رواية العابث ال خير في هذا الزمان

البارت 136


عند ريتان ..

فتحت عيونها ببطء شافت الحراس واقفين قريب منها وراشد متكتف وعيونه عليها
فزت جالسه وهي تحاول تضبط نفسها وتفهم سبب دخولهم عليها
قطع تفكيرها صوت راشد : كويس صحيتي
ريتان وقفت وبعددت عنهم بخطوات مترنحه للزاويه وهي تتنفس بسرعه
راشد اشر لها : اششش اهدي
ريتان عقدت حواجبها : وش دخلكم عنــ..ـدي
راشد : طويل العمر امرنا نغير غرفتك يلا امشي
ريتان بشك ناظرته : وين بتوديني ؟
راشد بحده : بتمشين والا كيف ؟
ريتان بتجاهل لكلامه : رائد جاء !
راشد ضحك : جاء وتصالح هو واخوه وما اكل تراب في السالفه الا انتي يلا امشي
تجمدت ريتان مكانها بدهشه وهي تناظره
قرب لها وسحبها بقوه
شهقت وهي تحاول تفك نفسها منه لكن قوته ضعف قوتها خمس مرات
ركضت بجاوره تجاريه بخطواته وتحس كتفها بينخلع من شده لها
فتح باب ودفها داخل : خليك هنا والتزمي الصمت مانبي ازعاج
ريتان بحده ناظرته
طنشها وقفل الباب بوجهها
تنهدت بضيق وصدت عن الباب
رفعت حاجب وهي تتأمل المكان
مرتب مره وانيق الحائط من حولها ابيض بديكور
خفيف اسود سرير دائري اسود بمفرش ابيض ينتصف
الغرفه ومقابله اريكه جلد اسود والخداديات
رصاصي لامع وابيض تسريحه سوداء تمتلئ بالعطور والكريمات
تنهدت وهي تشد كفوفها على بطنها تهدي وجعها قربت للباب القريب منها
وهي تخمن انه دورة مياه " اكرم القارئ"
بمجرد دخولها لفح وجهها بخار ودفئ عكس الخارج
توسعت عيونها وهي تشوف البانيو مليان وتطوف فوقه ازهار الافندر
المهدئة للاعصاب
بحثت عن برنص " روب حمام" وبمجرد
ماشافته قفلت الباب تأخذ شور وهي تحس بتعب ...
بعد مرور ساعه .. واقفه تنشف شعرها القصير
وتحاول تظهر الثبات لموقفها نزلت المنشفه ع التسريحة وهي تفتح
ادراجها تفتشها
حصلت شوكلت داكنه فتحت واحد بسرعه وهي تقضمه تبي تشبع جوعها انتهت ورمت الكيسه وهي تتجه للباب بمجرد ما مسكت مقبض الباب انفتح وظهر رامز امامها رفع حاجب وابتسم : عشتي جوك !
ريتان صدت عنه وهي ترجع للداخل
دخل وراها وهو يتأملها بصمت اردف بعد دقيقه من الصمت : ليش ماغيرتي ملابسك ؟
ريتان نزلت نظراتها لبنطالها الممزقه
اطرافه غسلت ملابسها ودخلتها بالمجفف يكفيها تكون نظيفه : مابي منك شيء
رامز تنهد : ترى الوضع ماينفع كذا لازم تصير علاقتنا احسن عشان تقدرين تعيشين براحه وسلام
ريتان بتجاهل لكلامه : رائد وينه
رامز جلس على الاريكة : في ضيافتي
ريتان بشك : فيه شيء
رامز بنص عين : اجاوبك يعني ؟ مابتاخذين مني لاحق ولا باطل الا اذا
نفذتي اوامري وبصمت ورضا نفس
ريتان : طيب بس بشرط
رامز وقف وهو مستغرب رضاها : وشو ؟
ريتان ببرود : ابي اشوف رائد بعدها لك اللي تبي
رامز ضرب كفوفه ببعض بقوه : اقولك رائد لا
ريتان صدت عنه : اجل كلامك مايمشي علي ولا اشوفك تنتظر مني اي شيء
رامز ابتعد وخرج بسرعه وقفل الباب بقوه
ريتان تنهدت وهي ترفع كفها لقلبها : يمممه ، الحمدلله طلع الحمدلله '
_

بمجرد خروج رامز من عند ريتان
اتجه لـ رائد ناظره من وراء الزجاج وهو مكتف ويتنفس بصعوبه
وعيونه تورمت
ابتسسم بتشفي ورفع ايده وهو يأشر بالرقم ظ£
ويضحك : لو عشت ثلاث ايام اتحداك ما احد يعيش بدون اكسجين
راشد يتأمل رائد بصمت والتفت لـ رامز من رفع كفه
عقد حواجبه وهو مستغرب كيف بنت تسوي كذا فـي اخوان !!!!!
ابتسم بسخريه وهو اكثر شخص يعرف رامز عقله مغسول من المخدرات والخمور لكن وش اللي رجع رائد !!!
ليش رجع وبدون مساعده !! فتشوه ماكان معه لا جوال ولا سماعات ولا شيء وش يخطط عليه ؟

البارت 137


فالمملكة .. تحديداً الرياض ..

خرجت ختام من بيت ابو خالد بعد ماودعتهم
وخالد طلع وراها : جيتي مع من ؟
ختام التفتت له وابتسمت برقه :
ابو محمد " حارس البيت "
خالد التفت حوله ورجع ناظرها : طيب بيوديك !
ختام هزت راسها بالايجاب : كلمته يقول
بالطريق
وبهمس حاني : مابي اتعبك
خالد بلع ريقه ورفع كفه يمسح شعره ونبضات قلبه ترتفع : كلميه لا يجي بطلع انا وانتي مشوار صغير
ختام ابتسمت : والله
خالد ابتسسم وهو مفهي فيها : والله
طلعت جوالها تتصل وثواني ودخلته شنطتها : يلا كلمته
خالد حس بمويه بارده انكبت عليه من تذكر ان ماعنده سياره حس نفسه بموقف بايخ ومحرج
صار مايدري وش السواه
تكلم ببطء : اءءء اقول لك
ختام بأستغراب قربت لهه : خالد شفيك ؟
خالد اخذ نفس وابتسم
بقوه من شاف عبدالله زوج اخته يوقف
قريب منهم ..
ركض له بسرعه
وهو يسحبه من السياره
ويبوس جبينه
ختام عقدت حواجبها وهي تشوف خالد يهمس
بأذن عبدالله
ضحك عبدالله واخذ اكياس واتجه للبيت دون مايرفع عينه لـ ختام
وخالد ركب واشر لها : يلااا
ختام ابتسمت واتجهت له : ليش اخذت سيارته !
خالد تجاهل سؤالها وهو يتجهه بسرعه
لحديقه هادئه قريبه من حيهم : تبين ناخذ شيء نشربه
ختام : لا شربت في بيتكم
خالد ابتسم : إن شاء الله يصير بيتك بعد
ختام التفت بسرعه وقلبها ينبض بقوه : ايشش!
خالد ضحك : ولا شيء سلامة راسك
ختام رمشت ببطء تحاول تستوعب كلمته !
رفعت راسها وهي تناظر المكان حولها
وقف والتفت لها : انزلي
مابقى شيء على الساعه ظ¢
نزل وقفل الباب وهو يسمعها تتكلم ختام بلكاعه : وش دعوه مستعجل !
فتح الباب اللي عندها : مستعجل بسرعه بسرعه لا تجيء الدوريه تاخذنا
الحين
ضحكت ختام ونزلت ودخلوا للحديقه
كان فيه عائلتين
ومعهم اطفال يلعبون والجو هادئ ولطيف اتجهوا لطرف الحديقه
وجلس خالد على العشب
وختام تناظره : مافي شيء نجلس عليه
ابتسم لها ونزع جاكيته الخفيف وحطه : يلا تعالي اجلسي
ضحكت وهي تجلس وتضم شنطتها لحضنها : تمام جلست ..
خالد تنهد وهو مايدري كيف يبداء التفت لها : عندي ثلاث اشياء بقولها
لك عاد انتي اختاري نبداء من وين
ختام بتوتر : عادي اي شيء
خالد ابتسم : قدمت على كورس انجليزي مكثف لمده ثلاث شهور
ختام ضحكت بفرحه : والله مبروك
خالد ابتسم لها ورفع كفه بحرج يمسح على شعره : الله يبارك فيك
ويستر من الدرجات
ختام بسرعه : سهل مره ترى انا بساعدك لاتشيل هم
خالد ابتسم : ماتقصرين الله يسعدك
ختام بنص عين : والشيء الثاني هاه ! دامك قدمت على الانجليزي الله يستر مو خالد اللي اعرفه
ضحك خالد ورفع كفوفه لها بأستسلام : بتنصدمين فـ خليني ساكت
ختام برجاء : لا امانه قول
خالد اخذ نفس وناظرها : قدمت على شغل في مول قريب براتب ثلاث الاف حلو صح !
ختام رمشت ببطء : شغل ؟ ليش وانا
خالد هز راسه بنفي :انتي على عيني وراسي
بس اعذريني احسه مره غلط والرواتب اللي اعطيتيني حافظها لك
ما اخذت من كل راتب الا الف ريال بس حق شغلي
حرام فيني ظ،ظيمنع الاف وانا ما اسوي شيء واذا لي خاطر عندك لا تعترضين
ختام سكتت وعيونها عليه بعتب صدت عنه وهي تتنهد بضيق
خالد ابتسم : افا !
ختام مررت لسانها على شفايفها وتحس بالغصه واقفه بحلقها
خالد : شفيك زعلتي ، مو تاركك انا معك
ختام ابتسمت ابتسامه مصطنعه وعيونها مدمعه : عادي ما زعلت شيء راجع لك
خالد صد عنها وهو يهمس : الشيء الثالث مابعد قلته
ختام ناظرته بسرعه : وفيه شيء بعد ؟
خالد التفت لها بجسمه كله وتربع قدامها وهو يبتسم بتوتر ويعض طرف شفته : انا تقدمت لك وطلبتك من عمك
ختام توسعت عيونها وشهقت : ايش
خالد بتوتر : ووافق ، مابقى ينتظر الا موافقتك
ختام ابتسمت ببراءه وصدت عنه وملامحها تشع بالحمره والخجل
اللذيذ على قلب خالد
همس لها برقه : فداء راسك انا
ختام ناظرته وبكبرياء :بفكر وارد لك
خالد غمز لها : انتظرك
ختام وقفت بسرعه : ردي بيوصلك مع عمي ..

البارت 138


بعد مرور ثلاث ايام ..

ابتسمت لنفسها تهدي من توترها ورفعت عيونها لـ الماس بنت عمها : هاه حلو !
الماس جلست وحطت رجل على رجل : يجنن بس غيري لون الروج
ام خالد " المسؤوله عن الميك اب " : قلت لها بس رفضت
دُنيا " مساعدة ام خالد " قربت لختام تعدل تسريحتها وتضبط اخر
الكحل
ختام ضحكت : والله احس حلو
الماس بتقزز من اللون الوردي الصارخ : امانه غيريه
ارتفعت ضحكة ختام وهي تمسحه : بس ابي اجننك
اخذت دُنيا روج بلون الكرز افتح درجة واحده
من لون فستانها ووضعته
وهي تبتسم بثقه : الحين بتجننين !
ختام بحالميه : الماس كيف تتوقعين شكل
خالد !
الماس : خالد نفسه ماتغير
ختام تأففت : اقولك شيء ؟ تقلعي برا يلا الخطأ مني اللي ناديتك
ضحكت الماس وطلعت من جناح ختام واتجهت للاصنصير تنزل تحت وتشوف باقي الترتيبات
من الساعه ظ، ظهر موجودين بهذا الفندق
استأجره ابوها كامل فرحه لختام لكن اللي مستغربته ليش امي فرحانه ؟
وهي تبي ختام لـ خالي مروان الله يستر احس فيه شيء
خرجت من الاصنصير وعيونها في الارض بشتات ومازالت تفكر قطع تفكيرها ضحكة غزلان صديقه ختام التفتت لجهتهم
طاوله حولها سبع بنات
صديقات ختام وبنات تجار معروفين
ابتسمت برقه واتجهت لطاولتهم ترحب فيهم " لمار ، رنا ، ريما ، منار ، غزلان ، مدى "
لمار بضحكة : حفله خطوبه برمضان
ومن الساعه وحده هنا ؟
اشكر ختام بعد عمري
غزلان رجعت شعرها ع وراء بدلع : واضيفي عليها صايمين ومواصلين
ارتفعت ضحكاتهم والماس ابتسمت
بهدوء
منار بفضول : ختام وينها ؟ إن شاء الله خلصت !
الماس : فوق تقدروا تطلعون لها لو تبون
استأذنت منهم قابلتها اسماء منسقه القاعه : اهلاً اهلاً استاذه الماس نور المكان بوجودكم والله
الماس استحت منها : هلا اسماء شكراً ي قلبي تعبناك معنا
اسماء بعتب : لا كذا بزعل منك تدرين وش كثر غلاة امك بقلبي
الماس ابتسمت لها : الله يسعدك
اسماء اشرت للباب : ترى فيه بنات ينتظرونك ي ليت تشوفينهم
الماس بسرعه : طيب شكراً
ركضت للباب وبمجرد ماشافت بسمه والبندري وفاطمه رحبت فيهم
بفرحه : اخيراً طولتوا
البندري وبسمه " مُغنيات من الدرجة الرفيعه"
وفاطمه " اختارتها ختام بالذات عشان زفتها " دخلتهم الماس عشان يبدون استعدادهم ورجعت للباب تنتظر ..

بعد ربع ساعه وصلت الطقاقه ام سليمان و مساعدتها المصريه
ام مصطفى : والله العظيم قابلنا ام عايض بطريقها طالبتها كمان ؟
الماس : ايوه تفضلوا
ام سليمان بأعجاب وعيونها تتنقل بالمكان :
واو ، وش هالجمال اللهم صل وسلم على حبيبنا محمد
دخلوا وام مصطفى تزغرط بصوت عالي بحماس
وصلت ام عائض المطربه وعبير عازفة البيانو وتولين المختصه بالكورال
وبدوا تجهيزاتهم في الصاله الداخليه حسب اوامر ختام والماس
واستقبلتهم " معالي " تحدد لهم
المهام الخاصه في كل وحده فيهم
ومتى دورها تغني او تعزف ..
_

في الاعلى ،. انتهت ختام من تجهيزاتها وبدأت بجلسات تصوير طويله
وكل صوره اجمل من الثانيه واحلامها الكبيره اللي كانت تتوقع بيوم
انها مستحيله تحققت
وبتصير لخالد وخالد بيصير لها
كل صوره كانت تحكي جمالها وفرحتها وسعادتها توصف شعورها بس نظرات عيونها
فرحتها واضحة والمصورات الماهرات " مها " و " امجاد " مو مقصرات وكل وحده تحاول تطلع البومها وتصويرها اجمل من الثانيه
مها بضحكة وهي تناظر لـ امجاد اللي شوي وتطيح عشان تضبط الصوره : يارب تطيحين
امجاد عدلت وقفتها وناظرتها بحقد : اصصص تخربت الصوره
ارتفعت ضحكة ختام وهي مبسوطه بوجودهم الجلسه معهم هادئة وماسببت لها توتر ولا قلق بالعكس يحاولون يسوون مشاكل بينهم عشان تضحك
انفتح الباب والتفتوا له كلهم
ختام عقدت حواجبها :حلا ؟
حلا " صديقة قديمه لختام " : عيون حلا
اقتربت منها بخطوات سريعه وهي مصدومه
من جيتها : كيف جيتي !
حلا : الماس قالت لي كيف ما احضر في خطوبه اغلى وحده على قلبي ؟؟
ضمتها ختام بقوه وهي تحس انها بتبكي من الفرحه بشوفتها ..

البارت 139


في وسط تجهيزاتهم ارتفع اذان المغرب وقدموا لهم الفطور وافطروا بهدوء وكل شخص متوتر من شيء
واكثر وحده متوتره هالليله الماس اكثر حتى من ختام قلبها شاغلها تحس مستحيل ينتهي اليوم بسلام
بداء الضيوف بالتوافد والفندق يمتلئ والقاعة الخارجيه ايضاً والبنات " صديقات ختام "
يرتبون وينظمون كل شيء اول بأول عشان مايصير شيء مفاجئ
فور دخول الضيوف يرحبون فيهم ويدخلونهم القاعه الخارجيه والاطفال لهم جناح كامل خاص فيهم
ومعهم المختصه بالاطفال" حور " '


في بيت ابو خالد ...
انتهى خالد من اخر تجهيزاته ثوب ابيض يبرز طوله يزينه كبكات بُني غامق اشبه بأحجار ثمينه عدل شماغه الابيض ولبس ساعته
الجديده
التفت للباب اللي انفتح : جاهز ؟
ابتسم لها : جاهز ، كيف ابوي ؟ خلص او بعد مالبس ؟
بُشرى ابتسمت بحنيه ودخلت وقفلت
الباب وراها وهي تتجه ببطء : خلودي بعد عمري ابوي تعرفه لو طلع من البيت او جلس
مايدري عنده زهايمر ولاعب فيه عشان كذا امي قالت يجلس هنا وجارنا ابو مسفر كلمنا يقول بيجيء عنده مايقدر للعرس والروحه
خالد عقد حواجبه واحمرت ملامحه بغضب
: عرس بدون ابوي مافيه
بُشرى مسكت ايده وبحده : وش عرس بدون ابوي مافيه ؟ مو بكيفك غصباً عليك ، اجل تبي عيال الطبقه المخمليه يتشمتون في ابوي ومرضه ! هاه! رد علي
خالد جمدت ملامحه وعيونه عليها : بُشرى
بُشرى صدت عنه : بسرعه خلص
عبدالله صار في السياره
طلعت وخالد بهت لونه بزعل على حاله
اخذ نفس عميق وطلع لابوه يودعه قبل يمشي ويطلب رضاه ودعواته ...


في هولندا
اجواء الفرح لامكان لها هُنا الجميع يعيش في قلق وتوتر وعمل متواصل
الحُراس والعاملين
بالاضافه الى ارواح ابطالي جميعها مُرهقه
رامز ينتظر لحظة توقف انفاس رائد
ويكابد اي شعور شفقه يتولد في داخله
اما ريتان امتنعت عن الطعام وقررت عدم الخضوع لاوامر رامز الا
بعد تنفيذ شرطها وهو رؤيه رائد
ورائد
الاكسجين لم يتبقى منه الكثير
يشعر بنعمه كل نفس
وهو ينظر الى لحظة فقدانه للحياه ..


عند ريتان .. مستلقيه ع السرير الواسع ومنحنيه على نفسها بتفكير مُشتت
بمجرد شعورها بدخول رامز
نهضت لتجلس بهدوء
وتصد عنه للجهه الاخرى بتطنيش مثلما فعلت طوال الثلاثه الايام الماضيه
همس لها ببطء : والنهايه ؟
ريتان ماردت
رامز قرب لها ووقف مقابلها : اليوم بيجيء مسؤولين كبار وبيصير
بيني وبينهم صفقه مُربحه وكل واحد معه زوجته او حبيبته
طبيعي ماراح ارضى اخرج بشكل غير عن المألوف رامز التاجر الكبير مو متزوج او ما يحب اليوم ابيك معي ابيك شكل وروح
رفعت نظراتها له وصدت
مسك فكها بقوه ولف وجهها له : انا اتكلم
ريتان ببحه : وانا قلت لك شرطي
رامز ابتسم : يعني لو شفتيه راح تستقبلين ضيوفي ؟
ريتان ابتسمت ببرود : افا عليك ! وارحب فيهم بعد
رامز تجمدت ملامحه وعقد حواجبه : ريتان
ريتان رفعت راسها له وارتجفت برعب من نظراته لكن حاولت تحافظ على ثبات ملامحها ونظراتها
رامز بحده : لو فكرتي تطيحين وجهي قدام ضيوفي مسحت بوجهك هالارض وخليت مصيرك مثل رائد
ريتان انكتمت انفاسها : وش مصيره ؟
رامز بمكر اشر للباب : روحي شوفيه
ريتان وقفت واتجهت للباب
وثواني ووقفت والتفتت له قبل تطلع : وينه ؟
رامز مشى وراها : بروح معك له
وقفت تنتظره يتجاوزها ماتبي يمشي وراها تحس انه بيغدر فيها
خرجوا من المستودع للمستودع الاخر
ونظرات الحراس وغمزتهم لبعض مافاتت ريتان اللي خافت اكثر ...

البارت 140


دخلوا للمستودع الثاني وقرب لهم راشد : هلا طال عمرك
رامز : رائد باقي له حياه ؟
راشد : ممكن ربع ساعه او نص بالكثير وتنتهي اسطوانه الاكسجين
ريتان عقدت حواجبها بدون فهم لكلامهم
مشى رامز وهو يتكلم بثقه : تعالي
مشت وراه بربكة ووقفوا في غرفه فيها اسطوانات كبيره وطويله لونها ابيض اشبه بطفايات الحريق لكن بأحجام
ضخمه وطويله
رامز بتفكير : كيف ندخله جوا !
راشد تنهد : الله يعين بشيل وحده
رامز ضحك : بسرعه لبسها وخليها تدخل تشوفه
ربع ساعه بس
راشد ضحك : اخاف يقول لها وصيته
رامز التفت لريتان : على طاري الوصيه ذكريني اقولك شيء عن وصيه ابوك
ريتان تجمدت ملامحها وعيونها مثبته بعيونه
: وش وصيته !
رامز ضحك : قلت ذكريني يعني مو الحين
ريتان سكتت وهي تشوف راشد يقرب لها ويضع القناع بعناية لتغطية الفم والأنف وربطه بأمان للحد إلى أدنى مستوى من الثغرات بين الوجه والقناع ومن ثُم وصله بأنبوبة غاز الاكسجين
ريتان بهمس : ليش البسه ؟
راشد رفع عيونه لرامز كان برا الغرفه ويكلم بجواله
تكلم بهمس : توقعتك تكلمين رامز المهم الغرفه اللي فيها رائد فيها غاز
سام لو شميتيه بيأثر عليك على طول عشان كذا نحميك بالقناع
ريتان تجمدت ملامحها وحست قلبها انقبض
غاز سام !!! بلعت ريقها بصعوبه وهي تحس
بدموعها تتجمع بعيونها
راشد شال اسطوانه الغاز : يلا تعالي
مشى لداخل الغرفه وهو ماسك اسطوانتين
الاكسجين الخاصه فيه وحقت ريتان
بمجرد دخولهم وقفت ريتان
ولونها بهت بصدمه من شكل رائد
الغرفه ثلج ولونه يميل للبيج او الرصاصي وضباب يتوسطها سرير حديدي بجانبه اسطوانه الاكسجين
ورائد مستلقي على السرير وكفوفه مثبته
على السرير بحديد
ورجوله كمان ولابس مثل ملابس
المستشفيات رداء خفيف جداً
وملامحه مختفيه وراء القناع قربت له بسرعه وراشد ركض وراها بالاكسجين وخايف ينقطع الانبوب
وقفت جنب السرير ورائد مغمض عيونه مدت كفها له ببطء ومسحت
بسبابتها بين حاجبيه
عقد حواجبه وفتح عيونه ببطء ورجع
يغمض بلا حول ولا قوه
جلست جنبه وهي ترتجف بصدمه
وخوف ورعب اول مره بحياتها تعيش مثل هالشعور
بيموت واضح بيموت خلاص مافي امل للنجاه
التفتت لراشد وهي تشهق : بيموت
راشد ابتسم وهو خارج وتاركها لحالها مع رائد ..
جلست جنب رائد وهي تضم كفه بين كفوفها : امانه تكلم ، قول شيء
رائد انت بخير
ضغط على يدها وابتسم
انحنت على كتفه وهي تجهش بالبكاء
ضغط بقوه على اصبعها ورفعت راسها له
كان يناظرها بحده مخلوطه بعتب
همست له : تعبت والله العظيم
اشر لها بعيونه ع الباب
همست : رامز !!
هز راسه وهي تنهدت : ليش ماتتكلم
ابتسم لها وغمز بعينه
اردفت بأستغراب :مافهمتك بس رامز يكلم بجواله وراشد مدري وين انقلع
رائد غمض وهو يحس بالاكسجين يقل
ريتان ناظرته شوي وبهمس : رائد
تدري ان هنا غاز سام ؟
الاكسجين اللي عندك مابقى شيء وينتهي
رائد ناظرها بأستغراب وهو يشوفها توقف وتنحني عليه
ابتسمت ووجهها مقابل وجهه : الاكسجين اللي عندي توهم يفتحون
بعطيك اياه واخذ اللي عندك
رائد توسعت عيونه وهو يشوفها تنزع القناع وتكتم انفاسها وهي تقرب له
بسرعه تنزع قناعه وتثبت اللي عندها على فمه وتلبس الخاص فيه
بمجرد ما انتهت من تثبيت قناعها
ضحكت بفرحه
ورائد متجمد مكانه ويبتسم
ركبت قناعه ونزلت راسها قريب له وهي تتنفس ببطء وتحس ببروده اطراف رائد ووجهه اللي شوي ويتجمد قربت لجبينه اكثر وهي تطبع قُبله فوقه بعمق
وتبعد وعيونها تنطق الحسره
همست له بخفه : مادخلت عندك الا بعد
شروط ومواثيق رامز عازم ناس اليوم ويقول مهمين وبينهم صفقه وكلام طويل وشرطه عشان
اشوفك اطلع عندهم وانا بضطر اطلع بس ماحبيت اروح دون ما اقول لك رائد حاول تلقى مخرج انت وين هربت وش سويت ؟؟
قول لي!
رائد مسك ايدها وهو يكتب بخفه بسبابته : اليوم
ريتان : وش اليوم ؟؟
رائد تجمدت ملامحه وعيونه ع الباب
التفتت وراها وشافت
راشد واقف : خلصتي ! طويل العمر يطلبك
ريتان التفتت لرائد وهز راسه بالموافقه
تنهدت ببطء وناظرت راشد : خلصت
وقفت وراشد قرب لها عشان ياخذ اسطوانه الاكسجين وتجمدت ملامح ريتان
بخوف اكيد اذا شالها بتكون خفيفه
عكس الاولى بحركة سريعه رمت قناعها عليه
وركضت للباب وطلعت
وراشد مصدوم ركض وراها بسرعه وقفل الباب ..

البارت 141


الرياض.. تحديداً في الفندق
'
الجوء غير رقص وحماس
وام مصطفى تشعل الجوء بالزغاريط و" لمى " رقص وماخذه الجو والمسؤولات عن التوزيعات والقهوه
" رغد " رفا " شهد "
قايمين بعملهم بالشكل الكامل
ومنار صديقة ختام كل شوي تمر بالبخور وتجدده
توقف الصوت فجاءه
وبدأت المغنيه البندري تغني اغنيه خاصه لاهل المعرس فور دخولهم
وام الماس ترحب فيهم وتضحك لهم وشايلتهم شيل
والماس مصدومه من امها
ومصدومه اكثر من خالها مروان
كلمت وحده من صديقاتها اسمها ساره وارسلت لها عنوان قصر اخوالها وطلبتها تراقبه ووقت خروج مروان تدق عليها لكن ساره كل شوي تكلمها وتبلغها انه
جالس في الحديقه الخاصه بالبيت ولابس بجامه بعد ويتقهوى
هنا ارتاحت وايقنت ان اهلها يتغيرون للافضل ...


عند ام خالد وبُشرى
دخلوا للقاعه ومعهم جيرانهم وصديقات بُشرى وانعجبوا من حفاوتهم في الترحيب وجمال الاستقبال
ام خالد بهمس لبُشرى : ماشاء الله شكل العائله كلها صدورهم شرحه ووسيعه مثل ختام الحمدلله
بُشرى ابتسمت : ايه، ماشاء الله
فتحت جوالها وهي تشوف اشعار رساله من خالد " ختام تقول ادخل "
بُشرى ضحكت وردت بسرعه " طيب ادخل "
التفتت حولها تناظر الحضور
وقدامها في الطاوله الاولى بنات جالسين ويشربون شاي ومعهم
فصفص
عقدت حواجبها وهي تناظرهم بأستغراب
" واضح جايين سوالف بس "
انتبهت الماس لنظرات بُشرى وبسرعه تقدمت للطاوله الاولى " صديقاتها طبعاً" تطلبهم يعدلون من جلستهم ومايناظرون ناحيه
اهل خالد
ووصلتها ردودهم بالضحك والبرود ( وسن ) وش فيها ؟ ( منى ) ترى عادي ( رُبى ) الماس فليها ي بنت ..


عند الرجال ..
بمجرد دخولهم ارتفع ترحيب ابو الماس
وابتسامه بارده تغطي وجهه
وخالد ارتبك اكثر مجرد ماشافه وبجنبه الشيخ
سلموا وجلسوا ومر عليهم اثنين بالقهوه والبخور
عُمر بنص عين : الله الله عريس ؟
خالد توتر وهو يشوف الشيخ يكلم ابو الماس : اسكت امانه
ضحك عُمر وهو يمسك كف خالد ويعدل ساعته
ويحط بوسط كفه مسباح احمر
ابتسم خالد وبانت اسنانه
ابو الماس : الله يحيكم والله ي زيارتكم
زادتني شرف واسعدتني
وانت ي خالد اعرفك ومكانتك عندي مثل ولدي وانت تدري
خالد سكت وملامحه جامده
ابو الماس : انت جيت وطلبت البنت مني
وانا وافقت وهي وافقت
لكن تعرف البنات هاليومين حتى في عقد
الزواج يبون يسوون حفله وفرح فـ سويتها لاجل خاطر بنتي والشيخ الحين هنا وموجود وما اقول غير الله يتمم لكم على خير
الحضور بصوت واحد " امين "
ابو الماس مسك ايد خالد اللي جالس جنبه : اللحين اذا ماعندك مانع ابيك تقوم معي وندخل لاجل نكتب العقد
خالد وقف بسرعه معه : الشور شورك
دخلوا لداخل الفندق وجلسوا يكملوا اجراءات العقد
وخالد متوتر ويجاوب بربكة
وابو الماس يضحكك
اعطاهم بطايقه وكملوا كل شيء ومابقى غير توقيع ختام وموافقتها
ابو الماس : انا بطلع لها دقيقه وراجع
اتجه للاصنصير وطلع فوق عند ختام واول ما انفتح الاصنصير
شافها
جالسه ع الاريكة وتتأمل مناكيرها وقفت بتوتر وضمت كفوفها لبعض
ابتسم لها وقرب : والله وكبرتي وصرتي عروس
ختام ابتسمت بحياء : شكراً عمو
باس جبينها وفتح لها الكتاب توقع
بمجرد ماقرت اسم خالد وشافت توقيعه حست بتوتر فضيع
اخذ عمها الكتاب وابتسم لها : الله يوفقك نزل من عندها واعطى الشيخ
وطلع هو واياه
وخالد جلس ينتظر ختام ..

البارت 142


انتبه للباب المقابل له ينفتح
ويدخلون بنات كثير
بعبايتهم وماسكين ورد واكياس هدايا وقف وهو
مصدوم من دخولهم وبمجرد تفكيره بالخروج انفتح باب الاصنصير
وارتفعت اهازيج الفرح
تجمدت ملامحه من شاف ختام طالعه من الاصنصير وتتجه
له بهدوء وابتسامه صغيره تتسلل لمُحياها
رمش ببطء وهو يهمس : ماشاء الله
ابتسمت وصدت عنه بوجهها وهي تضحك
قرب لها وابتسم : مبروك علي وجودك بحياتي
ختام بنظرات عميقه : يبارك بأيامي وايامك مع بعض وللابد
خالد تنهد وهو مفهي فيها
ضحكت وهي تبعد عنه شوي ويرتفع صوت دبكة شاميه
ويدخلون بنات صغار وهي مقابلتهم
ورقصوا مع بعض
وصوت ضحكات ختام عالي
وخالد تحمس معها وبلا شعور اتجه لها ومسك ايدها يكمل معها
ويحركون رجولهم بنفس اللحظه
والوقفات كلها بنفس الوقت
لدرجة ان البعض شك انهم متدربين مع بعض من قبل
انتهت الدبكة وانفاس ختام ترتفع وتنخفض
بسرعه
ضحك خالد وقرب لها وهو يبوس خدها برقه: عاشت بنت سوريا
ابتسمت ختام وارتفع صوت التصفيق والصراخ
التفت خالد وانتبه لبُشرى تغمز له
عض شفته وصد : لا بالله بُشرى الحين فرحانه بالعقد اكثر مني
ختام ابتسمت : بعد عمري هي
خالد بوله : بعد عمري انتي
ضحكت ختام وهي تلتفت للبنات اللي يضحكون ويصارخون
خالد بأحراج : انا بطلع
احس شكلي خطأ هنا
ختام بأستغراب : ليش ؟
مسكت كفه بين كفوفها : بننزف مع بعض
خالد برفض : لا ختام
وبنظرات حانيه تأملها : لا تاخذين بخاطرك علي !
ختام ابتسمت : براحتك
خالد همس : بطلع
ختام عقدت حواجبها وببراءه تكلمت : وين الدبله ؟
خالد ضحك وغمز لها : بعدين انا وانتي بس مانبي متطفلين ع حياتنا
ختام بحماس هزت راسها بالايجاب
طلع من عندها بسرعه
وهي التفتت للبنات تستعد للزفه للقاعه الخارجيه
وبُشرى قربت لها سلمت عليها وباركت لها وحصنتها وهي تحس
بدموعها بتنزل مو مصدقه خالد الصغير المشاغب يتزوج !!!! صدق كبرنا ي دنيا ..

بعد عشر دقائق بدت عازفة البيانو بالعزف
خرجت بخطوات هادئه تضم بكفها مجموعه صغيره من زهره الاقحوان
التي ترمز " للسعاده" و " الاخلاص"
ونظراتها واثقه تشع بالفرح والسرور لا تنكر ان هذه الليله من اجمل ليالي حياتها
فـ بعد فراق والدها لم يكتب لها يوم اجمل من هذا
وصلت لنصف المسافه وبدأت المطربه
بـ غناء زفتها اختارت الكلمات بعنايه شديده كانت تشعر ان خالد
حقاً العوض الجميل في يُتمها وحرمانها من ابوها
وفي ظل فقدان امها واختفأها المفاجئ
وموت اخوها
بمجرد وصولها لمكان جلوسها التفتت للحضور
وهي تبتسسم وترفع كفها والورد فيه وترميه عليهم
والبنات يصارخون وكل وحده تحاول تمسكه
ارتفعت ضحكات ختام بعمق شديد و رقه لامتناهيه وهي تشوف الورد
تمسكه بُشرى وهي تتنفس بقوه ووجهها احمر
وبنتها في ايدها تبكي
ومازالت تحارب تبي الورد
تكلمت وحده من الحضور وهي تخزها
بنظراتها : متزوجه وبنتك كانت بتموت في
ايدك جايه تحاربين على الورد ليه
بُشرى بتقليد للبنت فالصوت والنبره هفت الورد ع وجهها وتكلمت :
كيفي
تجاوزتها وهي ترجع تجلس جنب امها
وتبتسم بفخر انها اخذتها
وتحاول تسكت بنتها اللي انفجعت من ركض امها وبكت
ارتفع صوت المطربه بكلمات رقيقه
وناعمه ترافقها ايقاعات متناسقه
والاضاءه تتثبت ع باب القاعه
ختام انكتمت انفاسها بخوف وقلق وهي مو مقرره لكذا وش صار !!!
التفتت للمطربه تبيها تنتبه لها توضح لها ع الاقل لكن كانت مغمضه عيونها وتغني بذمه
وضمير
دخلت سيده انيقه للغايه ترتدي فستان كحلي
اقتربت من ختام وهي تبتسم بثقه وخلفها فتاه في بداية العشرينات
بملامح رقيقه ترتدي فستان اسود
يبرز اناقتها
بمجرد وقوف السيده امام ختام نهضت لتقف هي الاخرى وملامحها
تثير الشفقه من شدة صدمتها
همست ببطء : امــ..ـي !!

البارت 143


انبح صوتها وهي تناظرها بصدمه كم سنه مرت !
كم ! مو يوم او يومين
سنين انا انحرمت سنين
حيه !! كيف جات ؟ كيف عرفت وبكامل زينتها ؟ يعني ماكانت مريضه ولا مجبوره ع فراقي ؟
انتظرتها تتكلم تبي تتأكد هي فعلاً او مشبه بسبب تعطشها الشديد
لوالدتها بسبب حاجتها المُلحه هذا اليوم
خوفها وقلقها وربكتها
احتاجتها ورب البيت احتاجك ي يمه
ام ختام ابتسمت بحنيه : ايه ماما انا جيت
ختام بنفور ابتعدت عنها وهي تدفها وتتجاوزها وتخرج بسرعه من القاعه وانفاسها سريعه تكاد ان تفيض
بروحها والحضور في دهشه مما حدث
ام ختام بتوتر التفتت للخلف همست لها " تغريد " بنت اختها : صار خير خالتي من سنين ماشافتك طبيعي بتنصدم
ام ختام هزت راسها بالايجاب وخرجت وراء ختام وهي تبي تهديها جات عشانها عشان
فرحتها ماتبي تخرب ليلة عمرها
قابلتها الماس اللي استغربت وجودها :
مين انتي ؟ وليش طلعتي فجاءه عند ختام ؟
ام ختام صمتت لثواني ثم اردفت بهدوء : الماس صح !
الماس تجمدت ملامحها خوف انها ساحره او تدور مشاكل : من انتي !
ام ختام ابتسمت برقه : تشبهين الصوره مو متغيره كثيره
الماس شهقت بروعه : صورتي ! وين شفتيها ؟ تكلمي
ام ختام تركتها وهي تتجه للاصنصير
وام الماس تقرب لبنتها : شفيك ؟ من ذي ؟
الماس بخوف : مدري تقول اني اشبه الصوره
صوري عندها يمه
ام الماس سكتت لثواني ثم همست : تشبه ام ختام تتوقعين هي ؟
احمرت ملامحها بغضب : وش جابها ؟ سراقة الرجاجيل كانت عيونها
ع ابوك بعد وفاة عمك لو تكون هي ذبحتها عند بنتها
لحقت ام ختام بسرعه وهي معصبه
والماس ماتدري وش تسوي تروح وراهم او ترجع تعدل الوضع
اللي داخل القاعه ..


فوق قفلت ختام وهي ترتجف مو مصدقه جيتها المفروض تفرح ؟ لا هي خافت
ومو شوي الا كثير جيتها ماتطمن ابد
اندق الباب وتكلمت بحده : من ؟
همست : انا افتحي
فتحت الباب وتكتفت : نعم ؟ وش جايبك ابي اسالك كم عمري ؟ والا اقول تدرين ان اخوي خالد مات !
ضحكت بسخريه وعيونها بعيون امها
ام ختام بحنيه هزت راسها بالنفي : حبيبي ختام ماتركتك بكيفي
لا وربي ترى الدنيا هي اللي اجبرتني عشان ما ارجع سوريا انجبرت اتركك عشان اجلس معك ببلد واحد اتاكد من صحتك من وقت لثاني ماما ختام ترى انتي بنتي وحبيبتي
صدت ختام وهي تكتم دموعها : ما ابي تكلميني ..


عند الرجال ..
سوالف عامه يشترك فيها الجميع اقترب طفل في الرابعه من عمره
وهو يبتسم لابو الماس وجلس جنبه وهو يبوس كفه بعمق ويميل لحضنه
خالد بأستغراب ناظره والتفت لعُمر : شوف هالصغير من تتوقع يكون !
عُمر : يمكن ولده
خالد بأستنكار : لا ماعنده الا بنت
تكلم احد الموجودين : هذا ولدك ؟
كبر ماشاء الله
ابو الماس ابتسم بثقه : ايه سندي وعضيدي
تجهمت ملامح خالد وهو يحس فيه شيء خطأ
خير !!! ختام تقول ماعنده الا بنت
وزوجته ماتقدر تجيب عيال خلاص معقوله متزوج وحده ثانيه ؟
بس ماقد تكلمت عنها !!! انتبه للاشعارات الكثيره بهاتفه اخرجه
وفتحه بسرعه
كلها من " ختام الهوى"
قراها بشكل سريع وهو ملامحه متجمده " تعال بسرعه "
" انا بطلع "
" بتجي !!! "
" بروح لوحدي خلاص لا تجي "
قرب لابو الماس وهو يهمس له انه صار ظرف عند اهله وضروري
يطلع استغرب وسمح له وبسرعه خرج
وعُمر يناظره بأستغراب ! وين راح ذا ؟
اتجه لقسم النساء ودق عليها
وصله صوتها مكتوم ووراها صراخ : خالد تعال فوق ماخلوني انزل
انجن جنونه وهو يسمع سب وشتم وصراخ عندها
وبدون تفكير دخل وطلع الاصنصير
وانفتح بالدور الثالث
قابلته عامله من اللي فالفندق : نعم !
تكلم بتوتر : ءء عروس وين ؟
ناظرته كيف كاشخ وابتسمت : انت عريس ؟
بالدور الرابع الجناح الثالث
شكرها بسرعه ورجع للاصنصير
وطلع لختام
انفتح الاصنصير وشاف قدامه بنت تبكي وثنتين كل وحده تشد شعر
الثانيه وحده تسب والثانيه تبكي
ارتفع صوته : ي ولد
التفتوا له بسرعه ودخلوا للجناح
وختام طلعت : خالد !!!
ركضت له بسرعه وهي تلبس حجابها بأهمال : خلنا نطلع
خرجت وحده من اللي دخلوا
وهي تتكلم بحده : ختام تعالي هنا
ختام مسكت كف خالد وهي منزله راسها وشدت عليه
قرب منها ورفع راسها له وهو يناظر بعيونها
وتجمدت ملامحه : تبكين !!!
رمش بسرعه والتفت للي واقفه قدامه
تبي تشد ختام وتاخذها
دفها وهو يزفر بغضب : خير ؟ انقلعي داخل احسن لك
تكلمت بنص عين : ترى مامتها انا مو من حقك تمنعني وانتي يلا ادخلي
نتكلم زي الناس والاوادم فشلتينا انتي وزوجة عمك
ختام هزت راسها بالنفي دون ماتناظرها : ماما ماتت ..

البارت 144


ام ختام شهقت : ختام !!! تعالي اقولك اللي صار افهمك اسبابي
ختام بكت وهي تتمسك في خالد اكثر : امانه طلعني ماابيها ما ابيها
سحبها معه بسرعه ودخلوا للاصنصير وهو يسمع ام ختام تتوعدها انها تكلم عمها
شد ختام لحضنه بقوه وهو يبوس راسها : خلاص اهدي اتحداها تقرب منك
انفتح الاصنصير وظهرت بُشرى امامه وشهقت : يمه احسبك رجال
خالد بنص عين : نعم ؟ ووش انا يعني ؟
بُشرى التفتت لختام : ليش طلعتي باقي بدايه الحفله
ختام صدت عنها بعيونها ماتبي تشوفها تبكي
وخالد بمزح : وش تبي فيكم بتطلع معي وانتي ارجعي مع زوجك ولاتنسون امي لا افقع عيونكم
بُشرى : لا لا كذا من البدايه ؟ تسرقين
ولدنا
ضحكت ختام وخالد طلع معها من الاصنصير
وهو يودع بُشرى .


في تبوك ..
ام ريتان نزلت جوالها وهي تتنهد بقلق كم مر على بنتها ماترد ولا تكلمها ؟
يعني حتى لو قلبها مخلوق من الحجر كان لان وكلمتني اكيد فيه شيء ولا ريتان بنتي مابترضى
علي بالخوف والوجع وانا انتظرها
انتبهت للباب ينفتح وروز تدخل طرف راسها : يمه صاحيه ؟
ام ريتان ابتسمت : ايه تعالي
روز ضحكت ودخلت : بس ابي نسولف شوي اذا فاضيه
ام ريتان بنص عين : وش سالفتك اليوم ؟
روز بنظرات طويله : عُمر قال لي شيء قبل يسافر للرياض وقال امانه وصلي العلم لأمي
ام ريتان عدلت جلستها وقلبها ينبض بخوف : وش ! صار شيء !!!
روز : لا لا تطمني بس يبيني اكلمك بموضوع صغير
ام ريتان تنفست براحه : وشو ؟
روز قربت لامها وجلست جنبها : يبي يتزوج ويبي رضاك
ام ريتان تنهدت وصدت : رويزه اطلعي وقفلي الباب اجل انا تبون انهان قدام
نوره ! ترى صح تصالحنا بس مع هذا ما ابغى ازوج ولدي بنتها لو كانت
اخر وحده بالعالم ..
روز بصدمه : شدعوه يمه ! ترى مسكينه وعسل وربي يعني بتشيلك شيل
وواضح عُمر يحبها حرام نوقف بوجههم
ام ريتان سكتت
روز بحسره : اجل تبينه ضايع مع وحده مانعرفها؟ مثل ريتان؟ سُعاد عندنا ونعرفها ويتيمه مالها احد وعُمر فيه الخير تخيل احد ثاني ياخذها ويجور عليها وابوها متوفي مالها احد وماعندها اخوان انا ربي اعطاني عُمر سند لي بعد ابوي بس سُعاد ؟
وترى مو اكبر منه بكثير بس سنتين ماتفرق
وقفت وهي تنحني على امها وتبوس راسها : فديتك لاتفكرين الا فالشيء اللي يبيه عُمر ترى ماعندنا الا عُمر واحد


في هولندا ..

بمجرد خروج ريتان عنه اخذ نفس عميق نفس هالقناع كان على وجهها
كانت تتنفس من هنا
من نفس الانبوبه ونفس الاكسجين
شوفتها ردت له الروح
كان بلحظة بيضعف وممكن يموت وهو مانفذ خطته عشان اخوه عشان صلة الدم اللي بينهم
حنّ واشفق على رامز ورامز ما اشفق
عليه
ابتسم وعقد حواجبه وهو يغمض وخيالها يطري لباله صح انه ماشافها بوضوح يحس
بضباب على عيونه بفعل الغاز السام لكن المهم انه شافها شكلها فيه شيء غريب ! شيء عجز
يعرفه ؟
تجمدت ملامحه وفتح بسرعه وهو يهمس ببطء : شعرها !!!!
بمجرد نطقه لحرف الراء
اصطدمت لسانه بالجهاز المثبت
اعلى فمه من الداخل
وارتفعت صافرات الانذار في مكان آخر نتيجة مافعل ...


عند ريتان ..
بعد نص ساعه ..
تنهدت وعدلت بدلتها البيضاء الرسميه " المختاره من قِبل رامز "
وخرجت بسرعه : راشد راشد
راشد اتجه لها : نعم ! ناقصك شيء
ريتان بهمس مخنوق وتمثيل متقن : انا اذا طلعت مع رامز الحين مستحيل اتجرأ ارفع عيني بعين رائد مره ثانيه عشان كذا طلبتك راشد بشوفه دقيقه بس
حتى لا تركب لي اكسجين بدخل اشوفه ثواني واطلع
راشد تأفف وهو يسمع اصوات الاغاني ترتفع
دليل على بدء الحفله
والنيران تتوهج خلف المستودع وتعكس
الشبابيك نورها
اشر بيده بتحذير : بسرعه وبدون اكسجين
مافيني حيل اشيله
ريتان : ايه
اشر لها راشد تتبعه وطلعوا بسرعه لمستودع الحراسه اللي فيه رائد وريتان تبتسم بفرح
وهي تضم مشبك شعر في باطن كفها
وتحاول تخفيه عن انظار راشد اللي مستعجل ويحاول ينتهي هو وريتان قبل يشوفهم رامز
او بتكون نهايته ، دخلوا للمستودع ووقفوا
عند الباب
راشد التفت لريتان : بسرعه ثواني او بتودعين روحك من السم اللي داخل
ريتان هزت راسها بالايجاب
واخذت نفس عميق وراشد فتح الباب ودخلت ..

البارت 145


ركضت لرائد وهي كاتمه انفاسها وبدون شعور ابتسمت وابتسم لها وهو يهمس : اشتقت
فتحت كف ايده بسرعه وتحط مشبك الشعر وتركض برا وتحس روحها بتطلع
اخذت نفس عميق وراشد قفل الباب : والنهايه ؟ وش استفدتي الحين !!!!
ريتان تتنفس بقوه : الاكسجين شكله بيخلص عليه
راشد ضحك : ادري وكويس انك شفتي الوضع
ريتان ناظرته بحده : انت رامز ماخذك لعبه عنده اصلاً لو عندك مثقال ذره بس رأي وكبرياء كان
ماتجرأ يأمرك ويحرك زيك زي اللعبه
راشد ابتسم وهو يخفي قهره من كلامها : ماتقدرين توترين علاقتي انا و رامز حاول رائد قبلك وشفتي كيف
صار وضعه تبين تصيرين مثله !
ريتان بلعت ريقها ببطء وعيونها بعيونه
ابتسم ثواني واتسعت ابتسامته وضحك وهو يطلع
مشت وراه بربكة متجهين لموقع الحفله وصراخ واصوات ولغات غريبه
حتى النبره تقدر ريتان اهمية وجودها وكل ما هُنا خبيث ، نجس
نيران مشتعله في الخارج واحتفالات ومُهرجين
ومجموعة راقصات وطاولات موزعه في المكان ويجلس عليها عدد كبير من الاشخاص
توقف راشد وتوقفت خلفه برهبه من المكان
واللحظه والاشخاص وكل شيء
اقترب منهم رامز وفتح كفه ومدها لريتان : اهلاً نورتي المكان بوجودك
يا عين رامز
ريتان ارتجفت وهي ترفع كفه عنها
وراشد يناظرها بحده ومخرج طرف سلاحه من جاكيته في حال رفضت دعوه رامز
بخطوات هادئه اتجهت للطاوله المقابله لهم ورامز يرحب بضيوفه
وواضح في وجهه الفرح
والسرور
ومجموعه رجال بملابس انيقه للغايه بدلات سوداء جلد اوكُحليه غامقه
مصنوعه من الجلد ايضاً
وسيجاراتهم الالكترونيه يتلاعبون بها بين شفاههم
سحب رامز الكرسي وابتسم لها
جلست وهي مرتبكة
جلس بجوارها وريتان بلعت ريقها الجاف ولا تشعر بشيء اعظم من هذا اكبر الكبائر امامها
كُفار ومتبرجات وخمور وعلاقات خاطئه و عقول
ملطخة بالنجاسه والقُبح ..
ابتسم رامز لريتان :داخلين مشروع قوي تدرين لو نجح مستحيل اي شخص بالعالم يقدر يوقفني حتى اصحاب الاماكن المرموقه يصيرون صفر على الشمال ما احد بيعطيهم
وجه ولا احد يبي منهم اي شيء لان الشيء اللي داخل له انا بينقذ البشريه من كل شيء ممكن يسبب لها ضيقه
او زعل بس ..
ريتان بدهشه من كلامه : وش ذا ؟
رامز بفخر : بتشوفينه وانتي بنفسك راح توقفين بصفي اقترب خمسة رجال منهم وكل واحد فيهم يحمل بين كفوفه شنطة ضخمه حديديه نزلوها على الطاوله
ورامز بنص عين : بس ذي !
رد الشاب اللي مقابله : الشاحنه بطريقها
الى هنا
ابتسم رامز وفتح الشنطه
وريتان كتمت انفاسها وعيونها توسعت وهي تشوف اسلحه كثيره من انواع متعدده ولها الوان ايضاً
انتبه لها رامز وان بالها مو معهم مسك ايدها والتفت له زي المقروصه : نعم !
رامز ابتسم : جبت واحد احمر لك
ريتان بقلة استيعاب : وش ؟ الاحمر
رامز اشر للسلاح الانيق امامها : زي هذا بس احمر
ريتان ابتسمت بصدمه وهي شوي وتبكي
هزت راسها بالنفي : مابيه
رامز ابتسم اكثر من شاف ابتسامتها وبانت اسنانه : والله ان تاخذينه
ريتان بشهقه وعيونها كلها دموع : لا لا انا مابيه والله مابيه
رامز ناظرها بأستغراب : اوك براحتك
صد عنها وهو يأشر لراشد قرب لهم : نعم طال عمرك
رامز : المكان مراقبينه !
انتبه لا يجي احد فجاءه
راشد : تطمن كل شيء تحت السيطره
رامز التفت للرجل امامه : كم قلت لي حسابك ؟
ريتان التفتت للمستودع خلفها
الموجود فيه رائد وهي تناظره بصمت وتفكير
لو احد جاء من الشرطه بنروح فيها كلنا رامز بيورطنا
تنهدت وناظرت رامز اللي
يبي يتبادل معهم بين شحنه خمور وشحنه اسلحه والظاهر وافقوا والاسلحه اللي جات عربون .