رواية جنوبية برت حالي ولا دري وين ديرتها

29 - 5 - 2021, 10:09 AM

البارت46

صارت تتلمس كل جزء من جسم أمها اللي صار متورم بشكل كبير بسبب احتباس السوائل..وصلت لرجول أمها اللي من شدة الورم تحسها بتنفجر هذي الرجول اللي ياما تعبت علشاننا دنقت وهي تبوسها امنيتها تحققت انها تبوس رجول أمها من زمان تحاول هي واخواتها يبوسون رجول أمهم وترفض بمجرد مالمست شفايفها رجول أمها حستها
أمها حستها تحركها وتبعدها حتى وهي تعبانة مازلت ترفض غطت رجول أمها وهي ترفع راسها شافت ريم وهي نايمه على الكنب قومتها علشان تروح البيت ترتاح بتجلس مع امها انتظرت ريم لين تجهزت وخرجت معها ..
شافت الدكتور امجد استشاري المسالك وجراحة الكلى.
واقف مع الدكتور خالد استشاري مخ واعصاب .
اشواق : المعذره منكم تأخرت عليكم تفضلوا
وهي تدخل قدامهم.
الدكتور امجد وهي يشوف التقرير النهائي وهي تناظر لتعابير وجهه تبغااه يتكلم يعطيها الكلام النهائي لحالة أمها علشان ترتاح لانها عرضتها على اكثر من استشاري حتى خارج أبها ارسلت نماذج من التقارير لرياض وجدة وبحكم انها تعرفهم طلبت منهم استشارة طبية وكلهم قالوا نفس الكلام .
الدكتور امجد/لا بسم الله ماشاء الله عليها الوالده طيبه وصحتها تتحسن وفي استجابه ملحوظه.
وهو يأشر على جهاز القلب المعلق في الجدار شوفي دكتوره اشواق معدل نبضات القلب صار طبيعي والأكسجين افضل من امس الجلطة اللي صارت للوالده مااثرتها كثير لأن جسمها قوي مرة وقدرت تتحمل .
اشواق بفرحة ناقصه : الحمدلله بس لسانها ثقيل ويد ورجل لها ماتقدر تحركها إلا بصعوبة.
الدكتور أمجد /الوالده يادكتورة اشواق كبيرة سن فطبيعي اللي صار لها وعندها ضغط وسكر مزمن بس جسمها قدر يتحمل ويقاوم لو الجلطة اللي جتها في واحد شباب كان مات من وقته انا اشوف ان استجابتها سريعة وفي تحسن ملحوظ بس لازم تنتظم على حبوب الضغط وابر السكر وحبوب الأسبرين علشان تمنع الجلطات المستقبلية لاقدر الله بما انها مريضة ضغط وسكر.
اشواق حست ان كلامه ماطمنها : اقدر دكتور امجد انقلها المانيا او اي مستشفى ثاني .
الدكتور امجد /دكتورة اشواق حطي في بالك امك كبيرة سن امك تجاوزت نصف السبعين من العمر ولو في فايدة من نقلها كنت راح اقول لك بس كبر السن له دور في حالتها رغم اني اشوف انها طيبة وحالتها جدآ مستقرة اليوم راح نشيل جهاز الأكسجين عنها وتتنفس طبيعي وكل ثلاث ساعات لها جلسة اكسجين .راح اكتب لها خروج بكرة مثل ماتعرفي دكتورة أشواق الزحمة وفي حالات احق انها تتنوم والعناية اللي نقدمها لها هنا تقدري انتي تقدميها لها في البيت والعلاج الطبيعي تاخذه كل ثلاث ايام.
الدكتور خالد : فعلا ياكتورة اشواق انا اشوف امك تحسنت عن قبل حتى الكلى تحسنت من خلال اخر تحليل بعد مااعطيناها حبوب المدرة للبول تحسن ملحوظ في عمل الكلى او افضل من قبل راح نستمر معها علي الحبوب المدرة شهر ونشوف اذا ماتحسن عمل الكلى افضل من كذا راح اضطر اني افتح لها واسوي لها غسيل كلى.
اشواق /طيب اقدر انا اتبرع لها بكليه او اي احد
الدكتور حمدي/نقول ان شاء الله ماتحتاج تبرع ما اقدر احدد الا بعد عملية الغسيل وبعدها نحدد على مدى الأستجابة الفعلية بعد الغسيل ويمكن ماتحتاج حتى غسيل اذا رجعت الكلى تعمل بشكل جيد.
اشواق وبدون اي ردت فعل ماحست بشي وكأن احاسيسها ماتت ماتحس بخوف ولا آمان ولا شي سكتت وهو تشوف الدكتور امجد يكتب في التقارير
خرجت معهم وهي ساكته ماتدري ايش تقول ..
ظيمنع
ظيمنع

علي
واقف مع ولده محمد ويهاوشه : انت ماتفهم الشرهه علي انا كلمتك تجي توقف معي المفروض اني اتصلت في أحمد وإلا عبدالله ابرك منك وانت ترجع تداوم وإلا تذلف عند أمك .
محمد وكل عصبية الكون فيه اول مرة ابوه يهاوشه كذا وعلشان مين علشان بنات اخوه اللي فجأه طلعوا لنا : انت يرضيك يبه بنات اخوك يدجون مع السواق اذا انت يرضيك انا مايرضيني اشوفها تخرج قدامي مستحيل اسكت عن الغلط لو تذبحني .
علي : محد طلب منك البنات من زمان وهم مع السواق ومالك كلمة عليهم ولا حتى انا وحنا عنهم من زمان فجأه طلعنا لهم ونتحكم فيهم وبنبرة كلها تعب وندم
مالك دخل فيهم يامحمد تكفى لا تزيدها علي انا لحد ذحين ماني مصدق ان احمد عنده بنات حلم احس ذحين لازم نسايرهم لين نكسبهم ولا نضغط عليهم .
محمد وكلام ابوه ماعجبه مرة وماراح يسكت قبل شوي خرجت منهم مع السواق اللي كان واقف معنا ولما سألها ابوي بكل احترام قامت عليه بكل وقاحة ولو مامسكني ابوي كان ذبحتها .
والمفاجئه ان الدكتورة اشواق طلعت بنت العم يالله كيف الدنيا تجمع بلا موعد في الوقت اللي حاول ينساها ظهرت له مره ثانيه من شافها اول مرة ولحد مااخذ الذاكرة اللي فيها صورها وهو يتعذب رغم ان كل الصور وهي لابسه نقاب او لثمه والبلا كله من عيونها عجز ينساها كان يبغى يعرف هي من وين في الجنوب ..

29 - 5 - 2021, 10:09 AM

البارت 47

اكثر من مرة يروح المستشفى ويستحي يسأل ويوم المراجعة ماكانت موجودة والحمدلله انه ماتهور وهددها او نشر صورها وهي بنت عمه ماكان راح يسامح نفسه .
رفع عيونه على صوت فتح الباب يشوفها تخرج مع الدكاتره وتستمع لهم بكل تركيز .
عباية على الكتف ساترة ونقابها اللي مبرز جمال عيونها ووسعها وكثافة رموشها تحرك شي بداخله غصب عنه شافها وهي تلحق الدكتور مشى وراها وقبل تدخل مكتب الدكتور حط يده على الباب يمنعها تدخل ولا همه كلام ابوه اللي قبل شوي ماهو ديوث علشان يسمح لها تدخل عند رجل اجنبي عنها ..
اشواق كانت بتدخل مكتب الدكتور خالد رفعت عيونها في اليد الممتده على الباب رجعت تناظر فيه من تحت لفوق نفس اللي كان واقف مع اللي يقول انه عمها لما وصلت لوجهه انتفض فيها كل عرق مثل الصاعقة اللي ضربتها نفس المريض اللي تكلم عليها وهي ضربته مستحيل تنسى ملامحه مستحيل شد انتباهها وهو في غرفة الأفاقه بعد العملية ددقتت في ملامح وجه قبل مايفوق من البنج حست انها تعرفه او يشبه احد بس ماركزت فعلا يشبه ابوها نفس حدة الملامح لما وصلت لوجهه شافت خشمه وفيه ندبه انتفض جسمها كله بخوف وهي تشوف ملامح الغضب على تقاسيم وجهه وتقوس حواجبه شافت اسمه معلق على البدله العسكرية محمد علي محمد ال زايد
نفس الأسم اللي قاله لها الرجل اللي يقول انه عمها حاولت تتماسك ولا توضح له خوفها ناظرت فيه بقوة مزيفة : بعد يدك لو سمحت .
محمد وهو يناظر فيها بمشاعر مختلطه واللي غلب هي مشاعر الغيرة على العرض مثل النار يحسها بنات عمه مفلوتين لا رقيب ولا حسيب اذا ذي دكتورة اجل الباقي الله يستر و بأمر : ارجعي غرفة أمش بسرعة وبلا دجة مع الرجال .
اشواق بقهر وتعب وضغط نفسي: اقول شكل المرة الأول ماجابت بك طب شكل المرة ذي اخرج عينك علشان تحترم نفسك وهي تأشر بأصبعها النحيف لوجهه .
محمد انجن محد قد قال له كذا : تخسين وتعقبين نزلي يدش وإلا قسم بالله اكسرها ماتخافين على نفسش انت.!
اشواق وهي تضحك مغبونه ومقهورة اللي يفكر بس مجرد تفكير راح اوسم خشمه نفسك بالضبط.
محمد جن جنونه وهو يمسك يدها بدون مايحس ويلويها لين حست ان مفاصلها تفككت .
محمد ولد فك يدك كان صوت ابوه الغاضب اللي خلاه يفوق ويرجع لوعيه من موجة الغضب .
اشواق تحاول قد ماتقدر تتحمل ألم يدها شافت ابوه يوقف وهو يدف ولده وبغضب : ايش تسوي يامجنون انقلع بنات اخوي مالك دخل فيهم ..
اشواق وهي تسمع كلامه حست بأمان احساس ان احد يدافع عنك يخاف عليك سمعته وهو يقول : اربي بنت اخوك
ردت عليه بقول : تخسى وتعقب متربية قبل اشوف وجهك إذا كنت المرة اللي طافت تنازلت عن الشكوى بكيفي وتنازلت علشانك من المرابطين على الحد بس طلعت منت بكفو ولا احترمت البدلة اللي عليك لكن قسم بعزة الله وجلاله يالمرة ذي ماغير اجيب خشمك الموسوم ذا وذي اكبر شاهد وهي تأشر على كاميرات مثبته في سقف المستشفى وتدخل قبل تسمع اي .!
علي واقف بينهم مصدوم ولا يدري ايش قصدها في الكلام ناظر بغضب في ولده : انت ماتفهم مالك حق تمد يدك عليها دوبي كلمتك مسرع نسيت ناوي تجلطني انت .
وهو يشوف ولده واقف وعيونه على الباب ولا سمع ايش يقول أبوه التفت لأبوه : يبه بنت اخوك داخل مع الدكتور شفتها ..
علي وهو يضرب صدر ولده بكل قوته اول مرة في حياته يضربه : انقلع من وجهي يامحمد صدقت لما قالت ما احترمت البدلة اللي عليك اخرج حد النفس طيبة عليك اخرج قبل تشوف شي مايسرك وحسابي معك بعدين احمد كلمته ومع الطريق جاي هو اللي بعتمد عليه وإلا انت خلك بس ماغير تعافر بدون فايده.
محمد ولا اهتم لكلام ابوه كل تركيزه مع اللي في الغرفة يحس نار تشتعل بصدره ناظر ابوه اللي معصب : يبه بنت اخوك وحدها يبه وين الغيرة ذي عرضنا وشرفنا.
علي بقلة حيلة : اعرف انه غلط لكن ماهو من حقي ذحين اجي واحاسبها انا يامحمد ابغى اكسبهم في صفي وحالتها ماتسمح اني اناقشها في شي اللي صار لبنات اخوي شي كبير وبضعف محمد يابوك ذحين انا على كتفي هم مثل الجبال والله ثقل يهد الحجر بنات اخوي اكثر من 16 وهم بلا سند ولا عزوه وحنا ماندري حسبي الله على من كان السبب قهر الرجال دوبي احس به ذحين الله يسامح ابوي الله يسامحه بس .
محمد وهو يشوف انهيار وتعب ابوه مسك يده : تهون ياابومحمد تهون وانت قدها وإن شاء الله تزين الأمور دامك لقيتهم اهم شي طيب عنده بنات عمي غير ذي وهو يأشر على الغرفة بقهر وغيرة

29 - 5 - 2021, 10:10 AM

البارت 48

علي وهو يزفر بقوة : تخيل اني شفت بنت اخوي مرتين وكلمتها ثلاث مرات واتابعها سناب وانستقرام ولا اعرفها.
محمد وهو يناظر بتركيز في ابوه
علي : بنات اخوي حولي ولا كنت ادري خزامى سوت لي اعلان ولفارس ولا ادري انها بنت اخوي بس كنت حاس بشي لما شفتها اول ماشفتها ضاق صدري كأني اشم ريحة احمد حولي كنت اخاف عليها ولا اعرف انها بنت اخوي ضاق صدري عليها لما هاوشتها ولا نمت ذاك الليل وانا اتذكر الوجع بعيونها من كلامك وماارتحت لين أميرة راسلتها وقالت انها في الفندق وانها طيبة اثاريك يامحمد كنت تسب وتشتم اخوي عنده بنت ثانيه اسمها ندى خريجة صيدلة وفي اشياء ثانيه اتعبتني قهرتني محتار ايش اسوي كيف قسى قلب احمد كيف ماعلمنا انه تزوج وانجب.
محمد وهو في حالة ذهول من اللي يسمعه من ابوه وهو يتذكر نظراته لخزامى واحتقاره لأشواق ..
ظيمنع
ظيمنع

اليوم الثاني الصباح
محمد/

وهو ثاير يناظر في ابوه واخوانه احمد وعبدالله ماخلا شي قدامه في الغرفة ماكسره لما يعصب لازم يفرغ اللي في داخله بأي طريقة .
احمد وهو يمسكه وقعده جنبه : محمد ولد صل على النبي خلاص الحمدلله ماصار شي نقدر نتصرف وعندنا اكثر من طريقة نخليها تتنازل عن البلاغ غصب عن خشمها.
عبدالله وهو يشوف وجه اخوه المحمر من شدة الغضب : محمد ترى الموضوع مايحتاج كل العصبية هذي الله يصلحك والحمدلله ان البلاغ كان مرسل على مقر دوامك في الرياض وماوصل نجران والبلاغ بمجرد ماوصل كنت انا اول من شافه ومسكته قبل مايعتمد من هيئة التحقيق والأدعاء العام وانا ذحين شفت كل اوراق بنات عمي معظمها كلها مزورة وعندي اكثر من دليل ادانه لهم خاصة أشواق .
علي وهو يثور في عياله : والله منتو رجال انتوا صاحيين تبغون تسجنون بنت اخوي تبغون تسببون لي جلطة بدال ماتوقفون معي تكسروني فيهم .
محمد/ ايوه اسجنها واسحبها على خشمها واعلمها كيف تحترم نفسها قليلة التربية يبه بنت اخوك رافعه علي قضية تحرش يبه انا ترفع علي قضية تحرش علشاني رفضت تدخل عند الدكتور لوحدها وكان البلاغ بيوصل مقر دوامي لولا لطف ربي انت متخيل شكلي يبه ضابط ويصير لي كذا الله ياخذها بنت اخوك هذا إذا كانت بنت اخوك صدق.
كف قوي من ابوه هو اللي سكته انفاس علي المتلاحقه عجز وندم وحيرة وقهر من كل شي كان يناظر في وجه ولده البكر محمد احب عياله لقلبه
حاط يده على وجه اللي تحول لكتله حمراء من قوة الكف هو ماعمره ضرب احد خاصة عياله قرب منه وهو يمسكه : تقذف عمك ياكلب والله انهم بنات احمد ومن صلبه والله انها عيون احمد وعيون امي ماخذينها منهم والخشم وكل شي امس قابلت السواق الشايب وبمجرد ماشافني قال انت تشبه لعمي أحمد مره
ولما سألته جاوبني عن كل شي واخرجت له صورة لعمك
وقال ايوه هذا هو عمي احمد هو عندهم سواق من 17-18سنة بنات اخوي خط احمر ولا احد يقرب منهم وانت ياعبدالله بطريقتك تقدر تحل كل شي البلاغ بيدك و معارفك في كل مكان معك يومين تقدر تصحح فيها اوراق بنات عمك وعندي شهادات ميلاد لهم الأصلية وكرت العائلة الأصلي لا بارك الله في زوجة ابوهم وحسبنا الله ونعم الوكيل فيها خلص كل شي يخص بنات عمك بدون مايمسهم شي .
احمد/والقضية اللي رفعتها على محمد يبه .
عبدالله/مافي إلا حل واحد وازهله عندي
وهو يناظر محمد اللي ساكت عيونه في الأرض .
علي/بصركم حلوها بعيد عن بنات اخوي وهذا انا حذرتكم والله لو جاهم مثقال حبة ماغير اذبحكم كلكم
وهو ينقل نظراته النارية بينهم وانت ياعبدالله تصرف انا متكل على الله ثم عليك وإذا محتاج فلوس هذي البطاقة اخرجها من جيبه خذ اللي فيها كامل لو يبلغ مليون خذه اهم شي بنات اخوي .
عبدالله/ ابشر ابشر إن شاء الله مايصير إلا كل خير.
علي وقف وهو يناظر في محمد اللي ساكت وجه كلامه له : قم انت و اخوانك ذحين اجهزوا فارس وجدك وجدتك باقي ساعة ويصلون المطار بنستقبلهم وناخذهم معنا بيت عمك لازم أمي وأبوي يعرفون بكل شي عشر أيام وانا اتهرب من اتصال ابوي وامي .
وخرج وهو شايل هموم الكون كله على ظهره وصل الغرفة وهو يوقف قدام الشباك والمطر ينزل على خفيف والضباب مغطي كل شي عشر ايام ما يدري كيف مرت عليه لا ما مرت باقي تثقله من تكرر عليه الحلم اخذ الرقم اللي ارسله فارس واتصل على مفسر الأحلام وقال له كل الأحلام اللي كان يشوفها واحلام ابوه خاصة الحلم اللي كان احمد لابس احرام وبيده كيس وواقف على جبال كله اشجار خضراء ويقول انا بردان لبسوني ملابس
سأله المفسر اسئله كثيرة تخص احمد اخوه وتخص العائلة كاملة قال المفسر إن صدقت الرؤيا ان اخوك احمد عنده ثلاث بنات وخايف عليهم وساكنين مع زوجتة في الجنوب وتحديدآ السودة ووصف له البيت وصف دقيق حس كأنه يحلم المكان اللي وصفه له المفسر سبق وراح له بعد موت اخوه

29 - 5 - 2021, 10:10 AM

البارت 49

لأنه سأل الرجل اللي كان في الخيمة مع اخوه أحمد وقال له مانعرف عنه شي غير انه من ابها وتحديدآ السودة قرية الخضراء بس وبعد ماخلص عزا اخوه راح السودة ووصل قرية الخضراء وصلى العصر في المسجد الصغير وسأل عن واحد اسمه احمد محمد ال زايد
قالوا مانعرف احد بأسم ال زايد في القرية مره لكن في بيت قدام لواحد أسمه احمد وماندري هو وإلا لا روح وتأكد بنفسك رحت وانا ابغى اطير من الفرحة على الاقل اعرف عن اخوي اي شي تزوج وزوجته وينها .
وصلت ودقيت الباب وفتحت لي حرمه عجوز سمراء متلثمه بطرحتها من شافتني خافت وقفلت الباب بوجهي قبل حتى اقول السلام وانا استغربت رجعت دقيت الباب بقوة لين فتحت قالت بلهجه غريبة ماهو تريد منا.
قلت لها اطمنها ياحرمه انا ماابغى منش شي جيت انشد عن واحد اسمه احمد محمد ال زايد يقولون انه صاحب البيت .
قالت لي وهو تحاول تدخل بنت صغيرة وتمنعها من الخروج
كان عندي أمل انها بنت احمد بس لما دققت في ملامحها ماكانت شبه احمد او احد منا قالت الحرمه مانعرف حد اسمه احمد وقفلت بوجهي .
تأكد انها مستحيل تكون زوجة احمد مستحيل احمد يتزوج وحده عجوز كذا وغير سعودية وواضح من شكلها وطريقة كلامها .
لكن بعد مافسر له الشيخ الحلم حجز على أبها ثاني يوم وعلى طول راح نفس المكان بنفس القرية اللي تغيرت تغير واضح وصلى بنفس المسجد اللي تم ترميمه وصار كبير بعد ماخلص الصلاه سأل احد المصلين عن البيت اللي قريب من المسجد قال له انه لمعالجة شعبية اسمها عايشة و تراها ماعاد تعالج مرة لأن جاها منع من وزارة الصحة بس اذا انت تحتاجها مرة حاول تقابلها ماراح تقصر تراها اجوديه سواقها اسمه سليم كان يصلي جنبك تحصله ذحين عند البيت ..
خرج من المسجد وكل مشاعره مختلطة مابين مصدق ومكذب ومابين فرحة وخوف مشى لين وصل نفس البيت اللي سبق وجاء عنده بعد موت اخوه بيت شعبي تم ترميمه بشكل جيد وحوش كبير حوله وصل البوابة وهو يشوف جمس واقف عنده نفس السواق اللي صلى معه صغير في السن سأله عن صاحب البيت قال ميت من زمان حس قلبه ينقبض مايدري ايش يسوي قال له انا تعبان وجاي من الرياض ناس قالوا لي ان صاحبة البيت تعالج وأنا ابغاها تعالجني واخرج 500ريال من جيبه وحطها بيد السواق وبحركة غير متوقعة من السواق رجع الفلوس ليدي وقال انا بكلم عمتي عايشة اذا تقدر تعالجك دخلتك انتظر هنا ودخل من البوابة .
وقف ينتظر عند الباب وهو يدعي الله ان تفسير الحلم يكون صحيح شوي وخرج السواق وهو يرحب بي تفضل ماكأنه هندي حتى في كلامه بلهجه مقاربه لكلام اهل المنطقة شكله مبطي يشتغل هنا .
دخل من البوابة وهو يحس بصدره يضيق شي حاثم على صدره اخذ نفس عميق مشبع بروائح اشجار وطين مخلوط برذاذ المطر اللي ينزل رجع تلثم بشماغه من البرد والضباب اللي مغطي الحوش كامل توسط المكان وهو يشوف اشجار كثيرة منتشرة في الحوش كأنه حديقة وابرزها شجرة سد عملاقة و علب بويه كلها حبق ونعناع والرياحين واشجار عطرية محتلة كامل الحوش دخل المجلس الخارجي
عبارة عن كنب اسود جلد فخم وخداديات صغيرة فضي واحمر طاولة اسود زجاج كبيرة حولها طاولات نفس الشكل صغيرة جلس بوسط المجلس وهو يشوف السواق جايب له علبة مويه اخذها بدون مايفتحها هو متوتر وخايف اخذ جواله ويفتح التطبيقات بلا هدف رفع راسه لما حس في السواق يقوم ويوقف عند الباب بمجرد ماشاف حرمه تمشي بشويش تتسند على العصا ملتفه بعبايتها ولثمتها توسطت المجلس وهي ترحب وبأنفاس مقطوعة
مرحبآ الف يالله حيه وهي تحاول تركز نظراتها
علي وقفت وانا اتحرك لها وصرت مقابل لها علشان تشوفني كويس والله هي اللي سبق وجيت لها نفس صوتها سمعت شهقتها
لما تأكدت مين أنا .!
قلت لها اتوقع ياعايشة ماني بضيف ترحبين بي انا راعي محل شافها ترجع لورا وهي تجلس على الكنب التفتت لسواق اللي مازال واقف قالت
له سليم اخرج وصك الباب .!
ناظرت لها بقوة وقلت اسمعي يابنت الناس انا سبق وجيتش واسأل اذا تعرفين واحد اسمه احمد محمد ال زايد وجحدي وقلتي مااعرفه مره واليوم انا جيتش ومتأكد انش زوجة احمد وين بناته ..
عايشة وهي تحس بنبض في راسها وتنمل في اطرافها نفسها يضيق السر اللي كانت مخفيته عن الكل بدأت تظهر اول خيوط هذا السر اللي جاهدت انه ماينكشف سوت المستحيل علشان محد يعرف وكانت حاسه انه راح يجي يوم وينكشف أمرها والحق يرجع لأهله مهما طال الزمن تعبها تضحيتها حياتها كلها ذحين بلمح البصر راحت حتى اخوها الوحيد تخلت عنه ومات زعلان منها ارضها اللي نولدت فيها هجرتها كانت انانية بشكل لا يوصف جت لسعودية مع ابوها وامها واخوها خليل وهي بعمر 15سنة اخرجهم من ارضهم الجوع والحرب بين القبايل خرجوا مشي على رجولهم متسلقين جبال شاهقة وعرة يومين متواصلة و كانت شاهدة على وفاة أمها في الطريق

29 - 5 - 2021, 10:11 AM

البارت 50

كانت حامل وانهكها الجوع والعطش لفظت انفاسها الأخيرة في احد الجبال دفنها ابوها وكملوا المسير لين وصلوا السودة وهنا عاشت مع ابوها اللي اشتغل راعي غنم وابل عند احد سكان القرية وهم مجهولي الهوية ابوها راعي وهي واخوها خليل في المزرعة يشتغلون وبعدها صارت تعالج الناس وزوجها ابوها لرجل من نفس جنسيتهم واستمر الزواج 10سنوات بدون انجاب كانت تعالج عقم النساء وتعجز تعالج نفسها اي وحده تعالجها كانت تحمل من ثاني شهر وطلقها زوجها علشان انها عقيم استمر ابوها في الرعي واصبح لديهم دخل مادي اشترى ابوها قطعة ارض صغيرة وتم بناء غرفتين وحوش صغير اخوها خليل قرر الرجوع لبلادهم وهي رفضت ترجع وجلست مع ابوها وبعد 5 سنوات تزوجت واحد سعودي اسمه منصور كان معه بنتين كل بنت من زوجه الكبيرة رقية عمرها 11سنة وريم صغيرة عمرها سنة.
فرحتي فيهم ماتوصف كنت لهم الأم الحنون عوضت فيهم نقص الأمومه حبيتهم حب الأم لعيالها واكثر وكبرت رقية وكبر حلمي فيها وصل عمرها 15سنة زوجها ابوها لواحد يعرفه يتاجر معه في الحلال اسمه أحمد رغم انها كانت صغيرة يقول شفت فيه الرجوله والطيب وكانت فرحتي فيها ماتوصف حملت من ثاني شهر وبعد الولادة تعبت وفجأه صارت ماتشوف عميت وماتقدر حتى تمشط حتى شعرها وتعبت من تعبها وزوجها ماخلا مستشفى إلا عالجها فيه بدون فايدة عيونها ماتقدر تشوف بها وكانت تبكي وتصيح حتى بنتها أشواق مارضعتها انا كنت اهتم فيها واراعيها وهي اخذها زوجها الأردن علشان يعالجها واشواق جلست عندي وبعد فترة رجعت وهي حامل وولدت بندى ونفس حالتها ماتشوف ولا تقدر حتى تحرك اصبع لها وانا كنت أم لبناتها ولريم واهتم فيهم وينادوني ماما
ورقية على وضعها وماكنت اخلي بناتها يروحون لها كنت اخاف تأذيهم كانت تجيها حالات هلع وخوف وتكسر كل شي عندها تعبت معها وزوجها تعب معها وبعدها حملت بخزامى وماتت بعد يومين من الولاده وحزنت لموتها انا وابوها وزوجها وبعد اسبوعين مات ابوها زوجي منصور كملت العده وجاني ابوي وقال ياعايشة ما يصير ان احمد زوج رقية يدخل عند بناته وانتي في البيت وماهو محرم لش خليه ياخذ بناته ويروح
كنت بنجن كيف ياخذهم وانا قلبي تعلق بهم وهم تعلقوا فيني انا امهم قلت لأبوي والله مااخليه ياخذهم وانا تعبت عليهم قال اجل يتزوجش وفعلآ تزوجني وانا اكبر منه في العمر كان يسافر ويرجع يطمن على بناته وبعدها بفترة مات ابوي وجاء خليل وقال يله خلنا نرجع بلدنا قلت مستحيل ارجع واخلي بناتي قال ماهم بناتش قلت له كلمة وحده والله مااخرج من هنا إلا على قبري ورجع ديرتنا زعلان مني ولا اهتميت له وانا مشغولة في بنات رقية اصبحت أم لهم لأشواق وريم وندى وخزامى اللي حبها اخذ قلبي واذا جاء ابوهم اخذهم المجلس عنده وانا مستحيل اقدر اخرج عنده ماكنت اشوفه زوج كان صغير وانا اكبر منه وهو حتى مايحاول يكلمني او يسأل عني كان اغلب وقته ساكت ولا ادري عنه شي نادر مااشوفه راح يحج وبعد اسبوع من الحج جاني خبر موته فرحت علشان محد يجي يطالبني في البنات لا من قريب ولا من بعيد وكنت اخاف احد يجي من اهله وفعلآ جاء اخوه وكان نسخه منه وعصبت عليه
وقلت مااعرف احد اسمه احمد ورحت عند امير سبق وعالجت ولده وقد قال لي لش جميل في رقبتي اذا احتجتي شي تعالي وابشري ورحت له وقلت ماابغى فلوس ابغى بس تغير لي اسم ابو زوجي وعائلته وقلت له اخاف ياخذون بناتي مني وانا تعبت عليهم وكذبت عليه وماقصر معي غيرت الأسم الجد والعائلة وبدال مااسم اشواق واخواتها احمد محمد ال زايد غيرته احمد عيسى ال فرحان وريم ماغيرت اسم ابوها لأني عارفه ان احمد اخذ عليها تنازل ووكالة عامة من امها واخوالها وفهمتها هي واخواتها لما كبروا انها بنتي من زوج ثاني اخذتهم ورحت ديرتي بجواز سفر مزور وهوية مزوره شهر هناك وانا كنت خايفة على البنات يصير لهم شي خاصة ان الحرب بين القبائل مستمرة وبعدها قررت ارجع السعودية ورجعت واستمريت في كذبي وتزويري لكل اوراق اشواق واخواتها كنت احسب ان الحقيقة بتطويها السنين وماتنفتح بس لازم الحق يرجع لأهله مهما طال الزمن .

مسحت عيونها وهي تناظر في علي اخو زوجها ونسخه منه بكل شي قالت له وهي تاخذ نفس قوي علشان تقدر تتكلم احمد له ثلاث بنات اشواق الكبيرة وندى وخزامى الصغيرة .
شافته وهو يحط يده على راسه ويرجع يسجد في الأرض خلص من السجود وقف وهو يتقدم عندها لين صار قريب وبكل قهر حاول انه يمسك نفسه مايذبحها مايحق له يمسها وهو اجنبي عنها وبغضب وين بنات اخوي وينهم حسبي الله عليش

29 - 5 - 2021, 10:11 AM

البارت 51

عايشة وهي تحس بثقل في راسها ومثل الغشاوه على عيونها وحاسة ان نهايتها قربت صارت تشوف الموت قدامها : قبل تشوف بنات اخوك في شنطة خاصة في اخوك فيها كل شي يخصه رفعت جوالها الكشاف حاولت يكون صوتها طبيعي يمه ريم ادخلي غرفتي وخذي المفتاح من تحت فراشي وافتحي قفل الصندوق الحديد وطلعي شنطة جلد وجيبيها عند باب المجلس وارجعي.
الصندوق هذا كان مقفل ومستحيل احد من بناتها يفتحه كل اوراقهم الأصلية فيه ولا وحدة فيهم قد شافت ايش داخل الصندوق .
علي وعيونه صايره مثل الدم من كثر ماهو مغبون ومقهور يأشر عليها : انتي ماتخافين الله احرمتينا بنات اخوي ماتخافين الله انتي ذحين في حكم الحرامية الخاطفة ذحين ابلغ عنش ويسحبونش مثل الكلب كيف طاوعش قلبش تخلين بنات يعيشون بلا سند وعندهم جد وعم وعيال عم تفز لهم المجالس من طيب طاريهم .
ماردت عليه لانه صادق بكل كلمه قالها كانت انانية في حبهم كانت تقول كيف تعبي يروح لغيري وكنت خايفة اموت واتركهم بلا سند جاء الوقت اللي لازم تخفف من حولها الثقيلة
لفت عند الباب من سمعت صوت شي عنده
رجعت تناظر في علي خذ الشنطة فيها كل شي يخص بنات اخوك حست بمرارة الكلمة وهي تنطق بنات اخوك فعلآ بناتهم وهي مالها إلا التعب والندم كيف تبرر لهم ذحين اذا عاتبوها ايش تقول لهم وخاصة ندى وخزامى اللي كل مرة يتمنون ان عندهم جد واعمام شافت علي ياخذ الشنطة ويجلس على الكنب ويناظر في الشنطة الجلد القديمة .
علي/ رفع راسه لها وهو يشوفها تناظر له
قال لها بكل كره وهو وده يقوم يذبحها : كم الرقم حق الشنطة شافها تغمض عيونها وترجع تفتحها وتتمسك في حافة الكنب رجع يتحسس الشنطة وهو يتخيل اخوه حضن الشنطة لصدره كأنه يحضن اخوه والله ريحة احمد ريحته بكل مكان من دخل البيت وريحته اكثر شي في الشنطة ذي.
لاحظ رقم مكتوب على ظهر الشنطه 1478
على طول دخله وفعلا انفتحت الشنطة.
حصل شهادات ميلاد بناته صك بيت
عقد نكاح من رقية وعقد ثاني لعائشة فواتير بيع وشراء اغنام من السودان جواز سفر له ولزوجتة رقية .
اوراق وكالة من المحكمة صور شخصية له.
كرت العائلة اصل وصور رفعه وهو يشوف انه اضاف بناته كلهم بكرت العائلة .
تقارير طبية بأسم رقية منصور صك وكالة وصورة منه هو يعرف الوكالة ذي لما سواها لأخوه احمد .
وباقي عنده نسخه منها محتفظ فيها
ودفتر تحت متكوب على الجلده الخارجية
هذا الدفتر خاص جدآ على من يجد هذا الدفتر الاتصال على هذا الرقم
وحاط رقم بيت خالي اللي هنا في أبها
ورقم البقالة اللي كانت في حارتنا قبل ننقل الرياض
وتحت بين قوسين تصل هذه الشنطة بكل مافيها لأخوي علي او ابوي محمد احمد ال زايد.،!
حس كل شي فيه يرجف مو قادر يفتح شي ابد يحس بيطيح من طوله حتى وهو بعيد عنهم مااستغنى عنهم كان يحس اني عون له مهما صار .
وملف اخضر متكوب عليه خااص ماقدر يفتحه يحس كل جسمه يرجف وقف وهو يمسك الشنطة حس انه ضايع كل اللي سواه انه مشى لين وقف قدامها مباشرة وبكل كره حسبي الله عليش ونعم الوكيل الله يجعل كل حسرة وندم جتنا من فراق أحمد تكون برقبتش الله يبتليش في نفسش الله يذوقش فراق احب الأشياء لقلبش انتي ماتدرين كم من دمعه نزلت من عيون أمي وهي تتندم وتتحسر ان احمد راح ولا خلف له ولد ولا بنت يشيلون اسمه من عقبه ايش اسوي فيش ذحين حتى ذبحش والله مايبرد ماهو في قلبي عليش وخرج بسرعة وبدال مايشوف بنات اخوه قرر يطلع قبل يذبحها يحس مخنوق ومحتار ولا يدري ايش السواه عجز يفكر لازم يتصل في واحد من عياله يوقفون معه على الأقل .
غمض عيونه وهو يكرر لاحول ولاقوة إلا بالله مصيبة وحمل ثقيل عليه التفت على صوت احمد وهو يكلمه :
ابوي فارس المجنون جاب جدي وجدتي اثاري رحلتهم على أبها 10الصباح يقول ابغاها مفاجأه لكم وجدتي في حال مايعلمه إلا الله تبكي وتصيح فارس الخبل راح وقال لها ياجده خالش يوسف مات بحادث وزوجته ماتت لما عرفت ان زوجها مات.
علي وهو يجلس على طرف الكرسي ويتحسب على عدو فارس : الولد ذا خبل ولا ناوي يتعدل قلت له جيب جدك وجدتك الجنوب تعذر بأي شي اهم شي لا تجيب لهم سيرة بنات عمك اخاف لا تطيح علينا وابوي عادي امره هين اذا جاء حطيته قدام الأمر الواقع من 10ايام وهو يتصل علي واتعذر له بشغل يخاف المواجهة مع ابوه وأمه وخايف عليهم هو مايدري كيف تحمل وقف وهو ياخذ شماغه ويوقف قدام التسريحة ويضبط شماغه وتعطر وخرج وهو يشوف احمد يخرج قدامه.
وصل الصالة وهو يشوف اولاده وابوه مجتمعين على أمه اللي سادحه على الكنب اللي يرش وجها بمويه واللي يمسح عيونها وهي تبكي وتصيح بأسم خالها يوسف وزوجتة

29 - 5 - 2021, 10:12 AM

البارت 52

سلمت على ابوي اللي من شافني فز واقف
ابو احمد : انا الله يكفيني شرك ياعلي وراك عملن ماهو طيب غبت 10ايام وبعدها ترسل لنا الخبل ذه يقول ان خال امك زوجتة ماتوا وبدال مانروح الديرة العزا جابنا الفندق هنا وعيالك موجودين والله ان ببطنك علمن كايد ياولد .
علي بتعب ولاعاد همه اي شي يسويه ابوه : يبه صل على النبي ولا به خلاف اجلس جلعني فداك وبتعرف كل شي انت وأمي .
دنق على أمه اللي متورم وجها من البكا ويبوس راسها : يمه جعلني جلعني فداش قومي والله ان مابه إلا كل خير وجدي يوسف طيب هو وزوجته.
لف لفارس وبنظرات نارية : انت متى تتصرف مثل الرجال تكذب علي تقول رحلتكم على أبها 11الصباح خبل انت تقول لهم ان الرجال وزوجته ماتوا
فارس وهو حس ان كل شي صار ضده يمكن من شدة حماسه بسالفة بنات عمه اللي طلعت لهم فجأه كل اللي قاله له ابوه ان عمه احمد طلع له بنات ولازم جده وجدته يجون بدون مايدرون بسالفة بنات عمه ولا دري ايش يقول لهم خاصة ان جدته مستحيل تسافر وجدي معنا قال مافي حل إلا انه يقول لجدته ان خالها وزوجته ماتوا لانها تحب خالها يوسف مرة تقول ماعاد من اهل أمها إلا هو وهي تبكي وتصيح بمجرد ماقال لها.
فارس وهو يقرب من ابوه يبوس راسه : اسف يبه انت قلت لي تصرف وانا تصرفت
علي وهو يدفه على صدره بعصبية وجلس جنب أمه وهو مو داري كيف يتكلم ويقول لهم صعب عليه وصعب عليهم الخبر رغم انه خبر بيفرحهم كثير مسك يد أمه ويناظر ابوه : ياجماعة صلوا على النبي .
الكل عليه الصلاة والسلام
علي : ياأبو أحمد يقصد ابوه العلم سلامتك انت وأمي سبق وقلت لكم انت حلمت في احمد الله يرحمه اكثر من مره وانت يبه قلت لي ان الحلم تكرر عليك كثير و فارس ارسل لي رقم مفسر احلام وكلمته وفسر لي الأحلام وقال لي كل شي .
رجع يناظر في الأرض وهو يشوف وجه ابو يتغير مايبغى يشوف ردة الفعل من ابوه بلع ريقه وهو يحس بثقل اللي بينطقه شد على يد أمه : أحمد الله يرحمه عنده ثلاث بنات وهذا هو تفسير الأحلام اللي كنا نشوفها
حس في يد أمه اللي ترجف رجع حط يده الثانية حول كتفها وشدها لحضنه : ابشري يمه ربي عوض صبرش خير بنات احمد راح يكونون بنات لش يعوضونش بدال ابوهم .
رفع عيونه لأبوه اللي ساكت ماغير فيني وفي عيالي واحد واحد وبعدها نزل عيونه الأرض وانا اشوف كيف وجهه تغير من عرفت ابوي وهو مايعبر عن مشاعره مهما كانت حتى موت احمد مانزل من عيونه دمعه حتى وهو يودعه وهو ينزله القبر.
سمع أمه تهلل وتكبر يارب يارب يارب وتعجز تكمل ايش بتقول حس فيها تفك نفسها منه فك يدها وهو يشوفها تنزل الأرض وتسجد وتبكي اختلط الكلام بالدموع والعبره تخنقها مااسمع منها إلا كلمة يارب عوضك ماله مثيل يارب ترحم احمد حبيبي يارب تجعل قصر عمره طول في حياة بناته.
رفعت راسها وهي جالسة بنفس المكان وتناظر فيني ودموعها تنزل : علي انت شفتهم بعيونك انت صادق
علي : وهو ينزل ويجلس جنبها ايه بالله اني صادق وشفت وحده فيهم الكبيرة أشواق ومن قبل يمه انتي قد شفتي وحده منهم
وهو يحضن كتف أمه ويستند عليه يمه بنات احمد كانوا حولنا ولا شفناهم حسبي الله على من كان السبب.
أمه وهي تمسك وجهه وتقول انا قد شفتهم متى؟
علي/ البنت يمه اللي أميرة تخليش تتفرجين لها بالجوال هذي بنت اخوي احمد الصغيرة يمه اسمها خزامى.!
فارس كأنه ماس ضربه يالله معقوله بنت عمه هي المشهورة خزامى كيف ؟! حس بقهر عليها كم مرة تغزل في يديها وفي صوتها وهو تنزل سنابات اخرج جواله وبسرعه حذفها من السناب ومن الأنستقرام بنت عمه وعرضه كان يتغزل فيها .
ويتلفت يشوف اذا احد يراقبه كأنه مسوي جريمة.
محمد(الأب) يسمع كلام ولده علي ولاهو قادر يرد ولا يسأل معقوله ولده عنده بنات وينهم كل السنين ذي ومع مين وهو من بعد ماخرج ولده ولا رجع ماخلى مكان مادور فيه اخر شي قال له راعي سوداني انا اعرف لك واحد (عراف ) يعلمك وين مكان ولدك كان يبغى يعرف وين ولده مهما كلفه السوداني قال له تدفع خمسين الف ودفعها وقال له ولدك خارج السعودية في ابعد مكان في السودان وماتزوج ولا شي والكلام هذا كان قبل موت ولده بثلاث شهور شاف ولده علي يوقف ويساعد أمه توقف ويقول يبه حنا ذحين بنروح لهم بيتهم ودخلت على الله ثم عليكم ما ابغى اي عصبيه ولا اي شي حنا نبغى نكسب البنات في صفنا اللي صار لبنات احمد شي كبير لازم نتحمل ونصبر عليهم
وموجه كلامه لعياله وانت يامحمد بالذات لا اسمع لك حس هناك واللي بيتكلم بشي يغث بنات احمد ويغثني قسم بالله مايمنعه مني احد
محمد وهو يسمع كلام ابوه من جده ذحين يبغاه يروح معه عند الكلبه ذيك اللي مقدمة عليه بلاغ لو شافها ذبحها قال : يبه توكلوا انتوا مابروح بنزل انا عند أمي
علي بأصرار : ولا شبر تروح خل أمك بعدين ويله قدامي كلكم.

29 - 5 - 2021, 10:12 AM

البارت 53

أشواق/
تحاول قد ماتقدر تثبت تكون قوية كانت تحسب إن طيحت ومرض أمها اقوى شي صار لها وخلاص بعدها تتصالح معها الحياة لأنها تعبت كثير ولازم ترتاح لكن مرض أمها كان بداية الأحداث اللي مثل العقد اللي انفرط وتناثر حباتها بكل مكان كل يوم تتفاجئ بحقيقة مثل العلقم كل يوم حقيقة تهد حيلها وتكسر ظهرها حست في أمها اللي ماسكه يدها وتضغط عليها قد ماتقدر حاولت انها تجبر عيونها وتناظر أمها الوهيمه أمها اللي خلتهم يعيشون سنين كلها مزورة كان يحملون نسب جد مزور وهمي ايش كان بتخسر لو خلتنا نعرف حقيقتنا حنا مين كم مرة بكت خزامى وندى يبغون لهم سند وعزوه وكان رد أمي ابوكم مقطوع من شجرة حتى ابوي كان يقول نفس كلامها .
لو ان أمي ماسوت اللي سوته ماكنت راح اضطر اروح اطلب ماهر زوج لي علشان اقدر اكمل الدراسة في كندا كل ماتذكر انها طلبته الزواج تحس بنار تكويها
نار تكويها كل مااكتشفت شي سيئ في ماهر وحاولت تنصحه تعدله يقول لها هذا انا ماجبرتش على نفسي انتي اخترتيني مازالت تتجرع مرارة اختيارها كل يوم حتى بعد انفصالها عنه .
ناظرت في وجه أمها وهي تجبر نفسها تكون طبيعية ولا توضح لها الضيق مهما صار منها ماراح تنسى جميلها وبتظل أمها رغم مرارة الواقع سمعتها تناديها بصوت بان فيه التعب والندم واشياء كثيرة .
أشواق/ليبه ياروح أشواق أمري جعلني قبلش.
عايشة من سمعت كلام اشواق نزلت دموعها بسرعه وهي اللي ماعمرها بكت قدامهم كانت مثال للقوة والتحمل واليوم عاجزه تتحمل شي وبصعوبة : انا متكله على الله ثم علاش تبيضين وجهي قدام اهل ابوش ماابغاهم يقولون اخذت بناتنا ولا عرفت تربيهم وهم اهلش لحمش ودمش ولا فرطوا فيكن لا والله انا كنت انانية فيكم حبيتكم حب خلاني عمياء مااشوف إلا نفسي وبس نسيت ان لكم اهل وسند وعزوه ماتدرين اني من يوم مات ابوكم وانا مااعرف الراحة لا ليل ولا نهار ان دق الباب تالي اليل قلت اهل احمد بيجون ياخذون بناتهم خاطرت بكم وبنفسي كله خوف يعود عمش يدور لكم حتى ماعاد صرت اعالج احد واذا سألوني ليه قلت جاني قرار منع من وزارة الصحة وانا اكذب كنت اخاف يجي ناس ويعرفكم ويعلم اهل ابوكم و كنت اخاف اموت واخليكم بلا سند ولا عزوه ولكن اليوم بموت وانا مرتاحة كل وحده فيكم مطمنه علاها وخاص لما شفت عمش شفت فيه ابوكم وشفت كيف فرحته ان اخوه عنده بنات لا تلومين ولا تعاتبين احد فيهم الغلط مني انا ذحين بيجون جدش وجدتش وعمش البسي عباتش انتي واخواتش واستقبلوهم احسن استقبال ولا يجون إلا وغداهم زاهب.
أشواق وبدون اي كلمة فكت يدها وقامت واقفه ناظرت في الممرضة الفلبينية اللي جابتها علشان تهتم في أمها : سرواتي انتبهي لماما كويس وطلعت لأخواتها المنهارين من البارح بعد ماقالت لهم أمها الحقيقة كلهم على نفس الوجع بس هي تختلف عنهم ماتقدر تشكي ولا تبكي ولا شي مثل الصنم واقفه تدور عليهم من البارح تحضن ذي وتخفف عن ذي وتروح تطمئن على أمها وهي تعيش حطام في داخلها وساكته وكلهم في كفه وحال ريم في كفه اللي من عرفت انها مو اختهم وهي منهاره تبكي وتصيح من البارح وماسكتت لحظه ..
والله اللي قاعد يصير لنا كثير كثير حيل مالنا طاقة نتحمل الحقيقة الغائبة اللي سمعتها من أمها ضرب من الخيال من الجنون ماعمرها شكت انها مو أمهم رغم سمار بشرتها ودائم تقول الحمدلله انكم ماخذتوا مني شي اخذتوا جمال ابوكم وجمال اهله ..
وحالة ريم هي اللي اتوقع انها الأصعب بيننا من عرفت الحياة وريم اختنا كانت تنادي ابوي مثلنا وحتى لما كبرنا سألت ابوي ليش ريم ماتكتب اسمك مثلنا في كتبها ريم أحمد
قال لي لأن ابوها مات من زمان
وخلاص من بعدها ماعاد صرنا نسأل ابد كون ان ريم أمها الحقيقة عايشه وعندها بس ماعمرها شافتها هنا الف استفهام وهي من عرفت الحقيقة وهي منهاره .
وصلت غرفة اخواتها وهي تشوفهم على نفس حالتهم اللي تركتهم فيها من البارح نفس الوضع ريم متكورة على فراشها مثل عادتها لما تتضايق او تتعب تسكت واحيآنآ تجيها حالة تصرخ وتكسر كل شي قدامها بس ذحين ساكته يمكن تعبت من البكاء قربت منها وهي تجلس على طرف السرير جنبها سحبت البطانية عن وجها اللي كان احمر وعيونها المنتفخه من اثر البكاء ناظرت فيها ريم بنظرات هزتها من داخل هي جايه تواسيها توقف معها تخفف عنها
مسكت يد ريم و تجلس وتتعدل على السرير وتحضنها وهي ساكته مااتوقع عندي كلام يخفف مصاب ريم والله ماعندي اي كلام كيف اخفف مصابها واهون عليها وانا بنفسي عجزانه اواسي نفسي بس مجبورة تعيش دور الشخص القوي الذي يقف عكاز لهم بكل الحالات

29 - 5 - 2021, 10:13 AM

البارت 54

حضنتها بقوة وهي تسند راسها عليها : ريم حبيبتي انتي شايفه انش بالعزلة هذي والبكاء بيتغير شي من وضعش وين ريم القوية ريم اللي صار لش صار لنا كلنا على نفس الوجع شوفي انا قدامش وقبل ماتكمل اشواق
دفتها ريم وهي تصيح : لا كلكم منتوا مثلي على الأقل ياأشواق عرفتوا اهلكم سندكم عزوتكم الشي اللي كنتوا تتمنوه ربي جابه لكم ..
رجعت تنهار من جديد وهي تبكي : لكن انا وهي تضرب صدرها وين اهلي اعمامي أمي الحقيقية وينها حتى اسمها محد يعرفه وينها ليش تركتني السنين هذي كلها عند وحده ماتقرب لنا ليش انا منبوذه ليش امي عايشة اخذتني ليش ماخلتني عند أمي حتى لو ما تبغاني مصيرها بتحن علي وليش دوبها تتكلم أمي عايشة ذحين وتكشف المستور ليتها سكتت كان احسن علشان نكمل مسلسل حياتنا السخيفة.
أشواق ماحاولت حتى تسكتها هي مؤمنة ان الأنصات افضل انواع المواساة رجعت تحضنها من جديد وهي تسمع كل سؤال من ريم مثل الوجع ينخر روحها اسئلة عالقة في خاصرة الحقيقة ..
مسحت على شعرها لين حست فيها تهدأ قالت لها : ريم حبيبتي كل اللي قاعد يصير لنا مقدر ومتكوب مالنا يد ولاحيله فيه وماندري لعل في الأمر خير .
ريم بعبرة خنقتها : وين الخير ياأشواق وانا مااعرف وين أمي واهلي قولي لي .!
اشواق :الله الذي خلقش من العدم مستحيل يتركش كذا بدون مايصرف ويختار لش كل شي ثقي بالله وذحين قومي غسلي وجهش المفقع هذا ومري أمي طمنيها عنش ياريم مهما كان تظل أم لنا حتى لو ماانجبتنا من البارح تسأل عليش اجبري بخاطرها لو شوي وبعدها تعالي المطبخ ساعدينا بنطبخ غدا لأهل ابوي
حست شي يرفرف في صدرها بمجرد نطق كلمة اهل أبوي قامت من ريم وهي تناظر في اخواتها يالله الحمل ثقيل علي يارب ساعدني وقفت في الوسط بين سرير ندى وخزامى وهي تحط يديها على وسطها دليل الحيرة وهي تشوف ريم تاخذ لها ملابس من الدولاب وتخرج .
رجعت تناظر في اخواتها وبصوت عالي : خزامى انتي وندى خلاص عاد ترى مسختوها الحمدلله ماصار شي الأمور طيبة والحمدلله ان عندنا اهل وسند وعزوه
تطمنهم ان كل شي بيكون بخير وهي تحتاج من يطمنها ان بكرة افضل لأنها خايفة من بكرة وبعد بكرة وخايفة الأيام كلها
سحبت بطانية خزامى ورجعت تسحب بطانية ندى وبحزم : يله قومي انت وهي خلاص ماكفاكم بكاء من امس لحد ذحين طيب النهاية ايش
وهي تشوف اخواتها كل وحده حاطه يدها في وجها .!
: وبعدين مو انتي وهي صدعتوا راسي من زمان ليش ماعندنا جد وجده واعمام وترى مااحد فيكم صغير كلكم كبار بلا انهزامية وضعف ودلع يله قدامي غسلوا ومروا امي تسأل عنكم من البارح وبعدها تعالوا المطبخ ساعدوني انا وريم وإذا جوا اهل أبوي تراكم بتدخلون تسلمون ولا ابغى دمعة تنزل سامعين ولا طولة لسان .
وخرجت بخطوات ثقيلة اليوم راح تواجه اهل ابوها تواجه جزء من حقيقة غابت عنهم ولاتدري تحمل مين المسؤلية .!
ظيمنع
ظيمنع

محمد/
وكل شياطين العالم راكبه راسه يبي يفرغ عصبيته بأي طريقة يحس ان الدم يغلي في عروقه كل ماتذكر اللي سوته أشواق ويحمد الله ان البلاغ وصل بيد اخوه عبدالله في هيئة التحقيق والأدعاء العالم ربي لطف به .،!
والله مايفوتها لها بنت عمه واللي زاد عليه ان ابوه غصبه يروح معهم عندها هو مايضمن نفسه اذا شافها يقوم يذبحها.
زفر بقوة وهو يستغفر اكثر من مرة ويعلق على بوري السيارة وفتح مساحات السيارة علشان الزجاج الأمامي من المطر اللي ينزل من الفجر عدل شماغه واخذ عطره وهو يرش من اكثر من مرة
اخذ جواله وهو يشوف الساعة12 الظهر
له ربع ساعة ينتظرهم في السيارة نزل قبلهم مايتواجه هو وابوه رفع يده يتحسس خده مكان الكف اللي جاه من ابوه .
ابوه اللي ماعمره ضرب احد فيهم وخاصة هو وضربه علشان بنت اخوه لكن طيب رجع وهو يعلق على البوري طفش وكل اللي قدام الفندق يناظرون فيه ولا اهتم لهم وهو مستمر معلق على البوري .
انفتح الباب اللي جنبه وهو يشوف جده يركب وباين على وجه الأنزعاج قفل الباب بقوة وهو يناظر فيه ايش قومك انت خبل ازعجت العرب.
ولا رد على جده وهو يشوف أبوه ماسك جدته وفارس يفتح لها الباب ويساندها لين ركبت وركب ابوه واخوانه وهو ساكت

حرك السيارة وهو يشوف المطر بدء بكثرة ويشغل المساحات علشان يقدر يشوف تحرك مبتعد عن الفندق وبدون مايلتفت قال بضيق : من وين طريق بيت بنات اخوك يقصد ابوه.
علي بضيق من ولده ومن كلمته الظاهر ان محمد بيتعبه كثير ماكان يبغى يروح بس غصبه يروح وهو يعرف ولده لما يعصب ماعاد يقدر يتحكم في تصرفاته ولا يلومه ابد خاصة ان اشواق قدمت بلاغ ضده مايدري ليش حس بفرح في غير مكانه عجبه تصرفها انها قادرة تحمي نفسها وذكية

29 - 5 - 2021, 10:13 AM

البارت 55

قال بعصبيه مستغربه منه بانت في صوته : محمد للمره المليون لا تحسب انك كبرت مااقدر عليك خلك رجال قبل لا تشوف الوجه الثاني مني خذ سيده وبعد الكبري اشارة وبعدها السودة قدامك سيده على طول ..
محمد وهو يضغط بيده بقوة على الدريكسون علشان مايتكلم كلام يزعل ابوه
الجد (محمد) وهو يشوف محمد كيف معصب من الصباح وذحين كلامه هو وابوه هو مايرضى عليه يعتبر ولده اللي ماجابه اخذه من أمه وهو صغير ابو شهر وكبر قدام عينه اخذ منه كل شي نهر ولده : علي ايش قومك على ولدك .
علي بأحترام : ولا شي يجعلني قلبك ياأبو احمد
الجد(محمد)وهو يناظر في محمد : وانت ايش قومك ماتقول بنات عمي ها.
محمد وهو وصل حده كمل جده الناقص.،
سكت ومارد وهو يتجاوز السيارات بسرعة يبغى ينهي السالفة ذي في اسرع وقت .
فارس بخوف: محمد بشويش ليش السرعة ذي تتجاوز والدنيا مطر ترى باقي ابغى نفسي دوبي مجمع لي قرشين .
محمد وهو ماصدق احد يتكلم علشان يبرد حرته قال : انت انطم ولا كلمه قبل انزل اوريك شغلك
الجده هيلة وهي تشوف ولدها علي الهادي كيف صار عصبي وهو يهاوش ولده وجده اللي قام يهاوش قالت : ياعوال الحلال خلاص صلوا على النبي تعوذوا من ابليس تراه حاضر معكم جعلني قبلكم لاتخربون علي فرحتي ببنات ولدي والله ان ودي اطير لهم واشوفهم .!
علي وهو يمسك يد أمه : راح تشوفينهم يالغالية وتقر عيونك بهم.
ورجع الصمت في السيارة مايقطعه إلا صوت مساحات السيارة وهي تسحب موية المطر
ومحمد وهو يشوف لوحة وسهم السودة لف ومشى سيدة لين دخل بين جبال شاهقة اللي مغطيها الضباب بكثافة رفع جواله وهو يشوف الوقت 12 ونص
ورجع شاف درجة الحرارة كانت 15درجة مئويةرغم برودة الأجواء إلا انه يحس بحرارة بكل جسمه.
سمع جده موجه كلامه لولده علي: اخوك عنده عيال ذكور .
علي وهو مستغرب من سؤال ابوه اللي ماقال كلمة من عرف عن بنات احمد ولاحتى سأل وخايف من ردة فعله لما يشوفهم ولا يضمن ابوه مره ويعرف ان ابوه يحب الذكور ويميل لهم
علي : لا والله عنده بس ثلاث بنات.
الجده بحب : فديتهم جعلني قبلهم والله انهم عند قلبي كأنهم الف رجل رضيت بهم.
الجد(محمد)سكت ولا علق بكلمة.

محمد وهو يشوف المطر مازال مستمر خفف السرعة وهو يقول : يبه هذا حنا في السودة وين البيت .
علي/خلك ماشي سيده راح تحصل مسجد والبيت قريب منه .
رجع محمد يمشي بسرعه لين ظهر لهم المسجد ويشوف بوابة مفتوحة قدامها جمس وسيارة هايلوكس.
سمع ابوه يقول وقف عندك ونزلوا كلهم وهم يشوفون
السواق شايب في استقبالهم عند الباب ويرحب بهم
فارس نزل وهو يحضن نفسه اح يابرد عندهم في الظهر وهو يلف ويناظر حوله مكانهم خطير بنات عمي
ورجع يناظر في السيارات اللي قدامهم اخس يابنات عمي سيارات اخر موديل ماشاء الله.!

:

أشواق /
وهي متوترة وتحاول قد ماتقدر تكون طبيعية وقفت قدام المراية وهي تلف طرحتها وتثبتها وترجع تلبس النقااب .
خرجت لين وصلت المطبخ وهي تشوف اخواتها يشتغلون بصمت ولا وحدة تكلم الثانية قالت : ندى خزامى اذا خلصتوا تجهزوا بروح استقبلهم وصلوا
خرجت من باب الصالة وهي تحس ان رجولها مو قادرة تشيلها وبدال ما تخرج تستقبلهم رجعت لداخل الصالة وهي تسمع صوت السواق يرحب فيهم ويدخلهم ماتدري ليش حست انها مو قد المواجهة جلست على كنب الصالة قريب من باب وهي ترجف اكثر من شعور غريب تحسه اختلاط مشاعر.
قامت وهي تاخذ نفس عميق وهي تحضن نفسها بقوة وهي تخرج بعد ماتأكدت انهم دخلوا المجلس.
خرجت وهي تمشي بسرعة والمطر ينزل تمشي بسرعة علشان ماترجع تدخل الصالة
لازم من المواجهه ذي لازم ،مؤمنة ان اقدار الله خير مهما كانت موجعه .
وصلت عند المجلس وهي تشوف اكثر من فردة حذاء رجالية قدام الباب يا الله كم مر عليهم من الوقت مااحد جاهم ولا دخل بيتهم رجل لا في عيد ولاغيره.
وقفت باب المجلس وهي تناظر بلا هدف بس تشم ريحة ابوها والله ريحته تحسه حولها وهي تسمع اصواتهم صوت ابوها دخلت وهي ترجع من الخوف من الموقف من برودة الأجواء وقفت تشوف السواق يوزع عليهم مويه
ومن شافوها وقف لها عمها ومعه واحد شايب وحرمه لابسه عبايتها تشجعت وبصوت حاولت قد مايقدر يخرج واضح لان العبرة خانقتها ومن شافها السواق تدخل خرج..
: يامرحبا يامرحبا يامرحبا يالله حييهم ومحتارة تسلم مين اول .؟
وقبل ماتتقدم تسلم على الشايب
قامت الحرمه لها وهي تقطع المسافه بينهم وهي تبكي وتصيح وتحضنها : المرحب باقي
حست انها تحلم يالله الوجه ذا تعرفه مستحيل تنساه يالله سبق وشافت جدتها هي مسويه لها العملية حضنتها بقوة وجدتها ماخلت مكان ماسلمت عليها فيه واخر شي تحاول انها تفك نقابها وبأستعطاف : يمه أشواق وريني وجهش وريني .!

المواضيع المتشابهه لموضوع: رواية جنوبية برت حالي ولا دري وين ديرتها لموضوع: رواية جنوبية برت حالي ولا دري وين ديرتها
الموضوع	كاتب الموضوع	المنتدى	مشاركات	آخر مشاركة
تحميل رواية خالي العزيز نابليون pdf	همسه الشوق	قسـم البحوث والكتب العلميه او التعليميه	13	11 - 2 - 2021 07:28 PM
رواية فهد و نوره رواية رومنسية سعودية كاملة	سجات التهاويل	همس للقصص وحكايات وروايات	23	8 - 6 - 2018 01:07 PM
حمود السمي يخربها مع حبيب محاورة حفل تكريم الشاعر حامد محمد	جروح الم	همس للعرضات و المحاورات الشعريه القلطات	5	9 - 10 - 2015 05:45 PM
مشاعر لم يجربها الرجل هع	إنكسآر ♪`	همس للألغاز والنكت والضحك	6	28 - 10 - 2012 11:04 AM
رواية قمر خالد من اروع الروايات	الحب ياسمين	همس للقصص وحكايات وروايات	2	5 - 6 - 2012 04:13 AM

الذين يشاهدون محتوى الموضوع الآن : 1 ( الأعضاء 0 والزوار 1)

الأعضاء الذين قاموا بتقييم هذا الموضوع : 0
لم يقوم أحد بتقييم هذا الموضوع

رواية جنوبية برت حالي ولا دري وين ديرتها

همس للقصص وحكايات وروايات