرها : رُد علي
امانه عليك رُد
خالد صد عنها بملامحه
وهو اشبه بـ شخص اخر غير خالد الحيوي النشيط
مات وقتلته بعيونها بنظراتها الحاده
ختام ونار الغيره تحرق قلبها وتشتعل فيه : بخاطرك احد ؟ تحب احد
التفت لها بسرعه وكُله يصرخ
وربك ماملك هالقلب غيرك
قربت له وبهمس طويل مبحوح : قول الصدق
بقلبك احد !
خالد ً: خلاص بس
انا هنا عشانك مابي تتضايقين ويصير المشوار كله على بعضه هم وغم
انتي اصغر من كذا انتي تستاهلين الراحه والضحكة وش لك بالهموم
ختام بعناد تكتفت : اذا انت هم عادي
خالد ضحك : والله البلشه
ختام : رُد علي جاوبني ؟
خالد رفع عيونه على فوق شوي ورجع ناظرها : بكره ارد عليك

17 - 11 - 2020, 02:45 AM

البارت 110

ختام شفايفها ترجف ومكشره هزت راسها بالموافقه
خالد ابتسم : ابتسمي
وشو له زعلانه ؟
ختام صدت عنه : مابينا كلام ولا ابتسامه ولا شيء الا بعد ماترد
مشت للفندق وهو مصدوم هز راسه بـ لا : مايمدي احد يتوقع ردة
فعلها
ركض وراها : ختام ختام
طنشته ودخلت للفندق
وطلعت الاصنصير بسرعه وقفلته قبل يدخل خالد
طلع من الاصنصير الثاني وانفتح
وشاف ختام داخله الجناح تنهد ومشى وراها
: يابنت
رمت شنطتها على الكنب والتفتت له : شوف بكره ترد علي كل ماطال ردك كل مازاد هجرنا لبعض
خالد ابتسم وميل راسه على جنب
وهو يستضعفها بعيونه : ختام
ختام صدت عنه وهي تقوي قلبها
يعرف كيف يضغط علي
لكن ماينفع معه الا كذا
لا تضعفين لا تضعفين وتناظرينه
دخلت لغرفتها وقفلت
وخالد واقف مكانه مدهوش
تنهد وجلس وهو يمسح شعره بكفوفه ويفكر وش يرد عليها
اخذ جواله بسرعه واتصل على بُشرى دامها خاربه خاربه
بُشرى تدري بالعلم خلوها تفهم الموضوع كامل وبالطريقه الصح
ردت عليه بهمس : هاه ؟ وجع ماتدري كم الساعه
عض شفته بحرج : نايمه ؟
بُشرى قامت وطلعت برا الغرفه عشان ولدها
مايصحى : لا مثلك داشره بالشوارع خير وش تبي ؟ خالد مسك ضحكته : وشو له معصبه روقي عشان اعرف اتكلم
بُشرى جلست على الاريكة ورجعت شعرها
وراء وعيونها على الشباك تتأمل المطر : توني نومت ولدي لو صحى من صوت
الجوال كان ذبحتك
خالد ابتسم : طيب ابي اقول لك شيء
بُشرى بلقافه : وش ؟
خالد تنهد ووقف واتجه لغرفته وتقفل فيها
عشان ختام ماتسمعه
جلس على طرف السرير وببحه : بُشرى انا احب ..
بُشرى بشهقه : ايش ؟ من هي ي قليل السنع
انا قلت لك تعال معنا مكه دريت انك بتضيع
بدوني
خالد : نعم اضيع بدونك ؟ اقول اسمعيني صح ترى راسي مصدع
ولا ادري وش الحل ؟
بُشرى رفعت رجولها على الكنب وهي تمرر كفها على بطنها المنتفخ في اخر شهورها : اولاً من ؟
خالد : ختام
بُشرى سكتت ونظراتها لانت
غمضت عيونها لثواني طويله
خالد ببحه : ادري انه خطأ بس سامح الله خطاي وزلتي والله مافكرت فيها بسوء
ولا شر
بُشرى بهدوء وصوت جامد : هي معك
في امريكا ؟
خالد تجمدت ملامحه : من قال اني بأمريكا ؟
بُشرى بحده : انا مو غبيه ترى ادري ان الرقم من خارج المملكة
خالد تخيل لو يدري عمها وش بيسوي فينا
تتذكر لما كلمك للشغل كيف هدد لو عرف ان بنت اخوه اشتكت منك !
خالد انا اخاف عليك
خالد بلع ريقه بربكة : بس هي
بُشرى بأستغراب : هي ايش ؟
خالد : اعترفت لي اولاً هي تحبني
بُشرى عضت شفتها وابتسمت بلا شعور
مهما كان هي الطف من تلتزم الحده لوقت طويل شخصيه مرحه
تخالطها صفاتها الضحكه
انطلقت ضحكتها بصوت عالي : يا غبي
انفتح باب الغرفه وسكتت وهي تشوف زوجها
واقف ورافع حاجبه
همست بتوتر : خويلد والله العظيم
ابتسم بيأس منها وهز راسه ورجع للغرفه
خالد بخوف : من عندك ؟ لا يكون سمع
بُشرى براحه : لا عبدالله بس طلع ورجع يخاف علي بعد عمري
خالد بسخريه : قصدك يخاف منك المهم وش السواه ؟ البنت اعترفت لي وقالت بكره ارد عليها
بُشرى : يعني ماتدري انك تحبها ؟
خالد بأنفعال ؛ لااااا
بُشرى تنهدت : خالد حبيبي وربي ابي مصلحتك انا ادري انه لو فكرت تختلط معها وبالاصح مع عمها ممكن يصير كارثه لانه مايبي الا واحد مثل مستواهم عشان ترتاح بنت اخوه ولو رحت بيفكر انك تبي
تسرقها مابيفكر لا في حُب ولا غيره صح او لا ؟
خالد ويحس بغصه بحلقه : صح
بُشرى عجزت تكمل بعد ماسمعت صوته
همست بخفه : استخير وانت رُد باللي ترتاح له
خالد غمض عيونه بقوه : ابي رائيك انا ضايع
بُشرى : ماراح اقول لك شيء استخير وبس يلا مع السلامه حبيبي وطمني بكره انتظرك
قفلت الخط وخالد جالس مكانه بحيره وش السواه ؟ استخير ! ولو ماارتحت ؟
انا ابيها وفرصه جات لعندي ..

18 - 11 - 2020, 11:58 PM

اابارت 111

في امستردام ..
رجع لواقعه على همس ريتان المرتجف : جـ....ـاء
غرست وجهها بكتف رائد اللي ملامحه متجمده وينتظر رامز يجيه يوقف قدامه ومثل ما اطلق عليه قبل يطلق عليه الحين
ظهر امامهم عامل نظافه وناظرهم بأستغراب
رائد بلع ريقه بتوتر ووقف وهو يشد ريتان توقف معه : يلا نطلع
بنثير الشبهه
طلعوا بسرعه وانتبهوا لسيارة رامز مو موجوده قدام الفندق
رائد تنهد براحه : راح
ريتان ماتكلمت اول مره تشوف رائد كذا وهو شبه عاجز وخايف
رائد مشى بسرعه للفندق وطلع لجناحهم
ركض وريتان وراه ماتدري وش السالفه
دخل للجناح وماشاف جواله تأكد انه خذه " مو مشكلة يأخذه لكن إن شاء الله ما أخذ الجوازات اهم شيء"
دخل للغرفه وشافها منحاسه وكل شيء
مرمي بالارض ملابس ريتان وعطوراتها
طلع لغرفته وانتبه لشنطته الصغيره
مو موجوده
اللي فيها الجوازات والهويه ومبالغ ماليه
عض شفته بورطه
مايقدر يتصرف الحين حتى بإيجار الفندق
كويس انه دفع حق الليله الماضيه بيطلعون الحين لكن وين بيروحون ؟
وكيف يتصرفون بدون اي اثبات وجواله خذه يعني مافي اي فرصه يتصل
بأحد معارفه هنا واخوياه او معاذ
غمض بقوه وجلس على السرير وهو يهمس : استغفر الله
سمع همس ريتان عند الباب : رائد شوف
رفع نظراته لها كانت تأشر على التسريحه
قرب لها كان مكتوب بروج ريتان ((( نجيت بنفسك مني قبل سنتين ونجيت الحين لكن الثالثه ثابته ))) وقطعه لاصق شفافه تحتها رصاصه
التفت لريتان وريقه جاف : روحي رتبي اغراضك وجهزيها واذا بتنامين شوي نامي لان بس ظ£ ساعات ونخرج ماعندنا إيجار للفندق
ريتان خرجت من عنده متعبه مُرهقه عاجزه تفهم وش تسوي ووش بيصير لها لكن الاكيد ان رامز باع حياة اخوه
فـ ماراح تغلى عليه " ريتان "
دخلت غرفتها وجمعت اغراضها انتبهت لااسواره مرميه على سريرها
اول مره تشوفها
خذتها كان مكتوب عليها R حرف فقط وشديدة اللمعان ذهبيه
شكلها مطليه بالذهب او ذهب اصلي مررت عليها اصابعها بخفه
وطلعت لغرفة رائد يمكن له او اذا لرامز يشوفها ممكن يقصد فيها شيء
وقفت بجمود وهي تسمعه يهمس : زواجي من ريتان كله غلط بغلط
والله ندمان قد شعر راسي
شدت على طرف مقبض الباب وطرقته بهدوء
ودخلت : هذي لك ؟
رائد ناظرها لثواني : ايه وين لقيتيها ؟
ريتان : على سريري
رائد بأبتسامه لاذعه وهذه الابتسامات تصيب الاناث في مقتل : ارميها
صد عنها للشباك
وملامحه جامده وبيده اليسرى سيجاره اصبح بسببها اكبر ملوث للجو في هولندا بإكملها
خرجت مبتعده عن غرفته وهي تشعر بنار تشتغل في داخلها ( انا غلط في غلط ؟ )
قفلت شناطها وهي التي من بداية خروجها من منزل اهلها وهي لم تفرغها كامله ( حظ ) هذه الشنط سيء للغايه
لانها تمتلكها انسانه مثلي انا
بدلت ملابسها لشيء اثقل ورتبت حجابها وجلست على الاريكة القريبه من
الباب وكفها تحت ذقنهاا
ماهي الا دقائق ونامت ...

بعد ساعتين ..
فتحت عيونها على صوته يستعجلها تقوم
جلست بسرعه : شفيك ؟
واقف قدامها ببنطلون اسود وبلوفر واسع اسود ايضاً وكاب اسود على شعره وشنطة ظهر يلبسها وبكفه اليسار
مازالت السيجاره
بياض بشرته واحمرار انفه واعلى خديه
بالاضافه الى لمعان عينيه العسليه كانت سبب في معرفه ريتان الان لماذا كادت البنات يفقدن صوابهن في
الطائره
وقفت بتعب وسمعته يقول بسخريه : بتقدري تشيلي الشنط كلها ماعندي فلوس يعني مافي سياره يعني مافيه شنط اختاري وحده صغيره وتاكدي انك انتي اللي بتشيليها
صد وطلع وريتان غمضت
بقوه تحاول تضبط نفسها
طلعت وراه بسرعه : جوالي عندي اعطيك تكلم احد يدبر لك فلوس ؟
رائد جالس على الاريكة وعيونه بالارض وواضح يفكر : ما احفظ
الارقام
رجعت للغرفه وهي تفضي شنطتها الصغيره
وتحط فيها الاشياء المهمه ..

18 - 11 - 2020, 11:59 PM

البارت 112

بعد نص ساعة خرجوا من الفندق بخطوات تضيع بين الزحام
اشبه بمن سُرقت هويته وحُرم من اسمه في ليله واحد فقط
ريتان بربكة مدت يدها بمجرد ماعبروا
الشارع لتمسك طرف بلوفر رائد
التفت لها وهو الذي نساها لوهله
مسك ايدها وشد عليها وتجاوزوا الشارع بصمت مُهيب مماثل لخطورة وضعهم الحالي
كل واحد منهم افكاره تختلف عن الاخر ولكن يتفقان في نقطه وهي ( كيف هو سبيل النجاة ؟ )
افكار رائد عن شيء لم يتضح لكم حتى الان كان يفكر في كارثه لو مسكوهم الشرطه وفتشوهم مئة بالمئة سيرن الجرس وهو غير حامل لبطاقة التصريح
بطاقته واغراضه اخذها رامز ..
رائد لا يوجد لديه سلاح لكن تتوفر بأعماقه
رصاصة الرصاصة التي اطلقها عليه رامز
قبل سنتين لم يستطع اي طبيب جراح
اخراجها لانها لو اخرجت سيموت بالتأكيد مكانها يقع في وسط شريان مع هذا قدر الله ولم تسبب اذى عظيم لرائد لذا رفض اي طبيب اخراجها وبقيت في اعماقه ولكي يمر بسلام من عند
اجهزة التفتيش قاموا الجهات المتخصصه
بوضع تصريح لمثل هذه الحالات يوضح حقاً مايعانيه وانها لاتشكل خطر لكن لو ضاع التصريح بتصير
مشكلة عظيمه بيطلبونه يسلم السلاح واذا ماسلم سلاح بيطلقون عليه
وبيقتلونه اكيد
تنهد بتعب وهو يلتفت حوله يتمنى لو انه يحصل مكان أمن يترك ريتان فيه
ويروح يتفاهم مع رامز
بأي مقابل يبيه
المهم مايقرب للبنت الحين مايبي الا يرجعها لاهلها بسلام .
دخل في ممر ضيق وتوقف لثواني والتفت لها : اعطيني جوالك
طلعته له وهي ساكته ماقدرت تقول شيء
طول الطريق هي السبب هي اللي نبهت رامز وفتحت عيونه لو ماكلمته
رائد اشر على محل قدامه : بدخل احاول
فيهم يعطوني مويه لو ماضبط معهم بعت جوالك
ريتان شهقت : ايش ؟
رائد بنص عين : بنموت ! تبين تموتين
ريتان سكتت وهي تتنفس بقهر
تكتفت وصدت عنه
رائد ناظر حوله كان المكان فاضي وابتعد عنها للمحل
جلست وهي تتأمل الشارع اللي جنبها انكتمت انفاسها وتوسعت عيونها بدهشه
وهي تشوف سياره سوداء توقف قدام المحل
وينزل منها واحد يضحك ويدخل سلاح بجيبه
رفعت كفها لفمها تكتم صوتها : يارب لو مات وش بيصير لي ! حتى جوالي معه والوقت ليل
ليش مادخلت معه نزلت نظراتها للارض بخوف وهي تحس بحركة في اخر الممر
تقرب لها ........

فالمحل ..

دخل الشخص ونظراته تدور لـ رائد يعرفه سبق وشافه مع رامز
مرتين ممكن لكن رائد ملامحه شرقيه
وعيونه العسليه بتسهل من موضوع ايجاده
انتبه له واقف عند صاحب المحل يتفاوض معه قرب بهدوء ورفع بطاقة هوية
وبلكنة هولنديه طليقة نطق : انا الضابط " الفريد " نرجوا اخلاء المكان
خرج صاحب المحل بخوف ورائد يناظر الشخص بدهشه يحس
انه يعرفه !! يعرف ملامحه
همس بشك : راشد ؟
راشد ضحك : نعم طال عمرك
قرب له وبحركة سريعه غرز مسدسه
في جبين رائد وبيده الاخرى رفع رائد من
رقبته واصبح شبه مخنوق
راشد بضحكة : تخون طويل العمر تخون اخوك ليش عشان بنت !!!! على فكره ترى بتصير لعبه لنا كلنا ماصارت تهم
الرئيس ..
رائد وملامحه احمرت ويكاد يجن من كلامه : اي رئـ...ـيس
راشد ببحه وشفايفه قريبه من اذن رائد : تظن اني انا رئيس العصابه غلطان ترى اخوك هو الزعيم وانا مجرد خادم لا تفكر ان فيه احد اذاه او خرب
تربيته هو اللي ربانا وفتح المؤسسه
هههخخ صدمتك صح !!! رائد ببرود عكس داخله ابتسم : جاء معك !
راشد بسخريه : تدري انا ما احترم الاغبياء امثالك ولا اقدرهم مدري كيف تتكلم بهالهدوء وانت
تحت رحمتي !
رائد وهو مختنق لانه كلما تحرك زاد راشد
بقبضته على رقبته ..

19 - 11 - 2020, 12:01 AM

البارت 113

ريتان انكتمت انفاسها
بخوف وهي تحس بحركة في اخر الممر تقرب لها وقفت برهبه
وشالت شنطتها وركضت للمحل
انتبهت لصاحب المحل واقف برا ومرتبك
اشر لها ان المحل مقفل لا تقرب
طنشته وهي تسوي نفسها مشغولة بشنطتها عشان لو صار واحد جاء
يساعدها هذا على الاقل رفعت عيونها للمحل وهي تدعي ان رائد
يطلع لكن بهت لونها من شافته واقف وملامحه مختلفه والمسدس
بجبينه
اشرت لصاحب المحل وهي تصرخ
بالانجليزيه تطلب المساعده ‏( Help the man please )
ركضت للمحل ومسكها صاحب المحل
وهو يمنعها تدخل ..

فالداخل ...

ابتسم راشد : جايه الاخت تساعدك تدري انك ماراح تنفع نفسك قالت اروح افزع له " صح " !!
رائد وكلام راشد يستفزه اكثر رجع على وراء بقوه وهو يدفع راشد
عنه ويمسك السلاح
راشد شد بقبضته على السلاح
ودفع رائد بقوه وسقط على الارض
وهو يتاوه بألم لان راشد قفز فوقه
وبدأ يفتح الزناد لاجل يطلق عليه : هاه ! كلمه اخيره للمدام ؟
رائد سحب مفرش الطاوله اللي جنبه وتناثرت التُحف عليه وعلى راشد
ودفه بسرعه واصبح هو المتحكم بالوضع
راشد بأنفاس متقطعه : قوي شكلك رجال
ي ماما
رائد واعصابه استنزفت انحنى وهو يضرب بطرف السلاح جبين
راشد ويكررها حتى نزف وفقد وعيـه
ابتسم ودخل السلاح بجيبه وبسرعه
فتش جيوب راشد وطلع مفتاح السياره واخذ بطاقة الهويه المُزيفه
والنقود وسحب راشد لدورة المياه وقفل عليه فيها
وطلع مع الباب الثاني للمحل ووقف على جنب هو يتنفس بسرعه
ويراقب الوضع وريتان تحاول تدخل
تنهد بقهر منها : وش جابها ؟
كيف اخذ السياره الحين ؟!!! انحنى وجلس وهو يحاول
يضبط انفاسه
انتبه لريتان تدخل للمحل ووراها صاحب
المحل
ابتسم ومشى بخطوات هادئة وعيونه
عليهم خوف من صاحب المحل يشوفه
ركب السياره وقفل وشغلها وابتعد
عن المحل بسرعه للشارع الثاني و وقف على جنب ونزل راجع لريتان بياخذها ..

..

في استراحة بشرق تبوك ..
يلعبون بلوت كفريقين
ومجموعه اخرى تجلس تتابع
اعادة مباراه سابقة
وامامهم مكسرات واكواب شاي
تكلم احدهم اصلع ممتلئ قليلاً : عُمر وش هالكتاب اللي من اول ماجيت وهو معك
عُمر تنهد : كتاب عربي ابي طريقة حل لبعض الاسئلة
رمى احدهم الورق وهو يضحك : يلا ي مهزوم
التفت لـ عُمر : العربي سهل ترى خالد اتذكره يحل
ابتسم عُمر بشوق وضحك : ياظالم ما اخترت الا خالد !!؟
ناجح بمقبول تبيه يحل ويذاكر لا بالله ظلمته
ضحكوا كلهم وبدوا يتذكرون ايام الثانوي والغشّ بعد دقائق
وقف عُمر وهو يتنهد :يلا عن اذنكم اشوفكم بكره إن شاء الله
ودعوه وطلع وهو يفكر في عذر لـ رُبى عشان ينجوا من صوتها .. توقعاته كانت تُزهر في عيّني سُعاد كان المقصود هو رؤيتها خِلسه والتحجج
بالكتب والواجبات
لكن الواقع افلس منه نهائياً
اسال الله الثبات ...

في مكه ...
عند بُشرى .
اصبحنا على مطالع الفجر الساعه الان الثالثه والنصف صباحاً
من بعد مكالمة خالد
والتفكير لا يترك لها مجال للراحه تفكر في رد خالد ووش بيقول وكيف بتكون ردة فعل ختام ؟
وكيف لو عمها عرف ! اكيد ماراح يرضى
تنهدت وهي ترجع شعرها وراء وتغمض وتتنفس بعمق
فتحت عيونها ببطء ووقفت مبتعده عن
النافذة العريضه لغرفة النوم بمحاولة جاده ان تنام قليلاً قبل الاذان ..

19 - 11 - 2020, 12:03 AM

البارت 114

في هولندا
العاصمة امستردام ...

خرجت من المحل وهي مستغربه وين راح !!
وصاحب المحل يصارخ مفجوع بعد ماشاف الرجل اللي فـ دورة المياه
" اكرم القارئ "
واتصل بالشرطه يخبرهم بحالة اعتداء من حسن الحظ انه ما مات بس مصاب اصابه خطيره في الرأس
ابتعدت عن المحل للشارع الرئيسي وهي
تدور رائد ماتدري وين اختفى فجاءه
غمضت بقوه من حست بأحد يكتم صوتها بكفه ويشيلها من خصرها
ويركض فيها
حاولت تضربه وتفلت منه لكن ماقدرت بنت صغيرة وقصيرة يعني نتفه مالها
مجال تنقذ نفسها ..

عند رائد ..
وقف عند المحل بس بعيد شوي وهو ينتظر ريتان تخرج
تنهد بقهر : وينها !!! صد مبتعد عن المحل ورجع للشارع الرئيسي بخطوات بطيئه وعيونه بالارض
ومحتار وش يسوي ! لو دخل عرفه صاحب
المحل ولو هرب وتركها فـ مايصير
يعني بالنهايه زوجته وفي غربه مالها احد
رفع راسه وابتسم من شافها تمشي وتضرب برجلها في الارض بمّلل
مشى وراها بخفه وهو يحاول مايطلع صوت
وبحركة سريعه كتم صوتها وشالها وركض فيها للسياره
قبل تجيء الشرطه
وقف مقابل السياره وهو يتنفس بسرعه نزلها ع الارضض وناظرها بصدمه : دُبا
التفتت له وشهقت : انت !!! وينك ! وش صار
رائد بحده : اركبي بسرعه الشرطه
بتجيء
ريتان بأستغراب : هذي لمن ! " اشرت للسياره وهي تشوف رائد يركب "
بنبره واثقه : سيارتي يلا
ابتسمت وركبت بسرعه
وشغل وحرك ..

صباح يوم جديد
مختلف مثل اختلافات الايام
اختلف بعهد عقول سطحية جافه '
'في لوس انجلوس . '
تقِف وهي تسرح شعرها وتضيف اخر اللمسات
انفاسها تتسارع وتنخفض من وقت لأخر من شدة حماسها
لا ترجوا الان الا ان يجبر خالد خاطرها
ولا يردها خالية الوفاض
ارتدت معطفها على عجل وخرجت لـه متلهفه رده
وهي التي رفض النوم الاقتراب منها
وكانت صاحبة السهر والسهاد الليل الماضية
همس عندما وقعت عيناه عليها : صباح الخير
تأملت ملامحه في محاولة لمعرفة ما سيقول : صباح النور
وقف على عجل : يلا
تنهدت وخرجت خلفه من الجناح
نزلوا للكوفي تحت وطلبوا قهوه ودونات
وجلسوا برا
الجو غايم ومطر خفيف
نظرات ختام وترقبها لم تسمح لها بالنظر حتى في ما حولها او تأمل الجو
لم تترك فرصه لشيء ان يعدل مزاجها ولم تغّب عن خالد تصرفاتها
وهو يحاول بجد تركها لوقت اطول لانه نفسه لم يحدد اجابته بعد .
اقترب منهم النادل ووضع اكواب القهوه المّره ودونات السكر وابتعد بعد اخذ الحساب من خالد
تنهد خالد وهو يحاول جذب انتباه ختام : الجو اليوم ماعليه كلام
ختام صمتت بثبات على كلامها الليله الماضيه ورفعت كوب القهوه ترتشف منه بخفه
خالد ثبت كفوفه ببعض : زعلانه ؟
ماردت وهي تشيح بنظراتها عنه
لا حق له في اي كلمه مني بيننا وعد وديّن وانا افيّ بوعودي
ابتسم وهو يرتجي ان ترد عليه همس ببحه من برودة الجو : ولا حتى كلمه !!!!
مازالت هي الفائزة بهذا التحدي رغم رؤيتها لتلويحة وداع بين ثنايا كلماته الرقيقه
هو ليس مختلف توقعته حياة لي
ليس مجرد صاحب او حبيب
لكن خابت توقعاتي خذلتني حقاً
كان يجب ان لا يتردد في الاجابه علي
وانا احترق بترقب من الليله الماضيه
لم تعد قادره على الجلوس اكثر
والغصات تتراكم بقلبها
وقفت وابتعدت عنه وهي تشد
معطفها عليها
يناظرها بجمود ودهشه : وش صار؟
وقف بسرعه ومشى وراها : ختام !!!
وقفت وهي تناظر الارض وتلعب برجلها متجاهله ان ترفع عينيها له
همس لها : لا تسكتين كذا وانتي تعرفين الاجابه لاتشيلين بخاطرك علي ، انتِ عارفه مكانك وين صح ؟

19 - 11 - 2020, 12:04 AM

البارت 115

خِتام صمتت لثواني طويله ثم اردفت بوجع : ولا حتى كلمه بردها عليك الا بعد ماترد بشيء واضح انا ما اعرف مكانتي عندك ولا اعرف الاجابه لا تحاول تحسسني اني افهمك لدرجة قراءة افكارك طول عمرك ما شاركتني بشيء من مشاعرك
وافكارك كيف تبيني اتوقع او حتى اشك بشيء ابي رد صريح وواضح مثل سؤالي ، انا كنت شفافه معك رُد مثلي ...
تصاعدت انفاسها على هيئة ملح مذاب لتحشر في محاجرها
خالد وانفاسه تضيق وعيونه عليها يشعر بصدمه مما يحدث حقاً الوضع متأزم اكثر مما تصور هو لا يجرؤ على رؤيتها هكذا ملامحها
وانكسار عينيها يشعر بثقل في راسه
: ختااام
خِتام ماردت وهي ترفع كفوفها لوجهها وتبكي بحرقه
لتضعه في موقف محرج وجاد في وسط الشارع وبين الماره
اقسم بمن خلق عينيك الملونه الباذخة الجمال وملامحك النجدية وبشرتك البيضاء
وانفك الذي اُحب وكلامك المتغنج المليء بالطفوله والتسرع ان لا حيله لي في ما يحدث انا اعلم وموقن أني احبك لكن ماذا افعل بالبشر والكون
بأكمله
انحنى لعندها : افا ، من الصبح كذا كيف بالليل ؟ شكل هاليوم فيه احد
داعي علينا
رفعت نظراتها لهه بحده
ضحك وهو يهمس :تتوقعين بُشرى ؟
شكلها
ابتسمت ختام من بين دموعها على طاري بُشرى : لا تكلمني اقول
خالد ضحك : امانه اضحكي ماتليق عليك الدموع
خِتام صدت : لا
خالد : قلت امانه انا
خِتام ماردت عليه
خالد بتنهيده : افااا ، والله زعلك كايد
خِتام التفتت له : ايه ترى ما ارضى بسرعه
خالد ابتسم على جنب : ابشري باللي بيرضيك ، الله ياخذني ي شيخه
ان زعلتك وانا متعمد وبكامل عقلي
خِتام انكتمت انفاسها من دعا على نفسه
رددت بداخلها بصدق بعدم تحقق دعوته يزعلها او يرضيها شيء راجع له بس لا تتحقق دعوته يارب يارب
انك تعلم ان لا شيء مثل الموت سرق مني احبتي
ابي واخي يارب لا تجعل لي عمر بدونه انا ..
رفعت راسها له : طيب بصدق قول لي
خالد جلس على الارض مقابلها
على نصف ركبه ومسك ايدها اليمين وهمس : تقبلين بخالد اللي ناجح بمقبول ولا احد وظفه
وعايش مع اهله وماعنده الا غُرفه صغيره ماتجيء كبر اصغر غرفة ببيتكم
زوج لك !

..

خرجوا من امستردام
بأتجاه الريف
وريتان من التعب نامت
مر ثلاث ساعات فالطريق
فتحت عيونها بتعب : اففف ونهاية هالطريق !
رائد مرر يده اليسار على عيونه بتعب
واخذ السيجاره من يمينه ودخلها بفمه
وهو ساكت مارد نفث الدخان من فمه
وطلع يده من الشباك وبين اصابعه السيجاره
بأفكار عميقه متوتره لا يُدرك ماسيحدث بعد ساعات او ايام
ريتان بملل فتحت شنطتها تفتش فيها
: ابي اشحن جوالي اركبه هنا عادي !
رائد التفت لها : ركبيه
ريتان عقدت حواجبها :
وين بتوديني ؟
رائد طفى السيجاره والتفت لها : لجهنم
ريتان غمضت عيونها بقوه تضبط اعصابها
ولا ردت
رائد عدل جلسته وقدم راسه شوي
للمقود وهو يحاول يشوف الاكواخ اللي قدامه
تنفس براحه : وصلنا
التفتت له ورجعت تناظر قدامها
وقف وبنظرات واثقه التفت لها : شوفي بنزل ادور كوخ فاضي وانتي لا تتحركين من هنا
اشحني الجوال وقفلي السياره عليك
ريتان بلعت ريقها بربكه وهزت راسها : طيب
اخذ بوك وبعض الاوراق من السياره
ونزل وريتان تتابعه بنظراتها قفل الباب
وابتعد عن السياره
ريتان غمضت عيونها لثواني وفتحت ببطء ومسكت جوالها تطقطق فيه
تجمدت ملامحها من شافت اشعار رساله
ومن رامز التفتت حولها بخوف لايكون قريب
فتحت الرساله وهي
ترمش بسرعه (( لو رحتي لاخر الارض بجيبك انتي والخاين اللي معك ))
قفلت الجوال بسرعه وطاح من ايدها من الخوف وش سويت انا ؟ هذا ما ينلعب معه صدق
ادركت فـداحة الذنب الان لم اكن اشعر ان الامر بهذه الفضاعه
كان على وشك قتل اخيه وبالاضافه
الى انه قتل ابـي حبيبي وقرة عيني
هل يوجد مجال للشك او تأمل ان يرحمني من بطشه ؟ من جوره
وظلمه !
ما الذي عملته بنفسي أين عقلي ؟

المواضيع المتشابهه لموضوع: رواية العابث ال خير في هذا الزمان لموضوع: رواية العابث ال خير في هذا الزمان
الموضوع	كاتب الموضوع	المنتدى	مشاركات	آخر مشاركة
قطة الغابة النرويجية	همسه الشوق	همس لعالم النبات والثروه والزراعه والحيوانيه	4	25 - 9 - 2021 08:02 PM
رواية وانتبه لك ترى روحي معك رواية سعوديه للكاتبه	الحب ياسمين	همس للقصص وحكايات وروايات	9	4 - 4 - 2019 10:13 AM
رواية فهد و نوره رواية رومنسية سعودية كاملة	سجات التهاويل	همس للقصص وحكايات وروايات	23	8 - 6 - 2018 01:07 PM
فندق على شكل فقاعة في الغابة	نظرة عين	همس للسياحه والسفر	8	22 - 2 - 2015 09:05 PM
شوف كيف بيتحمم ملك الغابة	لك مشتاق	همس الشعر و الشيلات الصوتيه	9	6 - 10 - 2014 10:21 PM

الذين يشاهدون محتوى الموضوع الآن : 3 ( الأعضاء 0 والزوار 3)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع

رواية العابث ال خير في هذا الزمان

همس للقصص وحكايات وروايات